BTV NEWS

អគ្គនាយកដ្ឋានពន្ធនាគារ កំពុងសិក្សារៀបចំទីតាំងឃុំឃាំងថ្មីបន្ថែម ខណៈចំនួនជនជាប់ឃុំមានការកើនឡើងខ្លាំង

សមត្ថកិច្ចខេត្តព្រះសីហនុរកឃើញអ្នកបើកបររថយន្តធុនធ្ងន់មួយចំនួនមានសារធាតុគ្រឿងញៀននៅក្នុងខ្លួន

ឆេះខុនដូ Wealth Mansion តែសមត្ថកិច្ចជួយពន្លត់ទាន់ពេលដោយមិនរាលដាលទ្រង់ទ្រាយធំ

ជនជាតិវៀតណាម និងជនជាតិចិនជាងពីររយនាក់ទៀតត្រូវបានអាជ្ញាធរបណ្តេញចេញពីកម្ពុជាក្រោយរក ឃើញជាប់ពាក់ព័ន្ធករណី Online Scams

សន្តិសុខ និង សង្គម

ចៅក្រមសហរដ្ឋអាមេរិក រារាំងការរឹតបន្តឹងសិទ្ធិជ្រកកោនតាមព្រំដែនថ្មីរបស់លោក Biden

អាមេរិក៖ ចៅក្រមសហព័ន្ធអាមេរិកមួយរូបកាលពីថ្ងៃអង្គារបានរារាំងបទប្បញ្ញត្តិថ្មីរបស់លោកប្រធានាធិបតី Joe Biden ដែលរឹតបន្តឹងសិទ្ធិជ្រកកោននៅតាមព្រំដែនអាមេរិក-ម៉ិកស៊ិក ដោយលើកកម្ពស់គោលការណ៍សំខាន់នៃផែនការរបស់លោកក្នុងការទប់ស្កាត់ការធ្វើអន្តោប្រវេសន៍បន្ទាប់ពីការរឹតបន្តឹងមាត្រា ៤២ បានបញ្ចប់កាលពីខែឧសភាឆ្នាំនេះ ។ លោក Jon Tigar ចៅក្រមសហប្រចាំតំបន់របស់សហរដ្ឋអាមេរិក ដែលមានមូលដ្ឋាននៅរដ្ឋកាលីហ្វ័រនីញ៉ា (California)បានបន្តបទបញ្ជានេះរយៈពេល១៤ថ្ងៃ ដោយបន្សល់ទុកការរឹតត្បិតរហូតដល់ពេលនេះ។ រដ្ឋបាលលោក Biden ក្នុងរយៈពេលប៉ុន្មានម៉ោង បានប្តឹងទៅតុលាការឧទ្ធរណ៍ទី៩ របស់សហរដ្ឋអាមេរិក។ លោក Biden ដែលជាអ្នកប្រជាធិបតេយ្យបានចូលកាន់តំណែងកាលពីឆ្នាំ ២០២១ ដោយសន្យាថានឹងផ្លាស់ប្តូរគោលនយោបាយប្រកាន់តឹងជាច្រើនរបស់អតីតប្រធានាធិបតី Donald Trump មកពីគណបក្សសាធារណរដ្ឋ ប៉ុន្តែបានអនុម័តវិធានការព្រំដែនមួយចំនួនដូចលោក Trump ខណៈមានជនអន្តោប្រវេសន៍មួយចំនួនត្រូវបានចាប់ខ្លួនដោយខុសច្បាប់។ បទប្បញ្ញត្តិសិទ្ធិជ្រកកោនថ្មីរបស់លោក Biden ដែលចូលជាធរមាននៅពេលមាត្រា ៤២ បានបញ្ចប់កាលពីថ្ងៃទី១១ ខែឧសភា សន្មតិថាជនអន្តោប្រវេសន៍ភាគច្រើនមិនមានសិទ្ធិជ្រកកោនទេ ប្រសិនបើពួកគេឆ្លងកាត់ប្រទេសផ្សេងទៀតដោយមិនស្វែងរកការការពារពីកន្លែងផ្សេងទៀតជាមុន ឬប្រសិនបើពួកគេបរាជ័យក្នុងការប្រើប្រាស់ផ្លូវច្បាប់សម្រាប់ការចូលទៅក្នុងសហរដ្ឋអាមេរិក។ ចំនួនជនអន្តោប្រវេសន៍ ដែលចាប់ខ្លួន ពេលឆ្លងកាត់ព្រំដែនដោយខុសច្បាប់បានធ្លាក់ចុះក្នុងរយៈពេលប៉ុន្មានខែថ្មីៗនេះ បន្ទាប់ពីបទប្បញ្ញត្តិថ្មីចូលជាធរមាន។ គេនៅតែមិនច្បាស់នៅឡើយ ថាតើនិន្នាការនេះនឹងបន្តឬយ៉ាងណា ប្រសិនបើការរឹតត្បិតសិទ្ធិជ្រកកោនថ្មីត្រូវបានរារាំង ៕

