BTV NEWS

បណ្តេញជនជាតិវៀតណាមជិត ២០០នាក់ទៀតចេញពីកម្ពុជាពាក់ព័ន្ធករណី Online Scams

ស្នងការរាជធានី អំពាវនាវដល់យុវជនជៀសឆ្ងាយពីសកម្មភាពក្មេងទំនើង បើប្រព្រឹត្តល្មើសមានតែការអនុវត្តផ្លូវច្បាប់ប៉ុណ្ណោះ

មន្ត្រីជំនាញ៖ Online Scams នៅកម្ពុជា កំពុងត្រូវបានបង្ក្រាបយ៉ាងសកម្មទោះមានលក្ខណៈស្មុគស្មាញ

ជនបន្លំយកលុយពីភ្ញៀវបរទេស២ពាន់ដុល្លារ នៅផ្សារច្បារអំពៅ ត្រូវបានសមត្ថកិច្ចរាជធានីស្រាវជ្រាវឃាត់ខ្លួន និងយកថវិការជូនជនរងគ្រោះវិញ

សន្តិសុខ និង សង្គម

ការស៊ើបអង្កេត៖ អគ្គិភ័យរោងការនៅអ៊ីរ៉ាក់ បង្កឡើងដោយការធ្វេសប្រហែសយ៉ាងធ្ងន់ធ្ងរ

លទ្ធផលនៃការស៊ើបអង្កេតរបស់រដ្ឋាភិបាល លើគ្រោះមហន្តរាយអគ្គិភ័យរោងការបាននិយាយថា អគ្គិភ័យដែលបានឆាបឆេះសាលមង្គលការមានមនុស្សយ៉ាងច្រើនកកកុញ នៅក្នុងទីក្រុងភាគខាងជើងប្រទេសអ៊ីរ៉ាក់ ដែលបានសម្លាប់មនុស្សជាង១០០នាក់នោះ ត្រូវបានស្តីបន្ទោសលើ «ការធ្វេសប្រហែសទាំងស្រុង» និងកង្វះវិធានការសុវត្ថិភាព។លទ្ធផលស៊ើបអង្កេត ដែលត្រូវបានប្រកាសនៅក្នុងសន្និសីទសារព័ត៌មាន កាលពីថ្ងៃអាទិត្យ (១ តុលា) ដោយរដ្ឋមន្ត្រីមហាផ្ទៃ លោក Abdul Amir al-Shammari បាននិយាយថា ម្ចាស់សាល និងបុគ្គលិកបីនាក់ផ្សេងទៀត បានអនុញ្ញាតឱ្យមនុស្ស៩០០នាក់ចូលក្នុងកន្លែងប្រារព្ធពិធី នៅពេលដែលទីតាំងនោះត្រូវបានរចនាឡើងសម្រាប់ដាក់មនុស្សអតិបរមាចំនួន៤០០នាក់ប៉ុណ្ណោះ។លោគ Shammari បានបន្ថែមថា អគ្គិភ័យបានឆាបឆេះមនុស្សនៅខាងក្នុងសាលអាពាហ៍ពិពាហ៍នោះ ហើយក្រុមជួយសង្គ្រោះបានមានការពិបាកក្នុងការចូលទៅសង្រ្គោះពួកគេ ដោយសារតែទ្វារសម្រាប់ចេញមានតិច និងមានទំហំតូចផងនោះ។ រដ្ឋមន្ត្រីមហាផ្ទៃរូបនេះ បានកត់ត្រាអ្នកស្លាប់ចំនួន១០៧នាក់ ហើយបាននិយាយថា ក្រុមស៊ើបអង្កេតបានស្នើឱ្យរដ្ឋាភិបាលគួរតែផ្តល់ជំនួយផ្នែកហិរញ្ញវត្ថុដល់គ្រួសារអ្នកស្លាប់និងរបួសទាំងនោះ ហើយការស៊ើបអង្កេតក៏បានផ្តល់អនុសាសន៍ថា គួរតែចាត់វិធានការផ្លូវច្បាប់ប្រឆាំងនឹងក្រុមមន្ត្រីមូលដ្ឋានមួយចំនួនផងដែរ៕

