BTV NEWS

ដើមខែមិថុនានេះ កម្លាំងនគរបាលរាជធានីបង្ក្រាបគ្រឿងញៀន០៥ករណី ឃាត់មនុស្ស២៤នាក់ និងដកហូតគ្រឿងញៀន៦៦គីឡូក្រាម

បង្ក្រាបជនជាតិចិន០៤នាក់ ជាក្រុមត្រៀមរៀបចំផែនការណ៍ចាប់ជំរិត តែត្រូវទប់ស្កាត់ទាន់ពេល

សមត្ថកិច្ចខេត្តស្វាយរៀងបន្តចុះបង្រ្កាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាឃាត់ខ្លួនជនសង្ស័យជនជាតិចិន វៀតណាម និងខ្មែរចំនួន ៧៣នាក់

ឃាតកម្មសម្លាប់មនុស្ស ២នាក់រួចយកសពទៅកប់ចោលនៅខណ្ឌជ្រោយចង្វារ កម្លាំងសមត្ថកិច្ចរាជធានីបង្ក្រាបជនសង្ស័យបាន ៤នាក់

សន្តិសុខ និង សង្គម

ក្រុមវេជ្ជបណ្ឌិតកូរ៉េខាងត្បូងរាប់ពាន់នាក់ នៅតែបន្តតវ៉ា ខណៈការជាប់គាំងវិស័យសុខាភិបាលកាន់តែធ្ងន់ធ្ងរ

វេជ្ជបណ្ឌិតកូរ៉េខាងត្បូងរាប់ពាន់នាក់ បានតវ៉ាកាលពីថ្ងៃអាទិត្យ ទី៣ មីនា ក្នុងទីក្រុងសេអ៊ូល ក្នុងការកើនឡើងនៃការប្រឈមដាក់គ្នាជាមួយរដ្ឋាភិបាលជុំវិញកំណែទម្រង់ការបណ្តុះបណ្តាលផ្នែកវេជ្ជសាស្រ្ត ដែលបានមើលឃើញថាគ្រូពេទ្យហាត់ការក្មេងៗ បានលាឈប់ពីការងារយ៉ាងច្រើន ដែលធ្វើអោយមន្ទីរពេទ្យធ្លាក់ចូលទៅក្នុងភាពវឹកវរ។ វេជ្ជបណ្ឌិតវ័យក្មេងប្រហែល១ម៉ឺននាក់ បានឈប់ធ្វើការ និងឈប់ធ្វើការជិត២ សប្តាហ៍មុន ដើម្បីតវ៉ាប្រឆាំងការបង្កើនចំនួននិស្សិតពេទ្យចូលរៀននៅសាលាវេជ្ជសាស្ត្រចាប់ពីឆ្នាំក្រោយនេះ ដើម្បីទប់ទល់នឹងកង្វះគ្រូពេទ្យ និងការកើនឡើងមនុស្សវ័យចំណាស់កាន់តែច្រើន។ ក្រុមគ្រូពេទ្យជំនាញដែលធ្វើកូដកម្មបានផ្គើននឹងការដាក់ឱសានុវាទកាលកំណត់របស់រដ្ឋាភិបាលកាលពីថ្ងៃទី២៩ ខែកុម្ភៈ ដើម្បីឱ្យពួកគេត្រឡប់ចូលធ្វើការវិញ បើមិនព្រមទេ នឹងត្រូវប្រឈមចំណាត់ការផ្លូវច្បាប់ រួមទាំងការចាប់ខ្លួនដែលអាចកើតមាន ឬការព្យួរអាជ្ញាប័ណ្ណវេជ្ជសាស្ត្ររបស់ពួកគេ។ ក្រុមបាតុករបានពាក់ម៉ាស់ពណ៌ខ្មៅ និងគ្រវីសញ្ញាផ្សេងៗ ដោយនិយាយថា យើងប្រឆាំងនឹងការកើនឡើងនៃការចូលរៀនរបស់និស្សិតពេទ្យនៅសាលាពេទ្យ។លោកKim Taek-woo មកពីសមាគមគ្រូពេទ្យកូរ៉េបានប្រាប់ក្រុមបាតុករថា រដ្ឋាភិបាលកំពុងជំរុញកំណែទម្រង់ជាឯកតោភាគី ហើយថាគ្រូពេទ្យមិនអាចទទួលយកបានក្នុងកាលៈទេសៈណាក៏ដោយ ។រដ្ឋាភិបាលដឹងច្បាស់អំពីមូលហេតុដែលគ្រូពេទ្យទាំងអស់ប្រឆាំងទៅនឹងការកើនឡើងនៃការចូលរៀននៅសាលាពេទ្យ ប៉ុន្តែកំពុងកេងប្រវ័ញ្ចគោលនយោបាយដើម្បីប្រែក្លាយវេជ្ជបណ្ឌិតទៅជាទាសករជារៀងរហូត។ ការដើរចេញពីការងារទ្រង់ទ្រាយធំបានធ្វើឱ្យប៉ះពាល់ដល់មន្ទីរពេទ្យ ខណៈការព្យាបាល និងការវះកាត់សំខាន់ៗត្រូវបានលុបចោល ដែលជំរុញឱ្យរដ្ឋាភិបាលបង្កើនការប្រុងប្រយ័ត្នផ្នែកសុខភាពសាធារណៈដល់កម្រិតខ្ពស់បំផុត៕

