BTV NEWS

អគ្គនាយកដ្ឋានពន្ធនាគារ កំពុងសិក្សារៀបចំទីតាំងឃុំឃាំងថ្មីបន្ថែម ខណៈចំនួនជនជាប់ឃុំមានការកើនឡើងខ្លាំង

សមត្ថកិច្ចខេត្តព្រះសីហនុរកឃើញអ្នកបើកបររថយន្តធុនធ្ងន់មួយចំនួនមានសារធាតុគ្រឿងញៀននៅក្នុងខ្លួន

ឆេះខុនដូ Wealth Mansion តែសមត្ថកិច្ចជួយពន្លត់ទាន់ពេលដោយមិនរាលដាលទ្រង់ទ្រាយធំ

ជនជាតិវៀតណាម និងជនជាតិចិនជាងពីររយនាក់ទៀតត្រូវបានអាជ្ញាធរបណ្តេញចេញពីកម្ពុជាក្រោយរក ឃើញជាប់ពាក់ព័ន្ធករណី Online Scams

សន្តិសុខ និង សង្គម

ព្យុះទីហ្វុង Khanun សម្លាប់បុរសម្នាក់ និងធ្វើឲ្យគេហដ្ឋានមួយភាគបី នៅកោះអូគីណាវ៉ា ដាច់ចរន្តអគ្គិសនី

កម្លាំងខ្យល់ដ៏ខ្លាំង បានបោកបក់មកលើបណ្តាញអគ្គិសនី នៅកោះអូគីណាវ៉ារបស់ប្រទេសជប៉ុន ហើយបានធ្វើឲ្យគេហដ្ឋានដល់ទៅជាង ២០០.០០០ខ្នង គ្មានអគ្គិសនីប្រើប្រាស់ នៅព្រឹកថ្ងៃពុធ (ទី២ ខែសីហា) នេះ ខណៈព្យុះទីហ្វុង Khanun ដែលមានឥទ្ធិពលខ្លាំង និងធ្វើចលនាយឺតៗ បានបោកបក់មកជិតកោះភាគនិរតីរបស់ប្រទេស ដែលគំរាមកំហែងដល់ការមានភ្លៀងធ្លាក់ខ្លាំង។គិតមកទល់ពេលនេះ មានសេចក្ដីរាយការណ៍ថា មានអ្នកស្លាប់ម្នាក់ និងរបួស ១១នាក់ហើយ។ យោងតាមភ្នាក់ងារគ្រប់គ្រងគ្រោះអគ្គិភ័យ និងគ្រោះមហន្តរាយ បានឲ្យដឹងថា បុរសម្នាក់ត្រូវបានយានដ្ឋានដែលដួលរលំសង្កត់លើ ហើយបានគាំងបេះដូង។ ប្រព័ន្ធផ្សព្វផ្សាយបានរាយការណ៍ថា ក្រោយមកបុរសនោះត្រូវបានគេប្រទះឃើញថា ស្លាប់។យោងតាមទីភ្នាក់ងារឧតុនិយមជប៉ុន បានឲ្យដឹងថា មនុស្សរាប់រយពាន់នាក់ នៅក្នុងខេត្តត្រូពិចនេះ ដែលជាខេត្តគោលដៅទេសចរណ៍ដ៏ពេញនិយមមួយ ចម្ងាយប្រហែល ១.៦០០គីឡូម៉ែត្រ នៅភាគនិរតីនៃរដ្ឋធានីតូក្យូរបស់ប្រទេសជប៉ុន ត្រូវបានណែនាំឲ្យមានការជម្លៀស ខណៈដែលព្យុះនេះ បានផ្លាស់ទីទៅកាន់ភាគពាយព្យ ក្នុងល្បឿន ១០គីឡូម៉ែត្រក្នុងមួយម៉ោង។យោងតាមគេហទំព័រសេវាផ្គត់ផ្គង់មូលដ្ឋាន Okinawa Electric Power បានឲ្យដឹងថា គ្រួសារចំនួន ២១៨.២៦០គ្រួសារ ឬដែលគ្របដណ្ដប់ ៣៤ភាគរយនៃផ្ទះសម្បែងទាំងអស់ បានដាច់ចរន្តអគ្គិសនី គិតត្រឹមម៉ោង ៩ព្រឹកម៉ោង នៅជប៉ុន។ ក្នុងរដ្ឋធានីណាហា (Naha) របស់កោះអូគីណាវ៉ា អាកាសយានដ្ឋាន ត្រូវបានបិទទាំងស្រុង ដែលជាការបិទសម្រាប់ថ្ងៃទី២ នៅថ្ងៃពុធនេះ។ ជើងហោះហើរជាង ៤០០ ត្រូវបានលុបចោលរួចហើយ គិតត្រឹមពេលព្រឹក ដោយប៉ះពាល់ដល់អ្នកដំណើរយ៉ាងតិច ៦៥.០០០នាក់។ព្យុះនេះកំពុងតែកើតមានឡើង ក្នុងពេលដែលមានការមមាញឹកនៃរដូវទេសចរណ៍រដូវក្តៅ ដោយឆ្នាំនេះឃើញថា ចំនួនអ្នកដើរកម្សាន្ត បានត្រឡប់មកកម្រិត មុនមានជំងឺរាតត្បាតវិញហើយ។ កោះអូគីណាវ៉ា តែងតែត្រូវបានវាយប្រហារជាញឹកញាប់ ដោយព្យុះទីហ្វុង ប៉ុន្តែជាធម្មតា ច្រើនតែនៅចុងឆ្នាំ៕

