BTV NEWS

ឃាតកម្មចាក់សម្លាប់មនុស្សរួចយកសពប្លុងចោលក្នុងរថយន្តនៅខណ្ឌដង្កោ កម្លាំងសមត្ថកិច្ចឃាត់ខ្លួនក្រុមឃាតកបាន០៤នាក់

ដើមខែមិថុនានេះ កម្លាំងនគរបាលរាជធានីបង្ក្រាបគ្រឿងញៀន០៥ករណី ឃាត់មនុស្ស២៤នាក់ និងដកហូតគ្រឿងញៀន៦៦គីឡូក្រាម

បង្ក្រាបជនជាតិចិន០៤នាក់ ជាក្រុមត្រៀមរៀបចំផែនការណ៍ចាប់ជំរិត តែត្រូវទប់ស្កាត់ទាន់ពេល

សមត្ថកិច្ចខេត្តស្វាយរៀងបន្តចុះបង្រ្កាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាឃាត់ខ្លួនជនសង្ស័យជនជាតិចិន វៀតណាម និងខ្មែរចំនួន ៧៣នាក់

សន្តិសុខ និង សង្គម

WHO៖ មានតែការជញ្ជូនជំនួយផ្លូវគោកបន្ថែមទៀតចូលហ្កាហ្សាប៉ុណ្ណោះ ដែលអាចការពារទុរ្ភិក្សបាន

ប្រធានអង្គការសុខភាពពិភពលោក (WHO) បាននិយាយកាលពីថ្ងៃព្រហស្បតិ៍ (២១ មីនា) ថា មានតែការពង្រីកផ្លូវឆ្លងកាត់ជើងគោកសម្រាប់ដឹកជំនួយចូលទៅក្នុងតំបន់ហ្កាហ្សាប៉ុណ្ណោះ ទើបអាចជួយទប់ស្កាត់គ្រោះទុរ្ភិក្សនៅក្នុងតំបន់ហ៊ុមព័ទ្ធប៉ាឡេស្ទីន ដែលមានប្រជាជនរស់នៅយ៉ាងច្រើនក្រាស់ក្រែលនេះបាន។អគ្គនាយកអង្គការសុខភាពពិភពលោក លោក តេដ្រូស អាដហាណូម ហ្កេប្រេយ៉េស៊ូស (Tedros Adhanom Ghebreyesus) បាននិយាយថា កុមារកំពុងស្លាប់ដោយសារផលប៉ះពាល់នៃកង្វះអាហារូបត្ថម្ភ និងជំងឺ និងពីកង្វះទឹក និងអនាម័យគ្រប់គ្រាន់។ សង្គ្រាមរយៈពេល ៥ ខែបានធ្វើឱ្យមានការខ្វះខាតស្បៀងអាហារយ៉ាងធ្ងន់ធ្ងរក្នុងចំណោមប្រជាជនប៉ាឡេស្ទីនចំនួន ២,៣ លាននាក់នៅហ្កាហ្សា ដែលនៅក្នុងតំបន់មួយចំនួនឥឡូវនេះលើសពីកម្រិតទុរ្ភិក្សទៅទៀត នេះបើយោងតាមអង្គការសហប្រជាជាតិ។ទីភ្នាក់ងារជំនួយរបស់អង្គការសហប្រជាជាតិបាននិយាយថា «ឧបសគ្គដ៏ច្រើនលើសលប់» ចំពោះការផ្លាស់ទីជំនួយទៅកាន់ភាគខាងជើងនៃតំបន់ហ្កាហ្សា នឹងត្រូវបានយកឈ្នះដោយបទឈប់បាញ់ ហើយនិងការបើកច្រកព្រំដែនដែលបិទដោយអ៊ីស្រាអែល បន្ទាប់ពីក្រុមហាម៉ាស បានបើកការវាយលុករបស់ពួកគេកាលពីថ្ងៃទី០៧ ខែតុលា។អ៊ីស្រាអែលនិយាយថា ខ្លួនមិនបានដាក់កម្រិតលើជំនួយមនុស្សធម៌សម្រាប់តំបន់ហ្កាហ្សានោះទេ ហើយបានស្ដីបន្ទោសការផ្តល់ជំនួយយឺតយ៉ាវនេះទៅលើកង្វះសមត្ថភាព ឬគ្មានប្រសិទ្ធភាពក្នុងចំណោមភ្នាក់ងារអង្គការសហប្រជាជាតិ៕

មេដឹកនាំក្រុមជនអន្ធពាលម្នាក់របស់ហៃទី ត្រូវបានសម្លាប់ ខណៈក្រុមប្រឹក្សាអន្តរកាលជិតបញ្ចប់

