BTV NEWS

ចាប់ខ្លួនជនសង្ស័យ៥នាក់ពាក់ពន្ធ័ករណីចាប់ ឃុំឃាំង និងបង្ខាំងមនុស្សដោយខុសច្បាប់

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

សន្តិសុខ និង សង្គម

តំបន់មជ្ឈិមបូព៌ាប្រឈមការរីកសាយនៃសង្រ្គាម ខណៈអ៊ីស្រាអែល ប្ដេជ្ញាសងសឹកការវាយប្រហារពីអ៊ីរ៉ង់

អ៊ីស្រាអែល និងអ៊ីរ៉ង់បាន គំរាមកំហែងដាក់គ្នាទៅវិញទៅមក បន្ទាប់ពីការវាយប្រហារដោយផ្ទាល់ជាលើកដំបូងរបស់ក្រុងតេអេរ៉ង់ទៅលើសត្រូវរបស់ខ្លួន បានបង្កើនភាពតានតឹងយ៉ាងខ្លាំងនៅមជ្ឈិមបូព៌ា ខណៈសង្រ្គាមនៅតំបន់ហ្កាហ្សាមនៅតែបន្តដោយពុំទាន់មានបទឈប់បាញ់នៅឡើយ។ប្រមុខកងទ័ពអ៊ីស្រាអែល កាលពីថ្ងៃចន្ទ បានប្តេជ្ញាឆ្លើយតបវិញ បន្ទាប់ពីអ៊ីរ៉ង់ និងសម្ព័ន្ធមិត្តរបស់ខ្លួន បានបាញ់ស្រោចមីស៊ីល និងយានដ្រូន រួមទាំង រ៉ូកែតជាង ៣០០ ទៅកាន់ប្រទេសអ៊ីស្រាអែល កាលពីចុងសប្តាហ៍មុន ស្របពេលអ៊ីរ៉ង់និយាយថាជាការសឹងសឹកទៅនឹងការវាយប្រហារលើស្ថានកុងស៊ុលរបស់ខ្លួននៅប្រទេសស៊ីរី សម្លាប់មនុស្ស៧នាក់ រួមទាំងឧត្ដមសេនីយ៍អ៊ីរ៉ង់២នាក់ផងដែរ។ ទោះជាយ៉ាងណាក៏ដោយ ប្រធានាធិបតីអ៊ីរ៉ង់ លោក អ៊ីប្រាហ៊ីម រ៉េស៊ី (Ebrahim Raisi) ក៏បានព្រមានផងដែរថា ទោះបីជាសកម្មភាពនោះមានទំហំតិចតួចបំផុត ឲ្យតែជាការប្រឆាំងនឹងផលប្រយោជន៍របស់អ៊ីរ៉ង់ អ្នកនឹងត្រូវទទួលបានការឆ្លើយតបយ៉ាងធ្ងន់ធ្ងរ ធំធេង និងឈឺចាប់ ។ ក្រុមមេដឹកនាំពិភពលោក បានជំរុញឱ្យមានការអត់ធ្មត់ ចាប់តាំងពីការវាយប្រហាររបស់អ៊ីរ៉ង់លើ អ៊ីស្រាអែល ដែលបានបង្កឱ្យមានភាពច្របូកច្របល់នៃវិបត្តិការទូត និងបានធ្វើឱ្យតម្លៃប្រេងឡើងខ្ពស់ ខណៈទីផ្សារភាគហ៊ុនដាំក្បាលចុះ។អ៊ីស្រាអែលកំពុងថ្លឹងថ្លែងជម្រើសរបស់ខ្លួន បន្ទាប់ពីការវាយប្រហារដោយយានដ្រូន និងមីស៊ីលរបស់អ៊ីរ៉ង់ បណ្តាលឱ្យមានការខូចខាតតិចតួច ខណៈប្រព័ន្ធការពារដែនអាកាសរបស់អ៊ីស្រាអែលបានស្ទាក់ចាប់គ្រាប់មីស៊ីលភាគច្រើន ដោយមានជំនួយពីកងកម្លាំងសហរដ្ឋអាមេរិក អង់គ្លេស និងបារាំង និងសម្ព័ន្ធមិត្តក្នុងតំបន់។ក្រុមប្រដាប់អាវុធគាំទ្រដោយអ៊ីរ៉ង់នៅទូទាំងតំបន់មជ្ឈិមបូព៌ាបានបើកការវាយប្រហារជាបន្តបន្ទាប់អំឡុងសង្គ្រាមរយៈពេល៦ខែមកនេះ។ក្រុមឧទ្ទាមហេសបូឡា (Hezbollah) របស់ប្រទេសលីបង់ បានបើកការបាញ់ប្រហារឆ្លងព្រំដែនដ៏ខ្លាំងក្លាជាមួយអ៊ីស្រាអែល ក្រុមឧទ្ទាមហ៊ួទី គាំទ្រដោយអ៊ីរ៉ង់នៅប្រទេសយេម៉ែន បានដាក់គោលដៅលើការដឹកជញ្ជូនទំនិញនៅសមុទ្រក្រហម ហើយក្រុមប្រដាប់អាវុធនៅក្នុងប្រទេសអ៊ីរ៉ាក់ និងស៊ីរីបានបាញ់ផ្លោងទៅលើមូលដ្ឋានទ័ពអាមេរិក៕

