BTV NEWS

អាជ្ញាធរនិងមន្ត្រីជំនាញខេត្តកំពង់ឆ្នាំងចុះរៀបចំសណ្ដាប់ធ្នាប់តាមដងផ្លូវជាតិលេខ៥ ក្នុងស្រុកកំពង់ត្រឡាច

បណ្តេញជនជាតិវៀតណាមជិត ២០០នាក់ទៀតចេញពីកម្ពុជាពាក់ព័ន្ធករណី Online Scams

ស្នងការរាជធានី អំពាវនាវដល់យុវជនជៀសឆ្ងាយពីសកម្មភាពក្មេងទំនើង បើប្រព្រឹត្តល្មើសមានតែការអនុវត្តផ្លូវច្បាប់ប៉ុណ្ណោះ

មន្ត្រីជំនាញ៖ Online Scams នៅកម្ពុជា កំពុងត្រូវបានបង្ក្រាបយ៉ាងសកម្មទោះមានលក្ខណៈស្មុគស្មាញ

សន្តិសុខ និង សង្គម

រដ្ឋអាជ្ញាលីប៊ី៖ ការស៊ើបអង្កេត ជុំវិញការធ្វេសប្រហែស កំពុងដំណើរការបន្ទាប់ពីមានការបាក់ទំនប់

រដ្ឋអាជ្ញាសាធារណៈ បាននិយាយកាលពីថ្ងៃសុក្រ (ទី១៥ ខែកញ្ញា) ថា ការស៊ើបអង្កេត កំពុងដំណើរការ ជុំវិញការធ្វេសប្រហែស បន្ទាប់ពីទំនប់ចំនួន២ បានបាក់ នៅទីក្រុង Derna របស់ប្រទេសលីប៊ី ដែលនាំឲ្យមានគ្រោះមហន្តរាយទឹកជំនន់ ដែលបានសម្លាប់មនុស្សរាប់ពាន់នាក់។ថ្លែងទៅកាន់ប្រព័ន្ធផ្សព្វផ្សាយ លោក Al-Siddiq Al-Sour បាននិយាយថា បច្ចុប្បន្នការិយាល័យរបស់លោកកំពុងស៊ើបអង្កេតលើការធ្វេសប្រហែស ដែលអាចកើតមានពីអាជ្ញាធរមូលដ្ឋាន ក៏ដូចជារដ្ឋាភិបាលបន្តបន្ទាប់គ្នា ដើម្បីកំណត់ថា តើអ្នកណាជាអ្នកទទួលខុសត្រូវ ចំពោះកង្វះការថែទាំទំនប់។ សូមបញ្ជាក់ថា ទឹកជំនន់ដ៏ធំ ដែលបណ្ដាលមកពីព្យុះដ៏ខ្លាំងមួយ បានបំបាក់ទំនប់ កាលពីយប់ថ្ងៃអាទិត្យសប្ដាហ៍កន្លងទៅ និងបានហូរកាត់ភាគខាងកើតទីក្រុង Derna។ ចំនួនអ្នកស្លាប់ ដែលត្រូវបានបញ្ជាក់ដោយមន្ត្រី ក្នុងគ្រោះទឹកជំនន់នេះ មានភាពខុសគ្នា ដោយចំនួនទាំងអស់ គឺរាប់ពាន់នាក់ ហើយរាប់ពាន់នាក់ទៀតស្ថិតនៅក្នុងបញ្ជីអ្នកបាត់ខ្លួន៕

គ្រប់១ឆ្នាំហើយ គិតចាប់តាំងពី Mahsa Amini ត្រូវបានចាប់ខ្លួន និងស្លាប់ក្រោមការឃុំឃាំងរបស់អ៊ីរ៉ង់

