BTV NEWS

សហគមន៍កសិកម្មទំនើប «បន្លែផ្ទះសំណាញ់ត្រាំកក់» បន្តបែងចែកប្រាក់ចំណេញភាគលាភប្រចាំខែជូនដល់សមាជិករបស់ខ្លួនជាលើកទី៤

ស្ថានភាពតម្លៃស្រូវបានវិលមកធម្មតាឡើងវិញ ក្រោយចប់រដូវបុណ្យចូលឆ្នាំចិន-វៀតណាម

វិនិយោគិនថៃទទួលបានជោគជ័យលើការធ្វើអាជីវកម្ម ក្រោមបរិយាកាសអំណោយផលនៃកម្ពុជា

សមាគមក្នុងស្រុកជំរុញឲ្យម្ចាស់ SME ដើរឲ្យទាន់បច្ចេកវិទ្យាឌីជីថល ដើម្បីភាពរីកចម្រើនលើអាជីវកម្ម

សេដ្ឋកិច្ច និង កសិកម្ម

កម្ពុជានាំចេញជ័រកៅស៊ូក្នុងឆ្នាំ ២០២៤ មានទំហំទឹកប្រាក់ជាង ១ ៥០០ លានដុល្លារអាម៉េរិក

កម្ពុជានាំចេញជ័រកៅស៊ូនៅក្នុងបំណាច់ឆ្នាំ ២០២៤ មានទំហំទឹកប្រាក់ជាង ១ ៥០០ លានដុល្លារអាមេរិក កើនឡើងជិត ៦៤ ភាគរយ ធៀបទៅរយៈពេលដូចគ្នាឆ្នាំ ២០២៣, ចំពោះការកើនឡើងនេះ បានបង្ហាញនូវការរីកចម្រើននៃការដាំដុំ សម្រាប់បម្រើការ នាំចេញ និងការផ្គត់ផ្គង់ក្នុងស្រុក។អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ថ្លែងប្រាប់ BTV ស្តីពីការនាំចេញកៅស៊ូ និងការផ្គត់ផ្គង់កៅស៊ូក្នុង ស្រុកនេះថា ជុំវិញការចេញជ័រកៅស៊ូ ក៏ដូចជាការនាំចេញទំនិញផ្សេងៗរបស់កម្ពុជានៅក្នុងឆ្នាំ ២០២៤ កន្លងមកនេះ អ្នកឧកញ៉ា បានថ្លែងនូវការអបអរសាទរ ចំពោះកំណើននៃការនាំចេញទំនិញរបស់កម្ពុជា ដែលនេះបានបង្ហាញឱ្យឃើញអំពីការរីកចម្រើន ខ្សែច្រវាក់ផ្គត់ផ្គង់ក្នុងស្រុក ជាពិសេសការរីកចម្រើននៅក្នុងវិស័យកសិកម្ម ខណៈដែលវិស័យនេះបានកំពុងចូលរួមគាំទ្រដល់កំណើន នៃសេដ្ឋកិច្ចជាតិ។អ្នកឧកញ៉ា បន្តថា ជាក់ស្តែងការនំាចេញជ័កៅស៊ូដែលមានកំណើនកើនឡើងនេះ គឺជាសញ្ញាណមួយល្អនៃការងើបឡើង ក្នុងវិស័យកសិកម្ម គាំទ្រដល់សកម្មភាពនៃការដាំដុះក្នុងស្រុក និងស្របពេលដែលកម្ពុជាកំពុងស្រូបយករោងចក្រផលិតសំបកកង រថយន្តជាបន្តបន្ទាប់ ដែលទាំងនេះគឺជាការទីផ្សាររួមចំណែកមួយទៀត ទោះបីនៅមានកម្រិតតិចតួចក៏ដោយ។ ចំណែកមូលហេតុនៃការផ្គត់ផ្គង់ទីផ្សារក្នុងស្រុកនៅមានកម្រិតនេះ អ្នកឧកញ៉ា លឹម ហេង បន្តឱ្យដឹងថា ប្រទេសកម្ពុជា យើងភាគច្រើនផលិតជ័ររកៅស៊ូលេខ១ លេខ២ សម្រាប់បម្រើទីផ្សារនាំចេញ។ ចំណែកជ័រកៅស៊ូដែលបម្រើដល់រោងចក្រផលិត សំបករថយន្តក្នុងស្រុក គឺជាប្រភេទជ័រកៅស៊ូលេខ៣, បច្ចុប្បន្នកម្ពុជាបានផលិតជ័រកៅស៊ូប្រភេទនេះមានចំនួនតិចតួច តែទោះបី យ៉ាងណារោងចក្រផលិតសំបករថយន្ត ក៏បានចូលរួមចំណែកដល់ការប្រមូលទិញក្នុងស្រុកផងដែរ ចៀសវាងដល់ការកក់ស្ទុះ ឬគ្មាទីផ្សារប្រមូលទិញ ដែលកន្លងមកតែងតែជួបបញ្ហានេះជារឿយៗ។ទាក់ទិនជ័រកៅស៊ូនេះដែរ, បណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជរដ្ឋាបណ្ឌិតសភាកម្ពុជា ថ្លែងថា ជុំវិញការស្រូបយក ជ័រកៅស៊ូក្នុងស្រុក នៅមានកម្រិតទាបនៅឡើយនេះ ដោយសារកម្ពុជាពុំទាន់រោងចក្រកែច្នៃជ័រកៅស៊ូដែលប្រឡាក់ដី (ឬជ័រកៅស៊ូដែល មិនមានគុណភាព) សម្រាប់យកទៅកែច្នៃផលិតសំបកកងរថយន្តនៅឡើយ ក្នុងនោះប្រសិនយើងមានរោងចក្រប្រភេទនេះនៅក្នុង ស្រុកបន្ថែមទៀត រោងចក្រដែលផលិតសំបកកង់ទាំងអស់ នឹងស្រូបយកសក្តានុពលជ័រកៅស៊ូក្នុងស្រុកកាន់តែច្រើន។សូមបញ្ជាក់ថា នៅក្នុងបំណាច់ឆ្នាំ ២០២៤ កន្លងមកនេះ កម្ពុជាបាននាំចេញជ័រកៅស៊ូ គិតជាទឹកប្រាក់មានចំនួនជាង ១ ៥០០ លានដុល្លារអាមេរិក កើនឡើងជិត ៦៤ ភាគរយ ខណៈនៅក្នុងឆ្នាំ ២០២៣ កម្ពុជាបាននាំចេញកៅស៊ូ មានទឹកប្រាក់ជិត ១ ពាន់ លានដុល្លារអាមេរិកប៉ុណ្ណោះ៕ អត្ថបទ៖ សុន រ៉ាឌី

ឧបនាយករដ្ឋមន្ត្រី ស៊ុន ចាន់ថុល អញ្ជើញបើកការដ្ឋានសាងសង់រោងចក្រផលិតសំបកកង់រថយន្តក្នុងខេត្តស្វាយរៀង

