នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%
សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាល​ដែលកំពុង​ធ្វើកិច្ច​ការងារ​យ៉ាង​សកម្ម​ស្វែង​រក​ដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥
សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ​ និង ការអភិវឌ្ឍន៍

ប្រធានរដ្ឋសភាថៃ អញ្ជើញធ្វើមាតុភូមិនិវត្តន៍ បន្ទាប់ពីបានបញ្ចប់ទស្សនកិច្ចនៅកម្ពុជា រយៈពេល៣ថ្ងៃ

2024/03/23 05:16:46 pm        138
Facebook Telegram Linkin
នៅអាកាសយានដ្ឋានអន្តរជាតិភ្នំពេញ នារសៀលថ្ងៃទី២៣ ខែមីនា ឆ្នាំ២០២៤ ឯកឧត្តម វង សូត អនុប្រធានទី២ នៃរដ្ឋសភា បានអញ្ជើញជូនដំណើរ ឯកឧត្តម វ៉ាន់មូហាម៉ាត់ណ មៈថា (Wanmuhamadnoor Matha) ប្រធានរដ្ឋសភានៃព្រះរាជាណាចក្រថៃ ធ្វើមាតុភូមិនិវត្តន៍ បន្ទាប់ពីបានបញ្ចប់ទស្សនកិច្ចផ្លូវការ នៅព្រះរាជាណាចក្រកម្ពុជា រយៈពេល៣ថ្ងៃ ចាប់ពីថ្ងៃទី២១-២៣ ខែមីនា ឆ្នាំ២០២៤។

កម្មកររោងចក្រY&W៖ ពេលមកបើកលុយ ក្រសួងការងារបានយកចិត្តទុកដាក់ណាស់

2024/03/23 03:47:36 pm        275
Facebook Telegram Linkin
កម្មករនិយោជិតនៃរោងចក្រ Y&W ផ្ទុះការកោតសរសើរចំពោះរាជរដ្ឋាភិបាលដែលមានក្រសួការងារជាសេនាធិការ និងមន្ត្រីអាជ្ញាធរពាក់ព័ន្ធដែលបានយកចិត្តទុកដាក់យ៉ាងខ្លាំងចំពោះកម្មករនិយោជិតនៃក្រុមហ៊ុន Y & Wដែលកំពុងសម្រុកមកបើកប្រាក់ឈ្នួល និងប្រាក់បំណាច់ផ្សេងៗនៅសាលាខណ្ឌដង្កោ។ អ្នកនាង យី សោភា កម្មករនៃក្រុមហ៊ុន Y & W បានថ្លែងថា មន្ត្រីសម្របសម្រួលរបស់ក្រសួងការងារ និងបណ្តុះបណ្តាលវិជ្ជាជីវៈ និងមន្ត្រីអាជ្ញាធមូលដ្ឋាន បានយកចិត្តទុកដាក់ខ្លាំងចំពោះកម្មករ​ទាំងអស់​ដែលបានមកបើកប្រាក់នៅសាលាខណ្ឌ។ អ្នកនាងកត់សម្គាល់ឃើញថា ក្រសួងបានរៀបចំពីលំហូរ និងតម្រាយណែនាំបានយ៉ាងល្អ គ្មានឧបសគ្គសម្រាប់ការបើកប្រាក់ឡើយ។ បន្ថែមពីនេះ មន្ត្រី បានគិតគូលំអិតលើការផ្តល់ទឹកសុទ្ធ ភេសជ្ជៈ និងនុំប័ងដើម្បីជួយសម្រួលដល់បងប្អូនកម្មករថែមទៀតផង។ ចំណែកលោក សាន វាសនា កម្មករផ្នែកដេរ នៃក្រុមហ៊ុន Y & W បានសង្កេតឃើញថា អាជ្ញាធរបានរៀបចំរោងកង្ហា កៅអីអង្គុយដើម្បីសម្រួលដល់កម្មករថែមទៀតផង។ សម្រាប់កម្មកររូបនេះ ការយកចិត្តទុកដាក់បែបនេះរបស់រដ្ឋាភិបាល គឺគួរឱ្យសរសើរណាស់ មិននឹកស្មានដល់។ដោយឡែកលោក ហ្វា សាលី ដែលជាប្រធានសម្ព័ន្ធសហជីពជាតិ បានវាយតម្លៃខ្ពស់​ចំពោះការ​រៀបចំរបស់រាជរដ្ឋាភិបាលដែលគិតគូបានល្អិតល្អន់ និងធ្វើឱ្យដំណើរការនៃការបើកប្រាក់ឈ្នួលប្រព្រឹត្តទៅដោយរលូន។ ចំពោះការត្រៀមលើការបើកប្រាក់ឈ្នួល និងប្រាក់បំណាច់ជូនកម្មករនិយោជិតនៃរោងចក្រ Y & Wនេះក្រសួងការងារ និងបណ្តុះបណ្តាលវិជ្ជាជីវៈ និងអាជ្ញាធរពាក់ព័ន្ធបានពង្រាយកម្លាំងសន្តិសុខ មន្ត្រីពេទ្យដើម្បីសង្គ្រោះបឋម​ រថយន្តក្រុងដើម្បីដឹកកម្មករ ការត្រៀមទឹកសុទ្ធ នុំប័ង ភេសជ្ជៈក្នុង​គោលបំណង​ជួយសម្រួលដល់កម្មករនិយោជិតទាំងអស់ក្នុងអំឡុងពេលបើកប្រាក់ឈ្នួលនេះ។ សូមបញ្ជាក់ថា ក្រសួងការងារ និងបណ្តុះបណ្តាលវិជ្ជាជីវៈ បានផ្តើមការបើកថវិកាជូនកម្មករ​និយោជិតនៃក្រុមហ៊ុន Y & W ចាប់តាំងពីរសៀលម៉ោង១ ថ្ងៃសុក្រទី២២ ខែមីនាមក។ ក្នុងនោះ មានកម្មករប្រមាណ២ពាន់នាក់បានទទួលប្រាក់ឈ្នួលរបស់ខ្លួន។ នេះបើតាមសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈកាលពីថ្ងៃសុក្រ ទី២២ ខែមីនា ឆ្នាំ២០២៤នេះ៕

វិទ្យាស្ថាន NTTI រៀបចំសង្រ្កាន្តឆ្នាំថ្មី ដើម្បីជំរុញឲ្យយុវជនស្រឡាញ់វប្បធម៌ និងសាមគ្គីភាពរឹងមាំ