រលកកម្ដៅបានវាយលុកប្រទេសអាល់ហ្ស៊េរី ដោយសារបម្រែបម្រួលអាកាសធាតុ

កម្ដៅដ៏ខ្លាំងក្លាបានវាយប្រហារទ្វីបអាហ្រ្វិកខាងជើងក្នុងរដូវក្តៅនេះ ជាមួយនឹងចំហេះព្រៃរាលដាលក្នុងតំបន់ Maghreb ( ម៉ាក្រេប) ដែលប៉ះពាល់ដល់ប្រទេសអាល់ហ្សេរីខ្លាំងបំផុត។ ក្នុងចំណោមប្រទេសអាហ្រ្វិកខាងជើងទាំងអស់ អាល់ហ្សេរីបានរងគ្រោះខ្លាំងបំផុតពីបណ្ហាអាកាសធាតុដ៏ធ្ងន់ធ្ងរនេះ។ ប្រទេសនេះបានបាត់បង់ផ្ទៃដីព្រៃឈើទំហំ ១៥០.០០០ហិកតា ដោយសារចំហេះព្រៃក្នុងរយៈពេលពីរឆ្នាំចុងក្រោយនេះ។រដូវក្តៅនេះ ប្រទេសអាល់ហ្ស៊េរី បានមើលឃើញនូវការរីករាលដាលនៃចំហេះបាតុភូតធម្មជាតិ ដែលបានវាយប្រហារឈានដល់រដ្ឋចំនួន១៦ ដែលតំបន់ចំនួន៩៤ បានឆាបឆេះក្នុងពេលដំណាលគ្នា។ លោក Basma Bilbigawy សកម្មជនបរិស្ថានជនជាតិអាល់ហ្សេរី បាននិយាយថា កត្តាជំរុញសំខាន់នៅពីក្រោយចំហេះព្រៃទាំងនោះ គឺបម្រែបម្រួលអាកាសធាតុ។ឆ្លើយតបយ៉ាងឆាប់រហ័សចំពោះគ្រោះថ្នាក់ដែលកំពុងកើនឡើងនេះ ក្រុមអាជ្ញាធរអាល់ហ្សេរីបានបង្កើតផែនការជាតិមួយដើម្បីប្រឈមមុខនឹងចំហេះដ៏ធ្ងន់ធ្ងរ ដែលធ្វើឱ្យប្រទេសនេះអាចទប់ទល់ជាមួយបាតុភូតទាំងនេះប្រកបដោយប្រសិទ្ធភាព។ ប៉ុន្តែការចំណាយលើរដ្ឋាភិបាលគឺធំធេងណាស់ ដោយយ៉ាងហោចណាស់ជនជាតិអាល់ហ្សេរី ៣៥នាក់បានស្លាប់ និងមនុស្ស១.៥០០នាក់ត្រូវបានផ្លាស់ទីលំនៅដោយសារតែចំហេះព្រៃនៅឆ្នាំនេះ។នោះគឺជាការបន្ថែមលើការខូចខាតប្រព័ន្ធអេកូឡូស៊ី ដែលអ្នកជំនាញខ្លះនិយាយថា នឹងចំណាយពេលរាប់ទសវត្សរ៍ដើម្បីបង្កើតឡើងវិញ។ យ៉ាងហោចណាស់ប្រទេសចំនួន៩នៅលើសមុទ្រមេឌីទែរ៉ាណេ បានរាយការណ៍ថាមានចំហេះព្រៃនៅឆ្នាំនេះ រួមទាំងប្រទេសទុយនីស៊ី និងប្រទេសម៉ារ៉ុកផងដែរ៕

