BTV NEWS

កម្លាំងនគរបាលស្រុកស្វាយជ្រំយកចិត្តទុកដាក់ទប់ស្កាត់និងបង្ក្រាប ធ្វើឱ្យបទល្មើសថយចុះស្ទើរទាំងស្រុង

នគរបាលចាប់ខ្លួនជនសង្ស័យ៨នាក់ ពាក់ព័ន្ធករណីគ្រឿងញៀន និងទីតាំងបង្កបល្បែងស៊ីសង នៅខណ្ឌឫស្សីកែវ

នគរបាលនៅអាកាសយានដ្ឋានអន្តរជាតិភ្នំពេញ ឃាត់ខ្លួនជនបរទេសម្នាក់ ពាក់ព័ន្ធករណីដឹកជញ្ជូនកញ្ឆាក្រៀមឆ្លងដែនជិត ២០គីឡូក្រាម

ក្រុមក្មេងទំនើងជាង៤០នាក់ ត្រូវសមត្ថកិច្ចបញ្ជូនទៅពន្ធនាគារ អ្នកនាំពាក្យព្រមានថា "បើមិនកែ គឺគុក!"

សន្តិសុខ និង សង្គម

បង់ក្លាដែស បិទសាកលវិទ្យាល័យ និងសាលារៀន ខណៈមានការប៉ះទង្គិចកក្រើកប្រទេស

អ្នកស្លាប់ក្នុងការតវ៉ាបានកើនឡើងដល់៦នាក់ រួមទាំងនិស្សិត ៣ នាក់ និងមនុស្សរាប់រយនាក់ផ្សេងទៀតបានរងរបួសគិតត្រឹមថ្ងៃព្រហស្បតិ៍នេះ ខណៈក្រុមបាតុករទាមទារកំណែទម្រង់ប្រព័ន្ធកូតាការងាររបស់រដ្ឋាភិបាល បានប៉ះទង្គិចជាមួយនគរបាលយ៉ាងកក្រើកនៅក្នុងទីក្រុងធំៗទូទាំងប្រទេសបង់ក្លាដែស ដោយបង្ខំឱ្យបិទសាលារៀន អនុវិទ្យាល័យ និងសាកលវិទ្យាល័យ ។នគរបាល និងសារព័ត៌មានធំៗ បានរាយការណ៍ពីការស្លាប់ថ្មីចំនួន ២នាក់នៅក្នុងរដ្ឋធានី ដាកា (Dhaka) និងទីក្រុងកំពង់ផែ ចាតូក្រាម(Chattogram) ភាគឦសាន ខណៈប៉ុន្មានថ្ងៃមុននេះ មានអ្នកស្លាប់ ៤ នាក់ត្រូវបានរាយការណ៍ពីទីក្រុងចាតូក្រាម និងភាគពាយព្យទីក្រុងរាំងពួរ (Rangpur)។យោងតាមរបាយការណ៍នានា យ៉ាងហោចណាស់អ្នកស្លាប់បីនាក់គឺជានិស្សិត ស្របពេលអំពើហិង្សាបណ្ដាលឱ្យមនុស្សប្រហែល ៤០០នាក់ ផ្សេងទៀតបានរងរបួសកាលពីថ្ងៃអង្គារសប្ដាហ៍នេះ ខណៈ ការតវ៉ាទាមទារឱ្យមានកំណែទម្រង់ប្រព័ន្ធកូតាការងាររាលដាលពាសពេញទីក្រុងធំៗនៃប្រទេសបង់ក្លាដែស មួយថ្ងៃបន្ទាប់ពីការតវ៉ាស្ងៀមស្ងាត់ បានក្លាយជាអំពើហិង្សា ក្រោយបាតុកម្មតាមដងផ្លូវមួយសប្តាហ៍។ បច្ចុប្បន្ននេះ ក្រុមអាជ្ញាធរបានហៅកងកម្លាំងឆ្មាំព្រំដែនបង់ក្លាដែស (BGB) ចូលទៅក្នុងទីក្រុងធំៗចំនួនបួន បន្ទាប់ពីនគរបាលរាប់រយនាក់ប្រដាប់ដោយឧបករណ៍កុបកម្ម បានបង្ក្រាបការតវ៉ាទាំងយប់អាធ្រាត្រ ដែលបានផ្ទុះឡើងនៅក្នុងបរិវេណសាកលវិទ្យាល័យរដ្ឋទូទាំងប្រទេស។អ្នកនាំពាក្យក្រសួងអប់រំបាននិយាយថា ទន្ទឹមនឹងនេះដែរ រដ្ឋាភិបាលបានបញ្ជាឱ្យបិទសាលារៀន សាកលវិទ្យាល័យ និងអនុវិទ្យាល័យ រហូតមានបញ្ជាបន្ថែមទៀត ស្របពេលមានអំពើហិង្សាកើនឡើង៕