អ្នកពន្លត់អគ្គិភ័យរាប់រយនាក់ ប្រឹងប្រែងយ៉ាងខ្លាំង ដើម្បីពន្លត់ចំហេះព្រៃរបស់ប្រទេសព័រទុយហ្គាល់

ព័រទុយហ្គាល់៖ ដោយមានជំនួយពីអ្នកស្រុក អ្នកពន្លត់អគ្គិភ័យជនជាតិព័រទុយហ្គាល់រាប់រយនាក់ បាននប្រញាប់ប្រញាល់ ដើម្បីពន្លត់ភ្លើង ដែលកំពុងឆេះពាសពេញឧទ្យានធម្មជាតិក្បែរកន្លែងសម្រាកលំហែដ៏ពេញនិយមរបស់ទីក្រុង Cascais ខណៈដែលខ្យល់បក់ខ្លាំងធ្វើឲ្យស្មុគស្មាញដល់កិច្ចខិតខំ ដើម្បីគ្រប់គ្រងអណ្ដាតភ្លើងដ៏សន្ធោរសន្ធៅនេះ។ចំហេះព្រៃនេះ បានចាប់ផ្តើមនៅម៉ោង ៥ល្ងាច (ត្រូវនឹងម៉ោង ១៦:០០ ម៉ោងសកល) នៅឯតំបន់ភ្នំដែលជាផ្នែកមួយនៃឧទ្យានធម្មជាតិ Sintra-Cascais ដែលគ្របដណ្តប់លើផ្ទៃដីប្រហែល ១៤៥គីឡូម៉ែត្រក្រឡា និងស្ថិតនៅភាគខាងលិចនៃរដ្ឋធានីលីសបុន (Lisbon)។ ដោយមានការគាំទ្រពីរថយន្ត ១៨៩គ្រឿង អ្នកពន្លត់អគ្គិភ័យជាង ៦០០នាក់ ត្រូវបានដឹកយកមក បន្ទាប់ពីភ្លើងបានឆាបឆេះឡើង។ យន្តហោះបាញ់ទឹកពីលើអាកាស ក៏បានចូលរួមប្រយុទ្ធនឹងអណ្ដាតភ្លើងនេះដែរ ប៉ុន្តែត្រូវបញ្ឈប់ប្រតិបត្តិការ ដោយសារចាប់ផ្ដើមចូលដល់ពេលយប់ហើយ។នៅភូមិមួយ ក្នុងចំណោមភូមិដែលរងផលប៉ះពាល់ពីអគ្គិភ័យនេះ អ្នកស្រុកដែលអស់សង្ឃឹម បានប្រឹងប្រែងទប់ទល់នឹងការឆេះនេះដោយខ្លួនពួកគេផ្ទាល់ ដោយពួកគេបានព្យាយាមការពារលំនៅឋានរបស់ខ្លួនជាមួយនឹងធុងទឹក និងបំពង់ទុយោបាញ់ទឹក ខណៈដែលខ្យល់ខ្លាំង បានធ្វើឲ្យអណ្តាតភ្លើងឆាបឆេះកាន់តែខ្លាំងឡើងៗ។អភិបាលក្រុង Cascais លោក Carlos Carreiras បាននិយាយថា ខ្យល់បក់មានល្បឿនរហូតដល់ ៦០គីឡូម៉ែត្រក្នុងមួយម៉ោង គឺជាបញ្ហាប្រឈមដ៏ធំបំផុតនៅខាងមុខ ហើយមនុស្សមួយចំនួន ត្រូវបានជម្លៀសចេញជាការប្រុងប្រយ័ត្នទុកមុន។ ប្រជាជនពលរដ្ឋមូលដ្ឋាន បានប្រើរទេះរុញ ដើម្បីជួយជម្លៀសអ្នកដែលពិបាកធ្វើចលនា។យ៉ាងណាក្ដី បើតាមសមត្ថកិច្ច បានឲ្យដឹងថា មិនទាន់មានគេហដ្ឋានណារងការខូចខាត និងមិនមានអ្នករងរបួសធ្ងន់ធ្ងរនៅឡើយទេ។ ទិន្នន័យរបស់សហភាពអឺរ៉ុបបង្ហាញថា ប្រទេសព័រទុយហ្គាល់ ជាធម្មតា ក៏ជាប្រទេសមួយក្នុងចំណោមប្រទេសដែលរងគ្រោះខ្លាំងបំផុតដោយចំហេះព្រៃដែរ បើទោះរហូតមកដល់ពេលនេះ បានរួចផុតពីរលកកម្ដៅនាពេលថ្មីៗ ដែលបណ្តាលឲ្យមានមនុស្សស្លាប់ និងការបំផ្លិចបំផ្លាញ នៅទូទាំងទ្វីបអឺរ៉ុបភាគខាងត្បូងក៏ដោយ៕