មនុស្សយ៉ាងតិច២០នាក់ស្លាប់ និង១៩នាក់បាត់ខ្លួនក្នុងព្យុះភ្លៀងនៅក្នុងប្រទេសចិន

ចិន៖ ប្រព័ន្ធផ្សព្វផ្សាយរដ្ឋបាននិយាយកាលពីថ្ងៃអង្គារថា មនុស្សយ៉ាងហោចណាស់ ២០នាក់បានស្លាប់ និង ១៩នាក់កំពុងបាត់ខ្លួន បន្ទាប់ពីភ្លៀងធ្លាក់ខ្លាំងបានវាយប្រហារទីក្រុងប៉េកាំង និងខេត្តជុំវិញនោះ បណ្ដាលឲ្យលិចផ្លូវ និងបំណាក់ដីពាលពេញតំបន់។ព្យុះ Doksuri ដែលជាអតីតព្យុះទីហ្វុងដ៏ធំ បានបោកបក់ឆ្ពោះទៅភាគខាងជើងប្រទេសចិន បន្ទាប់ពីវាយប្រហារខេត្ត ហ្វ៊ូជាន ភាគខាងត្បូងកាលពីថ្ងៃសុក្រ បន្ទាប់ពីការវាយលុករបស់ប្រទេសហ្វីលីពីន។ ភ្លៀងធ្លាក់ដ៏ខ្លាំងបានចាប់ផ្តើមវាយលុករដ្ឋធានីប្រទេសចិនមួយនេះ និងតំបន់ជុំវិញកាលពីថ្ងៃសៅរ៍ ដោយបរិមាណទឹកភ្លៀងជាមធ្យមពេញមួយខែនៃខែកក្កដា បានធ្លាក់ទៅលើទីក្រុងប៉េកាំងក្នុងរយៈពេលត្រឹមតែ ៤០ម៉ោងប៉ុណ្ណោះ។តំបន់ធំៗជាច្រើននៅជាយក្រុងនៃទីក្រុងប៉េកាំងនៅតែរងការវាយប្រហារយ៉ាងធ្ងន់ធ្ងរដោយជំនន់ភ្លៀង ដែលជាគ្រោះមហន្តរាយធ្ងន់បំផុតក្នុងរយៈពេលជាច្រើនឆ្នាំមកនេះ។ នៅលើច្រាំងទន្លេនៃតំបន់ Mentougou ដែលជាតំបន់រងផលប៉ះពាល់ដ៏អាក្រក់បំផុតមួយ គេបានឃើញកំទេចកំទីល្បប់ភក់ពាសពេញផ្លូវ។ប្រទេសចិនបាននឹងកំពុងជួបប្រទះនឹងអាកាសធាតុធ្ងន់ធ្ងរ និងបានកត់ត្រាសីតុណ្ហភាពខ្ពស់បំផុតក្នុងរដូវក្ដៅនេះ ជាព្រឹត្តិការណ៍អាកាសធាតុដែលអ្នកវិទ្យាសាស្ត្រជាច្រើននិយាយថា កំពុងមានឥទ្ធិពលខ្លាំងឡើងដោយសារបម្រែបម្រួលអាកាសធាតុ។ ប្រទេសនេះបានត្រៀមខ្លួនរួចហើយសម្រាប់ទប់ទល់នឹងការមកដល់នៃព្យុះទីហ្វុង Khanun ដែលជាព្យុះទីប្រាំមួយក្នុងឆ្នាំនេះ ខណៈដែលវាខិតជិតឆ្នេរខាងកើតរបស់ប្រទេសចិន៕

ក្រុមហ៊ុន Meta ចាត់វិធានការដើម្បីបញ្ចប់ការចូលប្រើព័ត៌មាននៅក្នុងប្រទេសកាណាដា តាមច្បាប់ស្តីពីការបង់ប្រាក់ឱ្យអ្នកបោះពុម្ពផ្សាយ

អាមេរិក៖ ក្រុមហ៊ុន Meta បាននិយាយកាលពីថ្ងៃអង្គារថា វេទិការបស់ Meta ទាំងអស់បានចាប់ផ្តើមដំណើរការដើម្បីបញ្ចប់ការចូលប្រើព័ត៌មាននៅលើបណ្ដាញសង្គម Facebook និង Instagram សម្រាប់អ្នកប្រើប្រាស់ទាំងអស់នៅក្នុងប្រទេសកាណាដា ជាឆ្លើយតបទៅនឹងច្បាប់ដែលតម្រូវឱ្យក្រុមហ៊ុនអ៊ីនធឺណិតយក្សជាច្រើនបង់ប្រាក់ឱ្យអ្នកផ្សាយព័ត៌មាន។ច្បាប់ស្តីពីព័ត៌មានអនឡាញដែលត្រូវបានអនុម័តដោយសភាកាណាដានឹងបង្ខំឱ្យវេទិកាអនឡាញដូចជាក្រុមហ៊ុន Google ដែលជាបុត្តសម្ព័ន្ធរបសក្រុមហ៊ុនមេ Alphabet និងក្រុមហ៊ុន Meta ចរចាកិច្ចព្រមព្រៀងពាណិជ្ជកម្មជាមួយអ្នកផ្សាយព័ត៌មានកាណាដាសម្រាប់មាតិការបស់ពួកគេ។នៅក្នុងយុទ្ធនាការប្រឆាំងនឹងច្បាប់ ដែលជាផ្នែកមួយនៃនិន្នាការសកលកាន់តែទូលំទូលាយដើម្បីធ្វើឱ្យក្រុមហ៊ុនបច្ចេកវិទ្យាបង់ប្រាក់សម្រាប់ព័ត៌មាន ទាំងក្រុមហ៊ុន Meta និងក្រុមហ៊ុន Google បាននិយាយកាលពីខែមិថុនាថា ពួកគេនឹងបិទការចូលប្រើព័ត៌មាននៅលើវេទិការបស់ពួកគេនៅក្នុងប្រទេសនេះ។ ច្បាប់របស់ប្រទេសកាណាដាគឺស្រដៀងគ្នាទៅនឹងច្បាប់មូលដ្ឋានដែលអូស្ត្រាលីបានអនុម័តក្នុងឆ្នាំ២០២១ ហើយបានបង្កការគំរាមកំហែងពីក្រុមហ៊ុន Google និងក្រុមហ៊ុន Facebook ក្នុងការកាត់បន្ថយសេវាកម្មរបស់ពួកគេ៕