ការវាយប្រហារបានផ្ទុះឡើងនៅក្នុងរដ្ឋធានី ព័រអូប្រាំង របស់ប្រទេសហៃទី កាលពីថ្ងៃព្រហស្បតិ៍ (២១ មីនា) ខណៈក្រុមនយោបាយហាក់ដូចជាកាន់តែខិតជិតដល់ការបញ្ចប់ក្រុមប្រឹក្សាអន្តរកាល ដែលនឹងចូលកាន់តំណែងបន្តពីរដ្ឋាភិបាលដែលអវត្តមាន រួមទាំងការបាញ់ប្រហារដែលបណ្តាលឱ្យមេដឹកនាំក្រុមជនអន្ធពាលម្នាក់បានស្លាប់។យោងតាមនគរបាល និងប្រភពបានបញ្ជាក់ថា ប្រតិបត្តិការរបស់នគរបាលបានសម្លាប់ប្រធានក្រុមជនអន្ធពាល ឌែលម៉ាស ៩៥ (Delmas 95) លោក អេណេស ហ្ស៊ូម (Ernst Julme) ដែលត្រូវបានគេស្គាល់ថាឈ្មោះ ធី ហ្រ្គេក (Ti Greg) រយៈពេលមួយថ្ងៃបន្ទាប់ពីមេដឹកនាំក្រុមជនអន្ធពាលម្នាក់ទៀតត្រូវបានសម្លាប់នៅក្នុងការងើបឡើងវិញជាក់ស្តែងនៃចលនាយុត្តិធម៌។អ្នកនាំពាក្យអង្គការសហប្រជាជាតិបាននិយាយថា អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរ៉េស (Antonio Guterres) បានស្វាគមន៍ចំពោះរបាយការណ៍ ដែលថាក្រុមនយោបាយបានជ្រើសរើសសមាជិកទាំងអស់នៃក្រុមប្រឹក្សាអន្តរកាល ដែលកំណត់ដើម្បីកាន់អំណាចប្រធានាធិបតីមុនការបោះឆ្នោតនាពេលខាងមុខ។ ក្រុមប្រឹក្សា ដែលមានបំណងប្រមូលផ្តុំវណ្ណៈនយោបាយប្រេះស្រាំរបស់ប្រទេសហៃទីមួយនេះ ត្រូវបានផ្តល់អាណត្តិដោយមានអំណាចតែងតាំងអ្នកជំនួសនាយករដ្ឋមន្ត្រី អារីយែល ហុងរី (Ariel Henry) ដែលបានប្រកាសលាលែងពីតំណែងកាលពីថ្ងៃទី១១ ខែមីនា ដោយសារអំពើហឹង្សារបស់ក្រុមជនអន្ធពាលបានរារាំងការវិលត្រឡប់ចូលប្រទេសរបស់លោក។ ក្រុមប្រឹក្សានេះក៏នឹងកាន់អំណាចប្រធានាធិបតីមួយចំនួនរហូតដល់ការបោះឆ្នោតអាចត្រូវបានរៀបចំឡើង៕

ប្រជាជនតំបន់ហ្កាហ្សា ភៀសខ្លួនទៅភាគខាងត្បូង បន្ទាប់ពីការវាយឆ្មក់នៅមន្ទីរពេទ្យ Al Shifa

ពលរដ្ឋប៉ាឡេស្ទីន ត្រូវបានគេមើលឃើញថាបានធ្វើដំណើរឆ្ពោះទៅភាគខាងត្បូង កាលពីថ្ងៃព្រហស្បតិ៍ ខណៈការវាយលុករបស់អ៊ីស្រាអែល បានបន្តដាក់គោលដៅលើមន្ទីរពេទ្យ Al Shifa សម្រាប់ថ្ងៃទី៤។ ស្ត្រី កុមារ និងបុរស បានដឹកទ្រព្យសម្បត្តិរបស់ពួកគេទៅតាមផ្លូវតំបន់ឆ្នេរ ក្នុងទីក្រុង ហ្កាហ្សា ភាគខាងត្បូង។អ៊ីស្រាអែលបាននិយាយថា កងទ័ពរបស់ខ្លួនបានសម្លាប់ខ្មាន់កាំភ្លើងក្រុមហាម៉ាសជាង ៥០ នាក់កាលពីថ្ងៃមុន ដោយធ្វើឱ្យចំនួនអ្នកប្រយុទ្ធដែលត្រូវបានសម្លាប់នៅជុំវិញមន្ទីរពេទ្យនេះ កើនដល់១៤០ នាក់ រួមជាមួយទាហានអ៊ីស្រាអែលពីរនាក់។ អ៊ីស្រាអែលនិយាយថា ខ្លួនបានកំណត់ទីតាំងហេដ្ឋារចនាសម្ព័ន្ធ និងអាវុធរបស់ក្រុមភេរវករ នៅក្នុង និងនៅជុំវិញទីតាំងនោះ ដោយបង្ហាញរូបភាពកាំភ្លើងស្វ័យប្រវត្តិ AK-47 គ្រាប់បែក កាំភ្លើងត្បាល់ និងកាំភ្លើងធំផ្សេងទៀត។អ្នកនាំពាក្យយោធា លោក Daniel Hagari បាននិយាយថា ភេរវករក្រុមហាម៉ាស ក្រុមអ្នកប្រយុទ្ធ និងបុគ្គលិកជាន់ខ្ពស់ជាច្រើននាក់ បានលាក់ខ្លួននៅក្នុងមន្ទីរពេទ្យ រួមជាមួយក្រុមសកម្មប្រយុទ្ធជីហាតអ៊ីស្លាម។ ប៉ុន្តែ ក្រុមហាម៉ាស បានបដិសេធថា មន្ទីរពេទ្យនេះគ្មានក្រុមសកម្មប្រយុទ្ធទេ និងបាននិយាយថា អ្នកដែលបានស្លាប់ជាអ្នកជំងឺដែលរងរបួស និងជនភៀសខ្លួន។ វីដេអូ ដែលចេញផ្សាយដោយក្រុមហាម៉ាស បានបង្ហាញក្រុមសកម្មប្រយុទ្ធរបស់ខ្លួននៅខាងក្រៅបរិវេណមន្ទីរពេទ្យ Al Shifa ដោយមានកាន់អាវុធ និងបាញ់ទៅលើរថក្រោះអ៊ីស្រាអែល នៅតាមដងផ្លូវដែលក្លាយទៅជាគំនរបាក់បែក។ ក្រសួងការបរទេសអេហ្ស៊ីប បាននិយាយថា លោក Blinken រដ្ឋមន្ត្រីការបរទេសអាមេរិក ជួបជាមួយរដ្ឋមន្ត្រីការបរទេសមកពីប្រទេសអេហ្ស៊ីប អារ៉ាប៊ីសាអូឌីត កាតា និងហ្ស៊កដានី ដែលក្រុមមន្ត្រីទាំងអស់កំពុងជំរុញឱ្យបញ្ចប់ការប្រយុទ្ធគ្នារយៈពេលជាង ៥ ខែ ដែលបានសម្លាប់ពលរដ្ឋប៉ាឡេស្ទីនជិត ៣២.០០០នាក់ ដោយ៦៥នាក់ បានស្លាប់ក្នុងរយៈពេល ២៤ ម៉ោងកន្លងទៅនេះ។