មនុស្សរាប់ពាន់នាក់គ្មានអគ្គិសនីប្រើប្រាស់ ខណៈដែលព្យុះទីហ្វុង Doksuri វាយប្រហារប្រទេសហ្វីលីពីន

ហ្វីលីពីន៖ ខ្យល់បក់ខ្លាំង និងភ្លៀង បានគ្របដណ្តប់ប្រទេសហ្វីលីពីនភាគខាងជើង ខណៈដែលព្យុះទីហ្វុង ដូកស៊ូរី (Doksuri) បានបោកបក់ដល់ដីគោកនៅថ្ងៃពុធ (ទី២៦ ខែកក្កដា) នេះ បណ្តាលឲ្យទឹកទន្លេហូរហៀរលិចច្រាំង និងធ្វើឲ្យមនុស្សរាប់ពាន់នាក់គ្មានអគ្គិសនីប្រើប្រាស់។អ្នកស្រុកនៅក្នុងសហគមន៍ឆ្នេរសមុទ្រ ត្រូវបានជម្លៀសចេញមុនពេលព្យុះ ដោយនាំមកនូវកម្លាំងខ្យល់បក់រហូតដល់ល្បឿន១៧៥គីឡូម៉ែត្រក្នុងមួយម៉ោង ហើយត្រូវបានគេរំពឹងថា នឹងរក្សាបាននូវកម្លាំង នៅពេលដែលវាបន្តដំណើរឆ្ពោះទៅកាន់កោះតៃវ៉ាន់ និងប្រទេសចិន។លោក ម៉ានុអែល ម៉ាមបា (Manual Mamba) អភិបាលខេត្តកាហ្គាយ៉ាន (Cagayan) ភាគខាងជើង បានប្រាប់សារព័ត៌មានរ៉យទ័រថា៖«យើងកំពុងរងការវាយប្រហារនៅទីនេះ» ដោយបន្ថែមថា រហូតមកដល់ពេលនេះ ពុំទាន់មានរបាយការណ៍អំពីអ្នកស្លាប់ និងរបួសទេ។ឆ្មាំល្បាតឆ្នេរហ្វីលីពីន បាននិយាយថា អ្នកដំណើរជាង ៤.០០០នាក់ ត្រូវជាប់គាំងនៅកំពង់ផែនានា ក្នុងប្រទេស បន្ទាប់ពីការធ្វើដំណើរតាមសមុទ្រ ត្រូវបានផ្អាក៕