2024/03/23 03:34:47 pm        372
Facebook Telegram Linkin
វិទ្យាស្ថានជាតិបណ្តុះបណ្តាលបច្ចេកទេស (NTTI) បានរៀបចំកម្មវិធីសង្ក្រាន្ត ក្រោមប្រធានបទ “យុវជនស្រឡាញ់វប្បធម៌ ទំនៀមទំលាប់ និងអត្តសញ្ញាណជាតិ រួមទាំងមានសាមគ្គីភាពរឹងមាំ” ដើម្បីបង្ហាញអំពីភាពរុងរឿងនៃវប្បធម៌ ក៏ដូចជាបង្ហាញកម្មវិធីរបស់រាជរដ្ឋាភិបាល ក្នុងការបណ្តុះបណ្តាលជំនាញវិជ្ជាជីវៈដល់យុវជន ១,៥លាននាក់។ឯកឧត្តមបណ្ឌិត យ៉ោក សុទ្ធី នាយកវិទ្យាស្ថានជាតិបណ្តុះបណ្តាលបច្ចេកទេស បានមានប្រសាសន៍​ថា នេះជាលើកទី៤ហើយ ដែលថ្នាក់ដឹកនាំវិទ្យាស្ថាន សហការជាមួយក្រុមការងារយុវជនស្ម័គ្រចិត្ត រៀបចំពិធីសង្ក្រាន្តនេះឡើង ដែលសបញ្ជាក់ឲ្យឃើញពីសាមគ្គីភាព ការប្រាស្រ័យទាក់ទងល្អរបស់​យុវជនក្នុងសង្គមឌីជីថល។ បន្ថែមពីនេះទៀត គឺដើម្បីផ្សព្វផ្សាយ វប្បធម៌ អត្តសញ្ញាណជាតិ និងអបអរសាទរ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលមានវ័យចំណាស់ជាងគេក្នុងតំបន់អាស៊ីអាគ្នេយ៍។ ម្យ៉ាងទៀត ក្នុងន័យពង្រឹងស្មារតីយុវជន ពិសេសក្រុមយុវជនស្ម័គ្រចិត្ត NTTI និងសិស្ស និស្សិតក្នុងការបង្កើតចំណងមិត្តភាព និងបង្កើតនូវភាពរីករាយ ទំនាក់ទំនងល្អ ភាពម្ចាស់ការ ព្រមទាំងបង្ហាញពីក្ដីស្រឡាញ់ ​និងសាមគ្គីភាពក្នុងគោលដៅតែមួយរបស់យុវជនជាសរសរទ្រូង និងតំណាងភាពមោះមុតក្នុងការបង្កើតព្រឹត្តិការណ៍មួយនេះ។ ក្នុងពិធីប្រកាសបើកសម្ភោធ សង្ក្រាន្ត NTTI ២០២៤នេះ ឯកឧត្តម ប៉ុក ប៉ាន់ រដ្ឋលេខាធិការ​ក្រសួងការងារ និងបណ្តុះបណ្តាលវិជ្ជាជីវៈ ​បានសំដែងនូវការកោតសរសើរ និងវាយតម្លៃខ្ពស់​ចំពោះកម្មវិធីដ៏មានអត្ថន័យនេះ ព្រមទាំងចាត់ទុកថា ជាការរៀបចំបង្ហាញស្នាដៃនិស្សិត ឬយុវជន តាមរយៈសង្ក្រាន្ត ​និងការចូលរួមសហគម បាន​ឆ្លុះបញ្ចាំង​គំនិចច្នៃប្រឌិតរបស់យុវជន ពោរពេញ​ដោយសមត្ថភាព និងការតស៊ូខ្ពស់នៅក្នុងការងារសហគម។ ឯកឧត្តម ​បានសម្តែងការអបអរសាទរចំពោះសមិទ្ធផលដ៏មានតម្លៃនេះ ​ដែលជាកិច្ចខិតខំប្រឹងប្រែង និង​ចូលរួមយ៉ាងសកម្មពីថ្នាក់ដឹកនាំ មន្រ្តីរាជការ ​និងក្រុមយុវជនស្ម័គ្រចិត្ត រួមទាំងអាជីវកម្ម និង​ក្រុមហ៊ុននានា ដែលបានជម្រុញលទ្ធភាពក្នុងដំណើរការរៀបចំសង្ក្រាន្តជាផ្លូវការនាពេលនេះ ប្រកបដោយស្មារតីសាមគ្គីភាពយ៉ាងជិតស្និទ្ធបំផុត។ ឯកឧត្តម បានគូសបញ្ជាក់ថា ​យុវជនជាធនធានមូលធនមនុស្ស ដើម្បីរួមចំណែក​ជាកម្លាំង​ចលករក្នុងការលើកស្ទួយការអភិវឌ្ឍជាតិ ​ពិសេសវិស័យអប់រំបណ្តុះបណ្តាលបច្ចកេទេស និង​វិជ្ជាជីវៈ បានកាន់តែប្រសើរ ​តាមរយៈការបង្ហាញស្នាដៃ ទេពកោសល្យ ការច្នៃប្រឌិត ប្រកប​ដោយគុណភាព គុណតម្លៃ និងប្រសិទ្ធភាពខ្ពស់ តួយ៉ាងការរៀបចំសកម្មភាពដំណើរការកម្មវិធី “សង្ក្រាន្ត-NTTI-២០២៤” នេះ។សូមជម្រាបថា ព្រឹត្តការណ៍សង្រ្កាន្ត NTTI ២០២៤នេះ រៀបចំឡើងក្នុងបរិវេណវិទ្យាស្ថានជាតិ​បណ្តុះបណ្តាល ដែលមានរយៈពេល ២ថ្ងៃ គឺថ្ងៃទី២៣ និង២៤ ខែមីនា ឆ្នាំ២០២៤។ ព្រឹត្តិការណ៍នេះ មានការចូលរួមយ៉ាងសកម្មរបស់ក្រុមយុវជនស្ម័គ្រចិត្តNTTI ក្នុងគោលដៅបង្ហាញទឹកចិត្តយុវជន​ស្រលាញ់​វប្បធម៌ ទំនៀមទំលាប់ប្រពៃណីជាតិ និងការទទួលខុសត្រូវលើការងារសហគម ចំពោះសង្គមជាតិទាំងបច្ចុប្បន្ន និងអនាគត។ នៅក្នុងដំណើរការកម្មវិធីនេះ ​ឃើញមានការដាក់តាំងបង្ហាញស្នាដៃនិស្សិត ​ស្ថាបត្យកម្ម សំណង់ អគ្គិសនី​ ការច្នៃម៉ូត​សំលៀកបំពាក់ របាំជូនពរ ​របាំត្រុដិ ចាប៉ីដងវែង និងរបាំរស្មីដួងច័ន្ទ។ល។ ដែលជាការសម្តែងដោយនិស្សិតវិទ្យាស្ថានជាតិបណ្តុះបណ្តាលបច្ចេកទេស រួមទាំងមានតារា​ចំរៀងពេញនិយម និងការប្រគុំតន្រ្តីដែលមានការចូលរួមពីសិល្បៈករ សិល្បៈការិនីល្បីៗ​ជាច្រើនរូបផ្សេងទៀត៕អត្ថបទ ឈិត បូរ៉ាវី 

