នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជា-ឡាវ-វៀតណាម ដាក់ចេញកញ្ចប់ទស្សនកិច្ចរួម «ប្រទេសបី គោលដៅមួយ» ដើម្បីជំរុញ​ការ​ធ្វើ​ដំណើរក្នុងតំបន់
អាជ្ញាធរជាតិអប្សរា កំពុង​បន្តជួសជុលពង្រឹងរចនាសម្ព័ន្ធស្រះទឹកខាងជើង របស់​ប្រាសាទអង្គរវត្ត ​
ក្រុមហ៊ុនអាកាសចរណ៍មួយពីឌូបៃ ចាប់អារម្មណ៍ផ្សព្វផ្សាយទេសចរណ៍កម្ពុជា និងពិចារណាភ្ជាប់​ជើងហោះហើរ​មកកម្ពុជា
ភ្ញៀវជាតិ អន្តរជាតិ ធ្វើលំហាត់យោគៈអបអរសាទរទិវាយោគៈអន្តរជាតិ លើកទី១២

វប្បធម៌ និងទេសចរណ៍

អ្នកជំនាញ៖ ជើងហោះត្រង់ពីប្រទេសឆ្ងាយៗមកកម្ពុជានឹងកើនខ្លាំង ក្រោយព្រលានយន្តហោះថ្មី​សង់រួច

2024/03/13 12:29:07 pm        475
Facebook Telegram Linkin
រាជរដ្ឋាភិបាលកម្ពុជាក្រោមការដឹកនាំដោយសម្ដេចមហាបវរធិបតី ហ៊ុន ម៉ាណែត បាន​ចុះ​ហត្ថលេខា​ព្រមព្រៀងគ្នាជាមួយបណ្តាប្រទេសជាច្រើនលើការតភា្ជប់ជើងហោះហើរត្រង់មកកម្ពុជា ខណៈកម្ពុជា កំពុងស្ថាបនា​អាកាសយានដ្ឋាន​អន្តរជាតិ​តេជោ​នឹង​គ្រោង​ដាក់​ឱ្យប្រើប្រាស់​នៅ​ឆ្នាំក្រោយ​នេះ។ ស្របពេលនេះអ្នកជំនាញក្នុងវិស័យទេសចរណមើលឃើញថា កម្ពុជា​នឹង​មាន​អ្នក​ដំណើរ និងទេសចរ​អន្តរជាតិ​កើន​ឡើង​ខ្លាំង​ក្រោយ​កម្ពុជា​មាន​ភាព​សំបូរ​បែប​ការ​ទទួល​ជើង​ហោះហើរ​អន្តរជាតិធំៗ។លោកបណ្ឌិត ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីភិច ប្រចាំនៅកម្ពុជា ថ្លែង​ប្រាប់ BTVនៅថ្ងៃទី១៣ ខែមីនានេះថា តាមរយៈហេដ្ឋារចនាសម្ព័ន្ធសំបូរបែប នៃព្រលាន​យន្ត​ហោះខ្នាត​ធំ​ជាច្រើន​កន្លែង​របស់​កម្ពុជា​នឹង​អាច​ទទួលជើង​យន្តហោះគ្រប់​ខ្នាត​ទាំងអស់​របស់​ពិភព​លោក ​មកចុះចតនៅកម្ពុជាបាន។ កត្តានេះ គឺជាកិច្ចការដ៏ល្អបំផុត សម្រាប់អ្នកដំណើរអន្តរជាតិ និង​ទេសចរអន្តរជាតិ អាចធ្វើដំណើរហោះត្រង់មកកម្ពុជា ហើយអ្វីដែលកម្ពុជា ត្រូវសហការ​ធ្វើ​បន្ត​នោះ​គឺ​ការទាក់ទាញអ្នកដំណើរ ទេសចរអន្តរជាតិមកកម្ពុជាឱ្យបានកាន់តែច្រើន។ អ្នកជំនាញរូបនេះបន្តថា ដើម្បីជំរុញទាក់ទាញអ្នកដំណើរទេសចរអន្តរជាតិមកកម្ពុជាកាន់តែច្រើន ស្ថាប័ន​ពាក់ព័ន្ធនានា គួរគាប្បី​សហការគ្នា​លើ​ការ​ផ្សព្វផ្សាយ​អំពី​ទីផ្សារ​គោលដៅ​ទេសចរណ៍​កម្ពុជា។ ការកែទម្រង់ផលិតផលទេសចរណ៍ និងការផ្លាស់ប្តូរ​ផ្នត់​គំនិត​ប្រជាជន​លើ​ការ​ទទួល​ស្វាគមន៍​ទេសចរឲ្យបានល្អ។ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ថ្លែងថា នៅពេល​ព្រលាន​យន្តហោះអន្តរជាតិតេជោថ្មីបើកដំណើរការ គឺកម្ពុជា​នឹង​មាន​លទ្ធភាព​គ្រប់​គ្រាន់​ទទួល​ជើង​យន្ត​ហោះគ្រប់ខ្នាតទាំងអស់របស់ពិភពលោក ហោះត្រង់មកកម្ពុជាបាន ហើយ​បច្ចុប្បន្ន​ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ កំពុងខិតខំសហការជាមួយស្ថាប័នរដ្ឋ ឯកជន និង​បាន​ជួបជាមួយបណ្តាអង្គទូត ថ្នាក់ដឹកនាំស្ថានប័នជំនាញប្រទេសដៃគូ ជំរុញបង្កើន​កិច្ច​សហ​ប្រតិបត្តិតភា្ជប់ជើងហោះត្រង់ ដែលមានភាពចំណិញពេលវេលា និងថវិកា​នៃ​អ្នក​ធ្វើ​ដំណើរ​ទេសចរណ៍​៕ អត្ថបទ៖ ស៊ុម សុខជា 

មន្ត្រីវប្បធម៌ កំពុងចុះបញ្ជីសារពើភ័ណ្ឌ ថែរក្សា អភិរក្សសមុច្ច័យបុរាណវិទ្យា ក្នុងខេត្តបន្ទាយមានជ័យ

