នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អូស្រ្តាលីគាំទ្រកម្ពុជា ក្នុងការសម្រេចបាននូវកំណើន និងការអភិវឌ្ឍសេដ្ឋកិច្ចជាតិ
ក្រុមការងារក្រសួងធនធានទឹកចុះពិនិត្យការអនុវត្តគម្រោងស្តារអូរយាយហុក ក្នុងភូមិសាស្រ្តខេត្តពោធិ៍សាត់
ក្រុមការងារក្រសួងធនធានទឹកបន្តចុះពិនិត្យជាក់ស្តែងស្ថានភាពទឹកតាមអាងទឹក និងប្រឡាយក្នុងភូមិសាស្រ្តខេត្តស្វាយរៀង និងព្រៃវែង
ដំឡូងមី និងគ្រាប់ស្វាយចន្ទីរបស់កម្ពុជា នឹងត្រូវនាំចេញទៅទីផ្សារចិនក្នុងគ្រាបន្ទាប់

សេដ្ឋកិច្ច និង កសិកម្ម

កម្ពុជាទទួលបានគម្រោងវិនិយោគចំនួន ៥៣ មានទុនសរុបជាង ១,២ ពាន់លានដុល្លារអាម៉េរិក

2024/09/10 11:16:38 am        113
Facebook Telegram Linkin
ក្រុមប្រឹក្សាអភិវឌ្ឍន៍កម្ពុជា ក្នុងខែ សីហា ឆ្នាំ ២០២៤ បានអនុម័តគម្រោងថ្មីចំនួន ៤៦ និង​គម្រោង​ពង្រីក​ផលិតកម្មចំនួន ៧ មានទុនវិនិយោគសរុបជាង ១,២ ពាន់លានដុល្លារអាម៉េរិក ក្នុងនោះចិន​វិនិយោគជាប់លំដាប់លេខរៀងទី១ បានរួមចំណែកជាង ៨៤ ភាគរយ ខណៈ​ការ​វិនិយោគ​ក្នុង​ស្រុក​គ្របដណ្តប់ជាង ៩ ភាគរយ នៃទុនវិនិយោគសរុប។ក្រុមប្រឹក្សាអភិវឌ្ឍន៍កម្ពុជា បានបង្ហាញរបាយការណ៍វិនិយោគនៅក្នុងខែ សីហា ឆ្នាំ ២០២៤ ក្នុង​នោះ​បា​ន​អនុម័តគម្រោងថ្មី ចំនួន ៤៦ គម្រោង និងគម្រោងពង្រីកផលិតកម្មចំនួន ៧ គម្រោង ដែល​មានទុនវិនិយោគសរុបប្រមាណ ជាង ១,២ ពាន់លានដុល្លារ អាម៉េរិក ដោយអាច​បង្កើត​ការងារ​បាន​ប្រមាណ ៣៣ ពាន់កន្លែង។ ក្នុងចំណោមគម្រោងវិនិយោគសរុប, គម្រោង​វិនិយោគ​ដែល​មាន​ ទីតាំងស្ថិតនៅក្រៅតំបន់សេដ្ឋកិច្ចពិសេស មានចំនួន ៣១ គម្រោង និងគម្រោង​វិនិយោគ​ដែល​មានទីតាំងស្ថិតនៅក្នុងតំបន់សេដ្ឋកិច្ច ពិសេស មានចំនួន ២២ គម្រោង។ចំពោះគម្រោងវិនិយោគដែលមានភាពលេចធ្លោជាងគេ ប្រចាំខែ សីហា នេះ នៅក្រៅតំបន់​សេដ្ឋកិច្ច​ពិសេស​រួមមាន៖ គម្រោង ពង្រីកផលិតកម្មរបស់គម្រោងវិនិយោគ បង្កើតសណ្ឋាគារ​ផ្កាយ ៥ ស្ថិតនៅក្រុងព្រះសីហនុ ខេត្តព្រះសីហនុ មានទុនវិនិយោគបន្ថែម ៨០ លាន​ដុល្លារ​អាម៉េរិក, គម្រោងពង្រីកផលិតកម្ម របស់គម្រោងវិនិយោគបង្កើតរោងចក្រផលិតចំណីសត្វ និង​កែ​ច្នៃ​ស្បែកសត្វ ស្ថិត នៅស្រុកព្រៃនប់ ខេត្តព្រះសីហនុ ក្នុងទុនវិនិយោគបន្ថែមប្រមាណជាង ១៩ លាន​ដុល្លារអាម៉េរិក, គម្រោងពង្រីកបន្ថែមមុខសញ្ញា ផលិតកម្ម កែច្នៃផលិត​ផល​ពាក់​កណ្ដាល​សម្រេច Gelatine Granule ដែលជាផលិតផលបច្ចុប្បន្ន របស់ក្រុមហ៊ុន ទៅជាផលិតផល សម្រេច​ជាច្រើនផ្សេងទៀតស្ថិតនៅស្រុកព្រៃនប់ ខេត្តព្រះសីហនុ ក្នុងទុនវិនិយោគបន្ថែម ២៨ លានដុល្លារ​អាម៉េរិក, គម្រោងវិនិយោគ បង្កើតកសិដ្ឋានបង្កាត់ពូជ និងចញ្ចឹមគោ សេះ សត្វចតុប្បាទ​ផ្សេងៗ និងរោងចក្រកែច្នៃផលិតចំណីសត្វ និងមន្ទីរពិសោធន៍ មានទីតាំង ស្ថិតនៅ​ស្រុក​ដំណាក់បង្អើរ ខេត្តកែប មានទុនវិនិយោគជាង ២៥ លានដុល្លារអាម៉េរិកផងដែរ។ដោយឡែកនៅក្នុងតំបន់សេដ្ឋកិច្ចពិសេសរួមមាន៖ គម្រោង​បង្កើត​តំបន់​សេដ្ឋកិច្ច​ពិសេស​ស្រុក​ស្រែ​អំបិល មានទីតាំងស្ថិត ឃុំជ្រោយស្វាយ ស្រុកស្រែអំបិល ខេត្តកោះកុង ក្នុងទុនវិនិយោគចំនួន ៨០ លានដុល្លារអាម៉េរិក, គម្រោងវិនិយោគបង្កើតរោងចក្រ ផលិតសំបកកង់រថយន្ត មានទីតាំង​ស្ថិតនៅ​ក្នុ​ងតំបន់សេដ្ឋកិច្ចពិសេស យូ ប៊ី អី ស្នួល ក្នុងទុនវិនិយោគ ៤៣០ លានដុល្លារអាម៉េរិក,3. គម្រោងវិនិយោគបង្កើតរោងចក្រផលិតសំបកកង់រថយន្ត មានទីតាំង​ស្ថិត​នៅ​ក្នុង​តំបន់​សេដ្ឋកិច្ច​ពិសេស ស៊ីន បាវិត ក្នុងទុនវិនិយោគ ជាង ២៥៦ លានដុល្លារអាម៉េរិក, គម្រោងវិនិយោគ​បង្កើត​រោង​ចក្រ​ផលិតភេសជ្ជៈគ្រប់ប្រភេទ គ្មានជាតិអាល់កុល ស្ថិតនៅក្នុងតំបន់ សេដ្ឋកិច្ចពិសេស​សុវណ្ណ​ភូមិ ក្នុងទុនវិនិយោគជាង ៤០ លានដុល្លារអាម៉េរិក៕ អត្ថបទ៖ សុន រ៉ាឌី