ច្បាប់សន្តិសុខជាតិថ្មីរបស់ទីក្រុងហុងកុង ចូលជាធរមាន

2024/03/23 03:17:52 pm        198
Facebook Telegram Linkin
ច្បាប់សន្តិសុខជាតិថ្មីរបស់ទីក្រុងហុងកុង បានចូលជាធរមានហើយ នៅថ្ងៃសៅរ៍ (ទី២៣ ខែមីនា) បើទោះបីជាច្បាប់នេះរងការរិះគន់ពីអន្តរជាតិយ៉ាងខ្លាំងក្លាក៏ដោយ ដែលថា វាអាចបំផ្លាញសេរីភាពនៅក្នុងទីក្រុងដែលគ្រប់គ្រងដោយប្រទេសចិន ប៉ុន្តែមានស្វ័យភាពមួយចំនួនចេញពីប្រវត្តិសាស្ត្ររបស់ខ្លួន ក្នុងនាមជាអាណានិគមរបស់អង់គ្លេស។ច្បាប់នេះបានចូលជាធរមានកាលពីពាក់កណ្តាលអធ្រាត្រ នៅពេលដែលត្រូវបានផ្សព្វផ្សាយនៅលើគេហទំព័ររបស់រដ្ឋបាលទីក្រុង ពោលគឺមានរយៈពេលប៉ុន្មានថ្ងៃបន្ទាប់ពីសមាជិកសភាគាំទ្រទីក្រុងប៉េកាំងរបស់ទីក្រុងហុងកុងបានអនុម័តជាឯកច្ឆន្ទ ជាការប្រញាប់ប្រញាល់ចេញនូវច្បាប់ ដើម្បីបំពេញនូវអ្វីដែលអាជ្ញាធរហៅថា ចន្លោះប្រហោងផ្នែកសន្តិសុខជាតិ។ នាយកប្រតិបត្តិក្រុងហុងកុងលោក John Lee បានចុះហត្ថលេខាលើច្បាប់សន្តិសុខជាតិថ្មីនេះ កាលពីល្ងាចថ្ងៃសុក្រ (ទី២២ ខែមីនា) ដោយនិយាយថា ទីក្រុង «សម្រេចបាននូវបេសកកម្មជាប្រវត្តិសាស្ត្រ ដោយបំពេញតាមការទុកចិត្តដែលអាជ្ញាធរកណ្តាល (ចិន) មានមកលើពួកយើង»។យ៉ាងណាក្ដី ច្បាប់នេះបានរងនូវការរិះគន់ពីបណ្ដាប្រទេសធំៗជាច្រើន ដោយប្រទេសអូស្ត្រាលី និងអង់គ្លេស កាលពីថ្ងៃសុក្រនោះ បានសម្ដែងការមិនបេញចិត្តចំពោះសកម្មភាពរបស់ប្រទេសចិន នៅក្នុងទីក្រុងហុងកុង បន្ទាប់ពីកិច្ចប្រជុំនៅទីក្រុង Adelaide ដោយបានកត់សម្គាល់នៅក្នុងសេចក្តីថ្លែងការណ៍រួមមួយថា «មានការព្រួយបារម្ភយ៉ាងខ្លាំងអំពីការបន្តលុបបំបាត់ស្វ័យភាព សេរីភាព និងសិទ្ធិជាប្រព័ន្ធ នៅទីក្រុងនេះ»។ អង្គការសហប្រជាជាតិ និងសហភាពអឺរ៉ុបបានរិះគន់ការអនុម័តយ៉ាងឆាប់រហ័ស ចំពោះច្បាប់នេះ ដែលត្រូវបានយកមកពិភាក្សាលើកដំបូងជាសេចក្តីព្រាងច្បាប់ នៅដើមខែមីនា។ ចំណែករដ្ឋមន្ត្រីការបរទេសអាមេរិក លោក Antony Blinken បាននិយាយថា ច្បាប់នេះនឹងមាន «ផលប៉ះពាល់យ៉ាងទូលំទូលាយ» ដល់ពលរដ្ឋអាមេរិក និងក្រុមហ៊ុននានា នៅក្នុងទីក្រុងហុងកុង។ច្បាប់ថ្មីនេះ រួមបញ្ចូលទាំងបទល្មើសក្បត់ជាតិ ចារកម្ម និងការជ្រៀតជ្រែកពីខាងក្រៅ ហើយកំពុងត្រូវបានឃ្លាំមើលយ៉ាងដិតដល់ពីសំណាក់អ្នកការទូត និងក្រុមហ៊ុននានាដែលភ័យខ្លាចថា ច្បាប់នេះអាចធ្វើឲ្យប៉ះពាល់បន្ថែមទៀតដល់ភាពទាក់ទាញរបស់ទីក្រុងហុងកុង ក្នុងនាមជាមជ្ឈមណ្ឌលហិរញ្ញវត្ថុអន្តរជាតិ។ ចិន និងរដ្ឋបាលហុងកុង បានការពារការបង្រ្កាបផ្នែកសន្តិសុខថា ជាកត្តាសំខានចាំបាច់ ក្នុងការស្តារសណ្តាប់ធ្នាប់ឡើងវិញ បន្ទាប់ពីមានការតវ៉ាដោយហិង្សាជាច្រើនខែប្រឆាំងរដ្ឋបាល នៅឆ្នាំ២០១៩។ សូមរំលឹកថា ក្រុងហុងកុងត្រូវបានប្រគល់ឲ្យប្រទេសចិនគ្រប់គ្រងវិញ នៅឆ្នាំ១៩៩៧ ដោយមានការធានាថា ស្វ័យភាព និងសេរីភាពកម្រិតខ្ពស់ ក្នុងនោះរួមទាំងសេរីភាពក្នុងការបញ្ចេញមតិ និងការជួបជុំ នឹងត្រូវបានការពារក្រោមរូបមន្ត «ប្រទេសមួយ ប្រព័ន្ធពីរ»៕

រៀងរាល់ឆ្នាំកសិផលសរីរាង្គក្នុងរង្វង់១ម៉ឺនតោន ត្រូវបានគាំទ្រឱ្យមានទីផ្សារ និងធានាគុណភាពសរីរាង្គអឺរ៉ុប និងអាមេរិក

