BTV NEWS

អគ្គនាយកដ្ឋានពន្ធនាគារ កំពុងសិក្សារៀបចំទីតាំងឃុំឃាំងថ្មីបន្ថែម ខណៈចំនួនជនជាប់ឃុំមានការកើនឡើងខ្លាំង

សមត្ថកិច្ចខេត្តព្រះសីហនុរកឃើញអ្នកបើកបររថយន្តធុនធ្ងន់មួយចំនួនមានសារធាតុគ្រឿងញៀននៅក្នុងខ្លួន

ឆេះខុនដូ Wealth Mansion តែសមត្ថកិច្ចជួយពន្លត់ទាន់ពេលដោយមិនរាលដាលទ្រង់ទ្រាយធំ

ជនជាតិវៀតណាម និងជនជាតិចិនជាងពីររយនាក់ទៀតត្រូវបានអាជ្ញាធរបណ្តេញចេញពីកម្ពុជាក្រោយរក ឃើញជាប់ពាក់ព័ន្ធករណី Online Scams

សន្តិសុខ និង សង្គម

ចំនួនអ្នកស្លាប់កើនឡើងដល់២២នាក់ ដោយបំណាក់ដី នៅប្រទេសឥណ្ឌា

មន្ត្រីសង្គ្រោះគ្រោះមហន្តរាយ បាននិយាយថា ចំនួនអ្នកស្លាប់ ដោយសារបំណាក់ដីនៅរដ្ឋ Maharashtra ភាគខាងលិចប្រទេសឥណ្ឌាបានកើនឡើងដល់២២នាក់ កាលពីថ្ងៃសុក្រ ដោយសាកសពចំនួន៦នាក់ទៀត ត្រូវបានទាញយកចេញពីក្រោមស្រទាប់ដីល្បាប់ មុនពេលប្រតិបត្តិការជួយសង្គ្រោះត្រូវបានផ្អាក។ បំណាក់ដី បានកើតឡើង កាលពីយប់ថ្ងៃព្រហស្បតិ៍នៅក្នុងភូមិ Irshalwadi តំបន់ភ្នំដាច់ស្រយាលមួយមាន ចម្ងាយប្រហែល ៦០ គីឡូម៉ែត្រពីទីក្រុង Mumbai ដោយបានធ្វើឱ្យលំនៅឋានជាច្រើនខ្នងបាក់រលំ។ភូមិតូចមួយនេះ ត្រូវបានប៉ាន់ប្រមាណថា ជាលំនៅឋានរបស់មនុស្សយ៉ាងហោចណាស់ ២២៥ នាក់ ដែលជាង៨០នាក់ បានរត់ភៀសខ្លួន ហើយមនុស្សជាង១០០ នាក់ទៀតត្រូវបានគេសង្ស័យថា នៅតែជាប់នៅក្រោមគំនរបាក់បែក។

UN ព្រមានបន្ទាប់ពីការបញ្ចប់កិច្ចព្រមព្រៀងគ្រាប់ធញ្ញជាតិសមុទ្រខ្មៅថា មនុស្សច្រើននាក់អាចស្លាប់