ប្រមុខUN ជំរុញឲ្យសហភាពអឺរ៉ុបជៀសវាង«ស្តង់ដាពីរ» ជុំវិញតំបន់ហ្កាហ្សា និងអ៊ុយក្រែន

ក្រុមមេដឹកនាំសហភាពអឺរ៉ុប ត្រូវបានជំរុញកាលពីថ្ងៃព្រហស្បតិ៍ ឲ្យបង្ហាញពីការគោរពដូចគ្នាចំពោះច្បាប់អន្តរជាតិនៅតំបន់ហ្កាហ្សា ខណៈដែលពួកគេមានគោលបំណងរក្សាការគាំទ្រអ៊ុយក្រែន ខណៈដែលប្រជាជនប៉ាឡេស្ទីនរាប់សែននាក់ ប្រឈមមុខនឹងការខ្វះខាតស្បៀងអាហារដ៏ធ្ងន់ធ្ងរ និងគ្រោះទុរ្ភិក្ស ដែលអាចកើតមានឡើង។នៅឯកិច្ចប្រជុំកំពូលរបស់សហភាពអឺរ៉ុប នៅទីក្រុងប្រ៊ុចសែល អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គុយតឺរេស ( Antonio Guterres) បានអំពាវនាវដល់ក្រុមមេដឹកនាំនេះ ឲ្យរក្សាភាពរឹងមាំ និងឯកភាព ក្នុងការគោរពតាមស្តង់ដាដែលមានចែងក្នុងធម្មនុញ្ញអង្គការសហប្រជាជាតិ និងច្បាប់អន្តរជាតិ។លោកហ្គុយតឺរេស បានប្រាប់អ្នកយកព័ត៌មានថា៖«គោលការណ៍ជាមូលដ្ឋាននៃច្បាប់មនុស្សធម៌អន្តរជាតិ គឺការការពារជនស៊ីវិល។ យើងត្រូវតែប្រកាន់ខ្ជាប់នូវគោលការណ៍នៅក្នុងប្រទេសអ៊ុយក្រែន ដូចជានៅតំបន់ហ្កាហ្សា ដោយគ្មានស្តង់ដាទ្វេរដង» ដោយឈរជាមួយប្រធានក្រុមប្រឹក្សាសហភាពអឺរ៉ុប លោក Charles Michel ដែលជាប្រធានកិច្ចប្រជុំកំពូលនេះ។ទីភ្នាក់ងារស្បៀងអាហាររបស់UN បានព្រមានថា «ទុរ្ភិក្សជិតមកដល់» នៅតំបន់ហ្កាហ្សាភាគខាងជើង។ ទន្ទឹមនឹងនោះ អ៊ីស្រាអែលហាក់ដូចជាបានប្តេជ្ញាចិត្តក្នុងការបើកការវាយលុកជើងគោក នៅក្នុងទីក្រុងរ៉ាហ្វាភាគខាងត្បូង ដែលមនុស្សជាច្រើនបានស្វែងរកការជ្រកកោនពីការប្រយុទ្ធ។សហភាពអឺរ៉ុប ដែលមានប្រទេសចំនួន២៧ បានបែកបាក់គ្នាយ៉ាងខ្លាំងជាយូរមកហើយ នៅក្នុងវិធីសាស្រ្តរបស់ខ្លួនចំពោះអ៊ីស្រាអែល និងប៉ាឡេស្ទីន ហើយការវាយប្រហាររបស់ក្រុមហាម៉ាស ដែលបំផ្លិចបំផ្លាញលើអ៊ីស្រាអែលភាគខាងត្បូងកាលពីថ្ងៃទី៧ ខែតុលា បានបង្ហាញនូវភាពខុសគ្នាទាំងនោះ។ ប៉ុន្តែនៅពេលដែលចំនួនអ្នកស្លាប់នៅហ្កាហ្សា កើនឡើងដល់ជិត ៣២.០០០នាក់ ប្រទេសជាច្រើនទៀត កំពុងគាំទ្រការអំពាវនាវឲ្យមានបទឈប់បាញ់។