ចំនួនអ្នកស្លាប់កើនឡើងដល់២៦នាក់ ដោយគ្រោះថ្នាក់រថយន្តក្រុងនៅភាគខាងត្បូងប្រទេសប៉េរូ

ប្រព័ន្ធផ្សព្វផ្សាយក្នុងស្រុកបានរាយការណ៍ថា ចំនួនអ្នកស្លាប់ដោយសារគ្រោះថ្នាក់ចរាចរណ៍រថយន្តក្រុងអន្តរខេត្ត កាលពីថ្ងៃអង្គារ នៅលើផ្លូវហាយវ៉េ ក្នុងតំបន់ Ayacucho ភាគនិរតីប្រទេសប៉េរូ បានកើនឡើងដល់២៦នាក់។ យោងតាមបណ្តាញទូរទស្សន៍ឯកជន បានរាយការណ៍ថា អ្នកស្លាប់ចំនួន២៦ នាក់ ត្រូវបានរាយការណ៍រហូតមកដល់ពេលនេះ។ នៅពេលដំបូង នគរបាល បានរាយការណ៍ថា មនុស្ស២១នាក់បានស្លាប់ និង ១៥នាក់ផ្សេងទៀតរងរបួស ត្រូវបានគេបញ្ជូនទៅកាន់មន្ទីរពេទ្យក្នុងតំបន់។រថយន្តដែលជាកម្មសិទ្ធិរបស់ក្រុមហ៊ុន «Empresa Turismo Molina Union SAC» បានរេចង្កូតចេញពីផ្លូវ ហើយធ្លាក់ចូលទៅក្នុងជ្រោះជម្រៅប្រហែល២០០ម៉ែត្រ ក្នុងខេត្ត Cangallo តំបន់ Ayacucho ។ប្រធាននាយកដ្ឋានការពារផ្លូវថ្នល់របស់នគរបាលជាតិ បាននិយាយឱ្យដឹងថា រថយន្តក្រុងនេះ កំពុងធ្វើដំណើរលើផ្លូវ Lima-Ayacucho ដោយមានអ្នកដំណើរប្រហែល៤០នាក់នៅលើរថយន្ត។រថយន្តគិលានសង្គ្រោះចំនួន៥គ្រឿង មកពីមណ្ឌលសុខភាពតំបន់ នាយកដ្ឋានពន្លត់អគ្គីភ័យ និងអង្គភាពសេវាសុខភាពនគរបាល ត្រូវបានបញ្ជូនទៅកាន់កន្លែងកើតហេតុ។

មនុស្ស ៥នាក់បានស្លាប់ ក្នុងការតវ៉ាប្រឆាំងកូតាការងារដ៏ហិង្សានៅប្រទេសបង់ក្លាដែស

នគរបាលបាននិយាយថា យ៉ាងហោចណាស់មនុស្ស ៥ នាក់បានស្លាប់ និងជាច្រើននាក់ទៀតរងរបួសនៅទូទាំងប្រទេសបង់ក្លាដែស កាលពីថ្ងៃអង្គារ (១៦ កក្កដា) ខណៈក្រុមយុវជនគាំទ្ររដ្ឋាភិបាល និងនគរបាលដែលកំពុងបាញ់ឧស្ម័នបង្ហូរទឹកភ្នែក ប៉ះទង្គិចជាមួយនិស្សិតដែលតវ៉ាប្រឆាំងនឹងប្រព័ន្ធកូតាការងាររបស់រដ្ឋាភិបាល។និស្សិតរាប់ម៉ឺននាក់បានចូលរួមការតវ៉ាទូទាំងប្រទេសរយៈពេលពីរថ្ងៃ បន្ទាប់ពីមនុស្សជាង ១០០ នាក់បានរងរបួសកាលពីថ្ងៃចន្ទ នៅក្នុងការប្រមូលផ្តុំតវ៉ាដែលបានបិទផ្លូវហាយវេ និងផ្លូវដែកសំខាន់ៗ។ នោះគឺជាការតវ៉ាដ៏ធំលើកដំបូងប្រឆាំងនឹងរដ្ឋាភិបាលរបស់នាយករដ្ឋមន្ត្រីបង់ក្លាដែស លោកស្រី សេក ហាស៊ីណា (Sheikh Hasina) ចាប់តាំងពីលោកស្រីបានឈ្នះអាណត្តិទីបួនជាប់គ្នាក្នុងខែមករា។ក្រុមបាតុករខឹងសម្បារចំពោះកូតាការងារក្នុងវិស័យសាធារណៈ រួមទាំងកូតា ៣០ភាគរយសម្រាប់សមាជិកគ្រួសារនៃអ្នកតស៊ូដើម្បីសេរីភាពពីសង្គ្រាមឯករាជ្យឆ្នាំ១៩៧១ ស្របពេលអត្រាអត់ការងារធ្វើរបស់យុវជនឡើងខ្ពស់ខ្លាំង។នគរបាលកុបកម្មបានប្រតិបត្តិការនៅតាមបរិវេណសាកលវិទ្យាល័យនៅទូទាំងប្រទេសក្នុងកិច្ចខិតខំប្រឹងប្រែងដើម្បីលុបបំបាត់ការរំខាន។ កងកម្លាំងប៉ារ៉ាការពារព្រំដែនបង់ក្លាដែស ត្រូវបានដាក់ពង្រាយនៅទូទាំងប្រទេស ដើម្បីរឹតបន្តឹងសន្តិសុខ ខណៈដែលការប៉ះទង្គិចនៅតែបន្តកើតមានជាច្រើនកន្លែង៕