ប្រធានជំនួយរបស់អង្គការសហប្រជាជាតិ បាននិយាយទៅកាន់ក្រុមប្រឹក្សាសន្តិសុខកាលពីថ្ងៃសុក្រថា ការកើនឡើងតម្លៃគ្រាប់ធញ្ញជាតិចាប់តាំងពីរុស្ស៊ីបានដកខ្លួនចេញពីកិច្ចព្រមព្រៀងមួយដែលអនុញ្ញាតឱ្យមានការនាំចេញគ្រាប់ធញ្ញជាតិរបស់អ៊ុយក្រែន នៅសមុទ្រខ្មៅដោយសុវត្ថិភាព អាចគំរាមកំហែងដល់ភាពអត់ឃ្លាន និងកាន់តែធ្ងន់ធ្ងរសម្រាប់មនុស្សរាប់លាននាក់។លោក Martin Griffiths បាននិយាយទៅកាន់ក្រុមប្រឹក្សាដែលមានសមាជិក ១៥ រូបថា មនុស្សមួយចំនួននឹងស្រេកឃ្លាន អ្នកខ្លះទៀតអត់អាហារ ដែលមនុស្សជាច្រើននាក់អាចស្លាប់ដោយសារតែការសម្រេចចិត្តនេះ។ លោកនិយាយថា ប្រជាជនប្រហែល ៣៦២ លាននាក់នៅក្នុង ៦៩ ប្រទេសកំពុងត្រូវការជំនួយមនុស្សធម៌។រុស្ស៊ី បានដកខ្លួនចេញពីកិច្ចព្រមព្រៀងគ្រាប់ធញ្ញជាតិសមុទ្រខ្មៅ កាលពីថ្ងៃចន្ទដោយនិយាយថាការទាមទារដើម្បីធ្វើឲ្យប្រសើរការនាំចេញស្បៀងអាហារនិងជីរបស់ខ្លួនមិនត្រូវបានបំពេញ ហើយគ្រាប់ធញ្ញជាតិអ៊ុយក្រែន មិនគ្រប់គ្រាន់នោះដែលបានទៅដល់ប្រទេសក្រីក្របំផុត។ អនាគតស្រូវសាលីរបស់សហរដ្ឋអាមេរិកនៅទីក្រុងឈីកាហ្គោ បានកើនឡើងជាង ៦% ក្នុងសប្តាហ៍នេះ ហើយកាលពីថ្ងៃពុធមានការកើនឡើងប្រចាំថ្ងៃខ្ពស់បំផុតចាប់តាំងពីរុស្ស៊ីបានវាយលុកលើអ៊ុយក្រែនក្នុងខែកុម្ភៈ ឆ្នាំ ២០២២។ កិច្ចព្រមព្រៀងគ្រាប់ធញ្ញជាតិសមុទ្រខ្មៅ ត្រូវបានសម្របសម្រួលកាលពីមួយឆ្នាំមុនដោយអង្គការសហប្រជាជាតិ និងប្រទេសទួរគី ដើម្បីប្រយុទ្ធប្រឆាំងវិបត្តិស្បៀងអាហារពិភពលោកដែលកាន់តែយ៉ាប់យ៉ឺនដោយការវាយលុករបស់រុស្ស៊ី។

អ្នកជំនាញរបស់UN ថ្កោលទោសការឃុំខ្លួនកុមារដោយបំពាននៅស៊ីរី

អ្នកជំនាញរបស់អង្គការសហប្រជាជាតិម្នាក់បានបង្ហាញការព្រួយបារម្ភកាលពីថ្ងៃសុក្រថា កុមាររាប់ម៉ឺននាក់កំពុងត្រូវបានឃុំខ្លួនដោយខុសច្បាប់នៅភាគឦសានប្រទេសស៊ីរី ដោយផ្អែកលើទំនាក់ទំនង ជាមួយក្រុមរដ្ឋអ៊ីស្លាមនិងបំពានច្បាប់អន្តរជាតិ តាមដែលបានចោទប្រកាន់ ។លោកស្រី Fionnuala Ni Aolain អ្នករាយការណ៍ពិសេសរបស់អង្គការសហប្រជាជាតិ បាននិយាយមួយថ្ងៃបន្ទាប់ពីត្រលប់មកពីតំបន់នោះថា លោកស្រីមានការព្រួយបារម្ភអំពីការចាប់ក្មេងប្រុសរាប់រយនាក់ពីជំរុំនានា។ជនភៀសខ្លួននៅក្នុងប្រទេសរាប់ពាន់នាក់ និងគ្រួសារនៃក្រុមអ្នកប្រយុទ្ធរដ្ឋអ៊ីស្លាមដែលសង្ស័យ រួមមានជនជាតិស៊ីរី អ៊ីរ៉ាក់ និងជនជាតិដ៏ទៃទៀត ត្រូវបានដាក់ឲ្យស្នាក់នៅក្នុងជំរំឃុំឃាំងនៅទូទាំងតំបន់ បន្ទាប់ពីភៀសខ្លួនចេញពីតំបន់ដែលគ្រប់គ្រងដោយក្រុមជីហាដក្នុងអំឡុងពេលជម្លោះនៅស៊ីរី។ លោកស្រីនិយាយថា អ្វីដែលខ្ញុំនឹងនិយាយថា ធ្វើឱ្យខ្ញុំនិងក្រុមរបស់ខ្ញូំព្រួយបារម្ភបំផុត ខណៈយើងបានទៅពិនិត្យមើលនៅភាគឦសានប្រទេសស៊ីរី គឺជាការឃុំឃាំងកុមារជាច្រើនដោយច្បាស់លាស់ និងតាមអំពើចិត្ត ជាពិសេសក្មេងប្រុសនៅក្នុងទីតាំងផ្សេងៗគ្នា។ ការឃុំខ្លួនពួកគេនៅក្នុងជំរំ ពន្ធនាគារ និងមជ្ឈមណ្ឌល គឺ ផ្អែកលើការគំរាមកំហែងដែលចោទប្រកាន់ថាពួកគេបង្ករចំពោះបញ្ហាសន្តិសុខ ដោយផ្អែកលើការជាប់ពាក់ព័ន្ធពីមុនតាមដែលចោទប្រកាន់របស់ពួកគេ ឬឪពុកម្តាយរបស់ពួកគេជាមួយក្រុម Daesh ដែលលោកស្រីនិយាយបន្ថែមដោយប្រើពាក្យមានន័យដូចសម្រាប់ក្រុមរដ្ឋអ៊ីស្លាម។ ក្នុងចំណោមកន្លែងដែលលោកស្រីបានទៅពិនិត្យមើល គឺជំរំ al-Hol ដែលដំណើរការដោយជនជាតិឃឺដ មានផ្ទុកមនុស្សប្រមាណ ៥៥.០០០ នាក់ ក្នុងនោះមានកុមារ ៣១.០០០ នាក់។ ជំរំនេះក៏មានជនជាតិភាគីទីបីមកពីបណ្តាប្រទេសលោកខាងលិច ទោះបីជាមានសម្ពាធរបស់អង្គការសហប្រជាជាតិឲ្យយកពួកគេត្រលប់ទៅវិញក៏ដោយ។

