BTV NEWS

កម្លាំងចម្រុះ រកឃើញជនជាតិចិន ៩០នាក់, ជនជាតិវៀតណាម ៣៥នាក់, ជនជាតិមីយ៉ាន់ម៉ា១៥នាក់, ឡាវម្នាក់ ក្នុងប្រតិបត្តិការចុះត្រួតពិនិត្យទីតាំងសង្ស័យលួចលាក់ប្រព្រឹត្តបទល្មើស Online Scam នៅក្រុងបាវិត

អាជ្ញាធរខេត្តកោះកុង បំភ្លឺថាមិនមានការបង្រ្កាបទីតាំងល្បែងអនឡាញទេ មានការស្រាវជ្រាវករណីឃាតកម្ម

អាវុធហត្ថខេត្តស្ទឹងត្រែងឃាត់រថយន្តដឹកជនជាតិចិនចំនួន ៩នាក់ ពាក់ព័ន្ធការឆបោកតាមប្រព័ន្ធបច្ចេកវិទ្យា

ចាប់ពីថ្ងៃទី២៧ ខែមិថុនាដល់ថ្ងៃទី១៦ ខែកក្កដានេះ គ.ប.ឆ.ប. បង្រ្កាប ONLINESCAMS ២០ទីតាំងឃាត់ខ្លួនជនសង្ស័យ ១.៣៦២ នាក់ ក្នុងនោះជនជាតិវៀតណាម ៣៤៧នាក់

សន្តិសុខ និង សង្គម

មនុស្ស ១១ នាក់ស្លាប់ និងរាប់សិបនាក់របួសក្នុងគ្រោះថ្នាក់រថយន្តក្រុងនៅឥណ្ឌូនេស៊ី

នគរបាលបាននិយាយកាលពីថ្ងៃអាទិត្យ (១២ ឧសភា) ថា យ៉ាងហោចណាស់មនុស្ស ១១ នាក់បានស្លាប់ និងរាប់សិបនាក់ផ្សេងទៀតបានរងរបួស នៅពេលដែលរថយន្តក្រុងដឹកសិស្សវិទ្យាល័យក្នុងការធ្វើដំណើរកម្សាន្តបញ្ចប់ការសិក្សា បានជួបគ្រោះថ្នាក់នៅលើកោះដ៏ធំបំផុតរបស់ប្រទេសឥណ្ឌូនេស៊ី។រថយន្តក្រុងនេះបានដឹកសិស្ស និងគ្រូបង្រៀនជាង ៦០ នាក់ពីទីក្រុង ដេប៉ុក (Depok) ទៅកាន់ទីក្រុង លឹមបាង (Lembang) នៃកោះ ជ្វា (Java) ដែលជាកន្លែងទេសចរណ៍ដ៏ពេញនិយមមួយ នៅពេលដែលវាបានជួបគ្រោះថ្នាក់នៅម៉ោង ៦:៤៨ ល្ងាចកាលពីថ្ងៃសៅរ៍។អ្នកនាំពាក្យនគរបាលខេត្ត ជ្វា ខាងលិច បានប្រាប់សារព័ត៌មាន AFP កាលពីថ្ងៃអាទិត្យថា សិស្សានុសិស្សទាំងនោះទើបតែបានប្រារព្ធពិធីបញ្ចប់ការសិក្សារបស់ពួកគេ ហើយកំពុងធ្វើដំណើរត្រឡប់ទៅសាលារៀនវិញ នៅពេលដែលរថយន្តក្រុងនោះបាត់បង់ការគ្រប់គ្រង និងរ៉េចង្កូតទៅបុករថយន្ត និងម៉ូតូបីគ្រឿងនៅក្បែរនោះ។ប្រមុខនគរបាលចរាចរណ៍ក្នុងតំបន់ លោក អ៊ុនដាង ស្យ៉ារីហ្វ ហ៊ីដាយ៉ាត (Undang Syarif Hidayat) បានប្រាប់ទូរទស្សន៍ ខមផាស (Kompas) ថាលោកសង្ស័យថាហ្វ្រាំងរបស់រថយន្តក្រុងបានដំណើរការខុសប្រក្រតីមុនពេលគ្រោះថ្នាក់ ប៉ុន្តែនគរបាលនៅតែកំពុងស៊ើបអង្កេតមូលហេតុពិតប្រាកដនៃគ្រោះថ្នាក់នេះ៕