ភ្លៀងមូសុងនៅឥណ្ឌា ធ្លាក់ដល់កម្រិតទាបបំផុតក្នុងរយៈពេល៥ឆ្នាំដោយសារបញ្ហាអាកាសធាតុ

នាយកដ្ឋានអាកាសធាតុររដ្ឋរបស់ឥណ្ឌា បាននិយាយកាលពីថ្ងៃសៅរ៍ (៣០ កញ្ញា) ថា កមិ្រតទឹកភ្លៀងមូសុងរបស់ប្រទេសឥណ្ឌាក្នុងឆ្នាំនេះ គឺទាបបំផុតក្នុងរយៈពេល៥ឆ្នាំ ចាប់តាំងពីឆ្នាំ២០១៨មក ដោយសារគំរូអាកាសធាតុ អ៊ែល នីញ៉ូ បានធ្វើឱ្យខែសីហា ជាខែស្ងួតបំផុតក្នុងរយៈពេលជាងមួយសតវត្សរ៍។ ខ្យល់មូសុងដែលមានសារៈសំខាន់សម្រាប់សេដ្ឋកិច្ចចំនួន៣សែនកោដិ៍ដុល្លាររបស់ឥណ្ឌា នាំមកជិត៧០ភាគរយនៃទឹកភ្លៀង ដែលប្រទេសនេះត្រូវការ សម្រាប់ដំណាំ ព្រមទាំងបំពេញអាងស្តុកទឹក និងអាងចិញ្ចឹមត្រីផងដែរ។ស្ទើរតែពាក់កណ្តាលនៃដីស្រែក្នុងប្រទេស ដែលមានប្រជាជនច្រើនជាងគេលើពិភពលោកនេះ បានខ្វះខាតប្រព័ន្ធធារាសាស្រ្ត ធ្វើឱ្យភ្លៀងមូសុងកាន់តែមានសារៈសំខាន់សម្រាប់ផលិតកម្មកសិកម្ម។ ឱនភាពទឹកភ្លៀងនៅរដូវក្ដៅ អាចធ្វើឱ្យអាហារសំខាន់ៗដូចជា ស្ករ គ្រាប់ធញ្ញជាតិ អង្ករ និងបន្លែ ឡើងថ្លៃកាន់តែខ្លាំង ព្រមទាំងធ្វើឱ្យអតិផរណាអាហារទាំងមូលកើនឡើងយ៉ាងគំហុកផងដែរ។ផលិតកម្មទាបក៏អាចជំរុញឱ្យប្រទេសឥណ្ឌា ដែលជាប្រទេសផលិតអង្ករ ស្រូវសាលី និងស្ករធំជាងគេទីពីររបស់ពិភពលោក ដាក់ការទប់ស្កាត់បន្ថែមទៀតលើការនាំចេញទំនិញទាំងនេះ។ នាយកដ្ឋានឧតុនិយមឥណ្ឌា (IMD) បាននិយាយនៅក្នុងសេចក្តីថ្លែងការណ៍មួយថា ភ្លៀងធ្លាក់ទូទាំងប្រទេស ក្នុងអំឡុងខែមិថុនា ដល់ខែកញ្ញា គឺមានកម្រិត៩៤ភាគរយ នៃរយៈពេលមធ្យមដ៏វែងរបស់វា ដែលជាកម្រិតទាបបំផុតចាប់តាំងពីឆ្នាំ២០១៨មក៕

សន្តិសុខសុវត្ថិភាពនៅតាមទីវត្តអារាម ត្រូវបានយកចិត្តទុកដាក់ការពារពីកងកម្លាំងសមត្ថកិច្ច

ភ្នំពេញ៖ នៅតាមទីវត្តអារាមនានាទាំងអស់ មិនថានៅរាជធានីភ្នំពេញ ឬតាមបណ្តាខេត្តនានានោះទេ គឺត្រូវបានយកចិត្តទុកដាក់ ពីការការពារសន្តិសុខសុវត្ថិភាព ជូនពលរដ្ឋជាពុទ្ធបរិស័ទ ដែលបានអញ្ជើញទៅកាន់បិណ្ឌដាក់បាត ដើម្បីឧទ្ទិសកុសលផលបុណ្យជូនញាតិការ ដែលបានចែកកាយរំលាយឋានទៅជាតិខាងមុខ ។ ជាក់ស្តែងនៅព្រឹកថ្ងៃទី២ ខែតុលា ឆ្នាំ២០២៣នេះ ដែលត្រូវជាថ្ងៃបិណ្ឌទី០៣ នៃពិធីបុណ្យកាន់បិណ្ឌ វត្តនិរោធរង្ស៊ី ដែលជាវត្តមួយក្នុងចំណោមវត្តអារាមជាច្រើន នៅក្នុងខណ្ឌច្បារអំពៅ នៃរាជធានីភ្នំពេញ ត្រូវបានការពារសន្តិសុខសុវត្ថិភាព ពីកម្លាំងនគរបាល កម្លាំងកងរាជអាវុធហត្ថ និងកម្លាំងប្រជាការពារផងដែរ ។ លោកវរសេនីយ៍ទោ ឡូ ភារម្យ អធិការរងនគរបាលខណ្ឌច្បារអំពៅ បានប្រាប់ BTV ឱ្យដឹងថា ពាក់ព័ន្ធនឹងសន្តិសុខសុវត្ថិភាព និងរក្សាបានរបៀបរៀបរយជូនពលរដ្ឋ នៅតាមទីតាំងវត្តអារាម វាជាកាតព្វកិច្ចចាំបាច់ ដែលកងកម្លាំងសមត្ថកិច្ចទាំងអស់ត្រូវសហការគ្នា យកចិត្តទុកដាក់ក្នុងការការពារ និងជាការបង្ការទប់ស្កាត់នូវរាល់សកម្មភាពអសន្តិសុខទាំងឡាយ ដែលអាចកើតមានឡើងបាន ។ ពលរដ្ឋ ជាពុទ្ធបរិស័ទ ដែលបានទៅធ្វើបុណ្យនៅវត្តនិរោធរង្ស៊ី ក៏បានសម្តែងនូវភាពកក់ក្តៅ ដោយមិនមានការព្រួយបារម្ភនោះឡើយ ពីបញ្ហាអសន្តិសុខ ព្រោះពួកគាត់ទាំងអស់គ្នា ក៏បានសង្កេតឃើញ ពីការការពារបានយ៉ាងល្អ និងយកចិត្តទុកដាក់ពីកងកម្លាំងសមត្ថកិច្ចទាំងអស់ផងដែរ៕

