BTV NEWS

ស្នងការរាជធានី អំពាវនាវដល់យុវជនជៀសឆ្ងាយពីសកម្មភាពក្មេងទំនើង បើប្រព្រឹត្តល្មើសមានតែការអនុវត្តផ្លូវច្បាប់ប៉ុណ្ណោះ

មន្ត្រីជំនាញ៖ Online Scams នៅកម្ពុជា កំពុងត្រូវបានបង្ក្រាបយ៉ាងសកម្មទោះមានលក្ខណៈស្មុគស្មាញ

ជនបន្លំយកលុយពីភ្ញៀវបរទេស២ពាន់ដុល្លារ នៅផ្សារច្បារអំពៅ ត្រូវបានសមត្ថកិច្ចរាជធានីស្រាវជ្រាវឃាត់ខ្លួន និងយកថវិការជូនជនរងគ្រោះវិញ

តំណាងអយ្យការចោទប្រកាន់ជនសង្ស័យម្នាក់យករូបថ្នាក់ដឹកនាំធ្វើជាប្រូហ្វាល់ ជាមធ្យោបាយគំរាមជនរងគ្រោះជំរិតទារប្រាក់

សន្តិសុខ និង សង្គម

កងទ័ពអ៊ីស្រាអែលអះអាងថា ក្រុមហាម៉ាស បានបាត់បង់ការគ្រប់គ្រងភាគខាងជើងនៃតំបន់ហ្កាហ្សាស្ទ្រីប

សារព័ត៌មាន CNN បានរាយការណ៍ ដោយដកស្រង់សម្តីលោក Daniel Hagari តំណាងកងកម្លាំងការពារអ៊ីស្រាអែល (IDF) បាននិយាយថា ក្រុមហាម៉ាស់ បាន «បាត់បង់ការគ្រប់គ្រង»នៃផ្នែកភាគខាងជើងនៃតំបន់ហ្កាហ្សាស្ទ្រីប។លោក Hagari បាននិយាយថា ប្រជាជនហ្កាហ្សា កំពុងធ្វើដំណើរឆ្ពោះទៅភាគខាងត្បូងនៃដែនដីនេះ លោក បានអះអាងថា មនុស្ស៥០.០០០នាក់ បានចាកចេញពីតំបន់ទីក្រុងហ្កាហ្សា។«ប្រជាជននៅតំបន់ហ្កាហ្សាយល់ថា ក្រុមហាម៉ាស បានបាត់បង់ការគ្រប់គ្រងភាគខាងជើងនៃតំបន់ហ្កា ហ្សាស្ទ្រីប ហើយវាមានសុវត្ថិភាព និងសុវត្ថិភាពជាង នៅភាគខាងត្បូង ហើយនៅទីនោះ ពួកគេអាចមានទឹក អាហារ និងថ្នាំពេទ្យ»។កងកម្លាំងការពារអ៊ីស្រាអែល (IDF) បានរាយការណ៍ថា ពួកគេ បានឡោមព័ទ្ធទីក្រុងហ្កាហ្សាទាំងស្រុង និងបានបំបែកតំបន់ឆ្នេរជាពីរផ្នែក។មុននេះ សមាជិកជាន់ខ្ពស់នៃក្រុមហាម៉ាស លោក Ghazi Hamad បានស្វាគមន៍ការវាយប្រហារទ្រង់ទ្រាយធំលើអ៊ីស្រាអែល កាលពីថ្ងៃទី៧ ខែតុលា ក្នុងអំឡុងពេលដែលជនស៊ីវិល ត្រូវបានសម្លាប់រង្គាល ហើយបានសន្យាថា ក្រុមភេរវករប៉ាឡេស្ទីន នឹងធ្វើការវាយប្រហារបែបនេះម្តងទៀតជាច្រើនដង នៅពេលអនាគត រហូតដល់ខ្លួនបំផ្លាញអ៊ីស្រាអែលទាំងស្រុង។

ពលរដ្ឋប៉ាឡេស្ទីន រាប់ពាន់នាក់ រត់គេចទៅភាគខាងត្បូងហ្កាហ្សាដោយថ្មើរជើង ខណៈអ៊ីស្រាអែលវាយសន្ធាប់លើក្រុងហ្កាហ្សា