អេហ្ស៊ីបនឹងធ្វើអន្តរាគមន៍ក្នុងសំណុំរឿង ICJ ខណៈភាពតានតឹងជាមួយអ៊ីស្រាអែលកើនឡើង

ប្រទេសអេហ្ស៊ីប កាលពីថ្ងៃអាទិត្យ (ទី១៣ ខែឧសភា) បាននិយាយថា ខ្លួននឹងធ្វើអន្តរាគមន៍ក្នុងការគាំទ្រក្នុងសំណុំរឿងរបស់អាហ្វ្រិកខាងត្បូងប្រឆាំងនឹងអ៊ីស្រាអែល នៅតុលាការយុត្តិធម៌អន្តរជាតិ (ICJ) ដោយលើកឡើងពីទំហំប្រតិបត្តិការរបស់អ៊ីស្រាអែលដែលកំពុងកើនឡើង នៅក្នុងតំបន់ហ្កាហ្សា និងផលប៉ះពាល់របស់ពីប្រតិបត្តិការរបស់ពួកគេទៅលើជនស៊ីវិល។ការសម្រេចនេះបង្ហាញឲ្យឃើញពីភាពតានតឹងដែលកំពុងកើនឡើង រវាងប្រទេសជិតខាងទាំង២ ខណៈប្រតិបត្តិការរបស់អ៊ីស្រាអែលនៅទីក្រុងព្រំដែន Rafah សាកល្បងកិច្ចព្រមព្រៀងរយៈពេលវែង និងកិច្ចសហប្រតិបត្តិការសន្តិសុខ។ក្រសួងការបរទេសអេហ្ស៊ីបបានប្រាប់ថា «ការប្រកាសអំពីអន្តរាគមន៍ ក្នុងសំណុំរឿងនេះ កើតឡើងដោយសារពិចារណាដល់ការពង្រីកវិសាលភាព និងទំហំនៃការរំលោភបំពានរបស់អ៊ីស្រាអែល ប្រឆាំងនឹងជនស៊ីវិលនៅតំបន់ហ្កាហ្សា» ដោយក្រសួងមិនបានបញ្ជាក់ច្បាស់ថា តើអន្តរាគមន៍នេះ នឹងរួមបញ្ចូលអ្វីខ្លះ។ កន្លងមក ប្រទេសអេហ្ស៊ីបបានបង្ហាញទឡ្ហីករណ៍ក្នុងសំណុំរឿងនេះ។សូមបញ្ជាក់ថា កាលពីថ្ងៃសុក្រ (ទី១០ ខែឧសភា) ប្រទេសអាហ្រ្វិកខាងត្បូងបានស្នើសុំតុលាការឲ្យបញ្ជាអ៊ីស្រាអែលដកចេញពីទីក្រុង Rafah ដែលជាផ្នែកនៃវិធានការសង្គ្រោះបន្ទាន់បន្ថែមនៅក្នុងសំណុំរឿងដែលកំពុងបន្តមាន ពោលគឺជាបទចោទប្រកាន់អ៊ីស្រាអែលពីអំពើប្រល័យពូជសាសន៍។ប្រភពពីសន្តិសុខអេហ្ស៊ីប បានប្រាប់សារព័ត៌មាន Reuters ថា មន្ត្រីអេហ្ស៊ីបបានបញ្ជូនបន្តទៅកាន់អ៊ីស្រាអែលថា ពួកគេបានស្តីបន្ទោសសកម្មភាពរបស់ប្រទេសនេះថា បានធ្វើឲ្យទំនាក់ទំនងទ្វេភាគីតានតឹង និងរាំងស្ទះដល់គណៈប្រតិភូមកពីក្រុមហាម៉ាស អ៊ីស្រាអែល សហរដ្ឋអាមេរិក អេហ្ស៊ីប និងកាតា ដែលបានធ្វើកិច្ចចរចាបទឈប់បាញ់ នៅទីក្រុងគែរ។ នៅពេលសួរអំពីសន្ធិសញ្ញាឆ្នាំ១៩៧៩ រវាងប្រទេសទាំង២ ទាក់ទងនឹងប្រតិបត្តិការនៅទីក្រុង Rafah រដ្ឋមន្ត្រីការបរទេសអេហ្ស៊ីបលោក Sameh Shoukry កាលពីថ្ងៃអាទិត្យ បានប្រាប់ថា សន្ធិសញ្ញានេះ គឺចាំបាច់ដើម្បីធានាសន្តិសុខ ហើយថា វាមានយន្តការដើម្បីដោះស្រាយការរំលោភណាមួយដោយមិនចាំបាច់ចូលទៅក្នុងសេចក្ដីកម្អិត៕