ថ្ងៃទី១៦ ខែកញ្ញាគឺជាខួបមួយឆ្នាំ គិតចាប់តាំងពីនារីឈ្មោះ Mahsa Amini បានស្លាប់ ក្រោមការឃុំឃាំងពីសំណាក់នគរបាលសីលធម៌របស់ប្រទេសអ៊ីរ៉ង់។អ្នកនាង Amini វ័យ ២២ឆ្នាំ បានស្លាប់ បន្ទាប់ពីមានអាការសន្លប់ ក្រោយការចាប់ខ្លួន នៅទីក្រុងតេអេរ៉ង់ ពីបទ «ស្លៀកពាក់មិនសមរម្យ» ដែលបញ្ហានេះទាក់ទាញបានការចាប់អារម្មណ៍យ៉ាងខ្លាំង ជុំវិញសិទ្ធិរបស់ស្ត្រី នៅក្នុងប្រទេសអ៊ីរ៉ង់។ហេតុការណ៍នោះ បានបង្កឲ្យមានការខឹងសម្បាយ៉ាងខ្លាំងជាច្រើនឆ្នាំ ចំពោះបញ្ហានានា រាប់តាំងពីការរឹតបន្តឹងការគ្រប់គ្រងសង្គម និងនយោបាយ រហូតដល់ភាពលំបាកខាងសេដ្ឋកិច្ច ដែលបង្កឲ្យមានវិបត្តិភាពស្របច្បាប់ដ៏អាក្រក់បំផុតរបស់ប្រព័ន្ធគ្រប់គ្រងដែលយកច្បាប់វិន័យសាសនាជាធំនេះ អស់ជាច្រើនទសវត្សរ៍។ការតវ៉ាប្រឆាំងរដ្ឋាភិបាលរយៈពេលជាច្រើនខែ បានរាលដាលទៅជារូបភាបប្រឆាំងយ៉ាងធំបំផុត ចំពោះអាជ្ញាធរអ៊ីរ៉ង់ ក្នុងរយៈពេលជាច្រើនឆ្នាំ ដោយមនុស្សជាច្រើន បានអំពាវនាវឲ្យបញ្ចប់ការគ្រប់គ្រងជាងបួនទសវត្សរ៍ តាមច្បាប់វិន័យរបស់សាសនាឥស្លាមនេះ៕

គ្រោះមហន្តរាយទឹកជំនន់ បានធ្វើឲ្យទីក្រុងកំពង់ផែរបស់លីប៊ី រងការបំផ្លិចបំផ្លាញទាំងស្រុង

ទិដ្ឋភាពថតពីលើអាកាសនៃទីក្រុង Derna ជាទីក្រុងនៅឆ្នេរសមុទ្រនៃប្រទេសលីប៊ី ដែលស្ទើរតែត្រូវបានទឹកហូរនាំទៅអស់គ្មានសល់អ្វី ដោយគ្រោះទឹកជំនន់ដ៏មហន្តរាយ នាពេលថ្មីៗនេះ បានបង្ហាញឲ្យឃើញពីទំហំនៃការបំផ្លិចបំផ្លាញនេះ។យោងតាមអឌ្ឍចន្ទក្រហមលីប៊ី បានឲ្យដឹងថា ទឹកជំនន់ដ៏ខ្លាំងក្លា ដែលបណ្តាលមកពីការបាក់ទំនប់ទឹកចំនួន២ ដោយសារមានភ្លៀងធ្លាក់ខ្លាំងពីព្យុះមេឌីទែរ៉ាណេ Daniel បានវាយប្រហារតំបន់ទាំងមូល ក្នុងទីក្រុង Derna កាលពីយប់ថ្ងៃអាទិត្យ តាមពេលវេលាក្នុងស្រុក ដោយបានឆក់យកជីវិតមនុស្សយ៉ាងហោចណាស់ ១១.៣០០នាក់ និងធ្វើឲ្យ ១០.០០០នាក់ផ្សេងទៀត បាត់ខ្លួន គិតត្រឹមថ្ងៃព្រហស្បតិ៍ (ទី១៤ ខែកញ្ញា)។តួលេខពីអង្គការទេសន្តរប្រវេសន៍អន្តរជាតិ (IOM) កាលពីថ្ងៃសុក្រ (ទី១៥ ខែកញ្ញា) បានបង្ហាញថា នៅក្នុងទីក្រុង Derna នេះ អគារចំនួន ២.២១៧អាគារ ត្រូវបានបំផ្លិចបំផ្លាញ។បណ្តាញទូរទស្សន៍សកលរបស់ប្រទេសចិន (CGTN) នៅថ្ងៃសៅរ៍ (ទី១៦ ខែកញ្ញា) នេះ បានចេញផ្សាយរូបភាពវីដេអូថតដោយយានដ្រូន ដែលបង្ហាញពីក្រុមជួយសង្គ្រោះធ្វើការដោយមិននឿយហត់ នៅទីកន្លែងនៃគ្រោះមហន្តរាយនោះ ដើម្បីស្វែងរកអ្នកនៅរស់។ក្នុងវីដេអូរយៈពេល ១នាទី ដែលត្រូវបានថត កាលពីថ្ងៃសុក្រ តំបន់ទាំងអស់ បានរងការខូចខាត ដោយអគារជាច្រើន ទាំងរលំបាក់ទៅជាគំនរកម្ទេចថ្ម ឬត្រូវបានទឹកហូរនាំចេញពីទីតាំងដើម។ គេឃើញថា ក្រុមជួយសង្គ្រោះ ជាមួយអ្នកជីករុករក កំពុងធ្វើការនៅតំបន់គ្រោះមហន្តរាយ កាយយកកម្ទេចថ្ម និងសង្ឃឹមថា រកឃើញអ្នកនៅរស់រានមានជីវិត៕