2024/03/23 01:20:45 pm        112
Facebook Telegram Linkin
ព្រះវិហារ៖ ក្នុងសន្និបាតប្រចាំឆ្នាំ ដើម្បីបង្ហាញពីសមិទ្ធផល ដែលសម្រេចបានក្នុងឆ្នាំ២០២៣ និងលើកទិសដៅផែនការសកម្មភាពសម្រាប់ ឆ្នាំ២០២៤ សហភាពសហគមន៍កសិកម្មព្រះវិហារមានជ័យ បានលើកឡើងថា ជាលទ្ធផល រៀងរាល់ឆ្នាំកសិផលសរីរាង្គ ក្នុងរង្វង់ ១ម៉ឺនតោន ត្រូវបានគាំទ្រឱ្យមាន ទីផ្សារសមរម្យ តាមរយៈការផលិត និងធានាគុណភាពសរីរាង្គអឺរ៉ុប និងអាមេរិក។នាថ្ងៃទី២២ ខែមីនា ម្សិលមិញនេះ សហភាពសហគមន៍កសិកម្មព្រះវិហារ បានរៀបចំមហាសន្និបាត បូកសរុបលទ្ធផលការងារប្រចាំឆ្នាំរបស់ខ្លួន ដើម្បីបង្ហាញពីសមិទ្ធផលសម្រេច ក្នុងឆ្នាំ២០២៣ ពិសេសការប្រមូលធាតុចូលសំខាន់ៗដែលបានមកពីមហាសន្និបាត ដើម្បីយកមកកែលម្អរ និងរៀបចំផែនការសកម្មភាពការងារសម្រាប់អនុវត្តនៅឆ្នាំ២០២៤ បន្ថែមពីនេះ ក៏ជាការពង្រឹងទំនាក់ទំនង និងភាពជាដៃគូររវាងសហគមន៍កសិកម្ម និងស្ថាប័នពាក់ព័ន្ធ រួមមាន ស្ថាប័នរដ្ឋ ក្រុមហ៊ុនឯកជន និងអង្គការក្រៅរាជរដ្ឋាភិបាល។លោក នួន ដេ ប្រធានសហភាពសហគមន៍កសិកម្មព្រះវិហារមានជ័យ បានឱ្យដឹងថា សហភាពសហគមន៍ព្រះវិហារមានជ័យ ត្រូវបានចុះបញ្ជីទទួលស្គាល់ជាផ្លូវការ នៅអគ្គនាយក-ដ្ឋានកសិកម្ម នៅក្នុងខែកក្កដា ឆ្នាំ២០១៦។ មកដល់បច្ចុប្បន្នសហភាព មានសហគមន៍កសិកម្ម ជាសមាជិកសរុបចំនួន ២៥សហគមន៍ ដែលមានសមាជិកជាអ្នកផលិតចំនួន ៥,៤០៣គ្រួសារ។ លោក បន្ដថា គំនិតផ្តួចផ្តើមដំបូង នៃការបង្កើតសហភាពនេះឡើង ក្នុងគោលបំណងជំរុញ និង​គាំទ្រការផលិតស្រូវសរីរាង្គ ជួយពង្រឹង ​និងពង្រីកទីផ្សារកសិផលរបស់ប្រជាកសិករ​ ព្រម ទាំងការ​ទទួល​បាននូវវិញ្ញាបនបត្រស្រូវសរីរាង្គ ​ស្របតាមស្តង់ដាររបស់សហភាពអឺរ៉ុប​ និងសហ-រដ្ឋអាមេរិក​ជារៀងរាល់ឆ្នាំ ដើម្បីលក់ឲ្យក្រុមហ៊ុនអ្នកនាំចេញក្នុងតម្លៃខ្ពស់សមរម្យ។ ក្នុងឱកាសនោះប្រធានមន្ទីរកសិកម្ម រុក្ខាប្រមាញ់ ​និងនេសាទខេត្ត ​លោក ពឹង ទ្រីដា បានថ្លែងអំណរ​គុណដល់ដៃគូរអភិវឌ្ឍន៍ ​និងអ្នកពាក់ព័ន្ធទាំងអស់ដែលបានធ្វើជាដៃគូ ​និងបាន​គាំទ្រដល់សហភាព និង​ថ្លែងកោតសរសើរ ​និងវាយតម្លៃខ្ពស់ ចំពោះសហភាពសហគមន៍ កសិកម្មព្រះវិហារមានជ័យ ដែល​សម្រេចបាននូវលទ្ធផលល្អ ធ្វើឱ្យសហគមន៍ទទួលបានការ រីកចម្រើន។ ជាមួយគ្នានេះលោកក៏បានផ្ដាំផ្ញើ ​ភាពសហគមន៍កសិកម្មព្រះវិហារមានជ័យ ត្រូវបន្តពង្រឹងស្មារតី​សាមគ្គីភាព ​ឯកភាពផ្ទៃក្នុងរបស់ខ្លួនឱ្យបានល្អប្រសើរ​ ធ្វើយ៉ាងណាសម្រេច ឱ្យបាននូវផែនការ​អាជីវកម្មរបស់ខ្លួនឱ្យរឹងមាំ ​សម្ដៅធ្វើឱ្យប្រសើរឡើងនូវការអភិវឌ្ឍ​សហគមន៍​ កសិកម្ម បង្កើន​ប្រាក់ចំណូលកសិករ រួមចំណែកលើកកម្ពស់វិស័យកសិកម្ម ទ្រទ្រង់ខឿនសេដ្ឋ កិច្ចជាតិ ដែល​ជាទិសដៅរបស់រាជរដ្ឋាភិបាលកម្ពុជា ​ក៏ដូចជាក្រសួងកសិកម្ម រុក្ខាប្រមាញ់ និងនេសាទ៕ 

ប្រធានរដ្ឋសភាថៃ អញ្ជើញចូលរួមរំលែកមរណទុក្ខជូនសម្តេចរដ្ឋសភាធិបតី ឃួន សុដារី ដោយផ្ទាល់ នៅគេហដ្ឋានសម្តេច