ប្រទេសម៉ិកស៊ិក ជួយជនអន្តោប្រវេសន៍ដែលទទួលរងដោយច្បាប់និរទេសរបស់រដ្ឋតិចសាស់

រដ្ឋមន្ត្រីការបរទេសម៉ិកស៊ិក លោកស្រី អាលីស៊ីយ៉ា បាសេណា(Alicia Barcena) បាននិយាយកាលពីថ្ងៃព្រហស្បតិ៍ថា ស្ថានកុងស៊ុលម៉ិកស៊ិកនៅរដ្ឋតិចសាស់នឹងផ្តល់ការការពារ ការគាំទ្រ និងការណែនាំ ដល់ប្រជាជនម៉ិកស៊ិក ដែលរងផលប៉ះពាល់ដោយច្បាប់ S.B. ៤. របស់រដ្ឋតិចសាស់។S.B.4 គឺជាច្បាប់រដ្ឋតិចសាស់គាំទ្រដោយគណបក្សសាធារណរដ្ឋ ដែលនឹងផ្តល់សិទ្ធិអំណាចដល់អាជ្ញាធររដ្ឋក្នុងការចាប់ខ្លួន កាត់ទោសជនអន្តោប្រវេសន៍និងអ្នកស្វែងរកសិទ្ធិជ្រកកោន ដែលសង្ស័យថា បានឆ្លងកាត់ព្រំដែនសហរដ្ឋអាមេរិក-ម៉ិកស៊ិក ដោយខុសច្បាប់។ក្នុងអំឡុងសន្និសីទសារព័ត៌មាន លោកស្រី Barcena បាននិយាយថា ប្រទេសម៉ិកស៊ិក បានចុះហត្ថលេខាលើកិច្ចព្រមព្រៀងជាមួយប្រទេសវ៉េណេស៊ុយអេឡា ដើម្បីនិរទេសជនអន្តោប្រវេសន៍ និងបានឈានដល់កិច្ចព្រមព្រៀងជាមួយក្រុមហ៊ុនជាច្រើនរបស់ប្រទេសម៉ិកស៊ិក និងវ៉េណេស៊ុយអេឡា ដើម្បីជួលពួកគេបម្រើការងារ។រដ្ឋាភិបាលប្រទេសម៉ិកស៊ិក បាននិយាយថា ខ្លួននឹងផ្តល់ប្រាក់ប្រហែល ១១០ដុល្លារក្នុងមួយខែ ឱ្យជនអន្តោប្រវេសន៍នៅក្នុងប្រទេស ជាផ្នែកនៃកម្មវិធីដែលពួកគេនឹងមានឱកាសដើម្បីធ្វើការឱ្យក្រុមហ៊ុនផ្សេងៗ នៅក្នុងប្រទេសទាំងពីរផងដែរ។

អាមេរិក ដាក់សម្ពាធលើអ៊ីស្រាអែល ដោយអំពាវនាវឲ្យមានសេចក្ដីសម្រេចបទឈប់បាញ់នៅហ្កាហ្សា ខណៈបន្តការចរចានៅកាតា

