នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្តេចធិបតី និងលោកជំទាវបណ្ឌិត អញ្ជើញមកដល់អាកាសយានដ្ឋានអន្តរជាតិតេជោ ប្រកបដោយសុវត្ថិភាព
សម្ដេចធិបតី៖គ្រប់គោលនយោបាយដែលយើងបង្កើតឡើង ត្រូវចងចាំជានិច្ចថា «វិបុលភាពដែលមានអត្ថន័យលុះត្រាតែបម្រើដល់ប្រជាជន»
សម្ដេចធិបតី៖ទស្សនៈដែលថា រដ្ឋជាមាជិកមួយអាចពឹងផ្អែកលើខ្លួនឯងទាំងស្រុងនៅក្នុងខ្សែច្រវាក់ផ្គត់ផ្គង់ទាំងមូលគឺជាការគិតបែបស្រមៃប៉ុណ្ណោះ
សម្តេចធិបតី និងលោកជំទាវបណ្ឌិត អញ្ជើញនិវត្តន៍ពីទីក្រុងហាណូយ បន្ទាប់ពីបានចូលរួមវេទិកាអនាគតរបស់អាស៊ានលើកទី៣ និងទស្សនកិច្ចផ្លូវការនៅវៀតណាម

នយោបាយ​ និង ការអភិវឌ្ឍន៍

សម្តេចធិបតី៖ អ្នកសារព័ត៌មានដែលគោរពវិជ្ជាជីវៈប្រៀបបានជាកញ្ចក់ឆ្លុះបញ្ចាំងដ៏មានប្រសិទ្ធភាព អំពីបញ្ហាសង្គម

2024/05/03 09:01:07 am        218
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា អ្នកសារព័ត៌មាន​អាជីព ដែលគោរពវិជ្ជាជីវៈ ប្រៀបបានដូចជាកញ្ចក់ឆ្លុះបញ្ចាំង​ដ៏មានប្រសិទ្ធភាពអំពីបញ្ហា​សង្គមយ៉ាង​ដូច្នេះដែរ ហើយសម្តេច​បានមើលឃើញថា លំហសេរីភាពសារព័ត៌មាន នៅកម្ពុជា​នាពេលបច្ចុប្បន្នកាន់តែរីកចម្រើនធំធាត់ប្រកបដោយសុខភាពល្អ និងឆ្ពោះទៅរកការរៀបចំបាន​នូវសណ្តាប់ធ្នាប់ល្អប្រសើរផងដែរ។តាមរយៈសារលិខិតក្នុងឱកាសទិវាសេរីភាពសារព័ត៌មានពិភពលោក លើកទី៣១ នៅថ្ងៃទី៣ ខែឧសភា ឆ្នាំ២០២៤នេះ ​ក្រោមប្រធានបទ««សារព័ត៌មានសម្រាប់ផែនដី៖ សារព័ត៌មាន​ក្នុងស្ថានភាព ​នៃវិបត្តិបរិស្ថាន» សម្តេចធិបតី ហ៊ុន ម៉ាណែត ​បានបញ្ជាក់ថា«អ្នកសារព័ត៌មានអាជីព ដែល​គោរពវិជ្ជាជីវៈ គឺប្រៀបបានជាកញ្ចក់​សម្រាប់​ឆ្លុះបញ្ចាំង​ដ៏មានប្រសិទ្ធភាពអំពីបញ្ហាសង្គម។ខ្ញុំសូមឲ្យ​បងប្អូន​សារព័ត៌មានបន្តចូលរួមលើកស្ទួយវិស័យព័ត៌មាន ​ដោយប្រតិបត្តិឱ្យបាន ខ្ជាប់ខ្ជួន​នូវវិជ្ជាជីវៈសារព័ត៌មាន ​និងចូលរួមជាមួយរាជរដ្ឋាភិបាលក្នុងការទប់ស្កាត់ និងលុបបំបាត់ព័ត៌មាន​ក្លែងក្លាយ បំភ្លៃការពិត ​មានចរិតបំពុលសង្គម ​ជេរប្រមាថ និងញុះញង់ បង្កឱ្យកើតមានអរិភាព និងការបែកបាក់សាមគ្គីភាពជាតិ។ ខ្ញុំសូមគាំទ្រចំពោះយុទ្ធនាការប្រឆាំងព័ត៌មានក្លែងក្លាយ ក្រោម ប្រធានបទ​ «និយាយថាទេ ចំពោះព័ត៌មានក្លែងក្លាយ»។សម្តេចធិបតី បានបន្ថែមទៀតថា ក្នុងយុទ្ធនាការរៀបចំសណ្តាប់ធ្នាប់សារព័ត៌មាន ផ្អែកលើអភិក្រម «ថ្មី ពិត លឿន និងទូលំទូលាយ ​ប្រកបដោយជំនឿទុកចិត្ត ​និងវិជ្ជាជីវៈ ដើម្បីផ្សារភ្ជាប់គ្រប់មជ្ឈដ្ឋាន» របស់ក្រសួងព័ត៌មានហើយសម្តេចសូមវាយតម្លៃខ្ពស់ចំពោះការ​ផ្តួចផ្តើម​រៀបចំ​ធម្មនុញ្ញវិជ្ជាជីវៈ​សារព័ត៌មាន ​ដែលជាការកំណត់និយាមស្តង់ដាប្រតិបត្តិ ស្តីពីក្រមសីលធម៌អ្នកសារព័ត៌មាន ដើម្បីដាក់ចេញនូវវិធានការទប់ស្កាត់ ​និងលុបបំបាត់ការបំពានក្រម សីលធម៌ និងវិជ្ជាជីវៈ​សារព័ត៌មាន​របស់អង្គភាព និងអ្នកសារព័ត៌មានមួយចំនួន។ ទន្ទឹមនេះ ការយកចិត្ត ទុកដាក់លើការកសាងនិងអភិវឌ្ឍសមត្ថភាពអ្នកសារព័ត៌មាន​តាមរយៈការ​រៀបចំ​ការបណ្តុះបណ្តាល នានាជាកត្តាចាំបាច់ ដែលក្នុងន័យនេះសម្តេចសូមគាំទ្រលើទិសដៅ​យុទ្ធសាស្ត្រ​របស់ក្រសួងព័ត៌មាន ​ស្តីពីការពង្រឹងបទដ្ឋានបច្ចេកទេសនិងការទទួលខុសត្រូវវិជ្ជាជីវៈ និងការអភិវឌ្ឍធនធាន​មនុស្ស​និងបណ្តុះស្មារតីមនសិការវិជ្ជាជីវៈ ក្នុងដំណើរការការដ្ឋាន​កំណែទម្រង់​របស់ខ្លួនផងដែរ។ក្នុងឱកាសទិវាសេរីភាពសារព័ត៌មាននេះ សម្តេចធិបតីហ៊ុន ម៉ាណែត ក៏បានលើកឡើងផងដែរថា លំហសេរីភាពសារព័ត៌មាន ​នៅកម្ពុជាកាន់តែរីកចម្រើនធំធាត់ប្រកបដោយសុខភាពល្អ និង​ឆ្ពោះទៅរកការរៀបចំបាននូវសណ្តាប់ ធ្នាប់ល្អប្រសើរ។ ​ស្ថានភាពសេរីភាពនៃការបញ្ចេញមតិ នៅតែស្ថិត​ក្នុងបរិយាកាសអំណោយផលព្រោះថា​ អ្នកសារព័ត៌មានអាចរាយការណ៍ដោយសេរី ដោយ​ឈរលើមូលដ្ឋានក្រមសីលធម៌ និងវិជ្ជាជីវៈសារព័ត៌មាន។យ៉ាងណាក៏ដោយដើម្បីលើកកម្ពស់គុណភាពសារព័ត៌មាន ​សម្តេចធិបតី ហ៊ុន ម៉ាណែត នាយករដ្ឋមន្រ្តី បានលើកឡើងទៀតថា ​អ្នកសារព័ត៌មានត្រូវឈរលើគោលការណ៍ជាមូលដ្ឋាន នៃការគោរពក្រមសីលធម៌ និងវិជ្ជាជីវៈសារព័ត៌មាន។ ​នៅលើពិភពលោក អ្នកសារព័ត៌មាន បានបំពេញ​តួនាទីដ៏សំខាន់ក្នុងការចូលរួមកែលម្អចំណុចខ្វះខាតនៅក្នុងសង្គម និងបាននាំយក​ព័ត៌មាន​ពីរាជរដ្ឋាភិបាល ទៅកាន់ប្រជាពលរដ្ឋ និងនាំមកវិញនូវព័ត៌មានពីប្រជាពលរដ្ឋ​មករាជរដ្ឋាភិបាល ដើម្បីដោះស្រាយបញ្ហា ឱ្យទាន់ពេលវេលា ​និងសុខុដុមនីយកម្មក្នុងសង្គម ចូលរួម​ថែរក្សាសុខសន្តិភាព ការអភិវឌ្ឍជាដើម៕អត្ថបទបាន ចក់