មនុស្ស ៦នាក់ត្រូវប្រទះឃើញស្លាប់ក្នុងបន្ទប់សណ្ឋាគារក្រុងបាងកក ដោយសង្ស័យថាមកពីការបំពុល

នគរបាលថៃ កំពុងស៊ើបអង្កេតការស្លាប់របស់ជនបរទេសចំនួន ៦ នាក់ដែលសាកសពត្រូវបានប្រទះឃើញនៅក្នុងបន្ទប់សណ្ឋាគារលំដាប់ខ្ពស់មួយកន្លែងក្នុងទីក្រុងបាងកក កាលពីថ្ងៃអង្គារ (១៦ កក្កដា) ដោយអាជ្ញាធរសង្ស័យថាពួកគេត្រូវបានបំពុល ខណៈនគរបាលក៏កំពុងស្វែងរកមនុស្សទី៧ ដែលជាប់ពាក់ព័ន្ធនឹងហេតុការណ៍នេះ។មន្ត្រីនគរបាលឈ្មោះ ធីទី សែងសាវ៉ាង (Thiti Saengsawang) បានប្រាប់អ្នកយកព័ត៌មានថា ជនរងគ្រោះទាំងប្រាំមួយនាក់ ដែលមានដើមកំណើតជាជនជាតិវៀតណាមហើយមានពីរនាក់កាន់លិខិតឆ្លងដែនអាមេរិកនោះ បានចូលស្នាក់នៅសណ្ឋាគារ ហ្គ្រែន ហ៊ីយ៉ាត់ អេរ៉ាវ៉ាន់ (Grand Hyatt Erawan) នៅទីក្រុងបាងកក នៅចន្លោះពេលផ្សេងគ្នា បន្ទាប់ពីទៅដល់នៅថ្ងៃសៅរ៍ និងថ្ងៃអាទិត្យ។លោកបន្តថា អ្នកទាំង៦ ដែលមានបុរសបីនាក់និងស្ត្រីបីនាក់នោះ បានចូលស្នាក់នៅបន្ទប់ផ្សេងគ្នាប៉ុន្តែសាកសពរបស់ពួកគេត្រូវបានប្រទះឃើញក្នុងបន្ទប់តែមួយ ដែលមិនមានសញ្ញានៃការតស៊ូប្រតាយប្រតប់ឡើយ។ លោក ធីទី បាននិយាយថា៖ «នេះមិនមែនជាការបំពុលខ្លួនឯងទេ ប៉ុន្តែមានអ្នកណាម្នាក់ធ្វើឱ្យស្លាប់ ហើយនគរបាលកំពុងតាមដានគ្រប់ជំហានចាប់តាំងពីពួកគេចុះពីយន្តហោះមក»។លោកបន្ថែមថា ការពិនិត្យបឋមមិនរកឃើញភ័ស្តុតាងនៃការរងរបួសទាក់ទងនឹងការវាយតប់ ឬចោរកម្មនោះទេ ប៉ុន្តែបានបង្ហាញថាអ្នកទាំង ៦នាក់នោះបានទទួលទានសារធាតុពុលម្យ៉ាង។ រដ្ឋាភិបាលបាននិយាយនៅក្នុងសេចក្តីថ្លែងការណ៍មួយថា នាយករដ្ឋមន្ត្រីថៃ លោក សេដ្ឋា ថាវីស៊ីន (Srettha Thavisin) ដែលបានចុះទៅពិនិត្យសណ្ឋាគារនោះកាលពីល្ងាចថ្ងៃអង្គារជាមួយមន្ត្រីនគរបាលជាន់ខ្ពស់ បានបញ្ជាឱ្យមានការស៊ើបអង្កេតយ៉ាងឆាប់រហ័សលើបញ្ហានេះ៕