ជនជាតិប៉ាឡេស្ទីនរាប់ពាន់នាក់ បានរត់ភៀសខ្លួនចេញពីតំបន់ភាគខាងជើងហ្កាហ្សា ចូលទៅភាគខាងត្បូងវិញ កាលពីថ្ងៃពុធ ដោយថ្មើរជើង នៅទូទាំងតំបន់រងការឡោមព័ទ្ធមួយនេះ ជាការចាកចេញយ៉ាងច្រើនសន្ធឹកសន្ធាប់ដោយសារយុទ្ធនាការវាយប្រហារជើងគោក និងអាកាសកាន់តែខ្លាំងរបស់អ៊ីស្រាអែល។ដំណើរចាកចេញរបស់មនុស្សជាច្រើនទាំង ស្ត្រី កុមារ មនុស្សចាស់ និងជនពិការ បានធ្វើដំណើរនៅតាមផ្លូវ សាលា អ៊ីឌីន (Salah Eddin) ជាផ្លូវហាយវេមួយ ក្នុងចំណោមផ្លូវហាយវ៉េជាច្រើនក្នុងភាគខាងជើងទៅកាន់ភាគខាងត្បូងចំនួនពីរនៅក្នុងតំបន់ហ្កាហ្សា តាមបណ្តោយច្រករបៀងជម្លៀសដែលប្រកាសដោយកងកម្លាំងការពារអ៊ីស្រាអែល។ យុវតីម្នាក់បានប្រៀបធៀបចលនាដ៏ធំនេះទៅនឹង ណាកបា (Nakba) ឬមហន្តរាយ ជាភាសាអារ៉ាប់ សម្រាប់ការបណ្តេញជនជាតិប៉ាឡេស្ទីនចេញពីទីក្រុងរបស់ពួកគេក្នុងអំឡុងពេលបង្កើតអ៊ីស្រាអែល។ នេះជាថ្ងៃទី៥ ជាប់គ្នាដែលកងកម្លាំងការពារអ៊ីស្រាអែល(IDF) បើកច្រកសម្រាប់ការជម្លៀស ហើយចំនួនមនុស្សភៀសខ្លួនទៅកាន់ភាគខាងត្បូងបានកើនឡើងជារៀងរាល់ថ្ងៃ។អង្គការសហប្រជាជាតិបាននិយាយថាមនុស្សប្រមាណ២.០០០នាក់ បានភៀសខ្លួនទៅកាន់ភាគខាងត្បូងកាលពីថ្ងៃអាទិត្យដោយកើនឡើងដល់ ១៥.០០០នាក់ កាលពីថ្ងៃអង្គារសប្ដាហ៍នេះ ។ រដ្ឋាភិបាលអ៊ីស្រាអែលបាននិយាយថាប្រជាជន ហ្កាហ្សាប្រហែល ៥០.០០០ នាក់បានធ្វើដំណើរតាមច្រករបៀងជម្លៀសខ្លួនកាលពីថ្ងៃពុធ។ ចំនួននោះមិនអាចផ្ទៀងផ្ទាត់ដោយឯករាជ្យបានទេ ប៉ុន្តែអ្នកសារព័ត៌មាន CNN នៅទីនោះ បាននិយាយថាចំនួនដែលកំពុងចាកចេញគឺច្រើនជាងកាលពីថ្ងៃអង្គារ៕

កិច្ចព្រមព្រៀងជនអន្តោប្រវេសន៍របស់អ៊ីតាលី ជាមួយអាល់បានី ប្រឈមឧបសគ្គច្រើនខណៈរងការរិះគន់ខ្លាំង