នៅថ្ងៃទី១២ ខែមករា ឆ្នាំ២០២៥ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជាអធិបតី ក្នុងពិធីបើកការដ្ឋានសាងសង់រោងចក្ររបស់ក្រុមហ៊ុន វ៉ាន់លី ថាយអឺ (WANLI Tire) ដោយមានការអញ្ជើញចូលរួមផងដែរពី ឯកឧត្តម WANG WENBIN ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជា។ក្នុងពិធីនោះ ក៏មានការចូលរួមពីឯកឧត្តមអគ្គលេខាធិការ នៃអគ្គលេខាធិការដ្ឋានក.អ.ក. ឯកឧត្តមអគ្គលេខាធិការគណៈកម្មាធិការវិនិយោគកម្ពុជា, ឯកឧត្តមអភិបាល នៃគណៈអភិបាលខេត្តស្វាយរៀង, លោក JING GUANGJUN ប្រធានក្រុមប្រឹក្សាភិបាល ក្រុមហ៊ុន Guangzhou Industrial Investment Holding Group, លោក CAO XIANDONG ប្រធានក្រុមប្រឹក្សាភិបាល ក្រុមហ៊ុន វ៉ាន់លី ថាយអឺ, លោក ZENG PING អគ្គនាយករងក្រុមហ៊ុន China Construction Fourth Engineering Bureau ព្រមទាំង ឯកឧត្តម លោកជំទាវ លោក លោកស្រី និងភ្ញៀវកិត្តិយសជាតិ អន្តរជាតិជាច្រើនរូបផ្សេងទៀត។នៅក្នុងសុន្ទរកថាគន្លឹះ ឯកឧត្តមឧបនាយករដ្ឋមន្ត្រី បានលើកឡើងអំពីទំនាក់ទំនងយ៉ាងស្អិតល្មួតរវាងកម្ពុជា និងមិត្តចិន ហើយនឹងបន្តរឹតបន្តឹងចំណងមិត្តភាពទំនាក់ទំនងការទូតមួយនេះ ឱ្យកាន់តែមានភាពល្អប្រសើរឡើង ក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែប រួមទាំងការសម្រេចឱ្យបាននូវការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី ប្រកបដោយគុណភាពខ្ពស់ និងស្តង់ដារខ្ពស់ និងពង្រឹងទំនុកចិត្តផ្នែកនយោបាយ ដែលកសាងឡើងដោយថ្នាក់ដឹកនាំមុនៗ។ លើសពីនេះ ការផ្ដល់ហិរញ្ញប្បទាន និងជំនួយផ្សេងៗរបស់មិត្តចិនដល់កម្ពុជា រួមទាំងនៅក្នុងកិច្ចសហប្រតិបត្តិការនៃគំនិតផ្តួចផ្តើមខ្សែក្រវាត់ និងផ្លូវ ដែលបានដាក់ចេញដោយ ឯកឧត្ដមប្រធានាធិបតីចិន ស៊ី ជីនពីង មិនត្រឹមតែបានជួយរួមចំណែកដល់ការអភិវឌ្ឍសេដ្ឋកិច្ច-សង្គមកម្ពុជាប៉ុណ្ណោះទេ តែថែមទាំងជួយពង្រឹងឯករាជ្យភាព ខាងនយោបាយរបស់កម្ពុជាទៀតផង។បន្ថែមពីនេះ ឯកឧត្តមឧបនាយករដ្ឋមន្ត្រី ក៏បានលើកឡើងអំពីតួលេខ នៃការកើនឡើងរបស់គម្រោងវិនិយោគ ដែលបង្ហាញឱ្យឃើញពីការជឿទុកចិត្តរបស់វិនិយោគិនមកលើរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា រួមជាមួយនឹងកត្តាសំខាន់ៗដូចជា៖ (១)កត្តាសុខសន្តិភាព ស្ថេរភាពនយោបាយ និងម៉ាក្រូសេដ្ឋកិច្ច (២)លក្ខខណ្ឌល្អប្រសើរនៃក្របខណ្ឌច្បាប់ និងលិខិតបទដ្ឋានគតិយុត្ត និង (៣)ការបើកចំហសេដ្ឋកិច្ច ទទួលការវិនិយោគស្ទើរលើគ្រប់វិស័យ ជាពិសេសភាពអំណោយផលនៃលក្ខខណ្ឌ និងការលើកទឹកចិត្តវិនិយោគ ដូចមានចែងក្នុងច្បាប់ស្ដីពីវិនិយោគ នៃព្រះរាជាណាចក្រកម្ពុជា។ រោងចក្រផលិតសំបកកង់រថយន្តរបស់ក្រុមហ៊ុន វ៉ាន់លី ថាយអឺ ដែលប្រារព្ធពិធីបើកការដ្ឋានសាងសង់នាព្រឹកនេះ ជាការសម្រេចចិត្តដាក់ទុនវិនិយោគនៅកម្ពុជា ដែលកើតចេញពីជំនួបពិភាក្សាទ្វេភាគីរវាង ឯកឧត្តមឧបនាយករដ្ឋមន្ត្រី ជាមួយលោក Jing Guangjun ក្នុងដំណើរបេសកកម្មគោះទ្វារវិនិយោគដល់រោងចក្រ វ៉ាន់លី ថាយអឺ នៅទីក្រុងក្វាងចូវ សាធារណរដ្ឋប្រជាមានិតចិន កាលពីថ្ងៃទី២១ ខែតុលា ឆ្នាំ២០២៣ កន្លងទៅ។ គម្រោងនេះមានទីតាំងស្ថិតក្នុងតំបន់សេដ្ឋកិច្ចពិសេស ស៊ីនបាវិត ក្នុងក្រុងបាវិត នៃខេត្តស្វាយរៀង មានវិសាលភាពគ្របដណ្តប់លើផ្ទៃដីប្រមាណ ៣២ហិកតា ជាមួយទំហំទុនវិនិយោគរហូតដល់ប្រមាណ ៥០០ លានដុល្លារអាម៉េរិក សម្រាប់ទាំងដំណាក់កាលទី១ និងទី២ ដែលរំពឹងថានឹងបង្កើតការងារជូនបងប្អូនប្រជាពលរដ្ឋបានចំនួនប្រមាណ ១ ០០០កន្លែង។ គម្រោងវិនិយោគមួយនេះ គឺជាសមិទ្ធផលថ្មីមួយដ៏មានសារៈសំខាន់ និងមានតម្លៃសម្រាប់តំបន់សេដ្ឋកិច្ចនេះបន្ថែមទៀត ដើម្បីចូលរួមអភិវឌ្ឍន៍សង្គមសេដ្ឋកិច្ចរបស់កម្ពុជា និងសម្រាប់ខេត្តស្វាយរៀង ជាពិសេសគឺមានសង្គតិភាពទៅនឹងកិច្ចខិតខំប្រឹងប្រែងរបស់រដ្ឋាភិបាលកម្ពុជា ក្នុងការធ្វើពិពិធកម្មផលិតកម្ម និងលើកកម្ពស់កំណើនសេដ្ឋកិច្ចក្នុងតំបន់៕

ឯកឧត្តម ឌិត ទីណា៖ កម្ពុជាមានកសិផលជាច្រើនប្រភេទថែមទៀតដែលត្រូវការវិនិយោគសម្រាប់នាំចេញ