បណ្តាប្រទេសនៅអឺរ៉ុបចាប់ផ្តើមជម្លៀសពលរដ្ឋចេញពីប្រទេសនីហ្សេ ដែលរងផលប៉ះពាល់ដោយរដ្ឋប្រហារ

បារាំង៖ ប្រទេសបារាំងបានចាប់ផ្តើមជម្លៀសពលរដ្ឋបារាំង និងអឺរ៉ុបរាប់រយនាក់ចេញពីប្រទេសនីហ្សេ ប៉ុន្មានថ្ងៃបន្ទាប់ពីប្រធានាធិបតីប្រទេសនីហ្សេ លោក Mohamed Bazoum ត្រូវបានឃុំខ្លួនដោយសមាជិកនៃកងអង្គរក្សប្រធានាធិបតីរបស់ខ្លួន។ ជើងហោះហើរដំបូងក្នុងចំណោមជើងហោះហើរចំនួន៣ជើង ដើម្បីជម្លៀសពលរដ្ឋបារាំង និងអឺរ៉ុបពីប្រទេសនីហ្សេរីយ៉ា ត្រូវបានហោះចេញកាលពីល្ងាចថ្ងៃអង្គារ ហើយពលរដ្ឋចំនួន២៦២នាក់ត្រូវបានបញ្ចូនឡើងយន្តហោះបារាំងចេញពីប្រទេសនីហ្សេផងដែរ។ប្រទេសបារាំង អ៊ីតាលី និងអេស្ប៉ាញ បានប្រកាសជម្លៀសប្រជាជនចេញពីប្រទេសនីហ្សេ សម្រាប់ពលរដ្ឋរបស់ពួកគេ និងជនជាតិអឺរ៉ុបដទៃទៀត។ ក្រសួងការពារជាតិអេស្បាញបានប្រកាសពីការត្រៀមលក្ខណៈដើម្បីជម្លៀសពលរដ្ឋជាង៧០នាក់ ហើយអ៊ីតាលីក៏បាននិយាយថាខ្លួនកំពុងរៀបចំជើងហោះហើរផងដែរ។ការិយាល័យក្រសួងការបរទេសរបស់ប្រទេសអាល្លឺម៉ង់បាននិយាយថា ពលរដ្ឋរបស់ខ្លួននៅប្រទេសនីហ្សេគួរតែ "ឆ្លៀតឱកាសបន្ទាប់ដើម្បីចាកចេញ" ប្រសិនបើការស្នាក់នៅរបស់ពួកគេនៅក្នុងប្រទេសនេះមិនចាំបាច់។ នៅទីក្រុងវ៉ាស៊ីនតោន សេតវិមានបាននិយាយថា សហរដ្ឋអាមេរិកមិនបានចូលរួមជាមួយសម្ព័ន្ធមិត្តអ៊ឺរ៉ុបក្នុងការជម្លៀសពលរដ្ឋនៅពេលនេះទេ ដោយលើកឡើងពីកង្វះគ្រោះថ្នាក់ភ្លាមៗ។អ្នកនាំពាក្យក្រុមប្រឹក្សាសន្តិសុខជាតិសហរដ្ឋអាមេរិក លោក John Kirby បាននិយាយថា «ទីក្រុងវ៉ាស៊ីនតោន ពិតជាដឹងពីកិច្ចខិតខំប្រឹងប្រែងរបស់ប្រទេសបារាំង និងប្រទេសអឺរ៉ុបផ្សេងទៀត ក្នុងការជម្លៀសពលរដ្ឋរបស់ពួកគេ។ ជាមួយគ្នានេះ យើងមិនមានការចង្អុលបង្ហាញណាមួយអំពីការគំរាមកំហែងដោយផ្ទាល់ដល់ពលរដ្ឋអាមេរិក ឬចំពោះមូលដ្ឋានររបស់យើងទេ ដូច្នេះយើងមិនបានផ្លាស់ប្តូរឥរិយាបថទាក់ទងនឹងវត្តមានរបស់យើងនៅក្នុងប្រទេសនីហ្សេនៅពេលនេះទេ៕