រដ្ឋាភិបាលអ៊ីតាលីកំពុងសាទរផែនការជាប្រវត្តិសាស្ត្រ ក្នុងការបញ្ជូនក្រុមជនអន្តោប្រវេសន៍ តាមសមុទ្រទៅកាន់ប្រទេសអាល់បានី ក្រោមកិច្ចព្រមព្រៀងដែលបានប្រកាសក្នុងសប្តាហ៍នេះ ដែលនឹងអនុញ្ញាតឱ្យប្រទេសអ៊ីតាលី សាងសង់មជ្ឈមណ្ឌលទទួលជនអន្តោប្រវេសន៍ និងជំរំឃុំឃាំងមួយនៅក្នុងប្រទេសនេះ។ យោងតាមឯកសារផ្លូវការដែលបានចេញផ្សាយកាលពីថ្ងៃពុធសប្ដាហ៍នេះ ប្រទេសអាល់បានីនឹងទទួលយកជនអន្តោប្រវេសន៍ អតិបរមាចំនួន ៣.០០០នាក់ ក្នុងពេលតែមួយ។នោះជាផ្នែកមួយនៃការជំរុញរបស់សហភាពអឺរ៉ុប ដើម្បីទប់ស្កាត់ ការធ្វើអន្តោប្រវេសន៍មិនទៀងទាត់ និងជាលើកដំបូង ដែលប្រទេស មិនមែនជាសមាជិកសហភាពអឺរ៉ុបមួយនេះ ទទួលយកជនអន្តោប្រវេសន៍ ជំនួសឱ្យបណ្ដាប្រជាជាតិប្លុកសហភាពអឺរ៉ុប ។ជនអន្តោប្រវេសន៍តាមសមុទ្រជាង ១៤៥.០០០ នាក់ បានទៅដល់ប្រទេសអ៊ីតាលីក្នុងឆ្នាំនេះ។លោកស្រីនាយករដ្ឋមន្រ្តីអ៊ីតាលី ចចា ម៉េឡូនី(Giorgia Meloni) បាននិយាយថា ជនអន្តោប្រវេសន៍ ប្រមាណ ៣៦.០០០ នាក់អាចឆ្លងកាត់ជំរំរបស់ប្រទេសអាល់បានី ជារៀងរាល់ឆ្នាំ ប៉ុន្តែអាស្រ័យលើថាតើប្រទេសអ៊ីតាលី អាចដំណើរការករណីសុំសិទ្ធិជ្រកកោនបានលឿនប៉ុណ្ណា។ ចំណែកអង្គការឃ្លាំមើលសិទ្ធិមនុស្សលើកលែងទោសអន្តរជាតិកាលពីថ្ងៃពុធទី៨ខែវិច្ឆិកា បានរិះគន់កិច្ចព្រមព្រៀងដែលបានប្រកាសនៅសប្ដាហ៍នេះថា ជាការអនុញ្ញាតឲ្យអ៊ីតាលី សាងសង់មជ្ឈមណ្ឌលទទួលជនអន្តោប្រវេសន៍ចំនួន២ និងជំរំឃុំឃ្លាំងជនអន្តោប្រវេសន៍ក្នុងប្រទេសអាល់បានី ដោយនិយាយថា ជាការរំលោភសិទ្ធិអន្តរជាតិ និងសិទ្ធិរបស់ជនអន្តោប្រវេសន៍៕

កងកម្លាំងអាមេរិក វាយប្រហារទីតាំងមួយចំនួន នៅស៊ីរី និងអ៊ីរ៉ាក់ សងសឹកការវាយប្រហារលើកងកម្លាំងរបស់ខ្លួន

យោងតាមវិទ្យុ Sham FM ដែលគាំទ្ររដ្ឋាភិបាលស៊ីរី និងមន្ទីរបញ្ចកោណ កងកម្លាំងសហរដ្ឋអាមេរិកបានវាយប្រហារទីតាំងនានានៅក្នុងខេត្ត ឌៀ អាល់ហ្ស៊រ(Deir al-Zour) ភាគខាងកើតប្រទេសស៊ីរី បន្ទាប់ពីពាក់កណ្តាលអធ្រាត្រឈានចូលថ្ងៃព្រហស្បតិ៍នេះ។ របាយការណ៍បាននិយាយថា ពួកគេបានវាយប្រហារតំបន់ជុំវិញផ្លូវ បរសាអ៊ីដ(Bor Saeed) ភាគខាងកើតក្រុង ឌៀ អាល់ហ្ស៊រ ដោយកត់សម្គាល់ថា ការវាយប្រហារនេះបានបង្កឱ្យមានការផ្ទុះដ៏ខ្លាំងក្លា។ក្នុងពេលជាមួយគ្នានេះ ក្រុមឃ្លាំមើលសង្រ្គាម និងសិទ្ធិមនុស្សរបស់ប្រទេសស៊ីរី បាននិយាយថា យន្តហោះចម្បាំងបានវាយប្រហារទីតាំងយោធា និងឃ្លាំងអាវុធមួយកន្លែង នៅតំបន់ជុំវិញផ្លូវ Bor Saeed។វិទ្យុ Sham FM ក៏បានរាយការណ៍ផងដែរពីការផ្ទុះដ៏ខ្លាំងក្លានៅឯអណ្តូងប្រេងអាល់អូម៉ា (al-Omar )ដែលជាទីតាំងមូលដ្ឋានទ័ពអាមេរិក ស្ថិតនៅតំបន់ជនបទភាគខាងកើតនៃទីក្រុង Deir al-Zour ។ទន្ទឹមនឹងនេះ មន្ទីរបញ្ចកោណបានបញ្ជាក់ថា នោះគឺជាការវាយប្រហារតាមអាកាសដឹកនាំដោយសហរដ្ឋអាមេរិកនៅក្នុងទីក្រុង Deir al-Zour ដោយនិយាយនៅក្នុងសេចក្តីថ្លែងការណ៍មួយថា យោធាសហរដ្ឋអាមេរិកបានបើកការវាយប្រហារតាមអាកាសស្វ័យការពារ លើទីតាំងមួយនៅភាគខាងកើតប្រទេសស៊ីរី ដើម្បីជាការឆ្លើយតបទៅនឹងការវាយប្រហារប្រឆាំងនឹងកងកម្លាំងសហរដ្ឋអាមេរិកនៅក្នុងប្រទេសអ៊ីរ៉ាក់ និងស៊ីរី ដោយសម្ព័ន្ធក្រុមកងកម្លាំង IRGC-Quds Force គាំទ្រដោយប្រទេសអ៊ីរ៉ង់។មិនទាន់មានព័ត៌មានអំពីការខូចខាតបង់នៅឡើយទេ។របាយការណ៍នានាបាននិយាយថាឧបទ្ទវហេតុនាពេលបច្ចុប្បន្ននេះទំនងជាផ្នែកមួយនៃការបាញ់ប្រហារតបតគ្នា ដែលកំពុងកើនឡើងនាពេលថ្មីៗនេះរវាងក្រុមអ្នកប្រយុទ្ធគាំទ្រអ៊ីរ៉ង់ និងកងកម្លាំងសហរដ្ឋអាមេរិកនៅក្នុងទីក្រុង Deir al-Zour ៕