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ នៅថ្ងៃម្សិលបានទទួលជួបសម្តែងការគួរសម និងពិភាក្សាការងារជាមួយក្រុមហ៊ុនមកពីប្រទេសចិន (Zhengzhou Chen’s Sun Fruits and Vegetables International Trade Co.,Ltd) ដើម្បីពិភាក្សាមួយចំនួនពាក់ព័ន្ធវិស័យកសិកម្ម និងគម្រោងពង្រីកការនាំចេញរបស់កម្ពុជា។យោងតាមក្រសួងកសិកម្ម រុក្ខាប្រមាញ់ និងនេសាទ នៅក្រោយចប់ជំនួបការងារ កាលពីរសៀលថ្ងៃទី៩ ខែមករា ឆ្នាំ២០២៥កន្លងទៅ បានឲ្យដឹងថា ក្នុងឱកាសនោះ ឯកឧត្តមរដ្ឋមន្ត្រី បានសម្តែងនូវការស្វាគមន៍ដែលក្រុមហ៊ុនមានគោលបំណងចង់វិនិយោគនូវកសិផលកម្ពុជាដូចជា ទុរេន ដូងស្រស់ និងស្វាយចន្ទី ដើម្បីនាំចេញទៅកាន់ទីផ្សារប្រទេសចិន និងទីផ្សារប្រទេសផ្សេងៗ។ លើសពីនេះ ឯកឧត្តម បានលើកឡើងថា កម្ពុជាមានកសិផលសក្តានុពលជាច្រើនរួមមាន ផ្លែស្វាយ ផ្លែមៀន និងចេកពងមាន់ មានរសជាតិឆ្ងាញ់ និងគុណភាពល្អ ជាពិសេសកម្ពុជាមាននីតិវិធីនៃការនាំចេញច្បាស់លាស់ទៅកាន់ប្រទេសចិន ប្រការសំខាន់គឺទាមទារការវិនិយោគលើការវេចខ្ចប់ កែច្នៃ និងអាចនាំចេញទៅកាន់ទីផ្សារអន្តរជាតិ។ឯកឧត្តមរដ្ឋមន្ត្រី បានបញ្ជាក់បន្ថែមថា កម្ពុជាស្វាគមន៍នូវរាល់វិនិយោគិនដែលមានបំណងចង់វិនិយោគលើការកែច្នៃ និងធ្វើពាណិជ្ជកម្មនាំចេញ ដោយអាចសហការធ្វើការដាំដុះជាមួយប្រជាកសិករ កំណត់ស្តង់ដាបច្ចេកទេសច្បាស់លាស់ មានកិច្ចសន្យាផលិតកម្មត្រឹមត្រូវ និងអាចទទួលទិញត្រឡប់ក្នុងតម្លៃចរចា ដោយមិនប្រកួតប្រជែងលើការដាំដុះជាមួយប្រជាកសិករឡើយ។ ទន្ទឹមនឹងនេះ ឯកឧត្តម ក៏បានផ្តល់ការណែនាំដល់ភាគីក្រុមហ៊ុនត្រូវធ្វើការកំណត់ស្តង់ដានៃកសិផលកម្ពុជាទៅកាន់ទីផ្សារប្រទេសចិន និងការធ្វើទីផ្សារផលិតផលដើម្បីឱ្យអ្នកប្រើប្រាស់មានការទទួលស្គាល់ ដែលជាកត្តាចាំបាច់ ជំរុញឱ្យផលិតផលលក់បានក្នុងតម្លៃថ្លៃ និងមានតម្លៃបន្ថែមខ្ពស់ ហើយកម្ពុជាមានគោលបំណងប្រកួតប្រជែងលើផលិតផលដែលមានគុណភាពល្អប្រណិត និងមានរសជាតិឆ្ងាញ់ ដោយមិនប្រកួតប្រជែងបរិមាណ។ក្នុងឱកាសនេះដែរ ឯកឧត្តមរដ្ឋមន្ត្រី បានលើកទឹកចិត្តដល់ភាគីក្រុមហ៊ុនសហការជាមួយក្រសួងកសិកម្ម ក្នុងការចុះពិនិត្យទីតាំង និងគុណភាពកសិផលកម្ពុជាដូចបានរៀបរាប់ខាងលើដើម្បីទទួលបានព័ត៌មានគ្រប់ជ្រុងជ្រោយ ពេញលេញ និងមានភាពច្បាស់លាស់ក្នុងការវិនិយោគ និងជូនពរដល់ក្រុមហ៊ុនទទួលបានលទ្ធផលជោគជ័យ ព្រមទាំងអាចនាំចេញនូវកសិផលកម្ពុជាទៅកាន់ទីផ្សារអន្តរជាតិបានពិតប្រាកដ៕ អត្ថបទ៖ ឈិត បូរ៉ាវី

ប្រភេទទំនិញសំខាន់ៗរបស់កម្ពុជាជាច្រើន បានគាំទ្រដល់មានកំណើន នៃការនាំចេញក្នុងឆ្នាំ២០២៤

ការនាំចេញទំនិញរបស់កម្ពុជា នៅក្នុងបំណាច់ឆ្នាំ ២០២៤ នេះ មានទំហំទឹកប្រាក់សរុបជាង ២៦ ពាន់លានដុល្លារអាមេរិក ក្នុងនោះ មានមុខទំនិញសំខាន់ៗជាច្រើនប្រភេទ បានគាំទ្រដល់កំណើន នៃការនាំចេញ និងមានប្រភេទទំនិញមួយចំនួនផ្សេងទៀត បានបន្តកំណើនខ្ពស់ ជាង ៥០ ភាគរយ បើធៀបនិងឆ្នាំ ២០២៣។អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានបង្ហាញស្ថិតិពាណិជ្ជកម្ម នៃការធ្វើពាណិជ្ជកម្មទៅកាន់ ទីផ្សារអន្តរជាតិរបស់កម្ពុជា ក្នុងនោះនៅក្នុងបំណាច់ឆ្នាំ ២០២៤ កន្លងមកនេះ, ចំពោះការធ្វើពាណិជ្ជកម្មនៃការនាំចេញរបស់កម្ពុជា មានទំហំ ទឹកប្រាក់ប្រមាណជាង ២៦ ពាន់លានដុល្លារ កើនឡើងជាង ១៧ ភាគរយ បើប្រៀបធៀបរយៈពេលដូចគ្នានិងឆ្នាំ ២០២៣ ក្នុងនោះមានប្រភេទ ទំនិញជាច្រើន បានចូលរួមចំណែកដល់ការរក្សាកំណើននៃការនាំចេញទំនិញរបស់កម្ពុជា, ដែលនេះបានបង្ហាញនូវនិន្នាការនៃការកើនឡើង ក្នុងឆ្នាំ ២០២៥ និងនៅក្នុងឆ្នាំបន្តបន្ទាប់ទៀត។ជាក់ស្តែងនៅក្នុងរយៈពេល ១២ ខែ ឆ្នាំ២០២៤ នេះ ប្រភេទទំនិញដែលបានបន្តកើនឡើងរួមមាន៖ ការនាំចេញសម្លៀកបំពាក់ និងគ្រឿងបន្ទាប់បន្សំធ្វើពីក្រណាត់ និងមិនធ្វើពីក្រណាត់ មានទឹកប្រាក់ជិត ១០ ពាន់លានដុល្លារ កើនឡើងជិត ៣០ ភាគរយ, ធញ្ញជាតិ ជិត ២ ពាន់លានដុល្លារ កើន ១១ ភាគរយ, កៅស៊ូ និងផលិតផលធ្វើពីកៅស៊ូ ជាង ១ ៥០០ លានដុល្លារ កើនជិត ៦៤ ភាគរយ, វត្ថុធ្វើពីស្បែក និងបរិក្ខាធ្វើពីរោមសត្វ ជាង ២ ពាន់លានដុល្លារ កើនជាង ២០ ភាគរយ, ស្បែកជើង ស្រោមជើង ជិត ១ ៧០០ លានដុល្លារ កើន ២០ ភាគរយ, គ្រឿងសង្ហារឹម ជាង ១ ១០០ លានដុល្លារ កើន ៣១ ភាគរយ បើប្រៀបធៀបរយៈពេលដូចគ្នានិងឆ្នាំ ២០២៣ ក្នុងនោះមានប្រភេទទំនិញ ផ្សេងៗជាច្រើនទៀត បានបន្តកើនឡើងគួកត់សម្គាល់ផងដែរ។ដោយឡែកប្រភេទំនិញដែលកើនខ្ពស់លើស ៥០ ភាគរយ នៅក្នុងបំណាច់ឆ្នាំ ២០២៤ រួមមាន៖ កៅស៊ូ និងផលិតផលធ្វើពីកៅស៊ូ កើនជិត ៦៤ ភាគរយ, អំបិល ស្ពាន ដី ថ្ម និងម្នាងសិលា កើនឡើងជាង ១៣៣ ភាគរយ, វត្ថុធ្វើពីដែក ឬដែកថែប ជាង ៧១ ភាគរយ និងស្ពាន់ និងវត្ថុធ្វើ ពីស្ពាន កើន ៦៤ ភាគរយ បើប្រៀបធៀបរយៈពេលដូចគ្នានិងឆ្នាំ ២០២៣។សូមបញ្ជាក់ថា ការធ្វើពាណិជ្ជកម្មលើទីផ្សារអន្តរជាតិ ពេញមួយឆ្នាំនៅក្នុងឆ្នាំ ២០២៤ របស់កម្ពុជា, មានទំហំទឹកប្រាក់សរុបជាង ៥៤ ពាន់លាន ដុល្លារ កើនជិត ១៧ ភាគរយ ក្នុងនោះការនាំចេញទំនិញរបស់កម្ពុជា មានទឹកប្រាក់ជាង ២៦ ពាន់លានដុល្លារ កើនឡើងជាង ១៥ ភាគរយ ខណៈការនាំចូលពីបរទេសមានចំនួនជាង ២៨ ពាន់លានដុល្លារ កើនឡើង ១៨ ភាគរយ បើធៀបរយៈពេលដូចគ្នាឆ្នាំ ២០២៣៕ អត្ថបទ៖ សុន រ៉ាឌី

