BTV NEWS

បង្រ្កាបបទល្មើសគ្រឿងញៀននៅចំណុចស្តារវីហ្កាសឃាត់ខ្លួនមនុស្ស ចំនួន១៤១នាក់

អាវុធហត្ថខេត្តព្រះសីហនុបង្រ្កាបទីតាំង ONLINE SCAMS មួយកន្លែងឃាត់ខ្លួនជនសង្ស័យចំនួន ១៨នាក់

ជនជាតិចិន ១៦៤នាក់ពាក់ទៀត ព័ន្ធករណី Online Scams ត្រូវបានបណ្ដេញចេញពីកម្ពុជា

អាជ្ញាធរស្រុកឈូកព្រមានអាជីវករឱ្យបញ្ឈប់ការទិញលក់ទំនិញនាំចូលពីថៃ

សន្តិសុខ និង សង្គម

ចំនួនអ្នកស្លាប់ក្នុងសង្រ្គាមតំបន់ហ្កាហ្សាបានកើនឡើងជាង១៨.២០០នាក់ ខណៈការវាយប្រយុទ្ធគ្នាកាន់តែខ្លាំងក្លា

ការប្រយុទ្ធគ្នាក្នុងទីក្រុងដ៏ខ្លាំងក្លាបានកក្រើកឡើងកាលពីថ្ងៃចន្ទ ១១ ធ្នូ នៅក្នុងសង្រ្គាមដ៏បង្ហូរឈាមបំផុតមិនធ្លាប់មាននៅក្នុងតំបន់ហ្កាហ្សា ដោយមានពលរដ្ឋប៉ាឡេស្ទីនជាង១៨.២០០នាក់និងទាហានអ៊ីស្រាអែលចំនួន១០៤នាក់ ត្រូវគេរាយការណ៍ថាបានស្លាប់ ស្របពេលមានវិបត្តិមនុស្សធម៌ដែលកំពុងកើនឡើងកាន់តែធ្ងន់ធ្ងរ។ សង្រ្គាមត្រូវបានបង្កឡើងដោយការវាយប្រហារកាលពីថ្ងៃទី ៧ ខែតុលា របស់ក្រុមហាម៉ាស ដែលបានសម្លាប់មនុស្សប្រហែល១.២០០នាក់ នៅប្រទេសអ៊ីស្រាអែលភាគខាងត្បូងហើយបានមើលឃើញចំណាប់ថ្នូររាប់សិបនាក់ត្រូវបានចាប់អូសត្រឡប់ចូលទៅតំបន់ហ្កាហ្សាវិញ។ ក្រុមហាម៉ាសបានព្រមានថាចំណាប់ថ្នូរដែលនៅសេសសល់ចំនួន១៣៧ នាក់ នឹងមិនមានជីវិតរស់នៅ ឡើយ លុះត្រាតែអ៊ីស្រាអែលបំពេញតាមការទាមទាររបស់ខ្លួន និងដោះលែងអ្នកទោសប៉ាឡេស្ទីនបន្ថែមទៀត។ការប្រយុទ្ធគ្នាយ៉ាងបង្ហូរឈាមនៅតែបន្តក្នុងតំបន់ហ្កាហ្សា ដោយក្រុមសកម្មប្រយុទ្ធជីហាតឥស្លាមនិយាយថា ពួកគេបានបំផ្ទុះផ្ទះមួយខ្នងក្នុងទីក្រុង Khan Yunis ភាគខាងត្បូង តំបន់ហ្កាហ្សា ជាទីតាំងដែលទាហានអ៊ីស្រាអែលកំពុងស្វែងរកផ្លូវរូងក្រោមដី។ គ្រាប់រ៉ូកែតដែលបាញ់ចេញពីតំបន់ហ្កាហ្សាបានវាយប្រហារទីក្រុង Holon ភាគកណ្ដាលនៃទីក្រុងឆ្នេរ ជាយទីក្រុង Tel Aviv របស់ប្រទេសអ៊ីស្រាអែល ធ្វើឱ្យជនស៊ីវិលម្នាក់រងរបួស និងបន្សល់ទុករណ្ដៅមួយកន្លែងនៅតាមផ្លូវក្នុងតំបន់លំនៅឋានប្រជាជន។ អ៊ីស្រាអែលបានជំរុញជនស៊ីវិលឱ្យស្វែងរកកន្លែងជ្រកកោននៅឆ្ងាយពីសមរភូមិប្រយុទ្ធនៅភាគខាងត្បូង ប៉ុន្តែកងទ័ពបានបន្តវាយប្រហារគោលដៅនានានៅទូទាំងដែនដីប៉ាឡេស្ទីន។ចំនួនអ្នកស្លាប់ចុងក្រោយពីក្រសួងសុខាភិបាលគ្រប់គ្រងដោយក្រុមហាម៉ាស គឺ១៨.២០៥នាក់ ភាគច្រើនជាស្រ្តី និងកុមារ៕