2024/03/13 11:22:01 am        169
Facebook Telegram Linkin
លោក ទេព សុខា ប្រធានការិយាល័យវិភាគ និងពិសោធន៍ នៃនាយកដ្ឋានបុរាណវិទ្យា និង​បុរេ​ប្រវតិ្ត​វិទ្យា នៃក្រសួងវប្បធម៌ និងវិចិត្រសិល្បៈ ថ្លែងប្រាប់BTV ព័ត៌មាន នាថ្ងៃទី១៣ ខែមីនា ឆ្នាំ​២០២៤​នេះ​ថា មន្រី្តជំនាញលើវិស័យវប្បធម៌ កំពុងចុះបញ្ជីសារពើភ័ណ្ឌ ថែរក្សា អភិរក្សសមុច្ច័យ​បុរាណ​វិទ្យា នៅក្នុងសារមនី្ទរចំនួន២គឺសារមនី្ទរបន្ទាយមានជ័យ និងសារមនី្ទរស្វាយចេក ក្នុង​ខេត្តបន្ទាយមានជ័យ ដើម្បីឲ្យមនុស្សជំនាន់ក្រោយចូលរួមថែរក្សា ការពារ និងអភិរក្ស​សម្បតិ្ត​បេតិកភណ្ឌ​ជាតិ។លោក ទេព សុខា បានលើកឡើងទៀតថា បច្ចុប្បន្នសារមនី្ទរបន្ទាយមានជ័យ និង​សារ​មនី្ទរ​ស្វាយ​ចេក ស្ថិតក្នុងខេត្តបន្ទាយមានជ័យនេះ មន្រី្តជំនាញកំពុងអនុវត្តគម្រោងថែរក្សា អភិរក្ស​កុលាលភាជន៍ និងការបណ្តុះបណ្តាលដល់និសិ្សតបុរាណវិទ្យា រួមនិងមន្ត្រី នៃ​មន្ទីរ​វប្បធម៌ និង​វិចិត្រ​សិល្បៈ​ ខេត្តបន្ទាយមានជ័យ អ្វីដែលមន្រី្តយើងកំពុងធ្វើនោះ គឺប្រមែប្រមូលកុលាលភាជន៍ មកពី​តំបន់ផ្សេង និងវត្ថុសិល្បៈ ដូចជា លោហៈ អង្កាំ ផ្សេងៗ ក្នុងខេត្តបន្ទាយមានជ័យ។ មន្ត្រី​កំពុង​សិក្សាបែងចែកប្រភេទកុលាលភាជន៍ (សំអាតស្ងួត និងសំអាតដោយទឹក) ការ​សិក្សា​អំពី​សាច់​ដី​ដែល​ស្មូន ចេញជារូបរាង និងរៀបចំបែងចែកដាក់តាមសម័យកាល (ពីសម័យមួយ ទៅ​សម័យ​មួយ​) ក្នុងនោះរៀបចំប្រភេទកុលាលភាជន៍ ចាប់ផ្តើមពីសម័យបុរេប្រវតិ្តសាស្រ្ត ក្នុង​នោះ​សម័យ​យុគ​ដែក និងយុគសំរិទ្ធ សម័យមុនអង្គរ សម័យអង្គរ និងសម័យកណ្តាល។លោក ទេព សុខា បានបញ្ជាក់ថា សមុច្ច័យបុរាណវិទ្យា (វត្ថុសិល្បៈ) ដែល​មន្ត្រី​ជំនាញ​ប្រមែ​ប្រមូល​បាន​ ដោយហេតុថា ក្នុងស្រុកស្វាយចេក ខេត្តបន្ទាយជ័យ សំបូរទៅ​ដោយ​ស្ថានីយ​កប់​សព​បុរាណ ​ដូចជា៖ស្ថានីយភូមិស្នាយ ស្វាយចេក សំភី និងស្ថានីយបុរាណផ្សេងៗទៀត។ ដូច្នេះ​សូម​អំពាវនាវ​ដល់​ប្រជាពលរដ្ឋ អ្នកភូមិ ឃុំ ស្រុក ដែលរស់នៅលើតំបន់នោះ មេត្តាកុំជីកគាស់កកាយ និង​ចរាចរ​វត្ថុសិល្បៈ។ ហើយវត្ថុសិល្បៈដែលមន្រី្តជំនាញកំពុងថែរក្សា អភិរក្ស គឺទទួល​បាន​មក​ពី​ការ​ចាប់​របស់​នគរបាលការពារបេតិកភណ្ឌ ប្រគល់ឲ្យសារមន្ទីរបន្ទាយមានជ័យ និង​សារ​មនី្ទរ​ស្វាយ​ចេក ដែលអ្នកជីកគាស់កកាយវត្ថុសិល្បៈ ព្យាយាមជួញដូរលក់ទៅឲ្យប្រទេសជិតខាង។ ដូច្នេះ​​លោក​ប្រធានការិយាល័យវិភាគ និងពិសោធន៍ នៃនាយកដ្ឋានបុរាណវិទ្យា និងបុរេប្រវតិ្តវិទ្យា ក៏​សូម​អំពាវនាវដល់យុវជន ប្រជាពលរដ្ឋ និងភ្ញៀវទេសចរជាតិ និងភ្ញៀវទេសចរអន្តរជាតិ សូម​អញ្ជើញ​ចូល​ទស្សនាសារមនី្ទរទាំងពីរនេះ ដើម្បីស្វែងយល់ពីប្រវតិ្តសាស្រ្ត និងស្នាដៃ​បុព្វបុរស​ដូន​តាខ្មែរ ​ដែលបានបន្សល់ទុកតាំងពីសម័យបុរេប្រវតិ្តសាស្រ្ត រហូតមកដល់សម័យមុនអង្គរ សម័យ​អង្គរ​ និងសម័យក្រោយអង្គរ ដែលជាធនធានមួយដ៏ប្រពៃ ដែលក្នុងនាមយើងកូនខ្មែរ ត្រូវ​មាន​កាតព្វ​កិច្ច​ចូល​រួមថែក្សា អភិរក្សសម្បតិ្តបេតិកភណ្ឌរបស់ខ្លួន៕ អត្ថបទ៖ រដ្ឋា

កម្ពុជា-ជប៉ុន រួមគ្នាបើកសិក្ខាសាលា ស្តីពីប្រពៃណីផលិតកុលាលភាជន៍ ក្នុងប្រទេសកម្ពុជា