កូរ៉េខាងជើងបាញ់មីស៊ីល តម្រង់គោលដៅច្រើនគ្រាប់ចូលទៅសមុទ្រ

នាយសេនាធិការចម្រុះរបស់ប្រទេសកូរ៉េខាងត្បូង បាននិយាយនៅថ្ងៃសៅរ៍ទី ២២ ខែកក្កដានេះថា ប្រទេសកូរ៉េខាងជើងបានបាញ់មីស៊ីលតម្រង់គោលដៅជាច្រើនគ្រាប់ ចូលទៅក្នុងសមុទ្រលឿងរវាងប្រទេសចិន និងឧបទ្វីបកូរ៉េ។ ការបាញ់មីស៊ីលទាំងនេះ ដែលយោធាបាននិយាយថា ធ្វើឡើងនៅម៉ោងប្រហែល ៤ ទៀបភ្លឺ ម៉ោងក្នុងតំបន់ កើតមានខណៈទំនាក់ទំនងរវាងកូរ៉េទាំងពីរស្ថិតក្នុងចំណុចទាបបំផុតមួយមិនធ្លាប់មាន។ នាយសេនាធិការ និយាយថា អាជ្ញាធរស៊ើបការណ៍កូរ៉េខាងត្បូង និងសហរដ្ឋអាមេរិក កំពុងវិភាគការបាញ់នេះ ខណៈកំពុងឃ្លាំមើលសញ្ញានៃសកម្មភាពបន្ថែមទៀត។កូរ៉េខាងជើង បានបាញ់មីស៊ីលបាលីស្ទីកពីរគ្រាប់ចូលសមុទ្រនៅឆ្នេរសមុទ្ររបស់ខ្លួនទៅកាន់ប្រទេសជប៉ុន កាលពីបីថ្ងៃមុន។ ការសាកល្បងសព្វាវុធនាពេលថ្មីៗនេះ គឺជាការធ្វើឡើងជាបន្តបន្ទាប់ចុងក្រោយ របស់ទីក្រុងព្យុងយ៉ាង ហើយបានកើតឡើងខណៈទីក្រុងសេអ៊ូល និងវ៉ាស៊ីនតោន បង្កើនកិច្ចសហប្រតិបត្តិការលើវិស័យការពារជាតិ ក្នុងការប្រឈមមុខនឹងភាពតានតឹងកំពុងកើនឡើងជាមួយកូរ៉េខាងជើង។ ទំនាក់ទំនងផ្នែកការទូតរវាងទីក្រុងព្យុងយ៉ាង និងទីក្រុងសេអ៊ូល បានជាប់គាំង ហើយមេដឹកនាំកូរ៉េខាងជើង លោក គីម ជុងអ៊ុន បានអំពាវនាវឱ្យបង្កើនការអភិវឌ្ឍអាវុធ រួមទាំងអាវុធនុយក្លេអ៊ែរតាទិក។ជាការឆ្លើយតប ទីក្រុងសេអ៊ូល និងទីក្រុងវ៉ាស៊ីនតោន បានធ្វើសមយុទ្ធយោធារួមគ្នាដោយមានយន្តហោះបំបាំងកាយទំនើប និងយុទ្ធោបករណ៍យុទ្ធសាស្ត្ររបស់សហរដ្ឋអាមេរិក ខណៈនាវាមុជទឹកបំពាក់ក្បាលគ្រាប់នុយក្លេអ៊ែររបស់អាមេរិកនៅសប្តាហ៍នេះ បានធ្វើទស្សនកិច្ចមកកាន់កំពង់ផែប្រទេសកូរ៉េខាងត្បូងជាលើកដំបូងក្នុងរយៈពេលជាច្រើនទសវត្សរ៍មកនេះ។