គណៈប្រតិភូយោធារុស្ស៊ីទៅដល់ប្រទេសកូរ៉េខាងជើង ដើម្បីចូលរួមប្រារព្ធខួបសង្គ្រាមកូរ៉េ

កូរ៉េខាងជើង៖ ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃពុធ ទី២៦ ខែកក្កដានេះថា គណៈប្រតិភូរុស្ស៊ីដឹកនាំដោយរដ្ឋមន្ត្រីការពារជាតិលោក សឺហ្គេ ស៊ូហ្គូ ( Sergei Shoigu) បានទៅដល់ទីក្រុង ព្យុងយ៉ាងកាលពីថ្ងៃអង្គារ (ទី២៥ កក្កដា) ដោយចូលរួមជាមួយក្រុមចិនជាភ្ញៀវសាធារណៈលើកដំបូងទៅកាន់ប្រទេសនេះ ចាប់តាំងពីការចាប់ផ្តើមផ្ទុះឡើងនូវជំងឺរាតត្បាតកូវីដ-១៩។KCNA បាននិយាយថា គណៈប្រតិភូទាំងពីរ នឹងចូលរួមក្នុងការប្រារព្ធខួបលើកទី៧០នៃ«ទិវាជ័យជម្នះ» នៅថ្ងៃព្រហស្បតិ៍ (ទី២៧ ខែកក្កដា) នៅទីក្រុងព្យុងយ៉ាង ដោយមានសមាជិកការិយាល័យនយោបាយបក្សកុម្មុយនីស្តចិន លោក លី ហុងចុង (Li Hongzhong)ដឹកនាំក្រុមប៉េកាំង។ក្រសួងការពារជាតិរុស្ស៊ី បាននិយាយថា ខ្លួនត្រូវបានអញ្ជើញដោយសមភាគីកូរ៉េខាងជើង ហើយនឹងចូលរួមក្នុងព្រឹត្តិការណ៍ទិវាជ័យជម្នះ។ ព្រឹត្តិការណ៍គម្រប់ខួបនេះ ត្រូវបានគេរំពឹងថា នឹងរួមបញ្ចូលការដង្ហែក្បួនយោធាដ៏សំខាន់ៗ។ប្រទេសកូរ៉េខាងជើង បានបិទព្រំដែនរបស់ខ្លួននៅដើមឆ្នាំ ២០២០ ចំពោះរាល់ការផ្លាស់ប្តូរពាណិជ្ជកម្ម និងការទូត សូម្បីតែជាមួយដៃគូសេដ្ឋកិច្ច និងនយោបាយសំខាន់ៗគឺប្រទេសចិន និងរុស្ស៊ីក៏ដោយ។ របាយការណ៍របស់ប្រព័ន្ធផ្សព្វផ្សាយរដ្ឋ មិនបាននិយាយថា តើដំណើរទស្សនកិច្ចនេះ បានធ្វើការផ្លាស់ប្តូរណាមួយក្នុងគោលនយោបាយនោះទេ៕

ចំហេះព្រៃបានវាយប្រហារប្រទេសទុយនីស៊ី ស្របពេលមានរលកកម្ដៅដ៏ខ្លាំង

ផ្នែកខ្លះនៃតំបន់ភាគខាងជើងប្រទេសទុយនីស៊ី ត្រូវបានបំផ្លាញដោយសារចំហេះព្រៃកាលពីថ្ងៃចន្ទ (២៤ កក្កដា) ស្របពេលមានរលកកម្ដៅដ៏ខ្លាំងនៅក្នុងប្រទេសនេះ។ វីដេអូដែលថតដោយសាក្សីម្នាក់នៅទីប្រជុំជន Tabarka បានបង្ហាញពីឧទ្ធម្ភាគចក្រពន្លត់អគ្គិភ័យមួយគ្រឿងកំពុងផ្ទុកទឹក មុនពេលចូលទៅធ្វើប្រតិបត្តិការនៅជិតចំហេះព្រៃ នៅលើភ្នំដែលគ្របដណ្តប់ដោយព្រៃឈើ ក្រោមផ្សែងខ្មៅដ៏ខ្មួលខ្មាញ់។ទីប្រឹក្សាគ្រប់គ្រងវិបត្តិ Crisis24 បាននិយាយថា ក្រុមអាជ្ញាធរកំពុងព្យាយាមជម្លៀសមនុស្សយ៉ាងហោចណាស់ ២.៥០០នាក់ ចេញពីទីប្រជុំជន Tabarka ប៉ុន្តែអគ្គិភ័យបានបិទផ្លូវ និងរារាំងកិច្ចខិតខំប្រឹងប្រែងជួយសង្គ្រោះនោះ។ទីភ្នាក់ងារ Crisis24 បានបន្ថែមទៀតថា លក្ខខណ្ឌអាកាសធាតុក្តៅ និងស្ងួត ត្រូវបានគេរំពឹងថានឹងនៅតែមាននៅជុំវិញតំបន់ Tabarka ក្នុងរយៈពេលប៉ុន្មានថ្ងៃខាងមុខនេះ ហើយកំណើននៃចំហេះព្រៃបន្ថែមទៀត ក៏ត្រូវបានគេរំពឹងទុកថា នឹងកើតមានផងដែរ៕