2024/03/12 01:58:10 pm        448
Facebook Telegram Linkin
សិក្ខាសាលា និងពិព័រណ៍ ស្តីពី ប្រពៃណីផលិតកុលាលភាជន៍ក្នុងប្រទេសកម្ពុជា រៀបចំ​ឡើង​ដោយ​មានកិច្ចសហការរវាងគណៈកម្មាធិការបេតិកភណ្ឌពិភពលោកកម្ពុជា សាកលវិទ្យាល័យ​វាសេដា នៃប្រទេសជប៉ុន និងសាកលវិទ្យាល័យភូមិន្ទវិចិត្រសិល្បៈ និងទទួល​បាន​ការ​គាំទ្រ​ពី​ក្រសួង​វប្បធម៌ និងវិចិត្រសិល្បៈ នាព្រឹកថ្ងៃទី១២ ខែមីនា ឆ្នាំ២០២៤នេះ នៅទីតាំង​សាកល​វិទ្យាល័យ​ភូមិន្ទវិចិត្រសិល្បៈ។ឯកឧត្តមបណ្ឌិត ហេង សុផាឌី សាកលវិទ្យាធិការ នៃសាកលវិទ្យាល័យភូមិន្ទវិចិត្រសិល្បៈ បាន​ថ្លែង​ថា ការរៀបចំឲ្យមានព្រឹត្តិការណ៍នេះឡើង ក្រៅពីក្នុងគោលបំណងបំផុសគំនិតលើកស្ទួយ ផ្សព្វផ្សាយ និងអភិរក្សប្រពៃណីនៃការផលិតកុលាលភាជន៍នាពេលបច្ចុប្បន្ន នៅក្នុង​ប្រទេស​កម្ពុជា​ជូន​ដល់​សាធារណជនទូទៅ អ្នកស្រាវជ្រាវ ពិសេសប្អូនៗនិស្សិត យើងក៏រំពឹងថា​អ្នក​ចូលរួម​ទាំង​អស់​ក៏​នឹងបានឃើញនិងបានសិក្សាស្វែងយល់ ប្រៀបធៀបអំពីភាពដូចគ្នា ឬខុសគ្នា ការវិវត្តន៍​នៃ​ទំនៀមទំលាប់ក្នុងការផលិតកុលាលភាជន៍រវាងសម័យបុរាណ និងសម័យបច្ចុប្បន្នផងដែរ។ សិក្ខាសាលានេះផ្តោតលើប្រធានបទពីរសំខាន់ (១) គឺការស្វែងយល់អំពីប្រពៃណី និង​បច្ចេក​ទេស ​នៃការផលិតកុលាភាជន៍នាសម័យមុនអង្គរ និង(២) ការបង្ហាញពីការផលិត ក្អម​ឆ្នាំង​តាម​បែប​ប្រពៃណី​ដែលមាននៅសេសសល់រហូតមកដល់បច្ចុប្បន្ន។ ចំពោះប្រធាទទី១៖ ទាក់ទងទៅ​នឹង​ប្រពៃណី នៃ​ការផលិតកុលាលភាជន៍នាសម័យបុរាណក្នុងប្រទេសកម្ពុជា ដែលតាមរយៈ​ការ​ស្រាវជ្រាវ​បុរាណវិទ្យាកន្លងមកយើងបានដឹងថា មានភស្តុតាង នៃការផលិត និងប្រើប្រាស់​កុលាល​ភាជន៍​តាំង​សម័យបុរេប្រវត្តិសាស្រ្តមកម៉្លេះ ជាក់ស្តែងស្ថានីយល្អាងស្ពាន ក្នុងខេត្តបាត់ដំបង ស្ថានីយ​សំរោងសែន និងស្ថានីយម្លូព្រៃជាដើម។ ប៉ុន្តែសម្រាប់សិក្ខាសាលានេះ កំណត់យក​តែ​ត្រឹម​សម័យ​មុន​អង្គរប៉ុណ្ណោះ ដែលមានវាគ្មិនចំនួន៤រូប នឹងធ្វើបទ​បង្ហាញ​អំពី​ប្រភេទ​កុលាល​ភាជន៍​មក​ពី​ស្ថានីយសំខាន់ៗរួមមាន ស្ថានីយអូរកែវ អង្គរបុរី វត្តភូ ថាឡាបរិវ៉ាត់ និងសំបូរព្រៃគុក។ ចំពោះ​ប្រធានបទទី២៖ គឺផ្តោតលើមរតកនៃការផលិតកុលាលភាជន៍នាសម័យបច្ចុប្បន្ន គឺ​សំដៅ​លើ​ការ​ផលិត​ក្អម ឆ្នាំងប្រើដោយឧបករណ៍ភ្លើង និងល្អ ឬ ទ្រនៈ និងទ្រនិល ដែលមានស្មូនឆ្នាំង ភាគ​ច្រើន​ជាស្ត្រី រៀនចេះតគ្នាពីមួយជំនាន់ទៅមួយជំនាន់ ពីម្តាយ ទៅកូន ពីមីងក្មួយ ពីបងស្រី ទៅ​ប្អូន​ស្រីជាដើម។ កន្លងមកតាមការសិក្សាស្រាវជ្រាវរបស់លោកបណ្ឌិត រ៉ូឡង់ ម៉ូរ៉េ នៅ​ឆ្នាំ​១៩៨៦ មានកន្លែងផលិតក្អម ឆ្នាំងតាមបែបប្រពៃណីច្រើនកន្លែងក្នុងប្រទេសកម្ពុជា ប៉ុន្តែ​សព្វ​ថ្ងៃ​នេះ កន្លែងមួយចំនួនឈប់ផលិតក្អមឆ្នាំងបែបប្រពៃណីនេះជាស្ថាពរ ឧទាហរណ៍ខេត្តបាត់ដំបង កំពង់ចាម (ផ្អាវ) តាកែវ (ភ្នំជីសូរ)ជាដើម។ បច្ចុប្បន្ន ខេត្តដែលបន្តធ្វើមានចំនួន៤ប៉ុណ្ណោះ មាន​ដូច​ជា៖ ខេត្តកំពង់ឆ្នាំង ក្នុងស្រុករលាប្អៀរ ៖ ការផលិតក្អមឆ្នាំង នៅក្នុងភូមិទ្រា ភូមិអណ្តូងឫស្សី ភូមិ​ត្រពាំង ស្បូវ ភូមិត្រោក ភូមិត្រពាំងអន ភូមិត្រពាំងគរ ភូមិពន្លឺថ្មី ភូមិបាំងឆួល។ ខេត្តកំពង់ស្ពឺ ស្រុក​បរសេដ្ឋ៖ ការផលិតក្អមឆ្នាំង មាននៅក្នុងភូមិដំដែក ភូមិត្រពាំងក្រឡាញ់ និងភូមិ ផ្សេង​ទៀត​។ ខេត្តកំពត ក្នុងស្រុកបន្ទាយមាស៖ ការផលិតក្អមឆ្នាំង នៅមានតែភូមិដំណាក់ចំបក់មួយគត់ និង​ខេត្តព្រៃវែង ក្នុងស្រុកពារាំង៖ ការផលិតក្អមឆ្នាំង នៅមានតែភូមិ ឫស្សីជុក និងភូមិ​ព្រៃព្រហ្ម​ប៉ុណ្ណោះ​។សូមបញ្ជាក់ផងដែរថា សិក្ខាសាលា និងពិព័រណ៌នាពេលនេះ មានវាគ្មិនចំនួន៦រូប ស្ម័គ្រ​ចិត្ត​ចូល​រួម​ធ្វើ​បទបង្ហាញអំពី កុលាលភាជន៍សម័យបុរាណ(សម័យមុនអង្គរ) កុលាលភាជន៍​មក​ពី​ស្ថានីយ​អូរកែរ, កុលាលភាជន៍មកពីស្ថានីយអង្គរបុរី, កុលាលភាជន៍មកពីស្ថានីយថាឡាបរិវ៉ាត់, កុលាលភាជន៍​មកពីស្ថានីយវត្តភូ និងកុលាលភាជន៍មកពីស្ថានីយសំបូរព្រៃគុក និងកុលាលភាជន៍​ប្រពៃណី​សម័យបច្ចុប្បន្ន ដើម្បីចែករំលែកចំណេះដឹង បទពិសោធន៍ និងលទ្ធផលស្រាវជ្រាវ​ថ្មី​ៗ​ដល់​អង្គសិក្ខាសាលាផងដែរ៕ អត្ថបទ រដ្ឋា

សាលាមធ្យមវិចិត្រសិល្បៈនឹងរៀបចំកម្មវិធីអបអរសាទរពិធីបុណ្យចូលឆ្នាំថ្មី ប្រពៃណីជាតិ នាពេលខាងមុខ

2024/03/12 01:41:07 pm        203
Facebook Telegram Linkin
ដោយទទួលបានការអនុញ្ញាតដ៏ខ្ពង់ខ្ពស់ពីលោកជំទាវបណ្ឌិតសភាចារ្យរដ្ឋមន្ត្រី ក្រសួងវប្បធម៌ និង​វិចិត្រសិល្បៈ សាលាមធ្យមវិចិត្រសិល្បៈ នឹងរៀបចំកម្មវិធី​អបអរ​សាទរ​ពិធី​បុណ្យ​ចូលឆ្នាំថ្មី​ប្រពៃណី​ជាតិ នៅថ្ងៃទី០១-០២ ខែមេសា ឆ្នាំ២០២៤ ក្នុងគោលបំណង​ដើម្បី​បង្កើន​ការ​ផ្សព្វ​ផ្សាយ និងការ​យល់​ដឹង​ពី​សិល្បៈ​វប្បធម៌​ជូន​សាធារណជន​ទូទៅ​ក៏​ដូច​ជា​ដើម្បី​បង្ហាញ​អំពី​ការ​បង្ហាត់​បង្រៀនរបស់លោកគ្រូ/អ្នកគ្រូ និងការហាត់រៀនរបស់សិស្សានុសិស្ស។ ក្នុងកម្មវិធីនេះគឺមានការតាំងពិព័រណ៍ស្នាដៃសិល្បៈរបស់សិស្សានុសិស្ស និងមាន​ការ​ចូលរួម​ពី​ខាង​សិប្បកម្ម​ផ្សេងៗនៅក្នុងរាជធានី និងបណ្តាខេត្តមួយចំនួន ជាពិសេសមាន​ការ​សម្តែង​សិល្បៈ​ទស្សនីយ​ភាពគ្រ​ប់ទម្រង់ដោយសិស្សានុសិស្ស ក៏ដូចជាសិល្បករ សិល្បការិនី និងតារាល្បីៗ​ដែល​ជា​អតីត​សិស្សសាលាមធ្យមវិចិត្រសិល្បៈ ព្រមទាំងមានការប្រគំតន្ត្រី (តន្ត្រីបុរាណ-តន្ត្រីសម័យ) ដើម្បី​ប​ង្ហាញជូននូវសិល្បៈវប្បធម៌ ប្រពៃណីដ៏ល្អផូរផង់របស់ខ្មែរ (ការថែរក្សា អភិរក្ស បេតិក​ភណ្ឌ​វប្បធម៌ (រូបី និងអរូបី) គឺជាភារកិច្ចរបស់កូនខ្មែរគ្រប់ៗរូប)។ កម្មវិធីនេះប្រព្រឹត្តទៅបានគឺដោយមានការអញ្ជើញចូលរួមពីសាធារណជន ទស្សនិកជន សប្បុរស​ជន​ពី​គ្រប់ទិសទី៕

