BTV NEWS

ឃាតកម្មចាក់សម្លាប់មនុស្សរួចយកសពប្លុងចោលក្នុងរថយន្តនៅខណ្ឌដង្កោ កម្លាំងសមត្ថកិច្ចឃាត់ខ្លួនក្រុមឃាតកបាន០៤នាក់

ដើមខែមិថុនានេះ កម្លាំងនគរបាលរាជធានីបង្ក្រាបគ្រឿងញៀន០៥ករណី ឃាត់មនុស្ស២៤នាក់ និងដកហូតគ្រឿងញៀន៦៦គីឡូក្រាម

បង្ក្រាបជនជាតិចិន០៤នាក់ ជាក្រុមត្រៀមរៀបចំផែនការណ៍ចាប់ជំរិត តែត្រូវទប់ស្កាត់ទាន់ពេល

សមត្ថកិច្ចខេត្តស្វាយរៀងបន្តចុះបង្រ្កាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាឃាត់ខ្លួនជនសង្ស័យជនជាតិចិន វៀតណាម និងខ្មែរចំនួន ៧៣នាក់

សន្តិសុខ និង សង្គម

នាយករដ្ឋមន្ត្រីបារាំង លោកហ្កាប្រ៊ីយ៉េល អាតាល់ សន្យាបង្កើតច្បាប់តម្លៃថ្មីដើម្បីបន្សាបកំហឹងកសិករ

លោកនាយករដ្ឋមន្ត្រីបារាំងហ្គាប្រ៊ីយ៉េល អាតាល់(Gabriel Attal)បាននិយាយកាលពីថ្ងៃពុធ២១កុម្ភៈថារដ្ឋាភិបាលបារាំង នឹងត្រូវរៀបចំនៅរដូវក្ដៅនេះ អំពីច្បាប់ថ្មីផ្ដល់ការការពារកាន់តែប្រសើរដល់ប្រាក់ចំណូលនិងការពង្រឹងជំហរបស់ប្រជាកសិករក្នុងការចរចាជាមួយក្រុមអ្នកលក់រាយនិងក្រុមហ៊ុន។លោក អាតល់ បានប្រកាសពីការធ្វើបច្ចុប្បន្នភាពនូវអ្វីដែលហៅថាជាច្បាប់ អ៊ីហ្គាលីម (Egalim)នៅក្នុងសុន្ទរកថាចុងក្រោយរបស់លោក បំណងបន្ធូរបន្ថយភាពតានតឹងជាមួយប្រជាកសិករដែលពោពេញដោយកំហឹង មុនពេលព្រឹត្តិការណ៍ដាក់បង្ហាញផលិតផលកសិកម្មប្រចាំឆ្នាំសាឡន ឌឺ អ៊ី អាគ្រីខាល់ឈ័រ( Salon de l'Agriculture )ដែលនឹងចាប់ផ្ដើមនៅចុងសប្ដាហ៍នេះ។ គេក៏បានមើលឃើញផងដែរនូវក្បួនតវ៉ានៅតែបន្តរបស់ប្រជាកសិករនៅក្នុងបណ្ដាប្រទេសផ្សេងៗទៀតក្នុងប្លុកសហភាពអឺរ៉ុប រួមទាំងប្រទេស បែលហ្ស៊ិក ក្រិក និងអាល្លឺម៉ង់ ជាដើម ដែលពួកគេកំពុងផ្ទុះកំហឹងខ្លាំងជុំវិញផលប៉ះពាល់លើផលិតផលកសិកម្ម ព្រោះតែវិធានការរបស់សហភាពអឺរ៉ុប ក្នុងការទប់ស្កាត់បម្រែបម្រួលអាកាសធាតុ និងការបើកច្រកឲ្យនាំចូលមានតម្លៃថោកលើទំនិញរបស់ប្រទេសអ៊ុយក្រែន ជាអ្វីដែលប្លុកនេះនិយាយថា ជាការជួយដល់កិច្ចខិតប្រែងក្នុងសង្រ្គាមរបស់ក្រុងគីវ។ នៅក្នុងប្រទេសបារាំង ក្រុមប្រជាកសិករបានផ្អាកការតវ៉ាមួយផ្នែកធំរបស់ខ្លួនក្រោយការធ្វើសកម្មភាពប្រឆាំងជាច្រើនសប្ដាហ៍ រួមទាំងការបិទផ្លូវហាយវ៉េ ផងដែរ បន្ទាប់ពីលោកនាយករដ្ឋមន្ត្រី អាតាល់ បានសន្យាចាត់វិធានការថ្មីកាលពីថ្ងៃទី១ ខែកុម្ភៈ។ ប៉ុន្តែក្រុមប្រជាកសិករដែលនិយាយថា ពួកគេនៅតែត្រូវចំណាយខ្ពស់ក្នុងជីវិភាពប្រចាំថ្ងៃ និងការបង់ពន្ធខ្ពស់ ច្បាប់បរិស្ថានបៃតង ការប្រឈមការប្រកួតប្រជែងពុំស្មើភាពពីប្រទេសខាងក្រៅប្លុក បានកំពុងដាក់សម្ពាធលើរដ្ឋាភិបាលឲ្យបង្ហាញលទ្ធផលដំបូងនៃវិធានការគ្រាអាសន្នមុនព្រឹត្តិការណ៍បង្ហាញផលិតផលកសិកម្ម។ លោកប្រធានាធិបតីបារាំង Emmanuel Macron និងរដ្ឋាភិបាលរបស់លោកក៏បានប្រុងប្រយ័ត្នផងដែរចំពោះការគាំទ្រដែលចេះតែកើនឡើងលើក្រុមកសិករពីសំណាក់ក្រុមស្ដាំនិយមជ្រុល មុនការបោះឆ្នោតសភារបស់សហភាពអឺរ៉ុបនៅខែមិថុនាខាងមុខ៕