ចំហេះនៅភាគខាងលិចកាណាដា បណ្តាលឲ្យមានការជម្លៀស និងក្ដីបារម្ភអំពីគុណភាពខ្យល់

ចំហេះព្រៃដ៏ធំដំបូងគេ ក្នុងរដូវកាលនេះ បានរាលដាលដល់ផ្ទៃដីទំហំប្រហែល ១០.០០០ហិកតា នៅទូទាំងភាគខាងលិចប្រទេសកាណាដា កាលពីថ្ងៃអាទិត្យ (ទី១២ ខែឧសភា) ខណៈដែលអាជ្ញាធរបានចេញបញ្ជាជម្លៀស សម្រាប់សហគមន៍មួយ ក្នុងខេត្ត British Columbia និងបានព្រមានពីការមានគុណភាពខ្យល់មិនល្អនៅទូទាំងខេត្តនេះ។នៅខេត្ត British Columbia អ្នកស្រុករាប់ពាន់នាក់នៅក្នុងតំបន់ទីក្រុង Northern Rockies និងតំបន់ Fort Nelson First Nations ត្រូវបានជម្លៀសចេញ ខណៈដែលអណ្ដាតភ្លើងនៅក្បែរនោះ បានឆាបឆេះកើនឡើងជិតទ្វេដងដល់ ៤.១៣៦ហិកតា។តំបន់ Fort Nelson First Nation ដែលមានចម្ងាយ ៧គីឡូម៉ែត្រពីទីក្រុង ក៏ត្រូវបានបញ្ជាឲ្យជម្លៀសចេញផងដែរ សម្រាប់សហគមន៍ Fontas ដែលជាសហគមន៍ជនជាតិដើមភាគតិច។ អភិបាលក្រុង Northern Rockies លោក Rob Fraser នៅក្នុងបទសម្ភាសន៍តាមទូរទស្សន៍ បាននិយាយថា ភាគច្រើននៃអ្នកស្រុកចំនួន ៣.៥០០នាក់ ទាំងនៅក្នុង និងជុំវិញតំបន់ Fort Nelson ត្រូវបានជម្លៀសចេញ។ចំណែកខេត្ត Alberta បានឲ្យដឹងថា ចំហេះព្រៃចំនួន២ មានសភាពខ្លាំងក្លា និងមិនអាចគ្រប់គ្រងបាន ហើយបានកត់ត្រាពីការចំហេះសកម្មចំនួន ៤៣កន្លែង ដែលក្នុងនោះមានមួយកន្លែងស្ថិតនៅចម្ងាយ ១៦គីឡូម៉ែត្រភាគនិរតីនៃទីក្រុង Fort McMurray។ អណ្ដាតភ្លើងនោះបានរាលដាលយ៉ាងខ្លាំង កាលពីចុងសប្តាហ៍ដល់ផ្ទៃដី ៥.៥០០ហិកតា ដែលមានទំហំធំជាងអ្វីដែលបានរាយការណ៍កាលពីថ្ងៃសុក្រ(ទី១០ ខែឧសភា)។កាលពីថ្ងៃអាទិត្យ (ទី១២ ខែឧសភា) អាជ្ញាធរបានប្រាប់ថា អណ្ដាតភ្លើងបានថមថយ តែគេរំពឹងថា នឹងរាលដាលខ្លាំងក្លាឡើងវិញ ដោយសារអាកាសធាតុឡើងខ្ពស់។ ស្ថាប័នបរិស្ថានកាណាដាបានចេញសេចក្តីថ្លែងការណ៍ពិសេសអំពីគុណភាពខ្យល់ដែលលាតសន្ធឹងពីខេត្ត British Columbia ដល់ខេត្ត Ontario កាលពីថ្ងៃអាទិត្យ។គួរបញ្ជាក់ថា រដ្ឋាភិបាលសហព័ន្ធបានព្រមានថា កាណាដាត្រូវប្រឈមនឹងរដូវកាលចំហេះព្រៃ «ដ៏មហន្តរាយ» មួយផ្សេងទៀត ខណៈដែលខ្លួនព្យាករថា សីតុណ្ហភាពនិទាឃរដូវ និងរដូវក្តៅខ្ពស់ជាងធម្មតា នៅទូទាំងប្រទេស ដែលត្រូវបានជំរុញដោយលក្ខខណ្ឌអាកាសធាតុនៃបាតុភូត El Nino៕