គណៈកម្មាធិការ UN មិនអាចយល់ព្រមលើសំណើសមាជិកភាពពេញសិទ្ធិរបស់ប៉ាឡេស្ទីនបានទេ

គណៈកម្មាធិការក្រុមប្រឹក្សាសន្តិសុខអង្គការសហប្រជាជាតិ ដែលកំពុងពិចារណាលើពាក្យស្នើសុំរបស់អាជ្ញាធរប៉ាឡេស្ទីន ដើម្បីក្លាយជាសមាជិកពេញសិទ្ធិរបស់អង្គការសហប្រជាជាតិ «មិនអាចធ្វើអនុសាសន៍ជាឯកច្ឆ័ន្ទបានទេ» ទៅលើថា តើប៉ាឡេស្ទីនបំពេញតាមលក្ខណៈវិនិច្ឆ័យ ឬយ៉ាងណា នេះបើយោងតាមរបាយការណ៍របស់គណៈកម្មាធិការដែលមើលឃើញដោយសារព័ត៌មានរ៉យទ័រ កាលពីថ្ងៃអង្គារ (១៦ មេសា)។ក្រុមអ្នកការទូតបាននិយាយថា អាជ្ញាធរប៉ាឡេស្ទីននៅតែត្រូវបានគេរំពឹងថានឹងជំរុញក្រុមប្រឹក្សាសន្តិសុខដែលមានសមាជិក ១៥ រូបឱ្យបោះឆ្នោតឆាប់បំផុតនៅសប្តាហ៍នេះ លើពង្រាងសេចក្តីសម្រេចដែលបានផ្តល់អនុសាសន៍ឱ្យខ្លួនក្លាយជាសមាជិកពេញលេញ។សមាជិកភាពពេញសិទ្ធិបែបនេះ នឹងធ្វើឱ្យមានការទទួលស្គាល់រដ្ឋប៉ាឡេស្ទីនប្រកបដោយប្រសិទ្ធភាព។ ប៉ាឡេស្ទីនបច្ចុប្បន្នជារដ្ឋអ្នកសង្កេតការណ៍មិនមែនជាសមាជិក ដែលជាការទទួលស្គាល់ជាក់ស្ដែងនៃឋានៈរដ្ឋ ដែលត្រូវបានផ្តល់ដោយមហាសន្និបាតអង្គការសហប្រជាជាតិសមាជិក ១៩៣ ប្រទេសក្នុងឆ្នាំ២០១២។ប៉ុន្តែពាក្យស្នើសុំចូលជាសមាជិកពេញសិទ្ធិរបស់អង្គការសហប្រជាជាតិ ត្រូវតែអនុម័តដោយក្រុមប្រឹក្សាសន្តិសុខ ដែលសម្ព័ន្ធមិត្តរបស់អ៊ីស្រាអែលគឺសហរដ្ឋអាមេរិកអាចរារាំងបាន ហើយបន្ទាប់មកត្រូវមានការគាំទ្រយ៉ាងតិចពីរភាគបីនៃមហាសន្និបាត។ សហរដ្ឋអាមេរិកបាននិយាយកាលពីដើមខែនេះថា ការបង្កើតរដ្ឋប៉ាឡេស្ទីនឯករាជ្យមួយគួរតែកើតឡើងតាមរយៈការចរចាដោយផ្ទាល់រវាងភាគីនានា និងមិនមែននៅអង្គការសហប្រជាជាតិនោះទេ៕