រដ្ឋមន្ត្រីក្រសួងសេដ្ឋកិច្ច ស្នើឱ្យរដ្ឋបាលខេត្តកណ្តាល យកចិត្តទុកដាក់លើការកែទម្រង់ហិរញ្ញវត្ថុសាធារណៈ

រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ស្នើឱ្យរដ្ឋបាលខេត្តកណ្តាល បន្តយកចិត្តទុកដាក់ចូលរួមសហការជិតស្និទ្ធ និងផ្តល់ការគាំទ្រ ចាំបាច់នានា ដល់អង្គភាពប្រមូលចំណូលពន្ធដារ, ពន្ធគយ និងអាករ, និងចំណូលមិនមែនសារពើពន្ធ, ការគ្រប់គ្រងទ្រព្យសម្បត្តិរដ្ឋ និង ការប្រើប្រាស់ធនធានហិរញ្ញវត្ថុ ដែលត្រូវបានផ្ទេរជូនដោយក្រសួង-ស្ថាប័នថ្នាក់ជាតិ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុម ការងាររាជរដ្ឋាភិបាល ចុះមូលដ្ឋានខេត្តកណ្តាល ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ ២០២៤ និងលើកទិសដៅ ការងារឆ្នាំ២០២៥ របស់រដ្ឋបាលខេត្តកណ្តាល ថ្ងៃទី៩ មករា ម្សិលមិញនេះ ក្នុងនោះពាក់ព័ន្ធការផ្ដល់សេវាសាធារណៈជូនប្រជាពលរដ្ឋ ឯកឧត្តមឧបនាយករដ្ឋមន្ត្រី ស្នើដល់រដ្ឋបាលខេត្ត, គណៈបញ្ជាការឯកភាពខេត្ត និងក្រុង-ស្រុក, អាជ្ញាធរ និងកងកម្លាំងមានសមត្ថកិច្ច ត្រូវយកចិត្តទុកដាក់លើការងារមួយចំនួនរួមមាន៖ ការលើកកម្ពស់គុណភាព និងប្រសិទ្ធភាពនៃការផ្តល់សេវាសាធារណៈជូនប្រជា- ពលរដ្ឋ គឺជាគោលបំណង និងជាទិសដៅការងារដ៏សំខាន់មួយរបស់រាជរដ្ឋាភិបាល ។ ក្នុងន័យនេះ, ថ្នាក់ដឹកនាំរដ្ឋបាលខេត្ត, ក្រុង-ស្រុក និងមន្ត្រីរាជការទាំងអស់ ត្រូវខិតខំផ្តោតការយកចិត្តទុកដាក់ខ្ពស់ លើការផ្តល់សេវាសាធារណៈនានា ជូនប្រជាពលរដ្ឋ ឲ្យបាន រហ័ស ប្រកបដោយស្មារតីទទួលខុសត្រូវខ្ពស់ និងត្រូវពង្រឹងការផ្តល់សេវារដ្ឋបាល តាមយន្តការច្រកចេញ-ចូលតែមួយរបស់ខេត្ត និង ផ្តល់ការគាំទ្រដល់ការិយាល័យច្រកចេញ-ចូលតែមួយរបស់ក្រុង-ស្រុក និងយន្តការច្រកចេញ-ចូលតែមួយរបស់ឃុំ-សង្កាត់។ក្រៅពីនេះ ឯកឧត្តមអគ្គបណ្ឌិតសភាចារ្យ សូមឱ្យបន្តផ្តោតការយកចិត្តទុកដាក់បន្ថែម ដើម្បីធានាការផ្តល់សេវាជូនប្រជាពល- រដ្ឋកាន់តែមានប្រសិទ្ធភាព, តម្លាភាព និងគណនេយ្យ ព្រមទាំងត្រៀមរៀបចំខ្លួន និងចាប់ផ្តើមគិតគូរអំពីការពង្រីកការផ្តល់សេវា រដ្ឋបាលតាមប្រព័ន្ធអនឡាញ ស្របតាមទិសដៅដែលត្រូវបានកំណត់ដោយរាជរដ្ឋាភិបាល និងសមស្របតាមការរីកចម្រើនរបស់ សង្គមជាតិ, ជាពិសេសការប្រើប្រាស់បច្ចេកវិទ្យាឌីជីថល ដើម្បីចំណេញពេល និងថវិកា ព្រមទាំងកាត់បន្ថយនូវបែបបទស្មុគស្មាញ ដែលមិនចាំបាច់ ។ ចំណែកការងារកែទម្រង់ការគ្រប់គ្រងហិរញ្ញវត្ថុសាធារណៈ ឯកឧត្តមឧបនាយករដ្ឋមន្ត្រី, ស្នើសុំឱ្យរដ្ឋបាលខេត្ត បន្តយកចិត្ត ទុកដាក់លើកិច្ចការមួយចំនួនមាន៖ ចូលរួមសហការជិតស្និទ្ធ និងផ្តល់ការគាំទ្រចាំបាច់នានា ដល់អង្គភាពក្រោមឱវាទ ក្រសួងសេដ្ឋកិច្ច និងហិរញ្ញវត្ថុ ក្នុងការប្រមូលចំណូលពន្ធដារ, ពន្ធគយ និងអាករ, និងចំណូលមិនមែនសារពើពន្ធ ប្រកបដោយប្រសិទ្ធភាព និងការ ទទួលខុសត្រូវខ្ពស់។ រៀបចំផែនការយុទ្ធសាស្រ្តថវិកា និងអនុវត្តថវិកាកម្មវិធី ដើម្បីធានាថា កម្មវិធី និងផែនការសកម្មភាពការងារ ត្រូវបានធ្វើសមាហរណកម្ម ហើយថវិកាត្រូវបានវិភាជន៍ ដើម្បីឆ្លើយតបទៅនឹងតម្រូវការអាទិភាពរបស់រដ្ឋបាលតាមថ្នាក់នីមួយៗ។ ពង្រឹងការគ្រប់គ្រងទ្រព្យសម្បត្តិរដ្ឋ តាមរយៈការជំរុញការធ្វើបញ្ជីសារពើភ័ណ្ឌ, ការធ្វើបណ្ណកម្មសិទ្ធ និងការពង្រឹងប្រសិទ្ធភាពក្នុងការ គ្រប់គ្រង និងការប្រើប្រាស់ទ្រព្យសម្បត្តិរដ្ឋទាំងនោះឱ្យបានល្អ។ លើកកម្ពស់ការទទួលខុសត្រូវ និងភាពជាម្ចាស់ក្នុងការអនុវត្តមុខងារ និងការប្រើប្រាស់ធនធានហិរញ្ញវត្ថុ ដែលត្រូវបានផ្ទេរជូនដោយក្រសួង-ស្ថាប័នថ្នាក់ជាតិ ឱ្យមានប្រសិទ្ធភាព តម្លាភាព និងគណនេយ្យ- ភាព៕ អត្ថបទ៖ សុន រ៉ាឌី