ប្រធានចារកម្មរបស់អ៊ីស្រាអែល គ្រោងធ្វើដំណើរទៅកាន់ប្រទេសកាតានៅថ្ងៃសុក្រសប្ដាហ៍នេះ សម្រាប់ការចរចាបទឈប់បាញ់ ខណៈសហរដ្ឋអាមេរិក មានផែនការដាក់ជូនសេចក្ដីសម្រេចមួយ អំពាវនាវឲ្យមានបទឈប់បាញ់បន្ទាន់ក្នុងតំបន់ហ្កាហ្សា ដើម្បីឲ្យមានការបោះឆ្នោតមួយនៅក្រុមប្រឹក្សាសន្តិសុខអង្គការសហប្រជាជាតិ ដែលជាការបង្កើនសម្ពាធលើសម្ព័ន្ធមិត្តរបស់ខ្លួន។ ប្រមុខការទូតអាមេរិក លោក Antony Blinken បាននិយាយកាលពីថ្ងៃព្រហស្បតិ៍ នៅក្នុងរដ្ឋធានីគែរ(Cairo) ប្រទេសអេហ្ស៊ីប ថា លោកជឿថា ការចរចាដែលត្រូវបានសម្របសម្រួលដោយ សហរដ្ឋអាមេរិក កាតា និងអេហ្ស៊ីប នៅតែអាចឈានដល់កិច្ចព្រមព្រៀងបទឈប់បាញ់ រវាងក្រុមសកម្មប្រយុទ្ធប៉ាឡេស្ទីន ហាម៉ាស និងអ៊ីស្រាអែល។ការចរចានៅក្នុងប្រទេសកាតា ផ្ដោតលើបទឈប់បាញ់ មានរយៈពេល៦សប្ដាហ៍ដែលនឹងអនុញ្ញាតឲ្យដោះលែងចំណាប់ថ្នូរអ៊ីស្រាអែល៤០នាក់ ជាថ្នូរនឹងជនជាតិប៉ាឡេស្ទីនរាប់រយនាក់ដែលត្រូវបានឃុំខ្លួននៅក្នុងពន្ធនាគារប្រទេសអ៊ីស្រាអែល ការបើកផ្លូវឲ្យមានជំនួយបន្ថែមទៀត ចូលទៅក្នុងតំបន់ហ៊ុព័ទ្ធមួយនេះជាទីដែលគ្រោះទុរ្ភិក្សជិតចូលមកដល់ ដោយសារកង្វះអាហារធ្ងន់ធ្ងរ។ ក្រុមមន្ត្រីប៉ាឡេស្ទីន ដែលបានដឹងកិច្ចខិតខំប្រឹងប្រែងការចរចានេះ បានប្រាប់សារព័ត៌មាន Reuters ដោយសុំមិនបញ្ចេញថា ក្រុមហាម៉ាស បានបង្ហាញភាពបត់បែន តែអ៊ីស្រាអែលនៅតែបន្តធ្វើឲ្យជាប់គាំង ព្រោះខ្លួនមិនចង់បញ្ចប់ការប្រព្រឹត្តឧក្រិដ្ឋកម្មសង្រ្គាមនៅហ្កាហ្សា។ ទីក្រុងវ៉ាស៊ីនតោន ដែលតែងតែយកទ្រូងពាំងជាខែលសម្រាប់អ៊ីស្រាអែលនៅអង្គការសហប្រជាជាតិ បានបង្កើនសម្ពាធកាន់តែខ្លាំងលើសម្ព័ន្ធមិត្តយូរអង្វែងមួយនេះរបស់ខ្លួន ហើយពង្រាងសេចក្ដីសម្រេចក្រុមប្រឹក្សាសន្តិសុខអង្គការសហប្រជាជាតិនេះ បានក្លាយជាសម្ពាធបន្ថែមទៀតលើអ៊ីស្រាអែលផងដែរស្របពេលមានការថ្កោលទោសជាសកលកើនឡើងចំពោះសង្រ្គាមដែលមានអាយុកាល៥ខែ ដោយសបានសម្លាប់ជនស៊ីវិលប៉ាឡេស្ទីនជាង៣ម៉ឺននាក់ នៅហ្កាហ្សា ៕

ក្រុមគ្រូពេទ្យ៖ យ៉ាងហោចណាស់ស្រ្តីជាម្តាយ ៣៧ នាក់ត្រូវបានសម្លាប់ជារៀងរាល់ថ្ងៃនៅហ្កាហ្សា

