ក្រុមបាល់ទាត់ម្ចាស់ផ្ទះសហរដ្ឋអាមេរិកបើកយុទ្ធនាការប្រកួតកីឡាបាល់ទាត់ពិភពលោកដោយបានយកឈ្នះប៉ារ៉ាហ្កាយ ៤ទល់នឹង១ ក្នុងពូល D ព្រឹកថ្ងៃសៅរ៍នេះនៅពហុកីឡដ្ឋាន SoFi នៅឡូសអែនជឺឡេស។

លេងបាន ៧នាទីកីឡាករប៉ារ៉ាហ្កាយ Damian BOBADILLA ធ្វើឱ្យមាកកំហុសចូលទីខ្លួនឯង មុនពេលកីឡាករ Folarin BALOGUN រកបានពីរគ្រាប់តែឯងនាទីទី៣១ និងនាទីទី៤៥។ ចប់វគ្គទី១អាមេរិកនាំមុខប៉ារ៉ាហ្កាយ ៣ទល់នឹង០។
ក្នុងវគ្គទី២នាទីទី៧៣ ប៉ារ៉ាហ្កាយវាយបកបានមួយគ្រាប់វិញដោយកីឡាករ MAURICIO។ តែយ៉ាងណាក៏ដោយមុនបញ្ចប់ការប្រកួត ពីមុខអ្នកគាំទ្ររបស់ខ្លួនជាង៧០ ០០០នាក់ អាមេរិកបន្ថែមបានមួយគ្រាប់ទៀតដោយកីឡាករ Giovanni REYNA នាទីទី៩០បូក៨។ ចប់ការប្រកួតអាមេរិកឈ្នះ ប៉ារ៉ាហ្កាយ ៤ទល់នឹង១។
មួយប្រកួតទៀតក្នុងពូល D ត្រូវលេងនៅព្រឹកថ្ងៃទី១៤ ខែមិថុនា ម៉ោង១១និង០០នាទីដោយ អូស្ត្រាលី ប្រកួតជាមួយតួកគី៕