តុលាការបើកការស៊ើបសួរ ករណីជនបើករថយន្តព្រូស បង្កគ្រោះថ្នាក់ស្លាប់មនុស្ស នៅក្នុងកោះពេជ្រ

ភ្នំពេញ ៖ លោកវ៉ិត មឃះ ព្រះរាជអាជ្ញាររង និងជាអ្នកនាំពាក្យសាលាដំបូងរាជធានីភ្នំពេញ នារសៀលថ្ងៃទី១១ ខែធ្នូ ឆ្នាំ២០២៣ បានប្រាប់ឱ្យដឹងថា ៖ ករណីជនបើកបររថយន្តព្រូស បង្កគ្រោះថ្នាក់ចរាចរណ៍ បើកបុកម៉ូតូមួយគ្រឿង បណ្តាលឱ្យបុរសម្នាក់ស្លាប់ នៅក្នុងកោះពេជ្រ តុលាការបានបើកការស៊ើបសួររួចហើយ ក្រោយការចោទប្រកាន់ផ្លូវការ ។ ជនជាប់ចោទមានឈ្មោះលី ថាដារ៉ាវី ភេទប្រុស មុខរបរនៅផ្ទះ បច្ចុប្បន្នរស់នៅភូមិក្តីតាកុយ សង្កាត់វាលស្បូវ ខណ្ឌច្បារអំពៅ ។រូបគេ ត្រូវបានតុលាការចោទប្រកាន់ពីបទ ៖ បេីកបរដោយធ្វេសប្រហែសមិនប្រុងប្រយ័ត្នបណ្តាលឱ្យអ្នកដទៃស្លាប់ តាមបញ្ញត្តិមាត្រា៨៥ ចំណុច ( ខ និង ឃ ) នៃច្បាប់ស្តីពីចរាចរណ៌ផ្លូវគោក ។ ក្នុងដំណាក់កាលស៊ើបសួរខាងលើនេះដែរ ជនជាប់ចោទអាចប្រឈមមុខនឹងការឃុំខ្លួនដាក់ពន្ធនាគារបណ្តោះអាសន្ន ។គួររំលឹកថា ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៥ និង២៦នាទីព្រឹកថ្ងៃទី៣០ វិច្ឆិកា ឆ្នាំ២០២៣ នៅក្នុងមជ្ឈមណ្ឌលកោះពេជ្រ ស្ថិតនៅគល់ស្ពានកោះនរាត្រើយខាងលិច ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ៕ ដោយ ៖ លីហេង

អាជ្ញាធរខណ្ឌទួលគោក ទុករយៈពេល ១សប្ដាហ៍ ឱ្យម្ចាស់អាជីវកម្មលក់ដូរនៅជាប់របងពេទ្យកុមារជាតិ រុះរើចេញ