អាជ្ញាធរខណ្ឌដូនពេញ ចុះណែនាំដល់ម្ចាស់អាជីវកម្ម រំលោភចិញ្ជើមផ្លូវជាប្រចាំក្នុងមូលដ្ឋាន

ភ្នំពេញ៖ អាជ្ញាធរខណ្ឌដូនពេញបានបន្តយកចិត្តទុកដាក់ពីបញ្ហាបរិស្ថានអនាម័យ និងសណ្ដាប់ធ្នាប់សាធារណៈជាប្រចាំទាំងយប់ទាំងថ្ងៃ ដើម្បីរក្សាសោភ័ណភាពទីក្រុងភ្នំពេញ ព្រោះមូលដ្ឋានខណ្ឌដូនពេញ ជាទីប្រជុំជននិងរមណីយដ្ឋានជាច្រើន មានភ្ញៀវជាតិ និងអន្តរជាតិច្រើនផងដែរ មកលេងកម្សាន្ត។ជាក់ស្ដែងនៅយប់ថ្ងៃទី១៥ ខែកញ្ញាឆ្នាំ ២០២៣នេះ លោក ចាប ឌីណា អភិបាលរងនៃគណៈអភិបាលខណ្ឌដូនពេញពេញបានដឹកនាំគណៈបញ្ជាការឯកភាពខណ្ឌចុះអប់រំណែនាំដល់ម្ចាស់អាជីវកម្ម គ្រប់ប្រភេទដែលប្រកបអាជីវកម្មតាមដងផ្លូវលេខ១៣០ ផ្លូវលេខ១៣៦ ជារួមក្នុងមូលដ្ឋានសង្កាត់ផ្សារកណ្ដាលទី១ ខណ្ឌដូនពេញ ដែលប្រើប្រាស់ចិញ្ចឹមផ្លូវលើសពី១ភាគ៣ សូមឲ្យរក្សាចិញ្ចើមផ្លូវដើម្បីឲ្យអ្នកថ្មើជើងងាយស្រួលធ្វើដំណើរ។លោក ចាប ឌីណា អភិបាលរងទទួលបន្ទប់បរិស្ថានអនាម័យសណ្ដាប់ធ្នាប់សាធារណៈ បានឲ្យ BTV ដឹងថា ដោយមានការចង្អុលបង្ហាញពីលោក ជា ខេមា អភិបាលនៃគណៈអភិបាលខណ្ឌភ្នំពេញបានចាត់ឲ្យលោក ចុះដឹកនាំកម្លាំងគណៈបញ្ជាការឯកភាពខណ្ឌ រៀបចំបរិស្ថានអនាម័យជាប្រចាំជាពិសេស តាមដងផ្លូវសំខាន់ៗ ដើម្បីរក្សាចិញ្ចើមផ្លូវជូនពលរដ្ឋអ្នកធ្វើដំណើរដោយថ្មើរជើង និង ណែនាំដល់ក្រុមអាជីវករប្រកបអាជីវកម្ម ក្លឹប ខារ៉ាអូខេ និងបារបារាំងជាដើម នៅតាមដងផ្លូវឲ្យរក្សាចិញ្ចើមផ្លូវ និងរក្សាសោភ័ណ្ឌភាព រាជធានីភ្នំពេញយើងដើម្បីឲ្យភ្ញៀវជាតិនិងភ្ញៀវអន្តរជាតិមកទស្សនានិងបទលេងកម្សាន្ត។លោកអភិបាលរង បានបន្ថែមទៀតថា ការធ្វើអាជីវកម្មរដ្ឋបាលខណ្ឌមិនមានការហាមឃាត់ទេ តែត្រូវរក្សាបានសណ្តាប់ធ្នាប់ របៀបរៀបរយ អនាម័យបរិស្ថានល្អ ។ បន្ថែមទៀតនោះ លោកអភិបាលរងបានសូមឲ្យអាជីវករកុំគិតថា អាជ្ញាធរមករំខានការប្រកបអាជីវកម្មរបស់ពួកគាត់ គឺចុះមករៀបចំសណ្ដាប់ធ្នាប់ឲ្យបានល្អប្រសើរ និងថែរក្សាសន្តិសុខសុវត្ថិភាពជូនម្ចាស់ប្រកបអាជីវកម្មទាំងអស់ព្រោះតំបន់ដែលគ្មានក្មេងទំនើងតំបន់ដែលមានភាពសន្តិសុខល្អនោះភ្ញៀវជាតិ និងអន្តរជាតិមកលេងកំសាន្តកាន់តែច្រើន។ ជាចុងក្រោយអាជ្ញាធរ សូមអរគុណចំពោះការចូលរួមរបស់ ម្ចាស់ប្រកបអាជីវកម្មទាំងអស់គ្នាជាមួយអាជ្ញាធរ៕អត្ថបទ៖ កុម្ភៈ