អ៊ីស្រាអែល បង្កើនការវាយប្រហារលើក្រុងរ៉ាហ្វា ខណៈចំនួនអ្នកស្លាប់ហ្កាហ្សា ឡើងដល់ជាង ២៩.៣០០ នាក់

អ្នកស្រុកបាននិយាយថា អ៊ីស្រាអែលបានបង្កើនការទម្លាក់គ្រាប់បែករបស់ខ្លួនទៅលើទីក្រុងរ៉ាហ្វា (Rafah) នៅភាគខាងត្បូងនៃតំបន់ហ្កាហ្សា ហើយសមាជិកជាង ១០ នាក់ក្នុងមួយគ្រួសារត្រូវបានសម្លាប់នៅក្នុងការវាយប្រហារតាមអាកាសមួយ ខណៈក្រសួងសុខាភិបាលរបស់តំបន់ហ៊ុមព័ទ្ធប៉ាឡេស្ទីននេះ បានប្រកាសកាលពីថ្ងៃពុធ (២១ កុម្ភៈ) ថាមនុស្ស ២៩.៣១៣ នាក់បានស្លាប់ និងមនុស្ស ៦៩.៣៣៣ នាក់រងរបួសនៅក្នុងសង្គ្រាមរហូតមកទល់ពេលនេះ។អ្នកស្រុកបាននិយាយថា រថក្រោះអ៊ីស្រាអែល បានវាយរុលនៅភាគខាងលិចពីក្រុងខាន់យ៉ូនីស ចូលទៅក្រុង អាល់ ម៉ាវ៉ាស៊ី (Al-Mawasi) ដែលកាលពីមុនកងទ័ពអ៊ីស្រាអែល បានប្រាប់ឱ្យប្រជាជនប៉ាឡេស្ទីន ទៅជ្រកកោននៅទីនោះព្រោះជាតំបន់សុវត្ថិភាព។កងទ័ពការពារអ៊ីស្រាអែល (IDF) បាននិយាយថា ខ្លួនបានបង្កើនប្រតិបត្តិការនៅក្នុងទីក្រុងខាន់ យូនីស (Khan Younis) ដែលជាទីក្រុងមួយនៅភាគខាងជើងក្រុងរ៉ាហ្វា ប៉ុន្តែមិនបាននិយាយអំពីការវាយប្រហាររបស់ខ្លួនលើក្រុងរ៉ាហ្វា នៅក្នុងសេចក្តីសង្ខេបប្រចាំថ្ងៃព្រឹត្តិការណ៍នៅក្នុងតំបន់ហ្កាហ្សាទេ។មនុស្សប្រហែល ១,៥ លាននាក់ត្រូវបានគេប៉ាន់ប្រមាណថាប្រមូលផ្តុំគ្នាចូលទៅក្នុងទីក្រុងរ៉ាហ្វា ដែលស្ថិតនៅចុងភាគខាងត្បូងនៃតំបន់ហ៊ុមព័ទ្ធដែលនៅជិតព្រំដែនជាមួយប្រទេសអេហ្ស៊ីប ហើយភាគច្រើននៃអ្នកទាំងនោះ បានភៀសខ្លួនចេញពីលំនៅឋានរបស់ពួកគេពីតំបន់ចុងភាគខាងជើងដើម្បីគេចពីការវាយលុករបស់យោធាអ៊ីស្រាអែល៕