មនុស្សរាប់ម៉ឺននាក់ រងផលប៉ះពាល់ពីភ្លៀងធ្លាក់ខ្លាំងនៅក្នុងប្រទេសប៉ារ៉ាហ្គាយ

ភ្លៀងធ្លាក់ខ្លាំងដែលបង្កឡើងដោយបាតុភូតអាកាសធាតុ អ៊ែល នីញ៉ូ បានបណ្ដាលឲ្យមនុស្សរាប់រយនាក់ជម្លៀសខ្លួនទៅកាន់ទីជម្រកបណ្ដោះអាសន្ននៅក្នុងទីក្រុង អាយ៉ូឡាស (Ayolas) ភាគខាងត្បូងប្រទេសប៉ារ៉ាហ្គាយ ដោយអ្នកស្រុកកំពុងទប់ទល់នឹងទឹកជំនន់បន្ថែមទៀតនៅតាមដងផ្លូវ។ យ៉ាងហោចណាស់សង្កាត់ចំនួន៥ នៅក្នុងទីក្រុង ដែលមានចម្ងាយប្រហែល ៣០០គីឡូម៉ែត្រ ពីរដ្ឋធានី អាសង់ស្យុង មួយនេះត្រូវបានជន់លិច បន្ទាប់ពីព្យុះកាលពីសប្តាហ៍មុនបានបណ្តាលឱ្យទន្លេ ប៉ារ៉ាណា បាក់ច្រាំងបង្កជាទឹកជំនន់។យោងតាមការប៉ាន់ស្មានរបស់ក្រសួងសង្គ្រោះបន្ទាន់ជាតិ បានឲ្យដឹងថា ប្រជាជនប្រមាណ ៣៥.០០០នាក់ នៅទូទាំងប្រទេសបានរងផលប៉ះពាល់ដោយភ្លៀងធ្លាក់នេះ ខណៈក្រុមអាជ្ញាធរក្នុងតំបន់នៅទីក្រុង អាយ៉ូឡាស ជិតព្រំដែនជាមួយប្រទេសអាហ្សង់ទីន បាននិយាយថា មនុស្សប្រហែល ៣.៧០០នាក់ ត្រូវបានផ្លាស់ទីលំនៅ។ អ្នកស្រុកខ្លះធ្វើដំណើរតាមទូកតូចៗតាមដងផ្លូវដែលនៅតែលិចទឹកក្នុងក្រុងកាលពីថ្ងៃពុធ (0៨ វិច្ឆិកា)។ក្រុមអ្នកជំនាញអាកាសធាតុព្យាករណ៍ថា ខ្យល់ព្យុះបន្ថែមទៀតនឹងបន្តនៅចុងសប្តាហ៍នេះ ដោយសារឥទ្ធិពលអាកាសធាតុ អ៊ែល នីញ៉ូ ដែលបណ្តាលមកពីការឡើងកម្ដៅនៃមហាសមុទ្រប៉ាស៊ីហ្វិក និងជំរុញឱ្យមានព្រឹត្តិការណ៍អាកាសធាតុដ៏ធ្ងន់ធ្ងរនៅទូទាំងទ្វីបអាមេរិក៕

ក្រសួងការបរទេសអាមេរិក៖ ច្រកឆ្លងកាត់Rafahរវាងតំបន់ហ្កាហ្សា និងអេហ្ស៊ីប ត្រូវបានបិទ ដោយសារស្ថានភាពសន្តិសុខ