ការកាត់បន្ថយការប្រើប្រាស់ឥន្ធនៈហ្វូស៊ីល គឺជាគន្លឹះក្នុងការកាត់បន្ថយបម្រែបម្រួលអាកាសធាតុ

យោងតាមប្រធានអង្គការឧតុនិយមពិភពលោក (WMO) បានឱ្យដឹងថា ការកាត់បន្ថយការប្រើប្រាស់ឥន្ធនៈហ្វូស៊ីល គឺជាគន្លឹះដើម្បីផ្លាស់ប្តូរនិន្នាការអវិជ្ជមាននៃបម្រែបម្រួលអាកាសធាតុ និងកាត់បន្ថយបញ្ហាអាកាសធាតុធ្ងន់ធ្ងរដូចជារលកកម្តៅ ទឹកជំនន់ និងគ្រោះរាំងស្ងួតជាដើម។លោក Petteri Taalas អគ្គលេខាធិការ WMO បានប្រាប់សារព័ត៌មាន China Media Group (CMG) កាលពីថ្ងៃច័ន្ទក្នុងបទសម្ភាសជាវីដេអូថា ការបន្ថយការប្រើប្រាស់ឥន្ធនៈហ្វូស៊ីលគឺជាគន្លឹះនៃសុខុមាលភាពរបស់មនុស្សជាតិនាពេលអនាគត។អ្នកឧតុនិយមជាន់ខ្ពស់រូបនេះបាននិយាយថា ប្រទេសចិនកំពុងជួយកំណត់របៀបវារៈស្តីពីការកាត់បន្ថយឧស្ម័នកាបូនឌីអុកស៊ីត ជាមួយនឹងការវិនិយោគរបស់ប្រទេសនេះលើបច្ចេកវិទ្យាថាមពលពន្លឺព្រះអាទិត្យ និងរថយន្តអគ្គិសនី។ លោក Taalas បានបញ្ជាក់ថា ទោះបីជាមានវិធានការជាច្រើនកំពុងត្រូវបានធ្វើឡើងដើម្បីពង្រឹងការឆ្លើយតបទៅនឹងការគំរាមកំហែងនៃបម្រែបម្រួលអាកាសធាតុ ព្រមទាំងអភិវឌ្ឍន៍ប្រភពថាមពលស្អាតបន្ថែមទៀតដូចជាខ្យល់ ថាមពលព្រះអាទិត្យ និងថាមពលនុយក្លេអ៊ែរក៏ដោយ ក៏វិធានការទាំងនោះមិនមានប្រសិទ្ធភាព គ្រប់គ្រាន់ក្នុងការដោះសា្រយបញ្ហាអាកាសធាតុនោះដែរ៕

នគរបាលជប៉ុនចាប់ខ្លួនស្ត្រី និងឪពុកម្តាយ ពីបទសម្លាប់កាត់ក្បាលបុរសម្នាក់ នៅសណ្ឋាគារ ក្នុងតំបន់កម្សាន្ត កោះហុកកៃដូ