នាវាទេសចរណ៍បរទេស ផ្ទុកអ្នកដំណើរជិត ១០០០នាក់ ចូលចតធ្វើទស្សនកិច្ច ក្នុងខេត្ដព្រះសីហនុ

2024/03/11 12:35:11 pm        253
Facebook Telegram Linkin
ព្រះសីហនុ៖ នាយនគរបាលអន្ដោប្រវេសន៍ច្រកទ្វារកំពង់ផែអន្ដរជាតិក្រុងព្រះសីហនុ ប្រាប់ថា នាវា​ទេសចរណ៍បរទេសខ្នាតយក្ស ឈ្មោះ SEA BOURN ENCORE សញ្ជាតិ BAHAMAS ផ្ទុក​អ្នក​ដំណើរ​ចម្រុះជាតិសាសន៍ ៨៨៥នាក់ ចូលចតនៅកំពង់ផែស្វយ័តអន្ដរជាតិក្រុងព្រះសីហនុ ដើម្បី​ធ្វើ​ទស្សនកិច្ចនៅខេត្ដព្រះសីហនុ ថ្ងៃទី១១ ខែមីនា ឆ្នាំ២០២៤។ លោកវរសេនីយ៍ បន្ដថា បន្ទាប់ពីវិបត្ដិជំងឺកូវីដ-១៩ មាននាវាទេសចរណ៍បរទេសខ្នាតយក្ស ផ្ទុក​អ្នក​ដំណើរ​រាប់រយ រាប់ពាន់នាក់ ចូលចតជាបន្ដបន្ទាប់នៅកំពង់ផែស្វយ័តអន្ដរជាតិក្រុងព្រះសីហនុ ធ្វើ​ទស្សនកិច្ចក្នុងខេត្ដព្រះសីហនុនិងក្នុងព្រះរាជាណាចក្រកម្ពុជា។ នាវាដែលចូលចតថ្ងៃនេះ (លើកទី៤) បានធ្វើដំណើរមកពីប្រទេសវៀតណាម ផ្ទុកអ្នកដំណើរចម្រុះជាតិសាសន៍សរុបចំនួន ៨៨៥​នាក់ ក្នុងនោះ មានភ្ញៀវទេសចរចំនួន ៤៦៣ និងនាវិកសរុបចំនូន ៤២២នាក់ ជាតិ​សាសន៍​ដែល​ច្រើន​ជាង​គេបង្អស់ គឺសញ្ជាតិអាមេរិក និងអូស្រ្ដាលី។  លោក បន្ដថា ការចូលចតនាវាទេសចណ៍ បានផ្ដល់​ឱកា​សឱ្យភ្ញៀវ​ទេសចរ​ចម្រុះ​ជាតិ​សាសន៍​បាន​ទស្សនា​ពី​វឌ្ឍនភាពខេត្ដព្រះសីហនុ និងបានស្វែងយល់ពីវប្បធម៌រស់នៅរបស់ប្រជាពលរដ្ឋខ្មែរ ជាមួយ​និងធនធានធម្មជាតិដ៏សម្បូរបែបរបស់ខេត្ដព្រះសីហនុ។ ទាំងនេះ បានបញ្ជាក់​យ៉ាង​ច្បាស់​ថា សេដ្ឋកិច្ចពិភពលោកបានដំណើរការឡើងវិញ ក្រោមដំបូល​សុខសន្ដិភា​ព​នៅ​ព្រះរា​ជា​ណា​ចក្រ​កម្ពុជា​ នឹងអាចឱ្យភ្ញៀវទេសចរ បន្ដផ្សព្វផ្សាយពីខេត្ដព្រះសីហនុ ក៍ដូចជាប្រទេសកម្ពុជា ក្នុងការ​ទាក់​ទាញ​ភ្ញៀវទេសចរ សម្រាប់លើកកម្ពស់វិស័យទេសចរណ៍នៅកម្ពុជា។ ម្យ៉ាងវិញទៀត ការ​ចូល​ចត​នេះ បានផ្ដល់អត្ថប្រយោជន៍មួយចំនួន ដល់ប្រជាពលរដ្ឋខេត្ដព្រះសីហនុ ដែលជាអ្នក​លក់​ផលិត​ទេសចរណ៍ ពិសេសអ្នករត់តាក់ស៊ី ឬម៉ូតូកង់បី និងម៉ូតូឌុប ។ល។   

រទេះគោខ្មែរ ក្លាយជាយាន្តជំនិះដ៏ពេញនិយម សម្រាប់ភ្ញៀវទេសចរអន្តរជាតិនាពេលបច្ចុប្បន្ន