អនុប្រធានាធិបតីអាមេរិក៖ ត្រូវតែមានបទឈប់បាញ់ជាបន្ទាន់នៅក្នុងតំបន់ហ្កាហ្សា

លោកស្រីអនុប្រធានាធិបតីអាមេរិក Kamala Harris កាលពីថ្ងៃអាទិត្យទី៣ខែមីនា បានអំពាវនាវឲ្យមានបទឈប់បាញ់ជាបន្ទាន់នៅក្នុងតំបន់ហ្កាហ្សា និងបានដាក់សម្ពាធយ៉ាងខ្លាំងលើអ៊ីស្រាអែល ឲ្យបង្កើនលំហូរជំនួយ ដើម្បីកាត់បន្ថយនូវអ្វីដែលលោកស្រី បានហៅថាជា ស្ថានភាពអមនុស្សធម៌ គ្រោះមហន្តរាយមនុស្សធម៌ ហើយមនុស្សកំពុងអត់ឃ្លានក្នុងចំណោមប្រជាពលរដ្ឋប៉ាឡេស្ទីន។ លោកស្រី Harris ក៏បាននិយាយយ៉ាងទទូចផងដែរ ដោយអំពាវនាវឲ្យអ៊ីស្រាអែលបន្ធូរបន្ថយស្ថានភាពដ៏វិនាសកម្មនៅក្នុងតំបន់ហ្កាហ្សា។ ថ្លែងនៅឯព្រឹត្តិការណ៍មួយក្នុងទីក្រុង Selma រដ្ឋ Alabama ដើម្បីរម្លឹកខួប៥៩ឆ្នាំនៃហេតុការណ៍ សម្លាប់មនុស្សយ៉ាងរង្គាល ដែលគេបានដាក់ឈ្មោះថា ហេតុការណ៍សម្លាប់មនុស្សដ៏សាហាវបំផុត"Bloody Sunday,"នៅក្នុងដែនដីអៀរឡង់ខាងជើងរបស់អង់គ្លេសកាលពីឆ្នាំ ១៩៧២ នៅពេលទាហានរដ្ឋបានវាយប្រហារដោយហិង្សាលើក្រុមអ្នកតវ៉ា អនុប្រធានាធិបតី រូបនេះ បានជំរុញឲ្យក្រុមហាម៉ាស ទទួលយកកិច្ចព្រមព្រៀង ដោះលែងចំណាប់ថ្នូរ ដែលនឹងចាប់ផ្ដើមបទឈប់បាញ់រយៈពេល៦សប្ដាហ៍ និងអនុញ្ញាតឲ្យជំនួយចូលទៅក្នុងតំបន់ហ្កាហ្សា។លោកស្រី និងលោកប្រធានាធិបតី Joe Biden បានអំពាវនាវឲ្យ អ៊ីស្រាអែលធ្វើកិច្ចការឲ្យបានច្រើនថែមទៀត ដើម្បីការពារជីវិតជនស៊ីវិល នៅហ្កាហ្សា និងបើកឲ្យជំនួយមនុស្សធម៌ចាំបាច់ចូលទៅជួយដល់ពលរដ្ឋប៉ាឡេស្ទីន៕