គ.ស.ហ. បើកកិច្ចប្រជុំពិភាក្សាលើការអនុវត្ត និងការត្រៀមរៀបចំរបាយការណ៍វាយតម្លៃ IDP នៅចុងអាណត្តិ

គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.ហ.) បើកកិច្ចប្រជុំពិនិត្យ ពិភាក្សា និងផ្តល់ធាតុចូលលើសេចក្តី ព្រាងរបាយការណ៍ ស្តីពីវឌ្ឍនភាពនៃការអនុវត្ត IDP ក្នុងឆ្នាំ២០២១-២០២៣, ការអនុវត្តវិធានការដែលនៅសេសសល់, និងការត្រៀម រៀបចំរបាយការណ៍វាយតម្លៃចុងអាណត្តិនៃការអនុវត្តគោលនយោបាយ IDP។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅក្នុងកិច្ចប្រជុំពិភាក្សាលើសេចក្តី ព្រាងរបាយការណ៍ ស្តីពីវឌ្ឍនភាពនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា IDP ក្នុងឆ្នាំ ២០២១-២០២៣ នៅថ្ងៃម្សិលមិញនេះ ឯកឧត្តមបានជូនអង្គប្រជុំអំពីការរៀបចំរបាយការណ៍វឌ្ឍនភាព នៃការអនុវត្តគោលនយោបាយអភិវឌ្ឍន៍ វិស័យ ឧស្សាហកម្មកម្ពុជា ឆ្នាំ២០១៥-២០២៥ ដែលបានអនុវត្តក្នុងឆ្នាំ ២០២១-២០២៣ កន្លងមក ក្រោមការដឹកនាំសម្របសម្រួលដោយ ក្រុមប្រឹក្សាអភិវឌ្ឍន៍កម្ពុជា។ ឯកឧត្តមឧបនាយករដ្ឋមន្ត្រី អនុប្រធានទី១ ក.អ.ក. ក៏បានគូសរំលេចពីចំណុចសំខាន់ៗមួយចំនួនរួមមាន សាវតារនៃការ រៀបចំគោលនយោបាយ IDP ឆ្នាំ២០១៥-២០២៥, ចក្ខុវិស័យរបស់រាជរដ្ឋាភិបាលក្នុងការ អភិវឌ្ឍវិស័យឧស្សាហកម្មកម្ពុជា ដែលផ្ដោត លើការជំរុញ កែប្រែ និងធ្វើទំនើបកម្មរចនាសម្ព័ន្ធឧស្សាហកម្ម, ឧស្សាហកម្មអតិពលកម្ម ឱ្យឈានទៅរកឧស្សាហកម្មផ្អែកលើជំនាញ, ការធ្វើពិពិធកម្មសេដ្ឋកិច្ច, ការពង្រឹងភាពប្រកួតប្រជែង និងលើកកម្ពស់ផលិតភាពសេដ្ឋកិច្ច ឆ្លើយតបទៅនឹងការប្រែប្រួលរចនាសម្ព័ន្ធ សេដ្ឋកិច្ចក្នុងស្រុក និងសភាពការណ៍ប្រែប្រួលនៃនិម្មាបនកម្មសេដ្ឋកិច្ចតំបន់និងសកល, ធាតុផ្សំសំខាន់ៗ ដែលជាកត្តាជំរុញឱ្យសម្រេច បាននូវចក្ខុវិស័យខាងលើ, វិធានការគោលនយោបាយសំខាន់ៗ ព្រមទាំងខ្លឹមសារ និងទម្រង់នៃសេចក្តីព្រាងរបាយការណ៍ពីវឌ្ឍនភាព នៃការអនុវត្តគោលនយោបាយ IDP ក្នុងឆ្នាំ២០២១-២០២៣។ទាក់ទិន IDP នេះដែរ, ឯកឧត្តម នុត អ៊ុនវ័ណរ៉ា អគ្គលេខាធិការរង គណៈកម្មាធិការវិនិយោគកម្ពុជា និងជាប្រធានលេខា ធិការដ្ឋាន IDP នៃក.អ.ក. ក៏បានធ្វើបទបង្ហាញសង្ខេប ស្តីពីរបាយការណ៍វឌ្ឍនភាព នៃការអនុវត្តគោលនយោបាយ IDP ក្នុងឆ្នាំ ២០២១-២០២៣ រួមមានចំណុចសំខាន់ៗមួយចំនួនដូចជា៖ ទី១. វដ្ដនៃការជំរុញការអនុវត្ត IDP និងការរៀបចំរបាយការណ៍ វឌ្ឍនភាព, ទី២. រចនាសម្ព័ន្ធនៃរបាយការណ៍, ទី៣. វិធីសាស្ត្រនៃការតាមដានការអនុវត្តគោលនយោបាយ IDP, ទី៤. ការតាមដាន សមិទ្ធកម្ម, ទី៥. បញ្ហាប្រឈម និងហានិភ័យ និង ទី៦.សេចក្តីសន្និដ្ឋាន និងទិសដៅការងារបន្ត។សរុបរួមមក កិច្ចប្រជុំខាងលើបានសម្តែងការកោតសរសើរ និងវាយតម្លៃខ្ពស់ដល់ក្រុមប្រឹក្សាអភិវឌ្ឍន៍កម្ពុជា ដែលបានខិតខំ សម្របសម្រួលនិងដឹកនាំរៀបចំរបាយការណ៍វឌ្ឍនភាពបានល្អ និងគ្រប់ជ្រុងជ្រោយ ហើយដែលឆ្លុះបញ្ចាំងពីវឌ្ឍនភាពនៃការអនុវត្ត គោលនយោបាយ IDP ក្នុងឆ្នាំ២០២១-២០២៣ ព្រមទាំងលទ្ធផលសម្រេចបាន និងការជំរុញអនុវត្តវិធានការនានា ខណៈពេលដែល កម្ពុជាបាននិងកំពុងជួបប្រទះនឹងការរីករាលដាលនៃជំងឺCOVID-១៩ និងបញ្ហាប្រឈមជាច្រើននាពេលនោះ។ ជាមួយគ្នានេះ តាមរយៈ វឌ្ឍនភាពដែលសម្រេចបាន ក៏បានបង្ហាញផងដែរថា វិស័យឧស្សាហកម្មកម្ពុជាបាននិងកំពុងងើបឡើងគួរឱ្យកត់សម្គាល់ ពិសេស អនុវិស័យកម្មន្តសាល។ អង្គប្រជុំក៏បានចែករំលែកនូវព័ត៌មាន ធាតុចូល និងផ្តល់នូវអនុសាសន៍សំខាន់ៗ ក្នុងការត្រៀមគិតគូរ សម្រាប់ ការរៀបចំឯកសារគោលនយោបាយឧស្សាហកម្មកម្ពុជាសម្រាប់ដំណាក់កាលបន្ទាប់ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោល នយោបាយសេដ្ឋកិច្ច និងហិរញ្ញវត្ថុ (គ.ស.ហ.)៕ អត្ថបទ៖ សុន រ៉ាឌី