ការិយាល័យសិទ្ធិមនុស្ស UN៖ អ៊ីស្រាអែល នៅតែរឹតបន្តឹងដោយខុសច្បាប់លើជំនួយហ្កាហ្សា

ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយកាលពីថ្ងៃអង្គារ (១៦ មេសា) ថា អ៊ីស្រាអែលនៅតែដាក់កំហិត «ដោយខុសច្បាប់» លើការផ្តល់ជំនួយមនុស្សធម៌សម្រាប់តំបន់ហ្កាហ្សា បើទោះបីជាមានការអះអាងពីអ៊ីស្រាអែល និងប្រទេសដទៃទៀតថា ឧបសគ្គរារាំងជំនួយបានធូរស្រាលច្រើនក៏ដោយ។ការវាយលុករបស់អ៊ីស្រាអែល នៅតំបន់ហ្កាហ្សាស្ទ្រីប ដែលបង្កឡើងដោយការវាយប្រហារឆ្លងព្រំដែនដ៏បង្ហូរឈាមរបស់ក្រុមហាម៉ាស កាលពីថ្ងៃទី០៧ ខែតុលា បានប្រែក្លាយតំបន់ហ្កាហ្សាភាគច្រើនទៅជាវាលរហោស្ថាន ដោយមនុស្សរាប់សែននាក់ឥឡូវនេះបានភៀសខ្លួន និងប្រមូលផ្ដុំគ្នាកកកុញទៅកាន់ទីជម្រកផ្សេងៗដែលពោរពេញដោយជំងឺ។លោកស្រី រ៉ាវីណា សាមដាសានី (Ravina Shamdasani) អ្នកនាំពាក្យការិយាល័យសិទ្ធិមនុស្សនៃអង្គការសហប្រជាជាតិ បាននិយាយនៅក្នុងសន្និសីទសារព័ត៌មាននៅទីក្រុងហ្សឺណែវថា «អ៊ីស្រាអែល បន្តរឹតបន្តឹងដោយខុសច្បាប់លើការចូល និងការចែកចាយជំនួយមនុស្សធម៌ និងដើម្បីអនុវត្តការបំផ្លិចបំផ្លាញយ៉ាងទូលំទូលាយនៃហេដ្ឋារចនាសម្ព័ន្ធស៊ីវិល»។បរិមាណជំនួយដែលចូលទៅក្នុងតំបន់ហ្កាហ្សាបច្ចុប្បន្ននេះកំពុងមានជម្លោះ ដោយអ៊ីស្រាអែល និងទីក្រុងវ៉ាស៊ីនតោន បាននិយាយថាលំហូរជំនួយបានកើនឡើងខ្លាំងក្នុងរយៈពេលប៉ុន្មានថ្ងៃថ្មីៗនេះ ប៉ុន្តែទីភ្នាក់ងារអង្គការសហប្រជាជាតិនិយាយថា ជំនួយនៅតែទាបជាងកម្រិតអប្បបរមាដែលត្រូវការ៕

ក្រុមឧទ្ទាមមីយ៉ាន់ បានវាយបកទៅលើកងទ័ពរដ្ឋាភិបាលយោធា ដើម្បីដណ្តើមយកទីប្រជុំជនព្រំដែនមកវិញ