ភ្លៀងធ្លាក់ខ្លាំងបង្កើនកម្រិតទឹកជិត ៦ដងនៅទឹកជ្រោះ Iguazu (អ៊ីក្វាហ្ស៊ូ)របស់ប្រទេសប្រេស៊ីល

ប្រេស៊ីល៖ អ្នកតំណាងម្នាក់របស់ក្រុមហ៊ុនទេសចរណ៍ បាននិយាយប្រាប់ទីភ្នាក់ងារព័ត៌មានរ៉យទ័រថា ភ្លៀងធ្លាក់ខ្លាំងនៅតំបន់ភាគខាងត្បូងប្រទេសប្រស៊ីល បាននាំឲ្យទឹកហូរនៅទឹកជ្រោះ Iguazuកើនឡើងជិត ៦ដងក្នុងរយៈពេលប៉ុន្មានសប្តាហ៍ចុងក្រោយនេះ ។ លោក Wemerson Augusto គឺជាអ្នកគ្រប់គ្រងផ្នែកទំនាក់ទំនងរបស់ក្រុមហ៊ុនទេសចរណ៍ Cataratas និយាយថា ទឹកហូរនៅទឹកជ្រោះ Iguazu ដែលតាមធម្មតាហូរ ១,៥លានលីត្រក្នុងវិនាទីនោះ បានហូររហូតដល់ ៩លានលីត្រក្នុង១វិនាទី កាលពីសប្តាហ៍មុន ។ លោក Augusto បន្តថា កានកើនឡើងកម្រិតទឹកហូរនេះ គឺបណ្តាលមកពីភ្លៀងធ្លាក់ខ្លាំងឥតឈប់ឈរនៅតាមដងទន្លេ Iguazu និងនៅទីក្រុង Curitiba ជាកន្លែងប្រភពដើមនៃទន្លេ ។ ដោយឡែក នៅក្នុងប្រទេសអាហ្សង់ទីនវិញ រដ្ឋាភិបាល បានបិទការចូលទស្សនាទឹកជ្រោះ Garganta del Diablo កាលពីថ្ងៃទី ១១ ខែកក្កដាកន្លែងទៅ ប៉ុន្តែទោះបីជាយ៉ាងណាក៏ដោយ នៅប្រទេសប្រេស៊ីល ពុំមានការរឹតត្បិតបែបនេះទេលើភ្ញៀវទេសចរនោះទេ ៕

ទីក្រុងសេអ៊ូល៖ការវាយប្រហារនុយក្លេអ៊ែររបស់កូរ៉េខាងជើង នឹងមានន័យថាជាការបញ្ចប់របបនេះ

កូរ៉េខាងត្បូង៖ ទីក្រុងសេអ៊ូល បានប្រាប់កូរ៉េខាងជើងកាលពីថ្ងៃសុក្រថា ការប្រើប្រាស់នុយក្លេអ៊ែររបស់ខ្លួន នឹងមានន័យថា ជាការបញ្ចប់នៃរបបរបស់លោកគីម ជុងអ៊ុន បន្ទាប់ពីទីក្រុងព្យុងយ៉ាង បានគំរាមកំហែងសងសឹកនុយក្លេអ៊ែរទៅនឹងការបង្កើនការដាក់ពង្រាយយោធារបស់សហរដ្ឋអាមេរិកនៅលើឧបទ្វីបនេះ។ទំនាក់ទំនងរវាងកូរ៉េទាំងពីរ គឺស្ថិតនៅចំណុចទាបបំផុតដែលមិនធ្លាប់មាន ដោយកូរ៉េខាងជើង បានបង្កើនការសាកល្បងអាវុធ ខណៈដែលទីក្រុងសេអ៊ូល និងវ៉ាស៊ីនតោន បង្កើនកិច្ចសហប្រតិបត្តិការយោធា។រដ្ឋមន្ត្រីការពារជាតិរបស់ទីក្រុងព្យុងយ៉ាង បានព្រមានកាលពីថ្ងៃព្រហស្បតិ៍ថា ដំណើរទស្សនកិច្ចកំពង់ផែរបស់នាវាមុជទឹកដែលបំពាក់ដោយនុយក្លេអ៊ែររបស់សហរដ្ឋអាមេរិកទៅកាន់ទីក្រុងប៊ូសាន នៅសប្តាហ៍នេះ ជាលើកដំបូង ចាប់តាំងពីឆ្នាំ១៩៨១ អាចបំពេញតម្រូវតាមច្បាប់សម្រាប់កូរ៉េខាងជើងក្នុងការប្រើប្រាស់អាវុធនុយក្លេអ៊ែររបស់ខ្លួន។កាលពីឆ្នាំមុន ប្រទេសកូរ៉េខាងជើង បានអនុម័តច្បាប់នុយក្លេអ៊ែរដ៏ធំទូលាយមួយ ដោយបានដាក់ចេញនូវសេណារីយោមួយចំនួនដែលមានលក្ខណៈមិនច្បាស់លាស់ ដែលប្រទេសនេះ អាចប្រើប្រាស់នុយក្លេអ៊ែររបស់ខ្លួន រួមទាំងការវាយប្រហារនុយក្លេអ៊ែរជាមុន ប្រសិនបើមានការគំរាមកំហែង។ក្រសួងការពារជាតិរបស់ទីក្រុងសេអ៊ូល បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រនៅថ្ងៃសុក្រនេះថា ដូចដែលទីក្រុងសេអ៊ូល និងទីក្រុងវ៉ាស៊ីនតោន«បានបញ្ជាក់យ៉ាងច្បាស់»ពីមុនហើយ«ការវាយប្រហារនុយក្លេអ៊ែរណាមួយលើសម្ព័ន្ធមិត្ត នឹងប្រឈមមុខនឹងការឆ្លើយតបភ្លាមៗដ៏លើសលប់ និងដោយគ្មានការរារែក៕