មនុស្សយ៉ាងហោចណាស់២៥នាក់ ស្លាប់ ក្នុងប្រទេសវ៉េណេហ្សុយអេឡា បន្ទាប់ពីអណ្តូងរ៉ែមាសខុសច្បាប់បាក់ស្រុត

អាជ្ញាធរ បាននិយាយកាលពីថ្ងៃពុធថាមនុស្សយ៉ាងហោចណាស់២៥នាក់ បានស្លាប់ និងច្រើននាក់ រងរបួស ដោយសារបំណាក់ដី នៅអណ្តូងរ៉ែមាសខុសច្បាប់បើកចំហដោយខុសច្បាប់ នៅក្នុងប្រទេសវ៉េណេហ្សុយអេឡា ភាគខាងត្បូង។ អភិបាលរដ្ឋ លោក Angel Marcano បានប្រាប់អ្នកសារព័ត៌មានថា បំណាក់ដី បានកើតឡើងកាលពីថ្ងៃអង្គារ នៅតំបន់ជនបទមួយកន្លែងនៃទីក្រុងអង់ហ្គូស្ទូរ៉ា( Angostura) ក្នុងរដ្ឋ Bolivar ។លោកអភិបាលរដ្ឋ បាននិយាយនៅក្នុងទីក្រុង La Paragua ដែលនៅជិតទីតាំងអណ្តូងរ៉ែមាសថា មានបំណាក់ដី វាបានបាក់ស្រុត ហើយរហូតមកដល់ពេលនេះ មនុស្ស២៥នាក់ត្រូវបានបញ្ជាក់ថាស្លាប់។ ការរិយាល័យអភិបាលរដ្ឋ បានបញ្ជូនឧទ្ធម្ភាគចក្រចំនួន២គ្រឿងទៅកាន់កន្លែងកើតហេតុដើម្បីបន្តការងារជួយសង្គ្រោះ ព្រោះថាប្រជាជនក្នុងតំបន់និយាយថា កម្មករអណ្តូងរ៉ែច្រើននាក់បន្ថែមទៀត បានជាប់នៅក្នុងបំណាក់ដីល្បប់។ កម្មករណ្តូងរ៉ែរាប់ពាន់នាក់កំពុងធ្វើការនៅអណ្តូងរ៉ែនោះ ភាគច្រើនគ្មានឯកសារ ដែលកំពុងរុករករ៉ែនៅទីតាំងអណ្តូងរ៉ែនៅក្នុងតំបន់ដោយគ្មានច្បាប់រដ្ឋ។ កម្មករអណ្តូងរ៉ែ និងក្រុមសិទ្ធមនុស្សនិងបរិស្ថាន បាននិយាយកាលពីពេលមុនថា ឧបទ្ទវហេតុជាច្រើនកើតឡើង ជារឿងធម្មតានៅក្នុងតំបន់រុករករ៉ែខុសច្បាប់។

នគរបាលប្រតាយប្រតប់គ្នាជាមួយប្រជាកសិករអេស្ប៉ាញ ក្នុងការតវ៉ាប្រឆាំងគោលនយោបាយកសិកម្មរដ្ឋាភិបាល

នគរបាលបានប្រតាយប្រតប់គ្នាជាមួយក្រុមប្រជាកសិករអេស្ប៉ាញ កាលពីថ្ងៃពុធក្នុងទីក្រុង ម៉ាឌ្រីដ (Madrid) កាលពីថ្ងៃពុធទី២១កុម្ភៈ ខណៈពួកគេតវ៉ាប្រឆាំងអ្វីដែលពួកគេនិយាយថាជា ការប្រកាន់យកការបង់សេវាក្រៅផ្លូវការជ្រុលហួសហេតុ និងជំនួយរដ្ឋមិនគ្រប់គ្រាន់។ ក្រុមប្រជាកសិករកំពុងតវ៉ារយៈពេលជាច្រើនសប្ដាហ៍ទូទាំងប្រទេសជាច្រើននៅក្នុងសហភាពអឺរ៉ុប ភាគច្រើននៅក្នុងប្រទេសប៉ូឡូញ ក្រិក និងសាធារណរដ្ឋឆែក ។កសិករក្នុងប្រទេសទាំងនោះ បានអំពាវនាវឲ្យកាត់បន្ថយការិយាធិបេត្យ ឬការបង់សេវាច្រើនដំណាក់កាលដែលបានជាប់ព័ន្ធទៅនឹងគោលនយោបាយកសិកម្មរបស់សហភាពអឺរ៉ុប និងភាពធូររលង់ច្បាប់បរិស្ថានរបស់ប្លុកនេះ។ ខណៈពួកគេរង់ចាំការតម្រង់ជួរត្រាក់ទ័រដើម្បីទៅកាន់ចំណុចប្រមូលផ្ដុំនៅកណ្ដាលទីលានចតុរង្គឯករាជ្យ ក្រុមបាតុករបានបិទផ្លូវមួយចំនួន ជាមួយនគរបាលដែលកំពុងគ្រប់គ្រងចលនាតវ៉ារបស់ពួកគេ។ក្រុមប្រជាកសិករមួយចំនួន បានត្អូញត្អែរ ថាកងកម្លាំងនគរបាល កំពុងទប់ស្កាត់ក្បួនត្រាក់ទ័រ មិនឲ្យចូលទៅក្នុងទីក្រុងម៉ាឌ្រីដ ។ រដ្ឋាភិបាលបានលើកឡើងថាត្រាក់ទ័រ៥០០គ្រឿង ត្រូវបានអនុញ្ញាតិឲ្យចូល ដែលទិនន្ន័យនោះត្រូវបានផ្ដល់ដោយក្រុមអ្នករៀបចំ នៅពេលសុំការអនុញ្ញាតរៀបចំការតវ៉ា ចំណែករថយន្តចំនួន១៥០គ្រឿងបន្ថែមទៀត ត្រូវបានរារាំងមិនឲ្យចូលទៅក្នុងទីក្រុងនេះទេ ៕