នគរបាលខេត្តឧត្តរមានជ័យ ធ្វើការបាញ់ទឹកស្រោចនៅតាមសាលារៀន ខណៈអាកាសធាតុឡើងកំដៅកាន់តែខ្លាំង

2024/05/03 08:45:34 am        233
Facebook Telegram Linkin
ដោយអនុវត្តតាមបទបញ្ជាការណែនាំពីឯកឧត្តម ប៉ែន កុសល្យ អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពខេត្តឧត្តរមានជ័យ បានជំរុញឲ្យស្នងការនគរបាលខេត្តឧត្តរមានជ័យ និងអធិការនគរបាលតាមបណ្តាលក្រុងស្រុកទាំងប្រាំ ត្រូវមានវិធានអនុវត្តដោយធ្វើការបាញ់ទឹក​ស្រោចស្រព​នៅតាមបណ្តាលសាលារៀននានា ក្នុងមូលដ្ឋានដែនសមត្ថកិច្ចរបស់ខ្លួន ។ឯកឧត្តម បានបន្តថា ការធ្វើបែបនេះ បានជាប់ជាប្រចាំនៅតាមសាលារៀន គឺវាអាចជួយកាត់បន្ថយ​បានច្រើន​ចំពោះបញ្ហាការឡើងកំដៅ និងអាចផ្តល់ភាពងាយស្រួលដល់ប្អូនៗ​សិស្សានុសិស្ស​ដែលកំពុងសិក្សាមិនមានការប្រឈម និងកំដៅឡើងខ្លាំងផងដែរ។សូមបញ្ជាក់ថា ក្នុងរយះពេលប៉ុន្មានថ្ងៃនេះ ខណៈអាកាសធាតុបានឡើងកំដៅខ្លាំងចាប់ពី ៤០°Cឡើងនោះ កម្លាំងសមត្ថកិច្ចជំនាញ​បាន​ធ្វើការ​បញ្ចេញ​រថយន្ត​ពន្លត់​អគ្គីភ័យ​ជាច្រើនគ្រឿង​នៅតាមបណ្តាលក្រុង ​ធ្វើការ​សម្របសម្រួល​ជួយបាញ់ទឹកស្រោច​នៅតាមសាលារៀន​ដើម្បីជួយ​កាត់បន្ថយការឡើងកំដៅនៅតាមសាលារៀន ដើម្បីផ្តល់ភាពងាយស្រួលដល់សិស្សានុសិស្សដែលកំពុងសិក្សាផងដែរ ៕