មនុស្ស១លាននាក់ចូលរួមការហែក្បួនរបស់ក្រុមចម្រុះប្រឆាំងក្នុងប្រទេសប៉ូឡូញ នៅមុនការបោះឆ្នោតថ្ងៃទី១៥ ខែតុលា

អ្នកគាំទ្រនៃក្រុមចម្រុះប្រឆាំងប៉ូឡូញ បានប្រមូលផ្តុំនៅតាមដងផ្លូវនានានៃរដ្ឋធានីវ៉ាសូវី កាលពីថ្ងៃអាទិត្យដើម្បីចូលរួម «ការដើរដង្ហែនៃបេះដូងចំនួនមួយលាន» ជាមួយនឹងការបោះឆ្នោតរបស់ប្រទេសនេះ នៅ ពីរសប្តាហ៍ទៀត។អង្គការព័ត៌មានអាល្លឺម៉ង់ Deutsche Presse-Agentur រាយការណ៍ថា មនុស្សជិត មួយលាននាក់ បានចូលរួមក្នុងបាតុកម្មដែលដឹកនាំដោយអតីតនាយករដ្ឋមន្ត្រី ដូណាល់ ថាស(Donald Tusk)។ ការធ្វើបាតុកម្មនេះ ធ្វើឡើង ដើម្បីប្រឆាំងនឹងគណបក្សច្បាប់ និងយុត្តិធម៌ ដែលកំពុងគ្រប់គ្រងអំណាច។លោកថាស បានហៅចលនាប្រឆាំងនេះថាជា«កម្លាំងដែលមិនអាចបញ្ឈប់បាន» និងជា «សញ្ញាសម្រាប់ការចាប់កំណើតឡើងវិញរបស់ប្រទេសប៉ូឡូញ» នេះបើយោងតាមទីភ្នាក់ងារសារព័ត៌មានប៉ូឡូញ។លោក បាននិយាយនៅក្នុងសេចក្តីថ្លែងការណ៍មួយនៅលើគេហទំព័ររបស់គណបក្សរបស់លោក គឺ ផ្លេត ហ្វ័រម៉ា អូប៊ីវ៉ាតែលស្កា (Plat forma Obywatelska)ថា អ្វីដែលមិនអាចទៅរួច អាចទៅរួច។ នៅពេលដែលខ្ញុំឃើញមានអ្នកគាំទ្រដ៏ច្រើន នៅពេលដែលខ្ញុំឃើញទឹកមុខញញឹមរបស់ពួកគេទាំងអស់គ្នានេះ ខ្ញុំមានអារម្មណ៍ល្អ ដែលពេលវេលាដ៏សំខាន់នេះ កំពុងក្លាយជាប្រវត្តិសាស្ត្រនៃមាតុភូមិរបស់យើង»។

មន្ត្រីអ៊ីរ៉ង់ទទួលស្គាល់តួនាទីរបស់ប្រទេស ក្នុងការទម្លាក់គ្រាប់បែកភេរវកម្ម ដែលបានសម្លាប់សមាជិកយោធាអាមេរិកចំនួន២៤១នាក់