នគរបាលជប៉ុន បាននិយាយថា ពួកគេបានចាប់ខ្លួនស្ត្រីម្នាក់ និងឪពុកម្តាយរបស់ស្ត្រីនោះ ពាក់ព័ន្ធនឹងករណីសម្លាប់កាត់ក្បាលដ៏ចម្លែកមួយ ក្នុងតំបន់កម្សាន្តពេលរាត្រីដ៏ពេញនិយម នៅភាគខាងជើងទីក្រុង Sapporo របស់ប្រទេសជប៉ុន ជាកន្លែងដែលសាកសពបុរសគ្មានក្បាលម្នាក់ ត្រូវបានប្រទះឃើញដោយបុគ្គលិកនៅក្នុងបន្ទប់សណ្ឋាគារ កាលពី ២-៣សប្តាហ៍កន្លងទៅ។នគរបាលកោះហុកកៃដូ នៅភាគខាងជើងនៃកោះដ៏ធំមួយរបស់ប្រទេសជប៉ុន បាននិយាយ នៅថ្ងៃអង្គារ (ទី២៥ ខែកក្កដា) នេះថា ពួកគេបានចាប់ខ្លួននារីឈ្មោះ Runa Tamura វ័យ ២៩ឆ្នាំ និងឪពុករបស់នាងឈ្មោះលោក Osamu Tamura ដែលជាគ្រូពេទ្យវិកលចរិត វ័យ ៥៩ឆ្នាំ នៅថ្ងៃមុន ពីបទសង្ស័យថា បានរួមគំនិតគ្នាកាត់ក្បាលជនរងគ្រោះ នៅក្នុងបន្ទប់សណ្ឋាគារមួយ ហើយយកក្បាលដែលកាត់នោះចេញ នៅពាក់កណ្តាលអធ្រាត្រ ចន្លោះថ្ងៃទី១ និងទី២ ខែកក្កដា។ ក្បាលរបស់ជនរងគ្រោះឈ្មោះ Hitoshi Ura អាយុ ៦២ឆ្នាំ បានបាត់រកមិនឃើញតាំងពីពេលនោះមក។នគរបាល បានឆ្មក់ចូលផ្ទះរបស់ជនសង្ស័យ នៅថ្ងៃអង្គារនេះ ហើយបានចាប់ខ្លួនម្តាយរបស់ជនសង្ស័យឈ្មោះលោកស្រី Hiroko Tamura វ័យ ៦០ឆ្នាំ ជាបុគ្គលិកក្រៅម៉ោង ដោយសង្ស័យថា បានសមគំនិតជាមួយគ្រួសារ ក្នុងការដឹកជញ្ជូន និងរក្សាក្បាលនោះ នៅក្នុងផ្ទះ។ តែយ៉ាងណាក្ដី នគរបាលមិនបានបញ្ជាក់ឲ្យច្បាស់លាស់ទេថា តើកូនស្រី និងឪពុកសហការគ្នាយ៉ាងណានោះ។ នគរបាលកំពុងតែស៊ើបអង្កេតពីមូលហេតុជំរុញឲ្យប្រព្រឹត្តឃាតកម្មនេះ តែពុំបានប្រាប់ថា តើស្ត្រី និងជនរងគ្រោះ ស្គាល់គ្នា ឬអត់នោះទេ៕

ផ្សែងពីចំហេះព្រៃបានគ្របដណ្តប់លើប្រជុំកោះ Rhodes របស់ប្រទេសក្រិក

ផ្សែងពីចំហេះព្រៃនៅតែគ្របដណ្ដប់លើភូមិតូចមួយឈ្មោះ Masari នៅលើប្រជុំកោះ Rhodes របស់ប្រទេសក្រិក កាលពីថ្ងៃចន្ទ (២៤ កក្កដា) ខណៈក្រុមអ្នកពន្លត់អគ្គិភ័យកំពុងធ្វើការដើម្បីទប់ស្កាត់អណ្តាតភ្លើងនៅទីតាំងទេសចរណ៍ដ៏ពេញនិយមមួយនោះ។ប្រតិបត្តិករក្រុមហ៊ុនទេសចរណ៍បានទៅយកអ្នកទេសចរណ៍ជាង២.០០០នាក់ចេញពីទីនោះ កាលពីថ្ងៃចន្ទ ដែលរដ្ឋាភិបាលក្រិកបានហៅសកម្មភាពនោះថា ជាការជម្លៀសដ៏ធំបំផុតដែលមិនធ្លាប់មាននៅក្នុងប្រទេសនេះ។ជើងហោះហើរធ្វើមាតុភូមិនិវត្តន៍ជាច្រើនបន្ថែមទៀតគឺត្រូវធ្វើឡើងកាលពីថ្ងៃច័ន្ទ និងនៅថ្ងៃអង្គារ (២៥ កក្កដា)នេះ ដោយសារតែចំហេះព្រៃនោះនៅតែមិនអាចគ្រប់គ្រងបាននៅឡើយ ហើយក្រុមអាជ្ញាធរការពារជនស៊ីវិលបានព្រមានថា ការគំរាមកំហែងនៃចំហេះព្រៃបន្ថែមទៀតមានកម្រិតខ្ពស់ នៅស្ទើរតែគ្រប់ផ្នែកនៃប្រទេសក្រិក ដែលគ្របដណ្តប់ដោយរលកកំដៅ។ចំហេះព្រៃនេះ បានឆាបឆេះតាំងពីថ្ងៃពុធ (១៩ កក្កដា) នៅប្រជុំកោះ Rhodes ដោយបានបង្ខំមនុស្ស ១៩.០០០ នាក់ឱ្យចាកចេញពីផ្ទះសម្បែង និងចេញពីសណ្ឋាគារកាលពីចុងសប្តាហ៍ ខណៈដែលចំហេះព្រៃបានទៅរាលដាលដល់រមណីយដ្ឋានឆ្នេរនៅភាគអាគ្នេយ៍នៃកោះនេះ៕