កំពង់ផែស្វយ័តភ្នំពេញប្រមូលចំណូលបានជាង ២៧លានដុល្លារអាម៉េរិក ក្នុងរយៈពេល៨ខែនេះ

2024/09/10 10:56:52 am        128
Facebook Telegram Linkin
កំពង់ផែស្វយ័តភ្នំពេញ ក្នុងរយៈពេល ៨ខែ ឆ្នាំ ២០២៤ នេះ ប្រមូល​ចំណូល​ដោយ​មិន​ទាន់​ធ្វើ​សវនកម្ម បានចំនួនសរុបប្រមាណ ជាង ២៧ លានដុល្លារអាម៉េរិក កើនឡើង ១៥ ភាគរយ បើ​ធៀប​រយៈ​ពេលដូចគ្នាទៅនិងឆ្នាំមុន។តាមប្រកាសព័ត៌មាន របស់កំពង់ផែស្វយ័តភ្នំពេញ បានបង្ហាញឱ្យដឹងថា សម្រាប់ការ​ប្រមូល​ចំណូល​ប្រចាំខែសីហា ឆ្នាំ២០២៤នេះ កំពង់ផែស្វយ័តភ្នំពេញអនុវត្តន៍​ការ​ប្រមូល​ចំណូល​សរុប​បាន​ចំនួន​ជាង ៤ លានដុល្លារអាម៉េរិក កើនឡើង ២៥ ភាគរយ បើធៀបរយៈ​ពេល​ដូចគ្នា​ទៅ​និង​ឆ្នាំ​មុន ​ក្នុងនោះការប្រមូលចំណូលពីប្រតិបត្តិការផែ បានចំនួន ៣,៨ លានដុល្លារអាម៉េរិក, ចំណូល​ពីអាជ្ញាធរផែ ជាង ៥៥ ពាន់ដុល្លារ និងចំណូលពីសេវាកម្មផ្សេងៗ ៤៣ម៉ឺនដុល្លារ។ចំណែកការប្រមូលចំណូលនៅក្នុងរយៈ ៨ ខែ ឆ្នាំ ២០២៤ នេះវិញ, ឃើញថា ការ​ប្រមូល​ចំណូល​ដោយ​មិន​ទាន់ធ្វើសវនកម្ម របស់កំពង់ផែស្វយ័តភ្នំពេញ មានចំនួនសរុបជាង ២៧ លានដុល្លារ​អាម៉េរិក​ កើនឡើង ១៥ ភាគរយ បើធៀបរយៈពេលដូចគ្នាទៅ និងឆ្នាំមុន ក្នុងនោះការ​ប្រមូល​ចំណូល​ពី​ប្រតិបត្តិការផែ បានចំនួនជាង ២២ លានដុល្លារអាម៉េរិក, ចំណូលពីអាជ្ញាធរផែ ជាង ៣ លាន​ដុល្លារ និងចំណូលពីសេវាកម្មផ្សេងៗជិត ១០ ពាន់ដុល្លារ។សូមបញ្ជក់ថា នៅក្នុងរយៈ ៨ ខែ ឆ្នាំ ២០២៣ កន្លងទៅនេះ កំពង់ផែស្វយ័តភ្នំពេញ អនុវត្តន៍​ការ​ប្រមូល​ចំណូល​សរុបបានជាង ២៣ លានដុល្លារអាម៉េរិកប៉ុណ្ណោះ ខណៈរយៈពេល​ដូចគ្នា​ក្នុង​ឆ្នាំ​នេះ ការប្រមូលចំណូលបានបង្ហាញនូវនិន្នាការកើនឡើង ដោយសរបញ្ជាក់ ឱ្យឃើញថា សកម្មភាព​នៃ​ការដឹកជញ្ជូនតាមផ្លូវទឹក បានកម្រើកឡើងវិញជាបណ្តើរៗ៕ អត្ថបទ៖ សុន រ៉ាឌី

ស្ថាប័នរដ្ឋចំនួនពីរសហការគ្នាក្នុងក្របខណ្ឌប្រើប្រាស់បច្ចេកវិទ្យាឌីជីថល ដើម្បីជំរុញការវិនិយោគ

2024/09/10 10:36:35 am        99
Facebook Telegram Linkin
ក្រុមប្រឹក្សាអភិវឌ្ឍន៍កម្ពុជា និងធនាគារជាតិនៃកម្ពុជា រួមគ្នាបន្តកិច្ចសហការ ក្នុងក្រប​ខណ្ឌ​ប្រើប្រាស់​បច្ចេកវិទ្យាឌីជីថល ដើម្បី ជំរុញការវិនិយោគ ស្របតាមចក្ខុវិស័យរបស់រាជរដ្ឋាភិបាល នីតិកាលទី ៧ ដែលចាត់ទុកបច្ចេកវិទ្យាឌីជីថលជាអាទិភាពគន្លឹះ។ឯកឧត្តម ហ៊ាង សុទ្ធាយុត្តិ អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា នៅ​ក្នុងជំនួបពិភាក្សាការងារ និងស្ដាប់បទបង្ហាញរបស់មន្ត្រីជំនាញនៃធនាគារជាតិនៃកម្ពុជា នៅ​ថ្ងៃទី៩ ខែកញ្ញា ឆ្នាំ ២០២៤ នេះ បានបង្ហាញការស្វាគមន៍យ៉ាង កក់ក្ដៅដល់ប្រតិភូ​នៃ​ធនាគារ​ជាតិ​នៃ​កម្ពុជា ដែលបានចំណាយពេលវេលា ដើម្បីធ្វើបទបង្ហាញអំពីប្រព័ន្ធធនាគារអនឡាញ (OBS) និងប្រព័ន្ធបាគង ជូនដល់មន្ត្រីជំនាញ នៃក្រុមប្រឹក្សាអភិវឌ្ឍន៍កម្ពុជា។ ស្របគ្នា​នឹង​ឱកាស​នេះ ឯកឧត្តមបានរំលេចជូនអំពីវឌ្ឍនភាព ថ្មីៗរបស់ក្រុមប្រឹក្សាអភិវឌ្ឍន៍កម្ពុជា លើ​កិច្ច​ការ​ងារ​ពាក់​ព័ន្ធបច្ចេកវិទ្យា រួមមានការដាក់ចេញឱ្យប្រើប្រាស់ សាកល្បងផ្ទៃក្នុងប្រព័ន្ធគ្រប់ គ្រង​គម្រោង​វិនិយោគកម្ពុជា (CDC Investment Project Management) ឬប្រព័ន្ធ cdcIPM ដែល​កិច្ចការងារនេះ បានអនុវត្ត ស្របតាមចក្ខុវិស័យរបស់រាជរដ្ឋាភិបាល នីតិកាលទី ៧ នៃរដ្ឋសភា ដែល​បានចាត់ទុកបច្ចេកវិទ្យាឌីជីថលជាអាទិភាពគន្លឹះ ជាបញ្ចកោណទី៥ ដើម្បីការ​អភិវឌ្ឍ​ សេដ្ឋកិច្ច និងសង្គមឌីជីថល។ទាក់ទិនបញ្ហានេះដែរ, មន្ត្រីជំនាញនៃធនាគារជាតិនៃកម្ពុជា ក៏បាន​ធ្វើ​បទ​បង្ហាញ​យ៉ាង​ក្បោះ​ក្បាយ​ជូន​ដល់​អង្គប្រជុំ អំពី ព័ត៌មានជាមូលដ្ឋានរបស់ប្រព័ន្ធទាំងពីរ ដែលបានចូលរួមបម្រើប្រយោជន៍ និង​ការតភ្ជាប់ លើវិស័យហិរញ្ញវត្ថុ និងធនាគារជួយសម្រួល ដល់កិច្ចការងារផ្ទេរ-និង​ទូទា​ត់​សាច់​ប្រាក់​បាន​យ៉ាងល្អប្រសើរ។ ជុំវិញកិច្ចសហការលើច្ចេកវិទ្យាឌីជីថលនេះ, អង្គប្រជុំបានពិភាក្សា ផ្លាស់​ប្ដូរយោបល់យ៉ាងផុសផុល ដោយក្នុងនោះភាគីទាំងពីរបានឯកភាព នឹងបន្តកិច្ច​សហការ​ជិត​ស្និទ្ធ និងពិនិត្យលទ្ធភាពក្នុងការ ប្រើប្រាស់ ក៏ដូចជាតភ្ជាប់ប្រព័ន្ធនានា ដើម្បីបម្រើប្រយោជន៍ សា​ធារណៈ។សូមបញ្ជាក់ថា ហេដ្ឋារចនាសម្ព័ន្ធទូទាត់ដែលអភិវឌ្ឍដោយធនាគារជាតិនៃកម្ពុជា មានជា​ច្រើន​ប្រព័ន្ធ​ ក្នុងនោះប្រព័ន្ធធនាគារអេឡិច ត្រូនិច OBS បានកំពុងដាក់ឱ្យដំណើរការ ដោយមាន​សមាជិក​ចំនួន ៨១រួមមនា៖ ធនាគារពាណិជ្ជ ៦៥, ធនាគារឯកទេស ២, គ្រឹះ ស្ថានមីក្រូហិរញ្ញវត្ថុ​ទទួល​ប្រាក់​បញ្ញើ ៤, គ្រឹះស្ថានមិនមែនទទួលប្រាក់បញ្ញើ ១, គ្រឹះស្ថានផ្តល់សេវាទូទាត់សងប្រាក់ ១៧ និងស្ថាប័ន រដ្ឋចំនួន ១ ផងដែរ។ ចំណែកប្រព័ន្ធទូទាត់បាគង បានកំពុង​ជំរុ​ញ​ប្រើ​ប្រាស់​សេវា​ទូទាត់​សង​ប្រាក់ និងជំរុញឱ្យសាធារណជន និង សហគ្រាសធ្វើប្រតិបត្តិការហិរញ្ញវត្ថុឌីជីថល បាន​កាន់តែប្រសើរជាងមុន៕ អត្ថបទ៖ សុន រ៉ាឌី