អាជ្ញាធរខណ្ឌ៧មករាចុះត្រួតពិនិត្យទីតាំង ឌីអិន ស្ប៉ានិង ម៉ាស្សា ដែលសង្ស័យមានបង្កប់ ល្បែងស៉ីសងគ្រប់ប្រភេទ

ភ្នំពេញ៖ ក្រោយមានបណ្ដាញសង្គមមួយចំនួនបាន បង្ហោះជាសាធារណៈថាទីតាំង ឌីអិន ស្ប៉ានិង ម៉ាស្សា មានបង្កប់ល្បែងស៊ីសងខុសច្បាប់ប្រភេទ នៅខាងក្នុង ដូច្នេះកម្លាំងគណៈបញ្ជាការឯកភាពខណ្ឌ ៧មករាបានចុះដល់ទីតាំងនិងត្រួតពិនិត្យជាក់ស្ដែង ពុំមានដូចការចុះផ្សាយនោះឡើយ ឃើញតែបន្ទុប់ម៉ាស្សា ស្នុកឃ័រ គ្មានសម្ភារៈអ្វីពាក់ព័ន្ធល្បែងស៉ីសងនោះទេ។សូមជម្រាបជូនថា ប្រតិបត្តិការចុះត្រួតពិនិត្យ ធ្វើឡើងនៅរសៀលថ្ងៃទី២១ ខែ កុម្ភះ ឆ្នាំ ២០២៤ មានការបញ្ជាពី លោក ថេង សុថុល អភិបាលនៃគណៈអភិបាលខណ្ឌ៧មករា បានចាត់ឲ្យ លោក កេត ឧត្តម អភិបាលរង ខណ្ឌ ដឹកនាំកម្លាំងគណៈបញ្ជាការឯកភាពខណ្ឌចុះត្រួតពិនិត្យផ្ទាល់តែម្ដង នៅចំណុចទីតាំង ឌីអិន ស្ប៉ានិង ម៉ាស្សា ស្ថិតនៅតាមបណ្ដោយផ្លូវ លេខ១២២ កែងផ្លូវលេខ១៧១ សង្កាត់មិត្តភាព ខណ្ឌ៧មករា រាជធានីភ្នំពេញ តែពុំមានអ្វីពាក់ព័ន្ធបទល្មើសនិងល្បែងស៉ីសងឡើយ។នៅក្នុងការចុះត្រួតពិនិត្យនេះផងដែរអាជ្ញាធរ បានអប់រំណែនាំដល់ម្ចាស់គ្រប់គ្រងទីតាំង និងបានធ្វើការកិច្ចសន្យា ចំពោះមុខជាមួយសមត្ថកិច្ច ហាមមិនឱ្យមានបង្កប់ល្បែងស៊ីសងគ្រប់ប្រភេទនិងបទល្មើសផ្សេងៗដែលខុសច្បាប់ ការជួញដូរមនុស្ស និងសារធាតុញៀនជាដើម។ ក្នុងករណីមិនអនុវត្តតាមកិច្ចសន្យាអាជ្ញាធរនិងអនុវត្តតាមតិវិធីច្បាប់។សូមបញ្ជាក់ផងដែរកាលពី ថ្ងៃទី១៤ ខែកុម្ភៈ ឆ្នាំ ២០២៤ កន្លងមកនេះសម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ចេញបញ្ជាឲ្យអភិបាលរាជធានី-ខេត្តទាំងអស់នៅទូទាំងប្រទេស ត្រួតពិនិត្យជាបន្ទាន់លើទីតាំងល្បែងផ្សងសំណាង និងល្បែងស៉ីសងខុសច្បាប់គ្រប់ប្រភេទ ត្រូវតែបង្ក្រាប៕ អត្ថបទ៖ កុម្ភៈ