ក្រុមតស៊ូប្រឆាំងនឹងការគ្រប់គ្រងយោធារបស់មីយ៉ាន់ម៉ា បាននិយាយកាលពីថ្ងៃអាទិត្យថា ក្រុមយុទ្ធជនរបស់ខ្លួន បានវាយបកទៅលើការប៉ុនប៉ងរបស់កងទ័ពរបបយោធា ដើម្បីរុលចូលទៅកាន់ទីប្រជុំជន Myawaddy ដ៏សំខាន់នៅតាមបណ្តោយព្រំដែនថៃដែលត្រូវបានកាន់កាប់ដោយក្រុមឧទ្ទាមកាលពីសប្តាហ៍មុន។អ្នកនាំពាក្យរបស់សម្ព័ន្ធជាតិការ៉ែន(KNU) លោក Saw Taw Nee បាននិយាយនៅក្នុងបទសម្ភាសន៍មួយថា ការពង្រឹងកងកម្លាំងយោធា បានព្យាយាមវាយលុកលើទីប្រជុំជន Myawaddy អស់ជាច្រើនថ្ងៃ ប៉ុន្តែត្រូវបានវាយបកមកវិញ នៅក្នុងការប្រយុទ្ធគ្នា ដែលមានចម្ងាយប្រហែល ៤០គីឡូម៉ែត្រ។លោកបានប្រាប់សារព័ត៌មានរ៉យទ័រថា៖«វាមិនងាយស្រួលទេក្នុងការមកទីនេះ។ ពួកគេប្រឈមមុខនឹងការលំបាកជាច្រើន» ដោយនិយាយថា កងកម្លាំងរបស់ KNU បាននឹងកំពុង «រារាំង និងស្ទាក់ចាប់»កងទ័ពរបស់របបយោធា។ព័ត៌មានរបស់ KNU មិនអាចបញ្ជាក់ដោយឯករាជ្យបានទេ។ អ្នកនាំពាក្យរបបយោធាដែលបានដណ្តើមអំណាចពីរដ្ឋាភិបាលជាប់ឆ្នោតនៅឆ្នាំ ២០២១ មិនបានឆ្លើយតបនឹងទូរស័ព្ទពីសារព័ត៌មានរ៉យទ័រទេ។ទីប្រជុំជនព្រំដែន Myawaddy ជាប់នឹងប្រទេសថៃ ត្រូវបានវាយដណ្តើមពីការគ្រប់គ្រងដោយយោធា ដោយកងកម្លាំងប្រឆាំងរដ្ឋាភិបាលចម្រុះ ដែលដឹកនាំដោយ KNU កាលពីថ្ងៃព្រហស្បតិ៍។

អ៊ីស្រាអែល វាយប្រហារទីតាំងហេសបូឡា នៅលីបង់ភាគខាងកើត

កងទ័ពអ៊ីស្រាអែល និងប្រភពពីក្រុមគាំទ្រដោយអ៊ីរ៉ង់បាននិយាយថា អ៊ីស្រាអែលកាលពីថ្ងៃអាទិត្យ បានវាយប្រហារទីតាំងរបស់ក្រុមហេសបូឡានៅភាគខាងកើតនៃប្រទេសលីបង់ក្បែរព្រំដែនស៊ីរី ខណៈដែលភាពតានតឹង បានកើនឡើង បន្ទាប់ពីអ៊ីរ៉ង់បានវាយប្រហារអ៊ីស្រាអែលដោយផ្ទាល់។ប្រភពពីក្រុមហេសបូឡា បានប្រាប់សារព័ត៌មាន AFP ថា៖«ការវាយប្រហាររបស់អ៊ីស្រាអែល បានកំណត់គោលដៅលើតំបន់មួយ...នៅជិតទីក្រុង Baalbek និងបានកំណត់គោលដៅអគារពីរជាន់ ដែលជាកម្មសិទ្ធិរបស់ក្រុមហេសបូឡា ដោយបន្ថែមថា មិនមានអ្នកស្លាប់ និងរបួសទេ។ទីភ្នាក់ងារសារព័ត៌មានរដ្ឋរបស់ប្រទេសលីបង់ បានរាយការណ៍ថា` ការវាយប្រហារតាមអាកាសរបស់សត្រូវ បានតម្រង់ទៅលើអគារមួយ«នៅក្នុងភូមិ Nabi Sheet ហើយ«បានបំផ្លាញវាទាំងស្រុង»។អ្នកថតរូបសារព័ត៌មាន AFPម្នាក់នៅកន្លែងនោះ បានឃើញបំណែកបេតុង និងដែកនៃអគារដែលបានរងការវាយប្រហារនោះ។កងទ័ពអ៊ីស្រាអែល បាននិយាយនៅក្នុងសេចក្តីថ្លែងការណ៍មួយថា ជាការឆ្លើយតបទៅនឹងការវាយប្រហារ នៅពេលយប់នោះ «យន្តហោះចម្បាំង បានវាយប្រហារទីតាំងផលិតអាវុធដ៏សំខាន់មួយរបស់ក្រុមហេសបូឡា នៅក្នុងតំបន់ Nabi Sheet ដែលចូលយ៉ាងជ្រៅក្នុងប្រទេសលីបង់»។