លោក Biden និយាយជាលើកដំបូងពាក់ព័ន្ធនឹងការតវ៉ាតាមសាកលវិទ្យាល័យជុំវិញជម្លោះហ្កាហ្សា

2024/05/03 08:02:41 am        264
Facebook Telegram Linkin
ក្រោមសម្ពាធនយោបាយកាន់តែខ្លាំង លោកប្រធានាធិបតីអាមេរិក Joe Biden បានបញ្ចេញប្រតិកម្ម ជាលើកដំបូងចំពោះភាពចលាចលក្នុងបរិវេណសាកលវិទ្យាល័យទូទាំងសហរដ្ឋអាមេរិក ជុំវិញសង្គ្រាមនៅដែនដីហ្កាហ្សាកាលពីថ្ងៃព្រហស្បតិ៍ ២ ឧសភាសប្ដាហ៍នេះ ដោយនិយាយថា ជនជាតិអាមេរិក មានសិទ្ធិធ្វើបាតុកម្ម ប៉ុន្តែមិនប្រើអំពើហិង្សាឡើយ។លោក Biden បាននិយាយនៅក្នុងសុន្ទរកថានៅសេតវិមានថា មានសិទ្ធិតវ៉ា ប៉ុន្តែមិនមែនជាសិទ្ធិបង្កឱ្យមានភាពចលាចលទេ ។ទន្ទឹមនឹងរូបភាពចលាចលកើតចេញពីការតវ៉ានៅក្នុងបរិវេណសាកលវិទ្យាល័យនានា ដែលបានធ្វើឲ្យកក្រើកសហរដ្ឋអាមេរិកក្នុងប៉ុន្មានថ្ងៃថ្មីៗនេះ កំពុងរីករាលដាលពាសពេញបណ្ដាញទូរទស្សន៍និងសារព័ត៌មានទាំងឡាយលើពិភពលោក លោក Biden បានប្រឈមការរិះគន់ចំពោះការដោះស្រាយស្ថានភាពនេះ ។លោកតែងតែប្រគល់ឲ្យអ្នកនាំពាក្យរបស់លោកអត្ថាធិប្បាយ។ លោកប្រធានាធិបតីមកពីគណបក្សប្រជាធិបតេយ្យ ដែលកំពុងស្វែងរកការជាប់ឆ្នោតឡើងវិញនៅក្នុងខែវិច្ឆិកាឆ្នាំ២០២៤នេះ បានបោះជំហានយ៉ាងប្រុងប្រយ័ត្នក្នុងការរិះគន់ការប្រឆាំងពូជសាសន៍ ខណៈកំពុងព្យាយាមបញ្ឈប់ការគាំទ្រសិទ្ធិរបស់យុវជនអាមេរិកក្នុងការតវ៉ា និងព្យាយាមកំណត់ការខូចខាតនយោបាយរយៈពេលវែង។លោក Biden បាននិយាយថា ភាគីទាំងសងខាងមានចំណុចមួយ ដែលថាការប្រឆាំងដោយសន្តិវិធី មានសារៈសំខាន់ចំពោះលទ្ធិប្រជាធិបតេយ្យ ប៉ុន្តែអំពើហិង្សានឹងមិនត្រូវបានអត់ឱនឡើយ។លោកបានបន្តថា ការបំផ្លាញទ្រព្យសម្បត្តិមិនមែនជាការតវ៉ាដោយសន្តិវិធីទេ តែវាផ្ទុយនឹងច្បាប់។ ការបំផ្លិចបំផ្លាញ ការរំលោភបំពាន ការវាយកម្ទេចបង្អួច ការបិទសាលារៀន កំពុងបង្ខំឱ្យលុបចោលថ្នាក់រៀន និងពិធីប្រគល់សញ្ញាបត្របញ្ចប់ការសិក្សា សកម្មភាពបែបនេះ គេមិនហៅថាជាការតវ៉ាដោយសន្តិវិធីនោះទេ៕

ក្រុមឃ្លាំមើលអ៊ីស្រាអែល អំពាវនាវឱ្យថ្នាក់ដឹកនាំសហការក្នុងការស៊ើបអង្កេតលើហេតុការណ៍ថ្ងៃ៧ តុលា

2024/05/02 03:48:09 pm        97
Facebook Telegram Linkin
អង្គភាពសវនកររដ្ឋរបស់អ៊ីស្រាអែល កាលពីថ្ងៃពុធ (០១ ឧសភា) បានអំពាវនាវឱ្យលោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) និងប្រមុខកងកម្លាំងប្រដាប់អាវុធ សហការជាមួយនឹងការស៊ើបអង្កេតជាផ្លូវការមួយអំពីថា តើក្រុមហាម៉ាស អាចរៀបចំការវាយប្រហារកាលពីថ្ងៃទី០៧ ខែតុលា លើអ៊ីស្រាអែល ដែលបង្កឱ្យមានសង្រ្គាមហ្កាហ្សា នេះបានដោយរបៀបណា។ប្រធានអង្គភាពឃ្លាំមើល លោក ម៉ាតាន់យ៉ាហ៊ូ អែងហ្គលម៉ាន (Matanyahu Englman) បាននិយាយនៅដើមដំបូងនៃសង្រ្គាមថា លោកមានបំណងស៊ើបអង្កេតព្រឹត្តិការណ៍ជុំវិញការវាយប្រហារថ្ងៃទី០៧ ខែតុលា ដែលជាថ្ងៃមួយមានមនុស្សស្លាប់ច្រើនបំផុតក្នុងប្រវត្តិសាស្ត្រ ៧៥ ឆ្នាំរបស់ប្រទេស។នៅក្នុងខែធ្នូ លោកបាននិយាយថាការិយាល័យរបស់លោកនឹង «ជីកកកាយរកភស្ដុតាង» ខណៈដែលខ្លួនពិនិត្យមើលទៅលើ «ការបរាជ័យពហុប្រព័ន្ធ» ដែលឈានទៅដល់ការវាយប្រហារអំឡុងពេល និងក្រោយថ្ងៃទី០៧ ខែតុលា ហើយថាផែនការសវនកម្មរបស់ការិយាល័យរបស់លោកភាគច្រើនសម្រាប់ឆ្នាំ២០២៤ នឹងផ្តោតលើការស៊ើបអង្កេតនេះ។ទូរទស្សន៍រដ្ឋ ខាន់ (Kan) របស់អ៊ីស្រាអែលបានរាយការណ៍ថា នៅក្នុងលិខិតរបស់ប្រធានអង្គភាពសវនកររូបនេះបង្ហាញថា ការិយាល័យនាយករដ្ឋមន្ត្រី និងគណៈរដ្ឋមន្ត្រីសន្តិសុខ មិនបានសហការពេញលេញជាមួយការិយាល័យរបស់លោកទេ ដែលនាំឱ្យមានការពន្យារពេលក្នុងការធ្វើសវនកម្ម។ ការិយាល័យនាយករដ្ឋមន្ត្រី បានច្រានចោលការចោទប្រកាន់របស់លោក អែងហ្គលម៉ាន ហើយនិយាយថា ខ្លួនកំពុងសហការយ៉ាងពេញទំហឹងលើបញ្ហានេះ៕

