BTV NEWS

ប្រធានសមាគមអ្នកផ្គត់ផ្គង់ត្រីប្ដេជ្ញាចិត្តចូលរួមផ្គត់ផ្គង់ទិន្នផលត្រីឱ្យឆ្លើយតបតាមតម្រូវការទីផ្សារ

រដ្ឋមន្ត្រីក្រសួងសាធារណការ ចូលរួមកិច្ចប្រជុំពិភាក្សាការងារលើការរៀបចំផែនការមេ និងការអភិវឌ្ឍច្រករបៀងគម្រោងព្រែកជីកហ្វូណនតេជោ

ឯកឧត្តម ឌិត ទីណា ចុះត្រួតពិនិត្យស្ថានភាពដីសម្រាប់ផលិតកម្មដំណាំបន្លែដេីម្បីផ្គត់ផ្គង់ដល់កងទ័ព

សហព័ន្ធស្រូវអង្ករកម្ពុជា៖ កញ្ចប់អង្ករដែលមានរូបភាពស្រដៀងទៅនឹងទង់ជាតិប្រទេសថៃ មិនត្រូវបានបោះពុម្ពក្នុងប្រទេសកម្ពុជាឡើយ

សេដ្ឋកិច្ច និង កសិកម្ម

ធនគារARDBបើកសាខានៅបាត់ដំបងដើម្បីជួយដល់កសិករ កាន់តែងាយស្រួលទទួលបានឥណទាន

ភ្នំពេញ ៖ ធនាគារអភិវឌ្ឍន៍កសិកម្ម និង ជនបទARDB បានពង្រីកសាខាថ្មីមួយនៅខេត្តបាត់ដំបង ដើម្បីផ្តល់ភាពងាយស្រួលដល់កសិករ សហគមន៍កសិកម្ម និង អ្នកប្រកបរបរពាក់ពន្ធ័ទៅនឹងវិស័យកសិកម្មអាចទទួលបានឥណទានដែលមានអត្រាការប្រាក់ទាប និង កាន់តែងាយស្រួលជាងមុន។ កម្មវិធីនេះរៀបចំឡើងដោយមានការអញ្ជើញចូលរួម ពី ឯកឧត្តមបណ្ឌិត វង់ សណ្តាប់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទតំណាងសហព័ន្ធស្រូវអង្ករកម្ពុជា តំណាងរោងម៉ាស៊ីនកិនស្រូវក្នុងខេត្តបាត់ដំបង បន្ទាយមានជ័យ និងពោធិ៍សាត់ និង អ្នកប្រមូលទិញស្រូវ និងតំណាងសហគមន៍កសិកម្មក្នុងខេត្តបាត់ដំបង សរុបប្រមាណជាង៣០០នាក់។ឯកឧតត្តម កៅ ថា ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍កសិកម្មនិង ជនបទ បានមានប្រសាសន៍ថា ការបើកសាខាថ្មី នៅខេត្តបាត់ដំបង ដើម្បីផ្តល់ភាពងាយស្រួលជាងមុនចំពោះប្រជាពលរដ្ឋ អាចទទួលសេវាឥណទានពីធនាគារ មិនត្រឹមតែពលរដ្ឋនៅខេត្តបាត់ដំបងប៉ុណ្ណោះ ប៉ុន្តែពលរដ្ឋនៅខេត្តពោធិ៍សាត់ និង បន្ទាយមានជ័យ ក៏អាចមកទទួលសេវានៅសាខាបាត់ដំបងបានដែរ។ ឯកឧត្តមបន្តទៀតថា ខេត្តបាត់ដំបង ទទួលបានកម្ចីប្រមាណជិត៣០ភាគរយនៃឥណទានសរុបដែលARDB បានប្រតិបត្តិការកន្លងមក ដែលក្នុងនោះបានជួយទៅដល់កសិករលើការងារដាំដុះស្រូវ ឃ្លាំងម៉ាស៉ីនកិនស្រូវ ឡសម្ងួតស្រូវ ការកែច្នៃផលិតផលកសិកម្ម ផ្នែកចិញ្ចឹមសត្វ វារីវប្បកម្ម និង សហគ្រាសខ្នាតតូច និង មធ្យមដែលស្របទៅនឹងបេសសកម្មរបស់ធនាគារARDBក្នុងការជួយជ្រោមជ្រែងទៅលើវិស័យកសិកម្ម និង អភិវឌ្ឍន៍ជនបទ។ ឯកឧត្តម វង់ សណ្តាប់ រដ្ឋលេខាធិការក្រសួងសេដ្ឋកិច្ច និង ហិរញ្ញវត្ថុ បានមានប្រសាសន៍ថា ក្រោមការដឹកនាំរបស់សម្តេចតេជោ ហ៊ុនសែននាយករដ្ឋមន្ត្រី បានដឹកនាំប្រទេសទទួលបាននូវភាពជោគជ័យចំពោះការទប់ស្កាត់នូវការឆ្លងរាលដាលនៃជំងឺកូវីដ១៩ ហើយបច្ចុប្បន្ននេះ បាននឹងកំពុងអនុវត្តកម្មវិធីស្តារសេដ្ឋកិច្ចឡើងវិញតាមរយៈការគិតគូរខ្ពស់ទៅលើវិស័យ ទេសចរណ៍ សំណង់ ការវិនិយោគ និង វិស័យកសិកម្មជាដើម។ ការដាក់ចេញនូវផែនការសកម្មភាពស្តារសេដ្ឋកិច្ចឡើងវិញនេះ នឹងផ្តល់ឱកាសដល់កសិករ អាចពង្រីកការងារដាំដុះ ការកែច្នៃ ការនាំចេញផលិតផលទៅកាន់តែទីផ្សារក្រៅប្រទេស ហើយយកិច្ចការងារទាំងនេះអាចសម្រេចទៅបានដោយសារតែមានការចូលរួមចំណែកទុន ពីធនាគារARDBផងដែរ។ ឯកឧត្តម រំពឹងថា ធនាគារARDB នឹងបន្តបេសកកម្មរបស់ខ្លួនដើម្បីសម្រេចទៅតាមចក្ខុវិស័យរបស់រាជរដ្ឋាភិបាលគឺការលើកស្ទួយជីវភាពរបស់ប្រជាកសិករ ដែលនឹងក្លាយជាផ្នែកមួយចូលរួមជម្រុញកំណើនសេដ្ឋកិច្ចជាតិ។ សូមបញ្ជាក់ថា ធនាគារARDB ត្រូវ បានបង្កើតឡើងតាំងពីឆ្នាំ១៩៩៨ ជាធនាគារឯកទេស ដោយធ្វើប្រតិបត្តិការចម្បងផ្តោតលើការផ្តល់ឥណទានដល់អតិថិនជន និង ឥណទានបោះដុំដល់គ្រឹះស្ថានមី ក្រូហិរញ្ញវត្ថុដើម្បីផ្តល់ ឥណទានបន្តជូនប្រជាកសិករ និង សហគមន៍កសិកម្ម ។ បន្ទាប់មកនៅឆ្នាំ២០១៩ ដោយទទួលបាន សេចក្តីទុកចិត្ត ពី រាជរដ្ឋាភិបាលធនាគារ ARDB បានប្រែក្លាយពីធនាគារឯកទេស ទៅជាធនាគារពាណិជ្ជ ដើម្បីធ្វើ ប្រតិបត្តិការសេវា ធនា គារពេញលេញជូនអតិថិជន។ ក្នុងរយៈពេល២៥ឆ្នាំ នេះធនាគារ ARDB បានចូលរួមចំណែក យ៉ាងសកម្មក្នុងការអនុវត្ត គោលនយោបាយអភិវឌ្ឍន៍វិស័យកសិកម្មរបស់រាជរដ្ឋាភិបាល ក្រោមការដឹកនាំប្រកបដោយគតិ បណ្ឌិត របស់ សម្តេចអគ្គ មហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងការ អភិវឌ្ឍវិស័យកសិកម្ម តាមរយៈការជំរុញឱ្យមានស្ថិរភាពខ្សែច្រវាក់ផ្គត់ផ្គង់ក្នុងទីផ្សារ និងការលើកទឹកចិត្តឱ្យកសិករ ផលិតកសិផលដើម្បីឆ្លើយតបតម្រូវការក្នុងស្រុក កាត់បន្ថយការនាំចូល និងលើកកម្ពស់ការនាំចេញ។ ជាក់សែ្តង ធនាគារ ARDB បានអនុវត្ត កម្មវិធី ហិរញ្ញប្បទានពិសេសរបស់ រាជរដ្ឋាភិបាលក្នុងការផ្តល់ជាទុនបង្វិល និង ទុន វិនិយោគ លើហេដ្ឋារចនាសម្ព័ន្ធឃ្លំាងស្តុក ឡ សម្ងួត ស្រូវ និង ការកែច្នៃ នៅតំបន់ ខេត្តបាត់ដំបង កំពង់ធំ ព្រៃវែង និង តាកែវ ដែលមានសមត្ថភាពគ្រប់គ្រាន់ក្នុងការរួមចំណែកគាំទ្រដល់ ការនាំចេញ អង្ករបាន១លាន តោន ក្នុងមួយឆ្នាំ ស្រប តាមគោលនយោបាយរបស់ រាជរដ្ឋាភិបាលនិងរក្សា ស្ថិរភាពថ្លៃស្រូវ៕ អត្ថបទ៖ សូដាវណ្ណ