ប្រទេសចិនបង្កើនកិច្ចខិតខំប្រឹងប្រែង ដើម្បីការពារទឹកជំនន់ ចំពេលមានភ្លៀងធ្លាក់ខ្លាំង

ចិន៖ ដោយមានការព្យាករណ៍ថានឹងមានភ្លៀងធ្លាក់ខ្លាំងបន្ថែមទៀតក្នុងរយៈពេលប៉ុន្មានថ្ងៃខាងមុខនេះ ប្រទេសចិន បានធ្វើសកម្មភាពឆ្លើយតបគ្រាអាសន្ននៅក្នុងតំបន់ប៉េកាំង-ធានជីន-ហឺប៉ី (Beijing-Tianjin-Hebei) និងបង្កើនកិច្ចខិតខំប្រឹងប្រែងគ្រប់គ្រងទឹកជំនន់ នៅតំបន់អាងទន្លេហៃ(Hai)។ទីភ្នាក់ងារសារព័ត៌មានគ្រប់គ្រងដោយរដ្ឋ បានឲ្យដឹងថា ក្រសួងធនធានទឹក នឹងរៀបចំការស្តុកទុកទឹកជំនន់ក្នុងអាងស្តុកទឹក ខណៈពេលដែលការពារទឹកជំនន់ភ្នំដែលបណ្តាលមកពីភ្លៀងធ្លាក់ខ្លាំង។ ភ្នាក់ងារនេះ បានបន្ថែមថា កិច្ចខិតខំប្រឹងប្រែង នឹងត្រូវបានធ្វើឡើង ដើម្បីជម្លៀសប្រជាជនចេញពីតំបន់គ្រោះថ្នាក់ ជាមុន។ក្រសួងក៏បានបញ្ជូនក្រុមអ្នកជួយចំនួនបី ទៅជួយក្នុងការងារការពារទឹកជំនន់ក្នុងតំបន់។ភ្លៀងធ្លាក់ខ្លាំង និងព្យុះភ្លៀងរហូតដល់១៥០មីលីម៉ែត្រ ត្រូវបានគេព្យាករថា នឹងបោកបក់ផ្នែកខ្លះនៃទីក្រុងប៉េកាំង និងទីក្រុងហឺប៉ី ចាប់ពីថ្ងៃព្រហស្បតិ៍ដល់ថ្ងៃអាទិត្យ ខណៈដែលទឹកជំនន់ត្រូវបានគេរំពឹងថានឹងវាយប្រហារលើអាងទន្លេហៃ ក្នុងរយៈពេលបីថ្ងៃខាងមុខនេះ នេះបើយោងតាមសារព័ត៌មានXinhua។ទូរទស្សន៍រដ្ឋ CCTV បានរាយការណ៍កាលពីថ្ងៃព្រហស្បតិ៍ថា ភ្លៀងធ្លាក់ខ្លាំង បានបណ្តាលឲ្យមានទឹកជំនន់ដ៏ធ្ងន់ធ្ងរនៅទូទាំងភាគពាយ័ព្យ និងភាគខាងកើតប្រទេសចិន រួមទាំងទីក្រុង Wuxi ក្នុងខេត្ត Jiangsu ផងដែរ។