កម្ពុជា-ចិន ជំរុញការអភិវឌ្ឍន៍លើគម្រោងសំខាន់ៗឱ្យសម្រេចតាមផែនការ ដើម្បីប្រយោជន៍​ដល់កម្ពុជា

2024/09/10 10:02:08 am        126
Facebook Telegram Linkin
កម្ពុជា-ចិន បាននិងកំពុងពិនិត្យវឌ្ឍនភាព ដើម្បីពន្លឿនដល់វិនិយោគិនចិន ដែលអភិវឌ្ឍន៍​គម្រោង​វិនិយោគសំខាន់ៗនៅកម្ពុជា ជំរុញអនុវត្តឱ្យសម្រេចតាមផែនការសកម្មភាពរបស់ខ្លួន ឬ​បានឆាប់រហ័សជាងនេះ ដើម្បីបម្រើដល់ផលប្រយោជន៍ជាតិនៃកម្ពុជា។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុង​ជំនួប​ទទួល​ទាន​អាហារជាមួយ ឯកឧត្តម Zheng Shanjie ប្រធានក្រុមប្រឹក្សាភិបាល នៃ​គណៈ​កម្មាធិការ​ជាតិ​អភិវឌ្ឍន៍និងកំណែទម្រង់ចិន (NDRC) និងឯកឧត្តម Wu Hao អគ្គលេខាធិការ នៃ NDRC នៅសាធារណរដ្ឋប្រជាមានិតចិន ថ្ងៃទី ៩ ខែ កញ្ញា ឆ្នាំ ២០២៤ នេះ បាន​ពិភាក្សា​លើ​ការងារ​អភិវឌ្ឍន៍គម្រោងវិនិយោគសំខាន់ៗនៅកម្ពុជា ដើម្បីពិនិត្យអំពីវឌ្ឍនភាព នៃកិច្ចការងារ​អភិវឌ្ឍន៍​គម្រោងវិនិយោគមួយចំនួន ដែល វិនិយោគិនចិនបានបណ្ដាក់ទុនរួចរាល់នៅកម្ពុជា ដើម្បី​ធានាថា គម្រោងការងារទាំងអស់អាចអនុវត្តទៅដោយជោគជ័យ ក្រោមការ ជំរុញ​ពន្លឿន​នីតិវិធីការងារ រវាងភាគីទាំងពីរកម្ពុជា-ចិន ក្នុងគោលដៅរួម ឱ្យគម្រោង​ទាំង​នោះ​សម្រេច​បាន​ឆាប់​រហ័ស ដើម្បីបម្រើ ប្រយោជន៍ជាតិកម្ពុជា។ជាក់ស្ដែងដូចជាគម្រោងព្រែកជីកហ្វូណនតេជោជាដើម, គណៈកម្មាធិការជាតិអភិវឌ្ឍន៍ និង​កំណែ​ទ​ម្រង់ចិន បានបង្ហាញការ ប្តេជ្ញាចិត្ត នឹងជួយជំរុញ​ឱ្យ​ក្រុម​ហ៊ុន​ចិន​ដែល​វិនិយោគ​ក្នុង​គម្រោង​នេះ អនុវត្តការងារឱ្យសម្រេចបានលទ្ធផលតាមកាលកំណត់ ឬមុន កាលកំណត់ ដែល​បានដាក់ចេញក្រោមការឯកភាពពីរាជរដ្ឋាភិបាលកម្ពុជា គឺអំឡុងឆ្នាំ ២០២៨។សូមបញ្ជាក់ថា តាមរយៈទំនាក់ទំនងទ្វេភាគីយ៉ាងជិតស្និតរវាងប្រទេសទាំងពីរ ប្រទេសចិ​ន​បាន​ជួយ​វិនិយោគលើការសាងសង់ហេដ្ឋា- រចនាសម្ព័ន្ធជាច្រើន ដោយក្នុងនោះមានផ្លូវប្រវែងជាង ៣ ០០០ គីឡូម៉ែត្រ និងស្ពានចំនួន ១៦ ឆ្លងកាត់ទន្លេមេគង្គ ទន្លេសាប ទន្លេ បាសាក់ និងទន្លេ​ដទៃ​ទៀត​ត្រូវ​បានសាងសង់ឡើង ហើយគម្រោងហេដ្ឋារចនាសម្ព័ន្ធសំខាន់ៗទាំងនេះ បានត​ភ្ជាប់​សហគមន៍​សម្រួល- ពាណិជ្ជកម្ម ការដឹកជញ្ជូន ជំរុញកំណើនសេដ្ឋកិច្ចសង្គម ដោយបាន​កំពុង​លើក​កម្ពស់​ជីវភាពរស់នៅរបស់ ប្រជាពលរដ្ឋកម្ពុជា៕ អត្ថបទ៖ សុន រ៉ាឌី 

ក្រុមហ៊ុន អ អិម អេ ខេមបូឌា ផ្នែកគ្រឿងយន្តកសិកម្ម និងគ្រឿងចក្រធុនធ្ងន់ បើកសម្ពោធ​ជាផ្លូវការ​នូវទីតាំងអគារតាំងបង្ហាញថ្មីរួមគ្នា