ព្យុះព្រិល និងការធ្លាក់ព្រិលខ្លាំង បានរំខានដល់ការដឹកជញ្ជូននៅតំបន់មួយចំនួនក្នុងប្រទេសចិន

ការធ្លាក់ព្រិល ព្យុះព្រិល និងភ្លៀងធ្លាក់ទឹកកកនៅក្នុងខេត្តហឺប៉ី (Hebei) ខេត្តហឺណាន (Henan) និងខេត្តសានស៊ី (Shanxi) រួមទាំងរដ្ឋធានីប៉េកាំង របស់ប្រទេសចិន បាននាំឱ្យមានការរំខានដល់ការដឹកជញ្ជូនយ៉ាងទូលំទូលាយ នេះបើយោងតាមវីដេអូដែលចាក់ផ្សាយដោយទូរទស្សន៍រដ្ឋ CCTV បានបង្ហាញនៅថ្ងៃពុធ (២១ កុម្ភៈ) នេះ។ផ្លូវហាយវេក្នុងទីក្រុងជាច្រើនក្នុងខេត្តហឺប៉ី ត្រូវបានបិទដោយសារតែព្រិលធ្លាក់ខ្លាំង ខណៈដែលសេវារថយន្តក្រុងត្រូវបានផ្អាកជាបណ្តោះអាសន្ននៅក្នុងខេត្ត សានស៊ី។ ទីក្រុងប៉េកាំង ត្រូវបានគ្របដណ្ដប់ដោយព្រិលយ៉ាងក្រាស់ ដែលបានធ្លាក់ពេញមួយយប់ ដោយរំខានដល់ការធ្វើដំណើរ។នៅទីក្រុង ជឹងចូវ (Zhengzhou) រដ្ឋធានីនៃខេត្តហឺណាន រថភ្លើងជាងមួយរយគ្រឿងត្រូវបានពន្យារពេលកាលពីថ្ងៃអង្គារ (២០ កុម្ភៈ) ដោយអ្នកដំណើររាប់ពាន់នាក់បានជាប់គាំង និងទុកឱ្យរង់ចាំយ៉ាងខកចិត្តនៅស្ថានីយ៍រថភ្លើង។ ផ្នែកជាច្រើននៃប្រទេសចិន កំពុងទប់ទល់នឹងការធ្លាក់ព្រិលដ៏ជ្រៅមួយទៀត ខណៈដែលមនុស្សរាប់លាននាក់ត្រឡប់ពីការប្រារព្ធពិធីបុណ្យចូលឆ្នាំចិនរយៈពេលមួយសប្តាហ៍នៃថ្ងៃឈប់សម្រាកដ៏ធំបំផុតប្រចាំឆ្នាំ៕