កម្ពុជាពិភាក្សាលើការងារហិរញ្ញវត្ថុបៃតង សម្រាប់រៀបចំគោលនយោបាយ និងយន្តការកៀរគរហិរញ្ញវត្ថុ

ធនាគារជាតិនៃកម្ពុជា បើកកិច្ចប្រជុំពិភាក្សាជាអន្តរក្រសួង លើការងារហិរញ្ញវត្ថុបៃតង សម្រាប់ជាមូលដ្ឋានរៀបចំគោលនយោបាយ យុទ្ធសាស្ត្រ គំនិតផ្តួចផ្តើម យន្តការកៀរគរហិរញ្ញវត្ថុបៃតង និងជំរុញសកម្មភាពនៃការវិនិយោគបៃតងនៅកម្ពុជា។លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា នៅថ្ងៃទី៨ ខែមករា ឆ្នាំ២០២៥ បានអញ្ជើញជាអធិបតី និងដឹកនាំកិច្ចប្រជុំ បើកកិច្ចពិភាក្សា របស់ក្រុមការងារហិរញ្ញវត្ថុបៃតងអន្តរក្រសួង ដឹកនាំដោយធនាគារជាតិនៃកម្ពុជា ដើម្បីចូលរួម រៀបចំគោលនយោបាយយុទ្ធសាស្ត្រ គំនិតផ្តួចផ្តើម យន្តការកៀរគរហិរញ្ញវត្ថុបៃតង និងជំរុញសកម្មភាពនៃការវិនិយោគបៃតង។ កិច្ចប្រជុំក្រុមការងារអន្តរក្រសួងនេះ មានគោលបំណងចែករំលែក បច្ចុប្បន្នភាពនៃយុទ្ធសាស្រ្ត ផែនការសកម្មភាព និងគំនិត ផ្តួចផ្តើមនានារបស់រាជរដ្ឋាភិបាល និងជាការប្រមូលធាតុចូលបន្ថែម លើការអភិវឌ្ឍផែនទីមគ្គុទ្ទេសក៍ហិរញ្ញវត្ថុ ប្រកបដោយចីរភាព របស់ប្រទេសកម្ពុជា លើប្រព័ន្ធវដ្តករសាស្រ្តស្តីពីហិរញ្ញវត្ថុបៃតងនៅកម្ពុជា និងលើដំណើរការរៀបចំមុខងារ និងភារកិច្ចរបស់ក្រុមការងារ ហិរញ្ញវត្ថុបៃតងអន្តរក្រសួង និងពិភាក្សាអំពីការកំណត់ការងារអាទិភាព និងទិសដៅការងារដែលត្រូវអនុវត្តបន្តនាពេលអនាគត។បន្ថែមពីនេះ យន្តការអន្តរក្រសួងនេះក៏ផ្តល់ឱកាសឱ្យសមាជិកនីមួយៗ អាចចែករំលែកព័ត៌មាន និងចំណេះដឹង ពាក់ព័ន្ធក្នុង ការងារទប់ទល់ការបែ្រប្រួលអាកាសធាតុ ដែលជាគោលដៅសកល ក៏ដូចជាគោលដៅរួមរបស់រាជរដ្ឋាភិបាលកម្ពុជា ក្នុងការអភិវឌ្ឍ ប្រកបដោយចីរភាព។សូមបញ្ជាក់ថា នៅក្នុងកិច្ចប្រជុំ ពិភាក្សាលើការងារហិរញ្ញវត្ថុបៃតងនេះ ធនាគារជាតិនៃកម្ពុជា ក្រសួង-ស្ថាប័នពាក់ព័ន្ធ និងគ្រឹះស្ថាន ធនាគារ និងហិរញ្ញវត្ថុនៅកម្ពុជា បានចូលរួមយ៉ាងសកម្ម ក្នុងកិច្ចការជំរុញការកៀរគរប្រភពទុន សំដៅគាំទ្រកំណើនសេដ្ឋកិច្ច ប្រកបដោយចីរភាព និងមានកម្រិតកាបូនទាប៕ អត្ថបទ៖ សុន រ៉ាឌី