តំណាងសាធារណៈរដ្ឋឥស្លាមអ៊ីរ៉ង់ប្រចាំប្រទេសលីបង់ បានចេញសេចក្តីប្រកាសជាសាធារណៈលើកដំបូងអំពីតួនាទីរបស់របបអ៊ីរ៉ង់ ក្នុងការសម្លាប់រង្គាលលើយោធា និងបុគ្គលិកការទូតអាមេរិក នៅដើមទសវត្សរ៍ឆ្នាំ ១៩៨០នៅទីក្រុងបេរូត។វិទ្យាស្ថានស្រាវជ្រាវប្រព័ន្ធផ្សព្វផ្សាយមជ្ឈិមបូព៌ា (MEMRI) មានមូលដ្ឋាននៅទីក្រុងវ៉ាស៊ីនតោន ហើយជាលើកបានបកប្រែបទសម្ភាសន៍អំពីគ្រាប់បែកជាមួយលោក សាយយ៉េដ អ៊ីសសា តាបាតាបៃ (Sayyed Issa Tabatabai) ដែលបម្រើការជាអ្នកតំណាងមេដឹកនាំជាន់ខ្ពស់អ៊ីរ៉ង់ លោកអាលិ ខាមីណេ ( Ali Khamenei) នៅក្នុងប្រទេសលីបង់។ទីភ្នាក់ងារព័ត៌មានសាធារណៈរដ្ឋឥស្លាម (IRNA) ដែលគ្រប់គ្រងដោយរដ្ឋ បានពិនិត្យយ៉ាងរហ័សនូវការបង្ហាញដ៏អាក្រក់ដែល លោក តាបាតាបៃ បានធ្វើអំពីតួនាទីរបស់អ៊ីរ៉ង់ក្នុងការបំផ្ទុះគ្រាប់បែកអត្តឃាតទៅលើជនជាតិអាមេរិក ប៉ុន្តែ MEMRI បានរក្សាទុកច្បាប់ចម្លងមួយច្បាប់។ប្រទេសអ៊ីរ៉ង់និងជាសម្ព័ន្ធមិត្តយុទ្ធសាស្ត្រដ៏សំខាន់របស់ខ្លួន ចលនាភេរវកម្មហេសបូឡាហ៍ (Hezbollah) ដែលកំណត់ដោយសហរដ្ឋអាមេរិក នៅក្នុងប្រទេសលីបង់ ត្រូវបានគេស្តីបន្ទោសចំពោះការទម្លាក់គ្រាប់បែកលើស្ថានទូតអាមេរិកនៅទីក្រុងបេរូតក្នុងឆ្នាំ១៩៨៣ ដែលក្នុងនោះមនុស្ស៦៣នាក់រួមទាំងជនជាតិអាមេរិក១៧នាក់ ត្រូវបានស្លាប់ ហើយអ្នកបំផ្ទុះគ្រាប់បែកអត្តឃាតពីរនាក់ទៀត បានបំផ្ទុះបន្ទាយទាហានរបស់សមាជិកអាមេរិក និងបារាំងនៃកងកម្លាំងពហុជាតិនៅប្រទេសលីបង់ក្នុងឆ្នាំ១៩៨៣ ដែលក្នុងនោះទាហានម៉ារីនអាមេរិកចំនួន ២២០នាក់ ទាហានជើងទឹកអាមេរិកចំនួន ១៨នាក់ និងទាហានអាមេរិកចំនួន ៣នាក់ បានបាត់បង់ជីវិត។ កងទ័ពបារាំង៥៥នាក់ ក៏ត្រូវបានគេសម្លាប់ ក្នុងការវាយប្រហារភេរវកម្មនោះដែរ។

ពលរដ្ឋកាណាដាកាន់សាសនាស៊ីក ដឹងគុណកាណាដា បន្ទាប់ពីការចោទប្រកាន់ឥណ្ឌា ខណៈអ្នកខ្លះមានការភ័យខ្លាច