2024/09/09 12:14:30 pm        185
Facebook Telegram Linkin
ក្រុមហ៊ុន អ អិម អេ ខេមបូឌា ផ្នែកគ្រឿងយន្តកសិកម្ម និងផ្នែកគ្រឿងចក្រធុនធ្ងន់ សម្ពោធ​ទីតាំង​បង្ហាញ​គ្រឿង​យន្តកសិកម្ម ចនឌារ និងផ្នែកគ្រឿងចក្រធុនធ្ងន់ ដែលមានគ្រឿងចក្រ ជេស៊ីប៊ី រថយន្ត​ដឹក​ទំនិញ ហ៊្វុយសូ និងគ្រឿងចក្រផលិតបេតុងអាចាក ស្ថិតតាមបណ្តោយផ្លូវជាតិលេខ ៦អា កែងនិងមហាវិថី ឈ្នះ ឈ្នះ។ក្នុងពិធីសម្ពោធអគារតាំងបង្ហាញថ្មីរួមគ្នា នាព្រឹកថ្ងៃទី៩ ខែកញ្ញា ឆ្នាំ២០២៤នេះ លោក ងន សាំង អគ្គនាយកក្រុមហ៊ុន អ អិម អេ (ខេមបូឌា) បានថ្លែងថា ក្រុមហ៊ុន អ អិម អេ បាននាំយក​ផលិតផល​មកកាន់ទីផ្សារប្រទេសកម្ពុជា មិនមែនយកផលិតផលមកលក់ ដើម្បីតែថវិកានោះទេ។ ប៉ុន្តែក្រុមហ៊ុនមានការប្តេជ្ញាចិត្តខ្ពស់ ក្នុងការពង្រីក ពង្រឹងផលិតផលទាំងអស់នោះ ក្នុងទីផ្សារ​កម្ពុជាឲ្យដំណើរការហើយគោលដៅរបស់ក្រុមហ៊ុន គឺចង់បានលេខ០១ ក្នុងទីផ្សារតែម្តង។ ដូច្នេះ​ថ្ងៃ​នេះ​ទើប​ក្រុមហ៊ុន ត្រូវការសម្ពោធ និងពង្រីកទីតាំងថ្មី ស្ថិតតាមបណ្តោយផ្លូវជាតិលេខ ៦អា កែង​ និងមហាវិថី ឈ្នះ ឈ្នះ។គួរបញ្ជាក់ថា ក្រុមហ៊ុន បានផ្លាស់ប្តូរពីទីតាំង តាំងបង្ហាញគ្រឿងយន្តកសិកម្ម និងផ្នែកគ្រឿង​ចក្រ​ធុនធ្ងន់​ចាស់​ដែលស្ថិតនៅតាមបណ្តោយផ្លូវ 2004 ដោយមានការគាំទ្រ​ជា​ខ្លាំង​ពី​សំណាស់​អតិថិជន​ក្នុង​ការប្រើប្រាស់។ ដូច្នេះយើងបានប្តូរមកទីតាំងថ្មីនេះ ដែលមានទំហំដី 13,500 ម៉ែត្រ​ការ៉េ​សម្រាប់ធ្វើការតាំងបង្ហាញ ជួសជុល អោយមានវិសាលភាពធំទូលំទូលាយ។ សម្រាប់​ផ្នែក​គ្រឿង​យន្ត​កសិកម្មក្រុមហ៊ុន អ អិម អេ (ខេមបូឌា) បាននាំចូលនូវ ត្រាក់ទ័រចនឌារ (Jonh Deere) ដែលជាផលិតផលលេខមួយរបស់សហរដ្ឋអាមេរិក ដែលមាន ប្រភេទត្រាក់ទ័រកម្លាំង 28សេះ រហូតដល់ 410សេះ។ សម្រាប់ផ្នែកគ្រឿងចក្រធុនធ្ងន់ក្រុមហ៊ុន អ អិម អេ (ខេមបូឌា) បាននាំចូលនូវគ្រឿងចក្រ ជេស៊ីប៊ី (JCB) ជាគ្រឿង​ចក្រ​ម៉ាក​ល្បី​លំដាប់​ថ្នាក់​ពិភព​លោក​ដែល​ជា​ផលិត​ផល​លេខមួយ របស់ចក្រភពអង់គ្លេសដែលរួមមានផលិតផលជាច្រើនដូចជា អេស្កាវ៉ាទ័រ គ្រឿង​ចក្របក្សី រ៉ូឡូ សាស័រគ្រឿងចក្រស្ទូចលើកដាក់ទំនិញ។ ផ្នែកគ្រឿងចក្រធុនធ្ងន់ក៏មាន រថយន្ត​ដឹកទំនិញ ហ៊្វុយសូ (FUSO) ដែលជាផលិតលេខមួយរបស់ជប៉ុនដែលមានទម្ងន់ចាប់ពី 1.5 រហូតដល់ 25 តោន។ មិនត្រឹមតែប៉ុណ្ណោះគ្រឿងចក្រផលិតបេតុងអាចាក (AJAX) ជាគ្រឿង​ចក្រ​ម៉ាក​ល្បីលំដាប់ថ្នាក់ពិភពលោកដែលជាផលិតផលលេខមួយ របស់ប្រទេសឥណ្ឌា ដែលមាន​នូវ​រថយន្តផលិត និងក្រឡុកបេតុងចល័ត ម៉ាស៊ីនបាញ់បេតុងចល័ត និងសាយឡូផលិតបេតុង ក៏​ជា​ម៉ាកផលិតផលមួយក្នុងចំណោមបីនៃផ្នែកគ្រឿងចក្រធុនធ្ងន់ផងដែរ។ ក្រុមហ៊ុន អ អិម អេ (ខេមបូឌា) ផ្នែកគ្រឿងយន្តកសិកម្ម និងផ្នែកគ្រឿងចក្រធុនធ្ងន់មានទីតាំង អគារតាំងបង្ហាញ ចំនួន ៧ ដែលមានទីតាំងកណ្តាលនៅរាជធានីភ្នំពេញ និងតាមបណ្តាខេត្តមួយចំនួនទៀតដូចជា៖ ខេត្តកំពង់ស្ពឺ កំពង់ធំ តាកែវ សៀមរាប ពោធិ៍សាត់ បាត់ដំបង កន្លងមកនេះ ក្រុមហ៊ុន​បាន​ចូល​រួម​ចំណែក​ជាមួយរាជរដ្ឋាភិបាល និងប្រជាជនកម្ពុជា ក្នុងវិស័យ សាងសង់ ហេដ្ឋារចនាសម្ព័ន្ធ ប្រព័ន្ធ​ធារា​សាស្រ្ត សំណង់ធំៗ កសិកម្ម និងការដឹកជញ្ជូន​អោយ​កាន់​តែ​មាន​ភាព​រីក​ចម្រើន​តាមរយៈ​ផលិតផល​ទាំងអស់ខាងលើ។ វាក៏ផ្តល់ភាពងាយស្រួលក្នុងការប្រើប្រាស់ ចំណេញពេលវេលា ខ្លាំង រហ័ស ស៊ីប្រេងតិច ធុន រឹងមាំ សន្សំសំចៃ និងបច្ចេកវិទ្យាទំនើប ដែលអតិថិជន​មាន​ការ​ពេញ​និយម​ប្រើប្រា​ស់ក្នុងពេលសព្វថ្ងៃនេះ។ ជាពិសេសគឺសេវាកម្មថែទាំអតិថិជន ក្រោយពេលទិញ មិន​បារម្មណ៍អំពីហានិភ័យ ផ្សេងៗលើការ​ជួស​ជុល​ដោយ​យថាហេតុ​ណាមួយ និង​ចំណាយ​ច្រើន​លើកា​រ​ជួសជុល ព្រោះមានការធានាច្បាស់លាស់ពីក្រុមហ៊ុន RMA និងពីរោងចក្រផលិតផ្ទាល់ ដែល​ផ្តល់នូវទំនុកចិត្តខ្ពស់ដល់អតិថិជនក្នុងការប្រើប្រាស់ផលិតផលដែលមានគុណភាពខ្ពស់។ បន្ថែម​ពីនេះទៅទៀត យើងក៏មានសេវាកម្មចែកចាយ ថែទាំ និងជួសជុល ២៤ម៉ោង និង២៥ រាជ​ធានីខេត្ត ក្រៅពីទីតាំងបង្ហាញផងដែរ ដែល​ជា​កម្លាំង​ចលករ​មួយ​យ៉ាង​សំខាន់​ក្នុង​ការ​ជំរុញ​អោយ​វិស័យ សាងសង់ ហេដ្ឋារចនាសម្ព័ន្ធ ប្រព័ន្ធធារាសាស្រ្ត សំណង់ធំៗ កសិកម្ម និងការ​ដឹក​ជញ្ជូន​កាន់​តែមានភាពរីកចម្រើន៕ អត្ថបទ រដ្ឋា 

ឯកឧត្តម ឌិត ទីណា៖ វិស័យស្រូវអង្ករនឹងអាចរីកចម្រើនទៅមុខបាន ចាំបាច់ទាមទារឲ្យស្ថាប័នរដ្ឋ និងឯកជន សហការគ្នា