អ៊ីស្រាអែល ជំរុញឲ្យអង់គ្លេស ចាត់ទុកកងឆ្មាំបដិវត្តន៍ឥស្លាមជាក្រុមភេរវកម្ម

អ៊ីស្រាអែល បានជំរុញសម្ព័ន្ធមិត្តរួមទាំងអង់គ្លេសឲ្យចាត់ទុកកងឆ្មាំបដិវត្តន៍ឥស្លាមអ៊ីរ៉ង់ (IRGC) ជាក្រុមភេរវកម្ម បន្ទាប់ពីការវាយប្រហារដោយយានដ្រូន និងមីស៊ីលមកលើប្រទេសនេះ។កាលពីថ្ងៃអាទិត្យ លោក Lior Haiat អ្នកនាំពាក្យក្រសួងការបរទេសអ៊ីស្រាអែល បានអំពាវនាវឲ្យមានការហាមឃាត់ភេរវកម្មលើ IRGC ជា«ផលវិបាកដំបូង» សម្រាប់ការឈ្លានពាន«ទ្រង់ទ្រាយធំ និងមិនធ្លាប់មានពីមុនមក» របស់ខ្លួនប្រឆាំងនឹងអ៊ីស្រាអែល។ការអំពាវនាវនេះ នឹងបង្កើនសម្ពាធលើរដ្ឋាភិបាលជាមួយសមាជិកសភា និងការងារ កំណត់ដើម្បីបញ្ជាក់ឡើងវិញនូវការទាមទាររបស់ពួកគេសម្រាប់ការហាមឃាត់នៅថ្ងៃចន្ទនេះ នៅពេលដែលលោករីស៊ី ស៊ុណាក់ (Rishi Sunak)ត្រូវបានគេរំពឹងថា នឹងផ្តល់សេចក្តីថ្លែងការណ៍ស្តីពីការវាយប្រហាររបស់អ៊ីរ៉ង់ទៅកាន់សភា។ទន្ទឹមនឹងនោះ លោកដេវីត កាមេរុន ( Lord Cameron) រដ្ឋមន្ត្រីការបរទេស បានកោះហៅភារៈធារីរបស់ អ៊ីរ៉ង់កាលពីថ្ងៃអាទិត្យ។ នៅក្នុងសេចក្តីថ្លែងការណ៍មួយ អ្នកនាំពាក្យម្នាក់ បានរំលឹកឡើងវិញថា ចក្រភពអង់គ្លេស បានថ្កោលទោសចំពោះសកម្មភាពរបស់អ៊ីរ៉ង់ ហើយបាននិយាយថា ចក្រភពអង់គ្លេស «នឹងបន្តការគាំទ្រដល់សន្តិសុខរបស់អ៊ីស្រាអែល»។