និស្សិតជាង១០០នាក់ រងរបួសដោយសារការប៉ះទង្គិចគ្នាក្នុងការតវ៉ាកូតាការងារនៅបង់ក្លាដែស

នគរបាល និងសាក្សីបាននិយាយថា និស្សិតជាង ១០០ នាក់បានរងរបួសនៅទូទាំងប្រទេសបង់ក្លាដែស កាលពីថ្ងៃចន្ទ (១៥ កក្កដា) នៅក្នុងការប៉ះទង្គិចគ្នារវាងអ្នកតវ៉ាដើម្បីបញ្ចប់ប្រព័ន្ធកូតាសម្រាប់ការងាររបស់រដ្ឋាភិបាល ជាមួយនឹងអ្នកផ្សេងទៀតដែលស្មោះត្រង់នឹងគណបក្សកាន់អំណាច។ការតវ៉ានេះគឺជាបាតុកម្មដ៏ធំជាលើកដំបូងដែលនាយករដ្ឋមន្ត្រីបង់ក្លាដែស លោកស្រី សេក ហាស៊ីណា (Sheikh Hasina) បានប្រឈមមុខ ចាប់តាំងពីលោកស្រីបានឈ្នះអាណត្តិទី៤ ជាប់ៗគ្នាក្នុងការបោះឆ្នោតកាលពីខែមករា ដែលមានការធ្វើពហិការដោយក្រុមប្រឆាំង។នគរបាល និងសាក្សីបាននិយាយថា ក្រុមបាតុករប្រឆាំងកូតាការងាររាប់ពាន់នាក់ និងសមាជិកក្រុមនិស្សិតនៃសម្ព័ន្ធ អាវ៉ាមី (Awami) ដែលគាំទ្រលោកស្រី Hasina បានគប់ដុំថ្មដាក់គ្នា និងវាយគ្នាទៅវិញទៅមកដោយប្រើដំបង និងកំណាត់ដែកនៅសាកលវិទ្យាល័យនានាទូទាំងប្រទេស រួមទាំងរដ្ឋធានីដាកាផងដែរ។បាតុករបានអំពាវនាវឱ្យមានការតវ៉ានិងការប្រមូលផ្តុំបន្ថែមទៀតនៅទូទាំងប្រទេសដើម្បីសង្កត់ធ្ងន់លើការទាមទាររបស់ពួកគេ។ ការតវ៉ាបានចាប់ផ្ដើមកាន់តែខ្លាំងឡើងកាលពីយប់ថ្ងៃអាទិត្យ បន្ទាប់ពីលោកស្រី Hasina បានបដិសេធមិនបំពេញតាមការទាមទាររបស់និស្សិត ដោយបញ្ជាក់ថាបញ្ហានេះកំពុងស្ថិតនៅក្នុងតុលាការ៕