នគរបាលប្រឆាំងការជួញដូរមនុស្សឃាត់ខ្លួនបុរសម្នាក់ជាមេខ្យល់ ពាក់ព័ន្ធករណី នាំពលករជាង ១០០នាក់ ទៅធ្វើការនៅកូរ៉េ

ភ្នំពេញ៖ កម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន ដឹកនាំសហការជាមួយកម្លាំងគណៈបញ្ជាការឯកភាពខណ្ឌខណ្ឌពោធិ៍សែនជ័យ បានចុះត្រួតពិនិត្យរដ្ឋបាលផ្ទះសំណាក់មួយកន្លែងយីហោ «នាគទេព» រកឃើញជនរងគ្រោះចំនួន ១២៤នាក់ (ស្រី ៣៩នាក់) និងឃាត់ខ្លួនប្រុសមេខ្សល់ម្នាក់ រួមទាំងដកហូតលិខិតឆ្លងដែនមួយចំនួន ពាក់ព័ន្ធករណី នាំពលករមិនស្របច្បាប់ទៅធ្វើការនៅប្រទេសកូរ៉េ ។សូមជម្រាបជូនថា កាលពីព្រឹកថ្ងៃទី០៨ ខែមីនា ឆ្នាំ២០២៣ ដោយមានការចង្អុលបង្ហាញពី ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរនគរបាលរាជធានីភ្នំពេញ កម្លាំងការិយាល័យប្រឆាំងការជួញដូរមនុស្ស និងការពារអនីតិជន ដឹកនាំដោយលោកឧត្តមសេនីយ៍ទោ ចាន់ កិត្តិខុម ស្នងការរង ទទួលផែនការងារប្រឆាំការជួញដូរមនុស្សនិងការពារអនីតិជននិងការងារយេនឌ័រ និងលោកវរសេនីយ៍ទោ ហាក់ លី នាយការិយាល័យ បានសហការជាមួយកម្លាំងគណៈបញ្ជាឯកភាពខណ្ឌពោធិ៍សែនជ័យ បានចុះត្រួតពិនិត្យរដ្ឋបាលផ្ទះសំណាក់ «នាគទេព» ស្ថិតក្នុងភូមិត្រពាំងល្វា១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។ជនសង្ស័យដែលជាមេខ្យល់មាន ឈ្មោះ តាំ ច័ន្ទទី ហៅ សីហា ភេទប្រុស អាយុ ២៧ឆ្នាំ ជនជាតិខ្មែរ បច្ចុប្បន្នស្នាក់នៅផ្ទះជួល សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។តាមចម្លើយសារភាពរបស់ជនសង្ស័យ បានឲ្យដឹងថា ខ្លួនបានកុហកបោកប្រាស់ទៅជនរងគ្រោះជាង ១០០ នាក់នោះថា នឹងនាំពួកគាត់ទៅធ្វើការនៅប្រទេសកូរ៉េ ដោយក្នុងម្នាក់ៗត្រូវចំណាយលុយពី ៦០០ទៅ ៨០០ដុល្លារ ដើម្បីចំណាយទៅលើការធ្វើលិខិតឆ្លងដែនរួចឲ្យមក បានសម្រាកនៅទីតាំងផ្ទះសំណាក់នេះត្រៀមចេញទៅប្រទេសកូរ៉េ។តាមប្រភពពីជនរងគ្រោះ បានឲ្យដឹងថា ពួកគាត់ពិតជាបានបានខាតបង់ប្រាក់ដែលបានឲ្យទៅជនសង្ស័យជាមេខ្យល់ ក្នុងម្នាក់ៗ ចន្លោះពី ៦០០ដុល្លារ ទៅ ៨០០ដុល្លារ ពិតប្រាកដមែន។បច្ចុប្បន្នកម្លាំងនគរបាលការិយាល័យប្រឆាំងការជួញដូរមនុស្សនិងការពារអនីតិជន កំពុងកសាងសំណុំ បញ្ជូនជនសង្ស័យ ទៅកាន់សាលាដំបូងរាជធានីភ្នំពេញ ចាត់ការតាមនីតិវិធីច្បាប់ ។ ចំណែកជនរងគ្រោះចំនួន ១២៤នាក់ (ស្រី ៣៩នាក់) អនុញ្ញាតឲ្យវិលត្រលប់ទៅលំនៅដ្ឋានវិញ៕ អត្ថបទ៖ កុម្ភៈ