វិស័យឯកជនចាប់យកបច្ចេកវិទ្យាឌីជីថល ជាមូលដ្ឋានសម្រាប់ការធ្វើអាជីវកម្ម ពាណិជ្ជកម្ម

វិស័យឯកជននៅក្នុងឆ្នាំ២០២៥ នេះ នឹងចាប់ផ្តើមពង្រឹកចំណេះដឹង និងការចាប់យកបច្ចេកវិទ្យាឌីជីថល សម្រាប់ការផ្លាស់ប្ដូរ រចនាសម្ព័ន្ធ ដើម្បីទាញយកសក្តានុពលនៃបរិវត្តកម្មឌីជីថល សម្រាប់ជាមូលដ្ឋានគ្រឹះពង្រឹងអាជីវកម្ម និងការធ្វើពាណិជ្ជកម្ម។លោក នៅ វាសនា អ្នកជំនាញក្នុងវិស័យបច្ចេកវិទ្យាឌីជីថល និងជាប្រធានគ្រប់គ្រង ViHAT កម្ពុជា លើកឡើងក្នុងកិច្ច សម្ភាសន៍ជាមួយ BTV ស្តីពីការរីកចម្រើននៅក្នុងវិស័យបច្ចេកវិទ្យា និងការប្រើប្រាស់បច្ចេកវិទ្យាឌីជីថលនៅក្នុងអាជីវកម្ម ពាណិជ្ជកម្ម និងការទំនាក់ទំនងនេះថា បច្ចេកវិទ្យាឌីជីថលកំពុងរីកចម្រើនយ៉ាងឆាប់រហ័សនៅលើសកលលោក ស្របពេលនៃការរីកចម្រើននេះ កន្លងមកកម្ពុជាក៏បានដាក់ចេញនូវក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា២០២១-២០៣៥ ដែលយុទ្ធសាស្រ្ត នេះគឺជាការតម្រង់ទិសការអភិវឌ្ឍន៍សេដ្ឋកិច្ចកម្ពុជា តាមរយៈការពង្រឹងពិពិធកម្មមូលដ្ឋានសេដ្ឋកិច្ច និងការប្រកួតប្រជែង។លោកបន្តថា ជុំវិញបច្ចេកវិទ្យានេះ វិស័យឯកជនបានកំពុងពង្រីកខ្លួនការចាប់យកបច្ចេកវិទ្យា ជាពិសេសការចាប់យក ប្រព័ន្ធ ផ្សព្វផ្សាយសង្គម (Social media) ដែលជាប្រព័ន្ធពេញនិយមមួយ ក្នុងការទំនាក់ទំនង ផ្សព្វផ្សាយពាណិជ្ជកម្ម អាជីវកម្មរបស់ខ្លួន ប៉ុន្តែការប្រើប្រាស់ប្រព័ន្ធបច្ចេកវិទ្យាប៉ុណ្ណឹង នៅមិនទាន់គ្រប់គ្រាន់នៅឡើយ គឺទាមទារឱ្យសហគ្រិនត្រូវកាស្វែងយល់បន្ថែម និងចាប់យកប្រព័ន្ធបច្ចេកវិទ្យាផ្សេងៗជាច្រើន ដូចជាការគ្រប់គ្រងលើផ្នែកអាជីវកម្ម និងហិរញ្ញវត្ថុជាដើម ដើម្បីឈានទៅការធ្វើអាជីវកម្មឱ្យកាន់ តែរីកចម្រើន។ ទាក់ទិនបច្ចេកវិទ្យានេះដែរ, លោក សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងថា នៅក្នុងឆ្នាំ២០២៥ នេះ ជាទិសដៅរបស់សមាគម គឺមានផែនការជួយពង្រឹង និងពង្រីកចំណេះដឹងដល់សហគ្រិន លើផ្នែកបច្ចេកវិទ្យា ដើម្បីឱ្យពួកគាត់បាន ស្វែងយកបន្ថែម និងការចាប់យកបច្ចេកវិទ្យាឌីជីថលសម្រាប់ការធ្វើអាជីវកម្ម តាមរយៈការផ្សព្វផ្សាយការស្វែងរកដៃគូពាណិជ្ជកម្ម ធ្វើយ៉ាងណាឱ្យសហគ្រិននៅកម្ពុជា អាចឈានថ្ពក់ចាប់ដៃគូពាណិជ្ជកម្ម និងការផ្គត់ផ្គង់ផលិតផលចូលទីផ្សារឱ្យបានច្រើន។ជុំវិញវិស័យបច្ចេកវិទ្យានេះ, តាមយុទ្ធសាស្ត្រចតុកោណ-ដំណាក់កាលទី ៤ និងចក្ខុវិស័យកម្ពុជាឆ្នាំ២០៥០ និងការត្រៀមខ្លួនឆ្លើយ តប ទៅនឹងបដិវត្តន៍ឧស្សាហកម្មទី ៤ និងទាញយកសក្តានុពលនៃបរិវត្តកម្មឌីជីថល។ ក្របខណ្ឌគោលនយោបាយសេដ្ឋកិច្ច និងសង្គម ឌីជីថលកម្ពុជា ២០២១-២០៣៥ ត្រូវបានគិតគូរ និងរៀបចំឡើង ដោយផ្អែកទៅលើតម្រូវការជាក់ស្តែង សក្តានុពល ធនធាន និង សមត្ថភាព ទាំងនៅក្នុងវិស័យសាធារណៈ និងទាំងនៅក្នុងវិស័យឯកជន សម្រាប់ការតម្រង់ទិសការអភិវឌ្ឍ និងដំណើរនបរិវត្តកម្ម ឌីជីថលនៅកម្ពុជា។ បរិវត្តកម្មឌីជីថល នឹងនាំមកនូវបច្ច័យវិជ្ជមានដ៏សន្ធឹកសន្ធាប់ដល់សេដ្ឋកិច្ច-សង្គមកម្ពុជា ពោលគឺជាចន្ទល់ កំណើនថ្មី ដែលមានភាពធន់ខ្ពស់ទៅនឹងការផ្លាស់ប្ដូរជារចនាសម្ព័ន្ធនាពេលអនាគតផង ហើយក៏ជាចលករក្នុងការជំរុញក្បាលម៉ាស៊ីន កំណើនសេដ្ឋកិច្ចដែលមានស្រាប់ផង៕ អត្ថបទ៖ សុន រ៉ាឌី