ចំនួនអ្នកស្លាប់ប៉ាឡេស្ទីន នៅតំបន់សង្រ្គាមហ្កាហ្សា កើនឡើងដល់ជាង ៣៥.០០០ នាក់

អាជ្ញាធរសុខាភិបាលក្នុងតំបន់ហ្កាហ្សា បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យ (១២ ឧសភា) ថាចំនួនអ្នកស្លាប់របស់ប៉ាឡេស្ទីន ពីការវាយប្រហាររបស់អ៊ីស្រាអែល ដែលកំពុងបន្តលើតំបន់ហ្កាហ្សាស្ទ្រីប បានកើនឡើងលើសពី ៣៥.០០០ នាក់។ក្នុងរយៈពេល ២៤ ម៉ោងកន្លងមកនេះ កងទ័ពអ៊ីស្រាអែល បានសម្លាប់ជនជាតិប៉ាឡេស្ទីនចំនួន ៦៣ នាក់ និងបង្ករបួស ១១៤ នាក់ផ្សេងទៀត ដែលនាំឱ្យចំនួនអ្នកស្លាប់សរុបកើនឡើងដល់ ៣៥.០៣៤ នាក់ និងអ្នករបួសដល់ ៧៨.៧៥៥ ចាប់តាំងពីជម្លោះដ៏បង្ហូរឈាមរវាងប៉ាឡេស្ទីន និងអ៊ីស្រាអែល បានផ្ទុះឡើងកាលពីខែតុលា ឆ្នាំមុន។សេចក្តីថ្លែងការណ៍នោះបានកត់សម្គាល់ថា ជនរងគ្រោះមួយចំនួននៅតែស្ថិតនៅក្រោមគំនរបាក់បែក ហើយរថយន្តគិលានសង្គ្រោះបន្ទាន់ និងក្រុមការពារស៊ីវិលមិនអាចទៅដល់ពួកគេបានឡើយ ដោយសារតែកង្វះខាតឧបករណ៍សង្រ្គោះ បូករួមនឹងការវាយប្រហារឥតឈបឈររបស់ភាគីជម្លោះ។អ៊ីស្រាអែល បាននិងកំពុងបើកការវាយលុកទ្រង់ទ្រាយធំប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីប ដើម្បីសងសឹកប្រឆាំងនឹងការវាយលុកឆ្លងកាត់ព្រំដែនភាគខាងត្បូងអ៊ីស្រាអែល ដោយក្រុមនេះ កាលពីថ្ងៃទី០៧ ខែតុលា ឆ្នាំ២០២៣ ក្នុងអំឡុងពេលដែលមនុស្សប្រហែល ១.២០០ នាក់បានស្លាប់ និងប្រហែល ២៥០ នាក់ត្រូវបានចាប់ខ្លួន៕

កាណាដា ចាប់ខ្លួនជនល្មើសជនជាតិឥណ្ឌា ទី៤ ពីបទឃាតកម្មលើមេដឹកនាំសាសនាស៊ីក

នគរបាលកាណាដា បាននិយាយកាលពីថ្ងៃសៅរ៍ (១១ ឧសភា) ថាជនល្មើសទីបួនត្រូវបានចាប់ខ្លួន និងចោទប្រកាន់ពីបទឃាតកម្មលើមេដឹកនាំផ្តាច់ខ្លួនសាសនាស៊ីក លោក ហាឌីប ស៊ីញនីចា (Hardeep Singh Nijjar) កាលពីឆ្នាំមុន នៅក្នុងករណីដែលធ្វើអោយទំនាក់ទំនងការទូតមានភាពតានតឹងជាមួយឥណ្ឌា។នគរបាលកាណាដាកាលពីដើមខែនេះ បានចាប់ខ្លួន និងចោទប្រកាន់បុរសជនជាតិឥណ្ឌាបីនាក់រួចទៅហើយ នៅក្នុងទីក្រុង អ៊ែដម៉ុនតុន (Edmonton) ក្នុងខេត្តអាល់ប៊ឺតតា (Alberta) ហើយនិយាយថាពួកគេកំពុងស៊ើបអង្កេតថាតើបុរសទាំងនោះមានទំនាក់ទំនងនឹងរដ្ឋាភិបាលឥណ្ឌា ដែរឬទេ។ក្រុមស៊ើបអង្កេតអំពើមនុស្សឃាតរួមគ្នា (IHIT) បានប្រកាសកាលពីថ្ងៃសៅរ៍ថា បុរសឈ្មោះ អាម៉ានឌីប ស៊ីញ (Amandeep Singh) វ័យ ២២ ឆ្នាំត្រូវបានចោទប្រកាន់ពីបទមនុស្សឃាតកម្រិតទី១ និងការសមគំនិតក្នុងអំពើឃាតកម្មនៅក្នុងការសម្លាប់លោក នីចា។ ក្រុមស៊ើបអង្កេត IHIT នេះបន្ថែមថា លោក ស៊ីញ ដែលជាជនជាតិឥណ្ឌា ត្រូវបានឃុំខ្លួនរួចមកហើយសម្រាប់ការចោទប្រកាន់ផ្សេងទៀតពីបទកាន់កាប់អាវុធខុសច្បាប់។លោក នីចា វ័យ ៤៥ ឆ្នាំត្រូវបានបាញ់សម្លាប់កាលពីខែមិថុនា នៅខាងក្រៅវិហារសាសនាស៊ីក ក្នុងតំបន់ សើរ៉េយ (Surrey) ជាយក្រុង វេនខូវើ (Vancouver) ដែលមានប្រជាជនកាន់សាសនាស៊ីកច្រើន។ ប៉ុន្មានខែក្រោយមក នាយករដ្ឋមន្ត្រីកាណាដា លោក ចាស្ទីន ទ្រូដូ (Justin Trudeau) បានលើកឡើងពីភស្តុតាងពីលទ្ធភាពនៃការពាក់ព័ន្ធរបស់រដ្ឋាភិបាលឥណ្ឌា ដែលជំរុញឱ្យមានវិបត្តិការទូតជាមួយទីក្រុង ញូវដេលី (New Delhi)៕