នាយខណ្ឌរដ្ឋបាលជលផលកណ្តាល ឃាត់ខ្លួនជនសង្ស័យម្នាក់ដែលលួចផលិតឧបករណ៍នេសាទខុសច្បាប់

ភ្នំពេញ ៖ នាយខណ្ឌរដ្ឋបាលជលផលខេត្តកណ្តាល នៅព្រឹកថ្ងៃទី១៥ ខែកក្កដា ឆ្នាំ២០២៤នេះ បានសហការគ្នា ជាមួយអាជ្ញាធរមូលដ្ឋាន និងព្រះរាជអាជ្ញារងខេត្តកណ្តាល ចុះត្រួតពិនិត្យ និងឆែកឆេរទីតាំងលួចផលិតឧបករណ៍នេសាទខុសច្បាប់(អំភ្លីឆក់ត្រី)មួយកន្លែងស្ថិតនៅភូមទ្រាំងលើ ឃុំតាឯក ស្រុកខ្សាច់កណ្តាល ខេត្តកណ្តាល ដោយធ្វើការឃាត់ខ្លួនជនសង្ស័យម្នាក់ និងឧបករណ៍នេសាទខុសច្បាប់មួយចំនួន។ ថ្លែងប្រាប់ទូរទស្សន៍BTV ក្រោយចុះប្រតិបត្តិការនោះ នាយខណ្ឌរដ្ឋបាលជលផលកណ្តាល លោក ហេង សុភារិទ្ធ បានបញ្ជាក់ថា ប្រតិបត្តិការរហូតឈានដល់ឃាត់ខ្លួនជនសង្ស័យម្នាក់ដែលជាអ្នកផលិត និង ចែកចាយនូវឧបករណ៍នេសាទខុសច្បាប់នេះ គឺបានធ្វើឡើងបន្ទាប់ពីមានបទបញ្ជារបស់អភិបាលនៃ គណៈអភិបាលខេត្តកណ្តាល ឯកឧត្តម គួច ចំរើន ក្រោយពីជនសង្ស័យបានបង្ហោះលើបណ្តាញសង្គម តិកតុកដាក់លក់ នូវឧបករណ៍ខុសច្បាប់ទាំងនេះជាសាធារណៈ ខណៈករណីនេះជនសង្ស័យបានសារ ភាពថាគេពិតជាបានលួចផលិតមែន និងបានចែកចាយលក់នៅតាមបណ្តាខេត្តមួយចំនួនផងដែរ។បើតាមលោក ហេង សុភារិទ្ធ បានឲ្យដឹងផងដែរ ក្រោយធ្វើការឃាត់ខ្លួន និងរឹបអូសនូវវត្ថុតាងជន សង្ស័យត្រូវបានរៀបចំសំណុំរឿងបញ្ជូនទៅកាន់តុលាការចាត់ការទៅតាមនីតិវិធីច្បាប់ផងដែរខណៈករណីនេះជាបទល្មើសនេសាទ ដោយមិនអាចអនុគ្រោះបានឡើយ ដោយសារតែជនសង្ស័យរូបនេះបានលួចផលិតនូវឧករណ៍ខ្បាស់នេះយូរមកហើយនោះ។ ជាមួយគ្នានោះដែរ លោក ហេង សុភារិទ្ធ ក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ គប្បីត្រូវធ្វើការសហការជាមួយអាជ្ញាធរ ឬរដ្ឋបាលជលផលដើម្បីធ្វើយ៉ាងណាលុបបំបាត់បទល្មើសនេសាទ ខុសច្បាប់នៅតាមភូមិ និងសហគមន៍របស់បងប្អូនផងដែរ ហើយប្រសិនបើប្រពលរដ្ឋណាដែលបាននេ សាទ ឬលួចផលិតឧបករណ៍នេសាទខុសច្បាប់នឹងចាត់វិធានការភ្លាមៗដោយគ្មានការលើកលែងនោះឡើយ៕អត្ថបទ ៖ បាន ចក់

មនុស្ស ៥៥ នាក់បន្តបាត់ខ្លួន ក្នុងបំណាក់ដីនៅនេប៉ាល់ ខណៈអាជ្ញាធរថា គ្មានសង្ឃឹមរកឃើញអ្នកនៅរស់

អាជ្ញាធរបាននិយាយនៅថ្ងៃចន្ទ (១៥ កក្កដា) នេះថា ក្រុមសង្រ្គោះនៅក្នុងប្រទេសនេប៉ាល់ បានច្រានចោលឱកាសនៃការរកឃើញអ្នកនៅរស់រានមានជីវិតនៅក្នុងបំណាក់ដីកាលពីសប្តាហ៍មុន ដែលបានធ្លាក់លើរថយន្តក្រុងដឹកអ្នកដំណើរចំនួន ៦៥ នាក់ចូលទៅក្នុងទន្លេដែលជោរជន់ដោយសារភ្លៀងធ្លាក់ខ្លាំង។បុគ្គលិកសន្តិសុខរាប់រយនាក់បានបន្តប្រតិបត្តិការរុករកនៅព្រឹកថ្ងៃចន្ទ នេះដើម្បីកំណត់ទីតាំងរថយន្តក្រុង និងអ្នកដំណើរ ៥៥ នាក់ដែលនៅបាត់ខ្លួនក្នុងរយៈពេល ៧២ ម៉ោងបន្ទាប់ពីឧបទ្ទវហេតុកើតឡើង។ ក្រុមសង្រ្គោះដែលកំពុងរុករកនៅទីតាំងគ្រោះថ្នាក់កាលពីថ្ងៃសុក្រ សប្ដាហ៍មុន នៅក្នុងស្រុក ជីតវ៉ាន (Chitwan) ចម្ងាយប្រហែល ៨៦ គីឡូម៉ែត្រ ភាគខាងលិចនៃរដ្ឋធានី កដ្ឋមណ្ឌូ (Kathmandu) រហូតមកដល់ពេលនេះបានរកឃើញសាកសពមនុស្សចំនួន ៧ នាក់ ក្នុងនោះមានពីរនាក់បានរកឃើញនៅថ្ងៃចន្ទនេះ។លោក បេស រ៉ាច រីចាល់ (Bhesh Raj Rijal) មន្ត្រីនគរបាលជាន់ខ្ពស់នៅស្រុក Chitwan បាននិយាយថា «គ្មានឱកាសក្នុងការរកឃើញអ្នកនៅរស់រានមានជីវិតទេ ហើយការផ្តោតរបស់យើងគឺទៅលើការស្រង់សាកសព»។ មន្ត្រីម្នាក់បាននិយាយថា សមាជិកគ្រួសារដែលបានប្រមូលផ្តុំគ្នានៅទីតាំងស្វែងរកបានបោះបង់ក្តីសង្ឃឹមក្នុងការឃើញសាច់ញាតិដែលនៅរស់។បំណាក់ដី និងទឹកជំនន់ដែលបង្កឡើងដោយភ្លៀងធ្លាក់រដូវខ្យល់មូសុងបានសម្លាប់មនុស្សជាង ១០០ នាក់នៅនេប៉ាល់ ចាប់តាំងពីពាក់កណ្តាលខែមិថុនាមក។ ក្រោយបំណាក់ដី រដ្ឋាភិបាលបានប្រកាសពីគម្រោងហាមប្រាមរថយន្តក្រុងមិនឱ្យធ្វើដំណើរពេលយប់នៅកន្លែងដែលមានការព្យាករអាកាសធាតុមិនល្អ៕