អាមេរិកពិចារណាទទួលយកជនជាតិប៉ាឡេស្ទីនមួយចំនួន ជាជនភៀសខ្លួន ចំពេលមានសង្រ្គាមអ៊ីស្រាអែល-ហាម៉ាស

2024/05/02 01:30:34 pm        411
Facebook Telegram Linkin
រដ្ឋបាលលោក បៃដិន កំពុងពិចារណាទទួលយកប្រជាជនប៉ាឡេស្ទីនមួយចំនួនមកកាន់សហរដ្ឋអាមេរិកក្នុងនាមជាជនភៀសខ្លួន ខណៈដែលពួកគេ ស្វែងរកការរត់គេចពីតំបន់ហ្កាហ្សា ដែលហែកហួរដោយសង្រ្គាម ចំពេលមានសង្រ្គាមដែលកំពុងបន្តនៅមជ្ឈិមបូព៌ារវាងអ៊ីស្រាអែល និងក្រុមហាម៉ាស។សារព័ត៌មាន CBS News បានរាយការណ៍ថា មន្ត្រីជាន់ខ្ពស់មកពីបណ្តាទីភ្នាក់ងារសហព័ន្ធរបស់សហរដ្ឋអាមេរិក បានពិភាក្សាក្នុងប៉ុន្មានសប្តាហ៍ថ្មីៗនេះអំពីព័ត៌មានលម្អិតនៃជម្រើសដ៏សំខាន់ ក្នុងការទទួលយកជនជាតិប៉ាឡេស្ទីនពីតំបន់ហ្កាហ្សា ដែលមានសមាជិកគ្រួសារជាពលរដ្ឋអាមេរិក ឬអ្នករស់នៅអចិន្ត្រៃយ៍នៅសហរដ្ឋអាមេរិក និងមានឯកសាររបស់រដ្ឋាភិបាលសហព័ន្ធផ្ទៃក្នុង បង្ហាញ។ ឯកសារទាំងនោះ បានបង្ហាញឲ្យដឹងថា សំណើមួយពាក់ព័ន្ធនឹងការប្រើប្រាស់កម្មវិធីទទួលជនភៀសខ្លួនរបស់សហរដ្ឋអាមេរិក ដើម្បីនាំយកជនជាតិប៉ាឡេស្ទីនជាមួយនឹងទំនាក់ទំនងរបស់សហរដ្ឋអាមេរិក ដែលបានរត់គេចពីតំបន់ហ្កាហ្សា និងចូលទៅក្នុងប្រទេសអេហ្ស៊ីបដែលនៅជិតខាង។មន្ត្រីអាមេរិក ក៏បានពិចារណាទទួលយកប្រជាជនប៉ាឡេស្ទីនបន្ថែមចេញពីតំបន់ហ្កាហ្សា ហើយកំពុងដំណើរការពួកគេ ក្នុងនាមជាជនភៀសខ្លួន ប្រសិនបើពួកគេ មានសាច់ញាតិជនជាតិអាមេរិក។ សំណើនេះ នឹងត្រូវពឹងផ្អែកលើការសម្របសម្រួលជាមួយអេហ្ស៊ីប ដែលរហូតមកដល់ពេលនេះ មានការស្ទាក់ស្ទើរ ក្នុងការទទួលយកប្រជាជនដ៏ច្រើនពីតំបន់ហ្កាហ្សា។ប្រជាជនមកពីតំបន់ហ្កាហ្សាដែលឆ្លងកាត់ការទទួលបានសិទ្ធិជាបន្តបន្ទាប់ ការត្រួតពិនិត្យផ្នែកវេជ្ជសាស្រ្ត និងសុវត្ថិភាពនឹងមានលក្ខណៈគ្រប់គ្រាន់ក្នុងការហោះហើរទៅកាន់សហរដ្ឋអាមេរិកជាមួយនឹងឋានៈជាជនភៀសខ្លួន ដែលរួមមានសិទ្ធិស្នាក់នៅអចិន្ត្រៃយ៍ អត្ថប្រយោជន៍នៃការតាំងលំនៅថ្មី ដូចជាជំនួយលំនៅឋាន និងផ្លូវឈានទៅការទទួលបានសញ្ជាតិអាមេរិក។