ឯកឧត្តម គង់ វិបុល៖ ចិនជាប់ចំណាត់ថ្នាក់លេខ១ លើការវិនិយោគនៅប្រទេសកម្ពុជា

ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លើកឡើងថា គិតក្នុងរយៈពេល ១១ខែ ឆ្នាំ២០២៤ ចិនជាប់ចំណាត់ថ្នាក់លេខ១ ក្នុងការវិនិយោគបរទេសក្នុងប្រទេសកម្ពុជា ដោយមានទុនវិនិយោគសរុបចំនួនប្រមាណ ៣,២ពាន់លានដុល្លារ។ ក្នុងឱកាសអញ្ជើញចូលរួមពិធីជប់លៀងឆ្នាំថ្មីលើកទី៥ របស់សហព័ន្ធសហគ្រិនចិនមកពីខេត្តហ៊ូណាន ឯកឧត្តម គង់ វិបុល បានមានប្រសាសន៍ថា គិតមកដល់បច្ចុប្បន្ននេះ ទំនាក់ទំនងមិត្តភាព និងកិច្ចសហប្រតិបត្តិការរវាងកម្ពុជានិងចិន គឺមានការវិវឌ្ឍរីកចម្រើន និងស៊ីជម្រៅជាបន្តបន្ទាប់ ទោះសម័យកាលមានការផ្លាស់ប្តូរ ណាបែបណាក្នុងសាកលលោក ក៏ប្រទេសទាំងពីរនៅតែរក្សាបានយ៉ាងល្អនូវចំណងមិត្តភាព សមភាព គោរពគ្នា និងផ្តល់ផលប្រយោជន៍ទៅវិញទៅមក។ ជាមួយនេះ ឯកឧត្តមបានថ្លែងអំណរគុណចំពោះរដ្ឋាភិបាលចិន សម្រាប់ការគាំទ្ររយៈពេលវែងដល់កម្ពុជា ហើយសង្ឃឹមយ៉ាងមុតមាំ និងលើកទឹកចិត្តដល់អ្នកវិនិយោគចិនកាន់តែច្រើន ជាពិសេសសហគ្រិនខេត្តហ៊ូណាន ឱ្យបន្តមានទំនុកចិត្តក្នុងការវិនិយោគនៅកម្ពុជា និងពង្រីកទំហំវិនិយោគនៅកម្ពុជា។ ខណៈរដ្ឋាភិបាលកម្ពុជា នឹងបន្តជំរុញកំណែទម្រង់ ធ្វើឱ្យបរិយាកាសធុរកិច្ចកាន់តែល្អប្រសើរ ធានាបាននូវការរីកចំរើននៃសហគ្រាសនៅកម្ពុជា និងទន្ទឹងរង់ចាំទាក់ទាញអ្នកវិនិយោគបន្ថែមទៀត ដើម្បីរួមគ្នាលើកកម្ពស់កំណើនសេដ្ឋកិច្ចកម្ពុជាជាបន្តបន្ទាប់។អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា បានបញ្ជាក់ថា ការជួបជុំជនរួមជាតិហ៊ូណាន ក្នុងពេលនេះ បានក្លាយជាស្ពានដ៏សំខាន់មួយ តភ្ជាប់ទំនាក់ទំនងមិត្តភាពរវាងប្រជាជនកម្ពុជា និងចិន។ អ្នកឧកញ៉ា បានបន្តថា នៅពេលអនាគត អាជីវករខេត្តហ៊ូណាន នឹងបន្តប្តេជ្ញាចិត្តជំរុញកិច្ចសហប្រតិបត្តិការពាណិជ្ជកម្ម និងវិនិយោគរវាងកម្ពុជា និងចិន ទាក់ទាញអ្នកវិនិយោគបន្ថែមទៀតឱ្យចូលរួមក្នុងការកសាងសេដ្ឋកិច្ចរបស់កម្ពុជា និងធ្វើការរួមគ្នាដើម្បីបង្កើតអនាគតប្រកបដោយចីរភាព។ អ្នកឧកញ៉ា ក៏បានអញ្ជើញភ្ញៀវទេសចរណ៍ចិន ឱ្យមកទស្សនាកម្ពុជាដ៏ស្រស់ស្អាតនៅឆ្នាំ២០២៥នេះផងដែរ។សូមជម្រាបជូនថា កាលពីល្ងាចថ្ងៃទី៧ មករា ឆ្នាំ២០២៥នេះ សហព័ន្ធអ្នកជំនួញចិនក្រៅប្រទេសនៅកម្ពុជា របស់ជនជាតិចិនហ៊ូណានរាប់ពាន់នាក់ បានជួបជុំគ្នាដើម្បីរៀបចំពិធីជប់លៀងឆ្នាំថ្មីលើកទី៥ និងពិភាក្សាអំពីការអភិវឌ្ឍន៍នាពេលអនាគត នៅកោះពេជ្រ រាជធានីភ្នំពេញ។ ក្នុងនោះក៏មានការអញ្ជើញចូលរួមរបស់ លោកជំទាវ ខា ឡេង រដ្ឋលេខាធិការក្រសួងពាណិជ្ជកម្មកម្ពុជា លោក Lord Yang Zonglin អនុប្រធានប្រតិបត្តិយុវជននៃក្រុមប្រឹក្សាកម្ពុជាចិននិងជាប្រធានសម្ព័ន្ធយុវជន លោក Lord Lin Jianzhong អនុប្រធានប្រតិបត្តិយុវជននៃក្រុមប្រឹក្សាចិនកម្ពុជា និងភ្ញៀវកិត្តិយសជាច្រើនរូបផ្សេងទៀត៕ អត្ថបទ ឈិត បូរ៉ាវី

ត្រីប្រហុកចាប់ផ្តើមត្រូវ ប្រជាពលរដ្ឋសម្រុកចុះធ្វើប្រហុក ផ្អក នៅតាមតំបន់នានា ក្នុងខេត្តកំពង់ឆ្នាំង ត្រៀមទុកសម្រាប់បរិភោគប្រចាំឆ្នាំ

ត្រីសម្រាប់ធ្វើប្រហុក ផ្អក បានចាប់ផ្តើមត្រូវខ្លាំង នៅក្នុងខ្នើតខែបុស្សនេះ ខណៈពេលដែលត្រីចាប់ផ្តើមត្រូវគេសង្កេតឃើញមានប្រជាពលរដ្ឋជាច្រើនបាននាំគ្នាចុះមកធ្វើប្រហុក ផ្អក ត្រីឆ្អើរ ត្រីងៀត នៅតាមតំបន់នានា ក្នុងខេត្តកំពង់ឆ្នាំង ត្រៀមទុកសម្រាប់ការបរិភោគប្រចាំឆ្នាំ។ប្រជាពលរដ្ឋដែលចុះមកធ្វើប្រហុក ផ្អក ត្រីឆ្អើរ ត្រីងៀត នៅតាមតំបន់នានា ក្នុងខេត្តកំពង់ឆ្នាំង មានមកពីខេត្តកណ្តាល ខេត្តកំពង់ស្ពឺ ខេត្តកំពង់ចាម និងមួយចំនួនទៀត ជាអ្នកខេត្តកំពង់ឆ្នាំង ដែលពួកគាត់រស់នៅប៉ែកខាងលើឆ្ងាយពីដែននេសាទ៕

បណ្ដាញសង្គម

ព័ត៌មានថ្មីៗ

ចិន និងអឺរ៉ុប ព្រមានអាមេរិក ខណៈលោក Trump ដំឡើងពន្ធថ្មីលើដែកថែប និងអាលុយមីញ៉ូម

លោក Trump ចុះហត្ថលេខាក្រឹត្យដំឡើងពន្ធលើដែកថែប និងអាលុយមីញ៉ូមសម្រាប់ប្រទេសទាំងអស់ដោយគ្មានការលើកលែង

លោក Trump ព្រមានកម្ទេចក្រុមហាម៉ាស បើមិនដោះលែងចំណាប់ថ្នូរទាំងអស់ត្រឹមពាក់កណ្តាលថ្ងៃសៅរ៍នេះ

ក្រុមហាម៉ាសគំរាមពន្យារពេលដោះលែងចំណាប់ថ្នូរដំណាក់កាលបន្ទាប់ ដោយអះអាងថាអ៊ីស្រាអែលរំលោភបទឈប់បាញ់

[BREAKING NEWS] លោក Trump ចុះហត្ថលេខាក្រឹត្យដំឡើងពន្ធលើដែកថែប និងអាលុយមីញ៉ូមសម្រាប់ប្រទេសទាំងអស់ដោយគ្មានការលើកលែង

ក្រុមហ៊ុន World Citi Group បង្ហាញចំណាប់អារម្មណ៍វិនិយោគលើវិស័យអប់រំផ្នែកសុខាភិបាលនៅកម្ពុជា

ក្រុមហ៊ុន Excellent Associates Group Limited បង្ហាញពីចំណាប់អារម្មណ៍ស្វែងរកឱកាសវិនិយោគនៅកម្ពុជា

សាជីវកម្ម San Miguel របស់ហ្វីលីពីនចាប់អារម្មណ៍បណ្ដាក់ទុនវិនិយោគលើវិស័យហេដ្ឋារចនាសម្ព័ន្ធធំៗនៅកម្ពុជា

សម្ដេចមហាបវរធិបតី លើកទឹកចិត្តឱ្យក្រុមអតីតនិស្សិតហ្វីលីពីនពីបណ្ឌិត្យសភាយោធា West Point ចងភ្ជាប់ទំនាក់ទំនងជាមួយក្រុមអតីតនិស្សិតកម្ពុជា ពីបណ្ឌិត្យសភាយោធាWest Point

កម្ពុជាផ្តល់ចំណេះដឹងអំពីកិច្ចការពារកម្មសិទ្ធិបញ្ញា ពាក់ព័ន្ធនឹងពូជថ្មីនៃដំណាំ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877