2024/03/23 12:56:45 pm        197
Facebook Telegram Linkin
ក្នុងមនោសញ្ចេតនាគោរពរាប់អានដ៏ជ្រាលជ្រៅ ឆ្លៀតឱកាសក្នុងដំណើរទស្សនកិច្ចផ្លូវការនៅកម្ពុជា ឯកឧត្តម វ៉ាន់មូហាម៉ាត់ណ មៈថា (Wanmuhamadnoor Matha) ប្រធានសភានៃព្រះរាជាណាចក្រថៃ នៅព្រឹកថ្ងៃទី២៣ ខែមីនាឆ្នាំ២០២៤ បានអញ្ជើញទៅសម្តែងការគួរសមនិងចូលរួមរំលែកមរណទុក្ខ​ដោយផ្ទាល់ ជូនសម្តេចរដ្ឋសភាធិបតី ឃួន សុដារី ប្រធានរដ្ឋសភានៃព្រះណាចក្រកម្ពុជា ចំពោះមរណភាព​ប្អូនប្រុសបង្កើតរបស់សម្តេច ដល់គេហដ្ឋាន នៅក្នុងសង្កាត់ជ្រោយចង្វា ខណ្ឌឬស្សីកែវ រាជធានីភ្នំពេញ។ឯកឧត្តម វ៉ាន់មូហាម៉ាត់ណ មៈថា បានសម្តែងនូវមរណៈទុក្ខដ៏ក្រៀមក្រំជាមួយសម្តេច​ប្រធាន​រដ្ឋសភា ចំពោះការបាត់បង់របស់ ឯកឧត្តម ឃួន ផល្លារិទ្ធ ដែលជាការបាត់បង់ដ៏ធំមួយសម្រាប់ក្រុម​គ្រួសារ​ក៏ដូចជាសង្គមជាតិ។ សម្តេចរដ្ឋសភាធិបតី បានថ្លែងអំណរគុណនិងបង្ហាញក្តីរំភើបឥតឧបមា ដែលឯកឧត្តម វ៉ាន់មូហាម៉ាត់ណ មៈថា បានផ្ញើសារ និងកូរ៉ោនផ្ការំលែកទុក្ខជូនសម្តេចនិងក្រុមគ្រួសារ។ ជាពិសេសវត្តមានឯកឧត្តម ដែលបានអញ្ជើញមកដល់គេហដ្ឋានសម្តេចផ្ទាល់នាឱកាសនេះ បានផ្តល់​កិត្តិយស និងកម្លំាងចិត្ត យ៉ាងខ្លំាងក្លាជូនសម្តេចនិងក្រុមគ្រួសារ នៅក្នុងឱកាសមានទុក្ខ​ដ៏ក្រៀមក្រំនេះ។ ជាមួយគ្នានេះ សម្តេចបានសូមអភ័យទោសជូន ឯកឧត្តមប្រធានរដ្ឋសភា ដែលមិនអាចទទួលបដិសណ្ឋារកិច្ច និងជួបពិភាក្សាការងារផ្ទាល់ជាមួយឯកឧត្តម និងគណៈប្រតិភូបាន តាមការគ្រោងទុកបាន។ នៅក្នុងឱកាសប្រកបដោយ​មនោសញ្ចេតនា​ដ៏ជ្រាលជ្រៅនេះ ​ប្រធានរដ្ឋសភាប្រទេសទំាងពីរ ក៏បានលើកឡើងពីការពង្រឹងពង្រីកចំណងមិត្តភាពនិងកិច្ចសហប្រតិបត្តិការរដ្ឋសភាប្រទេសទំាងពីរឱ្យកាន់តែរីកចម្រើនឡើងជាពិសេសការឈានទៅការរៀបចំកែសម្រួលអនុស្សរណៈយោគយល់គ្នា រវាងរដ្ឋសភាប្រទេសទាំងពីរឡើងវិញ ​នៅគ្រប់កម្រិត ទាំងកិច្ចសហប្រតិបត្តិការថ្នាក់ដឹកនាំ គណៈកម្មការ​ជំនាញ ក្រុមមិត្តភាព អគ្គលេខាធិការរដ្ឋសភា ​ឱ្យស្របតាមសភាពការណ៍ ដើម្បីបម្រើ​ផលប្រយោជនជូនប្រទេសជាតិនិងប្រជាជនប្រទេសទំាងពីរឱ្យកាន់តែមានប្រសិទ្ធភាពឡើង។ ឯកឧត្តម វ៉ាន់មូហាម៉ាត់ណ មៈថា ​បានគោរពអញ្ជើញសម្តេចប្រធានរដ្ឋសភា ដឹកនាំ​គណៈប្រតិភូ​ជាន់​ខ្ពស់រដ្ឋសភាកម្ពុជា​ ទៅបំពេញសទស្សនកិច្ចនៅប្រទេសថៃក្នុងពេលឆាប់ៗនេះ។ សម្តេច បានទទួលយកសំណើនេះ និងបានគូសបញ្ជាក់ថាការពង្រឹងពង្រីកចំណងមិត្តភាព​ជាមួយរដ្ឋ​សភាប្រទេសថៃ ជាអាទិភាពសំខាន់មួយរបស់រដ្ឋសភាកម្ពុជា។ សម្តេចបានបញ្ជាក់ពីការគំាទ្រ ​ចំពោះការលើកឡើងរបស់ឯកឧត្តម ដែលថា “មានមិត្តជិតខាង​ល្អម្នាក់ ប្រសើរជាងមិត្តលល្អដប់នាក់ដែលស្ថិតនៅឆ្ងាយ”។ឯកឧត្តម ប្រធានរដ្ឋសភាថៃ បានអបអរសាទរជូនសម្តេចរដ្ឋសភាធិបតី ដែលត្រូវបានរដ្ឋសភា​បោះឆ្នោត​ជាប់ជាប្រធានរដ្ឋសភា ​និងជាស្រ្តីដំបូងនៅកម្ពុជាទទួលបានតំណែងដ៏សំខាន់នេះ។ ឆ្លងកាត់បទពិសោធន៍ និងពលីកម្មចូលរួមកសាងអភិឌ្ឍន៍សង្គមជាតិតំាងពីរដើមមក ឯកឧត្តមមានជំនឿមុតមាំថា សម្តេសរដ្ឋសភានឹងដឹកនាំស្ថាបន័រដ្ឋ​សភាឱ្យសម្រេច​បាននូវលទ្ធផលជាច្រើនទៀតជូនជាតិមាតុភូមិ។ សម្តេចរដ្ឋសភាធិបតី បានសម្តែងក្តីរីករាយ ​និងវាយតម្លៃខ្ពស់ចំពោះលទ្ធផលដំណើរទស្សនកិច្ច​របស់ ឯកឧត្តម វ៉ាន់មូហាម៉ាត់ណ មៈថា នៅកម្ពុជា។ ជាពិសេសលទ្ធផលនៃជំនួបពិភាក្សាទ្វេភាគី​រវាង ឯកឧត្តម និងឯកឧត្តមកិត្តិសេដ្ឋាបណ្ឌិត ជាម យៀប ប្រធានរដ្ឋសភាស្តីទី។លទ្ធផលជំនួបពិភាក្សានោះមិនត្រឹមតែលើកកម្ពស់កិច្ចសហប្រតិបត្តិរដ្ឋសភាប្រទេសទំាងពីរឱ្យសកម្មនិងគ្រប់ជ្រុងជ្រោយឡើងនោះទេ ថែមទំាងបានជំរុញនិងលើកកម្ពស់កិច្ចសហប្រតិបត្តិការ ភាពជាដៃគូយុទ្ធសាស្រ្ត នៃរាជរដ្ឋាភិបាលប្រទេសទំាងពីរ កាន់តែទទួលបានជោគជ័យច្រើនឡើង នៅលើគ្រប់គ្រប់វិស័យ ​មានទំាងវិស័យសេដ្ឋកិច្ច ពាណិជ្ជកម្ម ទេសចរណ៍ កសិកម្ម ជាពិសេសទំនាក់ទំនង​ប្រជាជននិងប្រជាជននៃប្រទេសទំាងពីរ៕