ពិភពលោកគ្របដណ្ដប់ដោយ រលកកម្ដៅ ភ្លើងឆេះព្រៃ បំណាក់ដី និងព្យុះភ្លៀង

រលកកម្ដៅ ដែលកំពុងវាយប្រហារតំបន់អឺរ៉ុប ក៏បានវាយប្រហារតំបន់ហ្កាហ្សា ផងដែរ ជាទីដែលជនជាតិប៉ាឡេស្ទីនបានព្យាយាមស្វែងរកជំនួយដោយការត្រាំក្នុងសមុទ្រ កាលពីថ្ងៃពុធទី១៩កក្កដា និងយកទឹកត្រជាក់ស្រោចលើខ្លួនពួកគេ។ ភ្លើងឆេះព្រៃទូទាំងប្រទេសក្រិក បានស្រាកស្រាន្តយឺតៗ កាលពីថ្ងៃព្រហស្បតិ៍ ទី២០ខែកក្កដា បន្ទាប់ពីបានឆាបឆេះផ្ទៃដីព្រៃឈើយ៉ាងធំ និងលំនៅឋានរាប់សិបខ្នង ក្នុងពេលប៉ុន្មានថ្ងៃនេះ ប៉ុន្តែសីតុណ្ហភាពបានកើនឡើង ដែលអាចបង្កឲ្យមានស្ថានភាពធ្ងន់ធ្ងរថ្មីថែមទៀត ។ កសិករម្នាក់ លោក អានឌ្រៀ ហ្វើរីនី (Andrea Ferrini)ស្ថិតនៅតំបន់ជួរមុខនៃបម្រែបម្រួលអាកាសធាតុ ក្នុងប្រទេសអ៊ីតាលី និង លោកបានរៀបរាប់ទាំងទឹកភ្នែកនៅពេលលោកនិយាយពីផ្លែឈើ និងដំណាំរបស់លោក ក្នុងប្រទេសអ៊ីតាលី ភាគខាងជើង ដែលស្ងួតហួតហែង មុនពេលត្រូវបានវាយប្រហារដោយព្យុះភ្លៀង និងទឹកជំនន់ធ្ងន់ធ្ងរមិនធ្លាប់មាន ក្រោយការគ្របដណ្ដប់ដោយរលកកម្ដៅ និងរងការវាយប្រហារដោយព្យុះភ្លៀងនៅពេលចុងក្រោយនេះ។ នៅក្នុងទីក្រុងរ៉ូម ប្រជាពលរដ្ឋ និងក្រុមអ្នកទេសចរ បានព្យាយាមរកកន្លែងត្រជាក់ដោយប្រើទឹកក្នុងសួនបាញ់ទឹក ដ៏ល្បីល្បាញនានារបស់ទីក្រុងនេះ ខណៈ រដ្ឋធានីរបស់អ៊ីតាលី ក្លាយជារដ្ឋធានី មួយក្នុងចំណោមទីក្រុងជាច្រើន ត្រូវបានប៉ះពាល់ខ្លាំងបំផុត ដោយសាររកកកម្ដៅ ដែលបានវាយប្រហារអឺរ៉ុបខាងត្បូង។ នៅក្នុងប្រទេសឥណ្ឌា ភ្លៀងធ្លាក់ខ្លាំង បណ្ដាលឲ្យមានទឹកជំនន់ធ្ងន់ធ្ងរ ព្រមទាំងបំណាក់ដីដ៏ធំនៅក្នុងទីក្រុង ខាតួ (Kathua ក្នុងតំបន់ ចាមួ(Jammu) និង កាស្មៀរ( Kashmir) ជាទីដែលមនុស្ស១៦នាក់បានស្លាប់ និងប្រមាណ១០០នាក់ ត្រូវគេបារម្ភថាបានជាប់ក្រោមបំណាក់ដី កាលពីថ្ងៃព្រហស្បតិ៍។ កាលពីថ្ងៃពុធ ទី១៩កក្កដា ព្យុះ បានវាយប្រហារ ពាសពេញទីក្រុង ហ្សាក្រេប (Zaghreb) ប្រទេសក្រូអាត ដោយបានផ្ដួលរំលើងដើមឈើ និងខូចខាតរថយន្តមួយចំនួន៕

ថ្នាក់ដឹកនាំរបស់ឥណ្ឌា លោក Modi ត្រូវបានរិះគន់ពីការខ្វះចំណាត់ការ ជុំវិញការរំលោភផ្លូវភេទ នៅ Manipur