អតីតប្រធានាធិបតីអាមេរិក លោក Donald Trump ត្រូវបានចោទប្រកាន់ ជុំវិញកិច្ចខិតខំប្រឹងប្រែងបង្វែរលទ្ធផលបោះឆ្នោតឆ្នាំ ២០២០

អាមេរិក៖ លោក Donald Trump ត្រូវបានចោទប្រកាន់ពីជុំវិញកិច្ចខិតខំប្រឹងប្រែងរបស់លោកក្នុងការបង្វែរលទ្ធផលនៃការបោះឆ្នោតឆ្នាំ២០២០ ដែលជាការគំរាមកំហែងខាងផ្លូវច្បាប់ដ៏ធ្ងន់ធ្ងរបំផុតសម្រាប់អតីតប្រធានាធិបតីរូបនេះ ខណៈលោកធ្វើយុទ្ធនាការដើម្បីវិលត្រឡប់ទៅកាន់កាប់តំណែងនៅសេតវិមាន។លោក Trump ត្រូវបានចោទប្រកាន់ពីបទសមគំនិតចំនួន៣ករណី និងមួយករណីពាក់ព័ន្ធនឹងការរារាំងដំណើរការស៊ើអង្កេត។លោកTrump ត្រូវបានចោទប្រកាន់ពីបទសមគំនិតក្នុងការក្លែងបន្លំឯកសារសហរដ្ឋអាមេរិក និងការឃុបឃិតដើម្បីរារាំងដំណើរការផ្លូវការមួយ - កិច្ចប្រជុំកាលពីថ្ងៃទី ៦ខែមករា ឆ្នាំ ២០២១របស់សម័យប្រជុំរួមនៃសភាដែលធ្វើឡើងដើម្បីបញ្ជាក់ជ័យជម្នះក្នុងការបោះឆ្នោតរបស់លោកJoe Biden មកពីគណបក្សប្រជាធិបតេយ្យ ។ការចោទប្រកាន់នេះ បាននិយាយថា បំណងនៃការឃុបឃិតដើម្បីបង្វែរលទ្ធផលឆ្នោតក្នុងការបោះឆ្នោតជ្រើសរើសប្រធានាធិបតីឆ្នាំ២០២០ ដោយប្រើអំណះអំណាងក្លែងក្លាយថាមានការលួចបន្លំការបោះឆ្នោត។ លោក Trump ត្រូវបានចោទប្រកាន់ចំនួន៣ករណីពីបទឃុបឃិត និងមួយករណីពីបទរារាំងដំណើរការចោទប្រកាន់រឿងក្ដីចំនួន៤៥ទំព័រដែលត្រូវបាននាំមកដោយ រដ្ឋអាជ្ញាពិសេសលោក Jack Smith ។ លោក Smith បានដាក់សំណុំរឿងចោទប្រកាន់រួចទៅហើយប្រឆាំងនឹងលោក Trump ពីបទគ្រប់គ្រងមិនបានល្អនៃឯកសារសម្ងាត់សំខាន់ៗរបស់រដ្ឋាភិបាល ហើយអតីតប្រធានាធិបតីរូបនេះ ក៏ប្រឈមនឹងការជំនុំជម្រះក្ដីក្នុងទីក្រុង New York ពីបទបង់ប្រាក់បំបិទមាត់តារាភាពយន្តអាសអាភាសម្នាក់។ យោងតាមសារព័ត៌មានរដ្ឋអាមេរិក លោក Trump គ្រោងនឹងឡើងតុលាការនៅថ្ងៃទី៣ខែសីហា៕

បុរសម្នាក់ ត្រូវនគរបាលឃាត់ខ្លួន ក្រោយបង្ហោះវីដេអូ ប្រមាថសម្ដេចតេជោ ហ៊ុន សែន និងញុះញង់បង្កចលាចលក្នុងសង្គម