ចំនួនអ្នកស្លាប់ជនជាតិប៉ាឡេស្ទីន នៅតំបន់សង្រ្គាមហ្កាហ្សា ឡើងលើសពី ២៩.១០០នាក់

ចំនួនអ្នកស្លាប់របស់ប៉ាឡេស្ទីន ពីការវាយប្រហាររបស់អ៊ីស្រាអែល ដែលកំពុងបន្តលើតំបន់ហ្កាហ្សាស្ទ្រីប បានកើនឡើងដល់ ២៩.១៩៥ នាក់ ជាមួយនឹងមនុស្សចំនួន ៦៩.១៧០ នាក់បានរងរបួសចាប់តាំងពីជម្លោះអ៊ីស្រាអែល និងក្រុមហាម៉ាស បានផ្ទុះឡើងកាលពីថ្ងៃទី០៧ ខែតុលា ឆ្នាំមុនមក នេះបើយោងតាមទិន្នន័យដែលចេញផ្សាយដោយនាយកដ្ឋានសុខាភិបាលនៅតំបន់ហ្កាហ្សា កាលពីថ្ងៃអង្គារ (២០ កុម្ភៈ)។អាជ្ញាធរសុខាភិបាលក្នុងតំបន់បាននិយាយថា ក្នុងរយៈពេល ២៤ ម៉ោងចុងក្រោយនេះ ប្រតិបត្តិការយោធារបស់អ៊ីស្រាអែល បានសម្លាប់មនុស្ស ១០៣ នាក់ និងមនុស្ស ១៤២ នាក់ទៀតរងរបួសនៅតំបន់ហ្កាហ្សាស្ទ្រីប។ យោងតាមរបាយការណ៍របស់ទូរទស្សន៍ប៉ាឡេស្ទីន កាលពីថ្ងៃអង្គារ បានឲ្យដឹងថា កងទ័ពអ៊ីស្រាអែល បានទម្លាក់គ្រាប់បែកយ៉ាងខ្លាំងទៅលើតំបន់ជាច្រើននៅភាគកណ្តាល និងភាគខាងត្បូងតំបន់ហ្កាហ្សា នៅថ្ងៃនោះដោយបានសម្លាប់មនុស្សយ៉ាងហោចណាស់ ៥១ នាក់។កងទ័ពអ៊ីស្រាអែល កាលពីថ្ងៃអង្គារ បានធ្វើការវាយប្រហារតាមអាកាសទៅលើលំនៅដ្ឋានជាច្រើននៅភាគកណ្តាលហ្កាហ្សាស្ទ្រីប ដោយបានសម្លាប់មនុស្សរាប់សិបនាក់ និងជាច្រើននាក់ទៀតរងរបួស នេះបើយោងតាមរបាយការណ៍ប្រព័ន្ធផ្សព្វផ្សាយក្នុងស្រុក។កងពលតូច អាល់កាសាម (Al-Qassam) ដែលជាអង្គការយោធាមានទំនាក់ទំនងជាមួយក្រុមហាម៉ាស បានប្រកាសកាលពីថ្ងៃអង្គារថា សមាជិករបស់ខ្លួនបន្តប្រយុទ្ធយ៉ាងខ្លាំងក្លាជាមួយកងទ័ពអ៊ីស្រាអែល នៅក្នុងតំបន់ជាច្រើននៃតំបន់ហ្កាហ្សាស្ទ្រីប ជាពិសេសនៅក្នុង និងជុំវិញទីក្រុងហ្កាហ្សា ភាគខាងជើង៕

កងទ័ពរុស្ស៊ី នឹងវាយរុញបន្ថែមទៀតចូលក្នុងអ៊ុយក្រែន បន្ទាប់ពីការដួលរលំដ៏វឹកវររបស់ក្រុង Avdiivka

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃអង្គារ (២០ កុម្ភៈ) ថាកងទ័ពរុស្ស៊ី នឹងវាយរុញបន្ថែមទៀតចូលទៅក្នុងទឹកដីអ៊ុយក្រែន ដើម្បីកសាងភាពជោគជ័យរបស់ពួកគេនៅលើសមរភូមិ បន្ទាប់ពីការដួលរលំនៃទីក្រុង អាវឌីអ៊ីវកា (Avdiivka) ជាទីដែលលោកបាននិយាយថា កងទ័ពអ៊ុយក្រែនត្រូវបានបង្ខំឱ្យភៀសខ្លួនក្នុងភាពវឹកវរ។ទីក្រុងដែលធ្លាប់មានប្រជាជនរស់នៅចំនួន ៣២.០០០ នាក់នេះ បានធ្លាក់ក្រោមការគ្រប់គ្រងរបស់ប្រទេសរុស្ស៊ី កាលពីថ្ងៃសៅរ៍ ដែលជាជ័យជម្នះលើសមរភូមិដ៏ធំបំផុតរបស់លោក ពូទីន ចាប់តាំងពីកងកម្លាំងរុស្ស៊ី បានដណ្តើមយកទីក្រុង បាកមុត (Bakhmut) ក្នុងខែឧសភា ឆ្នាំ២០២៣ មក។លោក ពូទីន បាននិយាយកាលពីថ្ងៃអង្គារថា បញ្ជារបស់អ៊ុយក្រែនឱ្យដកទ័ពចេញពីទីប្រជុំជននេះត្រូវបានប្រកាស បន្ទាប់ពីទាហានអ៊ុយក្រែនបានចាប់ផ្តើមរត់ភៀសខ្លួននៅក្នុងភាពវឹកវររួចហើយ។ លោកបានបន្ថែមថា ទាហានអ៊ុយក្រែនទាំងអស់ដែលត្រូវបានចាប់ខ្លួន គួរតែត្រូវបានគោរពតាមសិទ្ធិរបស់ពួកគេក្រោមអនុសញ្ញាអន្តរជាតិស្តីពីឈ្លើយសឹកសង្រ្គាម៕