បាក់ដំបូល នៅភាគខាងជើងប្រទេសឥណ្ឌា សម្លាប់មនុស្ស ៥នាក់

ក្រុមមន្ត្រីបាននិយាយ នៅថ្ងៃសៅរ៍ (ទី១៦ ខែកញ្ញា) នេះ ថា មនុស្ស ៥នាក់ បានស្លាប់បន្ទាប់ពីមានការរលំបាក់ដំបូលផ្ទះមួយខ្នងនៅក្នុងរដ្ឋ Uttar Pradesh ភាគខាងជើងប្រទេសឥណ្ឌា ហើយបើតាមសេចក្តីរាយការណ៍ បានឲ្យដឹងថា ជនរងគ្រោះ កំពុងសម្រាកលង់លក់ នៅពេលឧបទ្ទវហេតុនោះ បានកើតឡើង នៅព្រឹកព្រលឹមថ្ងៃសៅរ៍នេះ។យោងតាមការស៊ើបអង្កេតបឋម បានឲ្យដឹងថា ឧបទ្ទវហេតុនេះ បានកើតឡើងនៅតំបន់លំនៅឋានផ្លូវដែកដែលគេបោះបង់ចោល និងដែលត្រូវបានបញ្ជាឲ្យចាកចេញ។ មូលហេតុនៃការបាក់រលំនេះ នៅមិនទាន់ដឹងច្បាស់នោះទេ។ផ្ទះសម្បែងផ្សេងទៀត នៅតំបន់តាំងទៅលំនៅនេះ ឥឡូវនេះ កំពុងត្រូវបានត្រួតពិនិត្យ ហើយអាជ្ញាធរផ្លូវដែកនឹងបើកការស៊ើបអង្កេត ដើម្បីរើផ្ទះផ្សេងទៀត តាមការកំណត់របស់ក្រុមមន្ត្រី៕