មេដឹកនាំបក្សប្រឆាំងនានារបស់ប្រទេសឥណ្ឌា កាលពីថ្ងៃព្រហស្បតិ៍ (ទី២០ ខែកក្កដា) បានថ្កោលទោសនាយករដ្ឋមន្ត្រី លោក Narendra Modi បន្ទាប់ពីរូបភាពក្នុងវីដេអូដែលបង្ហាញពីស្ត្រីត្រូវបានគេរំលោភបំពាន នៅក្នុងរដ្ឋ Manipur បានលេចឡើង និងបានបង្កឲ្យមានកំហឹងនៅទូទាំងប្រទេស។លោក Modi ដែលមិនបានធ្វើការកត់សម្គាល់ណាមួយជាសាធារណៈអំពីបញ្ហានៅក្នុងរដ្ឋដែលគ្រប់គ្រងដោយគណបក្សជាតិនិយមហិណ្ឌូ Bharatiya Janata (BJP) របស់លោកនោះ នៅទីបំផុត បានចេញមកថ្កោលទោសចំពោះការចោទប្រកាន់រំលោភបំពានផ្លូវភេទថាជាទង្វើ«គួរឲ្យអាម៉ាស់» ហើយបានសន្យាថា នឹងចាត់វិធានការយ៉ាងតឹងរ៉ឹង ដោយនេះជាការចេញការយល់ឃើញដំបូងរបស់លោក ពាក់ព័ន្ធការប៉ះទង្គិចគ្នា រវាងជនជាតិភាគតិច នៅភាគឦសានដាច់ស្រយាល ដែលបានសម្លាប់មនុស្សយ៉ាងហោចណាស់ ១២៥នាក់។ការប៉ះទង្គិចគ្នានេះ បានចាប់ផ្តើមកើតមាន នៅដើមខែឧសភា ហើយអំពើហិង្សាជាច្រើន ត្រូវបានបញ្ឈប់នៅពាក់កណ្តាលខែនោះ។ តែទោះបីជាយ៉ាងណាក៏ដោយ អំពើហិង្សា និងការសម្លាប់ម្ដងម្កាល បានបន្តកើតឡើងវិញភ្លាមៗ ហើយរដ្ឋដែលមានប្រជាជនចំនួន ៣,២លាននាក់ និងដែលមានព្រំដែនជាប់ប្រទេសមីយ៉ាន់ម៉ានេះ នៅតែមានតានតឹង ចាប់តាំងពីពេលនោះមក។ មនុស្សរាប់រយនាក់ បានរងរបួស និងជាង ៤០.០០០នាក់ បានភៀសខ្លួនចេញពីគេហដ្ឋានរបស់ពួកគេ៕

មេដឹកនាំ Hezbollah អំពាវនាវឲ្យប្រទេសអារ៉ាប់ និងរដ្ឋអ៊ីស្លាម ដកបេសកជន និងផ្ដាច់ទំនាក់ទំនងទូតជាមួយស៊ុយអែត

ចលនាតស៊ូលីបង់ហេសបូឡាហ៍ (Hezbollah) បានអំពាវនាវដល់ប្រទេសអារ៉ាប់ និងម៉ូស្លីមទាំងអស់ឲ្យដកឯកអគ្គរដ្ឋទូតស៊ុយអែតចេញពីរដ្ឋធានីរបស់ពួកគេ ដើម្បីជាប្រតិកម្មតបទៅនឹងការកើតមានជាលើកទី២ នៃការប្រមាថលើគម្ពីរកូរ៉ានដ៏ពិសិដ្ឋ នៅក្នុងប្រទេសរបស់អ៊ឺរ៉ុបមួយនេះ។គេហទំព័រព័ត៌មាន al-Ahed របស់ប្រទេសលីបង់ បានរាយការណ៍ពីសម្ដីរបស់មេដឹកនាំចលនាតស៊ូ Hezbollah លោក Sayyed Hassan Nasrallah ដែលនិយាយថា៖ «យើងមានការសោកស្ដាយចំពោះអ្វីដែលបានកើតឡើងនៅថ្ងៃនេះ ពោលគឺជាទង្វើដ៏អាក្រក់ថ្មីម្ដងទៀត។ អ្វីដែលយើងបានឃើញ គឺជាការបង្កហេតុដែលប៉ះពាល់ដល់អារម្មណ៍របស់ប្រជាជនម៉ូស្លីម ហើយវាច្បាស់ណាស់ថា អ្នកណាក៏ដោយដែលដុត ឬប្រមាថគម្ពីរពិសិដ្ឋកូរ៉ាន គឺដោយសារមានការអនុញ្ញាតពីរដ្ឋាភិបាលស៊ុយអែត ហើយអ្នកដុតថ្មីនេះ គឺបុគ្គលដដែល ដែលបានដុតគម្ពីរកូរ៉ាន នាពេលកន្លងមក»។ត្រឹមតែប៉ុន្មានម៉ោងមុននេះ លោក Salwan Momik ជនភៀសខ្លួនអ៊ីរ៉ាក់ដែលមានមូលដ្ឋាន នៅស៊ុយអែតបានដើរជាន់លើច្បាប់ចម្លងនៃគម្ពីរកូរ៉ាន និងបានទាត់គម្ពីរពិសិដ្ឋរបស់មូស្លីម អំឡុងពេលធ្វើបាតុកម្ម នៅខាងក្រៅវិហារអ៊ីស្លាមដ៏សំខាន់ ក្នុងទីក្រុងស្តុកខូម (Stockholm) ខណៈមានការការពារយ៉ាងតឹងរ៉ឹងសម្រាប់បាតុកម្មនេះដោយនគរបាលស៊ុយអែត។ទង្វើនៃការមើលងាយលើគម្ពីរពិសិដ្ឋនេះ បានបង្កឲ្យមានការតវ៉ាយ៉ាងខ្លាំងក្លានៅទូទាំងសហគមន៍អ៊ីស្លាមរបស់ពិភពលោក។ ប៉ុន្មានម៉ោងមុនការប្រមាថមើលងាយដែលបានគ្រោងទុក បាតុករអ៊ីរ៉ាក់រាប់រយនាក់បានប្រមូលផ្តុំគ្នានៅខាងក្រៅស្ថានទូតស៊ុយអែតក្នុងទីក្រុងបាកដាដ ដោយបានសម្រុកទៅវាយបំបាក់ជញ្ជាំង និងដុតបំផ្លាញផ្នែកខ្លះរបស់ស្ថានទូត។ ក្រុងបាកដាដបានបណ្តេញបេសកជនស៊ុយអែត និងដកឯកអគ្គរដ្ឋទូតរបស់ខ្លួនចេញពីក្រុងស្តុកខុម៕