ប្រទេសចំនួន៤៩ និងសហភាពអឺរ៉ុប ស្វែងរកយន្តការថ្មី ដើម្បីតាមដានទណ្ឌកម្មលើកូរ៉េខាងជើង

2024/05/02 01:27:08 pm        454
Facebook Telegram Linkin
ប្រទេសចំនួន៤៩ និងសហភាពអឺរ៉ុប បានចេញសេចក្តីថ្លែងការណ៍រួមមួយ ដោយអំពាវនាវឱ្យមានយន្តការថ្មី សម្រាប់ការពិនិត្យការដាក់ទណ្ឌកម្មលើប្រទេសកូរ៉េខាងជើង។ គណៈកម្មការអ្នកជំនាញនៃក្រុមប្រឹក្សាសន្តិសុខអង្គការសហប្រជាជាតិ ទទួលបន្ទុកបេសកកម្មនេះ ត្រូវបានរំសាយចោលកាលពីថ្ងៃទី ៣០ ខែមេសា បន្ទាប់ពីប្រទេសរុស្ស៊ី បានប្រើសិទ្ធវ៉េតូចំពោះសេចក្តីសម្រេចដើម្បីបន្តអាណត្តិរបស់គណៈកម្មការនេះ។ គណៈកម្មាការ បានផ្តល់របាយការណ៍ និងការវិភាគអំពីរបៀបដែលប្រទេសកូរ៉េខាងជើង គេចវេសពីការដាក់ទណ្ឌកម្ម និងបន្តកម្មវិធីផលិតនុយក្លេអ៊ែរ និងមីស៊ីលរបស់ខ្លួន។លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិបានអានសេចក្តីថ្លែងការណ៍រួម នៅទីស្នាក់ការអង្គការសហប្រជាជាតិនៅទីក្រុងញូវយ៉ក កាលពីថ្ងៃពុធ។ លោកស្រី បាននិយាយថាការប្រើសិទ្ធិវ៉េតូរបស់រុស្ស៊ី បានដកសិទ្ធរដ្ឋសមាជិកអង្គការសហប្រជាជាតិចំពោះព័ត៌មាន និងគោលការណ៍ណែនាំសំខាន់ៗដើម្បីអនុវត្តវិធានការដែលបានអនុម័តដោយក្រុមប្រឹក្សា។លោកស្រី បានទាមទារឱ្យប្រទេសកូរ៉េខាងជើង បោះបង់កម្មវិធីអាវុធមហាប្រល័យ និងកម្មវិធីមីស៊ីលបាលីស្ទីក។ លោកស្រីឯកអគ្គរដ្ឋទូត បាននិយាយថា ដោយផ្តល់ភាពចាំបាច់សម្រាប់រដ្ឋសមាជិកទាំងអស់ ក្នុងការអនុវត្តន៍តាមសេចក្តីសម្រេចរបស់ក្រុមប្រឹក្សាសន្តិសុខដែលពាក់ព័ន្ធ ហើយពិចារណាពីការផុតកំណត់របស់គណៈកម្មការ ពេលនេះយើងត្រូវតែពិចារណា ពីរបៀបដើម្បីបន្តដំណើរការទៅកាន់គោលបំណង និងការវិភាគឯករាជ្យ។ លោកស្រី បាននិយាយបន្តថា យើងទន្ទឹងរង់ចាំធ្វើការជាមួយរដ្ឋសមាជិកទាំងអស់ ដើម្បីឱ្យការងារនេះអាចធ្វើទៅបាន។

ខណៈភាពតានតឹងកើនឡើង ជនជាតិអាមេរិកកាន់តែច្រើន មើលឃើញថា ប្រទេសចិនជាសត្រូវ

2024/05/02 01:19:17 pm        414
Facebook Telegram Linkin
យោងតាមការស្ទង់មតិថ្មីមួយដោយមជ្ឈមណ្ឌលស្រាវជ្រាវ ភូ (Pew) ប្រជាជនអាមេរិក មានការព្រួយបារម្ភកាន់តែខ្លាំង ពីអំណាចរបស់ប្រទេសចិននៅបរទេស ហើយចង់តតាំងនឹងឥទ្ធិពលនោះ។ អ្នកឆ្លើយសំណួរចំនួន ៤២% បានបង្ហាញថាពួកគេចាត់ទុកប្រទេសចិនជាសត្រូវរបស់សហរដ្ឋអាមេរិក ចំនួននេះបានកើនឡើងពី៣៤% ដែលបានស្ទង់មតិកាលពីក្នុងឆ្នាំ ២០២១ នៅពេលអង្គការស្រាវជ្រាវ មានមូលដ្ឋាននៅទីក្រុងវ៉ាស៊ីនតោន មួយនេះ បានចាប់ផ្តើមសួរសំណួរនេះ។ ការសិក្សាដែលបានចេញផ្សាយកាលពីថ្ងៃពុធសប្ដាហ៍នេះ ក៏បានរកឃើញផងដែរថា ៧១% នៃជនជាតិអាមេរិកជឿថាឥទ្ធិពលសកលរបស់ប្រទេសចិនបាននិងកំពុងកើនឡើងនៅក្នុងប៉ុន្មានឆ្នាំថ្មីៗនេះ។ស្ទើរតែពាក់កណ្តាលនៃអ្នកឆ្លើយតបបាននិយាយថា ការកំណត់អំណាចរបស់ចិនគួរតែជាអាទិភាពចម្បងសម្រាប់គោលនយោបាយការបរទេសរបស់សហរដ្ឋអាមេរិក រួមទាំងការការពារសហរដ្ឋអាមេរិកពីការវាយប្រហារភេរវកម្ម និងការទប់ស្កាត់លំហូរនៃគ្រឿងញៀនខុសច្បាប់ចូលទៅក្នុងប្រទេសនេះ។ភាពមន្ទិលដែលចេះតែកើនឡើងនេះ បានកើតឡើង ខណៈប្រទេសទាំងពីរប៉ះទង្គិចគ្នាលើបញ្ហាកាន់តែច្រើន ហើយបេក្ខជនសំខាន់ៗនៅក្នុងការបោះឆ្នោតប្រធានាធិបតីសហរដ្ឋអាមេរិកបានប្តេជ្ញាប្រកាន់ជំហរយ៉ាងតឹងរ៉ឹងលើប្រទេសចិន។លោកប្រធានាធិបតី Biden និងបេក្ខជនប្រធានាធិបតីមកពីបក្សសាធារណរដ្ឋគឺ លោក Donald Trump បានបង្ហាញការព្រួយបារម្ភពីផលប៉ះពាល់នៃទំនិញរបស់ចិនដែលមានតម្លៃទាប លើឧស្សាហកម្មអាមេរិក។ ប្រហែល២ភាគ៣ នៃអ្នកឆ្លើយតបនៅក្នុងការស្ទង់មតិ របស់មជ្ឈមណ្ឌល ភូ (Pew) ជឿថាប្រទេសចិនមានផលប៉ះពាល់អវិជ្ជមានលើលក្ខខណ្ឌសេដ្ឋកិច្ចរបស់សហរដ្ឋអាមេរិក៕