ពន្ធដារ អំពាវដល់ម្ចាស់សហគ្រាស អនុវត្តកាតព្វកិច្ចបង់ពន្ធឱ្យបានត្រឹមត្រូវ

ភ្នំពេញ៖ អគ្គនាយកនៃអគ្គនាយកដ្ឋានពន្ធដារ អំពាវដល់ម្ចាស់សហគ្រាសទាំងអស់ បន្តការកែទម្រង់ និងការគ្រប់គ្រងអាជីវកម្មឲ្យបានល្អប្រសើរ ដើម្បីការរីកចម្រើននៅក្នុងអាជីវកម្មរបស់ខ្លួន និងចូលរួមបង់ពន្ធឲ្យបានទាន់ពេលវេលា ដែលជាផ្នែកមួយនៃការចូលរួមចំណែកលើកកម្ពស់ដល់ការអភិវឌ្ឍនៅកម្ពុជា។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ លើកឡើងក្នុងសិក្ខាសាលាផ្សព្វផ្សាយស្តីពី "កាតព្វកិច្ចពន្ធលើប្រាក់ចំណូល ការបំពេញទម្រង់លិខិតប្រកាសពន្ធលើប្រាក់ចំណូលប្រចាំឆ្នាំ ការស៊ើបអង្កេតបទល្មើសពន្ធដារ និងការប្រឆាំងការសម្អាតប្រាក់ " នៅថ្ងៃទី ៦ ខែ មីនា ឆ្នាំ ២០២៣ នេះថាតាមរយៈនៃការពង្រឹងអភិបាលកិច្ចល្អ អគ្គនាយកដ្ឋានពន្ធដារបានរៀបចំការគ្រប់គ្រងតាមប្រព័ន្ធអេឡិចត្រូនិចឌីជីថល ដែល ធ្វើយ៉ាងណាម្ចាស់អាជីវកម្មងាយបង់ពន្ធ និងមានភាពងាយស្រួលក្នុងការបង់ពន្ធ ។តាមប្រសាសន៍ណែនាំ និងការខិតខំប្រឹងប្រែង ពិតជាបានផ្តល់ភាពងាយស្រួល គឺការបង់ពន្ធតាមអេឡិចត្រូនិច បច្ចុប្បន្នម្ចាស់សហគ្រាសបានបង់ពន្ធតាមប្រព័ន្ធនេះជាង ៩០ ភាគរយ នៃសហគ្រាសសរុប លើកលែងតែសហគ្រាសតូចៗ ដែលនៅបង់ពន្ធតាមលិខិតប្រកាស។ តែសម្រាប់បញ្ហានេះ អគ្គនាយកដ្ឋានពន្ធដារ ក៏បានបង្កើតនូវ App ដែលម្ចាស់អាជីវកម្មខ្នាតតូច អាចវាយទិន្នន័យបញ្ជូន និងបញ្ជូនមកពន្ធដារជាការស្រាច់។ឯកឧត្តម គង់ វិបុល បន្តថា ចំពោះពន្ធលើប្រាក់ចំណូលនេះ នៅឆ្នាំ ២០២២ កន្លងមក អគ្គនាយកដ្ឋានពន្ធដារបានប្រមូលចំណូលពន្ធនេះបានកើនឡើងយ៉ាងល្អប្រសើរ ហើយតាមរយៈនៃការកើនឡើងពន្ធប្រាក់ចំណូលនេះ គឺត្រូវតែឆ្លុះបញ្ចាំងនៅឆ្នាំ ២០២៣ ដែលកិច្ចការនេះ ទាំងរដ្ឋ និងឯកជន ត្រូវរួមគ្នាបន្តការកែទម្រង់ និងការគ្រប់គ្រងអាជីវកម្មឲ្យបានល្អប្រសើរ ដើម្បីការរីកចម្រើននៅក្នុងអាជីវកម្មរបស់ខ្លួន ដើម្បីចូលរួមចំណែកលើកកម្ពស់ដល់ការអភិវឌ្ឍនៅកម្ពុជា។សូមបញ្ជាក់ថា នៅក្នុងបំណាច់ឆ្នាំ ២០២២ អគ្គនាយកដ្ឋានពន្ធដារប្រមូលចំណូលពន្ធ-អាករគ្រប់ប្រភេទ បានចំនួនជាង ៣ ៤៥៥ លានដុល្លារអាមេរិក គឺប្រមូលលើសផែនការបានជាង ៦០០ លានដុល្លារ ត្រូវប្រមាណជាង ២២ ភាគរយ បើធៀបទៅនិងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១ ៕អត្ថបទ៖ សុន រ៉ាឌី

កម្ពុជាអាចទទួលបានការវិនិយោគកាន់តែច្រើន បន្ទាប់ពីត្រូវបានដកចេញពីបញ្ជីប្រផេះ

ភ្នំពេញ៖ អគ្គនាយកនៃអគ្គនាយកដ្ឋានពន្ធដារ មានប្រសាសន៍ថា ការដកកម្ពុជាចេញពីបញ្ជីប្រផេះនៃប្រទេសដែលមានការសម្អាតប្រាក់កខ្វក់ គឺជាសញ្ញាវិជ្ជមាននៃសេដ្ឋកិច្ចកម្ពុជាក្នុងការទាក់ទាញវិនិយោគ ជាពិសេសការបង្កើននូវនិរន្តរភាពនៃថវិកាជាតិសម្រាប់ការអភវិឌ្ឍ។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ លើកឡើងបែបនេះក្នុងសិក្ខាសាលាផ្សព្វផ្សាយស្តីពី "កាតព្វកិច្ចពន្ធលើប្រាក់ចំណូល ការបំពេញទម្រង់លិខិតប្រកាសពន្ធលើប្រាក់ចំណូលប្រចាំឆ្នាំ ការស៊ើបអង្កេតបទល្មើសពន្ធដារ និងការប្រឆាំងការសម្អាតប្រាក់ "នៅថ្ងៃទី ៦ ខែមីនា ឆ្នាំ ២០២៣។ឯកឧត្តមបន្តថា អគ្គនាយកដ្ឋានពន្ធដារ មាននាយកដ្ឋានស៊ើបអង្កេតបទល្មើសពន្ធដារ ជាសេនាធិការក្នុងការបំពេញមុខងារស៊ើបអង្កេតបទល្មើសសម្អាតប្រាក់ និងហិរញ្ញប្បទានភេរវកម្ម ដែលបាននឹងបន្តចូលរួមយ៉ាងសកម្មជាមួយអន្តរក្រសួង ស្ថាប័នដទៃទៀតរបស់រាជរដ្ឋាភិបាល ដែលមានដូចជា ក្រសួងមហាផ្ទៃ អគ្គស្នងការដ្ឋាននគរបាលជាតិ ក្រសួងយុត្តិធម៌ អង្គភាពស៊ើបការណ៍ហិរញ្ញវត្ថុកម្ពុជា និងក្រសួង-ស្ថាប័នពាក់ព័ន្ធផ្សេងទៀត លើការចោទប្រកាន់អ្នកប្រព្រឹត្តបទល្មើស លើករណីសង្ស័យនៃការលាងប្រាក់។ឯកឧត្តម រដ្ឋមន្ត្រីប្រតិភូអមនាយករដ្ឋមន្ត្រី បន្តថា លទ្ធផលដែល FATF សម្រេចដកកម្ពុជាចេញពីបញ្ជីប្រផេះ នេះជាខិតខំប្រឹងរបស់អង្គភាពរាជរដ្ឋាភិបាលទាំងអស់គ្នា ដែលការដកកម្ពុជាចេញពីបញ្ជីប្រផេះ គឺជាសញ្ញាវិជ្ជមានដ៏ល្អរបស់កម្ពុជា និងជាផ្នែកមួយយ៉ាងសំខាន់ ជាពិសេសការបង្កើនទំនុកចិត្ត និងទាក់ទាញដល់អ្នកវិនិយោគ ។សូមបញ្ជាក់ថា ដើម្បីចៀសផុតពីបញ្ជីប្រផេះ កម្ពុជា ត្រូវប្រឹងប្រែងស្រាវជ្រាវរកឲ្យឃើញពីប្រភពធនធានកខ្វក់របស់ឧក្រិដ្ឋជន ហើយឈានទៅដល់ការរឹបអូស ឬការបង្កកធនធានកខ្វក់ទាំងនោះ។ជុំវិញការបង់ពន្ធនេះ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី បានឲ្យដឹងថា ក្នុងរយៈពេលប៉ុន្មានឆ្នាំចុងក្រោយនេះ អនុលោមភាពសារពើពន្ធមានការកើនឡើងគួរឱ្យកត់សម្គាល់ ក៏ប៉ុន្តែនៅតែមានសហគ្រាសធំៗមួយចំនួន នៅតែប្រកាសខាតច្រើនឆ្នាំ ព្យាយាមបន្តគេចវេះពន្ធ ហើយទន្ទឹមនឹងគ្នានេះក៏មានរូបភាពនៃការគេចវេះពន្ធ និងបទល្មើសពន្ធដារបានកើតឡើងក្នុងទម្រង់ថ្មីៗ ក៏ប៉ុន្តែអគ្គនាយកដ្ឋានពន្ធដារបន្តស្រាវជ្រាវ និងចាត់វិធានការដើម្បីទប់ស្កាត់៕ អត្ថបទ៖ សុន រ៉ាឌី