2024/09/06 02:45:37 pm        781
Facebook Telegram Linkin
ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លើកឡើងថា ការងារស្រូវ-អង្ករ គឺជាការងារអន្តរស្ថាប័នទាំងរដ្ឋ និងវិស័យឯកជន ដែលទាមទារឲ្យមានការសហការគ្នាល្អ រួមគ្នា​ពិនិត្យលើបញ្ហាប្រឈម ក៏ដូចជារកដំណោះស្រាយជាមួយគ្នា ដើម្បីជំរុញ​វិស័យ​ស្រូវ​អង្ករ​ឲ្យ​កាន់​តែ​រីកចម្រើនទៅមុខបន្ថែមទៀត។ក្នុងឱកាសដឹកនាំកិច្ចប្រជុំក្រុមការងារផ្នែកស្រូវ-អង្ករ (ក្រុម ឈ) នៃវេទិការាជរដ្ឋាភិបាល-ផ្នែក​ឯកជន កាលពីរសៀលថ្ងៃទី៥ ខែកញ្ញា ឆ្នាំ២០២៤កន្លងទៅ ឯកឧត្តម ឌិត ទីណា បាន​គូស​បញ្ជាក់​ថា ការងារស្រូវ-អង្ករនេះ ទាំងស្ថាប័នរដ្ឋ និងវិស័យឯកជន ពិតជាត្រូវ​រួមគ្នា​ពិនិត្យ​លើ​បញ្ហា​ប្រឈម​នានា វិភាគវាយតម្លៃឱ្យបានច្បាស់លាស់ តាមរយៈការក្តោបព័ត៌មានគ្រប់ជ្រុងជ្រោយ ដើម្បី​ពិភាក្សារកដំណោះស្រាយមានរយៈពេលវែង ទទួលយកបានទាំងអស់គ្នា និង​មាន​ផល​ប្រយោជន៍​រួម​ជាលក្ខណៈសេដ្ឋកិច្ច ទាំងសម្រាប់វិស័យឯកជន និងសេដ្ឋកិច្ចជាតិ។បើ​តាម​ក្រសួងកសិកម្ម រុក្ខាប្រមាញ់ និងនេសាទ អង្គប្រជុំនេះ មានរបៀបវារៈចំនួន ៣សំខាន់ រួម​មាន ផ្នែកផលិតកម្មនិងការដាំដុះ ផ្នែកផលិតកម្ម-ការកិនកែច្នៃ ផ្នែកពន្ធដារក្នុងវិស័យស្រូវអង្ករ។ សហគមន៍​អ្នកផលិត តំណាងរោងម៉ាស៊ីនកិនស្រូវ ក្រុមហ៊ុននាំចេញអង្ករ និងថ្នាក់​ដឹកនាំ​នៃ​ក្រសួង​កសិកម្ម រុក្ខាប្រមាញ់ និងនេសាទ បានស្ដាប់និងពិភាក្សាយ៉ាងលម្អិតលើរបៀបវារៈទាំង៣ និង​សំណើរបស់ភាគីឯកជន មុននឹងឯកឧត្តមរដ្ឋមន្ដ្រី សហប្រធានក្រុមការងារផ្នែកស្រូវ-អង្ករ (ក្រុម ឈ) ផ្ដល់ជម្រើសដំណោះស្រាយចំពោះសំណើនីមួយៗ។ចំពោះ​សំណើមួយចំនួនដែលស្ថិតនៅក្រៅដែនសមត្ថកិច្ចរបស់ក្រសួងកសិកម្ម រុក្ខាប្រមាញ់ និង​នេសាទ ឯកឧត្តមរដ្ឋមន្ដ្រី បានផ្ដល់អនុសាសន៍ដល់ភាគីឯកជន លើក​យក​ទៅ​ប្រជុំ​ពិភាក្សា​ជាមួយ​ក្រុមការងារទទួលបន្ទុក ដើម្បីទទួលបានដំណោះស្រាយដែលមានលក្ខណៈប្រាកដនិយម អាច​អនុវត្តបាន និងទទួលបានផលចំណេញទាំងអស់គ្នា រាប់ចាប់តាំងពីអ្នកផលិតពូជស្រូវសុទ្ធ ប្រជា​កសិករ រោងម៉ាស៊ីនកិនស្រូវ និងក្រុមហ៊ុននាំចេញអង្ករ ជាដើម៕ អត្ថបទ៖ ឈិត បូរ៉ាវី 

CSX សហការជាមួយក្រុមហ៊ុនក្នុងស្រុកដើម្បីលើកកម្ពស់ការយល់ដឹងវិស័យផ្សារហ៊ុន

2024/09/04 04:30:37 pm        644
Facebook Telegram Linkin
ផ្សារមូលបត្រកម្ពុជា (CSX) និងធនាគារ អេស៊ីលីដា ភីអិលស៊ី បានសហការរៀបចំកម្មវិធី "វេទិកា​ក្រុមហ៊ុនចុះបញ្ជី" ដើម្បីផ្សព្វផ្សាយអំពីសក្តានុពលវិស័យផ្សារហ៊ុននៅកម្ពុជា ក៏ដូចជា បង្ហាញ​នូវវឌ្ឍនភាពរបស់ធនាគារ អេស៊ីលីដា ដើម្បីឱ្យវិនិយោគិន បានស្វែងយល់​ពី​កាលា​នុវត្តភាព​របស់​ធនាគារនាពេលបច្ចុប្បន្ន និងអនាគត។ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា នៅ​ក្នុង​ពិធី​បើកវេទិកា នាព្រឹកថ្ងៃទី៤ កញ្ញា ឆ្នាំ២០២៤នេះ បានមានប្រសាសន៍ថា វេទិកា​ក្រុមហ៊ុន​ចុះ​បញ្ជី ត្រូវបានរៀបចំជារៀងរាល់ឆ្នាំ ក្នុងគោលបំណងពង្រឹង និងពង្រីក​ទំនុក​ចិត្ត និង​សមត្ថភាព​វិភាគ​ទៅ​កាន់​វិនិយោគិន និងវិនិយោគសក្តានុពលវិស័យផ្សារហ៊ុន មុននឹងសម្រេច​ចិត្ត​វិនិយោគ​ប្រកប​ដោយ​ទំនុកចិត្ត។ ឯកឧត្តម បានបន្តថា ការរៀបចំកម្មវិធីបែបនេះ នឹងធ្វើឲ្យ​វិនិយោគិន​អាច​សម្រេច​ចិត្ត​បានកាន់តែល្អប្រសើរក្នុងការវិនិយោគ ពិសេសពាក់ព័ន្ធនឹងវិនិយោគរយៈពេលវែង។ឯកឧត្តមប្រតិភូ បានគូសបញ្ជាក់ថា ទីផ្សារមូលបត្រមួយអាចដំណើរការទៅបានល្អ តម្រូវ​ឲ្យ​មាន​ទាំង​ក្រុម​ហ៊ុនចុះបញ្ជីល្អៗ និងវិនិយោគប្រកបដោយចំណេះដឹង និងព័ត៌មាន។ ជាក់ស្តែង ដូច​ក្នុង​ពេល​នេះ ផ្សារមូលបត្រកម្ពុជាកំពុងតែបន្ថែមចំណេះដឹង និងព័ត៌មានល្អៗ​ជូន​វិនិយោគិន​ដើម្បី​ឲ្យ​វិនិយោគិន​កាន់​តែមានទំនុកចិត្ត និងអាចធ្វើការសម្រេចចិត្តដោយខ្លួនឯង។លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ថា គិត​មក​ដល់​ពេលនេះ អេស៊ីលីដា បានបោះផ្សាយលក់មូលបត្រកម្មសិទ្ធិ និងចុះបញ្ជី​ភាគ​ហ៊ុន​នៅ​ផ្សារ​មូល​បត្រ​កម្ពុជា មានរយៈពេល ៤ឆ្នាំហើយ ដែលមានការចូលរួមពីវិនិយោគិនសរុបចំនួនជាង ២,០០០នាក់ ដោយកាន់កាប់ភាគហ៊ុនចំនួនជាង ៤,៣លានភាគហ៊ុន នៃភាគ​ហ៊ុន​សរុប​របស់​ធនាគារ អេស៊ីលីដា។ លោកបន្ថែមថា ក្នុងនាមជាក្រុមហ៊ុនបោះផ្សាយលក់មូលបត្រកម្មសិទ្ធិ ធនាគារ អេស៊ីលីដា នៅតែប្តេជ្ញារក្សាស្តង់ដារខ្ពស់បំផុត ក្នុងការប្រតិបត្តិអភិបាលកិច្ចសាជីវកម្ម និង​ការ​រក្សាតម្លាភាព ដើម្បីធានាថាភាគីពាក់ព័ន្ធទាំងអស់នឹងទទួលបានព័ត៌មានធនាគារ និង​អត្ថ​ប្រយោជន៍​ផ្សេង​ៗ ដូចៗគ្នាប្រកបដោយប្រសិទ្ធភាព ដូចជា ការជូនដំណឹងអំពី ផែនការ​យុទ្ធសាស្ត្រ របាយការណ៍ហិរញ្ញវត្ថុ ភាគលាភ និងគំនិតផ្តួចផ្តើមសំខាន់ៗ របស់ធនាគារ។គិត​ត្រឹមដំណាច់ខែមិថុនា ឆ្នាំ២០២៤ វិនិយោគិន របស់ធនាគារ អេស៊ីលីដា កើនឡើងចំនួនជាង ១ម៉ឺន ៨ពាន់នាក់ ស្មើនឹង ជាង៣៥% នៃចំនួនវិនិយោគិនសរុបនៅផ្សារមូលបត្រកម្ពុជា ខណៈ​ភាគ​ហ៊ុន​ដែលកំពុងជួញដូរនៅលើទីផ្សារមូលបត្រកម្ពុជា មានចំនួន ៧៦លានភាគហ៊ុន នៃភាគ​ហ៊ុន​សរុប​របស់ធនាគារ អេស៊ីលីដា ចំនួន ៤០០លានភាគហ៊ុន។ ដោយឡែក គិតត្រឹមត្រី​មាស​ទី​២ ឆ្នាំ២០២៤ ទំហំមូលធនូបនីយកម្មទីផ្សារសរុបមានតម្លៃប្រហែល ១១,២២ ប៊ីលានរៀល ស្មើ​នឹង​ប្រមាណ ២.៧៣ពាន់លានដុល្លារអាមេរិក ឬស្មើនឹង ៨,៧៥% ធៀបនឹងផលិត​ផល​ក្នុង​ស្រុក​សរុ​ប​៕ អត្ថបទ ឈិត បូរ៉ាវី