ពលរដ្ឋកាណាដាកាន់សាសនាស៊ីក បានដឹងគុណចំពោះនាយករដ្ឋមន្ត្រីកាណាដា លោក Justin Trudeau ដែលបានបញ្ចេញសំឡេងគាំទ្រចំពោះការភ័យខ្លាចរបស់ពួកគេ ហើយក្រោកឈរឡើងប្រឆាំងនឹងប្រទេសឥណ្ឌា ខណៈអ្នកខ្លះទៀតមានការភ័យខ្លាចការសងសឹកពីប្រទេសមានប្រជាជនច្រើនជាងគេលើពីភពលោកមួយនោះ ក្នុងហានិភ័យនៃប្រតិកម្មតបយ៉ាងធ្ងន់ធ្ងរពីរដ្ឋធានី ញ៉ូវ ដេល្លី ដែលលោក Trudeau បាននិយាយថាអាចជាប់ពាក់ព័ន្ធនឹងការសម្លាប់មេដឹកនាំផ្តាច់ខ្លួនសាសនាស៊ីក។រដ្ឋាភិបាលឥណ្ឌាបានចាត់ទុកមេដឹកនាំសាសនាស៊ីក លោក Hardeep Singh Nijjar ដែលជាពលរដ្ឋកាណាដា និងត្រូវបានបាញ់សម្លាប់កាលពីខែមិថុនា ក្នុងខេត្តប្រ៊ីដធីស កូឡំប៊ី របស់កាណាដា ថាជាភេរវករ ដោយសារតែការតស៊ូមតិរបស់លោក ក្នុងការទាមទាររដ្ឋឯករាជ្យ កាលីស្ថាន សម្រាប់ពលរដ្ឋសាសនាស៊ីក។ប្រទេសឥណ្ឌា បានបដិសេធយ៉ាងដាច់ខាត នូវការជាប់ពាក់ព័ន្ធណាមួយរបស់ខ្លួនក្នុងការសម្លាប់លោក Nijjar ដែលបានកើតឡើងនៅចំណតរថយន្តនៃវិហារស៊ីក នៅតំបន់ Surrey ក្នុងខេត្តប្រ៊ីដធីស កូឡំប៊ី របស់កាណាដា ប៉ុន្តែពលរដ្ឋកាណាដាសាសនាស៊ីក មិនជឿជាក់លើឥណ្ឌានោះទេ ហើយប្រជាជនមួយចំនួន ដែលជាអ្នកគាំទ្រការស្វែងរករដ្ឋឯករាជ្យ កាលីស្ថាន មានការភ័យខ្លាចយ៉ាងខ្លាំង។ប្រទេសទាំងពីរបានបណ្តេញអ្នកការទូតរវាងប្រទេសទាំងពីរ នៅក្នុងការសងសឹកមួយ បន្ទាប់ពីការប្រកាសដ៏កក្រើកពីលោកនាយករដ្ឋមន្ត្រីកាណាដា Trudeau កាលពីសប្តាហ៍មុន ប៉ុន្តែឥណ្ឌាបានចាត់វិធានការកាន់តែហួសហេតុ ដោយបានចេញការព្រមានអំពីការធ្វើដំណើរ និងបញ្ឈប់ការផ្តល់ទិដ្ឋាការដល់ជនជាតិកាណាដា។ ចំណាត់ការរបស់លោក Trudeau ប្រថុយប្រថាននឹងការផ្លាស់ប្តូរយុទ្ធសាស្ត្រសេដ្ឋកិច្ច និងនយោបាយ ដែលប្រទេសលោកខាងលិចជាច្រើនកំពុងសំដៅឆ្ពោះទៅកាន់ប្រទេសឥណ្ឌា ដើម្បីប្រឆាំងនឹងប្រទេសចិន៕

នីហ្ស៊េរីយ៉ាផ្តល់ការដំឡើងប្រាក់ឈ្នួល មុនពេលកូដកម្មការងារ

ប្រធានាធិបតីនីហ្ស៊េរីយ៉ា លោក Bola Tinubu កាលពីថ្ងៃអាទិត្យ (១ តុលា) បានប្រកាសការដំឡើងប្រាក់ឈ្នួលបណ្តោះអាសន្ន សម្រាប់កម្មករដែលមានប្រាក់ចំណូលទាប និងផ្ដល់រថយន្តក្រុងធំៗដែលដំណើរការដោយហ្គាស ដើម្បីបន្ធូរបន្ថយផលប៉ះពាល់នៃការដកប្រាក់ឧបត្ថម្ភប្រេងសាំង ត្រឹមតែរយៈពេលពីរថ្ងៃ មុនពេលសហជីពកម្មករចាប់ផ្តើមធ្វើកូដកម្មមិនកំណត់រយៈពេល។លោក Tinubu បានលុបចោលប្រាក់ឧបត្ថម្ភ ដែលមានអាយុកាលរាប់ទសវត្សរ៍ ក្នុងអំឡុងពេលសម្ពោធរដ្ឋាភិបាលរបស់លោកកាលពីខែឧសភា ហើយបានបញ្ចប់ការរឹតបន្តឹងលើការប្តូរប្រាក់បរទេស ដែលបាននាំឱ្យមានការកើនឡើងតម្លៃនៃការចំណាយប្រចាំថ្ងៃ និងបណ្ដាលឲ្យសហជីពដែលមានកំហឹងជាមួយរដ្ឋភិបាលរបស់លោកយ៉ាងខ្លាំង។ លោក Tinubu បាននិយាយថា បន្ទាប់ពីកិច្ចពិភាក្សាជាមួយកម្មករ អាជីវកម្ម និងអ្នកពាក់ព័ន្ធផ្សេងទៀត បុគ្គលិករដ្ឋាភិបាលសហព័ន្ធនឹងទទួលបានប្រាក់ឈ្នួលបន្ថែមចំនួន២៥.០០០ណៃរ៉ា (រូបិយប័ណ្ណនីហ្ស៊េរីយ៉ា) ក្នុងមួយខែសម្រាប់រយៈពេលប្រាំមួយខែខាងមុខ ដែលជាការដំឡើងតូចមួយ ដោយលោកបាននិយាយថា គឺជាការចាំបាច់ដើម្បីជៀសវាងការជំរុញតួលេខអតិផរណាចំនួនដល់ទៅពីរខ្ទង់នៅក្នុងប្រទេសនេះ។នោះមានន័យថា ប្រាក់ឈ្នួលអប្បបរមានៅក្នុងប្រទេសនីហ្ស៊េរីយ៉ា កើនឡើងរហូតដល់៥៥.០០០ណៃរ៉ា ដែលស្មើនឹង៧១ដុល្លារ ពីតួលេខប្រាក់ឈ្នួលកាលពីមុន ដែលមានត្រឹមតែ៣០០០០ណៃរ៉ាប៉ុណ្ណោះ។ ប៉ុន្តែសហជីពកម្មករចង់ឲ្យលោកប្រធានាធិបតី Tinubu ផ្តល់ប្រាក់ឧបត្ថម្ភថ្លៃប្រេងឡើងវិញ ហើយពួកគេក៏ធ្លាប់បានទាមទារប្រាក់ឈ្នួលអប្បបរមាចំនួន២០ម៉ឺនណៃរ៉ា ផងដែរ៕