រាជរដ្ឋាភិបាល និងដៃគូរអភិវឌ្ឍន៍ ពិភាក្សាលើការរៀបចំយុទ្ធសាស្រ្តវិស័យដឹកជញ្ជូន និងការវិនិយោគ

ភ្នំពេញ៖ រាជរដ្ឋាភិបាល និងដៃគូរអភិវឌ្ឍន៍ ចាប់ផ្តើមពិភាក្សាជំនួយបច្ចេកទេស លើការរៀបចំផែនការយុទ្ធសាស្រ្តអភិវឌ្ឍន៍វិស័យដឹក ជញ្ជូនសាធារណៈ ដើម្បីប្រសិទ្ធភាពនៃមធ្យោបាយដឹកជញ្ជូន និងផែនការ តភ្ជាប់នៃគម្រោងវិនិយោគលើមធ្យោបាយដឹកជញ្ជូនផ្សេងៗ។លោក Daisuke Mizusawa មន្រ្តីជំនាញការជាន់ខ្ពស់ផ្នែកដឹកជញ្ជូន នៃធនាគារអភិវឌ្ឍន៍អាស៊ី (ADB) លើកឡើងក្នុងជំនួប នៅថ្ងៃទី៦ ខែកុម្ភៈ ជាមួយ ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ ថា គោលបំណងនៃការសិក្សាលើការរៀបចំផែនការយុទ្ធសាស្រ្ត សម្រាប់ការអភិវឌ្ឍវិស័យដឹកជញ្ជូនសាធារណៈនៅក្នុងទីក្រុង គឺដើម្បីដោះស្រាយបញ្ហាការកក ស្ទះចរាចរណ៍ និងប្រសិទ្ធភាពនៃមធ្យោបាយដឹកជញ្ជូននៅរាជធានីភ្នំពេញ ដោយការសិក្សានេះធ្វើឡើងក្រោមក្របខ័ណ្ឌហិរញ្ញប្បទាន ជំនួយ បច្ចេកទេសរបស់ជប៉ុន គ្រប់គ្រងដោយ ADB និងកម្មវិធីភាពជាដៃគូ MobiliseYourCity របស់ភ្នាក់ងារបារាំងសម្រាប់ការអភិវឌ្ឍ (AFD) ។លោក Daisuke Mizusawa លោកបន្តថា តាមការសិក្សាបានបង្ហាញនូវលទ្ធភាពនៃជម្រើសមួយចំនួន សម្រាប់ដោះស្រាយបញ្ហាកកស្ទះចរាចរណ៍ និងតម្រូវការវិនិយោគលើគម្រោងប្រព័ន្ធដឹកជញ្ជូនសាធារណៈតាមរថយន្តក្រុងផងដែរ។ បញ្ហានេះក្រុមបេសកម្ម របស់ ADB ក៏បានស្នើសុំមតិណែនាំជាយុទ្ធសាស្រ្ត ពីក្រសួងសេដ្ឋកិច្ច និងហិរញ្ញវត្ថុ ដើម្បីជំរុញការសិក្សា អាចឆ្លើយតបចំគោលដៅ និងដោះស្រាយបានចំៗ។ជាការឆ្លើយតប ឯកឧត្តម វង្សី វិស្សុត បានស្វាគមន៍ចំពោះជំនួយបច្ចេកទេសដ៏មានសារៈសំខាន់នេះ នៅក្នុងបរិការណ៍ដែល ប្រទេសកម្ពុជាកំពុងមានការអភិវឌ្ឍយ៉ាងឆាប់រហ័ស ហើយកំណើនខាងផ្នែកនគរូបនីយកម្ម ក៏មានល្បឿនលឿន ពិសេសក្នុងរាជធានីភ្នំ ពេញ និងទីក្រុងនៅតាមបណ្តាខេត្តមួយចំនួន ខណៈដែលបញ្ហាការកកស្ទះចរាចរណ៍ និងប្រសិទ្ធភាពនៃមធ្យោបាយដឹកជញ្ជូន បាន កំពុងក្លាយជាបញ្ហាប្រឈមពីមួយថ្ងៃទៅមួយថ្ងៃ។ ឯកឧត្តមរដ្ឋមន្រ្តីប្រតិភូ លើកឡើងបន្តថា ចំពោះការរៀបចំយុទ្ធសាស្រ្តនេះ ត្រូវតែផ្អែកលើផែនការនគរូបនីយកម្ម, ផែនការ មេអភិវឌ្ឍន៍ទីក្រុង, ផែនការមេនៃការអភិវឌ្ឍន៍ហេដ្ឋារចសម្ព័ន្ធ តភ្ជាប់ទីក្រុងទៅប៉ូលសេដ្ឋកិច្ច និងផែនការមេអភិវឌ្ឍន៍ហេដ្ឋារចនា សម្ព័ន្ធផ្លូវថ្នល់ក្នុងទីក្រុង ព្រមទាំងផែនការអភិវឌ្ឍន៍ផ្សេងៗទៀតក្នុងទីក្រុង។ ក្រៅពីនេះការអភិវឌ្ឍន៍វិស័យដឹកជញ្ជូនសាធារណៈ នៅទីក្រុង ក៏ត្រូវគិតគូរថែមទៀត ទៅដល់មធ្យោបាយដឹកជញ្ជូនផ្សេងៗដូចជា៖ រថភ្លើងលើអាកាស, រថភ្លើងក្រោមដី និងរថភ្លើង ធម្មតាជាដើម។ ដោយឡែកចំពោះការរៀបចំប្រព័ន្ធដឹកជញ្ជូនសាធារណៈតាមរថយន្តក្រុង ក៏ត្រូវមានការគិតគូរដល់របៀងដឹកជញ្ជូន និងតម្រាយផ្លូវ និងកក្តាការចូលរួមគាំទ្រក្នុងការប្រើប្រាស់របស់ប្រជាជន។ ក្រៅពីនេះគឺត្រូវសិក្សាបន្ថែមថា តើរថយន្តក្រុង ទាំងនោះ ជាប្រភេទរថយន្តដែលប្រើប្រាស់ថាមពលប្រេង ឬក៏អគ្គិសនី ដើម្បីគ្មានការបំភាយឧស្ម័នការបូនិចប៉ះពាល់ដល់បរិស្ថាន៕ អត្ថបទ៖ សុន រ៉ាឌី