ក្រសួងមហាផ្ទៃ និងធនាគារកាណាឌីយ៉ា ក.អ ចុះអនុស្សារណៈលើការប្រមូលកម្រៃទិដ្ឋាការ​ពីអតិថិជន

2024/09/04 10:49:14 am        210
Facebook Telegram Linkin
ក្រសួងមហាផ្ទៃ និងធនាគារកាណាឌីយ៉ា ក.អ បានចុះអនុស្សារណៈនៃការយោគយល់គ្នា ស្តីពីការ​ប្រើប្រាស់​សេវាកម្មទូទាត់តាមប្រព័ន្ធ អេឡិចត្រូនិច លើការប្រមូលកម្រៃទិដ្ឋាការពីអតិថិជន ដោយ​ភ្ជាប់​ជាមួយនិងប្រព័ន្ធអេឡិចត្រូនិច និងសលាកបត្រចូលព្រះរាជាណាចក្រ កម្ពុជា។ឯកឧត្តមនាយឧត្តមសេនីយ៍ សេង យូអ៊ាន់ អគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ និងឧកញ៉ា ឆារស៍ វ៉ាន់ អភិបាលនៃធនាគារកាណឌីយ៉ា ក.អ នៅថ្ងៃទី៤ ខែ កញ្ញា ឆ្នាំ២០២៤នេះ បានចុះអនុស្សារណៈនៃការយោគយល់គ្នា ស្តីពីការប្រើប្រាស់សេវាកម្ម​ទូទាត់​តាមប្រព័ន្ធអេឡិចត្រូនិច លើការប្រមូលកម្រៃទិដ្ឋាការពីអតិថិជន ដោយភ្ជាប់ជាមួយ​និង​ប្រព័ន្ធអេឡិចត្រូនិច និងសលាកបត្រចូលព្រះរាជាណាចក្រកម្ពុជា (Cambodia e-Arrival)។ក្នុងពិធីចុះអនុស្សារណៈនេះ, ឯកឧត្តមសន្តិបណ្ឌិត គៀត ច័ន្ទថារិទ្ធ រដ្ឋលេខាធិការ​ក្រសួងមហាផ្ទៃ លើកឡើងថា រាជរដ្ឋាភិបាលនៅក្នុងការអាណត្តិទី៧ បានដាក់ចេញ​នូវ​យុទ្ធសាស្រ្តបញ្ចាកោណដំណាក់កាលទី១ ដែលដឹកនាំបន្តនូវសមិទ្ធផលទាំងឡាយ ពីយុទ្ធសាស្រ្តចតុកោណដំណាក់កាលទី៤ ដោយក្នុងនោះមានកិច្ចការជាច្រើន ដែលរាជរដ្ឋាភិបាលដាក់ចេញឱ្យអនុវត្តន៍ និងមានការងារ បង្កើនគុណភាព និងប្រសិទ្ធភាពនៃការផ្តល់សេវាសាធារណៈ ដែលជាចំណុចសំខាន់មួយនៅក្នុងយុទ្ធសាស្រ្ត បញ្ហាកោណរបស់រាជរដ្ឋាភិបាល ក្នុងនោះកម្មវិធី Cambodia e-Arrival នេះ គឺជាកិច្ចការមួយនៃការបង្កើនគុណភាព និងប្រសិទ្ធភាព នៃការផ្តល់សេវាសាធារណៈ។ឯកឧត្តមសន្តិបណ្ឌិត បន្តលើកឡើងថា ជុំវិញបញ្ហានេះ កន្លងមកភ្ញៀវទេសចរដែលចូលមកព្រះរាជាណាចក្រកម្ពុជា គឺត្រូវបំពេញឯកសារដោយសរសេរដៃ ដែលមានឯកសារយ៉ាងតិចចំនួន ៣ ទៅ ៤ ។ ដូច្នេះដើម្បីសម្រួលការផ្តល់សេវាកម្មនេះឱ្យបានស្រួល ក្រសួងមហាផ្ទៃបានរៀបចំកម្មវិធី ឱ្យភ្ញៀវបំពេញតាមរយៈប្រព័ន្ធអេឡិចត្រូនិច ដែលមានឈ្មោះថា Cambodia e-Arrival តាមរយៈនេះ ការបំពេញម្តង គឺអាចបំពេញជំនួសដល់ទៅ ៤ ដង។ឯកឧត្តមសន្តិបណ្ឌិត គៀត ច័ន្ទថារិទ្ធ បន្តថា បញ្ហានេះ មុនដំបូងគឺយើងមិនទាន់បានគិតគូរពីការសុំទិដ្ឋាការនៅក្នុងនោះទេ ដោយគ្រាន់តែគិតថា ជាការបំពេកញឯកសារចំនួន ៣ ប៉ុណ្ណោះ គឺឯកសារអន្តោប្រវេសន៍ ឯកសារគយ និងឯកសារសុខាភិបាល ប៉ុន្តែក្រោមការឈ្លៀសវៃ និងប៉ិនប្រសព្វរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី សម្តេចបានជំរុញបន្ថែមឱ្យប្រើប្រាស់ ទិន្នន័យនេះ ដើម្បីផ្តល់ទិដ្ឋាការជូនភ្ញៀវនៅពេលមកដល់ ឬពីចម្ងាយមកតែម្តង។ ដូច្នេះតាមរយៈការផ្តល់ទិដ្ឋាការតាមប្រព័ន្ធអេឡិច ត្រូចនិចនេះ គឺមានការបង់ប្រាក់តាមប្រព័ន្ធអេឡិចត្រូនិចផងដែរ ដែលបញ្ហានេះគឺក្រសួងមហាផ្ទៃ ត្រូវការដៃគូពីធនាគារក្នុងការទូទាត់ប្រាក់ ឬប្រមូលប្រាក់កម្រៃដែលជនបរទេសបង់ នេះគឺជាលើកទី២ហើយ ដែលបានចុះអនុស្សារណៈនៃការយោគយល់គ្នាជាមួយ ធនាគារកាណាឌីយ៉ា ក.អ បន្ទាប់ពីធនាគារអេស៊ីលីដារួចមក៕ អត្ថបទ៖ សុន រ៉ាឌី