កងទ័ពមីយ៉ាន់ម៉ា មានចំណាត់ការចុះបញ្ជីក្រុមជនស៊ីវិលជាលើកដំបូង ចូលជាយោធា

2024/03/23 12:04:47 pm        124
Facebook Telegram Linkin
កងទ័ពសហភាពមីយ៉ាន់ម៉ា មានចំណាត់ការដើម្បីចុះឈ្មោះជនស៊ីវិលជាក្រុមដំបូងរបស់ខ្លួន ចូលជាយោធា ដោយមានលិខិតកោះហៅ ដែលតាមសេចក្តីរាយការណ៍ថា បានបញ្ជូនទៅកាន់បេក្ខជនដែលមានសិទ្ធិ នៅតំបន់ផ្សេងៗរបស់សហភាពមីយ៉ាន់ម៉ា។ លិខិត ពុំអាចជាទម្រង់ស្តង់ដារនោះទេ ប៉ុន្តែវាមានសារដូចគ្នា ដែលណែនាំអ្នកទទួលឱ្យចុះឈ្មោះចូលបម្រើយោធា ហើយបានព្រមានថា ការខកខានក្នុងការរាយការណ៍នឹងនាំឱ្យមានការកាត់ទោស។នេះគឺស្របតាមច្បាប់យោធាដែលបានអនុម័តកាលពីពេលថ្មីៗនេះ ដែលបានបង្កឱ្យមានការព្រួយបារម្ភជាច្រើនជុំវិញភាពតានតឹង រហូតដល់ការកើនឡើងអំពើហិង្សាក្នុងពេលវិបត្តិដែលកំពុងកើតមាន។ ប្រជាពលរដ្ឋដែលមានអាយុពី ១៨ ដល់ ៣៥ឆ្នាំ ហើយក្នុងករណីខ្លះរហូតដល់ ៤៥ ឆ្នាំ ត្រូវបានតម្រូវឱ្យចូលបម្រើកងទ័ព នៅក្រោមច្បាប់នេះ។អ្នកទទួលលិខិតម្នាក់ ដែលបដិសេធមិនប្រើឈ្មោះពេញ ជាបុរសអាយុ ៣១ ឆ្នាំ បានទទួលលិខិតកាលពីពាក់កណ្តាលខែមីនា ដែលត្រូវបានកោះហៅទៅកាន់ការិយាល័យសង្កាត់ក្នុងតំបន់របស់លោក បាននិយាយថា ពេលដែលលោកដឹងថាឈ្មោះរបស់លោកមាននៅក្នុងបញ្ជី លោកត្រូវតែធ្វើចំណាកស្រុក។ អ្នកគ្រប់គ្នាដឹងថា នឹងមានអ្វីកើតឡើងប្រសិនបើអ្នកត្រូវបានគេកែណ្ឌឲ្យធ្វើទាហាន។ យើងត្រូវបានផ្ដល់ជម្រើសដូចជា ការលះបង់ខ្លួនឯង បើមិនដូច្នេះទេត្រូវភៀសខ្លួន ដែលលោកសុខចិត្តធ្វើជាអ្នកសុំទាននៅក្រៅប្រទេស។

អ្នកការទូតជាន់ខ្ពស់អាមេរិក ព្រមានអ៊ីស្រាអែល ពីភាពឯកោជាសកល ប្រសិនបើបន្តការវាយលុក ទីក្រុង Rafah

2024/03/23 12:02:14 pm        160
Facebook Telegram Linkin
រដ្ឋមន្ត្រីការបរទេសសហរដ្ឋអាមេរិក លោក Antony Blinken បានព្រមាននាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃសុក្រថា អ៊ីស្រាអែលប្រឈមហានិភ័យភាពឯកោជាសកលបន្ថែមទៀត ប្រសិនបើប្រទេសនេះបន្តផែនការវាយលុកតាមជើងគោកលើទីក្រុង Rafah របស់ប៉ាឡេស្ទីននៅតំបន់ហ្កាហ្សា។ លោក Blinken បានជួបជាមួយលោក Netanyahu ក្នុងអំឡុងពេលបេសកកម្មសន្តិភាពទៅកាន់តំបន់មជ្ឈិមបូព៌ា ខណៈមានភាពតានតឹងក្នុងទំនាក់ទំនងជុំវិញការវាយលុករបស់អ៊ីស្រាអែលនៅតំបន់ហ្កាហ្សា ដែលគ្រប់គ្រងដោយក្រុមហាម៉ាស។ លោក Blinken បាននិយាយទៅកាន់អ្នកសារព័ត៌មាននៅទីក្រុង Tel Aviv ថាយើងចែករំលែកគោលដៅរបស់អ៊ីស្រាអែលក្នុងការកម្ចាត់ក្រុមហាម៉ាស ទោះបីជាយ៉ាងណាប្រតិបត្តិការជើងគោករបស់យោធាទ្រង់ទ្រាយធំនៅទីក្រុង Rafah ពុំមែនជាវិធីដើម្បីធ្វើដូច្នេះឡើយ។ លោក Blinken បាននិយាយថា វាមានហានិភ័យចំពោះការសម្លាប់ជនស៊ីវិលកាន់តែច្រើន វាមានហានិភ័យចំពោះការបំផ្លាញកាន់តែខ្លាំងសម្រាប់ការផ្តល់ជំនួយមនុស្សធម៌ វាមានហានិភ័យភាពនៅឯកោបន្ថែមទៀតសម្រាប់អ៊ីស្រាអែលនៅជុំវិញពិភពលោក និងធ្វើឱ្យប៉ះពាល់ដល់សន្តិសុខ និងជំហរយូរអង្វែង។លោក Netanyahu បាននិយាយកាលពីពេលមុនថា អ៊ីស្រាអែលនឹងដើរតែម្នាក់ឯង ប្រសិនបើទីក្រុងវ៉ាស៊ីនតោន នៅតែប្រឆាំងនឹងផែនការរុលចូលទៅក្នុងទីក្រុង Rafah នៅរបងព្រំដែនភាគខាងត្បូង ជាកន្លែងដែលពលរដ្ឋតំបន់ហ្កាហ្សាជាងមួយលាននាក់បានជ្រកកោននៅក្នុងទីជម្រកបណ្តោះអាសន្ន។ មេដឹកនាំអ៊ីស្រាអែល បាននិយាយថាលោកបានប្រាប់ លោក Blinken ថាលោកកោតសរសើរចំពោះការគាំទ្ររបស់សហរដ្ឋអាមេរិកក្នុងការប្រយុទ្ធប្រឆាំងក្រុមហាម៉ាស ជាក្រុមសកម្មប្រយុទ្ធប៉ាឡេស្ទីន ហើយ អ៊ីស្រាអែល ទទួលស្គាល់ថាវាចាំបាច់ដើម្បីការពារជនស៊ីវិល។អ៊ីស្រាអែល និយាយថាទីក្រុង Rafah គឺជាទីតាំងលាក់ខ្លួនចុងក្រោយរបស់ក្រុមសកម្មប្រយុទ្ធហាម៉ាស ហើយខ្លួនមានផែនការជម្លៀសជនស៊ីវិលមុនពេលមានការវាយប្រហារ។ ទីក្រុង វ៉ាស៊ីនតោន និយាយថា ការវាយលុកតាមជើងគោក អាចជាកំហុសមួយ និងបង្កគ្រោះថ្នាក់ខ្លាំងដល់ជនភៀសខ្លួននៅទីនោះ។