ភ្នំពេញ៖ កម្លាំងនគរបាលនៃកម្លាំងការិយាល័យប្រឆាំងបទល្មើសបច្ចេកវិទ្យា សហការជាមួយកម្លាំងនាយកដ្ឋានស៉ើបការក្រៅ និងប៉ុស្តិ៍នគរបាលរដ្ឋបាលត្រពាំងក្រសាំងបានចាប់ខ្លួនបុរសម្នាក់ បន្ទាប់ពីបង្ហោះវីដេអូតាមបណ្ដាញសង្គម Tiktok ប្រើប្រាស់ពាក្យប្រមាថដល់ សម្ដេចតេជោ ហ៊ុន សែន នាយករដ្ឋមន្ដ្រី និងមានចេតនាញុះញង់ចង់បង្កចលាចលក្នុងសង្គម។លោកឧត្តមសេនីយ៍ត្រី សាន សុខសីហា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានឲ្យBTV ដឹងនាល្ងាចថ្ងៃទី១ ខែសីហា ឆ្នាំ២០២៣នេះថា កាលពី នៅវេលាម៉ោង ០៨និង២៤ នាទីព្រឹកថ្ងៃទី៣១ ខែកក្កដា ឆ្នាំ២០២៣ កម្លាំងការិយាល័យប្រឆាំងបទល្មើសបច្ចេកវិទ្យា សហការជាមួយកម្លាំងនាយកដ្ឋានស៉ើបការក្រៅ និងប៉ុស្តិ៍នគរបាលរដ្ឋបាលត្រពាំងក្រសាំង បានឃាត់ខ្លួនជនសង្ស័យម្នាក់ឈ្មោះ ភី អ៊ួក ភេទប្រុស អាយុ ៣០ឆ្នាំ នៅចំនុចផ្ទះគ្មានលេខ ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ និងមុខរបរចុងភៅ (រោងចក្រ TOP SUMMIT GARMENT)។ក្នុងប្រតិបត្តិការនៃការឃាត់ខ្លួនជនសង្ស័យ ដោយមានការសម្របសម្រួល ពីលោក សេង ហៀង ព្រះរាជអាជ្ញារងអមសាលាដំបូងរាជធានីភ្នំពេញ ពាក់ព័ន្ធករណី ញុះញង់បង្ករអោយមានភាពវឹកវរ ប៉ះពាល់ធ្ងន់ធ្ងរដល់សន្តិសុខសង្គម និងបទប្រមាថរាជការសាធារណៈ រួចបញ្ជូនខ្លួនជនសង្ស័យមកកាន់ស្នងការដ្ឋាននគរបាលរាជធានីភ្នំពេញ។នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានបង្ហោះវីដេអូកាត់តជាសាធារណៈ ដោយភ្ជាប់ជាមួយខ្លឹមសារ ដែលមានចរិកជាការញុះញង់ធ្វើឲ្យប៉ះពាល់ដល់ថ្នាក់ដឹកនាំរាជរដ្ឋាភិបាល ពោលគឺមានចេតនាបង្កឲ្យចលាចលដល់សន្ដិសុខជាតិ និងប្រមាថថ្នាក់ដឹកនាំនៃរាជរដ្ឋាភិបាលកម្ពុជា ប្រព្រឹត្តអំឡុងខែមិថុនា ឆ្នាំ២០២៣។បច្ចុប្បន្នជនសង្ស័យត្រូវបានកម្លាំងនគរបាលជំនាញសួរនាំនិងកដាងសំណុំរឿងចាត់ការតាមនីតិវិធី៕ អត្ថបទ៖ កុម្ភៈ

គ្រោះថ្នាក់ចរាចរណ៍ទូទាំងប្រទេសនៅថ្ងៃទី១សីហា បណ្តាលឲ្យមនុស្សស្លាប់ ៤នាក់ និងរងរបួស ៧នាក់

ភ្នំពេញ៖ គ្រោះថ្នាក់ចរាចរណ៍ផ្លូវគោកទូទាំងប្រទេសនៅថ្ងៃទី១ ខែសីហា ឆ្នាំ២០២៣ បណ្តាលឲ្យមនុស្សស្លាប់ ៤នាក់ របួសធ្ងន់ ៦នាក់ និងស្រាល ១នាក់ ខណៈសមត្ថកិច្ច បន្តអំពាវនាវដល់ពលរដ្ឋចូលរួម គោរពច្បាប់ចរាចរណ៍ស្មើនឹងគោរពជីវិតខ្លួនឯង។យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស ចេញដោយនាយកដ្ឋាននគរបាល ចរាចរណ៍ និងសណ្តាប់សាធារណៈ នៃអគ្គស្នងការដ្ឋាននគរបាលជាតិ នៅថ្ងៃទី១ ខែសីហា បានបញ្ជាក់ថា គ្រោះថ្នាក់ដែលបង្កឲ្យមានមនុស្សស្លាប់ និងរបួសសរុបចំនួន ១១នាក់ គឺកើតឡើង ដោយសារការប៉ះទង្គិច គ្នាចំនួន ១១លើក មាន កត្តាល្បឿន ២លើក មិនគោរពសិទ្ធ ២លើក មិនប្រកាន់ស្តាំ ១លើក បត់គ្រោះថ្នាក់ ៣លើក កត្តាយាន ១លើក និងកត្តាអាកាសធាតុ២លើក៕

អ្នកគាំទ្រ និយាយលាទាំងទឹកភ្នែក ចំពោះតារាចម្រៀងប៉ុប Coco Lee ក្នុងពិធីបុណ្យសព នៅហុងកុង