[UPDATE] ចំនួនអ្នកស្លាប់ក្នុងទឹកជំនន់ និងបំណាក់ល្បាប់ពីបន្ទុះភ្នំភ្លើង នៅឥណ្ឌូនេស៊ីបានកើនឡើងដល់ ៤១

មន្ត្រីក្រសួងគ្រប់គ្រងគ្រោះមហន្តរាយក្នុងតំបន់ម្នាក់ បាននិយាយកាលពីថ្ងៃអាទិត្យ ១២ ឧសភា ថាមនុស្សយ៉ាងហោចណាស់ ៤១ នាក់ត្រូវបានបញ្ជាក់ថាបានស្លាប់ និង១៧នាក់ទៀតបាត់ខ្លួន បន្ទាប់ពីទឹកជំនន់គំហុក និងការហូរធ្លាក់កម្អែរត្រជាក់ចេញពីភ្នំភ្លើងមួយ បានវាយប្រហារភាគខាងលិចប្រទេសឥណ្ឌូនេស៊ី។ ភ្លៀងធ្លាក់ខ្លាំងជាច្រើនម៉ោងបានបណ្តាលឱ្យមានទឹកជំនន់នៅក្នុងស្រុកចំនួនពីរក្នុងខេត្តស៊ូម៉ាត្រាខាងលិចកាលពីល្ងាចថ្ងៃសៅរ៍ ហើយបានបញ្ចេញកម្ទេចផេះ និងថ្មធំៗ ធ្លាក់ចុះពីលើភ្នំម៉ារ៉ាពី (Marapi) ដែលជាភ្នំភ្លើងតែងផ្ទុះដ៏សកម្មបំផុតនៅលើកោះស៊ូម៉ាត្រានៃប្រជុំកោះនេះ។ អ្នកនាំពាក្យទីភ្នាក់ងារគ្រោះមហន្តរាយខេត្ត ស៊ូម៉ាត្រាខាងលិច លោក អ៊ីលហាំ វ៉ាហាប់ (Ilham Wahab) បានប្រាប់សារព័ត៌មាន AFP ថា រហូតមកដល់ពេលនេះទិន្នន័យរបស់យើងបង្ហាញថាមនុស្ស៣៧នាក់បានស្លាប់ នៅក្នុងស្រុកអាហ្កាំ (Agam) និងនៅស្រុក តាណាដាតា(Tanah Datar)។ យ៉ាងហោចណាស់មនុស្ស ១៨ នាក់ផ្សេងទៀត បានរងរបួស។ យើងកំពុងបន្តស្វែងរកមនុស្ស១៧ នាក់ផ្សេងទៀតដែលបាត់ខ្លួន។ យោងតាមទីភ្នាក់ងារស្វែងរក និងជួយសង្គ្រោះ បាសាណាស់ (Basarnas) ស្រុក អាហ្កាំ និង ស្រុក តាណាដាតា ត្រូវបានវាយប្រហារដោយទឹកជំនន់ដ៏គំហុក និងលំហូរកម្អែរត្រជាក់ចុះពីភ្នំភ្លើង ម៉ោន ម៉ារ៉ាពី (Mount Marapi) នៅម៉ោងប្រហែល ១០និង៣០នាទី យប់ថ្ងៃសៅរ៍ ។ កម្អែលភ្នំភ្លើង ដែលត្រូវគេស្គាល់ផងដែរថាជា បំណាក់ល្បាប់ចុះពីភ្នំភ្លើង គឺជាវត្ថុធាតុភ្នំភ្លើង ដូចជាផេះ ខ្សាច់ និងគ្រួស ដែលហូរធ្លាក់ចុះពីតាមជម្រាលភ្នំភ្លើងដោយសារទឹកភ្លៀង៕

អ្នកស្លាប់ក្នុងទឹកជំនន់នៅប្រេស៊ីល ឡើងដល់ជាង ១៤០ នាក់ ខណៈភ្លៀងធ្លាក់ខ្លាំងនៅតែបន្ត