ភ្នំពេញ៖ រដ្ឋបាលខណ្ឌទួលគោកបានចេញសេចក្ដីជូនដំណឹងចុងក្រោយ ជូនដល់ម្ចាស់អាជីវកម្ម លក់ដូរលើផ្លូវ អមសងខាង ជុំវិញមន្ទីរពេទ្យកុមារជាតិឲ្យរុះរើចេញ ដើម្បីចូលរួមរក្សាសណ្ដាប់ធ្នាប់បរិស្ថានអនាម័យ និងកាត់បន្ថយការកក់ស្ទះ។នៅព្រឹកថ្ងៃទី១១ខែធ្នូ ឆ្នាំ ២០២៣ នេះ លោក ស៊ឹប សុផង់ អភិបាលរងខណ្ឌទួលគោក បានដឹកនាំកម្លាំងគណៈបញ្ជាការឯកភាពខណ្ឌចុះអប់រំណែនាំ និងបិទសេចក្ដីជូនដំណឹងចុងក្រោយរបស់រដ្ឋបាលខណ្ឌជូនដល់ម្ចាស់អាជីវកម្មប្រកបការលក់ដូរ លើចិញ្ជើមផ្លូវជុំវិញមន្ទីរពេទ្យកុមារជាតិទាំងអស់ដើម្បីឲ្យរុះរើចេញក្នុងរយៈពេលមួយសប្តាហ៍។ ដោយកន្លងមកពួកគាត់បានយកចិញ្ចើមផ្លូវលក់ដូរ រំលោភលើផ្លូវ ធ្វើឲ្យបាត់បង់សណ្ដាប់ធ្នាប់ និងបង្កការកក់ស្ទះចរាចរណ៍ផងដែរ។ក្នុងនោះដែរលោកអភិបាលរងខណ្ឌទួលគោក បានឱ្យដឹងថា អាជ្ញាធរខណ្ឌទួលគោកបានចុះជូនដំណឹងដល់ម្ចាស់អាជីវកម្ម នៅជុំវិញរបងពេទ្យកុមារជាតិជាច្រើនលើកច្រើនសារមកហើយ។ប៉ុន្តែម្ចាស់អាជីវកម្មទាំងនោះមិនបានចូលរួមសហការជាមួយអាជ្ញាធរឡើយ។ ដូច្នេះអាជ្ញាធរបានចេញសេចក្ដីជូនដំណឹងនេះជាលើកចុងក្រោយ ក្នុងរយៈពេលមួយសប្តាហ៍ ដើម្បីឲ្យពួកគាត់រុះរើចេញក្នុងករណីមិនចូលរួមសហការជាមួយអាជ្ញាធរ និងចាត់ការវិធានការរដ្ឋបាល។សូមបញ្ជាក់ផងដែរ ក្នុងសេចក្ដីជូនដំណឹងរបស់រដ្ឋបាលខណ្ឌ សូមជម្រាបជូនដល់បងប្អូនប្រជាពលរដ្ឋ ម្ចាស់អាជីវកម្មលក់ដូរគ្រប់ប្រភេទ នៅលើចិញ្ចើមផ្លូវអមសង្ខាងផ្លូវ បរិវេណជុំវិញមន្ទីរពេទ្យកុមារជាតិ ក្នុងសង្កាត់ទឹកល្អក់ទី១ ខណ្ឌទួលគោកទាំងអស់ មេត្តា ជ្រាបថា ដើម្បីចូលរួមសហការរក្សាសណ្តាប់ធ្នាប់តាមដងផ្លូវ និងការប្រើប្រាស់ចិញ្ចើមផ្លូវសាធារណៈ ឱ្យមានរបៀបរៀបរយ ក្នុងន័យដោះស្រាយបញ្ហាកកស្ទះចរាចរណ៍ កាត់បន្ថយគ្រោះថ្នាក់ចរាចរណ៍ និងលើកកម្ពស់សោភ័ណភាពរាជធានីភ្នំពេញ រដ្ឋបាលខណ្ឌទួលគោក ស្នើសុំឱ្យលោក លោកស្រី ម្ចាស់អាជីវកម្មទាំងអស់ បញ្ឈប់ជាបន្ទាន់ក្នុងការប្រកបអាជីវកម្ម លក់ដូរគ្រប់ប្រភេទរំលោភលើចិញ្ចើមផ្លូវ និងទ្រូងផ្លូវ ឬតសំយាបរំលោភលើចិញ្ចើមផ្លូវសាធារណៈ និងត្រូវធ្វើការរុះរើចេញ ដោយទុករយៈពេលឱ្យ០៧ថ្ងៃ ចាប់ពីថ្ងៃជូនដំណឹងនេះតទៅ៕ អត្ថបទ៖ កុម្ភៈ

មនុស្សរាប់ពាន់នាក់ ធ្វើបាតុកម្មប្រឆាំងនឹងជ្វីហ្វនិយម នៅអាល្លឺម៉ង់ ខណៈប្រទេសនេះ កំពុងប្រឈមនឹងការកើនឡើងនៃឧប្បត្តិហេតុនានា

មនុស្សរាប់ម៉ឺននាក់ បានធ្វើបាតុកម្មប្រឆាំងនឹងជ្វីហ្វនិយម នៅទីក្រុងប៊ែរឡាំង កាលពីថ្ងៃអាទិត្យ ខណៈដែលប្រទេសអាល្លឺម៉ង់ កំពុងប្រឈមមុខនឹងការកើនឡើងយ៉ាងខ្លាំងនូវឧប្បត្តិហេតុប្រឆាំងជនជាតិជ្វីហ្វ បន្ទាប់ពីការវាយប្រហាររបស់ក្រុមហាម៉ាសលើអ៊ីស្រាអែល កាលពីពីរខែមុន។ទីភ្នាក់ងារសារព័ត៌មានអាល្លឺម៉ង់ Dpa បានរាយការណ៍ថា នគរបាលបានប៉ាន់ប្រមាណថា មនុស្សប្រហែល ៣.២០០នាក់ បានប្រមូលផ្តុំគ្នាទាំងកណ្តាលមេឃកំពុងភ្លៀង នៅក្នុងរដ្ឋធានីរបស់អាល្លឺម៉ង់ ខណៈពេលដែលអ្នករៀបចំ បានដាក់តួលេខអ្នកចូលរួមចំនួន ១0.000 នាក់ ។ អ្នកចូលរួមក្នុងការតវ៉ា ដែលមានឈ្មោះថា «ឥឡូវនេះ លែងមានទៀតហើយ» (Never again is now) បានដើរដង្ហែទៅកាន់ច្រកទ្វារ Brandenburg។ក្រុមមួយដែលកំពុងតាមដានការប្រឆាំងនឹងជ្វីហ្វនិយម នៅប្រទេសអាល្លឺង់ បាននិយាយកាលពីចុងខែ វិច្ឆិកាថា ខ្លួនបានកត់ត្រាការកើនឡើងយ៉ាងខ្លាំងនៃឧប្បត្តិហេតុប្រឆាំងជនជាតិជ្វីហ្វ នៅក្នុងខែនេះ បន្ទាប់ពីការវាយប្រហាររបស់ក្រុមហាម៉ាស សរុបចំនួន៩៩៤លើក គឺកើនឡើង ៣២០ភាគរយ បើធៀបនឹងរយៈពេលដូចគ្នា កាលពីឆ្នាំមុន។មេដឹកនាំជនជាតិជ្វីហ្វដ៏សំខាន់របស់ប្រទេសអាល្លឺម៉ង់ លោក Josef Schuster បាននិយាយថា៖«ការប្រឆាំងជ្វីហ្វនិយម គឺជាការអនុវត្តជាទូទៅនៅកណ្តាលសង្គម ក្នុងប្រទេសអាល្លឺម៉ង់» ហើយបានអំពាវនាវឲ្យមានសាមគ្គីភាពជាមួយអ៊ីស្រាអែល និងជាមួយជនជាតិជ្វីហ្វ នៅក្នុងប្រទេសអាល្លឺម៉ង់។