ចិន៖ ក្រុមមនុស្ស ដែលមានទឹកភ្នែករលីងរលោង បាននិយាយលាទៅកាន់សពតារាចម្រៀង និងអ្នកនិពន្ធបទចម្រៀង Coco Lee នៅថ្ងៃអង្គារ (ទី១ ខែសីហា) ខណៈដែលពិធីបុណ្យសព ត្រូវបានធ្វើប្រារព្ធឡើង នៅភាគខាងកើតទីក្រុងហុងកុង ដើម្បីជូនដំណើរតារាដ៏ល្បីឈ្មោះ ដែលបានទទួលមរណភាព ក្នុងវ័យ ៤៨ឆ្នាំបន្ទាប់ពីប្រកបអាជីពលើវិថីសិល្បៈចម្រៀងអស់រយៈពេល ៣ទសវត្សរ៍។អ្នកគាំទ្រ ដែលជាច្រើននាក់បានស្លៀកពាក់ពណ៌ខ្មៅ បានស្រែកថា «លាហើយ Coco!» ហើយសូមជូនពរឲ្យធ្វើដំណើរទៅទីស្ងប់សុខ ខណៈដែលឡានដឹកក្តារមឈូសរបស់នាង បានរំកិលចេញពីអគារ បន្ទាប់ពីរៀបចំពិធីរួចរាល់ នៅខាងក្នុងនោះ។ក្នុងចំណោមអ្នកដែលមានវត្តមាននោះ បុរសម្នាក់ឈ្មោះ ចាវ ផឹង (Zhao Peng) ដែលជាអ្នកគាំទ្ររបស់លោកស្រី Lee តាំងពីវ័យ ៥ឆ្នាំមកម្ល៉េះនោះ បាននិយាយថា «ពិតជាពិបាកទ្រាំណាស់ ដែលឃើញគាត់ (លោកស្រី Coco Lee) ចាកចេញដោយគ្មានថ្ងៃត្រឡប់បែបនេះ»។ អ្នកស្រុកប៉េកាំងដែលពោរពេញដោយអារម្មណ៍រំជួលចិត្តរូបនេះ បានបន្ថែមថា លោកមិនសប្បាយចិត្តសោះឡើយ ដែលនឹងមិនអាចមើលការសម្ដែងរបស់តារាចម្រៀងប៉ុបអាមេរិកដើមកំណើតហុងកុងជារៀងរហូត។សូមបញ្ជាក់ថា បងប្អូនស្រី ២នាក់របស់សព បានសរសេរបង្ហោះនៅលើបណ្ដាញសង្គម Facebook ថា អ្នកចម្រៀង Lee បានប្រឹងតស៊ូជាមួយនឹងជំងឺធ្លាក់ទឹកចិត្ត ហើយក៏បានបាត់បង់ជីវិត នៅថ្ងៃទី៥ ខែកក្កដា បន្ទាប់ប៉ុនប៉ងធ្វើអត្តឃាត នៅ ៣ថ្ងៃមុននោះ។ ក្នុងចំណោមការសម្ដែងដែលគួរឲ្យកត់សម្គាល់បំផុតរបស់លោកស្រី Lee គឺការសម្ដែងជាតួអ្នកចម្បាំងស្រី Mulan និងការសម្ដែង ក្នុងបទចម្រៀងដែលទទួលបានពានរង្វាន់អូស្ការ «A Love Before Time» ដកស្រង់ពីភាពយន្ត «Crouching Tiger និង Hidden Dragon»៕

ជប៉ុន និងចិនប្រកែកគ្នាអំពីផែនការបង្ហូរសំណល់ទឹក ហ៊្វូគូស៊ីម៉ា នៅក្នុងកិច្ចប្រជុំត្រៀមត្រួតពិនិត្យឡើងវិញការមិនរីកសាយអាវុធនុយក្លេអ៊ែរឬ NPT

