នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេច​ធិបតីណែនាំអាជ្ញាធរពាក់ព័ន្ធគ្រប់លំដាប់ថ្នាក់ ត្រួតពិនិត្យ និងគ្រប់គ្រងឱ្យបានចំពោះទំនិញគេចពន្ធ និងខូចគុណភាព ហើយត្រូវសហការគ្នាចាត់វិធានការឱ្យបានច្បាស់លាស់
សម្ដេច​ធិបតីក្រើនរំឭកអាជ្ញាធរពាក់ព័ន្ធគ្រប់លំដាប់ថ្នាក់ត្រូវបន្តបង្ក្រាប Online Scams មិនត្រូវបន្ធូរដៃឡើយ
សម្ដេចតេជោ ហ៊ុន សែន អញ្ជើញជួបពិភាក្សាទ្វេភាគីជាមួយ ឯកឧត្តម លី ឈាង នាយករដ្ឋមន្ត្រីចិន
សម្ដេចតេជោ ហ៊ុន សែន អញ្ជើញចូលក្រាបថ្វាយបង្គុំគាល់ព្រះករុណាព្រះមហាក្សត្រ និងសម្តេចព្រះមហាក្សត្រី

នយោបាយ​ និង ការអភិវឌ្ឍន៍

រដ្ឋមន្រ្តីការបរទេសថៃ នឹងអញ្ជើញបំពេញទស្សនកិច្ចផ្លូវការនៅកម្ពុជា នៅថ្ងៃទី២៧ ខែមិថុនា ឆ្នាំ ២០២៤នេះ

2024/06/24 09:07:53 am        221
Facebook Telegram Linkin
ភ្នំពេញ៖ តបតាមការអញ្ជើញរបស់ ឯកឧត្តម សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រី ការបរទេស និងសហប្រតិបត្តិការអន្តរជាតិ ឯកឧត្តម ម៉ារីត សាងៀមផុង្ស រដ្ឋមន្ត្រីការបរទេស នៃព្រះរាជាណាចក្រថៃ នឹងអញ្ជើញបំពេញទស្សនកិច្ចផ្លូវការ នៅព្រះរាជាណាចក្រកម្ពុជា នៅថ្ងៃទី២៧ ខែមិថុនា ឆ្នាំ២០២៤។ ក្នុងអំឡុងពេលទស្សនកិច្ចនេះ ឯកឧត្តម ម៉ារីត សាងៀមផុង្ស នឹងចូលជួបសម្តែងការគួរសម ដាច់ដោយឡែកជាមួយ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ ឯកឧត្តម ម៉ារីត សាងៀមផុង្ស នឹងជួបពិភាក្សាទ្វេភាគីជាមួយ ឯកឧត្តមឧបនាយករដ្ឋមន្ត្រី សុខ ចិន្តាសោភា ដែលក្នុងឱកាសនោះរដ្ឋមន្ត្រីការបរទេសទាំងពីរ នឹងផ្លាស់ប្តូរទស្សនៈអំពី មធ្យោបាយនានាដើម្បីពង្រឹងទំនាក់ទំនងទ្វេភាគីព្រមទាំងរិះរកវិធីសាស្ត្រនានាដើម្បីពង្រីកកិច្ចសហ ប្រតិបត្តិការបន្ទាប់ពីប្រទេសទាំងពីរបានតម្លើងកម្រិតទំនាក់ទំនងទ្វេភាគីទៅជាភាពជាដៃគូយុទ្ធសាស្ត្រ កាលពីខែកុម្ភៈ ឆ្នាំ២០២៤។ ភាគីទាំងពីរ ក៏រំពឹងនឹងពិភាក្សាលើបញ្ហាតំបន់ និងអន្តរជាតិមួយចំនួន ដែលជាប្រយោជន៍ និងក្តីកង្វល់រួម៕

[UPDATE] អារ៉ាប៊ីសាអ៊ូឌីត បានចុះឈ្មោះអ្នកធ្វើធម្មយាត្រាស្លាប់ដោយសារក្ដៅខ្លាំងអំឡុងបុណ្យហាជីចំនួន ១.៣០១ នាក់