2024/03/11 12:01:17 pm        509
Facebook Telegram Linkin
កំពង់ឆ្នាំង៖ រទេះគោខ្មែរដឹកភ្ញៀវបរទេស ក្នុងឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង បាន និងកំពុងក្លាយជាយាន្តជំនិះដ៏ពេញនិយមសម្រាប់ភ្ញៀវទេសចរអន្តរជាតិនាពេលបច្ចុប្បន្ន ។ ការ​ដឹកភ្ញៀវទេសចរអន្តរជាតិនេះ បានចាប់ផ្តើមពេញនិយមឡើងវិញ ក្រោយ​រាជ​រដ្ឋាភិបាល​កម្ពុជា​ទប់​ស្កាត់​ជំងឺ​កូវីដ១៩បាន១០០%ក្នុងប្រទេស និងនាំអោយភ្ញៀវ​អន្តរជាតិ​បាន​ចូល​មក​ជិះ​រទេះគោ​ខ្មែរ រួមនិងការទស្សនាផ្ទាំងគំនូរបុរាណអាយុជាង៣០០ឆ្នាំ ក្នុងព្រះវិហារវត្តពោធិ៍រុក្ខារាម ហៅ​វត្តកំពង់ត្រឡាចលើ និងការទស្សនាវាលស្រែ រួមនិងភូមិឋានខ្មែរតាមជនបទ។ប្រជាសហគមន៍អ្នកតាហាង ស្ថិតក្នុងភូមិអ្នកតាហាង ឃុំកំពង់ត្រឡាចក្រោមបានអោយដឹងថា រទេះ​គោ​ខ្មែរ មាននៅក្នុងសហគមន៍ចំនួន២គឺ សហគមន៍អ្នកតាហាង និងសហគមន៍​កំពង់​ត្រឡាច​លើ ហើយសមាជិកក្នុងសហគមន៍មាន៤៨នាក់ ។ សព្វថ្ងៃក្នុង១ថ្ងៃ​ៗ​សមាជិកអាច​ដឹក​ភ្ញៀវ​អន្តរ​ជាតិបានចន្លោះពី២ ទៅ៣ជើង ដោយក្នុង១រទេះគោអាចផ្ទុកភ្ញៀវបាន២នាក់ ជិះ​មើល​តាម​ភូមិ​ឋានរបស់ប្រជាពលរដ្ឋរស់នៅជនបទ ទស្សនាវាលស្រែវាលស្រូវ និងបាន​ចូល​ទៅ​ទស្សនា​ផ្ទាំង​គំនូរ​បុរាណអាយុជាង៣០០ឆ្នាំ ក្នុងព្រះវិហារវត្តពោធិ៍រុក្ខារាម ហៅវត្តកំពង់ត្រឡាចលើ ។ សមាជិកនៅក្នុងសមាគមន៍ទាំងអស់សុទ្ធតែមានរទេះ និងគោខ្លួនឯងផ្ទាល់ ហើយ​សេវា​ដឹក​ក្នុង​ភ្ញៀវ​ម្នាក់​៧ដុល្លារ ក្នុង១ថ្ងៃៗ ពួកគាត់អាចរកកម្រៃបានចន្លោះពី៣ម៉ឺនរៀល ទៅ៨ម៉ឺនរៀល សម្រាប់​ផ្គត់ផ្គង់គ្រួសារ។ ប្រជាសហគមន៍ទាំងអស់បានថ្លែងអំណរគុណដល់សម្តេចតេជោ ហ៊ុន សែន ដែលសម្តេច​បាន​ខិតខំ​ការពារ​ថែ​រក្សា​អាយុ​ជីវិ​ត​ប្រជាពលរដ្ឋ​ទាំង​អស់​តាម​រយៈ​ការ​ខិតខំ​ស្វែងរ​ក​វ៉ាក់សាំងការពារជម្ងឺកូវីត១៩ និងការពារប្រជាពលរដ្ឋរហូតអាចទប់ស្កាត់បានទាំងស្រុង។លោក កុយ ញ៉ាន មេឃុំកំពង់ត្រឡាចបានអោយដឹងថា៖ កាលពីឆ្នាំ២០១៩ និងឆ្នាំ២០២០ មិន​មាន​ភ្ញៀវ​អន្តរជាតិមកជិះរទេះគោខ្មែរក្នុងឃុំរបស់លោកឡើយ ព្រោះកំពុង​ជួប​វិបត្តិ​ជា​សកល​ចំពោះ​ជំងឺ​កូវីដ១៩ ។ លុះក្រោយមកជម្ងឺនេះត្រូវបានទប់ស្កាត់បាត់ទៅវិញ ហើយភ្ញៀវ​អ​ន្តរ​ជាតិ​បា​នម​កជិះ​រទេះគោខ្មែរ និងទស្សនាគំនូរបុរាណ និងជីវភាពប្រជាពលរដ្ឋ​តាម​ជន​បទ​របស់​ខ្មែរ​យើង​បន្ត​ទៀត​ ។ តាមរយៈរូមគំនូរបុរាណ និងការធ្វើដំណើរកម្សាន្តបែបប្រពៃណីខ្មែរជិះរទេះគោ របស់​ភ្ញៀវ​ទេសចរអន្តរជាតិនេះ បានផ្តល់ឱកាសការងារ និងចំណូល​ដល់​ប្រជា​សហគមន៍​រស់​នៅ​ក្នុង​តំបន់​ជន​បទ ក្នុងឃុំកំពង់ត្រឡាច មានជីវភាពធូរធារមួយកម្រឹត ។ ភ្ញៀវទេសចរ​អន្តរជាតិ ដែល​មក​ទស្សនា​ទាំងនេះ មិនត្រឹមតែបានកម្រៃផ្គត់ផ្គង់គ្រួសារក្នុងសហគមន៍នោះទេ ថែមទាំងបង្កើន​ការ​អភិរក្សរូបគំនូរទឹកថ្នាំបុរាណរបស់ខ្មែរ និងសត្វគោ រទេះគោខ្មែរថែមទៀតផង ។ ភ្ញៀវ​ទេសចរ​អន្តរជាតិ​ដែល​មកកទស្សនាកំសាន្តនេះ ភាគច្រើនមកពី អាមេរិក បារាំង ជប៉ុន និងតំបន់អឺរ៉ុប ដើម្បី​មើល​រូបគំនូរពីសម័យបុរាណរបស់ខ្មែរ ការជិះរទេះគោខ្មែរ និងបាន​ទស្សនា​តំ​បន់​វាល​ស្រែ​វាល​ស្រូវ​ខ្មែរ និងការរស់នៅបែបជនបទរបស់ប្រជាពលរដ្ឋខ្មែរផងដែរ ។ចំពោះភ្ញៀវទេសចរអន្តរជាតិ ដែលមកកំសាន្តទីនោះ គឺធ្វើដំណើរ​តាម​កប៉ាល់​មក​ចត​នៅ​មាត់​កំពង់​ក្នុង​ឃុំ​កំពង់​ត្រឡាចក្រោម ហើយប្រជាសហគមន៍​បាន​យក​រទេះគោខ្មែរ​ទៅ​ទទួល​ពួក​គាត់​ពី​ទីនោះ បន្ទាប់មកដឹកពួកគាត់ទៅទស្សនារូបគំនូរបុរាណ នៅព្រះវិហារក្នុងវត្តពោធិ៍រុក្ខារាម ដែលមាន​ចម្ងាយប្រមាណ៣គីឡូម៉ែត្រ ដោយត្រូវឆ្លងកាត់វាលស្រែ និងភូមិឋាន​ប្រជាពលរដ្ឋ​ផង​ដែរ​៕ កាំង ហុងវាស្នា

មន្ត្រីវប្បធម៌ប្រឹងប្រែងសិក្សាស្រាវជ្រាវតឹកតាងប្រវតិ្តសាស្រ្ត របកគំហើញថ្មីៗ ជូនដល់មហាជន ពីសម្បតិ្តវប្បធម៌

2024/03/09 10:35:55 am        164
Facebook Telegram Linkin
លោក ឡេង វិទូ ប្រធាននាយកដ្ឋានស្តីទី នៃនាយកដ្ឋានបុរាណវិទ្យា និងបុរេប្រវតិ្តវិទ្យា តាម​រយៈ​BTVព័ត៌មាន នាថ្ងៃទី៩ ខែមីនា ឆ្នាំ២០២៤នេះបានលើកឡើងថា មន្ត្រីជំនាញវប្បធម៌ ប្រឹងប្រែង​សិក្សា​ស្រាវជ្រាវ​តឹកតាងប្រវតិ្តសាស្រ្ត របកគំហើញថ្មីៗ ជូនដល់មហាជន ពី​សារៈសំខាន់​សម្បតិ្ត​វប្បធម៌​។លោក ឡេង វិទូ លើកឡើងថា នៅដើមខែឧសភា ឆ្នាំ២០២៤ខាងមុខនេះ នាយកដ្ឋាន​សហការ​ជាមួយ​សាកលវិទ្យាល័យ ហាវៃ សហរដ្ឋអាមេរិក និងបើកការសិក្សាស្រាវជ្រាវបុរាណវិទ្យា នៅក្នុង​ខេត្ត​បាត់ដំបង ទាក់ទងជីវភាពរស់នៅរបស់ប្រជាពលរដ្ឋ នៅតំបន់ប្រាសាទបាសែត ស្ថិតក្នុង​ស្រុក​សង្កែ​ ក្រោយពីការធ្វើកំណាយ យើងនឹងធ្វើការសិក្សាអភិរក្ស ផ្សព្វផ្សាយ​វត្ថុ​សិល្បៈ​ដែល​យើង​រក​ឃើញ​។ ហើយនាយកដ្ឋានក៏មានកិច្ចសហការជាមួយសាកលវិទ្យាល័យ ប្រទេសអូស្រ្តាលី ដែល​ដឹកនាំ​ដោយ​លោកបណ្ឌិត ម៉ាទីន ដោយធ្វើការសិក្សាស្រាវជ្រាវបុរាណ នៅតំបន់​រាជធានី​សម័យ​កណ្តាល​។សូមបញ្ជាក់ផងដែរថា៖ តាំងពីឆ្នាំ២០០៧ ដែលបានបង្កើតនាយកដ្ឋានបុរាណវិទ្យា និង​បុរេប្រវត្តិ​វិទ្យា​រួច​មក នាយកដ្ឋានបានធ្វើប្រតិបត្តិការដោយផ្ទាល់ខ្លួនឯងផង និងធ្វើការសហប្រតិបត្តិការ ជា​មួយ​ដៃគូរជាតិ និងដៃគូរអន្តរជាតិមួយចំនួនធំ ក្នុងនោះមានការចូលរួមពីបណ្តាល៩ប្រទេស ស្មើ​នឹង​២១​ស្ថាប័នស្រាវជ្រាវ។ ការគ្រប់គ្រង និងការស្រាវជ្រាវទាំងនេះផ្តោតលើ សម័យបុរេ​ប្រវត្តិ​សាស្ត្រ សម័យប្រវត្តិសាស្ត្រ រហូតដល់សម័យមុន-ក្រោយអង្គរ។ មកទល់នឹងពេលនេះក្រសួង ក៏​ដូចជានាយកដ្ឋានបានចុះបញ្ជី និងគ្រប់គ្រងស្ថានីយបុរាណវិទ្យាទាំងអស់ចំនួន ៩៣១៧ទីតាំង ក្នុង​នោះមានបុរាណដ្ឋានជា ប្រព័ន្ធធារាសាស្ត្របុរាណ ប្រាសាទមានរូបរាង ទួលមានគ្រឹះប្រាសាទ ទួល​មនុស្សរស់នៅ ទួលកប់សព ទីតាំងឡស្លរដែក និងទីតាំងឡដុតកុលាលភាជន៍បុរាណ៕ អត្ថបទ រដ្ឋា