ស្ថាប័នការពារជនស៊ីវិលក្នុងតំបន់ បាននិយាយកាលពីថ្ងៃអាទិត្យ (១២ ឧសភា) ថា ចំនួនអ្នកស្លាប់ដោយសារភ្លៀងធ្លាក់ខ្លាំងនៅក្នុងរដ្ឋ រីអូ ក្រានដេ ដូស៊ុល (Rio Grande do Sul) របស់ប្រទេសប្រេស៊ីល បានកើនឡើងដល់ ១៤៣ នាក់ ខណៈភ្លៀងនៅតែបន្តធ្លាក់លើរដ្ឋដែលរងគ្រោះមួយនេះ។មនុស្ស ១២៥ នាក់ផ្សេងទៀតនៅតែមិនទានជួយសង្រ្គោះបាន ខណៈដែលកម្ពស់នៃទឹកទន្លេ ត្រូវបានរាយការណ៍ថាកំពុងកើនឡើងបន្ថែមទៀត។ សេវាអាកាសធាតុរបស់ប្រេស៊ីល បានហៅស្ថានភាពនេះថា «គួរឱ្យព្រួយបារម្ភខ្លាំងណាស់»។នៅល្ងាចថ្ងៃសៅរ៍ រដ្ឋាភិបាលបានប្រកាសប្រហែល ១២,១ ពាន់លានរ៉េអាល់ (២,៣៤ ពាន់លានដុល្លារ) ក្នុងការចំណាយគ្រាអាសន្ន ដើម្បីដោះស្រាយវិបត្តិដែលបានជម្លៀសមនុស្សជាង ៥៣៨.០០០ នាក់នៅក្នុងរដ្ឋ ក្នុងចំណោមប្រជាជនប្រហែល ១០,៩ លាននាក់។ ប្រធានាធិបតីប្រេស៊ីល លោក លូអ៊ីស អ៊ីណាស៊ីអូ លូឡា ដាស៊ីលវ៉ា (Luiz Inacio Lula da Silva) បាននិយាយថា រដ្ឋនឹងសាងសង់ឡើងវិញនូវអ្វីដែលត្រូវបានបំផ្លាញ។ភ្លៀងបានធ្លាក់ខ្លាំងកាលពីថ្ងៃអាទិត្យ ហើយត្រូវបានគេរំពឹងទុកថានឹងបន្តធ្លាក់នៅថ្ងៃចន្ទនេះ។ តិចជាងពីរសប្តាហ៍បន្ទាប់ពីភ្លៀងបានចាប់ផ្តើម រដ្ឋបានប្រកាសអាសន្នម្តងទៀតជាមួយនឹងហានិភ័យនៃទឹកដែលបន្តកើនឡើងនៅបឹង ហ្គូអៃបា (Guaiba) ក្បែររដ្ឋធានី ព័រតូ អាលេហ្ក្រេ (Porto Alegre) របស់រដ្ឋ រីអូ ក្រានដេ របស់ប្រេស៊ីលមួយនេះ៕

UN៖ ជនស៊ីវិលជិត ៣០ នាក់ ត្រូវបានសម្លាប់នៅក្នុងជម្លោះដែលបន្តជាថ្មីនៅស៊ូដង់

ទីភ្នាក់ងារមួយរបស់អង្គការសហប្រជាជាតិ បាននិយាយកាលពីថ្ងៃអាទិត្យ (១២ ឧសភា) ថា យ៉ាងហោចណាស់ជនស៊ីវិល ២៧ នាក់ត្រូវបានសម្លាប់ និងប្រហែល ១៣០ នាក់បានរងរបួស បន្ទាប់ពីការបន្តជាថ្មីនៃជម្លោះរវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF) នៅក្នុងទីក្រុង អែល ហ្វាស្ហើ (El Fasher) រដ្ឋធានីនៃរដ្ឋ ណស ដាហ្វឺ (North Darfur)។ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយនៅក្នុងរបាយការណ៍ចុងក្រោយរបស់ខ្លួនថា ប្រជាជនប្រមាណ ៨៥០ នាក់ ដែលប្រហែល ១៧០ គ្រួសារ ត្រូវបានផ្លាស់ទីលំនៅទៅកាន់ទីតាំងផ្សេងៗគ្នានៅទូទាំងតំបន់ អែល ហ្វាស្ហើ ដោយសារតែការប៉ះទង្គិចគ្នាថ្មីនេះ។អស់រយៈពេលជាច្រើនសប្តាហ៍ កងកម្លាំងគាំទ្ររហ័ស RSF បាននឹងកំពុងប្រមូលផ្តុំអ្នកប្រយុទ្ធរាប់ពាន់នាក់នៅជាយក្រុង អែល ហ្វាស្ហើ ក្នុងការរៀបចំសម្រាប់ការវាយប្រហារ ខណៈដែលកងកម្លាំងប្រដាប់អាវុធស៊ូដង់ SAF និងក្រុមប្រដាប់អាវុធនៅរដ្ឋដាហ្វឺ ដែលជាសម្ព័ន្ធមិត្ត បានពង្រឹងវត្តមានយោធារបស់ពួកគេនៅច្រកចូលក្រុង អែល ហ្វាស្ហើ និងជុំវិញតំបន់លំនៅឋានភាគច្រើននៃទីក្រុង។កាលពីសប្តាហ៍មុន អង្គការសហប្រជាជាតិបានព្រមានថា មនុស្សប្រហែល ៨០០.០០០ នាក់នៅក្នុងទីក្រុង អែល ហ្វាស្ហើ កំពុងស្ថិតក្នុង «គ្រោះថ្នាក់ធ្ងន់ធ្ងរ និងភ្លាមៗ» ខណៈដែលអំពើហិង្សាកាន់តែអាក្រក់ទៅៗ និងគំរាមកំហែងដល់ «ការបង្កជម្លោះដ៏បង្ហូរឈាមរវាងសហគមន៍» នៅទូទាំងតំបន់ ដាហ្វឺ៕