សមាគមអឌ្ឍចន្ទក្រហមប៉ាឡេស្ទីន បាននិយាយកាលពីថ្ងៃព្រហស្បតិ៍ (២១ មីនា) ថា ជាមធ្យមយ៉ាងហោចណាស់ស្រ្តីជាម្តាយចំនួន ៣៧ នាក់ត្រូវបានសម្លាប់ក្នុងមួយថ្ងៃ ដោយសារតែការវាយប្រហាររបស់អ៊ីស្រាអែល ដែលកំពុងបន្តនៅតំបន់ហ្កាហ្សាស្ទ្រីប ខណៈពិភពអារ៉ាប់ប្រារព្ធទិវាមាតារបស់ខ្លួនដែលត្រូវនឹងថ្ងៃទី២១ ខែមីនា ជារៀងរាល់ឆ្នាំ។គណៈកម្មការអ្នកឃុំឃាំង និងកិច្ចការអតីតអ្នកជាប់ឃុំ ក្នុងអង្គការរំដោះប៉ាឡេស្ទីន រួមជាមួយនឹងសមាគមក្លឹបអ្នកទោសប៉ាឡេស្ទីន បាននិយាយនៅក្នុងសេចក្តីថ្លែងការណ៍រួមមួយក្នុងឱកាសនៃទិវាមាតាថា ការវាយលុករបស់អ៊ីស្រាអែល ដែលកំពុងបន្តនៅតំបន់ហ្កាហ្សា បានបណ្តាលឱ្យមានការស្លាប់ដ៏ច្រើនសន្ធឹកសន្ធាប់របស់ម្តាយ និងកូនប៉ាឡេស្ទីន។សេចក្តីថ្លែងការណ៍បានបន្ថែមថា កងទ័ពអ៊ីស្រាអែលបានអនុវត្តការចាប់ខ្លួនស្ត្រីយ៉ាងច្រើននៅក្នុងតំបន់ហ៊ុមព័ទ្ធនេះ ចាប់តាំងពីការចាប់ផ្តើមនៃជម្លោះរបស់ខ្លួនប្រឆាំងនឹងក្រុមហាម៉ាស កាលពីខែតុលាឆ្នាំមុន។ អ្នកទោសស្ត្រីប៉ាឡេស្ទីនភាគច្រើន រួមទាំងសកម្មជនសង្គម ត្រូវបានចាប់ខ្លួនដោយចោទប្រកាន់ពាក់ព័ន្ធនឹងការញុះញង់ ឬការឃុំខ្លួនផ្នែករដ្ឋបាល។សេចក្តីថ្លែងការណ៍នេះបានអំពាវនាវដល់អង្គការ និងចលនាស្ត្រីអន្តរជាតិ ឱ្យរកអ្នកទទួលខុសត្រូវចំពោះមុខ «ឧក្រិដ្ឋកម្មដ៏គួរឱ្យរន្ធត់» ប្រឆាំងនឹងស្ត្រីប៉ាឡេស្ទីន រួមទាំងអ្នកទោសស្ត្រី ដែលកាន់កាប់ដោយអ៊ីស្រាអែល៕

រុស្ស៊ី បាញ់មីស៊ីលវាយប្រហារទីក្រុងគីវរបស់អ៊ុយក្រែន បណ្តាលឲ្យមនុស្ស១០នាក់រងរបួស

មន្ត្រីទីក្រុង បាននិយាយថា រុស្ស៊ីបានបើកការវាយប្រហារដោយមីស៊ីលទៅលើទីក្រុងគីវ រដ្ឋធានីរបស់អ៊ុយក្រែន នៅព្រឹកថ្ងៃព្រហស្បតិ៍ ទី២១ ខែមីនានេះ បណ្តាលឲ្យមនុស្សយ៉ាងហោចណាស់ ១០ នាក់រងរបួស និងបានបំផ្លាញអគារលំនៅឋានជាច្រើនខ្នង រួមទាំងអគារឧស្សាហកម្ម ទោះបីជាប្រព័ន្ធការការពារដែនអាកាស បានបាញ់ទម្លាក់មីស៊ីលទាំងអស់នោះក៏ដោយ។លោក សឺហីយ ប៉ុបកូ (Serhiy Popko) ប្រធានរដ្ឋបាលយោធា បាននិយាយថា ការវាយប្រហារទ្រង់ទ្រាយធំ លើកដំបូងក្នុងប៉ុន្មានសប្តាហ៍ថ្មីៗនេះ បានដាក់គោលដៅលើទីក្រុងនេះ ទាំងមីស៊ីលបាលីស្ទីក និងមីស៊ីលតម្រង់គោលដៅ។ លោក និយាយថា បន្ទាប់ពីផ្អាករយៈពេល ៤៤ ថ្ងៃ សត្រូវបានបើកការវាយប្រហារដោយមីស៊ីលទៅលើទីក្រុងគីវ។ អង្គភាពសេវាសង្គ្រោះបន្ទាន់ទាំងអស់ កំពុងធ្វើការការនៅលើទីតាំងរងការវាយប្រហារ។ អភិបាលក្រុង លោក វីតាលី ក្លីតឆ្កូ(Vitali Klitschko) បាននិយាយថា មនុស្សយ៉ាងហោចណាស់ ១០ នាក់ បានរងរបួសនៅទូទាំងទីក្រុង។ មេបញ្ជាការទ័ពអាកាស បាននិយាយថា ប្រព័ន្ធការពារដែនអាកាសរបស់អ៊ុយក្រែន បានបាញ់ទម្លាក់មីស៊ីលរបស់រុស្ស៊ីទាំង ៣១ គ្រាប់ ដែលដាក់គោលដៅសំដៅទៅលើរដ្ឋធានី។លោក Popko បាននិយាយថា យោធារុស្ស៊ី បានប្រើប្រាស់យន្តហោះទម្លាក់គ្រាប់បែកយុទ្ធសាស្ត្រ និងបានបាញ់មីស៊ីលមួយចំនួនចេញពីទឹកដីរបស់ខ្លួន បន្ទាប់ពីការធ្វើសមយុទ្ធដ៏ស្មុគស្មាញនៅក្នុងតំបន់ជិតខាង។ លោក Klitschko និយាយថា កម្ទេចកម្ទីមីស៊ីល បានធ្លាក់ទៅលើអគារលំនៅឋាន ទីតាំងឧស្សាហកម្ម និងសាលាមត្តេយ្យមួយកន្លែង នៅក្នុងទីក្រុង។ ប្រជាជននៅក្នុងអគារច្រើនជាន់មួយកន្លែង ត្រូវបានជម្លៀសចេញ បន្ទាប់ពីអគារលំនៅឋានមួយ ក្នុងចំណោមអគារលំនៅឋានជាច្រើន មានអគ្គិភ័យឆាបឆេះ។ លោក Popko និយាយថា ការវាយប្រហារនេះ ក៏បានធ្វើឲ្យបែកបង្អួចលំនៅឋានដែលនៅក្បែរនោះ និងបានឆេះបំផ្លាញរថយន្តឯកជនជាច្រើនគ្រឿង។