សម្តេចតេជោជំរុញបង្កើនការដាំដុះ ដើម្បីធានាសន្តិសុខស្បៀងក្នុងស្រុក និងនាំចេញ

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានជំរុញការបង្កបង្កើនផល ដើម្បីធានាបានសន្តិសុខស្បៀងក្នុងស្រុក និងអាចមានលទ្ធភាពនាំចេញទៅក្រៅប្រទេសកាន់តែច្រើន ដោយការដាំដុះលើដំណាំសក្តានុពល រួមមានស្រូវ ដំឡូងមី និងបន្លែជាដើម ត្រូវគិតគូដល់សុខភាពរបស់អ្នកប្រើប្រាស់ តាមរយៈការប្រើប្រាស់ជីក្នុងកម្រិតសមស្រប ឬជីធម្មជាតិ។ថ្លែងក្នុងពិធីប្រគល់វិញ្ញាបនបត្រ និងសញ្ញាបត្រជូនសិស្ស និស្សិតវិទ្យាស្ថានខ្មែរជំនាន់ថ្មីសរុបជិត២ពាន់នាក់ នៅព្រឹកថ្ងៃទី៦ ខែកុម្ភៈ សម្តេចតេជោ ហ៊ុន សែន មានប្រសាសន៍ថា កម្ពុជា នៅសល់ស្រូវប្រមាណ៦តោន ឬស្មើនឹងអង្ករ ៤លានតោន ក្នុងមួយឆ្នាំ សម្រាប់នាំចេញ ដោយមិនទាន់គិតពីស្បៀងដទៃទៀត ដូចជាដំឡូងមី ឬពោតជាដើម។សម្តេចតេជោ បានវាយតម្លៃខ្ពស់ ដល់ការបង្កបង្កើនផលរបស់កសិករ ដែលបានជួយ ឱ្យកម្ពុជា មានស្បៀងគ្រប់គ្រងដូចសព្វថ្ងៃ ងើបចេញពីប្រទេសដែលធ្លាប់ខ្វះស្បៀង គាំទ្រដោយប្រព័ន្ធស្រោចស្រពមានកាន់តែច្រើន អនុញ្ញាតឱ្យកសិករ បង្កបង្កើនផលលើសពីមួយដងក្នុងមួយរដូវ។សម្តេចតេជោ មានប្រសាសន៍ថា៖ “ឥឡូវនេះ កំពុងតែគិតអំពីសុវត្ថិភាពនៃអ្នកប្រើប្រាស់ គ្រប់ផ្នែកទាំងអស់ត្រូវគិតលើសុវត្ថិភាពនៃអ្នកប្រប្រាស់ដែលជាចំណុចត្រូវយកចិត្តទុកដាក់ ជាមួយនឹងការផលិតដោយមិនប្រើជីគីមីហួសជ្រុល ប៉ុន្តែលើកទឹកចិត្តឱ្យផលិតដោយជីសរីរាង្គ ដែលវាធានាដល់សុខភាពប្រជាជនយើង។ យើងកំពុងគិតដល់ធានាសន្តិសុខស្បៀងផង និងធានាដល់សុត្ថិភាព និងសុខភាពនៃអ្នកប្រើប្រាស់ផងដែរ”។ សូមបញ្ជាក់ថា កម្ពុជា បាននាំចេញកសិផលចំនួន ៧,៦២ លានតោនក្នុងរយៈពេល ១០ ខែទៅទីផ្សារក្រៅប្រទេស។ នេះបើយោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។ ផលិតផលសំខាន់ៗដែលកម្ពុជានាំចេញរួមមាន អង្ករ ចេក ស្វាយ ដំឡូងមី គ្រាប់ស្វាយចន្ទី ពោត ប្រេងដូង ម្រេច ជាដើម៕ អត្ថបទ៖ វណ្ណៈ

សហគ្រាសផ្នែកវេចខ្ចប់ និងកែច្នៃក្នុងស្រុក កំពុងងើបឡើងល្អប្រសើរជាងឆ្នាំមុន

ភ្នំពេញ៖ ប្រធានសមាគមសហគ្រិនស្រ្តីកម្ពុជា លើកឡើងថា នៅក្នុងឆ្នាំ ២០២៣ នេះ សកម្មភាពរបស់សហគ្រាសវេចខ្ចប់ និងកែច្នៃនៅកម្ពុជា កំពុងងើបឡើងកាន់តែល្អប្រសើរ នៅក្នុងខ្សែច្រវ៉ាក់ផលិតកម្ម ជាពិសេសការផ្គត់ផ្គង់ទំនិញនៅលើទីផ្សារ និងមានកំណើនកាន់តែល្អប្រសើរថែមទៀត។លោកជំទាវ កែវ មុំ ប្រធានសមាគមសហគ្រិនស្រ្តីកម្ពុជា លើកឡើងនៅថ្ងៃទី ៣ ខែ មីនា ឆ្នាំ ២០២៣ នេះថា ជុំវិញការប្រើប្រាស់ប្រចាំថ្ងៃ ប្រជាពលរដ្ឋ ត្រូវការទំនិញដែលមានអនាម័យ និងមានគុណភាព ដើម្បីសុខុមាលភាពសម្រាប់ជីវិតរស់នៅប្រចាំថ្ងៃ ។ ស្របពេលបរិបទកំពុងរីកចម្រើននេះដែរ សហគ្រាសវេចខ្ចប់ និងកែច្នៃនៅកម្ពុជា កំពុងបង្កើននូវការផលិត និងវេចខ្ចប់ ដើម្បីឆ្លើយតបទៅនឹងតម្រូវការទីផ្សារ។លោកជំទាវ បន្តថា ក្នុងឆ្នាំ ២០២២ បន្ទាប់ពីកម្ពុជាបើកប្រទេសឡើងវិញ សកម្មភាពនៅក្នុងខ្សែច្រវ៉ាក់ផលិត និងការលក់ដូរនៅតាមទីផ្សារ មានកំណើនគួរឲ្យកត់សម្គាល់ ។ ចំណែកនៅក្នុងឆ្នាំ ២០២៣ នេះវិញ លោកជំទាវ មានការរំពឹងថា សហគ្រាសវេចខ្ចប់ និងកែច្នៃនៅកម្ពុជា និងមានសកម្មភាពកាន់តែមមាញឹកជាងមុន។ជុំវិញវិស័យសហគ្រាសធុនតូច និងមធ្យមនេះ នៅក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបង្ហាញឲ្យដឹងថា គិតត្រឹមបំណាច់ឆ្នាំ ២០២២ មូលដ្ឋានសហគ្រាស និងសិប្បកម្ម ដែលបានចុះបញ្ជីនៅក្រសួង បានបង្កើតថ្មីមានចំនួន ១ ២២៩ មូលដ្ឋាន និងបង្កើតការងារថ្មីបានចំនួនជាង ២ ម៉ឺនកន្លែង និងមានករណីបិតទ្វារ មានចំនួន ៤៩០ ក្នុងនោះបើគិតសរុប កម្ពុជាមានចំនួនសហគ្រាសជាង ៤៣ ពាន់មូលដ្ឋាន និងមានពលកម្មសរុប ជាង ៤៥ ម៉ឺនកន្លែង ។ ទាក់ទងវិស័យយសហគ្រាសធុនតូច និងមធ្យមនេះដែរ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានផ្តល់ការអនុញ្ញាតឲ្យក្រុមហ៊ុនប្រើប្រាស់ស្លាកសញ្ញាមានគុណភាពលើផលិតផល មានចំនួន ១៤០ មុខផងដែរ៕អត្ថបទ៖ សុន រ៉ាឌី