រថយន្តកែច្នៃបំពង់ស៊ីម៉ាំង ២គ្រឿង ត្រូវកម្លាំងអាវុធហត្ថរាជធានីភ្នំពេញ ឃាត់ម្ចាស់មកអប់រំ និងណែនាំឲ្យដោះចេញ

កម្លាំងកងរាជអាវុធហត្ថរាជធានីភ្នំពេញ បានធ្វើការឃាត់ម្ចាស់រថយន្តចំនួន ២គ្រឿង ដែលបានកែច្នៃបំពង់ស៊ីម៉ាំង បង្កឲ្យមានសម្លេងរំខានដល់ប្រជាពលរដ្ឋ និងបង្កឲ្យបាត់បង់សណ្ដាប់ធ្នាប់សាធារណៈយកមកអប់រំ និងណែនាំឲ្យដោះស៊ីម៉ាំងចេញ ។ រថយន្តទាំង២គ្រឿង ទី១ រថយន្ត ម៉ាក MASDA ពណ៌ស ពាក់ស្លាកលេខ ភ្នំពេញ 2AF-1979 ត្រូវបានកម្លាំងមូលដ្ឋានអាវុធហត្ថខណ្ឌទួលគោក ធ្វើការឃាត់នៅចំណុចផ្លូវ៥៩២ សង្កាត់បឹងកក់២ ខណ្ឌទួលគោក រាជធានីភ្នំពេញ។ ទី២ រថយន្ត ម៉ាក MASDA ពណ៌ស ពាក់ស្លាកលេខ ភ្នំពេញ 2BH-3559 ត្រូវបានកម្លាំងមូលដ្ឋានអាវុធហត្ថខណ្ឌដូនពេញ ធ្វើការឃាត់ នៅចំណុចផ្លូវព្រះមុន្នីវង្សកែងនឹងផ្លូវ៩២ សង្កាត់វត្តភ្នំ ខណ្ឌដូនពេញ រាជធានីភ្នំពេញ។បន្ទាប់ពីបានអប់រំរួច កម្លាំងជំនាញអាវុធហត្ថរាជធានីភ្នំពេញ បានណែនាំម្ចាស់រថយន្តទាំង ២គ្រឿង ឲ្យដោះបំពង់ស៊ីម៊ាំងកែច្នៃចេញ ហើយបំពាក់បំពង់ស៊ីម៉ាំងធម្មតាវិញ និងធ្វើកិច្ចសន្យាបញ្ឈប់ការកែច្នៃបំពង់ស៊ីម៉ាំងរថយន្តខុសលក្ខណៈបច្ចេកទេស ដែលនាំបង្កការរំខានដល់សាធារណជនតទៅទៀត ។ជាមួយគ្នានេះអាវុធហត្ថរាជធានីភ្នំពេញ បានការសំណូមពរ ប្រជាពលរដ្ឋ ជាពិសេស អ្នកបើកបរ សូមកុំបើកបរយានយន្តការកែច្នៃបំពង់ស៊ីម៉ាំងខុសលក្ខណៈបច្ចេកទេសខុសច្បាប់ ដែលនាំឲ្យបាត់បង់សណ្តាប់ធ្នាប់ របៀបរាបរយសាធារណៈ ក៏ដូចជាមានសំឡេងខ្លាំងៗរំខានដល់ការរស់នៅរបស់ប្រជាពលរដ្ឋ៕ តារាវុទ្ធី