សហរដ្ឋអាមេរិកមិនគាំទ្រការវាយប្រហារនៅក្នុងប្រទេសរុស្ស៊ីទេ

សេតវិមានសហរដ្ឋអាមេរិក បាននិយាយថា ខ្លួនមិនគាំទ្រការវាយប្រហារនៅក្នុងប្រទេសរុស្ស៊ីទេ បន្ទាប់ពីត្រូវបានសាកសួរអំពីការវាយប្រហារដោយយានដ្រូនដែលបានបំផ្លាញអគារនៅទីក្រុងមូស្គូ កាលពីថ្ងៃចន្ទ (២៤ កក្កដា) ។រុស្ស៊ីបាននិយាយអំពីការចាត់វិធានការសងសឹកយ៉ាងតឹងរ៉ឹងប្រឆាំងនឹងអ៊ុយក្រែន បន្ទាប់ពីយានដ្រូនពីរគ្រឿងបានបំផ្លាញអគារនៅក្នុងរដ្ឋធានីរបស់ខ្លួន រួមទាំងអគារមួយនៅជិតទីស្តីការក្រសួងការពារជាតិ ដែលរុស្ស៊ីហៅសកម្មភាពនេះថា ជាអំពើភេរវកម្មដ៏សាហាវ។មិនមានមនុស្សរងរបួសក្នុងការវាយប្រហារនោះទេ ហើយមន្ត្រីជាន់ខ្ពស់អ៊ុយក្រែន បាននិយាយថា នឹងមានការវាយប្រហារច្រើនជាងនេះទៀត។ យានដ្រូនមួយបានវាយប្រហារនៅជិតអគារទីក្រុងមូស្គូ ជាទីដែលយោធារុស្ស៊ីរៀបចំសន្និសីទសារព័ត៌មានខ្លីអំពីអ្វីដែលពួកគេហៅថា "ប្រតិបត្តិការយោធាពិសេស" របស់ខ្លួន ជាការវាយប្រហារជានិមិត្តរូប ដែលរុញឲ្យឈានដល់កាវាយប្រហារដោយយានដ្រូនបែបនេះ។កាលពីថ្ងៃអាទិត្យ (២៤ កក្កដា) ប្រធានាធិបតីអ៊ុយក្រែនលោក Volodymyr Zelenskiy ដែលរដ្ឋាភិបាលរបស់លោកកម្រធ្វើអត្ថាធិប្បាយពីការវាយប្រហារនៅក្នុងប្រទេសរុស្ស៊ី ឬនៅលើទឹកដីដែលគ្រប់គ្រងដោយរុស្ស៊ី បានសន្យានូវអ្វីដែលលោកហៅថា "ការសងសឹកចំពោះភេរវកម្មដែលរុស្ស៊ីបានធ្វើទៅលើទីក្រុង Odesa"៕