ប្រជាជនអូស្ត្រាលីនាំគ្នាសម្រុកទៅឆ្នេរ Bondi ខណៈរលកកម្ដៅនៅដើមនិទាឃរដូវ ឡើងខ្ពស់

អាកាសធាតុ បានឡើងក្ដៅខ្លាំង សម្រាប់ផ្នែកខ្លះនៃភាគខាងកើតប្រទេសអូស្ត្រាលី នៅថ្ងៃសៅរ៍ (ទី១៦ ខែកញ្ញា) នេះ ខណៈរលកកម្ដៅ បានចាប់ផ្ដើមមកដល់ ពោលគឺមានរយៈពេល ២សប្ដាហ៍ បន្ទាប់ពីការបញ្ចប់នូវរដូវរងាដ៏ក្តៅបំផុតរបស់ប្រទេសនេះ ក្នុងប្រវត្តិសាស្ត្រ។រលកកម្ដៅ ដែលត្រូវបានគេរំពឹងថា នឹងបន្តរហូតដល់ថ្ងៃពុធ (ថ្ងៃទី២០ ខែកញ្ញា) ត្រូវបានគេព្យាករថា នឹងឡើងដល់ទៅជាង ៣០អង្សាសេ នៅទីក្រុងស៊ីដនី ដែលយ៉ាងហោចណាស់ឡើង ១០អង្សាសេ លើសពីកម្រិតមធ្យម។ការឡើងកម្ដៅ បានកើតមាន នៅមួយថ្ងៃមុនការរត់ប្រណាំងម៉ារ៉ាតុងទីក្រុងស៊ីដនី ដោយមនុស្សជាច្រើនមានក្ដីបារម្ភអំពីផលប៉ះពាល់នៃអាកាសធាតុ និងគុណភាពខ្យល់មិនល្អពីកម្ដៅដ៏ហួតហែង ដែលអាចបង្កគ្រោះថ្នាក់ដល់អ្នកចូលរួមចំនួន ៤២.០០០នាក់។ជាមួយគ្នានេះ អាជ្ញាធរ ក៏បានបង្កើនការព្រមានកម្រិតខ្ពស់ផងដែរ អំពីគ្រោះអគ្គិភ័យ សម្រាប់ទីក្រុងស៊ីដនី និងតំបន់ នៅជុំវិញ៕

ចំនួនអ្នកស្លាប់ដោយសារចំហេះព្រៃនៅហាវ៉ៃ ធ្លាក់មកត្រឹម៩៧នាក់

ចំនួនអ្នកស្លាប់ដោយសារចំហេះព្រៃ កាលពីខែមុន នៅលើកោះ Maui របស់រដ្ឋហាវ៉ៃ បានធ្លាក់ចុះមកនៅត្រឹម 97នាក់ ហើយឥឡូវនេះ មនុស្សបាត់ខ្លួន មានចំនួន ៣១នាក់។ នេះបើយោងតាមអភិបាលរដ្ឋហាវ៉ៃលោក Josh Green ដែលបានប្រាប់ទូរទស្សន៍ CNN នៅក្នុងបទសម្ភាសន៍មួយ កាលពីថ្ងៃសុក្រ (ទី១៥ ខែកញ្ញា)។កាលពីសប្តាហ៍មុន លោក Green បាននិយាយថា អ្នកស្លាប់មានចំនួន ១១៥នាក់ ហើយមនុស្ស ៦៦នាក់បានបាត់ខ្លួន។លោក Green បានប្រាប់ថា៖ «ចំនួនអ្នកស្លាប់ បានធ្លាក់ចុះ ដោយសារតែយើងមានអ្នកជំនាញផ្នែកនរវិទ្យារបស់ក្រសួងការពារជាតិ ដែលអាចវិនិច្ឆ័យហ្សែនកម្រិតខ្ពស់ជាងនេះ។ ពួកគេអាចប្រាកដថា ពួកយើងមិនបានបន្ថែមសោកនាដកម្ម ចំពោះមនុស្ស ដែលយើងបាត់បង់នោះទេ»។សូមបញ្ជាក់ថា ភ្លើងឆេះវាលស្មៅ កាលពីថ្ងៃទី៨ ខែសីហា បានឆាបឆេះយ៉ាងរហ័សដល់មូលដ្ឋានភ្នំភ្លើងមួយ រហូតរាលដាលទៅដល់ទីក្រុងរមណីយដ្ឋានទេសចរណ៍ Lahaina ដោយបានបំផ្លាញ ឬធ្វើឲ្យខូចខាតដល់អគារប្រមាណ ២.២០០ខ្នង៕