ទួរគីវាយប្រហារក្រុមឧទ្ទាមឃឺដ បន្ទាប់ពីការបំផ្ទុះគ្រាប់បែកនៅរដ្ឋធានីអង់ការ៉ា

ទួរគីនិយាយថា ខ្លួនបានធ្វើការវាយប្រហារតាមអាកាសជាច្រើនលើក្រុមឧទ្ទាមឃឺដ នៅភាគខាងជើងប្រទេសអ៊ីរ៉ាក់ រយៈពេលប៉ុន្មានម៉ោងបន្ទាប់ពីការបំផ្ទុះគ្រាប់បែកអត្តឃាត បានវាយប្រហារក្រសួងមហាផ្ទៃរបស់ប្រទេសទួរគី។ រដ្ឋាភិបាលទួរគីបាននិយាយថា គោលដៅចំនួន២០ទីតាំង ត្រូវបានបំផ្លាញ ហើយពួកសកម្មប្រយុទ្ធជាច្រើនមកពីក្រុមឧទ្ទាមរបស់គណបក្សពលករឃើឌីស្ថាន (PKK) ដែលបានហាមឃាត់ ត្រូវបានបង្រ្កាប។គណបក្ស PKK បាននិយាយថា ការបំផ្ទុះគ្រាប់បែកកាលពីព្រឹកថ្ងៃអាទិត្យនៅក្នុងរដ្ឋធានីអង់ការ៉ា ត្រូវបានធ្វើឡើងដោយក្រុមដែលមានទំនាក់ទំនងជាមួយពួកគេ ដោយសមាជិកម្នាក់របស់ក្រុមនោះបានបំផ្ទុះខ្លួនឯង និងអ្នកវាយប្រហារទីពីរត្រូវបានសម្លាប់ដោយនគរបាល ហើយមន្ត្រីនគរបាលពីរនាក់បានរងរបួស។ឧបទ្ទវហេតុបំផ្ទុះគ្រាប់បែកអត្តឃាតកាលពីព្រឹកថ្ងៃអាទិត្យដោយក្រុមឧទ្ទាមឃឺដ បានចាប់ផ្តើមនៅម៉ោងប្រហែល៩:៣០នាទីព្រឹក (ម៉ោងក្នុងស្រុក) នៅពេលដែលអ្នកវាយប្រហារម្នាក់បានចេញពីឡានរបស់ពួកគេ ហើយបានគប់គ្រាប់បែកតូចមួយទៅកាន់អគារក្រសួងមហាផ្ទៃដើម្បីរំខានដល់សន្តិសុខ។ ក្រោយមក អ្នកវាយប្រហារទីពីរបានបើកការបាញ់ប្រហារទៅលើអ្នកយាមនៅមាត់ទ្វារក្រសួង មុននឹងបំផ្ទុះគ្រាប់បែកអត្តឃាត។គណបក្សពលករឃើឌីស្ថាន (PKK) ត្រូវបានចាត់ទុកថាជាក្រុមភេរវកម្មនៅក្នុងប្រទេសទួរគី សហភាពអឺរ៉ុប ចក្រភពអង់គ្លេស និងសហរដ្ឋអាមេរិក។ ក្រសួងការពារជាតិទួរគីបាននិយាយថា ការវាយប្រហារតាមអាកាសកាលពីថ្ងៃអាទិត្យដោយរដ្ឋាភិបាលទួរគី បានកំណត់គោលដៅរូងភ្នំ ឃ្លាំង និងលេណដ្ឋានដែលប្រើប្រាស់ដោយក្រុមបះបោររបស់គណបក្ស PKK ផងដែរ៕

វិបត្តិមនុស្សធម៌នៅតាមព្រំដែនអាមេរិក-ម៉ិកស៊ិក ភាគខាងត្បូងកើនឡើងធ្ងន់ធ្ងរ ខណៈការឆ្លងដែនខុសច្បាប់ហក់ឡើងខ្ពស់