អ្នកនាំពាក្យរងក្រសួងការបរទេសអាមេរិក លោក Vedant Patel បាននិយាយថា ច្រកឆ្លងកាត់ព្រំដែន Rafah ចូលទៅក្នុងតំបន់ហ្កាហ្សា ត្រូវបានបិទ កាលពីថ្ងៃពុធ ដោយសារតែ «ស្ថានភាពសន្តិសុខ» ដែលមិនបានបញ្ជាក់ច្បាស់លាស់ ប៉ុន្តែមន្ត្រីសហរដ្ឋអាមេរិក កំពុងធ្វើការជាមួយអេហ្ស៊ីប និងអ៊ីស្រាអែល ដើម្បីបើកវាឡើងវិញ។ច្រកឆ្លងកាត់ព្រំដែនRafah ដែលត្រូវបានគ្រប់គ្រងដោយអេហ្ស៊ីប និងមិនជាប់ព្រំដែនអ៊ីស្រាអែល គឺជាចំណុចតែមួយគត់នៃការផ្តល់ជំនួយ ចាប់តាំងពីអ៊ីស្រាអែល បានបើកការវាយប្រហារដោយយោធា និងការឡោមព័ទ្ធតំបន់ហ្កាហ្សា ក្នុងការសងសឹកចំពោះការវាយប្រហារដោយក្រុមសកម្មប្រយុទ្ធហាម៉ាសពីឆ្នេរសមុទ្រ កាលពីថ្ងៃទី៧ ខែតុលា។ការជម្លៀសអ្នកកាន់លិខិតឆ្លងដែនបរទេសតាមច្រកឆ្លងកាត់នេះ ត្រូវបានផ្អាកកាលពីថ្ងៃសៅរ៍ និងថ្ងៃអាទិត្យ បន្ទាប់ពីការវាយប្រហាររបស់អ៊ីស្រាអែលលើរថយន្តសង្គ្រោះបន្ទាន់ ដែលកំពុងធ្វើដំណើរទៅកាន់ទីក្រុង Rafah ប៉ុន្តែការឆ្លងកាត់ បានបើកម្តងទៀត នៅថ្ងៃចន្ទ និងថ្ងៃអង្គារ។លោក Patel បាននិយាយក្នុងអំឡុងសន្និសីទសារព័ត៌មានជាទៀងទាត់មួយថា៖«ការយល់ដឹងរបស់យើងគឺដោយសារស្ថានភាពសន្តិសុខ ដូច្នេះច្រកឆ្លងកាត់ព្រំដែន Rafah នៅតែបិទ នៅថ្ងៃនេះ»។

ក្រុមអ្នកជំនាញ អំពាវនាវឲ្យមានកិច្ចសហប្រតិបត្តិការសកល ដើម្បីដាក់សម្ពាធអាមេរិក និងអ៊ីស្រាអែល

អ្នកជំនាញចិន និងក្រុមអ្នកវិភាគស្ថានការណ៍នៅមជ្ឈិមបូព៌ាផ្សេងទៀត បានសង្កត់ធ្ងន់នូវការជំរុញជាចាំបាច់សម្រាប់បទឈប់បាញ់ភ្លាមៗ ក្នុងតំបន់ហ្កាហ្សា ខណៈចំនួនអ្នកស្លាប់កើនឡើង ក្រោយការវាយប្រយុទ្ធគ្នាកាន់តែខ្លាំងក្លារយៈពេលមួយខែ ក្នុងជម្លោះរវាងអ៊ីស្រាអែល ប៉ាឡេស្ទីន ។ លោក លីសាវ សៀន(Li Shaoxian)ប្រធានបណ្ឌិតសភាចិននៃការស្រាវជ្រាវភាសាអារ៉ាប់នៅសាកលវិទ្យាល័យ នីងសៀ(Ningxia) បានអំពាវនាវឱ្យមានបទឈប់បាញ់ក៏ដូចជាកិច្ចខិតខំប្រឹងប្រែងរួមគ្នាដើម្បីដាក់សម្ពាធលើសហរដ្ឋអាមេរិក និងអ៊ីស្រាអែល ដែលបានប្រឆាំងនឹងវិធានការអនុវត្តបទឈប់បាញ់។ លោក លី និយាយថា ចំណុចអាទិភាពគឺ ត្រូវមានបទឈប់បាញ់ឱ្យបានឆាប់តាមដែលអាចធ្វើទៅបាន។ត្រូវមានបទឈប់បាញ់ភ្លាមៗ ។ប៉ុន្តែសហរដ្ឋអាមេរិក ជាអ្នកជំទាស់ មិនឲ្យមានបទឈប់បាញ់។ ដូច្នេះលោកគិតថាអ្វីដែលយើងអាចធ្វើបាននៅពេលនេះ គឺរួមគ្នាដើម្បីដាក់សម្ពាធយ៉ាងខ្លាំងលើសហរដ្ឋអាមេរិក និងអ៊ីស្រាអែល។ គោលនយោបាយរបស់រដ្ឋាភិបាលសហរដ្ឋអាមេរិក ក៏កំពុងវិវឌ្ឍក្រោមសម្ពាធយ៉ាងសំខាន់ទាំងក្នុងតំបន់និងអន្តរជាតិផងដែរ។ ដូច្នេះតាមការយល់ឃើញរបស់លោក លោកគិតថា ចិន ទួរគី រដ្ឋអារ៉ាប់ រុស្ស៊ី និងប្រទេសជាច្រើនទៀត គួរតែប្រឹងប្រែងរួមគ្នាដើម្បីសម្របសម្រួល៕