កម្លាំងនគរបាលឆ្មក់បង្ក្រាបទីតាំងផលិតកែច្នៃសារធាតុញៀន នៅក្នុងខេត្តព្រះសីហនុ និងរឹបអូសបានជិត ៦០គីឡូក្រាម

ព្រះសីហនុ៖ កម្លាំងនគរបាលប្រឆាំងគ្រឿងញៀន នៃស្នងការដ្ឋាននគរបាលខេត្តព្រះសីហនុ បានចុះស្រាវជ្រាវ និងបង្រ្កាបករណីកាន់កាប់អាវុធខុសច្បាប់ និងផលិតជួញដូរ និងកែច្នៃដោយខុសច្បាប់ នូវសារធាតុញៀន ១កន្លែង ឃាត់ខ្លួនជនបរទេសម្នាក់ និងសារធាតុញៀនជិត ៦០គីឡូក្រាម ។ វរសេនីយ៍ឯក កាន់ វណ្ណា ស្នងការរង បានឱ្យដឹងនៅរសៀលថ្ងៃទី១២ ខែឧសភា នេះថា ប្រតិបត្ដិការដែលមានការសម្របសម្រួលនីតិវិធីពីលោក លុច សុខលៀង ព្រះរាជអាជ្ញាររង នៃអយ្យការអមសាលាដំបូងខេត្ដព្រះសីហនុ កម្លាំងជំនាញបានចុះស្រាវជ្រាវ និងបង្រ្កាបនៅចំណុចសណ្ឋាគារ ជូហេតាង ស្ថិតក្នុងក្រុមទី១៥ ភូមិ៣ សង្កាត់លេខ១ ក្រុងព្រះសីហនុ ។ កាលពីរសៀលថ្ងៃទី១០ ខែឧសភា ឆ្នាំ២០២៤ ឃាត់ខ្លួនជនសង្ស័យ ០១នាក់ ជនជាតិចិន ព្រមទាំងដកហូតវត្ថុតាងមួយចំនួន។លោក បន្ថែមថា ជនសង្ស័យ ឈ្មោះ PENG XIONGFENG ភេទប្រុស អាយុ ៣៣ឆ្នាំ ជនជាតិចិន មុខរបរ មិនពិតប្រាកដ ទីកន្លែងកំណើត ខេត្ដហ៊ូណាន ប្រទេសចិន ទីលំនៅបច្ចុប្បន្ន ក្រុមទី១៥ ភូមិ៣ សង្កាត់លេខ១ ក្រុង/ខេត្ដព្រះសីហនុ។ វត្ថុតាងដកហូតរួមមាន៖ សារធាតុញៀនទម្ងន់សរុប ៥៨.១៤២,៣០ក្រាម (ទម្ងន់សុទ្ធ) ស្មើនឹងជាង ៥៨គីឡូក្រាម ក្នុងនោះ ១-សារធាតុញៀនប្រភេទមេតំហ្វតាមីន(ICE) ២-សារធាតុញៀនប្រភេទមេតំហ្វេតាមីន(WY) ៣-សារធាតុញៀនប្រភេទកេតាមីន(K) ៤-សារធាតុញៀន ប្រភេទអ៊ិចស្ដាស៊ី(MDMA)។ ទូរស័ព្ទដៃចំនួន ០២គ្រឿង ជញ្ជីងថ្លឹងគ្រឿងញៀនចំនួន ០៤គ្រឿង ផ្លាកលេខរថយន្ដចំនួន ០៤ផ្លាក ឧបករណ៍ផលិត កែច្នៃ និងថង់វេចខ្ចប់គ្រឿងញៀនមួយចំនួនធំ កាំភ្លើងខ្លីចំនួន ០១ដើម ម៉ាក BERETTA-MCO 950 B-CAL635 ផលិតនៅប្រទេសប្រេស៊ីល និងគ្រាប់កាំភ្លើ់ងចំនួន ៥០គ្រាប់៕

ប្រេស៊ីលព្រមានពីទឹកជំនន់ និងបំណាក់ដីបន្ថែមទៀត ខណៈភ្លៀងធ្លាក់ថ្មីវាយប្រហារភាគខាងត្បូង