2024/06/24 08:58:37 am        124
Facebook Telegram Linkin
ប្រទេសអារ៉ាប៊ីសាអ៊ូឌីត បានប្រកាសកាលពីថ្ងៃអាទិត្យថាខ្លួនបានកត់ត្រាការស្លាប់ចំនួន ១.៣០១ នាក់ ចំណោមអ្នកធ្វើធម្មយាត្រាក្នុងរដូវបុណ្យប្រពៃណីសាសនាអ៊ីស្លាម ហាជី (Hajj) ។ទីភ្នាក់ងារសារព័ត៌មានអារ៉ាប៊ីសាអ៊ូឌីត បានរាយការណ៍ថា រដ្ឋមន្ត្រីសុខាភិបាលអារ៉ាប៊ីសាអ៊ូឌីត លោក ហ្វាអាល់ ចាឡាចេល(Fahd Al-Jalajel) បាននិយាយថា វិស័យថែទាំសុខភាពរបស់ព្រះរាជាណាចក្រមួយនេះ បានដោះស្រាយករណីក្ដៅខ្លាំងជាច្រើន ដោយបុគ្គលមួយចំនួននៅតែស្ថិតក្នុងការថែទាំសុខភាពនៅឡើយ។ រដ្ឋមន្ត្រីរូបនេះបាននិយាយថា ក្នុងចំណោមអ្នកស្លាប់មានមនុស្សចាស់ និងអ្នកជំងឺរ៉ាំរ៉ៃជាច្រើននាក់ ដោយបង្ហាញថាកម្ដៅបានប៉ះពាល់ដល់អ្នកធ្វើធម្មយាត្រាដែលមិនបានចុះឈ្មោះច្រើនបំផុតដល់ទៅ៨៣% ខណៈពួកគេបានដើរផ្លូវឆ្ងាយ ក្រោមពន្លឺព្រះអាទិត្យដោយផ្ទាល់ ដោយគ្មានកន្លែងជ្រក ឬសម្រាកឲ្យបានគ្រប់គ្រាន់។ជនរងគ្រោះទាំងអស់ត្រូវបានកំណត់អត្តសញ្ញាណ ហើយក្រុមគ្រួសាររបស់ពួកគេបានជូនដំណឹង ទោះបីជាមានការខ្វះខាតព័ត៌មានផ្ទាល់ខ្លួន ឬឯកសារអត្តសញ្ញាណដំបូងក៏ដោយ។ លោកបានបន្ថែមថា ដំណើរការរៀបចំត្រឹមត្រូវ ត្រូវបានអនុវត្តសម្រាប់ការកំណត់អត្តសញ្ញាណ ការបញ្ចុះសព និងការចេញលិខិតបញ្ជាក់មរណភាព៕

គ.ជ.ប រៀបចំសន្និបាតបូកសរុបការងារបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤

2024/06/24 08:10:34 am        179
Facebook Telegram Linkin
នៅព្រឹកថ្ងៃទី២៤ខែមិថុនាឆ្នាំ២០២៤នេះ គ.ជ.ប បានរៀបចំសន្និបាតបូកសរុបការងារបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ និងការងារបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ឆ្នាំ ២០២៤»ដែលពិធីនេះ ធ្វើឡើងនៅខេត្តសៀមរាប។សន្និបាតនេះ មានគោលបំណងសំខាន់គឺធ្វើការបូកសរុប និងវាយតម្លៃ លើលទ្ធផលការងារ របស់​គណៈកម្មាធិការជាតិរៀបចំការបោះឆ្នោត(គ.ជ.ប)ក្នុងការរៀបចំ ការចាត់ចែង និងការគ្រប់គ្រង​ការបោះឆ្នោតអសកលចំនួន ២ រួមមាន ១- ការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ និង ២-ការបោះឆ្នោតជ្រើសរើសក្រុមប្រឹក្សា រាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ដែលបានប្រព្រឹត្តទៅក្នុងឆមាសទីមួយ នៃឆ្នាំ២០២៤ នេះ។សន្និបាត នឹងដំណើរការទៅពេញមួយថ្ងៃក្រោមអធិបតីភាព ឯកឧត្តម ជី ចំណាន អនុប្រធានគណៈកម្មាធិការជាតិរៀបចំការបោះឆ្នោត និងវត្តមានសមាជិក សមាជិកា គណៈកម្មាធិការជាតិរៀបចំការបោះឆ្នោត មកពីបណ្តាខេត្ត-រាជធានីទាំង២៥ វត្តមានឯកឧត្តម លោកជំទាវ លោក លោកស្រី តំណាងក្រសួង ស្ថាប័ន គណបក្សនយោបាយ សមាគម និងអង្គការមិនមែនរដ្ឋាភិបាល សរុបចំនួនប្រមាណ ជាង ៥០០នាក់៕