KCNA៖គណៈប្រតិភូជាន់ខ្ពស់ចិន នឹងធ្វើទស្សនកិច្ចនៅប្រទេសកូរ៉េខាងជើង ក្នុងសប្តាហ៍នេះ

កូរ៉េខាងជើង៖ ទីភ្នាក់ងារសារព័ត៌មាន KCNA ផ្លូវការរបស់កូរ៉េខាងជើង បានរាយការណ៍កាលពីថ្ងៃចន្ទថា គណៈប្រតិភូជាន់ខ្ពស់ចិន នឹងធ្វើដំណើរទៅកាន់ប្រទេសកូរ៉េខាងជើងក្នុងសប្តាហ៍នេះ ដែលជាដំណើរទស្សនកិច្ចត្រូវបានទទួលស្គាល់ជាលើកដំបូង ចាប់តាំងពីទីក្រុងព្យុងយ៉ាង បិទព្រំដែនរបស់ខ្លួន បន្ទាប់ពីមានការរីករាលដាលនៃជំងឺកូវីដ-១៩។ KCNA រាយការណ៍ថា សមាជិកការិយាល័យនយោបាយបក្សកុម្មុយនីស្តចិន លោក Li Hongzhong( លី ហុងចុង) នឹងចូលរួមក្នុងការប្រារព្ធពិធីរំលឹកខួបលើកទី៧០នៃការបញ្ចប់សង្គ្រាមកូរ៉េ។ប្រទេសកូរ៉េខាងជើង បានបិទព្រំដែនរបស់ខ្លួននៅដើមឆ្នាំ ២០២០ ចំពោះរាល់ការផ្លាស់ប្តូរពាណិជ្ជកម្ម និងការទូត សូម្បីតែជាមួយសម្ព័ន្ធមិត្តសេដ្ឋកិច្ច និងនយោបាយសំខាន់របស់ចិនក៏ដោយ។ របាយការណ៍របស់ប្រព័ន្ធផ្សព្វផ្សាយរដ្ឋកាលពីថ្ងៃចន្ទ មិនបាននិយាយថាតើដំណើរទស្សនកិច្ចនេះ បានធ្វើការផ្លាស់ប្តូរណាមួយក្នុងគោលនយោបាយនោះទេ។KCNA បានឲ្យដឹងថា លោក Li ដែលជាអនុប្រធានគណៈកម្មាធិការអចិន្ត្រៃយ៍នៃសភាប្រជាជនជាតិចិននឹងធ្វើទស្សនកិច្ច «ដើម្បីចូលរួមក្នុងការប្រារព្ធខួបលើកទី៧០នៃជ័យជម្នះក្នុងសង្គ្រាមរំដោះមាតុភូមិដ៏ អស្ចារ្យនេះ»៕

បណ្ដាញសង្គម

ព័ត៌មានថ្មីៗ

ក្រុមហ៊ួធីចោទប្រកាន់អារ៉ាប៊ីសាអ៊ូឌីតថា បានវាយប្រហារអាកាសយានដ្ឋានទីក្រុង Sanaa ហើយប្ដេជ្ញាសងសឹក

លោក Trump បញ្ជាក់ថា អាមេរិកគួរតែគ្រប់គ្រងច្រកសមុទ្រ Hormuz ហើយទទួលបានប្រាក់កម្រៃពីវា

ចក្រភពអង់គ្លេស ដាក់កងឆ្មាំបដិវត្តន៍អ៊ីរ៉ង់ក្នុងបញ្ជីជា «ក្រុមភេរវកម្ម»

លោក Zelenskyy ដាក់សេចក្តីព្រាងច្បាប់ទៅសភា ដើម្បីបន្ថែមរយៈពេលនៃច្បាប់អាជ្ញាសឹក

ទូរទស្សន៍រដ្ឋ៖ អ៊ីរ៉ង់បានបាញ់ «ព្រមាន» នាវា ២គ្រឿង នៅច្រកសមុទ្រ Hormuz

EU ដាក់ទណ្ឌកម្មថ្មីលើ «ឧក្រិដ្ឋជនតាមអ៊ីនធឺណិត» ដែលមានទំនាក់ទំនងជាមួយរុស្ស៊ី

បារាំងបញ្ជូនយន្តហោះទម្លាក់ទឹកទៅជួយពន្លត់ចំហេះព្រៃ នៅក្រៅក្រុងប៉ារីស

ចិនបញ្ជាក់ជាថ្មីនូវការអំពាវនាវឱ្យមានការឆ្លងកាត់ច្រកសមុទ្រ Hormuz ដោយ «សេរី និងសុវត្ថិភាព»

ការវាយប្រហាររបស់អ៊ីស្រាអែល សម្លាប់មនុស្ស ៨នាក់ ខណៈអ្នកស្លាប់នៅហ្កាហ្សា លើស ៧៣.២០០នាក់

សហភាពអឺរ៉ុបដាក់ចេញគំនិតផ្តួចផ្តើមជំនួយចំនួន ១ ពាន់លានដុល្លារសម្រាប់តំបន់ហ្កាហ្សា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877