ក្រុមឧទ្ទាមហ៊ួទីនៅប្រទេសយេម៉ែន គាំទ្រចំពោះការវាយប្រហាររបស់អ៊ីរ៉ង់លើអ៊ីស្រាអែល

ក្រុមហ៊ួទីដែលមានសម្ព័ន្ធមិត្តជាមួយអ៊ីរ៉ង់នៅប្រទេសយេម៉ែន បានពណ៌នាការវាយប្រហារតាមអាកាសដ៏ធំរបស់ទីក្រុងតេអេរ៉ង់ទៅលើអ៊ីស្រាអែលថា ជាការឆ្លើយតប «ស្របច្បាប់» ចំពោះការវាយប្រហាររបស់អ៊ីស្រាអែលទៅលើស្ថានកុងស៊ុលអ៊ីរ៉ង់នៅក្នុងរដ្ឋធានីដាម៉ាស ប្រទេសស៊ីរី កាលពីដើមខែនេះ។អ្នកនាំពាក្យរបស់កងជីវពល Mohammed Abdel-Salam បាននិយាយនៅក្នុងការបង្ហោះនៅលើប្រព័ន្ធផ្សព្វផ្សាយសង្គម X ដោយសំដៅទៅលើអ៊ីស្រាអែល ដែលជាសត្រូវរបស់អ៊ីរ៉ង់ថា [អ៊ីរ៉ង់] នឹងមិនអាចគេចផុតពីឧក្រិដ្ឋកម្មរបស់ខ្លួនដោយគ្មានទោសទណ្ឌឡើយ។ក្រុមសកម្មប្រយុទ្ធហ៊ួទី បាននិងកំពុងវាយប្រហារនាវានៅសមុទ្រក្រហម ក្នុងអ្វីដែលពួកគេនិយាយថា ជាការសងសឹកចំពោះការវាយលុកដ៏បំផ្លិចបំផ្លាញរបស់អ៊ីស្រាអែល នៅតំបន់ហ្កាហ្សាស្ទ្រីប។ដោយសារតែការវាយប្រហាររបស់ក្រុមហ៊ួទីដែលកំពុងបន្ត ក្រុមហ៊ុនដឹកជញ្ជូនធំៗ កំពុងគេចវេស ពីផ្លូវសមុទ្រខ្លីបំផុតរវាងអាស៊ី និងអឺរ៉ុប ហើយធ្វើដំណើរតាមផ្លូវវែងជាងនេះ គឺតាមឆ្នេរ Cape of Good Hope របស់អាហ្វ្រិកខាងត្បូង ជំនួសវិញ។ក្រុមហ៊ួទី បាននិយាយថា ពួកគេចង់បង្ខំឲ្យបញ្ចប់ការវាយប្រហាររបស់អ៊ីស្រាអែលទៅលើតំបន់ហ្កាហ្សាស្ទ្រីប ដែលបន្ទាប់ពីការវាយប្រហារដោយអង្គការឥស្លាមប៉ាឡេស្ទីនហាម៉ាស ក្នុងប្រទេសអ៊ីស្រាអែល កាលពីខែតុលាឆ្នាំមុន។

ក្រុមអាជ្ញាធរប្រេស៊ីល បើកការស៊ើបអង្កេតចំពោះករណីទូកមានសាកសាពស្អុយរលួយ

ការិយាល័យរដ្ឋអាជ្ញាសហព័ន្ធប្រេស៊ីល និងនគរបាលសហព័ន្ធរដ្ឋ Para បាននិយាយនៅក្នុងសេចក្តីថ្លែងការណ៍ថា ពួកគេនឹងបើកការស៊ើបអង្កេត បន្ទាប់ពីមានសេចក្តីរាយការណ៍ថា ទូកមួយគ្រឿងត្រូវបានគេប្រទះឃើញមានសាកសពមនុស្សស្អុយរលួយរាប់សិបនាក់ នៅជិតតំបន់ឆ្នេររដ្ឋភាគខាងជើងប្រទេសប្រេស៊ីលមួយនេះ ។ នគរបាលសហព័ន្ធនិយាយថា ក្រុមអ្នកជំនាញ និងក្រុមកោសល្យវិច្ច័យ ត្រូវបានបញ្ជូនទៅកាន់តំបន់នោះ ។ ទោះបីជាយ៉ាងណាក៏ដោយ ចំនួនសាកសព សញ្ជាតិ និងមូលហេតុនៃការស្លាប់របស់ជនរងគ្រោះ ពុំត្រូវបានដឹងភ្លាមៗនោះទេ ។ ទូកមួយគ្រឿងនេះ ត្រូវបានប្រទះឃើញដោយក្រុមប្រជានេសាទ នៅតំបន់ Barra do Quatipuru ជិតឆ្នេរ Ajuruteua ស្ថិតក្នុងទីក្រុង Braganca ។ ក្រុមនគរបាលសហព័ន្ធ ក្រុមភ្នាក់ងារពន្លត់អគ្គិភ័យ និងកងទ័ពជើងទឹកប្រេស៊ីល បានល្បាតទូកនៅតំបន់ឆ្នេរទីក្រុង Braganca ។ ដោយឡែក ការិយាល័យរដ្ឋអាជ្ញាសហព័ន្ធប្រេស៊ីល បាននិយាយថា សារព័ត៌មានក្នុងស្រុក Para អះអាងថា អាចនឹងមានសាកសពមនុស្ស ២០នាក់នៅលើទូក ហើយពួកគេគឺជាជនជាតិហៃទី ៕