សម្ដេ​ចតេជោ៖«គោលដៅរបស់ខ្ញុំអំពាវនាវឱ្យប្រើប្រាស់ CoolApp ក្រៅពីលើកទឹកចិត្តឱ្យកូនខ្មែរចេះស្រាវជ្រាវបច្ចេកទេស វិទ្យាសាស្ត្រក្លាយជាផលិតផលខ្មែរ ក៏ដើម្បីសុវត្ថិភាពសម្រាប់សន្តិសុខជាតិ»

2024/06/23 10:17:53 pm        212
Facebook Telegram Linkin
ភ្នំពេញ៖ សម្ដេច​អគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជា នាយប់ថ្ងៃទី២៣ ខែមិថុននេះ បាន​បង្ហោះសារ​លើបណ្ដាញ​សង្គមថា ប៉ុន្មានថ្ងៃមកនេះសម្ដេច​បានសាកល្បងប្រើកម្មវិធី CoolApp ដែលកូនខ្មែរបានផលិត និងដាក់ឲ្យប្រើប្រាស់ដែលមានសម្ដេច​ក៏ជាអ្នកអំពាវនាវឲ្យប្រើប្រាស់ផងដែរ គឺក្នុងគោលដៅលើកទឹកចិត្តឲ្យកូនខ្មែរចេះស្រាវជ្រាវបច្ចេកទេសវិទ្យាសាស្ត្រ ក្លាយជាផលិតផលខ្មែរ អ្វីដែលខ្ញុំត្រូវគិតគឺសុវត្តិភាពសម្រាប់សន្តិសុខជាតិដែលបរទេសពិបាកជ្រៀតជ្រែកយកព័ត៌មានពីយើងបាន។សម្ដេច​តេជោ មាន​ប្រសាសន៍បញ្ជាក់ថា ប្រទេសគេមានប្រព័ន្ធទំនាក់ទំនងរបស់គេ ដូចជា Wechat របស់ចិន, Zalo របស់វៀតណាម, Kakao Talk របស់កូរ៉េខាងត្បូង, Telegram របស់រុស្ស៉ី ដូច្នេះកម្ពុជាយើងមាន CoolApp។សម្ដេច​តេជោថ្លែងថា រឿងសំខាន់មួយទៀតគឺការធានាដល់ទំនាក់ទំនងក្នុងប្រទេសរបស់យើង ក្នុងករណីបណ្តាញទំនាក់ទំនងរបស់បរទេស ជួបការរអាក់រអួលដោយប្រការណាមួយ។ ដូចនេះមន្ត្រីរាជការស៊ីវិល និងកងកម្លាំងប្រដាប់គួរបង្កើតឲ្យមាន CoolApp ដើម្បីធានាម្ចាស់ការលើរក្សាការសម្ងាត់ផង និងការដាច់ទំនាក់ទំនងពីប្រព័ន្ធបរទេសផង។ CoolApp ប្រើប្រព័ន្ធរក្សាការសំងាត់បំផុត គឺប្រព័ន្ធ Encryption ដែលពុំអាចមើល ឬអានសាររបស់យើងទេ សូម្បីតែក្រុមហ៊ុន CoolApp ផ្ទាល់ក៏ដោយ។ យើងមិនបានហាមឃាត់ មិនឲ្យបងប្អូនឈប់ប្រើប្រព័ន្ធដែលធ្លាប់ប្រើនោះឡើយ។សម្ដេច​តេជោថ្លែង​ថា​៖«សម្រាប់ខ្ញុំបាន និងកំពុងប្រើ៨ប្រពន្ធ័រាប់ទាំង CoolApp ថ្មីផង។ តើមានអ្វីប្លែកពីប្រព័ន្ធផ្សេងទេ? សម្រាប់ខ្ញុំបានបញ្ចូលទៅក្នុងទូរស័ព្ទ៦គ្រឿង និងសាកល្បងប្រើប្រាស់ឃើញមានភាពងាយស្រួលលើចំណុច៣គឺ៖ ១. ងាយស្រួលបង្កើតដោយមិនពិបាករកលេខកូដពីកន្លែងផ្សេង ឬរង់ចាំយូរ។ ២. បញ្ជូនសារជាអក្សរ រូបថត វីដេអូ និងសារសម្លេងបានលឿន។ ៣. ហៅនិយាយឆ្លងឆ្លើយនិង Video call បានយ៉ាងច្បាស់ល្អ»។សម្ដេច​តេជោបញ្ជាក់ថា៖«សរុបមកវាប្រើ Internet តិចជាងប្រពន្ធ័ផ្សេងទៀត។ ចំណុចនេះជាការសាកល្បងរបស់ខ្ញុំប៉ុណ្ណោះបើបងប្អូនចង់សាកល្បងក៏សូមសាកល្បងមើលរាប់ទាំងប្អូននៅក្រៅប្រទេស ព្រោះបងប្អូនមួយចំនួនបានប្រើប្រាស់ប្រព័ន្ធនេះ ជាមួយខ្ញុំរួចហើយ»៕