កម្ពុជាទាក់ទាញការវិនិយោគប្រកបដោយគុណភាព ដើម្បីជំរុញសេដ្ឋកិច្ចឲ្យខ្លាំងក្លា

ភ្នំពេញ៖ មន្រ្តីជាន់ខ្ពស់ក្រសួងសេដ្ឋកិច្ច លើកឡើងថា កម្ពុជាមានភាពចាំបាច់ ត្រូវការទាក់ទាញការវិនិយោគប្រកបដោយគុណភាព ដើម្បីបង្កើនជំនាញ, បង្កើនការងារដែលមាន ប្រាក់ឈ្នូលសមរម្យ, ស្តងដារការងារល្អ, មានតម្លៃបន្ថែមខ្ពស់ និងជំរុញការធ្វើពិពិធកម្មក្នុងសេដ្ឋកិច្ច ក៏ដូចជាការវិនិយោគបៃតង ដើម្បីជំរុញការងើបឡើងវិញនៃសេដ្ឋកិច្ចឱ្យកាន់តែខ្លាំងក្លា។ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលើកឡើង នៅក្នុងជំនួបពិភាក្សាការងារ ជាមួយលោក Sebastian Eckardt មន្រ្តីជាន់ខ្ពស់ WB ទទួលបន្ទុកកិច្ចការម៉ាក្រូសេដ្ឋកិច្ច, ពាណិជ្ជកម្ម និងវិនិយោគ ប្រចាំតំបន់អាស៊ីខាងកើត និងប៉ាស៊ីហ្វិក និងលោកស្រី Maryam Salim នាយិកាគ្រប់គ្រងWB ប្រចាំកម្ពុជា នៅថ្ងៃទី២ ខែកុម្ភៈ ថា កំណើន សេដ្ឋកិច្ចកម្ពុជាឆ្នាំ ២០២៣ ត្រូវបានព្យាការថា អាចនឹងសម្រេចបានក្នុងអត្រាខ្ពស់ជាងរំពឹងទុកកាលពីពេលកន្លងទៅ ក្នុងអត្រា ៥,៦% ហើយការព្យាករណ៍នេះ ក៏មានកម្រិតប្រហាក់ប្រហែលទៅនឹងការវាយតម្លៃចុងក្រោយរបស់ដៃគូអភិវឌ្ឍន៍នានាផងដែរ។កំណើននេះ ដោយសារការនាំចេញផលិតផលកម្មន្តសាលមិនមែនកាត់ដេរ និងកសិកម្ម ត្រូវបានរំពឹងថា នឹងបន្តមានកំណើន ល្អ ដែលឆ្លុះបញ្ចាំងពីសក្តានុពលខ្ពស់ ជាពិសេសតម្រូវការពីទីផ្សារចិន ដែលទើបតែបានបើកប្រទេសឡើងវិញ និងអាចបំពេញបន្ថែមការនាំ ចេញផលិតផលកាត់ដេរ ដែលមាននិន្នាការថមថយ។ ឯកឧត្តម បានបន្តថា ជាទស្សនវិស័យ សម្រាប់រយៈពេលមធ្យម និងវែងខាងមុខ, កម្ពុជាមានភាពចាំបាច់ក្នុងការទាក់ ទាញ នូវការវិនិយោគប្រកបដោយគុណភាព ដើម្បីបង្កើនជំនាញ, បង្កើនការងារដែលមានប្រាក់ឈ្នូលសមរម្យ, ស្តងដារការងារល្អ, មានតម្លៃបន្ថែមខ្ពស់ និងជំរុញការធ្វើពិពិធកម្មក្នុងសេដ្ឋកិច្ច ។ កន្លងមក កម្ពុជាបានធ្វើកិច្ចការនេះជាច្រើនរួចមកហើយ ដូចជាការអនុវត្តច្បាប់វិនិយោគថ្មីជាដើម។ ទន្ទឹមនេះ ការដកកម្ពុជាចេញពីបញ្ជីប្រផេះ នៃក្រុមប្រទេសដែលមានហានិភ័យខាង លាងលុយកខ្វក់ ដោយអង្គការឃ្លាំមើលការលាងលុយ និងឧក្រិដ្ឋកម្មហិរញ្ញវត្ថុអន្តរជាតិ (FATF) ក៏នឹងជួយទាក់ទាញការវិនិយោគ ពីក្រៅប្រទេសបន្ថែមទៀតផងដែរ ហើយកម្ពុជានៅមានលំហរច្រើននៅឡើយ ដើម្បីជំរុញការអនុវត្តសកម្មភាព ឱ្យបានល្អជាងនេះ ដើម្បីអាចទាក់ទាញការវិនិយោគពីក្រៅ ដែលមានគុណភាពឱ្យបានច្រើន ពិសេសនៅក្នុងការបរិការណ៍ការផ្លាស់ប្តូទីតាំងវិនិយោគ ក្នុងតំបន់៕អត្ថបទ៖ សុន រ៉ាឌី

ឯកឧត្តម ហ៊ុន ម៉ាណែត លើកទឹកចិត្តដល់ក្រុមហ៊ុនអាមេរិកបន្តវិនិយោគនិងធ្វើធុរកិច្ចនៅកម្ពុជា