អ៊ីស្រាអែលទម្លាក់គ្រាប់បែកនៅហ្កាហ្សាភាគខាងត្បូង បន្ទាប់ពីការគំរាមចំណាប់ថ្នូររបស់ក្រុមហាម៉ាស

អ៊ីស្រាអែល បានទម្លាក់គ្រាប់បែកទៅលើទីក្រុងធំនៅតំបន់ហ្កាហ្សាភាគខាងត្បូង នៅថ្ងៃចន្ទ ទី១១ ខែធ្នូ នេះ បន្ទាប់ពីក្រុមហាម៉ាស បានព្រមានថា គ្មានចំណាប់ថ្នូរអ៊ីស្រាអែលណាម្នាក់នឹងចាកចេញពីដែនដីនេះបានឡើយ លុះត្រាតែការទាមទារឱ្យដោះលែងអ្នកទោសត្រូវបានបំពេញ។ អ្នកឆ្លើយឆ្លងព័ត៌មាន AFP បានរាយការណ៍ថា ការវាយប្រហាររបស់អ៊ីស្រាអែល នៅថ្ងៃចន្ទនេះ បានវាយប្រហារទៅលើទីក្រុង Khan Yunis ខណៈក្រុមសកម្មប្រយុទ្ធអ៊ីស្លាមនិយមជីហាត បាននិយាយថាពួកគេបានបំផ្ទុះលំនៅឋានមួយខ្នងជាកន្លែងដែលទាហានអ៊ីស្រាអែល កំពុងស្វែងរកច្រកផ្លូវរូងក្រោមដី។កងទ័ពបានរាយការណ៍ថា មានការបាញ់គ្រាប់រ៉ុក្កែត ចេញពីតំបន់ហ្កាហ្សា ចូលទៅក្នុងទឹកដីអ៊ីស្រាអែលនៅថ្ងៃចន្ទនេះ និងបាននិយាយថា ការប្រយុទ្ធគ្នាខ្លាំងបានកើតឡើងកាលពីថ្ងៃអាទិត្យ នៅជុំវិញទីក្រុង ហ្កាហ្សា និងទីក្រុងខាន់យូនីស(Khan Yunis)។ក្រុមហាម៉ាស កាលពីថ្ងៃអាទិត្យបានព្រមានថា អ៊ីស្រាអែល នឹងមិនទទួលបានចំណាប់ថ្នូររបស់ពួកគេនៅរស់ឡើយ បើគ្មានការដោះដូរ ការចរចា និងការបំពេញតាមការទាមទារ។ការទម្លាក់គ្រាប់បែក និងការប៉ះទង្គិចគ្នាយ៉ាងខ្លាំង ជាច្រើនខែមកនេះ បានធ្វើឱ្យប្រព័ន្ធសុខាភិបាលនៅតំបន់ហ្កាហ្សា ធ្លាក់ដល់មាត់ជ្រោះនៃការដួលរលំ ដោយមន្ទីរពេទ្យភាគច្រើនលែងដំណើរការ ហើយមនុស្សជិតពីរលាននាក់បានភៀសខ្លួនចេញ។

ប្រមុខទីភ្នាក់ងារជនភៀសខ្លួន UN៖ អ៊ីស្រាអែល ព្យាយាមបង្ខំឲ្យពលរដ្ឋហ្កាហ្សា ចូលទៅក្នុងប្រទេសអេហ្ស៊ីប