មេគ្រឿងញៀនម៉ិកស៊ិក លោក Ovidio Guzman ត្រូវបានធ្វើបត្យាប័នទៅសហរដ្ឋអាមេរិក

លោក Ovidio Guzman ដែលជាកូនប្រុសរបស់មេគ្រឿងញៀនម៉ិកស៊ិកធំជាងគេបំផុត គឺលោក Joaquin «El Chapo» Guzman ត្រូវបានធ្វើបត្យាប័នទៅសហរដ្ឋអាមេរិកហើយ កាលពីថ្ងៃសុក្រ (ទី១៥ ខែកញ្ញា) ដើម្បីទៅប្រឈមនឹងការចោទប្រកាន់ពីបទជួញដូរថ្នាំញៀនហ្វេនតានីល (ប្រភេទថ្នាំញៀនជួយបន្ថយការឈឺចាប់) ដែលនេះ ជាការជួយដល់ការជំរុញរបស់រដ្ឋបាលរបស់លោក ចូ បៃដិន ដើម្បីទប់ស្កាត់ការរីករាលដាលនៃថ្នាំញៀន ដែលបង្កគ្រោះថ្នាក់ធ្ងន់ធ្ងរនេះ។រដ្ឋមន្ត្រីក្រសួងយុត្តិធម៌អាមេរិក លោក Merrick Garland បាននិយាយថា ការធ្វើបត្យាប័នរបស់លោក Ovidio Guzman នេះ គឺជាជំហានថ្មីបំផុតចុងក្រោយ ក្នុងកិច្ចប្រឹងប្រែងរបស់សហរដ្ឋអាមេរិក ដើម្បីកម្ទេចគ្រប់រូបភាពទាំងអស់នៃប្រតិបត្តិការជួញដូរគ្រឿងញៀន ដែលក្ដោបក្ដាប់ដោយក្រុមរត់ពន្ធគ្រឿងញៀន Sinaloa Cartel ដោយក្រុមនេះជាប់ពាក់ព័ន្ធជាមួយគ្រួសារលោក Guzman ជាយូរមកហើយ។ ជាមួយគ្នានេះ មន្ត្រីម៉ិកស៊ិក ២រូប ដែលដឹងពីបញ្ហានេះ ក៏បានបញ្ជាក់អះអាងពីការធ្វើបត្យាប័នលោក Guzman វ័យ ៣៣ឆ្នាំនេះផងដែរ។ក្នុងនាមជាបុគ្គលម្នាក់នៃអ្នកបន្តវេន ក្នុងអាណាចក្រជួញដូរគ្រឿងញៀនពីឪពុករបស់ខ្លួន លោក Guzman ត្រូវបានចាប់ខ្លួន ក្នុងរយៈពេលដ៏ខ្លី នៅឯភាគខាងជើងទីក្រុង Culiacan ក្នុងឆ្នាំ២០១៩ ប៉ុន្តែត្រូវបានដោះលែងវិញ តាមបញ្ជារបស់ប្រធានាធិបតី លោក Andres Manuel Lopez Obrador ដើម្បីបញ្ចៀសការបង្ហូរឈាម នៅពេលដែលក្រុមជួញដូររបស់មេគ្រឿងញៀនរូបនេះ បានសងសឹក។រូបគេត្រូវបានចាប់ខ្លួនម្ដងទៀត កាលពីខែមករា បន្ទាប់ពីមានការប្រយុទ្ធគ្នាយ៉ាងខ្លាំង នៅរដ្ឋ Sinaloa ភាគខាងជើងប្រទេសម៉ិកស៊ិក៕