អ៊ីស្រាអែល ធ្វើពហិការមិនចូលរួមកិច្ចចរចាបទឈប់បាញ់ហ្កាហ្សា ជុំវិញបញ្ជីចំណាប់ថ្នូរ

សារព័ត៌មានអ៊ីស្រាអែលមួយបានរាយការណ៍ថា អ៊ីស្រាអែល បានធ្វើពហិការមិនចូលរួមកិច្ចចរចាបទឈប់បាញ់របស់តំបន់ហ្កាហ្សា នៅទីក្រុងគែរ កាលពីថ្ងៃអាទិត្យ (០៣ មីនា) បន្ទាប់ពីក្រុមហាម៉ាស បានបដិសេធការទាមទាររបស់អ៊ីស្រាអែលសម្រាប់បញ្ជីឈ្មោះពេញលេញនៃចំណាប់ថ្នូរដែលនៅរស់។គណៈប្រតិភូក្រុមហាម៉ាស បានទៅដល់ទីក្រុងគែរ សម្រាប់កិច្ចពិភាក្សានេះ ដោយចាត់ទុកថាជាឧបសគ្គចុងក្រោយដែលអាចកើតមាន មុនពេលទទួលបានកិច្ចព្រមព្រៀងមួយដែលនឹងបញ្ឈប់ការប្រយុទ្ធគ្នារយៈពេលប្រាំមួយសប្តាហ៍ ប៉ុន្តែរហូតដល់ពេលល្ងាច គេមិនឃើញភាគីអ៊ីស្រាអែលណាម្នាក់បង្ហាញខ្លួននោះទេ។សារព័ត៌មាន វ៉ាយណេត (Ynet) របស់អ៊ីស្រាអែលបានដកស្រង់សម្តីក្រុមមន្ត្រីអ៊ីស្រាអែលមិនបញ្ចេញអត្តសញ្ញាណ ដែលបាននិយាយថា «មិនមានគណៈប្រតិភូអ៊ីស្រាអែល នៅទីក្រុងគែរទេ ដោយសារក្រុមហាម៉ាស បដិសេធមិនផ្តល់ចម្លើយច្បាស់លាស់លើបញ្ជីឈ្មោះពេញលេញរបស់ចំណាប់ថ្នូរដែលនៅរស់ ដូច្នេះហើយគ្មានហេតុផលដើម្បីបញ្ជូនគណៈប្រតិភូអ៊ីស្រាអែល ទៅក្នុងកិច្ចចរចានោះឡើយ»។ទីក្រុងវ៉ាស៊ីនតោន បានទទូចថាកិច្ចព្រមព្រៀងបទឈប់បាញ់អាចសម្រេចបានឆាប់ៗ ហើយគួរតែធ្វើឡើងទាន់ពេលវេលាដើម្បីបញ្ឈប់ការប្រយុទ្ធគ្នានៅដើមខែបុណ្យរ៉ាម៉ាដាន ដែលមានរយៈពេលប៉ុន្មានថ្ងៃទៀតប៉ុណ្ណោះ ប៉ុន្តែភាគីជម្លោះបានផ្តល់សញ្ញាតិចតួចណាស់ពីការបោះបង់ចោលលក្ខខណ្ឌទាមទារពីមុន ដែលភាគីទាំងសងខាងបានបដិសេធ៕

ក្រុមប្រជាកសិករឥណ្ឌា គ្រោងហែក្បួនតវ៉ាទៅកាន់រដ្ឋធានី Delhi ទាមទារឲ្យរដ្ឋាភិបាលដំឡើងថ្លៃផលិតផលសកិកម្ម

មេដឹកនាំការតវ៉ា បាននិយាយថា ក្រុមប្រជាកសិករឥណ្ឌា គ្រោងហែក្បួនទៅកាន់រដ្ឋធានី New Delhi នៅថ្ងៃពុធទី៦ខែកុម្ភៈ ខណៈពួកគេជំរុញការទាមទារឲ្យរដ្ឋាភិបាលដំឡើងតម្លៃផលិតផលដំណាំកសិកម្មរបស់ពួកគេឲ្យបានខ្ពស់ជាងសព្វថ្ងៃ បន្ទាប់ពីការចរចាជាច្រើនជុំបរាជ័យ។ ក្រុមមេដឹកនាំសហជីពកសិកម្ម កំពុងស្វែងរកការធានាការគាំទ្រពីរដ្ឋ ឬការទិញមានតម្លៃទាបសម្រាប់ផលិតផលកម្មសិកម្មរបស់ប្រជាកសិករ។មេដឹកនាំក្បួនតវ៉ា លោក ចាជីត ស៊ីញ ដាឡេវ៉ាល (Jagjit Singh Dallewal) បាននិយាយថា នៅថ្ងៃទី៦ខែមីនា សប្ដាហ៍នេះ ក្រុមប្រជាកសិករនឹងទៅកាន់រដ្ឋធានី Delhi ពីគ្រប់ទីកន្លែងទូទាំងប្រទេសតាមរថភ្លើង រយន្តក្រុង និងយន្តហោះ។ លោកបាននិយាយថា កសិករ ក៏នឹងបិទផ្លូវហាយវ៉េ ទូទាំងប្រទេស នៅថ្ងៃទី១០ខែមីនា ផងដែរ។ ការតវ៉ានានា បានចាប់ផ្ដើមផ្ទុះឡើងកាលពីដើមខែកុម្ភៈដោយមានការចូលរួមពីកសិកររាប់រយនាក់ នៅក្នុងរដ្ឋពុនចាប់(Punjab) ដែលមានបំណងនាំយុទ្ធនាការរបស់ពួកគេទៅកាន់រដ្ឋធានី Delh។ ពួកគេត្រូវបានរារាំងដោយនគរបាល និងកងទ័ពប៉ារ៉ា នៅទីក្រុងព្រំដែនសាមប៊ូ (Shambhu) ជាប់រដ្ឋហារីយ៉ាណា (Haryana) ស្ថិតនៅចម្ងាយប្រហែល២០០គីឡូម៉ែត្រពីរដ្ឋធានី Delhi។ រដ្ឋាភិបាល បានប្រកាសជួយដំឡើងថ្លៃសម្រាប់ដំណាំកសិកម្មជាង២០ប្រភេទក្នុងមួយឆ្នាំៗ ប៉ុន្តែទីភ្នាក់ងាររដ្ឋនានាទិញយកតែស្រូវ និងស្រូវសាលីប៉ុណ្ណោះ ក្នុងការជួយមានកម្រិត ហើយមានកសិករដែលដាំដំណាំទាំង២ប្រភេទប្រហែល៦%ប៉ុណ្ណោះដែលទទួលបានអត្ថប្រយោជន៍នេះ៕