តារាចម្រៀងល្បីឈ្មោះ ឱក សុគន្ធកញ្ញា ក្លាយជាទូតសុច្ឆន្ទៈ តេលាខ្មែរ

2024/09/02 03:07:21 pm        584
Facebook Telegram Linkin
តេលាខ្មែរ ដែលមានប្រវត្តិតាំងពីទស្សវត្សទី៦០មកម៉្លេះ ក្រោមចក្ខុវិស័យ​ផ្គត់ផ្គង់​ផលិត​ផល​ប្រេង​ឥន្ធនៈ​ និងឧស្ម័ន ហ្គាស (LPG) ដែលមានគុណភាពខ្ពស់ជូនប្រជាជនខ្មែរ បានប្រកាសជាផ្លូវការ តារា​ចម្រៀងដ៏ល្បីនៅកម្ពុជា លោកស្រី ឱក សុគន្ធកញ្ញា ចូលរួមជាសមាជិក ដើម្បីជាតំណាង និង​ជួយ​ជំរុញ​ចក្ខុវិស័យរបស់ តេលាខ្មែរ ក្រោមរូបភាពជាទូតសុច្ឆន្ទៈ។ លោកឧកញ៉ា ឈុន វ៉ាន់ឌី អគ្គនាយករង តេលាខ្មែរ នៅក្នុងពិធីចុះហត្ថលេខាជាផ្លូវការ នៃ​កិច្ច​ព្រម​ព្រៀង​ទូត​សុច្ឆន្ទៈ រវាងតេលាខ្មែរ និងឱក សុគន្ធកញ្ញា នៅថ្ងៃទី៣១ សីហា ឆ្នាំ២០២៤កន្លងទៅ បាន​មានប្រសាសន៍ថា មូលហេតុដែល តេលាខ្មែរ ជ្រើសរើសលោកស្រី ឱក សុគន្ធកញ្ញា ជា​ទូត​សុច្ឆន្ទៈ ដោយសារតែលោកស្រី ជាតារាល្បី សុភាពរាបសា រួសរាយរាក់ទាក់ ឈ្លាសវៃ ពូកែ និង​មាន​សេចក្តីថ្លៃថ្នូរ ថែមទាំងរូបសម្បត្តិសមរម្យជាខ្មែរ ដែលស័ក្តិសមជាទូតសុច្ឆន្ទៈ តេលាខ្មែរ។លោកឧកញ៉ា បានលើកឡើងថា តេលាខ្មែរ បានពាំនាំយកនូវសមិទ្ធផលថ្មី ដែលជា​ផលិតផល​ស្តង់ដារ​អន្តរជាតិ ដើម្បីប្រកួតប្រជែងទីផ្សារក្នុងព្រះរាជាណាចក្រកម្ពុជា និងក្នុងតំបន់។ តាម​ការសិក្សា និងពិសោធន៍ច្បាស់លាស់ តេលាខ្មែរ បានណែនាំឱ្យស្គាល់ពីផលិតផល ប្រេងសាំង ប្រេង​ម៉ាស៊ូត គីណេតិច និង ហ្គាស ព្រីម ជាបច្ចេកវិទ្យាចុងក្រោយបំផុតពីសហរដ្ឋអាមេរិក។ ផល​ប្រយោជន៍សំខានៗ៤យ៉ាង រួមមាន៖ សន្ទុះខ្លាំង សម្អាតម៉ាស៊ីនបានល្អ អាចធ្វើដំណើរបានឆ្ងាយ និង​បរិមាណគ្រប់លីត្រ ។លោកឧកញ៉ា ឈុន វ៉ាន់ឌី បានគូសបញ្ជាក់ថា តេលាខ្មែរ ពិតជា​មាន​មោទនភាព​ណាស់​ក្នុង​ការ​នាំចូល​ផលិតផលគុណភាពស្តង់ដារអន្តរជាតិនេះ សម្រាប់ផ្គត់ផ្គង់ជូនប្រជាជនខ្មែរ តាមរយៈ​សេវា​កម្មល្អ ដែលសបញ្ជាក់ពីគុណតម្លៃវប្បធម៌ខ្មែរ និងក្រោមទស្សនៈវិស័យរួមគ្នាតែមួយ ខ្មែរ​ស្រឡាញ់​ខ្មែរ​ ខ្មែរគាំទ្រខ្មែរ។ ចំពោះចក្ខុវិស័យនេះ ក្រុមហ៊ុនប្ដេជ្ញាចិត្ត ក្នុងការចូលរួមអភិវឌ្ឍ និងលើក​ស្ទួយ​ប្រទេស​ជាតិ​ឱ្យមានភាពរីកចម្រើនឆ្ពោះទៅមុខ “អនាគតរួមគ្នា” ។ លោកសង្ឃឹមយ៉ាងមុតមាំថា អតិថិជនទាំងអស់ នឹងចូលរួមក្នុងការលើកស្ទួយផលិតផលរបស់ក្រុមហ៊ុនខ្មែរ ដែល​មាន​គុណ​ភាព​ខ្ពស់ និងសេវាកម្មល្អ និងអរគុណយ៉ាងជ្រាលជ្រៅ ចំពោះអតិថិជន ដៃគូអាជីវកម្ម​ទាំង​អស់​កន្លង​មក សម្រាប់ការជឿទុកចិត្តក្នុងការគាំទ្រផលិតផល និងសេវាកម្មរបស់ តេលាខ្មែរ៕

ធនាគារជាតិនៃកម្ពុជា ប្រកាសដល់គ្រឹះស្ថានហិរញ្ញវត្ថុ បន្តរៀបចំឥណទានឡើងវិញ​ដល់ចុងឆ្នាំ២០២៥