ភ្នំពេញ៖ ឯកឧត្តម ហ៊ុន ម៉ាណែត លើកទឹកចិត្តដល់ក្រុមហ៊ុនអាមេរិកទាំងអស់ឱ្យបន្តវិនិយោគនិងធ្វើធុរកិច្ចនៅកម្ពុជា ខណៈដែលកម្ពុជាជាប្រទេសកំពុងអភិវឌ្ឍន៍ក្នុងល្បឿនយ៉ាងលឿនស្ទើរគ្រប់វិស័យ។ ឯកឧត្តម ហ៊ុន ម៉ាណែត បានថ្លែងបែបនេះក្នុងឱកាសអនុញ្ញាតឱ្យគណៈប្រតិភូ ក្រុមប្រឹក្សាធុរកិច្ចអាមេរិកអាស៊ាន ដឹកនាំដោយឯកឧត្តម Michael Malacka ឯកអគ្គរដ្ឋទូតអាមេរិក និងជាអនុប្រធាន និងនាយកប្រតិបត្តិប្រចាំតំបន់ក្រុមប្រឹក្សាធុរកិច្ចអាមេរិកអាស៊ាន ចូលជួបពិភាក្សាការងារធុរកិច្ច និងវិនិយោគនៅសណ្ឋាគារ Hyatt Regency រាជធានីភ្នំពេញនៅដើមសប្តាហ៍នេះ។ឯកឧត្តម ហ៊ុន ម៉ាណែត បានស្វាគមន៍យ៉ាងកក់ក្តៅដល់គណៈប្រតិភូក្រុមប្រឹក្សាធុរកិច្ចអាមេរិកអាស៊ាន ដែលបានដឹកនាំក្រុមការងារ ដែលជាក្រុមហ៊ុនរបស់សហរដ្ឋអាមេរិកមកទស្សនកិច្ចជារៀងរាល់ឆ្នាំនៅកម្ពុជា ដើម្បីផ្តល់ដំណោះស្រាយធុរកិច្ច និងបង្កើនឱកាសវិនិយោគពីអាមេរិកមកកម្ពុជា។ឯកឧត្តមបានលើកទឹកចិត្តបន្ថែមទៀតដល់ក្រុមហ៊ុនអាមេរិកទាំងអស់ឱយបន្តវិនិយោគនិងធ្វើធុរកិច្ចនៅកម្ពុជា ដែលជាប្រទេសកំពុងអភិវឌ្ឍន៍ក្នុងល្បឿនយ៉ាងលឿនស្ទើរគ្រប់វិស័យ។ឯកឧត្តមឯកអគ្គរដ្ឋទូត Michael Malacka អនុប្រធាន និងនាយកប្រតិបត្តិប្រចាំតំបន់ របស់ក្រុមប្រឹក្សាធុរកិច្ចអាមេរិក-អាស៊ាន បានថ្លែងអំណរគុណចំពោះឯកឧត្តម ហ៊ុន ម៉ាណែត ដែលបានផ្តល់ឱកាសលើកដំបូងបំផុតដល់គណៈប្រតិភូក្រុមប្រឹក្សាធុរកិច្ចបានជួបសំដែងការគួរសម និងពិភាក្សាការងារបន្ទាប់ពីឯកឧត្តមត្រូវបានគណៈកម្មាធិការកណ្តាល នៃគណបក្សប្រជាជនកម្ពុជាផ្តល់សេចក្តីទុកចិត្តជ្រើសតាំងជាបេក្ខភាពនាយករដ្ឋមន្ត្រីបន្តវេននាពេលអនាគត។ ឯកឧត្តមបានអបអរសាទរកម្ពុជា ដែលបានទទួលជោគជ័យយ៉ាងធំធេងជាប្រវត្តិសាស្ត្រ ក្នុងការរៀបចំកិច្ចប្រជុំកំពូលអាស៊ាន កិច្ចប្រជុំកំពូលអាស៊ាន-អាមេរិក និងកិច្ចប្រជុំពាក់ព័ន្ធផ្សេងៗទៀតកាលពីឆ្នាំ២០២២ កន្លងទៅ ដែលនេះបាននាំកិច្ចទំនាក់ទំនងអាមេរិក-កម្ពុជា ឱ្យកាន់តែជិតស្និទ្ធទ្វេឡើងថែមទៀត។ ឯកឧត្តមឯកអគ្គរដ្ឋទូត បានឱ្យដឹងថា ក្រុមប្រឹក្សាធុរកិច្ចអាមេរិក-អាស៊ានមានអាយុកាលជាង ៣៧ ឆ្នាំ និងមានសមាជិកដែលជាក្រុមហ៊ុនយក្សអាមេរិកជាង ១៨០ ក្រុមហ៊ុន បានទទួលការសម្របសម្រួល និងជួយជ្រោមជ្រែងដល់ការធ្វើធុរកិច្ច និងវិនិយោគនៅអាស៊ានហើយបច្ចុប្បន្នក្រុមហ៊ុនជាង ១០ បានចូលរួមជាមួយគណៈប្រតិភូ ដើម្បីពង្រីកការធ្វើធុរកិច្ច និងវិនិយោគនៅកម្ពុជាជាពិសេសជួយដល់ផែនការងើបឡើងវិញនៃសេដ្ឋកិច្ចកម្ពុជា, បច្ចេកវិទ្យា និងនវានុវត្តន៍, លទ្ធភាពទទួលហិរញ្ញប្បទាន របស់ SME, ថាមពល និងហេដ្ឋារចនាសម្ព័ន្ធ, ផលិតផលដែលមានតម្លៃបន្ថែមខ្ពស់, និងការបណ្តុះបណ្តាលធនធានមនុស្ស, យុវជននិង SME ជាដើម៕អត្ថបទ៖ វ៉ន ដារ៉ា

រដ្ឋមន្ត្រីពាណិជ្ជកម្មជំរុញផលិតករបង្កើនគំនិតច្នៃប្រឌិតថ្មីៗ ខណៈទីផ្សារប្រកួតប្រជែងកាន់តែខ្ពស់