យោធាអ៊ីស្រាអែល ពិនិត្យឃើញថា ការស្លាប់ភាគច្រើនរបស់អ្នកចាំយកជំនួយហ្កាហ្សា មកពីការរត់ជាន់គ្នា

យោធាអ៊ីស្រាអែល បាននិយាយកាលពីថ្ងៃអាទិត្យ (០៣ មីនា) ថាភាគច្រើននៃជនជាតិប៉ាឡេស្ទីន ដែលបានស្លាប់កាលពីសប្តាហ៍មុន ខណៈហ្វូងមនុស្សយ៉ាងច្រើនសម្រុកចូលក្បួនរថយន្តផ្តល់ជំនួយនៅហ្កាហ្សា គឺមកពីការរត់ជាន់គ្នា ប៉ុន្តែក្រុមមន្ត្រីសុខាភិបាលក្នុងតំបន់បាននិយាយថា ជនរងគ្រោះដែលនាំចូលទៅក្នុងមន្ទីរពេទ្យ មានរបួសពីការវាយប្រហារដោយគ្រាប់កាំភ្លើងធំ។សម្ពាធបានកើតមានលើអ៊ីស្រាអែល ជុំវិញការស្លាប់របស់ជនជាតិប៉ាឡេស្ទីនរាប់សិបនាក់ ក្នុងអំឡុងពេលឧប្បត្តិហេតុដ៏ច្របូកច្របល់នៅតំបន់ហ្កាហ្សាស្ទ្រីប កាលពីថ្ងៃព្រហស្បតិ៍ ដែលហ្វូងមនុស្សបានឡោមព័ទ្ធក្បួនរថយន្តដឹកជំនួយ និងទាហានបានបើកការបាញ់ប្រហារ ដោយមានប្រទេសជាច្រើនគាំទ្រការអំពាវនាវរបស់អង្គការសហប្រជាជាតិសម្រាប់ការស៊ើបអង្កេត។កាលពីថ្ងៃអាទិត្យ អ្នកនាំពាក្យយោធាសំខាន់របស់អ៊ីស្រាអែល លោកឧត្តមនាវីឯក ដានីញ៉ែល ហាហ្ការី (Daniel Hagari) បានប្រកាសពីលទ្ធផលនៃការពិនិត្យបឋមដែលបានរកឃើញថា ភាគច្រើននៃអ្នកស្លាប់ទាំងនោះ ដោយសារតែត្រូវហ្វូងមនុស្សជាន់ពីលើហើយត្រូវសង្កត់ស្លាប់ ខណៈដែលហ្វូងមនុស្សបានប្រញាប់ប្រញាល់សម្រុកចូលរថយន្តជំនួយ។បន្ថែមពីលើនេះ «មានបុគ្គលប៉ុន្មាននាក់ប៉ុណ្ណោះ» ត្រូវបានកំណត់គោលដៅ ខណៈកងទ័ពបានបាញ់ប្រហារទៅលើក្រុមមនុស្ស ដែលចូលទៅជិតពួកគេក្នុងស្ថានភាពបង្ហាញពីការគំរាមកំហែងភ្លាមៗ ដោយលោកបន្ថែមថាការស៊ើបអង្កេតឯករាជ្យមួយត្រូវបានបើក ប៉ុន្តែមិនផ្តល់ព័ត៌មានលម្អិតទេ៕