មន្ត្រីលីប៊ី ច្រានចោលការទម្លាក់កំហុសសម្រាប់គ្រោះមហន្តរាយទឹកជំនន់

មន្ត្រីម្នាក់នៅប្រទេសលីប៊ីភាគខាងកើត បានបដិសេធការចោទប្រកាន់ដែលថា មនុស្សភាគច្រើនបានស្លាប់ដោយទឹកជំនន់ដ៏មហន្តរាយកាលពីចុងសប្តាហ៍មុនត្រូវបានគេប្រាប់ឱ្យស្នាក់នៅក្នុងផ្ទះរបស់ពួកគេ។ លោក Othman Abdul Jalil អ្នកនាំពាក្យរដ្ឋាភិបាល មានមូលដ្ឋាននៅទីក្រុង Benghazi បានប្រាប់សារព័ត៌មាន BBC ថាទាហានបានព្រមានពលរដ្ឋនៅទីក្រុង Derna ឱ្យភៀសខ្លួនចេញ។ លោកបានបដិសេធថា ពលរដ្ឋមិនត្រូវបានគេប្រាប់ឲ្យជម្លៀសខ្លួននោះទេ ប៉ុន្តែបានទទួលស្គាល់ថា មនុស្សមួយចំនួនប្រហែលជាគិតថា ការគំរាមកំហែងនេះគឺបំផ្លើស។ ទន្ទឹមនឹងនេះ ក្រុមអ្នកសារព័ត៌មាន BBC នៅ ទីក្រុង Derna និយាយថា ភ្នាក់ងារផ្តល់ជំនួយនៅពុំទាន់បានមកដល់ទីក្រុងនេះនៅឡើយ។ខណៈអ្នករាយការណ៍ព័ត៌មាន បានឃើញវិនាសកម្មនៃសកម្មភាពនៅកណ្តាលទីក្រុង Derna ដោយមានអ្នកជួយសង្គ្រោះ ក្រុមបុគ្គលិករថយន្តសង្គ្រោះ និងក្រុមធ្វើកោសល្យវិច្ច័យ កំពុងធ្វើការដើម្បីកំណត់អត្តសញ្ញាណអ្នកស្លាប់ ដែលមានសញ្ញាតិចតួចពីទីភ្នាក់ងារផ្តល់ជំនួយអន្តរជាតិធំៗ។ អ្នកនាំពាក្យអង្គការមួយបាននិយាយថា ការព្យាយាមសម្របសម្រួលប្រតិបត្តិការជំនួយក្នុងប្រទេសគឺជា «សុបិនអាក្រក់»។ លោក Tomasso Della Longa មកពីសហព័ន្ធអន្តរជាតិកាកបាទក្រហម និងអឌ្ឍចន្ទក្រហម (IFRC) បាននិយាយថា ប្រទេសលីប៊ីកាលពីមួយសប្តាហ៍មុនមានភាពស្មុគស្មាញរួចទៅហើយ។ ការធ្វើឱ្យស្ថានការណ៍កាន់តែស្មុគស្មាញ គឺដោយសារទឹកជំនន់បានបំផ្លាញហេដ្ឋារចនាសម្ព័ន្ធសំខាន់ៗ ដូចជាផ្លូវថ្នល់ និងប្រព័ន្ធទូរគមនាគមន៍ជាដើម។ចំនួនអ្នកស្លាប់ដែលត្រូវបានផ្តល់ឲ្យពីចំនួន៦.០០០នាក់ កើនឡើងដល់ជាង១១.៣០០នាក់ ខណៈមនុស្សរាប់ពាន់នាក់ទៀតនៅបាត់ខ្លួននៅឡើយ ដែលអភិបាលក្រុង Derna បានព្រមានថាចំនួនសរុបអាចកើនឡើងដល់២០.០០០នាក់។