2024/08/30 12:51:00 pm        274
Facebook Telegram Linkin
ធនាគារជាតិនៃកម្ពុជា ចេញសារាចរណែនាំដល់គ្រឹះស្ថានធនាគារ និងហិរញ្ញវត្ថុ បន្តរៀបចំឥណទានឡើងវិញ ដើម្បីជួយសម្រាល បន្ទុកចំណាយប្រចាំគ្រារបស់អតិថិជន ក្នុងការបំពេញកាតព្វកិច្ចសងត្រឡប់ឥណទាន ដោយវិធានការអនុគ្រោះនេះ នឹងបន្តរហូតដល់ ខែធ្នូ ឆ្នាំ ២០២៥។ធនាគារជាតិនៃកម្ពុជា ចេញសារាចរណែនាំ ស្តីពីការរៀបចំឥណទានឡើងវិញ ដោយក្នុងនោះធនាគារជាតិនៃកម្ពុជា អនុញ្ញាត ឱ្យគ្រឹះស្ថានធនាគារ និងហិរញ្ញវត្ថុ រៀបចំឥណទានឡើងវិញជូនអតិថិជន គឺត្រូវអនុវត្តលក្ខខណ្ឌមួយចំនួនដូចជា៖ គ្រឹះស្ថានអាចរៀប ចំឥណទានឡើងវិញជូនអតិថិជនបានចំនួនពីរដង ដោយអាចរក្សាចំណាត់ថ្នាក់ដដែល និងមិនចាំបាច់ធ្វើសំវិធានធនបន្ថែម។ គ្រឹះ ស្ថានអាចអនុវត្តការដំឡើងចំណាត់ថ្នាក់ឥណទានរៀបចំឡើងវិញ ក្នុងអំឡុងពេលអនុគ្រោះនេះ លើកដំបូងពីមួយកម្រិតទៅមួយ កម្រិត, បន្ទាប់ពីអតិថិជនបានបំពេញកាតព្វកិច្ចទូទាត់សងបន្តបន្ទាប់គ្នា ក្នុងរយៈពេលយ៉ាងតិច ៣ ខែ ចំពោះឥណទានដែលមានការ ទូទាត់សងប្រាក់ដើម ឬការប្រាក់ប្រចាំខែ។ បន្ទាប់មក, គ្រឹះស្ថានអាចស្ដារចំណាត់ថ្នាក់ឥណទានល្អជាងមុន ដោយគោរពតាមគោល ការណ៍ចំនួន ថ្ងៃហួសកាលកំណត់សងនៃការទម្លាក់ចំណាត់ថ្នាក់ឥណទាន និងត្រូវដំឡើងចំណាត់ថ្នាក់ត្រូវគោរពតាមលក្ខខណ្ឌដូច ដែលបានកំណត់ក្នុងសារាចរណែនាំនេះ។ចំពោះឥណទានមិនដំណើរការ ដែលធ្លាប់ត្រូវបានរៀបចំឡើងវិញ (លើកលែងឥណទានរៀបចំឡើងវិញក្នុងអំឡុងពេលអនុគ្រោះ កន្លងមក) ហើយបានស្នើសុំការរៀបចំឡើងវិញក្នុងអំឡុងពេលអនុគ្រោះនេះ។ ការដំឡើងចំណាត់ថ្នាក់មិនអាចខ្ពស់ជាង ពោលគឺស្ថិត ក្រោមស្តង់ដា។ ការដំឡើងចំណាត់ថ្នាក់នេះ ត្រូវចាប់ផ្តើមអនុវត្តចាប់ពីត្រីមាសទី ៤ ឆ្នាំ២០២៤ តទៅ។ទន្ទឹមនេះ, ការដំឡើងចំណាត់ថ្នាក់នេះ ក៏ត្រូវបានអនុវត្តចំពោះឥណទានរៀបចំឡើងវិញ លើវិស័យទេសចរណ៍នៅខេត្ត សៀមរាបផងដែរ ដោយក្នុងនោះគ្រឹះស្ថានមិនគួរប្រើប្រាស់តែព័ត៌មានឥណទានរៀបចំឡើងវិញក្នុងក្រុមហ៊ុន ក្រេឌីត ប្យូរ៉ូ ក្នុងអំឡុង ពេលអនុគ្រោះនេះ សម្រាប់ជាលក្ខខណ្ឌចម្បងក្នុងការអនុម័តឥណទាននោះឡើយ។ គ្រឹះស្ថានត្រូវពិនិត្យលក្ខខណ្ឌផ្សេងៗទៀត ដែល មានចែងក្នុងគោលនយោបាយរបស់គ្រឹះស្ថាន ដើម្បីអនុម័តឥណទាន និងត្រូវរៀបចំឥណទានឡើងវិញជូនអតិថិជន ឱ្យស្របតាមលក្ខ ខណ្ឌអនុគ្រោះដូចបានចែងក្នុងសារាចរណែនេះផងដែរ។គ្រឹះស្ថានត្រូវពិនិត្យ ពិភាក្សា និងជ្រើសរើសលក្ខខណ្ឌអនុគ្រោះមួយ ឬច្រើនខាងលើ ដែលសមស្របបំផុតសម្រាប់អតិថិជន ដើម្បីអាចធានាបានថា អតិថិជនអាចបន្តបំពេញកាតព្វកិច្ចទូទាត់សងបានតាមលក្ខខណ្ឌថ្មីនៃកិច្ចសន្យា។ គ្រឹះស្ថានត្រូវរៀបចំឥណ ទានឡើងវិញ ចំពោះអតិថិជនដែលស្ថានភាពអាជីវកម្ម និងស្ថានភាពហិរញ្ញវត្ថុនៅតែមានចីរភាព ហើយគ្រឹះស្ថានរំពឹងថា អតិថិជន ជួបប្រទះការលំបាកផ្នែកហិរញ្ញវត្ថុ និងការទូទាត់សងតែក្នុងរយៈពេលបណ្តោះអាសន្នប៉ុណ្ណោះ ហើយអាចមានលទ្ធភាពគ្រប់គ្រាន់ក្នុង ការបំពេញកាតព្វកិច្ចទូទាត់សងនាថ្ងៃខាងមុខ។ គ្រឹះស្ថានត្រូវមានតម្លាភាពក្នុងការផ្ដល់ព័ត៌មានត្រឹមត្រូវ គ្រប់ជ្រុងជ្រោយ និងត្រូវ ពន្យល់អតិថិជនឱ្យបានច្បាស់លាស់ អំពីលក្ខខណ្ឌនៃការរៀបចំឥណទានឡើងវិញ ដើម្បីឱ្យអតិថិជនមានមូលដ្ឋានក្នុងការសម្រេច ចិត្ត។ វិធានការអនុគ្រោះចំពោះការរៀបចំឥណទានឡើងវិញនេះ នឹងមានប្រសិទ្ធភាពអនុវត្តរហូតដល់ដំណាច់ខែ ធ្នូ ឆ្នាំ២០២៥៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

កំណាត់ផ្លូវហ្សាលដឺហ្គោល អាជ្ញាធរខណ្ឌ៧មករា យកជាផ្លូវគំរូមាន សណ្តាប់ធ្នាប់ និងសោភ័ណភាព
02/21/2025 08:02 PM
Facebook Telegram Linkin
រដ្ឋមន្ត្រីការបរទេសឥណ្ឌា និងចិន ជួបគ្នា នៅខាងក្រៅកិច្ចប្រជុំ G20
02/21/2025 07:02 PM
Facebook Telegram Linkin
រដ្ឋមន្ត្រីក្រសួងហិរញ្ញវត្ថុ៖ ការចំណាយលើវិស័យការពារជាតិ នឹងនៅតែជាអាទិភាពចម្បង សម្រាប់ប៉ូឡូញ
02/21/2025 07:02 PM
Facebook Telegram Linkin
ក្រុមហាម៉ាស់បញ្ចេញឈ្មោះចំណាប់ថ្នូរ ៦នាក់ដែលនឹងត្រូវដោះលែងនៅថ្ងៃសៅរ៍ស្អែក
02/21/2025 07:02 PM
Facebook Telegram Linkin
ក្រុមហាម៉ាស់៖ សាកសពចំណាប់ថ្នូរ Shiri Bibas ទំនងជាលាយឡំកប់ក្រោមគំនរបាក់បែកអគារជាមួយមនុស្សដទៃនៅតំបន់ហ្កាហ្សា
02/21/2025 07:02 PM
Facebook Telegram Linkin
ព្រិលគ្របដណ្តប់តំបន់ភាគខាងជើង និងតំបន់មាត់សមុទ្រជប៉ុនបង្ខំឲ្យមានការព្រមានពីបំណាក់ផ្ទំាងទឹកកក
02/21/2025 07:02 PM
Facebook Telegram Linkin
វិមានក្រឹមឡាំង៖ នៅមិនទាន់មានព័ត៌មានលម្អិតជាក់លាក់ អំពីលទ្ធភាពនៃជំនួប Trump-Putin
02/21/2025 07:02 PM
Facebook Telegram Linkin
រដ្ឋមន្ត្រី៖ បារាំងដាក់ពង្រាយនគរបាល តាមសាលារៀន ដើម្បីឆែកឆេរកាបូបដោយមិនកំណត់
02/21/2025 07:02 PM
Facebook Telegram Linkin
រដ្ឋអារ៉ាប់ ប្រញាប់ប្រញាល់រៀបចំវិធានការ ដើម្បីទប់ផែនការរបស់លោក Trump នៅតំបន់ហ្កាហ្សា
02/21/2025 07:02 PM
Facebook Telegram Linkin
មន្ត្រី EU និយាយថា មូលនិធិរបស់លីបង់ គឺផ្អែកលើការរៀបចំរចនាសម្ព័ន្ធធនាគារឡើងវិញ និងកិច្ចព្រមព្រៀងជាមួយIMF
02/21/2025 07:02 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.