សៀមរាប៖ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានជំរុញដល់ផលិតករ ពាណិជ្ជករកម្ពុជា ត្រូវខិតខំបង្កើតគំនិតច្នៃប្រឌិតថ្មីៗបន្ថែមទៀត និងរៀបចំទំនិញសម្រាប់បម្រើទីផ្សារត្រូវតែមានគុណភាព មានសុវត្ថិភាពដល់អ្នកប្រើប្រាស់ ដោយអនុលោមតាមស្តង់ដារអនាម័យ និងមានតម្លៃសមរម្យ ទើបអាចចូលរួមប្រកួតប្រជែងក្នុងទីផ្សារសេរីបាន។ការអំពាវនាវខាងលើនេះ ធ្វើឡើងក្នុងឱកាសឯកឧត្តមរដ្ឋមន្ត្រីអញ្ជើញបើកពិធីសម្ពោធពិព័រណ៍ផលិតផលខ្មែរ និងបន្លែផ្លែឈើលើកទី១៦ ក្នុងឱកាសយុទ្ធនាការទិញផលិតផលខ្មែររដូវកាលទី៨ ឆ្នាំ២០២៣ កាលពីរសៀលថ្ងៃទី២៤ ខែកុម្ភៈកន្លងទៅនៅខេត្តសៀមរាប ដោយមានការអញ្ជើញចូលរួមពីថ្នាក់ដឹកនាំក្រសួង, អភិបាលរងខេត្តសៀមរាប ផលិតករ ពាណិជ្ជករ កសិករ និស្សិត និងភ្ញៀវកិត្តិយសជាតិ និងអន្តរជាតិសរុបប្រមាណ ៣០០នាក់។ នៅក្នុងឱកាសនោះ ឯកឧត្តម ប៉ាន សូរស័ក្តិ បញ្ជាក់ថា យុទ្ធនាការទិញផលិតផលខ្មែរគឺជាផ្នែកមួយដ៏សំខាន់ នៃការអនុវត្តគោលនយោបាយអភិវឌ្ឍន៍វិស័យពាណិជ្ជកម្ម របស់ក្រសួងពាណិជ្ជកម្ម។ យុទ្ធនាការនេះគឺជាសំឡេងជួយដាស់ស្មារតីប្រជាជនកម្ពុជា ឱ្យងាកមកចូលរួមគាំទ្រ និងប្រើប្រាស់ផលិតផលក្នុងស្រុកជំនួសទំនិញនាំចូលពីបរទេសជាជំហានៗ។ឯកឧត្តមបានបន្តថា តាមរយៈការរៀបចំយុទ្ធនាការទិញផលិតផលខ្មែរចំនួន ៧រដូវកាលកន្លងមកនេះបានជួយពង្រឹងខ្សែសង្វាក់ផលិតកម្មក្នុងស្រុកជាបណ្តើរៗ ហើយផលិតករកម្ពុជាក៏មានចំណេះដឹង ចំណេះធ្វើ និងទទួលបានបទពិសោធន៍ល្អៗជាច្រើន សម្រាប់ពង្រឹង និងពង្រីកផលិតកម្ម អភិវឌ្ឍន៍ផលិតផល និងសេវារបស់ខ្លួនបម្រើឱ្យទីផ្សារ។ ជាលទ្ធផលសង្កេតឃើញថា ផលិតផលខ្មែរមានវត្តមាននៅលើទីផ្សារកាន់តែច្រើន ទាំងទីផ្សារក្នុងស្រុក ហាងលក់ទំនិញក្នុងអាកាសយានដ្ឋាន និងទីផ្សារនៅបរទេស និងមានការរីកចម្រើនទៅមុខទាំងគុណភាព សុវត្ថិភាព សោភ័ណភាព និងអនាម័យ ដែលអាចទុកចិត្តបានសម្រាប់អ្នកប្រើប្រាស់ទូទៅ។ ជាមួយគ្នានេះ ឯកឧត្តមរដ្ឋមន្ត្រីបានអំពាវនាវដល់គ្រប់ភាគីពាក់ព័ន្ធទាំងអស់ ត្រូវរួមគ្នាជួយលើកកម្ពស់ផលិតផលក្នុងស្រុក ជំរុញការផ្សព្វផ្សាយ និងប្រើប្រាស់ឱ្យបានទូលំទូលាយ ខណៈដែលក្រសួងពាណិជ្ជកម្មកំពុងខិតខំធ្វើពិពិធកម្មទីផ្សារបន្ថែមលើទីផ្សារដែលមានស្រាប់ តាមរយៈការចរចាបង្កើតតំបន់ពាណិជ្ជកម្មសេរីទ្វេភាគីកម្ពុជា-ចិន, កម្ពុជា-កូរ៉េ, កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP) កិច្ចព្រមព្រៀងពាណិជ្ជកម្មសេរីកម្ពុជា-អេមីរ៉ាត់អារ៉ាប់រួម ដែលនឹងបញ្ចប់នៅពេលឆាប់ៗនេះ និងកិច្ចព្រមព្រៀងពាណិជ្ជកម្មសេរីពហុភាគីជាមួយដៃគូពាណិជ្ជកម្មនានាជាច្រើនទៀត ដែលធ្វើឱ្យទីផ្សារទំនិញ សេវាកម្ម និងវិនិយោគកម្ពុជាកាន់តែទូលំទូលាយ។សូមជម្រាបថា ពិព័រណ៍ផលិតផលខ្មែរ និងបន្លែផ្លែឈើលើកទី១៦ ធ្វើឡើងរយៈពេល ៤ថ្ងៃចាប់ពីថ្ងៃទី២៤ ដល់២៧ ខែកុម្ភៈ ឆ្នាំ២០២៣ នៅក្រុង/ខេត្តសៀមរាប ដោយមានការដាក់តាំងបង្ហាញ និងលក់ផលិតផលខ្មែរ បន្លែ ផ្លែឈើ វត្ថុអនុស្សាវរីយ៍ ផលិតផលរបស់សហគមន៍ និងផលិតផលភូមិ១ ផលិតផល១ មកពីរាជធានី-ខេត្តចំនួន១២ ដោយមានក្រុមហ៊ុន សហគ្រាស និងអាជីករក្នុងស្រុកចូលរួមចំនួនជាង១០០។ ក្នុងអំឡុងពេលនេះដែរ ក្រសួងពាណិជ្ជកម្មក៏មានរៀបចំព្រឹត្តិការណ៍អមមួយចំនួនទៀតផងដែរ ដូចជា ការចម្អិនម្ហូបអាហារខ្មែរ កម្មវិធីសិក្ខាសាលាស្តីពីការកំណត់អត្តសញ្ញាណ និងការផ្សព្វផ្សាយផលិតផលសក្កានុពលកម្ពុជា កម្មវិធីផ្គូផ្គងពាណិជ្ជកម្ម កិច្ចពិភាក្សាស្តីពីបន្លែសុវត្ថិភាពសម្រាប់កុមារ និងការលេងសិល្បៈខ្មែរកំដរក្នុងពេលរាត្រីផងដែរ៕

បណ្ដាញសង្គម

ព័ត៌មានថ្មីៗ

សម្ដេចធិបតី៖ ខេត្តកំពង់ធំកំពុងវិវត្តជាសួនឧស្សាហកម្មស្វាយចន្ទី ខណៈនៅជិតផ្លូវទឹកព្រែកជីកហ្វូណនតេជោ

សម្ដេចធិបតី ផ្ដាំទៅក្រុមប្រឆាំងជ្រុលនិយមកុំភ័យចំពោះច្បាប់ដកសញ្ជាតិខ្មែរ បើអ្នកមិនបានប្រព្រឹត្តខុស

ប្រទេសអ៊ីរ៉ង់ បិទដែនអាកាសភាគកណ្តាលនិងភាគខាងលិច ដល់ជើងហោះហើរឆ្លងកាត់អន្តរជាតិ

ប្រធានាធិបតីកូរ៉េខាងត្បូងនិយាយថា ការចរចាពន្ធជាមួយអាមេរិក «មិនងាយស្រួលទេ»

ការបំផ្ទុះគ្រាប់បែកនៅភាគពាយ័ព្យប៉ាគីស្ថាន បានសម្លាប់មនុស្សបួននាក់រួមទាំងជំនួយការស្នងការ

រុស្ស៊ី៖ មនុស្សជាង ២១ម៉ឺននាក់ ចូលបម្រើទ័ពសម្រាប់សង្រ្គាមនៅអ៊ុយក្រែន ត្រឹមពាក់កណ្ដាលឆ្នាំ២០២៥នេះ

សម្តេចតេជោ ផ្តាំទៅថៃកុំឲ្យតេមករញ៉េរញ៉ៃដល់សម្តេចទៀត ដើម្បីឲ្យកម្ពុជាពិភាក្សាទ្វេភាគីជាមួយខ្លួន រឿងបើកព្រំដែននោះ

ប្រទេសចិន៖ គំនិតផ្ដាច់ខ្លួននិយមក្នុងបំណងឯករាជ្យភាពតៃវ៉ាន់ ជាគ្រោះមហន្តរាយដ៏ធំបំផុតដល់កោះនេះ

ជនអន្តោប្រវេសន៍ ព្យាយាមឆ្លងកាត់ព្រែកជីកតាមទូកតូចៗពីប្រទេសបារាំង ទៅអង់គ្លេស

សមាជិកសភាចក្រភពអង់គ្លេស អនុម័តបម្រាមលើក្រុម Palestine Action ថាជាក្រុមភេរវកម្ម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877