ប្រធានទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីនបានចោទប្រកាន់អ៊ីស្រាអែលថាកំពុងរៀបចំផែនការបណ្តេញពលរដ្ឋហ្កាហ្សា យ៉ាងច្រើនចូលទៅក្នុងប្រទេសអេហ្ស៊ីប ដែលការចោទប្រកាន់នេះ ត្រូវបានអ៊ីស្រាអែលនិយាយថា ជារឿងមិនពិត។ រយៈពេលជាងពីរខែនៃសង្រ្គាមដ៏បង្ហូរឈាម រវាងអ៊ីស្រាអែល និងក្រុមហាម៉ាស ដែលបង្កឡើងដោយការវាយប្រហារកាលពីថ្ងៃទី ៧ ខែតុលា របស់ក្រុមសកម្មប្រយុទ្ធ បានបណ្ដាលឲ្យប្រជាជនភាគច្រើននៃតំបន់ហ្កាហ្សា ត្រូវរត់ភៀសខ្លួន ប៉ុន្តែប្រជាជនប៉ាឡេស្ទីនភាគច្រើនត្រូវបានរារាំងមិនឱ្យចាកចេញពីដែនដីដ៏តូច ដែលឡោមព័ទ្ធនេះទេ។ នៅក្នុងទស្សនៈមួយដែលត្រូវបានចេញផ្សាយកាលពីថ្ងៃសៅរ៍នៅក្នុងសារព័ត៌មាន Los Angeles Times ប្រធានទីភ្នាក់ងារការងារ និងផ្ដល់ជំនួយរបស់អង្គការសហប្រជាជាតិ(UNRWA) លោក ហ្វីលីព ឡាហ្សារីនី (Philippe Lazzarini) បានចង្អុលបង្ហាញពីវិបត្តិមនុស្សធម៌កាន់តែធ្ងន់ធ្ងរនៅក្នុងតំបន់ហ្កាហ្សា និងការប្រមូលផ្តុំកាន់តែច្រើន នៅជិតព្រំដែននៃជនស៊ីវិលដែលចល័តទីលំនៅក្រោយការភៀសខ្លួនចេញពីការប្រយុទ្ធគ្នាដំបូងនៅភាគខាងជើង និងបន្តទៅភាគខាងត្បូង។ លោក ឡាហ្សារីនី បាននិយាយថា អង្គការសហប្រជាជាតិ និងរដ្ឋជាសមាជិកមួយចំនួន រួមទាំងសហរដ្ឋអាមេរិក បានច្រានចោលយ៉ាងដាច់ខាតចំពោះការបណ្តេញពលរដ្ឋហ្កាហ្សាចេញពីតំបន់ហ្កាហ្សាស្ទ្រីប។ប៉ុន្តែស្ថានការណ៍វិវត្តន៍ ដែលយើងកំពុងមើលឃើញ បង្ហាញពីការប៉ុនប៉ងបញ្ជូនពលរដ្ឋប៉ាឡេស្ទីនចូលទៅក្នុងប្រទេសអេហ្ស៊ីប ដោយពុំគិតពីថាតើពួកគេស្នាក់នៅទីនោះ ឬត្រូវបានតាំងទីលំនៅថ្មីនៅកន្លែងផ្សេងនោះទេ៕