ការលះបង់នៃមន្រ្តីបរិស្ថាននារី គឺជាវីរភាព និងការលះបង់ដ៏មានតម្លៃបំផុត ចំពោះការគ្រប់គ្រង​ធនធានធម្មជាតិឱ្យគង់វង្សតទៅមុខទៀត

2024/03/08 12:44:06 pm        272
Facebook Telegram Linkin
ភ្នំពេញ៖ «ការលះបង់នៃមន្រ្តីបរិស្ថាននារី គឺជាវីរភាព និងការលះបង់ដ៏មានតម្លៃបំផុត ដែល​មិន​អាច​កាត់ថ្លៃបាន ជាពិសេស ធានាការ​គ្រប់គ្រងធនធានធម្មជាតិឱ្យគង់វង្សតទៅ​មុខទៀត» នេះ​ជាការលើកឡើងរបស់ ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន នាថ្ងៃទី៨ ខែមីនា ឆ្នាំ​២០២៤ ដែលជាថ្ងៃដែលពិភពលោក ក៏ដូចជានៅកម្ពុជា បាននិងកំពុងប្រារព្ធទិវានារីអន្តរជាតិ ៨ មីនា​។ អ្នកនាំពាក្យក្រសួងបរិស្ថាន បានថ្លែងថា ក្នុងចំណោមមន្រ្តីឧទ្យានុរក្សសរុប ១០៦៩នាក់ មាន​ស្រ្តីប្រមាណ៣០% បាននិងកំពុងបំពេញបេសកកម្មជាមន្រ្តីឧទ្យានុរក្ស ដែល​បាន​បំពេញ​តួនាទី​សំខាន់ ចុះអប់រំ ផ្សព្វផ្សាយ ទប់ស្កាត់ និងបង្ក្រាបបទល្មើសធនធានធម្មជាតិ ប្រកបដោយ​កា​រ​ទទួលខុសត្រូវខ្ពស់ នៅតាមតំបន់ការពារធម្មជាតិ ក្នុងភូមិសាស្រ្តខេត្តចំនួន១៥ នៅក្នុង​ព្រះរាជាណាចក្រ​កម្ពុជា។ ឯកឧត្តម ខ្វៃ អាទិត្យា បានឱ្យដឹងថា មន្រ្តីឧទ្យានុរក្សទាំងអស់ បានលះបង់ពេលវេលា​ជាមួយ​ក្រុម​គ្រួសារ លះបង់កម្លាំងកាយកម្លាំងចិត្ត និងបញ្ញាស្មារតី ដើរល្បាតនៅតាមព្រៃ ភ្នំ ជ្រលងដងអូរ ទន្លេ​នានា ទាំងយប់ ទាំងថ្ងៃ ដោយមិនខ្លាចនឿយហត់ ប្រឈមជំងឺដង្កាត់នានា វង្វេងផ្លូវ ដាច់បាយ ផ្លូវលំបាក ទឹកជំនន់ ការប្រឈមនឹងបទល្មើស ជួបគ្រោះថ្នាក់ដោយប្រការណាមួយ ក៏​ប៉ុន្តែ​មន្រ្តី​ឧទ្យានុរក្សទាំងបុរស និងស្រ្តី ត្រូវបានឈរជើង និង​ចុះ​ល្បាត​បង្កាប​បទ​ល្មើស​ធនធាន​ធម្មជាតិ ជាប់ជាប្រចាំ នៅតាមតំបន់ការពារធម្មជាតិទាំងអស់ ដែលមានផ្ទៃដីជាង៧លានហិចតា ស្មើនឹង​ប្រមាណ៤០% នៃផ្ទៃដីប្រទេសកម្ពុជាទាំងមូល។«មន្ត្រីឧទ្យានុរក្សរបស់យើង បាននិងកំពុងបំពេញភារកិច្ច ជាក់ស្តែងនៅពេលនេះ គឺដូចជាឪពុក ម្តាយ ឬអ្នកអាណាព្យាបាល ដែលជួយឃ្លាំមើល ការពារ ថែរក្សា មរតកធនធាន​ធម្មជាតិ​ដ៏​សម្បូណ៌​បែប​សម្រាប់កូនចៅ តទៅមុខទៀត» បញ្ជាក់បន្ថែមពីអ្នកនាំពាក្យក្រសួងបរិស្ថាន។ជាមួយគ្នានេះ ឯកឧត្តម ខ្វៃ អាទិត្យា បានលើកឡើងថា កន្លងមកក៏ដូចជាបច្ចុប្បន្ន មន្រ្តី​ឧទ្យានុរក្ស​ត្រូវបានទទួលការថែទាំ និងលើកទឹកចិត្តពីរាជរដ្ឋាភិបាល តាមរយៈក្រសួងបរិស្ថាន ដូច​ជា​ការថែទាំសុខភាព ការការពារជំងឺ ការបណ្តុះបណ្តាលជំនាញវិជ្ជាជីវៈ ពង្រឹងសមត្ថភាព របៀប​នៃ​ការចុះល្បាត និងបង្កាបបទល្មើស មធ្យោបាយ សម្ភារៈ ការប្រើប្រាស់ឧបករណ៍ ស្រប​នឹង​ការ​វិវត្តថ្មី​នៃការជឿនលឿន នៃបច្ចេកវិទ្យា និងការអភិវឌ្ឍប្រទេស។ លើសពីនេះ ក្រសួង​បរសិស្ថាន បានពង្រឹងការគ្រប់គ្រង ចាត់ចែង និងការធ្វើសេចក្តីសម្រេចចិត្ត ក្នុងការគ្រប់​គ្រង​ធន​ធាន​ធម្មជាតិ ដែលជាការផ្តល់លទ្ធភាព ក្នុងការលើកកម្ពស់សមត្ថភាព លទ្ធភាព និង​ប្រសិទ្ធ​ភាព​ការងារ​ស្រ្តី ក្នុងការបំពេញភារកិច្ច ក៏ដូចជាការបង្កើនឱ្យមានការចូលរួម កាន់តែប្រសើរថែមទៀត រវាង​ស្រ្តី កុមារ ក្មេងស្រី ក្នុងវិស័យបរិស្ថាន។ឯកឧត្តម ខ្វៃ អាទិត្យា បានថ្លែងថា ក្រសួងបរិស្ថាន សហការជាមួយអ្នកពាក់ព័ន្ធ ក្នុងការបន្ត​ថែ​រក្សា​ធន​ធានធម្មជាតិ និងគិតគូរចូលរួមលើកស្ទួយជីវភាព ប្រជាសហគមន៍មូលដ្ឋាន តាមរយៈ​កម្ម​វិធី​អភិវឌ្ឍន៍​វិស័យគោលដៅកម្សាន្តបៃតង និងបន្តអប់រំផ្សព្វផ្សាយ ដល់មហាជន​ទូទៅ​ពី​សារៈ​សំខាន់​នៃ​យុទ្ធសាស្រ្តចក្រា ដែលផ្តោតលើមុំយុទ្ធសាស្រ្តចំនួន ៣ គឺភាព ស្ងាត បៃតង និងចីរភាព ឆ្ពោះ​ទៅ​ការសម្រេចទស្សនវិស័យ កម្ពុជាឆ្នាំ២០៥០ ជាប្រទេសមានការអភិវឌ្ឍន៍ជឿនលឿន និង​ជា​ប្រទេស​អព្យាក្រឹតកាបូន។អ្នកនាំពាក្យក្រសួងបរិស្ថាន បានវាយតម្លៃខ្ពស់ចំពោះមន្រ្តីរាជការក្រសួងបរិស្ថានទាំងអស់ ជា​ពិសេស​ចំពោះមន្ត្រីឧទ្យានុរក្សជានារី ដែលមានភាពអង់អាចក្លាហាន មាន​ស្មារតី​ស្នេហា​ជាតិ​មាតុ​ភូមិ មានការប្តេជ្ញាចិត្ត និងការលះបង់ខ្ពស់ក្នុងការថែរក្សាធនធានធម្មជាតិ ដែល​កម្ពុជា​មាន​សម្រាប់​មនុស្សរាប់ជំនាន់ទៀត៕