ប៉ាឡេស្ទីន១២នាក់ បានស្លាប់ក្នុងការវាយប្រហាររបស់អ៊ីស្រាអែលលើតំបន់លំនៅដ្ឋាន នៅហ្កាហ្សាភាគកណ្តាល

ជនជាតិប៉ាឡេស្ទីនយ៉ាងហោចណាស់ ១២នាក់ ត្រូវបានសម្លាប់កាលពីថ្ងៃអង្គារក្នុងអំឡុងពេលការវាយប្រហាររបស់អ៊ីស្រាអែលលើតំបន់លំនៅឋាន ក្នុងជំរំជនភៀសខ្លួននូសេរ៉ាត់ (Nuseirat) នៅតំបន់ហ្កាហ្សាស្ទ្រីបភាគកណ្តាល នេះបើយោងតាមប្រភពវេជ្ជសាស្រ្តប៉ាឡេស្ទីន។ប្រភពវេជ្ជសាស្រ្ត បានប្រាប់សារព័ត៌មានស៊ីនហួថា៖«ក្រុមអ្នកការពារស៊ីវិលប៉ាឡេស្ទីន បានដឹកជញ្ជូនសាកសពជនជាតិប៉ាឡេស្ទីនចំនួន ១២នាក់ និងរាប់សិបនាក់ រងរបួស បន្ទាប់ពីបានកំណត់គោលដៅផ្ទះជាច្រើននៅក្នុងជំរំនូសេរ៉ាត់ ដែលសម្បូរទៅដោយជនភៀសខ្លួន។ប្រភពដដែល បានបន្តថា៖«សាកសពជនរងគ្រោះ បានមកដល់មន្ទីរពេទ្យមួយនៅក្នុងតំបន់ ចំណែកអ្នករងរបួស ត្រូវបានបញ្ជូនទៅមន្ទីរពេទ្យ ដើម្បីទទួលការព្យាបាល ចំពេលមានទុក្ខធំដោយសារអស់ថ្នាំ ហើយចំនួនបុគ្គលិកពេទ្យ មានកំណត់ក្នុងមន្ទីរពេទ្យ»។ប្រភពបាននិយាយទៀតថា ពួកគេកំពុងប្រឈមមុខនឹង «ការលំបាកយ៉ាងខ្លាំង» ក្នុងការដោះស្រាយជាមួយនឹងជនរងគ្រោះមួយចំនួនធំ ដែលមកដល់មន្ទីរពេទ្យ។នៅព្រឹកថ្ងៃដដែល ក្រសួងសុខាភិបាលដែលមានមូលដ្ឋាននៅតំបន់ហ្កាហ្សា បានប្រកាសថា ចំនួនអ្នកស្លាប់របស់ប៉ាឡេស្ទីន ដោយសារការវាយប្រហាររបស់អ៊ីស្រាអែល នៅលើតំបន់ហ្កាហ្សាស្ទ្រីប បានកើនឡើងដល់ ២៩.១៩៥ ចាប់តាំងពីការផ្ទុះឡើងនៃជម្លោះហាម៉ាស-អ៊ីស្រាអែល។

កូរ៉េខាងត្បូងព្រមានពីគ្រោះថ្នាក់ដល់អ្នកជំងឺ ខណៈក្រុមវេជ្ជបណ្ឌិតជិត៨ពាន់នាក់ តវ៉ាដោយដើរចេញពីការងារ