ជប៉ុន៖ ជប៉ុន និងចិនបានប៉ះពាក្យសំដីគ្នាក្នុងសន្និសីទអន្តរជាតិនៅទីក្រុងវីយែន ប្រទេសអូទ្រីស ជុំវិញផែនការរបស់ជប៉ុនក្នុងការបញ្ចេញសំណល់ទឹកនុយក្លេអ៊ែរដែលត្រូវបានធ្វើប្រព្រឹត្តកម្មរួច និងសម្លាប់មេរោគចេញពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដៃអ៊ីឈី ចូលទៅក្នុងមហាសមុទ្រ។ ការលើកសក្ខីកម្មនេះ បានផ្ទុះឡើងកាលពីថ្ងៃចន្ទ ចំថ្ងៃបើកនៃកិច្ចប្រជុំគណៈកម្មាធិការត្រៀមសន្និសីទត្រួតពិនិត្យឡើងវិញឆ្នាំ២០២៦នៃសន្ធិសញ្ញាមិនរីកសាយអាវុធនុយក្លេអ៊ែរ (NPT) ឆ្នាំ២០២៦ ។តំណាងរបស់ប្រទេសចិនបានសម្តែងការប្រឆាំងនឹងផែនការរបស់ប្រទេសជប៉ុនក្នុងការបញ្ចេញសំណល់ទឹកដែលបានធ្វើប្រព្រឹត្តកម្មរួចចេញពីរោងចក្រ ហ៊្វូគូស៊ីម៉ា ដោយហៅសំណល់ទឹកនោះថា "ជាទឹកកខ្វក់"។ តំណាងជប៉ុនលោក Hikihara Takeshi បានបដិសេធការអះអាងរបស់ចិន ហើយបានសម្តែងការព្រួយបារម្ភជុំវិញការចោទប្រកាន់នេះ។ឯកអគ្គរដ្ឋទូតលោក Hikihara បានពន្យល់អំពីខ្លឹមសារនៃរបាយការណ៍ដែលចេញផ្សាយនាពេលថ្មីៗនេះ ដោយទីភ្នាក់ងារថាមពលបរមាណូអន្តរជាតិ ដែលបានរកឃើញថា ផែនការបញ្ចេញទឹកចូលក្នុងសមុទ្រនេះ "ស្របតាមស្តង់ដារសុវត្ថិភាពអន្តរជាតិ"។ តំណាងចិនបានបន្តទទូចថា ផែនការនេះបានបំពានលើសន្ធិសញ្ញាអន្តរជាតិ។ ជាការឆ្លើយតបទៅវិញ លោក Hikihara បានចង្អុលបង្ហាញពីគ្រោះថ្នាក់នៃការបង្កើនការសង្ស័យដែលខ្វះភស្តុតាងវិទ្យាសាស្រ្ត។រដ្ឋាភិបាលជប៉ុនគ្រោងនឹងសម្លាប់មេរោគទឹកដែលបានធ្វើប្រព្រឹត្តកម្មរួច ប្រហែលមួយភាគប្រាំពីរនៃគោលការណ៍ណែនាំរបស់អង្គការសុខភាពពិភពលោកសម្រាប់គុណភាពទឹកផឹក មុនពេលបង្ហូរទឹកនោះទៅក្នុងសមុទ្រ ហើយគ្រោងនឹងចាប់ផ្តើមប្រតិបត្តិការនៅពេលណាមួយក្នុងរដូវក្តៅនេះ៕

បណ្ដាញសង្គម

ព័ត៌មានថ្មីៗ

[UPDATE] ទិន្នន័យបង្ហាញថា ទ្វីបអឺរ៉ុបបានកត់ត្រាការស្លាប់លើសពី១០.០០០ នាក់ក្នុងអំឡុងពេលរលកកម្ដៅកាលពីចុងខែមិថុនា

ព្រះខ័នរាជស្វាយរៀងនាំចូលកីឡាករហូឡង់ Silvester van der Water ពង្រឹងក្លឹបត្រៀមយុទ្ធនាការអន្តរជាតិធំៗ

អ្នកជំនាញថាមពល៖ តម្លៃប្រេងអាចឡើងខ្ពស់ជាង៨០ដុល្លារក្នុងមួយបារ៉ែល ប្រសិនបើអំពើហិង្សានៅតែបន្ត

[UPDATE] ក្រុមអាជ្ញាធរថៃស៊ើបអង្កេតមូលហេតុអគ្គិភ័យឆាបឆេះក្លឹបកម្សាន្តរាត្រីមួយសម្លាប់មនុស្ស២៧នាក់នៅទីក្រុងបាងកក

អ៊ីរ៉ង់ពង្រីកការវាយប្រហារលើរដ្ឋឈូងសមុទ្រក្រោយអាមេរិកវាយប្រហារដោយនិយាយថាច្រកសមុទ្រហ័រមូស ត្រូវបានបិទជាថ្មី

អតីតសកម្មជនគណបក្សប្រឆាំងចំនួន ១០២នាក់ សុំចូលរួមជីវភាពនយោបាយជាមួយគណបក្សប្រជាជនកម្ពុជា

ពលរដ្ឋរងគ្រោះខ្យល់កន្រ្តាក់ ២៣គ្រួសារ ទទួលអំណោយពីសាខាកាកបាទក្រហមខេត្តបាត់ដំបង

រដ្ឋមន្ត្រីក្រសួងអប់រំ យុវជន និងកីឡា អញ្ជើញបើកកម្មវិធីរត់ ដើម្បីការអប់រំកុមារព្រំដែន

សម្តេចកិត្តិសង្គហបណ្ឌិត ម៉ែន សំអន អញ្ជើញសម្ពោធស្នាក់ការបក្សក្រុងបាវិតតម្លៃជាង ៥២ ម៉ឺនដុល្លារ

មនុស្ស ៦នាក់រងការបាញ់ប្រហារ និងមនុស្ស ២នាក់ស្លាប់ ក្នុងហេតុការណ៍បាញ់ប្រហារនៅទីក្រុង Toronto ប្រទេសកាណាដា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877