មនុស្ស ៩.០០០នាក់ ត្រូវបានជម្លៀសនៅភាគឦសានប្រទេសកាណាដា ដោយសារចំហេះព្រៃ

ក្រុមមន្ត្រីបាននិយាយកាលពីថ្ងៃសៅរ៍ (១៣ កក្កដា) ថា មនុស្សប្រហែល ៩.០០០ ត្រូវបានជម្លៀសចេញនៅភាគឦសានប្រទេសកាណាដា ដោយសារតែចំហេះព្រៃដ៏ខ្លាំងក្លានៅតំបន់នោះ។ ប្រធានមន្ត្រីពន្លត់អគ្គីភ័យខេត្ត លោក ជេហ្វ ម៉ូទី (Jeff Motty) បាននិយាយថា អ្នកស្រុកនៃទីក្រុង ឡាប្រាដ័រ ស៊ីធី (Labrador City) និង វ៉ាប៊ូស (Wabush) ក្នុងខេត្ត ញូវហ្វោនលែន អែន ឡាប្រាដ័រ (Newfoundland and Labrador) ត្រូវបានបញ្ជាឱ្យចាកចេញពីលំនៅឋានរបស់ពួកគេ។លោក ម៉ូទី បាននិយាយថា «យើងកំពុងមើលឃើញចំហេះរាលដាលខ្លាំងនៅទីនោះ។ ភ្លើងកំពុងរំកិលក្នុងល្បឿនប្រហែល ៥០ ម៉ែត្រក្នុងមួយនាទី»។ រូបភាពដែលបានចែករំលែកនៅលើប្រព័ន្ធផ្សព្វផ្សាយសង្គមបានបង្ហាញពីរថយន្តជាច្រើនតម្រង់ជួរដែលកំពុងរង់ចាំចាក់ប្រេងនៅស្ថានីយ៍ប្រេងឥន្ធនៈត្រៀមជម្លៀស ខណៈដែលមេឃត្រូវបានបិទបាំងដោយពពកផ្សែងយ៉ាងធំ។អ្នកស្រុកម្នាក់នៅទីក្រុង ឡាប្រាដ័រ បានប្រាប់ទូរទស្សន៍ CBC ថា៖ «វាពិតជារន្ធត់ណាស់ដែលបានឃើញផ្សែងច្រើនបែបនេះ»។ អាជ្ញាធរសហព័ន្ធបាននិយាយកាលពីថ្ងៃសុក្រ (១២ កក្កដា) ថា អាកាសធាតុអំណោយផលបានជួយកាត់បន្ថយកម្រិតចំហេះចាប់តាំងពីដើមរដូវក្តៅមក ប៉ុន្តែប្រទេសនេះកំពុងឈានចូលដល់រដូវចំហេះខ្ពស់បំផុតរបស់ខ្លួន។ខេត្តមួយនេះបាននិយាយថា មានចំហេះសកម្មចំនួន ១១ កន្លែងនៅក្រុង ឡាប្រាដ័រ កាលពីល្ងាចថ្ងៃសុក្រ ហើយលក្ខខណ្ឌអាកាសធាតុបានបង្កើនចំហេះឱ្យកាន់តែខ្លាំងក្លា។ ទីក្រុង ឡាប្រាដ័រ ស៊ីធី ដែលមានទីតាំងនៅជិតព្រំដែនខេត្តកេប៊ិក (Quebec) មានប្រជាជនប្រហែល ៩.០០០ នាក់នៅក្នុងជំរឿនឆ្នាំ២០២១៕