យោងតាមទិន្នន័យបឋមរបស់រដ្ឋាភិបាលដែលទទួលបានដោយសារព័ត៌មាន CBS News ក្រុមទីភ្នាក់ងារអន្តោប្រវេសន៍របស់សហរដ្ឋអាមេរិកបានដំណើរការជនអន្តោប្រវេសន៍ជាង ២០០.០០០ នាក់ ដែលបានឆ្លងកាត់ព្រំដែនភាគខាងត្បូងដោយខុសច្បាប់កាលពីខែកញ្ញាថ្មីៗនេះ ជាកម្រិតខ្ពស់បំផុត ដែលត្រូវបានកត់ត្រាក្នុងឆ្នាំ ២០២៣ នេះ ស្របពេលរដ្ឋបាលរបស់លោកប្រធានាធិបតី Biden ព្យាយាមទប់ទល់នឹងការធ្វើអន្តោប្រវេសន៍ដ៏ច្រើន ដែលកំពុងគ្រប់គ្រងតំបន់នេះ ។ ស្ថិតិផ្ទៃក្នុងពីនាយកដ្ឋានសន្តិសុខមាតុភូមិបានបង្ហាញថា ក្រុមទីភ្នាក់ងារល្បាតព្រំដែនកាលពីខែមុនបានកត់ត្រាចំនួនជនអន្តោប្រវេសន៍ប្រមាណ២១០.០០០នាក់ ដែលបានចូលទៅក្នុងទឹកដីសហរដ្ឋអាមេរិកដោយគ្មានការអនុញ្ញាតនៅចន្លោះកំពង់ផែផ្លូវការច្រកចូលតាមព្រំដែនម៉ិកស៊ិក ដែលកើនឡើងពី១៨១.០០០នាក់ កាលពីខែសីហា ។ តួលេខនៃចំនួនជនអន្តោប្រវេសន៍ កាលពីខែកញ្ញា គឺជាតួលេខខ្ពស់បំផុតចាប់តាំងពីខែធ្នូ ឆ្នាំ ២០២២នៅពេលអង្គភាពល្បាតព្រំដែនបានចាប់ខ្លួនជនអន្តោប្រវេសន៍ ចំនួន ២២២.០០០នាក់ ជាតួលេខប្រចាំខែខ្ពស់បំផុតទីពីរក្នុងកំណត់ត្រា។ កាលពីខែឧសភា ឆ្នាំ ២០២២ កន្ងទៅ អង្គភាពល្បាតព្រំដែន បានរាយការណ៍ពីអន្តោប្រវេសន៍ ចំនួន ២២៤.០០០នាក់ ដែលជាចំនួនខ្ពស់បំផុតមិនធ្លាប់មាន។ត្រឹមតែជាលើកទីពីរក្នុងប្រវត្តិសាស្ត្រសហរដ្ឋអាមេរិក ទិន្នន័យពីនាយកដ្ឋានសន្តិសុខមាតុភូមិបានដែលពុំបានផ្សព្វផ្សាយបង្ហាញថា ជនអន្តោប្រវេសន៍នៅតាមព្រំដែនភាគខាងត្បូងសហរដ្ឋអាមេរិកបានកើនលើស២ លាននាក់។ ទិន្នន័យទាក់ទងនឹងឆ្នាំសារពើពន្ធ២០២៣នេះ ដែលបានបញ្ចប់កាលពីចុងសប្តាហ៍នេះ ។ ជនអន្តោប្រវេសន៍សរុបចំនួន ២,២ លាននាក់ក្នុងឆ្នាំសារពើពន្ធ 2022 នៅតែជាចំនួនខ្ពស់បំផុតប្រចាំឆ្នាំ៕

ក្រុមអ្នកជំនាញ៖ អាហ្រ្វិកស្ថិតក្នុងស្ថានភាពដ៏គ្រោះថ្នាក់ ខណៈដែលប្រទេសលទ្ធិប្រជាធិបតេយ្យកាន់តែច្រើនធ្លាក់ចូលរដ្ឋប្រហារយោធា