កងទ័ពអ៊ីស្រាអែល បញ្ចេញវីដេអូ ជាអ្វីដែលខ្លួននិយាយថា ផ្លូវរូងក្រោមដីរបស់ក្រុមហាម៉ាស់នៅហ្កាហ្សា ត្រូវបានបំផ្លាញ

កងទ័ពអ៊ីស្រាអែល បានបញ្ចេញវីដេអូមួយកាលពីថ្ងៃពុធ ជាអ្វីដែលខ្លួននិយាយថា គឺជាទីតាំងនៃការបំផ្លាញផ្លូវរូងក្រោមដី នៅក្នុងតំបន់ហ្កាហ្សា ដែលត្រូវបានប្រើប្រាស់ដោយក្រុមហាម៉ាស់។វីដេអូ ត្រូវបានបង្ហោះនៅលើបណ្តាញ X ដែលគេស្គាល់កាលពីពេលមុនថា Twitter បានបង្ហាញគ្រឿងចក្រជីកដី កំពុងជីកដើម្បីរកឲ្យឃើញរចនាសម្ព័ន្ធក្រោមដី។ ចំណងជើងនៅលើវីដេអូ មានអំណានថា « ការបង្ហាញ និងបំផ្លាញរចនាសម្ព័ន្ធក្រោមដីរបស់អង្គការភេរវកម្មក្រុមហាម៉ាស់»។ ការផ្ទុះជាច្រើន ត្រូវបានមើលឃើញពីចម្ងាយនៅក្នុងវីដេអូ។ ការបំផ្ទុះមួយនៅចន្លោះអគារ២កន្លែង ដែលនៅខាងក្នុងគឺជាអ្វីដែលត្រូវបានគេនិយាយថាជាផ្លូវរូងក្រោមដី ត្រូវបានបង្ហាញនៅក្នុងវីដេអូ។វីដេអូមួយផ្សេងទៀតបានបង្ហាញកងទ័ពកំពុងពិនិត្យផ្លូវរូងនៅក្នុងដី ដោយមានចំណងជើងថា« កំណត់ទីតាំងហេត្ថារចនាសម្ព័ន្ធក្រោមដី និងធនធាននៅក្នុងតំបន់ហ្កាហ្សា»។ អ្នកនាំពាក្យមេបញ្ជាការយោធាអ៊ីស្រាអែល លោក Daniel Hagari បាននិយាយកាលពីថ្ងៃពុធថា វិស្វករប្រយុទ្ធ កំពុងប្រើប្រាស់ឧបករណ៍បំផ្ទុះ ដើម្បីកម្ទេចបណ្តាញផ្លូវរូងក្រោមដីរបស់ក្រុមហាម៉ាស់ ដែលលាតសន្ធឹងរាប់រយគីឡូម៉ែត្រនៅក្រោមតំបន់ហ្កាហ្សា។នៅក្នុងសេចក្តីថ្លែងការណ៍កាលពីថ្ងៃពុធ យោធានិយាយថា ខ្លួនបានបំផ្លាញច្រកចូលផ្លូវរូងក្រោមដី១៣០កន្លែងរហូតមកដល់ពេលនេះ។ វិស្វករប្រយុទ្ធ ដែលប្រយុទ្ធនៅក្នុងតំបន់ហ្កាហ្សា កំពុងកម្ទេចសព្វាវុធសត្រូវ និងកំពុងកំណត់ទីតាំង រកឲ្យឃើញ និងបំផ្ទុះច្រកចូលផ្លូវរូងក្រោមដី។