ក្រុមអាជ្ញាធរបានព្រមានថា ភ្លៀងធ្លាក់ថ្មីនៅតំបន់កំពុងរងគ្រោះទឹកជំនន់ភាគខាងត្បូងប្រទេសប្រេស៊ីល ត្រូវគេរំពឹងថានឹងដាក់បន្ទុកដ៏ធ្ងន់បំផុតនៅចន្លោះថ្ងៃអាទិត្យ និងថ្ងៃចន្ទសប្ដាហ៍នេះ ដែលជាការនាំទុក្ខសោកជាថ្មីដល់ជនរងគ្រោះដោយទឹកជំនន់រួចទៅហើយ ដែលបានសម្លាប់មនុស្ស១៣៦ នាក់ មកទល់ពេលនេះ។ ក្រុមអាជ្ញាធររដ្ឋ បានព្រមានកាលពីល្ងាចថ្ងៃសៅរ៍អំពីហានិភ័យនៃការកើនឡើងកម្រិតទឹក និងបំណាក់ដីបន្ថែមទៀត។ អភិបាលក្រុង រីអូ គ្រែនដេ ដូ ស៊ុល ( Rio Grande do Sul) លោកអេក្វាដូ ឡេតេ (Eduardo Leite) បាននិយាយនៅក្នុងវីដេអូមួយនៅលើបណ្ដាញ Instagram ថា យើងនៅតែជួបប្រទះស្ថានភាពអាសន្ននៅឡើយ។ទីភ្នាក់ងារការពារជនស៊ីវិលបាននិយាយថា ភ្លៀងធ្លាក់ខ្លាំងកាលពីសប្តាហ៍មុនបានបណ្តាលឱ្យទន្លេក្នុងរដ្ឋកសិកម្មហៀរប្រៀបច្រាំង បណ្តាលឱ្យមនុស្សចំនួន ៨០៦ នាក់រងរបួស និង ១២៥ នាក់ទៀតបាត់ខ្លួន បន្ថែមពីលើអ្នកស្លាប់។ក្នុងចំណោមប្រជាជនជាងពីរលាននាក់ដែលរងផលប៉ះពាល់ដោយសារទឹកជំនន់ មានជាង ៥៣៧.០០០នាក់ ត្រូវបានបង្ខំឱ្យចាកចេញពីផ្ទះសម្បែងរបស់ពួកគេដោយស្នាក់នៅក្នុងជម្រកបណ្ដោះអាសន្នចំនួន ៨១.០០០ កន្លែង ។ យោងតាមសហព័ន្ធជាតិក្រុងនេះ បានឱ្យដឹងថា លំនៅឋានជាង ៩២.០០០ ខ្នង ត្រូវបានខូចខាត ឬបំផ្លាញដោយទឹកជំនន់៕

បណ្ដាញសង្គម

ព័ត៌មានថ្មីៗ

ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប

លោក Trump ទទូចថាទីតាំងនុយក្លេអ៊ែរអ៊ីរ៉ង់ត្រូវបានបំផ្លាញស្របពេលមានរបាយការណ៍មួយចំនួនថាបានរួចផុតពីការបំផ្លាញ

ពលរដ្ឋជប៉ុនបោះឆ្នោតក្នុងការសាកល្បងដ៏សំខាន់សម្រាប់នាយករដ្ឋមន្ត្រី Shigeru Ishiba

អ្នកស្លាប់ក្នុងជំនន់ទឹកភ្លៀងនៅកូរ៉េខាងត្បូងសប្តាហ៍នេះ កើនឡើងដល់១៤ នាក់

ការប៉ះទង្គិចបានផ្ទុះឡើងក្នុងការតវ៉ាប្រឆាំងនឹងជនអន្តោប្រវេសន៍ក្នុងប្រទេសប៉ូឡូញ

ក្រសួងសុខាភិបាល បើកយុទ្ធនាការផ្តល់ថ្នាំលេបសមូហភាព ដើម្បីបង្ការជំងឺគ្រុនចាញ់ នៅខេត្តស្ទឹងត្រែង

[UPDATE] ការប្រកាសអាសន្នរលកយក្សស៊ូណាមិ ក្រោយការរញ្ជួយដីដ៏ខ្លាំងក្លា៣លើក វាយប្រហារឆ្នេរប៉ាស៊ីហ្វិករបស់រុស្ស៊ី

មេទ័ពជួរមុខប្រចាំទិសប្រាសាទតាក្របី៖ ការលើកទឹកចិត្តរបស់ពលរដ្ឋជាកម្លាំងស្មារតីដ៏រឹងមាំសម្រាប់ពលទាហាន

BREAKING NEWS ការប្រកាសអាសន្នរលកយក្សស៊ូណាមិ ក្រោយការរញ្ជួយដីដ៏ខ្លាំងក្លា បានវាយប្រហារឆ្នេរប៉ាស៊ីហ្វិករបស់រុស្ស៊ី

ពលរដ្ឋអង់គ្លេសប្រមូលផ្ដុំគ្នាទាំងភ្លៀង ក្នុងទីក្រុងឡុងដ៍្រ បង្ហាញការគាំទ្រពលរដ្ឋប៉ាឡេស្ទីន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877