ប្លុក ECOWAS នឹងចរចាជាមួយរបបយោធានីហ្សេ លើការត្រឡប់មកវិញលទ្ធិប្រជាធិបតេយ្យ

សេចក្តីថ្លែងការណ៍មួយបាននិយាយបន្ទាប់ពីកិច្ចប្រជុំកំពូលប្រចាំឆ្នាំថា ប្លុកក្នុងតំបន់របស់អាហ្រ្វិកខាងលិច ECOWAS កាលពីថ្ងៃអាទិត្យ បានបង្កើតគណៈកម្មាធិការមានមេដឹកនាំចំនួនបីរូប ដើម្បីចរចាជាមួយរបបយោធាប្រទេសនីហ្សេ ស្តីពីការផ្លាស់ប្តូរទៅរកការគ្រប់គ្រងតាមបែបលទ្ធិប្រជាធិបតេយ្យ និងដើម្បីពិចារណាលើការបន្ធូរបន្ថយទណ្ឌកម្ម។ នៅក្នុងកិច្ចប្រជុំកំពូល កាលពីថ្ងៃអាទិត្យនៅរដ្ឋធានី Abuja របស់ប្រទេសនីហ្សេរីយ៉ា ប្លុក ECOWAS បានសម្រេចបង្កើតគណៈកម្មាធិការមួយមានមេដឹកនាំមកពីប្រទេសតូហ្គោ សៀរ៉ាឡេអូន និងបេនីន ដោយចូលរួមជាមួយរបបយោធាប្រទេសនីហ្សេ ដើម្បីព្រមព្រៀងលើ «ផែនទីបង្ហាញផ្លូវអន្តរកាលមួយ» និងធ្វើការឆ្ពោះទៅរកការស្តារឡើងវិញយ៉ាងឆាប់រហ័សនៃសណ្តាប់ធ្នាប់រដ្ឋធម្មនុញ្ញ។ ប្លុក ECOWAS បាននិយាយថា ដោយផ្អែកលើលទ្ធផលនៃការចូលរួមដោយគណៈកម្មាធិការនៃប្រមុខរដ្ឋជាមួយរបបយោធានីហ្សេ អាជ្ញាធរនឹងបន្ធូរបន្ថយទណ្ឌកម្មដែលដាក់ទៅលើប្រទេសនីហ្សេ ជាបណ្តើរៗ។ ស្ថាប័នប្រចាំតំបន់មួយនេះ បាននិយាយបន្ថែមថា ប្រសិនបើរបបយោធានីហ្សេ មិនបានអនុវត្តតាមលទ្ធផលនៃការចូលរួម នោះទណ្ឌកម្មនឹងត្រូវបានរក្សាទុករួមទាំងការប្រើប្រាស់កម្លាំងដែលអាចកើតមាន។ ប្រធានាធិបតីប្រទេសនីហ្សេរីយ៉ា លោក Bola Tinubu ដែលជាប្រធានប្លុក ECOWAS កាលពីពេលមុនបាននិយាយថា ប្លុកនេះនឹងព្យាយាមឲ្យមានការចូលរួមជាថ្មីជាមួយបណ្តាប្រទេសក្នុងតំបន់ ក្រោមការគ្រប់គ្រងរបស់យោធា និងគាំទ្រពួកគេដើម្បីទទួលបានការផ្លាស់ប្តូរ «ជាក់ស្តែង និងឆាប់ៗ» ទៅកាន់លទ្ធិប្រជាធិបតេយ្យ។ លោក Tinubu បាននិយាយថា ប្លុក ECOWAS គួរតែត្រៀមផ្តល់ជំនួយផ្នែកបច្ចេកទេស និងសម្ភារៈដល់របបយោធា ដើម្បីទទួលបានគោលដៅនៃការផ្លាស់ប្តូរ។ រដ្ឋាភិបាលយោធាបាននិយាយថា ប្លុក ECOWAS បានដាក់ទណ្ឌកម្មសេដ្ឋកិច្ចជាបន្តបន្ទាប់ លើរបបយោធាដែលកំពុងធ្វើឱ្យប៉ះពាល់ដល់អ្នកក្រីក្រ ហើយគួរតែត្រូវបានដកចេញ។ ប្រទេសម៉ាលី នីហ្សេ និងបួគីណាហ្វាសូ កាលពីខែកញ្ញា បានចុះហត្ថលេខាលើកិច្ចព្រមព្រៀងសន្តិសុខ ដោយសន្យាថានឹងជួយគ្នាទៅវិញទៅមក ក្នុងករណីមានការបះបោរ ឬការឈ្លានពានពីខាងក្រៅណាមួយ។

យ៉ាងហោចណាស់មនុស្ស ១៧ នាក់ រងរបួសបន្ទាប់ពីរថភ្លើងបុកគ្នានៅអ៊ីតាលី

អង្គភាពសេវាកម្មពន្លត់អគ្គីភ័យ របស់ប្រទេសអ៊ីតាលី បានឆ្លើយតបទៅនឹងឧបទ្ទវហេតុរវាងរថភ្លើងពីរគ្រឿងបុកគ្នាក្នុងប្រទេសអ៊ីតាលី កាលពីយប់ថ្ងៃអាទិត្យ ទី១០ ខែធ្នូ ដែលបានបណ្តាលឱ្យអ្នកដំណើរច្រើននាក់រងរបួស។ប្រព័ន្ធផ្សព្វផ្សាយក្នុងស្រុកបានរាយការណ៍ថាមនុស្ស ១៧នាក់ បានរងរបួសក្នុងគ្រោះថ្នាក់នេះ ប៉ុន្តែគ្មាននរណាម្នាក់ក្នុងចំណោមពួកគេត្រូវបានគេចាត់ទុកថាស្ថិតក្នុងស្ថានភាពធ្ងន់ធ្ងរនោះទេ។ យោងតាមអង្គភាពសេវាសង្គ្រោះបន្ទាន់បានឲ្យដឹងថា រថភ្លើងទាំងពីរគ្រឿង កំពុងធ្វើដំណើររវាងស្រុក ហ្វាអង់ហ្សា និងស្រុកហ្វរលី(Faenza – Forli) នៅលើបណ្តាញផ្លូវរថភ្លើង Bologna-Rimini។អ្នកពន្លត់អគ្គីភ័យអ៊ីតាលី បាននិយាយថា ចរាចរណ៍ផ្លូវរថភ្លើងត្រូវបានផ្អាករវាងស្រុក កាស្តែលបូឡុកនីស(Castelbolognese) និងស្រុក Forli ។ពួកគេបាននិយាយផងដែរថា ប្រតិបត្តិការស្វែងរក និងជួយសង្គ្រោះត្រូវបានបញ្ចប់។