មនុស្សយ៉ាងហោច ៨នាក់ រងការបាញ់ប្រហារនៅទីក្រុង Chicago សហរដ្ឋអាមេរិក

មនុស្សយ៉ាងហោច ៨នាក់ រងការបាញ់ប្រហារនៅសង្កាត់ Back of the Yards ទីក្រុង Chicago សហរដ្ឋអាមេរិក កាលពីថ្ងៃសៅរ៍ ក្នុងនោះក្មេងស្រីម្នាក់ បានបាត់បង់អាយុជីវិត ។ ក្រុមនគរបាល និយាយថា ជនរងគ្រោះ រួមមានទាំងមនុស្សពេញវ័យ ៥នាក់ ដែលមានអាយុចន្លោះពី ១៩ឆ្នាំ ដល់ ៤០ឆ្នាំ ហើយនៅក្នុងចំណោមអ្នករងរបួស មានក្មេងប្រុសអាយុ ១ ឆ្នាំនិងក្មេងប្រុសអាយុ ៧ឆ្នាំ ផងដែរ ខណៈដែលក្មេងស្រីវ័យ ៧ឆ្នាំម្នាក់ បានបាត់បង់ជីវិតដោយសារតែរបួសធ្ងន់ធ្ងរនៅលើក្បាលរបស់នាង។ លោក Don Jerome គឺជាអ្នកស៊ើបអង្កេតនគរបាលក្រុង Chicago និយាយថា ករណីបាញ់ប្រហារនេះ បានកើតមាននៅលើផ្លូវលេខ ៥២ ស្ថិតតាមរុក្ខវិថី South Damen ។ ក្រុមនគរបាលបញ្ជាក់ថា ករណីបាញ់ប្រហារខាងលើ ទំនងជាផ្តើមចេញពីអំពើហិង្សាក្រុមជនអន្ធពាល និងជាករណីដ៏កម្រកើតឡើងមួយ ។ ដោយឡែក រឿងរ៉ាវលម្អិតបន្ថែមទៀតពាក់ព័ន្ធនឹងឧបទ្ទេវហេតុនេះ និងជនរងគ្រោះ ពុំត្រូវបានគេដឹងភ្លាមៗនោះទេ ៕