នៅប៉ុន្មានម៉ោងនៅពេលព្រឹក បុរសមួយក្រុមស្លៀកពាក់ឯកសណ្ឋានយោធា បានលេចមុខតាមកញ្ចក់ទូរទស្សន៍រដ្ឋ ហើយអះអាងថា បានដណ្តើមអំណាចពីប្រធានាធិបតី ដែលគ្រួសាររបស់គាត់ បានគ្រប់គ្រងប្រទេសអស់ជាច្រើនទសវត្សរ៍មកហើយ។នេះគឺជាឈុតមួយដែលបានចាក់ផ្សាយថ្មីៗបំផុតនៅក្នុងប្រទេសហ្គាបុង ក្នុងខែសីហា ប៉ុន្តែបានស្គាល់ផងដែរនៅក្នុងផ្នែកនៃទ្វីបអាហ្រ្វិកនេះ ដែលជាតំបន់ដ៏ធំដែលគេស្គាល់ថាជា«ខ្សែក្រវាត់រដ្ឋប្រហារ» ជាមួយនឹងខ្សែសង្វាក់ជាបន្តបន្ទាប់នៃមេដឹកនាំយោធាដែលលាតសន្ធឹងពីឆ្នេរសមុទ្រមួយទៅឆ្នេរសមុទ្រមួយ ទៀត។យ៉ាងហោចណាស់មានរដ្ឋប្រហាររាប់សិបនៅអាហ្រ្វិកខាងលិច និងកណ្តាល ចាប់តាំងពីឆ្នាំ ២០២០ ដោយ៨លើកបានជោគជ័យ ខណៈពេលដែលប្រទេសផ្សេងទៀតបរាជ័យ ឬឈានដល់ជម្លោះ។ កត្តាជំរុញមានភាពស្មុគ្រស្មាញ និងមានភាពខុសប្លែកគ្នា ប៉ុន្តែអ្នកជំនាញហាក់ដូចជាយល់ស្របថា អាហ្រ្វិក គឺស្ថិតនៅក្នុងស្ថានភាពដ៏គ្រោះថ្នាក់។ តើលទ្ធិប្រជាធិបតេយ្យកាន់តែច្រើននៅលើទ្វីបដែលធំជាងគេទីពីររបស់ពិភពលោក នឹងរងគ្រោះដោយសារការកាន់កាប់ដោយយោធា ឬតើពួកគេនឹងធ្វើការអំពាវនាវដ៏ខ្លាំងក្លា ដើម្បីឲ្យមានអភិបាលកិច្ចកាន់តែប្រសើរឡើងឬយ៉ាងណា?រដ្ឋប្រហារនៅប្រទេសហ្គាបុង បានកើតឡើងតែប៉ុន្មានម៉ោង បន្ទាប់ពីប្រធានាធិបតី លោក អាលី បុងហ្គោ អនឌីមបាស (Ali Bongo Ondimba) បានឈ្នះការបោះឆ្នោតឡើងវិញសម្រាប់អាណត្តិទីបី នៅក្នុងការបោះឆ្នោតមួយ ដែលត្រូវបានរិះគន់ដោយអ្នកសង្កេតការណ៍អន្តរជាតិ។ មេដឹកនាំរដ្ឋប្រហារ បានដាក់លោក បុងហ្គោឲ្យស្ថិតក្នុងការឃុំខ្លួនក្នុងផ្ទះរយៈពេលមួយសប្តាហ៍។ លោកបានក្លាយជាប្រធានាធិបតីនៃប្រទេសអាហ្វ្រិកកណ្តាលដែលសម្បូរប្រេងនេះនៅឆ្នាំ២០០៩ បន្ទាប់ពីមរណភាពរបស់ឪពុករបស់ខ្លួនដែលបានគ្រប់គ្រងអំណាច តាំងពីឆ្នាំ១៩៦៧។

បណ្ដាញសង្គម

ព័ត៌មានថ្មីៗ

លោក Trump និយាយថា អាមេរិកនិងអ៊ីរ៉ង់ចុះសម្រុងគ្នាខ្លាំងណាស់

ភ្លៀងធ្លាក់ខ្លាំងបង្កការជន់លិចនៅទីក្រុងមជ្ឈមណ្ឌលហិរញ្ញវត្ថុម៉ុមបៃប្រទេសឥណ្ឌា

អាហ្វ្រិកខាងត្បូងអះអាងថា មនុស្សជាង ៩០០នាក់ ត្រូវបានចាប់ខ្លួន អំឡុងបាតុកម្មប្រឆាំងអន្តោប្រវេសន៍

UN ៖ ការរីករាលដាលឆ្លងជំងឺអេបូឡា អាចនឹងធ្វើឲ្យអាហ្វ្រិកខាតបង់ប្រាក់ ៣,៦ ពាន់លានដុល្លារ

ក្រុមជួយសង្រ្គោះស្វែងរកអ្នកជាប់ខ្លួនក្រោយប្លុកអគារផ្ទះល្វែងបាក់នៅទីក្រុងអាតែន ប្រទេសក្រិក

ទិន្នន័យអង្គការណាសាបង្ហាញថា អគារប្រហែល ៥៨.៨៧០ខ្នង រងការខូចខាតក្នុងការរញ្ជួយដីនៅវេណេស៊ុយអេឡា

មនុស្ស ១២នាក់ស្លាប់ ក្រោយទឹកជំនន់វាយប្រហារតំបន់ជាច្រើនរបស់ហ្គាណា

ក្មេងៗ ១៤នាក់ស្លាប់ ក្នុងហេតុកាណ៍បាក់ដំបូលមជ្ឈមណ្ឌលសិក្សានៅប៉ាគីស្ថាន

លោក Trumpរាយការណ៍ប្រាក់ចំណូលជាង១,៤ពាន់លានដុល្លារពីការបណ្តាក់ទុនគ្រីបតូ

មេដឹកនាំបេឡារុសបំពេញទស្សនកិច្ចទៅកាន់ឥណ្ឌូនេស៊ី ជាផ្នែកមួយនៃដំណើរទស្សនកិច្ចនៅអាស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877