មនុស្ស១២នាក់ បានស្លាប់ក្នុងគ្រោះថ្នាក់បាក់រលំអណ្តូងរ៉ែមាសនៅវេណេហ្ស៊ុយអេឡា

រដ្ឋាភិបាលបានប្រកាសកាលពីថ្ងៃអាទិត្យ (១០ ធ្នូ) ថាការបាក់រលំអណ្តូងរ៉ែមាសសិប្បកម្មមួយកន្លែងនៅភាគអាគ្នេយ៍ប្រទេសវេណេហ្ស៊ុយអេឡា ក្បែរសហគមន៍ជនជាតិដើមភាគតិច បានសម្លាប់មនុស្សយ៉ាងហោចណាស់ ១២នាក់។ បំណាក់ដីមួយកន្លែងកាលពីថ្ងៃពុធ បានកប់អណ្តូងរ៉ែ ប៉ារ៉ៃបា ដេសានហូសេ (Paraiba de San Jose) នៅជិតទីប្រជុំជន អ៊ីខាបារុ (Icabaru) ក្នុងរដ្ឋបូលីវ៉ា (Bolivar) របស់វេណេហ្ស៊ុយអេឡា ជិតព្រំដែនរបស់ប្រទេសជាមួយប្រេស៊ីល។ស្របពេលមានការដួលរលំសេដ្ឋកិច្ចដ៏អូសបន្លាយរបស់វេណេហ្ស៊ុយអេឡា ប្រតិបត្តិការរុករករ៉ែក្រៅផ្លូវការបានរីកចម្រើនខ្លាំងនៅក្នុងតំបន់ដាច់ស្រយាល និងសម្បូរទៅដោយសារធាតុរ៉ែនៃប្រទេស ដែលអ្នករុករករ៉ែរាប់ពាន់នាក់ធ្វើការដើម្បីទាញយកលោហៈដែលរកកម្រៃបាន ជាពិសេសធាតុមាស ក្នុងស្ថានភាពមិនមានសុវត្ថិភាព។អណ្តូងរ៉ែដែលងាយរងគ្រោះថ្នាក់ទាំងនោះ គឺដំណើរការដោយការត្រួតពិនិត្យតិចតួច ឬមិនមានការត្រួតពិនិត្យពីអាជ្ញាធរ ទោះបីជារដ្ឋាភិបាលប្រទេសនេះតែងតែកែច្នៃកម្ទេចមាសទៅជាមាសដុំសម្រាប់ប្រើប្រាស់ផ្ទាល់ខ្លួនក៏ដោយ។ ទីភ្នាក់ងារគ្រប់គ្រងហានិភ័យ និងការការពារស៊ីវិលរបស់ប្រទេសវេណេហ្ស៊ុយអេឡា បាននិយាយនៅក្នុងការបង្ហោះនៅលើបណ្ដាញសង្គម X ថាខ្លួនកំពុងផ្តល់អាហារ ទឹក និងការផ្គត់ផ្គង់ផ្នែកវេជ្ជសាស្រ្តដល់អ្នកដែលរងផលប៉ះពាល់ ខណៈពេលដែលកំពុងសម្របសម្រួលការផ្ទេរសាកសពទៅកាន់ទីក្រុង ប៉ូអ៊ឺតតូ អរដាស (Puerto Ordaz) ចម្ងាយប្រហែល ៧០០គីឡូម៉ែត្រ ទៅភាគខាងជើងនៃប្រទេស៕

ការសន្យារបស់ COP28 រហូតមកដល់ពេលនេះមិនគ្រប់គ្រាន់ ដើម្បីទប់ស្កាត់ការឡើងកម្ដៅផែនដី ១,៥°C ទេ