ឃាត់ខ្លួនជនសង្ស័យ ០៦នាក់ករណីប្លន់ម៉ូតូ០៣ករណីនៅរាជធានីភ្នំពេញ

ភ្នំពេញ ៖ កម្លាំងការិយាល័យនគរបាលព្រហ្មទណ្ឌកម្រិតស្រាល ស្នងការដ្ឋាននគរបាលរាជធានីភ្នំពេញ ដឹកនាំដោយលោកឧត្តមសេនីយ៍ត្រី ប៊ុន សត្យា ស្នងការរង ទទួលផែនការងារនគរបាលព្រហ្មទណ្ឌ សហការជាមួយកម្លាំងអធិការដ្ឋាននគរបាលខណ្ឌដង្កោ ស្រាវជ្រាវឃាត់ខ្លួនជនសង្ស័យបន្តបន្ទាប់ ចំនួន០៦នាក់ ពាក់ព័ន្ធករណីប្លន់យកម៉ូតូនៅក្នុងរាជធានីភ្នំពេញ ចំនួន ០៣ករណីកាលពីថ្ងៃទី២៩ ខែកុម្ភៈ ឆ្នាំ២០២៤ ។លោកវរសេនីយ៍ទោ ម៉ម សាវន នាយការិយាល័យនគរបាលព្រហ្មទណ្ឌប្រាប់ឱ្យដឹងថាជនសង្ស័យទាំង ០៦នាក់ ដែលត្រូវសមត្ថកិច្ចឃាត់ខ្លួន ១-ឈ្មោះ ផល ពិសាល ហៅ ជ្រូក ភេទ ប្រុស ជនជាតិ ខ្មែរ មុខរបរ មិនពិតប្រាកដ មានទីលំនៅផ្ទះគ្មានលេខ ផ្លូវលំ ភូមិចុងបង្គោល ឃុំបែកចាន ស្រុកអង្គស្នួល ខេត្តកណ្តាល។២-ឈ្មោះ ដួង រស្មី ហៅ ហ្វី ភេទ ប្រុស ជនជាតិ ខ្មែរ មុខរបរ រត់តុការ មានទីលំនៅផ្ទះគ្មានលេខ ផ្លូវជាតិលេខ១ ភូមិកណ្តាលក្រោម ឃុំបន្ទាយដែក ស្រុកកៀនស្វាយ ខេត្តកណ្តាល។៣-ឈ្មោះ ផាត សុភក្ត្រា ហៅ វីន ភេទ ប្រុស ជនជាតិ ខ្មែរ មុខរបរ រត់តុការ មានទីលំនៅផ្ទះគ្មានលេខ ផ្លូវជាតិលេខ១ ភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល។៤-ឈ្មោះ សៅ រតនា ហៅ ឃ្មុំ ភេទ ប្រុស ជនជាតិ ខ្មែរ មុខរបរ តុបតែងរោងការ មានទីលំនៅផ្ទះគ្មានលេខ ផ្លូវជាតិលេខ១ ភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ។ ៥-ឈ្មោះ ផាន រតនៈពិសាល ភេទ ប្រុស ជនជាតិ ខ្មែរ មុខរបរ មិនពិតប្រាកដ មានទីលំនៅផ្ទះគ្មានលេខ ផ្លូវលំ សង្កាត់ស្ទឹងមានជ័យ១ ខណ្ឌមានជ័យ។ ៦-ឈ្មោះ ហុង សុធារស ភេទ ប្រុស ជនជាតិ ខ្មែរ មុខរបរ មិនពិតប្រាកដ មានទីលំនៅផ្ទះមិនចាំលេខ ផ្លូវមិនចាំលេខ ភូមិ១២ សង្កាត់វត្តភ្នំ ខណ្ឌដូនពេញ។ករណីទី១៖ នៅចំណុចផ្លូវ៥០ម៉ែត្រ ភូមិបាគូ សង្កាត់ដង្កោ ខណ្ឌដង្កោ កាលពីថ្ងៃទី២៩ ខែកុម្ភៈ ឆ្នាំ២០២៤ ។ ក្រុមជនសង្ស័យប្លន់ ម៉ូតូ ម៉ាកហុងដា សេ១២៥ ពណ៌ ខ្មៅ សេរីឆ្នាំ២០២២ ពាក់ផ្លាកលេខ តាកែវ១Z-៦២៨២ ។ករណីទី២៖ នៅចំណុចខាងជើងច្រកចូលបុរីវីអាយភីចម្ងាយ១០ម៉ែត្រ ផ្លូវលេខ២១៧ ភូមិព្រែកជ្រៃ សង្កាត់ស្ពានថ្ម ខណ្ឌដង្កោ កាលពីថ្ងៃទី២៥ ខែកុម្ភៈ ឆ្នាំ២០២៤ ប្លន់ ម៉ូតូ ម៉ាកហុងដា សេ១២៥ ពណ៌ ខ្មៅ សេរីឆ្នាំ២០២៣ ពាក់ផ្លាកលេខ ភ្នំពេញ១KG-៧៣៣៩។ករណីទី៣៖ នៅចំណុចលើស្ពានព្រែកសំរោង ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ កាលពីថ្ងៃទី២៤ ខែកុម្ភៈ ឆ្នាំ២០២៤ ប្លន់ម៉ូតូ ម៉ាកហុងដា សេ១២៥ ពណ៌ ស សេរីឆ្នាំ២០២២ ពាក់ផ្លាកលេខភ្នំពេញ១JH-៩៧២៣។ចំពោះជនសង្ស័យ និង វត្ថុតាងជាមធ្យោបាយជិះធ្វើសកម្មភាព ជំនាញការិយាល័យកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕ ដោយ ៖ តារាវុទ្ធី

អ៊ុយក្រែននិយាយថា ទាហានរុស្ស៊ីត្រូវបានបណ្តេញចេញពីទីក្រុង Krasnohorivka តំបន់ Donetsk