សភាអាមេរិក អនុម័តសេចក្តីស្នើច្បាប់មូលនិធិ១,២សែនកោដិដុល្លារ ដើម្បីបញ្ចៀសការបិទរដ្ឋាភិបាល

2024/03/23 11:58:52 am        161
Facebook Telegram Linkin
សភាសហរដ្ឋអាមេរិក កាលពីថ្ងៃសុក្រ បានអនុម័តសេចក្តីស្នើច្បាប់ផ្តល់មូលនិធិចំនួន ១,២ សែនកោដិដុល្លាររបស់រដ្ឋាភិបាល ដោយមានការគាំទ្រពីគណបក្សប្រជាធិបតេយ្យច្រើនជាងគណបក្សសាធារណរដ្ឋ ដែលនាំឱ្យមានការគំរាមកំហែងថ្មីដោយសមាជិកសភាអភិរក្សនិយមប្រកាន់តឹង ដើម្បីបណ្តេញប្រធានសភា លោក Mike Johnson ។ការបោះឆ្នោតមានសំឡេង ២៨៦ទល់នឹង១៣៤សំឡេង នៅក្នុងសភា ដែលបានបញ្ជូនទៅព្រឹទ្ធសភាភាគច្រើនមកពីគណបក្សប្រជាធិបតេយ្យ ដែលមានរយៈពេលច្រើនម៉ោងដើម្បីមានចំណាត់ការ មុនពេលផុតកំណត់នៅពាក់កណ្តាលអធ្រាត្រ ថ្ងៃសៅរ៍ ។ចំណាត់ការនេះ គឺជាជំហានដ៏សំខាន់មួយឆ្ពោះទៅរកការបញ្ចប់ការប្រយុទ្ធគ្នាជាងប្រាំមួយខែលើសកម្មភាពនៃការចំណាយរបស់ទីក្រុងវ៉ាស៊ីនតោនសម្រាប់ឆ្នាំសារពើពន្ធ ដែលបានចាប់ផ្តើមនៅថ្ងៃទី ១ ខែតុលា។ ទីភ្នាក់ងារវាយតម្លៃ បានព្រមានថាភាពច្របូកច្របល់ម្តងហើយម្តងទៀត អាចប៉ះពាល់ដល់ភាពជឿជាក់នៃរដ្ឋាភិបាលសហព័ន្ធដែលបច្ចុប្បន្នមានបំណុលច្រើនជាង៣៤,៦សែនកោដិដុល្លារ។វិធានការ ត្រូវបានអនុម័តដោយសភា មានសំឡេងឆ្នោត១៨៥ របស់គណបក្សប្រជាធិបតេយ្យ និង ១០១សំឡេងរបស់គណបក្សសាធារណរដ្ឋ ដែលនាំឱ្យអ្នកតំណាងអភិរក្សនិយមប្រកាន់តឹង លោកស្រី Marjorie Taylor Greene ណែនាំវិធានការមួយដើម្បីបណ្តេញចេញប្រធានសភាគណបក្សសាធារណរដ្ឋ លោក Mike Johnson ។ លោក Johnson បានឡើងកាន់តំណែងនេះកាលពីខែតុលា បន្ទាប់ពី អ្នកកាន់តំណែងមុនរបស់លោកគឺ លោក Kevin McCarthy បានអនុម័តវិធានការផ្តល់មូលនិធិបណ្តោះអាសន្នលើការជំទាស់របស់ពួកគេ ដោយបណ្តេញលោកចេញពីតំណែងជាអ្នកដឹកនាំ។

រាជរដ្ឋាភិបាលអំពាវនាវឲ្យភាគីពាក់ព័ន្ធបង្កើនល្បឿនទប់ស្កាត់ជំងឺរបេង បើទោះបីបច្ចុប្បន្នជំងឺនេះ មានការធ្លាក់ចុះក្តី