លោក ដូណាល់ ត្រាំ សន្យាសន្តិភាពពិភពលោក អំឡុងពេលថ្លែងសុន្ទរកថានៅរដ្ឋ Michigan

2024/05/02 01:11:08 pm        413
Facebook Telegram Linkin
បេក្ខជនប្រធានាធិបតី មកពីគណបក្សសាធារណរដ្ឋ លោក Donald Trump បានសន្យាថា នឹងនាំមកនូវសន្តិភាពដល់ពិភពលោក ប្រសិនបើលោកទទួលជ័យជម្នះក្នុងការបោះឆ្នោត នៅក្នុងខែវិច្ឆិកា ដែលលោកបានថ្លែងក្នុងអំឡុងពេលនៃការជួបប្រជុំគ្នានៃយុទ្ធនាការឃោសនាបោះឆ្នោតនៅទីក្រុង Freeland រដ្ឋ Michigan កាលពីថ្ងៃពុធ ទី១ ខែឧសភា។ក្នុងអំឡុងព្រឹត្តិការណ៍នេះ លោក Trump បាននិយាយថា ភាពអសមត្ថភាពរបស់ប្រធានាធិបតីសហរដ្ឋអាមេរិក លោក Joe Biden បាននាំភពផែនដី ឈានដល់ដំណាក់កាលមាត់ជ្រោះនៃសង្គ្រាមនុយក្លេអ៊ែរ ហើយលោកគឺជាមនុស្សតែម្នាក់គត់ ដែលអាចនិយាយដោយទំនុកចិត្តថាលោកអាចទប់ស្កាត់សង្គ្រាមលោកលើកទី៣បាន។អតីតប្រធានាធិបតីសហរដ្ឋអាមេរិករូបនេះ បានសន្យាថានឹងកសាងដំបូលដែកដូចដែលអ៊ីស្រាអែលមាន ហើយផ្នែកនោះនឹងត្រូវសាងសង់នៅរដ្ឋ Michigan ។ លោក Trump បានរក្សាក្នុងសុន្ទរកថាដដែលចំពោះការអនុវត្តការនិរទេសជនអន្តោប្រវេសន៍ជាច្រើន។ប្រធានាធិបតី លោក Joe Biden និងអតីតប្រធានាធិបតី លោក Donald Trump នឹងប្រឈមមុខដាក់គ្នាក្នុងការបោះឆ្នោតប្រធានាធិបតីសហរដ្ឋអាមេរិកនៅថ្ងៃទី ៥ ខែវិច្ឆិកា ជាអ្វីដែលមើលទៅហាក់ដូចជាមានការបែងចែកមិនចុះសម្រុងគ្នា និងមានការប្រជែងគ្នាយ៉ាងស្វិតស្វាញ។ លោក Trump មានអាយុ៧៧ឆ្នាំ ប្រឈមមុខនឹងការចោទប្រកាន់ចំនួន៨៨ករណី ក្នុងសំណុំរឿងព្រហ្មទណ្ឌចំនួន៤ ជុំវិញកិច្ចខិតខំប្រឹងប្រែងដើម្បីបង្ខូចការបោះឆ្នោតឆ្នាំ ២០២០ ព្រមទាំងការរក្សាទុកឯកសារសន្តិសុខជាតិសម្ងាត់បំផុតដោយខុសច្បាប់ និងការក្លែងបន្លំកំណត់ត្រាអាជីវកម្ម។ ការជម្រះក្តីបទព្រហ្មទណ្ឌលើកដំបូងរបស់លោក បានចាប់ផ្តើមនៅទីក្រុងញូវយ៉ក កាលពីថ្ងៃទី ១៥ ខែមេសា។

ទួរគី នឹងចូលរួមក្នុងសំណុំរឿងប្រល័យពូជសាសន៍របស់អាហ្វ្រិកខាងត្បូងប្រឆាំងអ៊ីស្រាអែល នៅតុលាការពិភពលោក