ជនប៉ាឡេស្ទីនជម្លៀសខ្លួននៅហ្កាហ្សាស្រ្ទីប ព្យាយាមវិលត្រឡប់ទៅកាន់តំបន់ភាគខាងជើងវិញ

កាលពីថ្ងៃអាទិត្យម្សិលមិញ ជនប៉ាឡេស្ទីនជម្លៀសខ្លួន បានព្យាយាមវិលត្រឡប់ទៅកាន់ផ្ទះសម្បែងរបស់ពួកគេវិញនៅតំបន់ភាគខាងជើងហ្កាហ្សាស្រ្ទីប រយៈពេល ៦ខែក្រោយការវាយប្រហាររបស់អ៊ីស្រាអែល ។ ហ្វូងមនុស្សយ៉ាងច្រើន ត្រូវបានគេមើលឃើញធ្វើដំណើរដោយថ្មើរជើងនៅតាមតំបន់ឆ្នេរ Wadi Gaza ដែលបែងចែករវាងតំបន់ភាគខាងត្បូង និងភាគខាងជើងហ្កាហ្សា ដោយសង្ឃឹមថានឹងត្រូវបានគេអនុញ្ញាតឲ្យវិលត្រឡប់ទៅកាន់ផ្ទះសម្បែងរបស់ពួកគេវិញ ។ ពលរដ្ឋមួយចំនួន ឃើញមានកាន់ទ្រព្យសម្បត្តិរបស់ខ្លួន និងប្រើរទេះសេះ ដើម្បីធ្វើដំណើរវិលត្រឡប់ទៅកាន់តំបន់ភាគខាងជើង ។ អ្នកស្រី Fatma al-Najjar គឺជាជនប៉ាឡេស្ទីនជម្លៀសខ្លួនមួយរូប និយាយថា ពួកយើងចង់វិលត្រឡប់ទៅកាន់តំបន់ភាគខាងជើងវិញ ដើម្បីមើលផ្ទះរបស់ពួកយើង ជួបកូនៗ និងសាច់ញាតិរបស់ពួកយើង ។ ទោះបីជាយ៉ាងណាក៏ដោយ នៅពុំទាន់មានការបង្គាប់ច្បាស់លាស់នោះឡើយពីយោធាអ៊ីស្រាអែល ពាក់ព័ន្ធនឹងលទ្ធភាពនៃការវិលត្រឡប់ទៅកាន់តំបន់ភាគខាងជើងហ្កាហ្សាវិញរបស់ជនប៉ាឡេស្ទីនជម្លៀសខ្លួនទាំងអស់នេះ ៕

បណ្ដាញសង្គម

ព័ត៌មានថ្មីៗ

មនុស្សបីនាក់ បានរងរបួស ក្នុងការបាញ់ប្រហារនៅទីលាន Times Square ក្នុងទីក្រុងញូវយ៉ក

គណៈកម្មាធិការថ្នាក់រដ្ឋមន្ត្រីអារ៉ាប់ ឲ្យអ៊ីស្រាអែលទទួលខុសត្រូវទាំងស្រុង ចំពោះអំពើប្រល័យពូជសាសន៍ដែលកំពុងបន្តនៅហ្កាហ្សា

យោធាកូរ៉េខាងត្បូង និយាយថា កូរ៉េខាងជើងកំពុងដកឧបករណ៍បំពងសំឡេងចេញពីព្រំដែនដ៏តានតឹងរបស់ពួកគេ

ទូរទស្សន៍រដ្ឋនិយាយថា ប្រទេសស៊ីរី នឹងមិនចូលរួមក្នុងកិច្ចប្រជុំ ជាមួយកងកម្លាំង SDF ដឹកនាំដោយឃើដ នៅទីក្រុងប៉ារីសទេ

កម្ពុជាអំពាវនាវដល់ថៃ សូមដោះលែងឱ្យបានឆាប់នូវកងទ័ពកម្ពុជា ដែលថៃចាប់ខ្លួនយកទៅ មានរយៈពេល ១១ ថ្ងៃហើយ

ប្រមុខកងទ័ពអាកាស៖ ឥណ្ឌាបានបាញ់ទម្លាក់យន្តហោះចម្បាំងប៉ាគីស្ថានចំនួន ៥គ្រឿង និងយន្តហោះយោធា ១គ្រឿង កាលពីខែឧសភា

ក្រុមអ្នកស្ម័គ្រចិត្ត៖ ជនស៊ីវិលយ៉ាងតិច ១៦នាក់ ស្លាប់ និង ៨នាក់ រងរបួស ក្នុងការវាយប្រហារដោយកងកម្លាំងយោធាប៉ារ៉ា នៅស៊ូដង់

ទាហានឥណ្ឌា ២នាក់ និងជនសកម្មប្រយុទ្ធម្នាក់ ត្រូវបានសម្លាប់ នៅក្នុងការប្រយុទ្ធគ្នាដោយកាំភ្លើង នៅកាស្មៀរ

អគារថ្មីក្នុងមន្ទីរពេទ្យបង្អែកស្រុកស្ទោង សម្ពោធដាក់ឱ្យប្រើប្រាស់សម្រាប់ផ្តល់សេវាជូនប្រជាពលរដ្ឋ

រដ្ឋមន្ត្រីក្រសួងកសិកម្មដឹកនាំកិច្ចប្រជុំដោះស្រាយបញ្ហាតម្លៃស្រូវស្រង៉ែ នៅខេត្តបាត់ដំបង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877