ក្រុមអាជ្ញាធរសុខាភិបាលបាននិយាយថា ក្រុមវេជ្ជបណ្ឌិតចុះកម្មសិក្សា ជិត៨ពាន់នាក់ នៅតាមមន្ទីរពេទ្យធំៗ របស់ប្រទេសកូរ៉េខាងត្បូង បានចូលរួមការដើរចេញពីការងារនៅថ្ងៃពុធទី២១ខែកុម្ភៈនេះ ដើម្បីតវ៉ាប្រឆាំងនឹងផែនការទទួលយកនិស្សិតពេទ្យបន្ថែមទៀតចូលសិក្សានៅសាលាពេទ្យដែលជំរុញឱ្យមានការពន្យារពេល និងការលុបចោលការព្យាបាលអ្នកជំងឺ ដូចជាការវះកាត់ជាដើម ។ រដ្ឋាភិបាលចង់បង្កើនចំនួននិស្សិតចូលរៀននៅសាលាពេទ្យឲ្យបានត្រឹម២ពាន់នាក់ ពីឆ្នាំសិក្សា ២០២៥ ធៀបនឹងតួលេខប្រចាំឆ្នាំបច្ចុប្បន្នមានប្រហែល៣ពាន់នាក់ ហើយចំនួនចុងក្រោយ នឹងបង្កើនឲ្យដល់កម្រិត ១ម៉ឺននាក់បន្ថែមទៀតនៅត្រឹមឆ្នាំ ២០៣៥។ ក្រសួងសុខាភិបាលបាននិយាយថា នៅក្នុងការតវ៉ានោះ ក្រុមវេជ្ជបណ្ឌិត ចំនួន ៧.៨១៣ នាក់ ជាងពាក់កណ្តាលនៃក្រុមវេជ្ជបណ្ឌិតចុះកម្មសិក្សាទាំងអស់នៅតែបន្តការងារ និងគ្រូពេទ្យស្ម័គ្រនៅមន្ទីរពេទ្យធំ ៗ បានដើរចេញពីការងាររបស់ពួកគេបន្ទាប់ពីបានដាក់ពាក្យលាលែងពីការងារ។ ក្រុមវេជ្ជបណ្ឌិត និងក្រុមនិស្សិតពេទ្យនិយាយថា មានគ្រូពេទ្យគ្រប់គ្រាន់ចំនួនរួចហើយ ប៉ុន្តែបញ្ហាធំជាងនេះ គឺគ្រូពេទ្យកាន់តែតិច ជ្រើសរើសធ្វើការក្នុងវិស័យសំខាន់ៗដូចជា ពេទ្យកុមារ និងពេទ្យសង្គ្រោះបន្ទាន់ ដោយសារបរិយាកាសការងារមិនសូវល្អ ប្រាក់ខែទាប និងធ្វើការច្រើនម៉ោង៕

បណ្ដាញសង្គម

ព័ត៌មានថ្មីៗ

ក្រុមអ្នកសង្កេតការណ៍អាស៊ាន បន្តចុះសង្កេតការណ៍ស្ថានភាពព្រំដែននៅតំបន់អូរភ្លុកដំរី ស្ថិតក្នុងឃុំថ្មដា ស្រុកវាលវែង ខេត្តពោធិ៍សាត់ ទីតាំងរងការវាយប្រហារ និងកំពុងកាន់កាប់ដោយខុសច្បាប់ដោយយោធាថៃ

ឯកអគ្គរដ្ឋទូត៖ ប៉ាគីស្ថាននៅតែរក្សាទំនាក់ទំនងជាមួយរុស្ស៊ីជុំវិញបញ្ហាអ៊ីរ៉ង់

CENTCOM៖ សហរដ្ឋអាមេរិកបានបាញ់ទម្លាក់មីស៊ីលអ៊ីរ៉ង់ដែលបាញ់ឆ្ពោះទៅប្រទេសកូវ៉ែត និងបារ៉ែន

ឱកាសការងារជាង ៩ពាន់កន្លែង អត្ថប្រយោជន៍ ប.ស.ស. និងកម្មវិធី TVET ត្រូវបានផ្សព្វផ្សាយដល់មូលដ្ឋានក្នុងខេត្តបាត់ដំបង ក្នុងស្មារតី «ខ្មែរជួយរកការងារ និងផ្ដល់ការងារឱ្យខ្មែរ»

លោក PUTIN៖ រុស្ស៊ីនឹងបន្តសាងសង់រោងចក្រនុយក្លេអ៊ែរនៅក្នុងប្រទេសអ៊ីរ៉ង់ នៅពេលស្ថានការណ៍ស្ងប់ស្ងាត់

សារព័ត៌មាន Politico ៖ ប្រទេសណាតូកំពុងពិភាក្សាអំពីកញ្ចប់ជំនួយហិរញ្ញវត្ថុចំនួន ៧០ ពាន់លានអឺរ៉ូសម្រាប់អ៊ុយក្រែន

អៀរឡង់ដាក់បម្រាមធ្វើដំណើរលើរដ្ឋមន្ត្រីអ៊ីស្រាអែលពីររូបមិនឲ្យចូលប្រទេសនេះ

ទីប្រឹក្សាមេដឹកនាំកំពូលអ៊ីរ៉ង់អំពាវនាវឲ្យលោក TRUMP បញ្ឈប់ការបិទច្រកសមុទ្រហ័រមូស និងដោះលែងទ្រព្យសកម្មរបស់ក្រុងតអេរ៉ង់

ប្រព័ន្ធផ្សព្វផ្សាយ៖ អ៊ីរ៉ង់ច្រានចោលការអះអាងដែលថា ខ្លួនយល់ព្រមប្រគល់សារធាតុអ៊ុយរ៉ានីញ៉ូមឲ្យទៅប្រទេសទី៣

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877