ទីភ្នាក់ងារថាមពលអន្តរជាតិ (IEA) បាននិយាយកាលពីថ្ងៃអាទិត្យ (១០ ធ្នូ) ថាការសន្យាថ្មីដែលបានប្រកាសនៅក្នុងកិច្ចប្រជុំកំពូលស្តីពីអាកាសធាតុ COP28 លើការកើនឡើងបីដងនៃការប្រប្រាស់ថាមពលកកើតឡើងវិញលើសការបំភាយឧស្ម័នមេតាន នឹងមិនគ្រប់គ្រាន់ក្នុងការទប់ស្កាត់ការឡើងកម្ដៅផែនដីក្នុងកម្រិត ១,៥អង្សាសេនោះទេ។រហូតមកដល់ពេលនេះ ប្រទេសចំនួន១៣០ បានយល់ព្រមលើការប្រើប្រាស់ថាមពលកកើតឡើងវិញចំនួនបីដង និងបង្កើនអត្រាការកែលម្អប្រសិទ្ធភាពថាមពលទ្វេដង ខណៈដែលក្រុមហ៊ុនប្រេង និងឧស្ម័នចំនួន ៥០ស្ថាប័ន បានយល់ព្រមកាត់បន្ថយការបំភាយឧស្ម័នមេតាន និងលុបបំបាត់ការដុតចំហេះជាទម្លាប់ត្រឹមឆ្នាំ២០៣០ ក្រោមធម្មនុញ្ញកាត់បន្ថយឧស្ម័នកាបូនឌីអុកស៊ីតពីប្រេង និងឧស្ម័ន។ការវិភាគរបស់ទីភ្នាក់ងារ IEA បាននិយាយថា ប្រសិនបើមនុស្សគ្រប់គ្នាអនុវត្តការប្តេជ្ញាចិត្តរបស់ពួកគេ វានឹងកាត់បន្ថយការបំភាយឧស្ម័នផ្ទះកញ្ចក់ដែលទាក់ទងនឹងថាមពលពិភពលោកចំនួន ៤ពាន់លានតោននៃឧស្ម័នកាបូនឌីអុកស៊ីតដែលត្រូវការនៅឆ្នាំ២០៣០។ នោះគឺប្រហែលមួយភាគបីនៃគម្លាតនៃការបំភាយឧស្ម័នដែលត្រូវកាត់បន្ថយក្នុងរយៈពេលប្រាំមួយឆ្នាំខាងមុខដើម្បីកាត់បន្ថយការឡើងកម្ដៅផែនដីកម្រិត ១,៥C លើសកម្រិតមុនសម័យឧស្សាហកម្ម ដូចដែលបានព្រមព្រៀងក្នុងកិច្ចព្រមព្រៀងប៉ារីសឆ្នាំ២០១៥។បន្ថែមពីលើកំណើនថាមពលកកើតឡើងវិញ ការបង្កើនប្រសិទ្ធភាពថាមពល និងការកាត់បន្ថយឧស្ម័នមេតាន ទីភ្នាក់ងារនេះបាននិយាយថា យន្តការហិរញ្ញប្បទានទ្រង់ទ្រាយធំគឺចាំបាច់សម្រាប់ការវិនិយោគថាមពលស្អាតបីដងនៅក្នុងបណ្ដាប្រទេសក្រីក្រ។ ទីភ្នាក់ងារ IEA ក៏បាននិយាយផងដែរថា ពិភពលោកនឹងត្រូវការប្តេជ្ញាចិត្តចំពោះការថយចុះនៃការប្រើប្រាស់ឥន្ធនៈហ្វូស៊ីល និងបញ្ចប់ការអនុម័តថ្មីនៃរោងចក្រថាមពលដើរដោយធ្យូងថ្មដែលមិនទាន់មានដំណើរការ៕

បណ្ដាញសង្គម

ព័ត៌មានថ្មីៗ

មនុស្ស ៣នាក់ស្លាប់ នៅប្រទេសបារាំង ខណៈសីតុណ្ហភាពកើនឡើងជាង ៤០អង្សាសេ អំឡុងរលកកម្តៅនៅអឺរ៉ុប

តំបន់គ្រីមៀ ផ្អាកការបោះជំរំរដូវក្តៅរបស់ក្មេងៗ ខណៈការវាយប្រហាររបស់អ៊ុយក្រែនធ្វើឲ្យជួបកង្វះខាតប្រេង

អ្នកការទូតជាន់ខ្ពស់របស់ចិន ជួបអនុប្រធានសន្តិសុខអ៊ីរ៉ង់ ក្រោយកិច្ចពិភាក្សាជាមួយអាមេរិក នៅស្វីស

វិមានក្រឹមឡាំង ចោទប្រកាន់អ៊ុយក្រែនថា បានគំរាមកំហែងដល់អធិបតេយ្យភាពរបស់បេឡារុស

អតីតរដ្ឋមន្រ្តីដឹកជញ្ជូនអេស្ប៉ាញ ត្រូវបានកាត់ទោសឲ្យជាប់ពន្ធនាគាររយៈពេល ២៤ឆ្នាំ ក្នុងករណីពុករលួយ

កងទ័ពស៊ូដង់ទទួលយកអ្នករត់ចោលជួររបស់កងកម្លាំង RSF នៅ Darfur បង្កការខឹងសម្បារនៅក្នុងចំណោមពលរដ្ឋ

ទីក្រុងប៉េកាំងប្ដេជ្ញាពង្រឹងទំនាក់ទំនងជាមួយបង់ក្លាដែស ខណៈនាយករដ្ឋមន្ត្រីគ្រោងទស្សនកិច្ចនៅចិន

ទីក្រុងមូស្គូបាញ់ទម្លាក់យានដ្រូនក្រុងគីវជាង ៨០គ្រឿង ខណៈការវាយប្រហាររុស្ស៊ីសម្លាប់មនុស្ស ៦នាក់នៅអ៊ុយក្រែន

ទីភ្នាក់ងារប្រឆាំងអំពើពុករលួយម៉ាឡេស៊ី បើកការស៊ើបអង្កតករណីផ្ទេរដំរីទៅកាន់សួនសត្វជប៉ុន

ប្រភព៖ ឥណ្ឌាកំពុងចរចាលក់មីស៊ីលល្បឿនលឿនជាងសំឡេង BrahMos ទៅអារ៉ាប់រួម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877