បំណាក់ដីដោយសារភ្លៀងធ្លាក់ខ្លាំងនៅវៀតណាម សម្លាប់មនុស្ស ១១នាក់

ប្រព័ន្ធផ្សព្វផ្សាយរដ្ឋបានរាយការណ៍ថា បំណាក់ដីដែលបង្កឡើងដោយភ្លៀងធ្លាក់ខ្លាំងនៅតំបន់ភ្នំភាគខាងជើងប្រទេសវៀតណាម បានបាក់កប់លើរថយន្ត ១៦ កៅអីមួយគ្រឿង ដោយបានសម្លាប់មនុស្សយ៉ាងហោចណាស់ ១១ នាក់ និងមនុស្សមួយចំនួនទៀតបានបាត់ខ្លួនកាលពីថ្ងៃសៅរ៍ (១៣ កក្កដា)។ទីភ្នាក់ងារសារព័ត៌មានរដ្ឋវៀតណាមបានរាយការណ៍ថា ក្រុមជួយសង្គ្រោះរួមមានទាហាន និងប្រជាពលរដ្ឋខេត្ត ហាសាំង (Ha Giang) បានរកឃើញថាមនុស្ស ១១ នាក់បានស្លាប់ និង ៤ នាក់ទៀតរងរបួស។ របាយការណ៍បានឱ្យដឹងថា អាជ្ញាធរមូលដ្ឋានបាននិយាយថា ចំនួនមនុស្សពិតប្រាកដនៅក្នុងរថយន្តនោះមិនត្រូវបានគេដឹងនោះទេ ហើយភ្លៀងធ្លាក់ខ្លាំងកំពុងធ្វើឱ្យមានភាពស្មុគស្មាញដល់កិច្ចខិតខំប្រឹងប្រែងស្វែងរក និងជួយសង្គ្រោះ។យោងតាមមជ្ឈមណ្ឌលជាតិសម្រាប់ការព្យាករណ៍ធនធានជលសាស្ត្រ បានឱ្យដឹងថា ភ្លៀងធ្លាក់ក្នុងកម្រិត ២៨០ មីលីម៉ែត្រ បានវាយប្រហារតំបន់នេះក្នុងរយៈពេល ២៤ ម៉ោងកន្លងមកនេះ។ ទីភ្នាក់ងារនេះបានព្រមានអំពីទឹកជំនន់ដ៏គំហុក បំណាក់ដីដោយសារទឹកជំនន់ ឬចរន្តទឹកហូរខ្លាំងនៅក្នុងខេត្ត ហាសាំង, ឡាវកៃ (Lao Cai), ពៀនក័ង (Tuyen Quang) និង អៀនបៃ (Yen Bai)។ប្រទេសវៀតណាម ងាយនឹងជួបគ្រោះមហន្តរាយធម្មជាតិណាស់ ដោយទឹកជំនន់ និងព្យុះទីហ្វុងបានសម្លាប់មនុស្សរាប់រយនាក់ក្នុងមួយឆ្នាំ។ គ្រោះធម្មជាតិបានសម្លាប់មនុស្ស ៣៨៩ នាក់ និងបង្ករបួស ៦៦៨ នាក់កាលពីឆ្នាំមុន នេះបើយោងតាមតួលេខរដ្ឋាភិបាល៕

បណ្ដាញសង្គម

ព័ត៌មានថ្មីៗ

កម្ពុជា -បារាំង វាយតម្លៃខ្ពស់ចំពោះការរីកចម្រើននៃទំនាក់ទំនង និងការសហប្រតិបត្តិការទ្វេភាគី

សម្តេចបវរធិបតីវាយតម្លៃខ្ពស់ចំពោះបេសកកម្មការទូតរបស់ឯកអគ្គរដ្ឋទូតឆែកចប់អាណត្តិ

ប៉ូឡូញត្រួតពិនិត្យតាមព្រំដែនអាល្លឺម៉ង់ និងលីទុយអានី ក្នុងពេលមានក្ដីបារម្ភអំពីជនអន្តោប្រវេសន៍

នាវិកនៃនាវាក្រិកមានសុវត្ថិភាព ក្រោយមានការវាយប្រហារដែលអាចជាស្នាដៃរបស់ក្រុមហ៊ួទី នៅសមុទ្រក្រហម

តំណាងសាខាកាកបាទក្រហមខេត្តកណ្ដាល ចាត់ទុកសម្តេចកិត្តិព្រឹទ្ធបណ្ឌិត ជាមាតាមនុស្សធម៌ជួយប្រជាពលរដ្ឋដែលរងគ្រោះ

រដ្ឋមន្ត្រីក្រសួងរតនាគារ៖ សហរដ្ឋអាមេរិកនឹងប្រកាសពាណិជ្ជកម្មជាច្រើន នៅ ៤៨ម៉ោងខាងមុខ

អ៊ីស្រាអែលវាយប្រហារគ្លីនិកផ្តល់ជាទីជម្រកដល់ជនប៉ាឡេស្ទីននៅទីក្រុងហ្កាហ្សាសម្លាប់មនុស្ស ៦នាក់

សត្វសិង្ហរត់គេចពីសួនសត្វបានវាយប្រហារបណ្តាលឲ្យកសិករម្នាក់រងរបួសនៅប្រទេសទួរគី

មនុស្ស ៣២នាក់ ត្រូវឡើងសវនាការ ជុំវិញអគ្គិភ័យនៅសណ្ឋាគារបណ្ដាលឲ្យមានអ្នកស្លាប់ នៅទួរគី

ឯកឧត្តមរដ្ឋមន្រ្តី ហេង សួរ ពន្យល់ដល់ពលករខ្មែរដែលត្រឡប់ពីថៃថា កម្ពុជាមានលក្ខខណ្ឌការងារល្អជាង និងអត្ថប្រយោជន៍ច្រើនជាងថៃ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877