បាតុករអ៊ីស្រាអែល ជំរុញឲ្យរំលាយទីភ្នាក់ងារប៉ាឡេស្ទីនរបស់UN

ជនជាតិអ៊ីស្រាអែលរាប់សិបនាក់កាលពីថ្ងៃពុធ បានតវ៉ានៅខាងក្រៅការិយាល័យទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA)នៅទីក្រុងហ្ស៊េរុយសាឡឹម ដោយអំពាវនាវឲ្យឲ្យរំលាយទីភ្នាក់ងារនេះ បន្ទាប់ពីអ៊ីស្រាអែលបានចោទប្រកាន់បុគ្គលិកមួយចំនួនថា បានឃុបឃិតជាមួយក្រុមហាម៉ាស។អ្នកតវ៉ាជនជាតិអាមេរិក-អ៊ីស្រាអែល នាង Allison Epstein បាននិយាយថា «UNRWA» បានអនុញ្ញាតឲ្យមានអំពើភេរវកម្មកើតឡើង។ «វាមិនមែនជាអង្គការដើម្បីសន្តិភាពទេ។ អង្គការនេះ បានបង្រៀនប្រជាជនប៉ាឡេស្ទីនជាច្រើនជំនាន់ឲ្យស្អប់ជនជាតិជ្វីហ្វ ហើយដល់ពេលដែលត្រូវរំលាយវាហើយ។នៅជុំវិញនាងនៅក្រុងហ្ស៊េរុយសាឡឹមភាគខាងកើត ដែលជាឧបសម្ព័ន្ធរបស់អ៊ីស្រាអែល ក្រុមអ្នកតវ៉ា បានស្រែកថា៖«UNRWA គឺជាក្រុមហាម៉ាស! ក្រុមហាម៉ាស គឺUNRWA!។ដោយត្រូវបង្កើតឡើងក្នុងឆ្នាំ ១៩៤៩ UNRWA មានបុគ្គលិកប្រហែល ៣០.0០០នាក់ នៅក្នុងទឹកដីប៉ាឡេស្ទីន ហ្ស៊កដានី លីបង់ និងស៊ីរី។ទីភ្នាក់ងារនេះ ត្រូវបានរិះគន់យ៉ាងខ្លាំង ចាប់តាំងពីអ៊ីស្រាអែល បានចោទប្រកាន់បុគ្គលិកហ្កាហ្សាចំនួន ១២នាក់ ដែលមានចំនួន ១.៣០០០នាក់ថា ជាប់ពាក់ព័ន្ធនៅក្នុងការវាយប្រហាររបស់ក្រុមហាម៉ាស នៅថ្ងៃទី៧ ខែតុលា លើអ៊ីស្រាអែលភាគខាងត្បូង។រដ្ឋាភិបាលជាច្រើន បានផ្អាកការផ្តល់ជំនួយរបស់ពួកគេដល់ទីភ្នាក់ងារនេះ ទោះបីជាមានរដ្ឋាភិបាលមួយចំនួន បានបន្តការផ្តល់មូលនិធិឡើងវិញក៏ដោយ។

ទីភ្នាក់ងារមនុស្សធម៌របស់UN ប្រើប្រាស់ការដឹកជញ្ជូនតាមអាកាស ដើម្បីដឹកជំនួយនិងបុគ្គលិកទៅហៃទី