បណ្ដាញសង្គម

ព័ត៌មានថ្មីៗ

ស្ថានឯកអគ្គរាជទូតកម្ពុជានៅជប៉ុន នឹងបន្តផ្តល់សេវា កុងស៊ុល កិច្ចគាំពារផ្នែកការងារ និងជំនួយចាំបាច់ផ្សេងៗជូនប្រជាពលរដ្ឋកម្ពុជានៅទូទាំងប្រទេសជប៉ុន

សេចក្តីថ្លែងការណ៍៖ ប្រទេសចំនួន៩នៅអឺរ៉ុប និងអ៊ុយក្រែនបង្កើតសម្ព័ន្ធភាពប្រឆាំងមីស៊ីលបាលីស្ទីក

អ្នកនាំពាក្យក្រសួងព័ត៌មាន៖ យុទ្ធនាការ "និយាយថាទេចំពោះព័ត៌មានក្លែងក្លាយ" បានជោគជ័យក្នុងការផ្លាស់ប្តូរឥរិយាបថពលរដ្ឋ ជាពិសេសយុវវ័យឱ្យចេះត្រិះរិះពិចារណា និងផ្ទៀងផ្ទាត់ព័ត៌មានជាមួយប្រភពផ្លូវការមុននឹងចែករំលែក

លោក Trump ថាកិច្ចព្រមព្រៀងជាមួយអ៊ីរ៉ង់នៅតែអាចសម្រេចបាន ខណៈអាមេរិកបើកការវាយប្រហារយប់ទី៣

ក្រុមហ៊ួធីចោទប្រកាន់អារ៉ាប៊ីសាអ៊ូឌីតថា បានវាយប្រហារអាកាសយានដ្ឋានទីក្រុង Sanaa ហើយប្ដេជ្ញាសងសឹក

លោក Trump បញ្ជាក់ថា អាមេរិកគួរតែគ្រប់គ្រងច្រកសមុទ្រ Hormuz ហើយទទួលបានប្រាក់កម្រៃពីវា

ចក្រភពអង់គ្លេស ដាក់កងឆ្មាំបដិវត្តន៍អ៊ីរ៉ង់ក្នុងបញ្ជីជា «ក្រុមភេរវកម្ម»

លោក Zelenskyy ដាក់សេចក្តីព្រាងច្បាប់ទៅសភា ដើម្បីបន្ថែមរយៈពេលនៃច្បាប់អាជ្ញាសឹក

ទូរទស្សន៍រដ្ឋ៖ អ៊ីរ៉ង់បានបាញ់ «ព្រមាន» នាវា ២គ្រឿង នៅច្រកសមុទ្រ Hormuz

EU ដាក់ទណ្ឌកម្មថ្មីលើ «ឧក្រិដ្ឋជនតាមអ៊ីនធឺណិត» ដែលមានទំនាក់ទំនងជាមួយរុស្ស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877