ឥណ្ឌាគ្រោងបង្កើតភ្លៀងសិប្បនិមិត្ត ដើម្បីទប់ទល់នឹងផ្សែងអ័ព្ទដ៏គ្រោះថ្នាក់

ទីក្រុងញ៉ូវ ដែលី របស់ប្រទេសឥណ្ឌា គ្រោងបង្កើតភ្លៀងសិប្បនិមិត្តជាលើកដំបូង ដើម្បីព្យាយាមកែលម្អគុណភាពខ្យល់នៅក្នុងទីក្រុង ដែលជារដ្ឋធានីមានការបំពុលខ្លាំងបំផុតរបស់ពិភពលោក ហើយត្រូវបានគ្រប់គ្រងដោយផ្សែងអ័ព្ទអស់រយៈពេលមួយសប្តាហ៍។ ទីក្រុងនេះបានបិទសាលារៀនទាំងអស់ និងបញ្ឈប់សកម្មភាពសាងសង់ ហើយបាននិយាយថា ខ្លួននឹងដាក់កំហិតលើការប្រើប្រាស់យានយន្ត។ដោយអាស្រ័យលើការអនុម័តផ្លូវច្បាប់ និងលក្ខខណ្ឌអាកាសធាតុ រដ្ឋមន្ត្រីបរិស្ថានក្នុងតំបន់បាននិយាយថា ក្រុមអាជ្ញាធរនឹងព្យាយាមបង្កើតឲ្យភ្លៀងធ្លាក់ចាប់ពីថ្ងៃទី២០ ខែវិច្ឆិកា ខាងមុខនេះ។ គុណភាពខ្យល់តែងតែស្ថិតក្នុងស្ថានភាពកាន់តែយ៉ាប់យ៉ឺនរៀងរាល់ឆ្នាំមុនរដូវរងា នៅពេលដែលខ្យល់ត្រជាក់បានហ៊ុមព័ទ្ធខ្យល់បំពុលពីប្រភពនានា រួមមានយានយន្ត ឧស្សាហកម្ម ធូលីសំណង់ និង ការដុតសំណល់កសិកម្មជាដើម។នាយកដ្ឋានបរិស្ថានរបស់ទីក្រុង ដេលី បាននិយាយថា ខ្លួនគ្រោងនឹងបង្កើតពពក ដែលជាបច្ចេកទេសមួយ ដែលប្រើប្រាស់សារធាតុដូចជា អ៊ីយ៉ូតប្រាក់ ដើម្បីជំរុញឱ្យមានភ្លៀងធ្លាក់។ ដោយសារគុណភាពខ្យល់កាន់តែអាក្រក់នៅក្នុងសប្តាហ៍មុន តុលាការកំពូលឥណ្ឌា បានបញ្ជាឱ្យរដ្ឋនានាជុំវិញទីក្រុងញ៉ូវ ដេលី កាលពីថ្ងៃអង្គារ ដើម្បីបញ្ឈប់កសិករមិនឲ្យដុតសំណល់ដំណាំ ដែលបង្កជាផ្សែងបំពុលដ៏អាក្រក់នៅក្នុងប្រទេស៕

មេបញ្ជាការក្រុមហេសបូឡា ព្រមានពីសង្គ្រាមតំបន់ បើការទម្លាក់គ្រាប់បែកលើហ្កាហ្សានៅតែបន្ត