ទីភ្នាក់ងារមនុស្សធម៌របស់អង្គការសហប្រជាជាតិ បាននិយាយកាលពីថ្ងៃពុធថា ពួកគេបានរៀបចំការដឹកជញ្ជូនតាមជើងយន្តហោះទៅកាន់ប្រទេសហៃទី មានឱសថ ការផ្គត់ផ្គង់វេជ្ជសាស្រ្ត និងបុគ្គលិកផ្តល់ជំនួយ ដែលមានសារៈសំខាន់សម្រាប់កិច្ចខិតខំប្រឹងប្រែងសង្គ្រោះនៅក្នុងប្រទេសដែលញាំញីដោយដោយជម្លោះមួយនេះ។ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា ការដឹកជញ្ជូនតាមផ្លូវអាកាស អាចនាំយកថ្នាំពេទ្យបានជាង ៨០០គីឡូក្រាម រួមមានទាំងកញ្ចប់ឈាម និងសម្ភារៈផ្គត់ផ្គង់វេជ្ជសាស្រ្តផ្សេងទៀតទៅក្នុងប្រទេសនេះ។អង្គការ OCHA បាននិយាយថា ការផ្គត់ផ្គង់ទាំងនេះ មានសារៈសំខាន់សម្រាប់ការឆ្លើយតបផ្នែកសុខភាព ធ្វើឡើងដោយទីភ្នាក់ងារអង្គការសហប្រជាជាតិ និងអង្គការមិនមែនរដ្ឋាភិបាល ដោយអគារថែទាំសុខភាព បានរងផលប៉ះពាល់ធ្ងន់ធ្ងរដោយអំពើហិង្សា។ អង្គការ OCHA បាននិយាយថា ការប្រើប្រាស់ការដឹកជញ្ជូនតាមអាកាស បានអនុញ្ញាតឱ្យអង្គការមនុស្សធម៌នាំយកបុគ្គលិកគ្រប់គ្រាន់ចូលទៅក្នុងប្រទេសហៃទី ដើម្បីបន្តផ្តល់ជំនួយ។ការិយាល័យ បាននិយាយថា កម្មវិធីស្បៀងអាហារពិភពលោក (WFP) បានចែកចាយអាហារក្តៅជាង ៨.៤០០កញ្ចប់ដល់ប្រជាជន ដែលត្រូវបានបង្ខំឱ្យភៀសខ្លួនចេញពីលំនៅឋានរបស់ពួកគេ នៅទីក្រុង ព័រ អូប្រាំង។លោកស្រី វ្ល័រេនស៊ីយ៉ា សូតូ នីណូ(Florencia Soto Nino) អ្នកនាំពាក្យរបស់អង្គការសហប្រជាជាតិ បាននិយាយថា ការដឹកជញ្ជូនតាមយន្តហោះត្រូវបានធ្វើប្រតិបត្តិការដោយអង្គភាពសេវាដឹកជញ្ជូនតាមអាកាសមនុស្សធម៌កម្មវិធីស្បៀងអាហារពិភពលោក(WFP) របស់អង្គការសហប្រជាជាតិ ។

បណ្ដាញសង្គម

ព័ត៌មានថ្មីៗ

ឯកឧត្តម គន់ គីម អញ្ជើញបញ្ចុះបឋមសិលាសាងសង់អគារទីស្នាក់ការ អ.ន.ក.ខេត្តតាកែវ

ឆ្មាំល្បាតឆ្នេរកោះតៃវ៉ាន់និយាយថា ខ្លួនបានដាក់ពង្រាយនាវាដើម្បីឆ្លើយតបទៅនឹងប្រតិបត្តិការរបស់ចិន

សម្ដេចតេជោ និងសម្ដេចកិត្តិព្រឹទ្ធបណ្ឌិត ប្រគេនចង្ហាន់សមណសិស្សជាង១ពាន់អង្គ/នាក់ ក្នុងឱកាសប្រឡងធម្មវិន័យ

បារាំង និងសម្ព័ន្ធមិត្តសម្លឹងរកការចាត់វិធានការថ្នាក់ជាតិ ដើម្បីដាក់សម្ពាធលើអ៊ីស្រាអែលលើបញ្ហាតំបន់ West Bank

ករណីឆ្លងជំងឺអេបូឡាហក់ឡើងជាង ៤០០នាក់ ខណៈក្ដីបារម្ភកើនឡើងពីការផ្ទុះឡើងនៃជំងឺនេះនៅអាហ្វ្រិកកណ្តាល

អតីតសកម្មជនគណបក្សប្រឆាំងចំនួន៥១នាក់ ចូលរួមជីវភាពនយោបាយជាមួយគណបក្សប្រជាជនកម្ពុជា

ការបាញ់ប្រហារបណ្ដាលឱ្យនគរបាលរបួស ខណៈកងកម្លាំងបូលីវីសម្អាតផ្លូវហាយវេក្រោយបិទរយៈពេលជាច្រើនសប្តាហ៍

អ៊ុយក្រែនវាយប្រហារដោយយានដ្រូនជាច្រើនលើរុស្ស៊ីនៅថ្ងៃចុងក្រោយនៃវេទិកាសេដ្ឋកិច្ចដ៏សំខាន់

សមត្ថកិច្ចខេត្តមណ្ឌលគិរី បញ្ជូនជនជាតិចិន និងមីយ៉ាន់ម៉ា៨០នាក់ ទៅនាយកដ្ឋានអន្តោប្រវេសន៍ ពាក់ព័ន្ធនឹងបទល្មើសឆបោកតាមប្រព័ន្ធអនឡាញ

កិច្ចប្រជុំផ្សព្វផ្សាយសេចក្ដីសម្រេច ស្ដីពីផែនការរួមឆ្ពោះទៅកាន់ការបោះឆ្នោតជ្រើសរើស ក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ នៅស្រុកគូលែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877