អង្គភាពយោធាអ៊ុយក្រែន បាននិយាយកាលពីថ្ងៃព្រហស្បតិ៍ថា កងកម្លាំងរបស់ពួកគេបានរុលទៅមុខចូលទៅក្នុងទីក្រុង ក្រាស្នូហូរីវកា(Krasnohorivka) ដែលមានទីតាំងនៅក្នុងតំបន់ Donetsk ដោយរថពាសដែក និងបានបង្ខំឱ្យទាហានរុស្ស៊ីរាប់សិបនាក់រត់ភៀសខ្លួន។កងពលតូចវាយលុកទី ៣ បាននិយាយនៅក្នុងសារបង្ហោះនៅលើបណ្តាញ Telegram ថា សត្រូវ គ្មានបំណងដកថយនោះទេ និងគ្មានបំណងបោះបង់ចោលគ្រប់អគារទាំងអស់។ ទាហានរុស្ស៊ី ត្រូវបានបណ្តេញចេញ ដោយអ៊ុយក្រែនបានប្រើប្រាស់កម្លាំង គ្រាប់កាំភ្លើង និងគ្រាប់បែកដៃ។ការវាយរុញច្រាននេះ បានកើតឡើង បន្ទាប់ពីមានការរាយការណ៍ថា កងកម្លាំងអ៊ុយក្រែន ក៏បានវាយរុញច្រានកងទ័ពរុស្ស៊ី ពីភូមិ Orlivka ភាគខាងលិចទីក្រុង Avdiivka ផងដែរ។ ទោះបីជាយ៉ាងណា ប្រធានាធិបតី លោក Volodymyr Zelenskiy បាននិយាយថា កងទ័ពខ្វះយុទ្ធោបករណ៍ និងគ្រាប់រំសេវ ដែលត្រូវការដើម្បីវាយរុញច្រានការវាយប្រហាររបស់រុស្ស៊ី ដោយសារតែខ្វះជំនួយរបស់ប្រទេសលោកខាងលិច។សារព័ត៌មាន Reuters អាចផ្ទៀងផ្ទាត់ដោយឯករាជ្យនូវទីតាំងនៃវីដេអូ តាមរយៈផ្កាយរណប និងរូបភាពឯកសារ ដែលផ្គូផ្គងត្រូវគ្នាជាមួយអគារ និងទីតាំងរបស់ពួកគេ ព្រមទាំងស្ពានផងដែរ។

មនុស្សជាច្រើន ភៀសខ្លួនចេញពីលំនៅឋាន ខណៈអំពើហិង្សា បានធ្វើឲ្យរង្គោះរង្គើប្រទេសហៃទី

ភាពភ័យខ្លាចជាបន្តបន្ទាប់ បានកើតឡើងនៅទីប្រជុំជន ទីក្រុង ព័រ អូប្រាំង កាលពីថ្ងៃព្រហស្បតិ៍ ខណៈអំពើហិង្សា និងការបាញ់កាំភ្លើង បានផ្ទុះឡើង ជាអ្វីដែលមេដឹកនាំក្រុមជនអន្ធពាល បាននិយាយថា គឺជាបាតុកម្មប្រឆាំងអាជ្ញាធរ។ការប៉ះទង្គិចប្រដាប់អាវុធ ដែលពាក់ព័ន្ធជាមួយក្រុមជនអន្ធពាល នគរបាល និងអ្នកតាំងខ្លួនជាអ្នកការពារ បានកើតឡើង នៅថ្ងៃតែមួយដែលនាយករដ្ឋមន្ត្រីប្រទេសហៃទី លោក Ariel Henry បានទៅដល់ប្រទេសកេនយ៉ា ដើម្បីពិភាក្សាអំពីការដាក់ពង្រាយបេសកកម្មសន្តិសុខពហុសាសន៍ នៅក្នុងប្រទេសដែលគាំទ្រដោយអង្គការសហប្រជាជាតិមួយនេះ។នៅពាក់កណ្តាលថ្ងៃ ស្ថាប័ន និងអាជីវកម្មភាគច្រើន នៅក្នុងទីក្រុង បានបិទទ្វារ ហើយមនុស្សរាប់ពាន់នាក់ បានព្យាយាមរត់ចេញពីទីក្រុងដោយថ្មើរជើង ឬតាមការដឹកជញ្ជូនសាធារណៈ។អង្គភាពនគរបាលពិសេស ត្រូវបានដាក់ពង្រាយនៅទូទាំងទីក្រុង ហើយសហជីពនគរបាលជាតិ ស៊ីណាប៉ូហា(SYNAPOHA) បាននិយាយថា មន្រ្តីបួននាក់បានស្លាប់ រួមទាំងអធិការម្នាក់។ក្រុមជនអន្ធពាលហិង្សា បានពង្រីកដែនដីរបស់ពួកគេ ហើយបច្ចុប្បន្ននេះ ត្រូវបានគេសន្និដ្ឋានថា នឹងគ្រប់គ្រងភាគច្រើននៅក្នុងរដ្ឋធានី។ អង្គការសហប្រជាជាតិ បានប៉ាន់ប្រមាណថា ជម្លោះនៅក្នុងប្រទេសនេះ បានសម្លាប់មនុស្សជិត ៥.០០០នាក់កាលពីឆ្នាំមុន ហើយបានជំរុញឲ្យមនុស្សប្រហែល ៣០០.០០០នាក់ ភៀសខ្លួនចេញពីលំនៅឋានរបស់ពួកគេ ខណៈការប្រយុទ្ធគ្នា បានធ្វើឲ្យរាំងស្ទះដល់សេវាស្បៀងអាហារ និងសេវាវេជ្ជសាស្រ្ត។