2024/05/02 01:00:25 pm        371
Facebook Telegram Linkin
រដ្ឋមន្ត្រីការបរទេសទួរគី លោក ហាកាន ហ្វីដាន ( Hakan Fidan) បាននិយាយកាលពីថ្ងៃពុធថា ប្រទេសទួរគី នឹងចូលរួមក្នុងសំណុំរឿងប្រល័យពូជសាសន៍របស់អាហ្វ្រិកខាងត្បូងប្រឆាំងនឹងអ៊ីស្រាអែលនៅតុលាការយុត្តិធម៌អន្តរជាតិ (ICJ)។លោក ហ្វីដាន បាននិយាយនៅក្នុងសន្និសីទសារព័ត៌មានរួមគ្នាជាមួយរដ្ឋមន្ត្រីការបរទេសឥណ្ឌូនេស៊ី លោកស្រី រីណូ ម៉ាស៊ូឌី ( Retno Marsudi) នៅទីក្រុងអង់ការ៉ាថា៖«នៅពេលបញ្ចប់អត្ថបទផ្លូវច្បាប់នៃការងាររបស់យើង យើងនឹងបញ្ជូនសេចក្តីប្រកាសអំពីការអន្តរាគមន៍ជាផ្លូវការ នៅចំពោះមុខតុលាការ ICJ ដោយមានគោលបំណងអនុវត្តការសម្រេចចិត្តនយោបាយនេះ»។លោកបានបន្តថា៖ «ប្រទេសទួរគី នឹងបន្តគាំទ្រប្រជាជនប៉ាឡេស្ទីន គ្រប់កាលៈទេសៈ។កាលពីខែមករា តុលាការ ICJ បានបញ្ជាឲ្យអ៊ីស្រាអែលបដិសេធរាល់សកម្មភាពដែលអាចស្ថិតនៅក្រោមអនុសញ្ញាប្រល័យពូជសាសន៍ និងធានាឲ្យកងទ័ពរបស់ខ្លួនមិនប្រព្រឹត្តអំពើប្រល័យពូជសាសន៍ប្រឆាំងនឹងប៉ាឡេស្ទីន បន្ទាប់ពីអាហ្វ្រិកខាងត្បូង បានចោទប្រកាន់អ៊ីស្រាអែលពីអំពើប្រល័យពូជសាសន៍ដឹកនាំដោយរដ្ឋ នៅក្នុងតំបន់ហ្កាហ្សា។កាលពីខែមករា លោកប្រធានាធិបតី តាយីប អឺដូហ្កាន់ (Tayyip Erdogan) បាននិយាយថា ប្រទេសទួរគី កំពុងផ្តល់ឯកសារសម្រាប់សំណុំរឿងនេះ នៅតុលាការ ICJ ដែលត្រូវបានគេស្គាល់ថា ជាតុលាការពិភពលោក។អ៊ីស្រាអែល និងសម្ព័ន្ធមិត្តលោកខាងលិច បានពណ៌នាការចោទប្រកាន់នេះថា គ្មានមូលដ្ឋាន។ សេចក្តីសម្រេចចុងក្រោយក្នុងសំណុំរឿងរបស់អាហ្វ្រិកខាងត្បូងនៅតុលាការ ICJ នៅទីក្រុងឡាអេ អាចចំណាយពេលរាប់ឆ្នាំ។

សម្ដេចធិបតី ណែនាំដល់ក្រសួងស្ថាប័នទាំងអស់ផ្ដល់បរិយាកាសកក់ក្ដៅដល់អ្នកវិនិយោគនៅកម្ពុជា

2024/05/02 12:55:00 pm        394
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបង្ហាញនូវមោទនភាពជាខ្លាំងដែលបានឃើញពីវឌ្ឍនភាពនៃវិស័យឧស្សាហកម្មនៅកម្ពុជា ជាពិសេសតាមរយៈនៃការខិតខំរបស់រាជរដ្ឋាភិបាលទាំងអាណត្តិចាស់ និងអាណត្តិថ្មី ដែលសម្តេចតែងតែខិតខំគៀគររកការវិនិយោគមកកម្ពុជា ហើយសម្តេចក៏បានបញ្ជាក់ថា ការខិតខំរបស់សម្តេចឱ្យគេសម្រេចចិត្តមកថ្មីគឺសំខាន់ ប៉ុន្តែសំខាន់ជាងនេះ គឺធ្វើឱ្យអ្នកដែលមកហើយមានភាពកក់ក្តៅ។សម្តេចធិបតីនាយករដ្ឋមន្ត្រី បានបង្ហាញនូវទំនុកចិត្តដល់វិនិយោគិនបែបនេះ ខណ:អញ្ជើញ ជាអធិបតីក្នុងពិធីសម្ពោធដាក់ឱ្យដំណើរការជាផ្លូវការរោងចក្រផ្គុំ និងដំឡើងរថយន្តតូយ៉ូតា តូយ៉ូតាស៊ុយស៊ូ មេនូហ្វេកធឺរីង(ខេមបូឌា)ដែលមានទីតាំងស្ថិតនៅតំបន់សេដ្ឋកិច្ចពិសេស រ៉ូយ៉ាល់គ្រុប ក្នុងរាជធានីភ្នំពេញ នាព្រឹកថ្ងៃទី២ ខែឧសភានេះ។សម្ដេច បានបញ្ជាក់យ៉ាងដូច្នេះថា រោងចក្រផ្គុំ និងដំឡើងរថយន្តតូយ៉ូតាដែលជាប្រភេទរថយន្ត​មានតម្រូវការ​និងប្រជាប្រិយនៅក្នុងប្រទេសកម្ពុជា បានបោះទុនវិនិយោគរហូតដល់​ប្រមាណ ៣៦,៨លានដុល្លារ មានបុគ្គលិកសរុប ១៥០នាក់ ជាមួយនឹងមានសមត្ថភាពដំឡើងរថយន្ត២ប្រភេទ ដំឡើងរថយន្តបាន ១.៣០០គ្រឿងសម្រា ប់ឆ្នាំ២០២៤នេះ មិនត្រឹមតែជាសញ្ញាបង្ហាញពីវឌ្ឍនភាពថ្មី​មួយសម្រាប់វិស័យឧស្សាហកម្មនៅកម្ពុជាឡើយ ប៉ុន្តែបន្ថែមជាសញ្ញាវិជ្ជមានមួយទៀតសម្រាប់ការ​ធ្វើ​ពិពិធកម្ម​សេដ្ឋកិច្ចកម្ពុជា ដែលការវិនិយោគបែបនេះគឺជាអ្វីដែលកម្ពុជាចង់បាន។សម្ដេចបន្តថា រាជរដ្ឋាភិបាលនីតិកាលទី៧ នៃរដ្ឋសភា បានដាក់ចេញនូវយុទ្ធសាស្ត្រ បច្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាពនិងចីរភាពដោយ​កំណត់​យកអាទិភាពគន្លឹះចំនួន៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា។ទន្ទឹមនឹងនេះ ដើម្បីទាញយក​ប្រយោជន៍ជាអតិបរមានិងជំរុញឲ្យអស់សក្តានុពលនូវប្រភពធនធាន ដែលមានបច្ចុប្បន្ន និងប្រភពថ្មីនៃកំណើនសេដ្ឋកិច្ចរបស់កម្ពុជារាជរដ្ឋាភិបាលបានគិតគូគ្រប់ជ្រុងជ្រោយ ដោយផ្ដល់ការ​លើកទឹកចិត្តខ្ពស់ដល់ការវិនិយោគគ្រប់វិស័យអាទិភាពតាមរយៈច្បាប់ស្ដីពីការវិនិយោគនៃ ព្រះរាជាណាចក្រកម្ពុជា និងការដាក់ចេញជាបន្តបន្ទាប់នូវច្បាប់ គោលនយោបាយនិងផែនការ​យុទ្ធសាស្ត្រ​ចាំបាច់នានាដែល មានភាពប្រឡាក់ក្រឡាសំដៅបង្កើតនិងបង្កើនការងារ​ដ៏មាន​តម្លៃ​បន្ថែមខ្ពស់និងចាប់យកឲ្យបាននូវកាលានុវត្តភាពថ្មី ដែលកំពុងលេចឡើង ស្របនឹង​និន្នាការ​តំបន់និងសាកល ដើម្បីបង្កើនល្បឿន និងធានាចីរភាពនៃកំណើនរយៈពេលវែង៕