អភិបាលខេត្តបន្ទាយមានជ័យ៖ ករណីឆេះសណ្ឋាគារនៅប៉ោយប៉ែតមិនមានមនុស្សគ្រោះថ្នាក់ទេ

បន្ទាយមានជ័យ៖ កាលពីយប់មិញអគ្គីភ័យបានឆាបឆេះជាខាងលើបង្អស់នៃសណ្ឋាគារ មីងឌូ នៅប៉ោយប៉ែត មកដល់ព្រឹកនេះ អភិបាលខេត្តបានបញ្ជាក់ថា មិនមានមនុស្សរងគ្រោះថ្នាក់នោះទេ។ឯកឧត្តម អ៊ុ រាត្រី អភិបាលខេត្តបន្ទាយមានជ័យបានប្រាប់ BTV នៅព្រឹកថ្ងៃទី១៦ ខែកញ្ញា ឆ្នាំ២០២៣នេះថា នៅថ្ងៃទី១៥ ខែកញ្ញា ឆ្នាំ២០២៣ វេលាម៉ោង ២១និង ៣០នាទីយប់ មានករណី អគ្គីភ័យឆាបឆេះនៅជាន់លើបង្អស់ នៃអគារសណ្ឋាគារមីងឌូ ស្ថិតនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ករណីនេះគឺបណ្ដាលមកពីការឆ្លងចរន្តអគ្គិសនី។ឯកឧត្តម បន្ថែមថា នៅក្នុងប្រតិបត្តិការពន្លត់នេះ លោកដឹកនាំបញ្ជារួមដោយផ្ទាល់ ដោយមានកម្លាំងចម្រុះចូលរួមប្រមាណ ១៥០នាក់ លទ្ធផលអគ្គីភ័យត្រូវបានពន្លត់ឱ្យរលត់ទាំងស្រុង នៅវេលាម៉ោង ២២ និង ៥០នាទីថ្ងៃដដែល។ឯកឧត្តម អុំ រាត្រី បញ្ជាក់ថា ក្រោយកើតហេតុកម្លាំងជំនាញបានរុករក និងស្រាវជ្រាវភ្លាមៗ គឺមិនមានមនុស្សណាម្នាក់ជាប់ក្នុងអគារ ឬរងគ្រោះថ្នាក់នោះឡើយ គ្រាន់តែមានការខូចខាតសម្ភារៈមួយចំនួននៅលើដំបូលអគារ។ឯកឧត្តម បានថ្លែងការអរគុណដល់កងកម្លាំង និងវិស័យឯកជន ក៏ដូចជាភាគីថៃដែលចេញរថយន្តពន្លត់អគ្គិភ័យមកជួយ និងបានក្ដាប់គ្រប់គ្រងសភាពការណ៍បានទាន់ពេលវេលា៕អត្ថបទ ៖ ប្រាក់ វ៉ាន់ដា

បណ្ដាញសង្គម

ព័ត៌មានថ្មីៗ

អ្នកនាំពាក្យក្រសួងព័ត៌មាន៖ ការពង្រឹងសុវត្ថិភាពឌីជីថល គឺជាកត្តាចម្បងក្នុងការប្រយុទ្ធប្រឆាំងព័ត៌មានក្លែងក្លាយ

កាកបាទក្រហមកម្ពុជា បណ្តុះបណ្តាលយុវជន ជាង១០០នាក់ លើច្បាប់មនុស្សធម៌ និងការកសាងសន្តិភាព

ផ្ទាំងទឹកនៅប្រទេសស្វីស ឆ្ពោះទៅរកការបំបែកកំណត់ត្រាមួយទៀត ក្រោយរលកកម្តៅខែមិថុនា

លោក Merz បញ្ជាក់ថា អាល្លឺម៉ង់អាចការពារការជំរុញការចំណាយយោធា ជាការឆ្លើយតបទៅនឹងលោក Trump

បុគ្គលិកសន្តិសុខស៊ីរី ៣រូបរងរបួស ដោយសារវាយប្រហារនៅជិតក្រុងដាម៉ាស ខណៈអ្នកប្រព្រឹត្តិស្លាប់

ក្រុមតាំងលំនៅនិគមន៍អ៊ីស្រាអែល ដណ្តើមក្តីស្រមៃជនប៉ាឡេស្ទីនក្នុងការមានផ្ទះសម្បែងនឹងគេនៅតំបន់វ៉េសប៊ែង

EU «ថ្កោលទោសយ៉ាងខ្លាំង» ចំពោះការវាយប្រហារបណ្ដាលឲ្យមានអ្នកស្លាប់ច្រើន នៅទីក្រុងដាម៉ាស

កងទ័ពជើងទឹកអង់គ្លេស សាកល្បងយានដ្រូនមានសមត្ថភាពវាយប្រហារចេញពីនាវា

មន្រ្តីជាន់ខ្ពស់រួមទាំងប្រធានាធិបតីអ៊ីរ៉ង់ ចូលរួមពិធីលាគ្នាចុងក្រោយ សម្រាប់អតីតមេដឹកនាំកំពូល Khamenei

អង្គការសហប្រជាជាតិ ព្រមានអំពីការមានបាតុភូតអែលនីញ៉ូដ៏ខ្លាំងក្លា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877