អតីតឯកអគ្គរដ្ឋទូតអាមេរិក នឹងផ្ដល់ចម្លើយពីភាពមានទោសលើបទចារកម្មឱ្យគុយបា អស់ពេលរាប់ទសវត្សរ៍

កំណត់ត្រារបស់តុលាការអាមេរិកបានបង្ហាញកាលពីថ្ងៃព្រហស្បតិ៍ (២៩ កុម្ភៈ) ថាអតីតឯកអគ្គរដ្ឋទូតអាមេរិក នឹងផ្ដល់ចម្លើយពីភាពមានទោសរបស់ខ្លួនចំពោះការចោទប្រកាន់ពីបទចារកម្មឱ្យប្រទេសគុយបា អស់ជាច្រើនទសវត្សរ៍ ដែលក្រសួងយុត្តិធម៌បានពិពណ៌នាថាជាការជ្រៀតចូលខ្ពស់បំផុត និងយូរអង្វែងបំផុតក្នុងរដ្ឋាភិបាលសហរដ្ឋអាមេរិក ដោយភ្នាក់ងារបរទេស។លោក វីកទ័រ ម៉ានូអ៊ែល រ៉ូឆា (Victor Manuel Rocha) ដែលធ្លាប់បម្រើការជាឯកអគ្គរដ្ឋទូតសហរដ្ឋអាមេរិក ប្រចាំប្រទេសបូលីវី ពីឆ្នាំ២០០០ ដល់ឆ្នាំ២០០២ ត្រូវបានចោទប្រកាន់កាលពីខែធ្នូ ពីបទប្រព្រឹត្តឧក្រិដ្ឋកម្មសហព័ន្ធជាច្រើនករណី រួមទាំងការដើរតួជាភ្នាក់ងារបរទេសខុសច្បាប់ និងប្រើប្រាស់លិខិតឆ្លងដែនដែលទទួលបានដោយក្លែងបន្លំ។សហរដ្ឋអាមេរិកបានចោទប្រកាន់ លោក រ៉ូឆា ថាបានគាំទ្រគុយបាជាសម្ងាត់ និងបេសកកម្មប្រមូលផ្តុំស៊ើបការណ៍សម្ងាត់របស់ខ្លួនប្រឆាំងនឹងទីក្រុងវ៉ាស៊ីនតោន ចាប់តាំងពីឆ្នាំ១៩៨១ មក។លោកបានផ្ដល់ចម្លើយពីភាពគ្មានទោសកាលពីពាក់កណ្តាលខែកុម្ភៈ ប៉ុន្តែភាគីក្នុងសំណុំរឿងបានប្រកាសកាលពីថ្ងៃព្រហស្បតិ៍ថា លោក «នឹងផ្លាស់ប្តូរចម្លើយរបស់ខ្លួន» ដើម្បីសារភាពកំហុស នេះបើយោងតាមឯកសារនៅក្នុងប្រព័ន្ធកំណត់ត្រាតុលាការតាមអ៊ីនធឺណិតរបស់សហរដ្ឋអាមេរិក ដោយបានបន្ថែមថាការកាត់ទោសត្រូវបានកំណត់សម្រាប់ថ្ងៃទី១២ ខែមេសា ខាងមុខនេះ៕