ទីបញ្ជាការទីពីររបស់ក្រុមហេសបូឡា(Hezbollah)ដែលជាកងជីវពលគាំទ្រដោយអ៊ីរ៉ង់ដ៏មានឥទ្ធិពលនៅក្នុងប្រទេសលីបង់ បាននិយាយថា ការសម្លាប់ជនស៊ីវិលរបស់អ៊ីស្រាអែលនៅតំបន់ហ្កាហ្សា បង្កឲ្យមានសង្រ្គាមរីកកាន់តែធំនៅតំបន់មជ្ឈិមបូព៌ា។ លោក សេក ណាំ កាសេម (Sheikh Naim Qassem) បានប្រាប់សារព័ត៌មាន BBC ថា ការវិវឌ្ឍន៍ដ៏ធ្ងន់ធ្ងរ និងគ្រោះថ្នាក់ខ្លាំង អាចកើតឡើងក្នុងតំបន់នេះ ហើយគ្មាននរណាម្នាក់អាចបញ្ឈប់មិនឲ្យប៉ះពាល់បានឡើយ ។ មេដឹកនាំទី២របស់ក្រុមហេសបូឡា បាននិយាយនៅក្នុងបទសម្ភាសន៍មួយក្នុងទីក្រុងបេរូត(Beirut) ខណៈក្រសួងសុខាភិបាលគ្រប់គ្រងដោយក្រុមហាម៉ាស នៅហ្កាហ្សាបាននិយាយថា មនុស្សជាង ១០.០០០នាក់ បានស្លាប់ ក្នុងការវាយប្រហាររបស់កងទ័ពអ៊ីស្រាអែល។ លោកបាននិយាយថា គ្រោះថ្នាក់គឺពិតប្រាកដមែន ដោយសារតែអ៊ីស្រាអែលកំពុងបង្កើនការឈ្លានពានប្រឆាំងនឹងជនស៊ីវិល និងការសម្លាប់ស្ត្រី ព្រមទាំងកុមារកាន់តែច្រើន។ តើវាអាចទៅរួចទេដែលថារឿងនេះនឹងនៅតែបន្ត និងកើនឡើងដោយពុំនាំមកនូវគ្រោះថ្នាក់ពិតប្រាកដដល់តំបន់នេះ ? ខ្ញុំគិតថាមិនមែនទេ។លោកបានទទូចថា ការកើនឡើងណាមួយនឹងត្រូវបានភ្ជាប់ទៅនឹងសកម្មភាពរបស់អ៊ីស្រាអែល។ លោកបានបន្តថាគ្រប់លទ្ធភាពទាំងអស់មានការឆ្លើយតប។ ក្រុមអ៊ីស្លាមនិកាយ ស៊ីអ៊ីត(Shia)ដែលត្រូវបានចាត់ទុក ជាអង្គការភេរវករដោយចក្រភពអង់គ្លេស សហរដ្ឋអាមេរិក និងសម្ព័ន្ធអារ៉ាប់ គឺជាកម្លាំងនយោបាយ និងយោធាដ៏ធំបំផុតនៅក្នុងប្រទេសលីបង់។រហូតមកដល់ពេលនេះ ការឆ្លើយតបរបស់ខ្លួនចំពោះសង្គ្រាមនៅហ្កាហ្សាបានជាប់ពាក់ព័ន្ធនឹងការ ព្រមានកាន់តែខ្លាំងរបស់ខ្លួន ប៉ុន្តែបានកំណត់សកម្មភាពរបស់ខ្លួនយ៉ាងប្រុងប្រយ័ត្ន។នៅពេលការវាយប្រហាររបស់អ៊ីស្រាអែលបានសម្លាប់ស្ត្រីម្នាក់និងកុមារបីនាក់នៅភាគខាងត្បូងប្រទេសលីបង់កាលពីថ្ងៃអាទិត្យ ក្រុមហេសបូឡា បានបាញ់រ៉ូកែត ក្រែដ(Grad) ជាលើកដំបូងនៅក្នុងជម្លោះដោយបានសម្លាប់ជនស៊ីវិលអ៊ីស្រាអែលម្នាក់៕

បណ្ដាញសង្គម

ព័ត៌មានថ្មីៗ

ក្រុមជ្វីហ្វបែលហ្ស៊ិក ជំរុញមានការដាក់ទណ្ឌកម្ម ប្រឆាំងនឹងអ៊ីស្រាអែល

មនុស្ស ៥នាក់ បានស្លាប់ ក្នុងហេតុការណ៍បាញ់ប្រហារនៅភាគខាងជើងអាល្លឺម៉ង់

អ៊ីរ៉ាក់កំណត់ពេលថ្ងៃទី២១ ខែកញ្ញា ដើម្បីឲ្យក្រុមប្រដាប់អាវុធព្រមប្រគល់អាវុធ

រដ្ឋមន្ត្រីក្រសួងកិច្ចការនារី តំណាងឱ្យរាជរដ្ឋាភិបាលកម្ពុជា អញ្ជើញចូលរួមអបអរសាទរខួបលើកទី១៥៩ នៃទិវាជាតិកាណាដា

អង្គភាពប្រឆាំងអំពើពុករលួយទទួលបានពាក្យប្តឹងចំនួនជាង២០០ក្នុងឆមាសទី១ឆ្នាំ២០២៦

ឯកឧត្តម ឧត្តមសេនីយ៍ឯក ឌី វិជ្ជា ដឹកនាំកិច្ចប្រជុំត្រួតពិនិត្យលទ្ធផលការងារប្រចាំឆមាសទី១ និងលើកទិសដៅការងារឆមាសទី២ ឆ្នាំ២០២៦ របស់ផែនការងារសន្តិសុខ

អ៊ីរ៉ង់បដិសេធរបាយការណ៍អំពីការពិគ្រោះយោបល់ជាមួយសហរដ្ឋអាមេរិក នៅទីក្រុងដូហា នាថ្ងៃទី ៣០ ខែមិថុនា

បណ្ដាប្រទេសអារ៉ាប់ថ្កោលទោសការវាយប្រហាររបស់អ៊ីស្រាអែល នៅភាគខាងត្បូងស៊ីរី

លោក Erdogan លើកឡើងថា ទួរគីត្រូវតែបាន «រួមបញ្ចូល» នៅក្នុងរចនាសម្ព័ន្ធសន្តិសុខអឺរ៉ុប

ការវាយប្រហាររបស់រុស្ស៊ី សម្លាប់មនុស្សយ៉ាងតិច ៧នាក់ នៅទូទាំងប្រទេសអ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877