កម្ពុជាពង្រឹងការគ្រប់គ្រងធនធានធម្មជាតិ និងអភិរក្សសត្វព្រៃកម្រ នៅតាមតំបន់ការពារធម្មជាតិ

2024/03/04 11:29:31 am        256
Facebook Telegram Linkin
ដើម្បីចូលរួមអបអរសាទរ ទិវាសត្វព្រៃពិភពលោក ថ្ងៃទី ៣ មិនា ឆ្នាំ២០២៤ ក្រសួងបរិស្ថាន បានបង្ហាញពីការគ្រប់គ្រងធនធនធម្មជាតិ ជាពិសេសអភិរក្សសត្វព្រៃ នៅកម្ពុជា សំដៅលើកកម្ពស់ការយល់ដឹងរបស់មហាជនអំពីមរតកធម្មជាតិ ដ័មានតម្លៃសម្រាប់មនុស្សជាតិ។ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បានបញ្ជាក់ថា កម្ពុជាយើងមានតំបន់ការពារធម្មជាតិចំនួន ៧៣កន្លែង មានផ្ទៃដីជាង៧លានហិចតា ស្មើនឹង៤០%នៃផ្ទៃដីប្រទេស។ អ្នកនាំពាក្យក្រសួងបរិស្ថាន បានលើកឡើងថា យោងតាមផែនការយុទ្ធសាស្រ្ត និងសកម្មភាពនានា បានរកឃើញថា សត្វព្រៃនៅប្រទេសកម្ពុជាមានប្រមាណ ២០៨៥ ប្រភេទ (ថនិកសត្វ=១៤៧ បក្សី=៥៤៣ ល្មូន=១៤៥ ថលជលិគ=៥៩ ត្រី=១០៩៣ និងសត្វល្អិត=៩៨)។ ឯកឧត្តម ខ្វៃ អាទិត្យា បានអះអាងថា ក្រសួងបរិស្ថាន និងអង្គការដៃគូធ្វើការអភិរក្សដោយផ្តោតសំខាន់ទៅលើប្រភេទសត្វដែលមានដោយកម្រ ជិតផុតពូជ និងកំពុងគំរាមកំហែងចំនួនប្រមាណ ១២៣ប្រភេទ (ថនិកសត្វ=២៥ បក្សី=៣៣ ល្មូន=២១ ថលជលិគ=៩ និងត្រី=៣៥) ជាមួយគ្នានេះ ប្រភេទសត្វជិតផុតពូជដែលមានច្រើនជាងគេនៅកម្ពុជារួមមាន៖ ថនិកសត្វមាន៖ ទន្សោង បក្សីមាន៖ក្ងរ (ត្រយ៉ង) យក្ស ចាបតេតកម្ពុជា និងត្រយ៉ងចំកកសជាដើម។ ឯកឧត្តមអ្នកនាំពាក្យក្រសួងបរិស្ថាន ប្រទេសកម្ពុជាក៏ចាត់ទុកជាប្រទេស ដែលមានវត្តមានប្រភេទសត្វ ដែលមានដោយកម្រ ជិតផុតពូជ និងកំពុងគំរាមកំហែងច្រើនដូចជា៖ ទន្សោង ត្រយ៉ងយក្ស ត្រយ៉ងចំកកស និងចាបតេតកម្ពុជាជាដើម មានវត្តមានតិចជាងប្រទេសជិតខាងដូចជា ដំរីអាស៊ី និងខ្ទីងជាដើម។ឯកឧត្តម ខ្វៃអាទិត្យា បានលើកឡើងបន្ថែមថា កម្ពុជាបាននិងកំពុងយកចិត្តទុកដាក់ខ្លាំង សហការជាមួយក្រសួង ស្ថាប័ន ពាក់ព័ន្ធ អាជ្ញាធរមូលដ្ឋានគ្រប់លំដាប់ថ្នាក់ អង្គការដៃគូ ការពារមរតកធម្មជាតិ រួមមានព្រៃឈើ សត្វព្រៃនិង ជិវៈចម្រុះ ដើម្បីបន្តទុកដល់កូនចៅជំនាន់ក្រោយ និងជាពិសេសធានាដល់ថែរក្សាប្រព័ន្ធអេកូឡូស៊ី ប្រយុទ្ធនឹងការប្រែប្រួលអាកាសធាតុ និងឆ្ពោះទៅសម្រេចទស្សនវិស័យប្រទេសអព្យាក្រឹតកាបូនឆ្នាំ២០៥០។ឯកឧត្តមលើកទឹកចិត្តឱ្យភាគីពាក់ព័ន្ធ ដៃគូសហការ ជាពិសេសប្រជាសហគមន៍តំបន់ការពារធម្មជាតិ ពង្រឹងការចូលរួមឱ្យកាន់តែសកម្មខ្លាំងបន្ថែមទៀត ជាមួយក្រសួងបរិស្ថាន ដើម្បីបង្កើតសេដ្ឋកិច្ចមូលដ្ឋាន និងការពារអភិរក្សធនធានធម្មជាតិ។ នៅក្នុងវិធានការបង្កើនប្រសិទ្ធភាពនៃការការពារ និងអភិរក្សធនធានធម្មជាតិ ក្រសួងបរិស្ថានមិនត្រឹមតែបន្តពង្រឹងលើការ អនុវត្តច្បាប់លើវិធាន៤ចំណុច ក្នុងនោះដោយអនុវត្តច្បាប់១០០% ចំពោះអ្នកប្រព្រឹត្តបទល្មើសធនធានធម្មជាតិ ប៉ុណ្ណោះទេ ប៉ុន្តែបានផ្តោតសំខាន់លើការអភិវឌ្ឍ ជំរុញការដាំដើមឈើឲ្យច្រើនជាងការកាប់ ដើម្បីរក្សានូវកំណើន ជាពិសេសការជំរុញ ការដាំស្តារព្រៃឈើ ដែលជាទិសដៅអាទិភាព បង្កើនគម្របព្រៃឈើឲ្យបាន៦០% នៅឆ្នាំ២០៥០ ស្របតាមយុទ្ធសាស្ត្របញ្ចកោណ របស់រាជរដ្ឋាភិបាលកម្ពុជា និងលើកកម្ពស់ជីវភាពប្រជាពលរដ្ឋ នៅតាមសហគមន៍ រួមទាំងការអភិរក្សជីវចម្រុះដោយចីរភាព។ តាមរយៈនេះ ក្រសួងបរិស្ថានបានដាក់ចេញយុទ្ធនាការថ្ងៃទី១០ តុលា ឆ្នាំ២០២៣ នឹងធ្វើការផ្តល់ និងដាំដើមឈើយ៉ាងតិច ១លានដើមក្នុងមួយឆ្នាំ ចាប់ពីឆ្នាំ២០២៤នេះ។ឯកឧត្តមអ្នកនាំពាក្យ បានបញ្ជាក់ថា ចំពោះការបង្កើតសេដ្ឋកិច្ចមូលដ្ឋាន គឺជាវិធានការជាក់ស្តែង ដើម្បីការពារ និងអភិរក្សព្រៃឈើ និងសត្វព្រៃរបស់កម្ពុជាឱ្យបានគង់វង្ស ដូចជាការដាំដុះដើមឈើ គឺ«ដើម្បីរកចំណូល» តាមរយៈការលក់ឥណទានកាបូន និងទេសចរណ៍គោលដៅកម្សាន្តបៃតង ៕