បណ្ដាញសង្គម

ព័ត៌មានថ្មីៗ

អ្នកវិនិយោគទុនចិននៅជុំវិញពិភពលោកនាំគ្នាមកបើកប្រជុំត្រៀមរៀបចំមហាសន្និបាតធុរកិច្ចនៅកម្ពុជាចុងឆ្នាំនេះ
06/10/2026 05:06 PM
Facebook Telegram Linkin
ពលរដ្ឋអ៊ីរ៉ង់និយាយថា ទីក្រុងតេអេរ៉ងមិនត្រូវនៅអសកម្មនោះទេ ស្របពេលភាពតានតឹងអាមេរិក-អ៊ីរ៉ង់កើនឡើង
06/10/2026 05:06 PM
Facebook Telegram Linkin
អាជ្ញាធរ និងកងកម្លាំងរាជធានីភ្នំពេញបន្តចុះត្រួតពិនិត្យទីតាំងប្រមូលផ្ដុំ ៩០ទីតាំងបន្ថែមទៀត ដើម្បីលុបបំបាត់បទល្មើសនានា ពិសេសបទល្មើសការឆបោកតាមប្រព័ន្ធ បច្ចេកវិទ្យា
06/10/2026 05:06 PM
Facebook Telegram Linkin
ស្ថាប័ន​តាម​ដាន​ EU៖ ពិភពលោកមាននូវ​ខែឧសភាក្តៅបំផុតទី២ ខណៈអឺរ៉ុបប្រឈមស្ថានភាពធម្មតាថ្មី​
06/10/2026 05:06 PM
Facebook Telegram Linkin
គណៈកម្មាធិការជាតិគ្រោងរៀបចំប្រព័ន្ធគ្រប់គ្រងសំរាមទំនើប ដោយផ្អែកលើប្រសិទ្ធភាពសេដ្ឋកិច្ច នៅក្នុងខេត្តព្រះសីហនុ និងកោះកុង
06/10/2026 05:06 PM
Facebook Telegram Linkin
គុយបាត្រៀមដឹកជញ្ជូនប្រេងឥន្ធនៈដ៏ធំបំផុតពី​សហរដ្ឋអាមេរិក ចាប់តាំងពី​មាន​ទណ្ឌកម្ម​សង្គ្រាមត្រជាក់
06/10/2026 05:06 PM
Facebook Telegram Linkin
ពីថ្នាក់រៀនទៅ​កសិដ្ឋាន​ឆ្លាតវៃ ! សិស្ស NTTI បង្កើត​បាន​ប្រព័ន្ធ Solar Greenhouse គ្រប់គ្រ​ងដំ​ណាំ​ដោយ​ស្វ័យប្រវត្តិ
06/10/2026 05:06 PM
Facebook Telegram Linkin
នាយករដ្ឋមន្ត្រីនិយាយថា «អូស្ត្រាលីមានការព្រួយបារម្ភយ៉ាងខ្លាំង» អំពីស្ថានភាពនៅមជ្ឈិមបូព៌ា
06/10/2026 04:06 PM
Facebook Telegram Linkin
មនុស្ស ១២នាក់ស្លាប់ និង ៩នាក់រងរបួស ក្នុងហេតុការណ៍បាញ់ប្រហារនៅទីក្រុង Johannesburg អាហ្វ្រិកខាងត្បូង
06/10/2026 04:06 PM
Facebook Telegram Linkin
គ្រូ និងសិស្ស អំពាវនាវសាធារណជនចូលរួមកម្មវីធី TVET Day ដើម្បីស្វែងយល់សារៈសំខាន់វិស័យបណ្តុះបណ្តាលជំនាញ
06/10/2026 04:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.