2024/03/23 11:25:51 am        133
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអំពាវនាវដល់ភាគីពាក់ព័ន្ធទាំងអស់ គប្បីត្រូវបន្តយកចិត្តទុកដាក់បន្ថែមទៀត ក្នុងការបង្កើនល្បឿនប្រយុទ្ធនឹងជំងឺរបេង បើទោះបីបច្ចុប្បន្នកម្ពុជា មានការធ្លាក់ចុះច្រើននូវជំងឺនេះក៏ដោយ ប៉ុន្តែការងារប្រយុទ្ធប្រឆាំងនឹងជំងឺរបេងនេះនៅតែមានបញ្ហា ប្រឈមមួយចំនួនដដែល។តាមរយៈសារលិខិត ក្នុងឱកាសប្រារព្ធទិវាពិភពលោក កំចាត់រោគរបេង ក្រោមប្រធានបទ«មែន ហើយ!យើងអាចបញ្ចប់ជំងឺរបេងបាន» ដែលនឹងប្រព្រឹត្តទៅនាថ្ងៃទី២៤ ខែមីនា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តី បានលើកឡើងថា កម្ពុជាបានសម្រេចសមិទ្ធផល​គួរជាទីមោទនៈក្នុង ការប្រយុទ្ធប្រឆាំងនឹងជំងឺរបេងអស់រយៈពេលប៉ុន្មានឆ្នាំកន្លងមកនេះ ខណៈ២០ឆ្នាំមុនកម្ពុជាស្ថិតនៅ ក្នុងចំណោមប្រទេសដែលមានអត្រាអ្នកកើតជំងឺរបេងខ្ពស់ជាងគេ នៅលើពិភពលោក តែក្នុងរយៈពេល យ៉ាងខ្លីកម្ពុជាបានក្លាយជាប្រទេសគំរូមួយ លើពិភពលោកចំពោះការងារកំចាត់ជំងឺរបេង យ៉ាងសកម្ម និង ប្រកបដោយប្រសិទ្ធភាព ដោយលទ្ធផលគាប់ប្រសើរនេះ គឺបានកើតចេញពីកិច្ចខិតខំប្រឹងប្រែងរួមគ្នារបស់ ប្រជាជាតិកម្ពុជា ដែលក្នុងនោះតាមរយៈការពង្រីកសេវាពិនិត្យ និងព្យាបាលពីរាជរដ្ឋាភិបាល។យ៉ាងណាក៏ដោយសម្តេចធិបតី នាយករដ្ឋមន្រ្តី បានលើកឡើងថា បើទោះបីជាកម្ពុជាទទួលបាន ជោគជ័យយ៉ាងនេះក៏ដោយ ក៏សម្តេចនៅតែយល់ថា ការងារប្រយុទ្ធប្រឆាំងនឹងជំងឺរបេងនេះនៅតែមាន បញ្ហាប្រឈមមួយចំនួន ដែលតម្រូវឲ្យភាគីទាំងអស់បង្កើនល្បឿននៃកិច្ចខិតខំប្រឹងប្រែងបំពេញកិច្ចការ បន្ថែមទៀត ដើម្បីកាត់បន្ថយជាអតិបរមានូវអត្រាឈឺ និងស្លាប់ដោយសារជំងឺរបេងស្របតាមគោលដៅអភិវឌ្ឍន៍ប្រកបដោយចីរភាពកម្ពុជា និងសកលលោក។សម្តេចបានបន្ថែមថា«ក្នុងស្មារតីនេះ យើងទាំងអស់គ្នាចាំបាច់ត្រូវបន្តជំរុញការយកចិត្តទុកដាក់ ដោះស្រាយបញ្ហាពាក់ព័ន្ធនឹងជំងឺរបេង ប្រកបដោយស័ក្តិសិទ្ធភាពនិងប្រសិទ្ធភាពខ្ពស់ ដើម្បីលើកកម្ពស់ សុខភាព និងគុណភាពនៃការរស់នៅរបស់ប្រជាពលរដ្ឋ ដែលជាអាទិភាពដ៏សំខាន់មួយក្នុងយុទ្ធសាស្រ្ត បច្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ សំដៅរួមចំណែកក្នុងការអភិវឌ្ឍមូលធន មនុស្ស ដែលជាកត្តាចាំបាច់មិនអាចខ្វះបានក្នុងការអភិវឌ្ឍសង្គម-សេដ្ឋកិច្ចទាំងមូល»។ក្នុងសារលិខិតដដែលនេះដែរ សម្តេចធិបតី នាយករដ្ឋមន្រ្តីក៏បានអំពាវនាវឲ្យមានការខិតខំ ប្រឹងប្រែងបន្ថែមទៀត ក្នុងការស្រាវជ្រាវស្វែងរកជំងឺរបេងប្រកបដោយស្មារតីបុរេសកម្ម នៅតាមសហគមន៍ និងវត្តអារាម និងបន្តថែរក្សាឲ្យបានខ្ពស់នូវអត្រាព្យាបាលជោគជ័យនៃជំងឺឲ្យបានលើ៩០ភាគរយ និងខិត ខំកៀរគធនធានមនុស្សបន្ថែមទៀតសម្រាប់បម្រើឲ្យការងារប្រយុទ្ធជំងឺរបេងជាដើម។តាមរយៈសារលិខិតនេះដែរសម្តេចធិបតី ហ៊ុន ម៉ាណែត នាយករដ្ឋមន្រ្តី ក៏បានប្រកាសថ្លែងអំណរ គុណដល់ភាគីពាក់ព័ន្ធទាំងអស់ ទាំងក្នុងនិងក្រៅប្រទេស រួមទាំងមន្រ្តី បុគ្គលិកសុខាភិបាលនៅទូទាំងប្រ ទេសគ្រប់រូប ដែលបានចូលរួមចំណែកធ្វើឲ្យការងារកំចាត់ជំងឺរបេងទទួលបានជោគជ័យក្នុងពេលកន្លងមក និងសូមសម្តែងការគាំទ្រ ជាថ្មីម្តងទៀតដល់សកម្មភាពប្រយុទ្ធនឹងជំងឺរបេង នៅកម្ពុជាក៏ដូចជានៅ ទូទាំងពិភពលោកផងដែរ៕ អត្ថបទបាន ចក់

បណ្ដាញសង្គម

ព័ត៌មានថ្មីៗ

លោក Trump និយាយថា ប្រធានាធិបតីចិន បានឯកភាពលើកិច្ចព្រមព្រៀង TikTok
09/20/2025 11:09 AM
Facebook Telegram Linkin
លោកTrump ចុះហត្ថលេខាលើសេចក្តីប្រកាសបង្កើតតម្លៃពាក្យស្នើសុំទិដ្ឋាការ H-1B តម្លៃ១សែនដុល្លារ
09/20/2025 11:09 AM
Facebook Telegram Linkin
ពលរដ្ឋប៉ាឡេស្ទីនរត់ភៀសខ្លួន ខណៈអ៊ីស្រាអែលវាយលុកក្រុងហ្កាហ្សាដោយ«កម្លាំងមិនធ្លាប់មានពីមុនមក»
09/20/2025 11:09 AM
Facebook Telegram Linkin
សហភាពអឺរ៉ុប ស្វះស្វែងបញ្ឈប់ការប្រើប្រាស់ឧស្ម័នរុស្ស៊ីឲ្យបានឆាប់ បន្ទាប់ពីយុទ្ធនាការជំរុញរបស់លោក Trump
09/20/2025 11:09 AM
Facebook Telegram Linkin
កម្មករកម្មការិនី អរគុណរាជរដ្ឋាភិបាលចំពោះការបន្តផ្តល់រថយន្តទៅស្រុកកំណើត ដោយមិនគិតថ្លៃនាឱកាសបុណ្យភ្ជុំបិណ្ឌ
09/20/2025 11:09 AM
Facebook Telegram Linkin
ក្រសួងបរិស្ថានប្រកាសរកឃើញសត្វម្រើមព្រះចំនួន៣ប្រភេទ ជាកំណត់ត្រាថ្មីសម្រាប់ពិភពលោក នៅតំបនភ្នំថ្មកំបោរ ក្នុងខេត្តបាត់ដំបង និងខេត្តកំពត
09/20/2025 10:09 AM
Facebook Telegram Linkin
សមាជិកសម្ព័ន្ធណាតូប្រទេសអេស្តូនីនិយាយថា យន្តហោះរុស្ស៊ីបីគ្រឿងរំលោភដែនអាកាសរបស់ខ្លួន
09/20/2025 10:09 AM
Facebook Telegram Linkin
រដ្ឋបាលរបស់លោកTrump ស្វែងរកការអនុម័តលក់អាវុធតម្លៃ៦,៤ពាន់លានដុល្លារទៅឱ្យអ៊ីស្រាអែល
09/20/2025 10:09 AM
Facebook Telegram Linkin
ក្រុមប្រឹក្សាសន្តិសុខអង្គការសហប្រជាជាតិ បោះឆ្នោតដាក់ទណ្ឌកម្មលើអ៊ីរ៉ង់ឡើងវិញជុំវិញកម្មវិធីនុយក្លេអ៊ែរ
09/20/2025 09:09 AM
Facebook Telegram Linkin
UN អនុញ្ញាតឱ្យប្រធានអាជ្ញាធរប៉ាឡេស្ទីន ថ្លែងសុន្ទរកថាតាមវីដេអូ បន្ទាប់ពីអាមេរិកបដិសេធទិដ្ឋាការ
09/20/2025 08:09 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.