MedCREATE សហការជាមួយមន្ទីរពេទ្យនៅម៉ាឡេស៊ី ផ្តល់សេវាដល់ពលរដ្ឋកម្ពុជា ដែលចង់ទៅព្យាបាលជំងឺនៅក្រៅប្រទេស

2024/02/25 06:24:57 pm        139
Facebook Telegram Linkin
ភ្នំពេញ​៖ ការិយាល័យតំណាងមន្ទីរពេទ្យអន្តរជាតិប្រចាំកម្ពុជា  MedCREATE នៅថ្ងៃទី២៥ ខែកុម្ភៈ ឆ្នាំ២០២៤ នេះ បានចុះអនុស្សរណៈយោគយល់គ្នា (MoU) ជាមួយមន្ទីរពេទ្យថ្មីមួយទៀត នៅក្នុងប្រទេសម៉ាឡេស៊ី ឈ្មោះ «Subang Jaya Medical Centre» ដើម្បីផ្តល់ភាពកាន់តែទូលំទូលាយសម្រាប់ប្រជាជនកម្ពុជា ដែលមាន បំណងស្វែងរកសេវាព្យាបាលនៅក្រៅប្រទេស។ការចុះអនុស្សរណៈយោគយល់គ្នា (MoU) រវាង Med CREATE និងមន្ទីរពេទ្យ Subang Jaya Medical Centre ខាងលើនេះ គឺប្រព្រឹត្តឡើងនៅសណ្ឋាគារ សាន់និងម៉ូន ក្នុងរាជធានីភ្នំពេញ បន្ទាប់ពីបើកសិក្ខាសាលាចែក រំលែកចំណេះដឹងពីបញ្ហា «ជំងឺមហារីកសុដន់» ពីសំណាក់លោកស្រីវេជ្ជបណ្ឌិតឯកទេសមកពីប្រទេសម៉ាឡេស៊ី ដើម្បីផ្តល់ពីវិធីសាស្ដ្រស្វែងរករោគសញ្ញា និងការព្យាបាលដ៏មាន ប្រសិទ្ធភាពជូនដល់អ្នកចូលរួមដែលចំនួនប្រមាណជិត ១០០ នាក់ នាវេលាថ្ងៃទី២៥ខែកុម្ភះ ២០២៤ នេះ។ខណះ ជំងឺមហារីកសុដន់ដែលចាត់ទុកជាប្រភេទមហារីកជាទូទៅច្រើនកើតលើស្តី្រ រីឯ បុរសក៏អាចវិវត្តទៅជាមហារីកសុដន់នេះដែរ បើទោះបីជាការកើតនៃជំងឺនេះកើតឡើងដោយកម្រក៏ដោយ ។ហើយការធ្វើរោគវិនិច្ឆ័យរកឃើញឆាប់រហ័សនៃមហារីក បង្កើនឱកាសច្រើនក្នុងការទទួលបានការព្យាបាលបានជោគជ័យ។នៅក្នុងឱកាសនោះលោក រ័ត្ន សុចាន់ នាយកប្រតិបត្តិផ្នែក ទីផ្សារ និងអាជីវកម្ម នៃMedCREATE ក៏ថ្លែងប្រាប់អ្នកចូលរួមឲ្យបានដឹងផងដែរថា MedCREATE គឺជាការិយាល័យតំណាងមន្ទីរពេទ្យអន្ដរជាតិឈានមុនគេ ក្នុងប្រទេសកម្ពុជា ចាប់ពីតាំងពីឆ្នាំ២០១៦ កន្លងមក តែងតែសិប្រឹក្សាយ៉ាងល្អិតល្អន់ និងស្វែងរកនូវដៃគូ មន្ទីរពេទ្យ ដែលមានគុណភាព និងសេវាកម្មល្អ សម្រាប់ផ្តល់ការព្យាបាលនូវប្រភេទជំងឺទាំងធ្ងន់ និងស្រាល និងការសង្រ្គោះបន្ទាន់ដល់អ្នកជំងឺ ។ លោក រ័ត្ន សុចាន់ បន្តឲ្យដឹងថា សម្រាប់អ្នកជំងឺសង្រ្គោះបន្ទាន់វិញ ការិយាល័យតំណាងមន្ទីរពេទ្យអន្តរជាតិប្រចាំកម្ពុជា នឹងផ្តល់នូវសេវារថយន្ត និងយន្តហោះសង្រ្គោះបន្ទាន់ទៅកាន់79ប្រទេសផងដែរ ខណះ MedCREATE បានធ្វើការសហការដោយផ្ទាល់ជាមួយមន្ទីរពេទ្យល្បីៗជា ច្រើន នៅក្នុងប្រទេសចំនួន៤ រួមមាន ប្រទេសថៃ, ប្រទេសឥណ្ឌា, ប្រទេសសិង្ហបុរី និងប្រទេសម៉ាឡេស៊ី៕

បណ្ដាញសង្គម

ព័ត៌មានថ្មីៗ

ទិន្នន័យបង្ហាញថា អឺរ៉ុបរកឃើញករណីមនុស្សស្លាប់ជាង ១ម៉ឺននាក់ អំឡុងរលកកម្តៅកាលពីចុងខែមិថុនា
07/14/2026 09:07 PM
Facebook Telegram Linkin
ក្រសួងការបរទេសឥណ្ឌាកោះហៅឲ្យចូលខ្លួនឯកអគ្គរដ្ឋទូតរងអ៊ីរ៉ង់ ជុំវិញការស្លាប់នាវិកម្នាក់
07/14/2026 09:07 PM
Facebook Telegram Linkin
EU រិះគន់ការគំរាមកំហែង លើ ICC ខណៈសហរដ្ឋអាមេរិកកំណត់គោលដៅតុលាការ
07/14/2026 08:07 PM
Facebook Telegram Linkin
កុងហ្គោអះអាងថា ការរីករាលដាលឆ្លងជំងឺអេបូឡា បានទៅដល់ខេត្ត Haut-Uele និងខេត្ត Tshopo
07/14/2026 08:07 PM
Facebook Telegram Linkin
ក្រុមឧទ្ទាមហ៊ូធី វាយប្រហារមីស៊ីលលើអារ៉ាប៊ីសាអ៊ូឌីត ដើម្បីបញ្ចប់ភាពស្ងប់ស្ងាត់អស់រយៈពេលជាច្រើនឆ្នាំ
07/14/2026 08:07 PM
Facebook Telegram Linkin
សភាអ៊ុយក្រែនបោះឆ្នោតបន្ថែមរយៈពេលនៃ​​​ច្បាប់អាជ្ញាសឹក និងការកេណ្ឌ​ទ័ព ៩០​ថ្ងៃទៀត
07/14/2026 08:07 PM
Facebook Telegram Linkin
ពលរដ្ឋអ៊ីរ៉ង់អះអាងថា ច្រកសមុទ្រ Hormuz ត្រូវតែបិទក្រោយរលកចុងក្រោយនៃការវាយប្រហាររបស់អាមេរិក
07/14/2026 08:07 PM
Facebook Telegram Linkin
វិមានក្រឹមឡាំងច្រានចោលការចោទប្រកាន់ថា រុស្ស៊ីនៅពីក្រោយការវាយប្រហារអ៊ីនធឺណិតលើ EU
07/14/2026 08:07 PM
Facebook Telegram Linkin
កម្លាំងរុស្ស៊ីវាយប្រហារនាវាស៊ីវិលនៅជិតកំពង់ផែសមុទ្រខ្មៅOdesa របស់អ៊ុយក្រែន
07/14/2026 08:07 PM
Facebook Telegram Linkin
រុស្ស៊ីចោទប្រកាន់អ៊ុយក្រែនពីបទអំពើភេរវកម្ម ចំពោះការវាយប្រហារលើការដឹកជញ្ជូន
07/14/2026 08:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.