អ្នកវិទ្យាសាស្រ្ត៖ ខែកុម្ភៈ ឆ្នាំ២០២៤ នេះទំនងជាខែក្តៅបំផុតក្នុងកំណត់ត្រាខែកុម្ភៈ

ក្នុងខែកុម្ភៈ ឆ្នាំនេះបានមើលឃើញស្ថានភាពអាកាសធាតុមិនប្រក្រតីជាច្រើនដូចជាផ្កាសាគូរ៉ា រីកមុនរដូវនៅក្នុងប្រទេសជប៉ុន កន្លែងជិះស្គីនៅអឺរ៉ុបទទេស្អាតដោយមិនមានទឹកកក និងចំហេះព្រៃយ៉ាសន្ធោសន្ធៅនៅរដ្ឋតិចសាស់ របស់អាមេរិក និងនៅប្រទេសឈីលី។ខណៈពេលដែលទិន្នន័យមិនទាន់ត្រូវបានបញ្ចប់ អ្នកវិទ្យាសាស្ត្របានប្រាប់សារព័ត៌មានរ៉យទ័រថា ខែកុម្ភៈ ឆ្នាំ២០២៤ គឺកំពុងក្លាយជាខែដែលមានសីតុណ្ហភាពជាមធ្យមពិភពលោកខ្ពស់បំផុតមិនធ្លាប់មានក្នុងកំណត់ត្រាសម្រាប់ខែកុម្ភៈ ដោយសារបម្រែបម្រួលអាកាសធាតុដែលជំរុញដោយឥន្ធនៈហ្វូស៊ីល និងការឡើងកម្ដៅនៅមហាសមុទ្រប៉ាស៊ីហ្វិកខាងកើត ដែលត្រូវបានគេស្គាល់ថាជាគំរូអាកាសធាតុ អ៊ែលនីញ៉ូ (El Nino)។ប្រសិនបើទិន្នន័យត្រូវបានបញ្ជាក់ នោះនឹងក្លាយជាការបំបែកកំណត់ត្រាសីតុណ្ហភាពក្ដៅបំផុតប្រចាំខែទីប្រាំបួនជាប់ៗគ្នា នេះបើយោងតាមទិន្នន័យពីរដ្ឋបាលមហាសមុទ្រ និងបរិយាកាសជាតិអាមេរិក ឬហៅកាត់ថា NOAA ។លោកស្រី ខារីន គ្លីសុន (Karin Gleason) អ្នកវិទ្យាសាស្ត្របរិយាកាសនៅទីភ្នាក់ងារនេះនិយាយថា គំរូអាកាសធាតុ អ៊ែលនីញ៉ូ ត្រូវបានគេរំពឹងថានឹងរលាយបាត់នៅពាក់កណ្តាលឆ្នាំ២០២៤ ហើយអាចផ្លាស់ប្តូរទៅជាគំរូអាកាសធាតុ ឡានីញ៉ា (La Nina) ដែលជាភាពត្រជាក់នៅប៉ាស៊ីហ្វិកខាងកើតវិញ ហើយនោះអាចជួយជំរុញចរន្តនៃអាកាសធាតុក្តៅរហូតដល់ចុងឆ្នាំ៕

បណ្ដាញសង្គម

ព័ត៌មានថ្មីៗ

សម្តេចតេជោ ហ៊ុន សែន ជំរុញដល់មន្ត្រីខេត្តកណ្តាលខិតខំបំពេញការងារបម្រើប្រជាជនដោយស្មោះត្រង់ និងមានទំនាក់ទំនងល្អជាមួយប្រជាជន

ប្រជាជនគុយបា តវ៉ាប្រឆាំងការដាច់ចរន្តអគ្គិសនី ខណៈទណ្ឌកម្មថ្មីរបស់អាមេរិកដាក់ទៅលើកោះនេះ

រុស្ស៊ី ចោទអ៊ុយក្រែនពីការសម្លាប់ពលរដ្ឋអាស៊ែបៃហ្សង់ ក្នុងការវាយប្រហារដោយយានដ្រូនទៅលើនាវា

បង្កើនការអំពាវនាវរកជំនួយទ្វេដងសម្រាប់លីបង់ដល់ជិត៦៤០លានដុល្លារ ក្នុងពេលមានការវាយប្រហាររបស់អ៊ីស្រាអែល

អ្នកនាំពាក្យ៖កម្លាំងមហាសាមគ្គីជាតិខ្មែរបានគាំទ្ររាជរដ្ឋាភិបាលក្នុងប្រើប្រាស់យន្តការផ្សះផ្សារដោយបង្ខំជាមួយថៃដើម្បីដោះស្រាយវិវាទទាមទារដែនសមុទ្រត្រួតស៊ីគ្នា

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញចូលរួមកម្មវិធីបញ្ចុះបឋមសិលាកសាង «រតនមន្ទីរពុទ្ធមណ្ឌលវិបស្សនាឧដុង្គ» ពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា

ក្រសួងការងារ អំពាវនាវឱ្យពលករខ្មែរដែលត្រូវថៃទើបបញ្ជូនមក ទាក់ទងមក១២៩៧ ដើម្បីទទួលបានការងារ និងអត្ថប្រយោជន៍សម្បូរបែបក្នុងស្រុក និងចៀសវាងចំណាកស្រុកខុសច្បាប់

ក្រសួងការងារ៖ ប្រទេសកម្ពុជាមានឱកាសការងារជាង ៩ម៉ឺនកន្លែងកំពុងរង់ចាំបងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ

ក្រសួងការងារ៖ ខេត្តស្វាយរៀងមានឱកាសការងារជាង ៣ពាន់កន្លែងកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ ខេត្ត៤ជាប់សមុទ្រមានឱកាសការងារជិត ៧ពាន់កន្លែងកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877