ឯកឧត្តម ស៊ុន ចាន់ថុល ដឹកនាំក្រុមការងារចុះពិនិត្យទីតាំងត្រៀមរៀបចំពិធី​បើកការដ្ឋានគម្រោងព្រែកជីកហ្វូណនតេជោ

2024/06/23 01:52:41 pm        384
Facebook Telegram Linkin
ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និង​ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នៅព្រឹកថ្ងៃទី២៣ ខែ​មិថុនា ឆ្នាំ២០២៤នេះ បានអញ្ជើញដឹកនាំក្រុមការងារ​ចុះត្រួតពិនិត្យ​ទីតាំង​បើកកា​រដ្ឋាន​សាង​សង់​ព្រែក​ជីក​ហ្វូណនតេជោ ស្ថិតនៅភូមិដីឥដ្ឋកោះផុស ឃុំដីឥដ្ឋ ស្រុកកៀនស្វាយ ខេត្តកណ្តាល។សូមជម្រាបថា ការដ្ឋានព្រែកជីកហ្វូណនតេជោ បាននឹងកំពុង​ដំណើរ​ត្រៀម​រៀប​ចំ​ដើម្បី​ទទួល​បាន​ការ​ចុចប៊ូតុងជាផ្លូវការពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បី​ចាប់​ផ្តើម​គម្រោងជាប្រវត្តិសាស្ត្ររបស់កម្ពុជាមួយនេះ។ គម្រោងព្រែកជីកហ្វូណនតេជោ ជាគម្រោងគមនាគមន៍ផ្លូវទឹកយ៉ាងសំខាន់ជាប្រវត្តិសាស្ត្រ និង​សក្តានុពល​របស់កម្ពុចា ដើម្បីតភ្ជាប់ទឹកសាប និងទឹកសមុទ្រក្នុងការនាំទំនិញទៅកាន់ពិភពលោក និង​ផ្ដល់ឯករាជភាពក្នុងការដឹកជញ្ជូនផ្លូវទឹករបស់កម្ពុជា ដោយ​មិន​ចាំ​បាច់​ពឹង​ដង្ហើម​ប្រទេស​ដទៃ​ឡើយ​។ គម្រោងព្រែកជីកនេះនឹងបើកការដ្ឋានជាផ្លូវការ ក្រោមអធិបតីភាព​ដ៏​ខ្ពង់ខ្ពស់​សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាព្រឹកថ្ងៃទី៥ ខែសីហា ឆ្នាំ២០២៤​ខាង​មុខ​នេះ​៕ 

គម្រោងអភិវឌ្ឍន៍ទំនប់ដូនទ្រី ដែលជាអាងស្តុកទឹកដ៏ធំនៅខេត្តបាត់ដំបង សម្រេចការសាងសង់បានប្រមាណ ៨០ភាគរយ

2024/06/23 08:45:36 am        302
Facebook Telegram Linkin
បាត់ដំបង៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយ ឯកឧត្តម សុខ លូ អភិបាលខេត្តបាត់ដំបង មន្ត្រីបច្ចេកទេសក្រសួង មន្ទីរជំនាញ និង​អាជ្ញាធរ​មូលដ្ឋាន នៅថ្ងៃទី២២ ខែមិថុនា ឆ្នាំ២០២៤ បានអញ្ជើញ​ចុះពិនិត្យ​វឌ្ឍនភាព​គម្រោង​អភិវឌ្ឍន៍​ទំនប់​ដូនទ្រី ក្នុងភូមិសាស្ត្រស្រុករុក្ខគិរី ខេត្តបាត់ដំបង ដែលទទួលហិរញ្ញប្បទាន​សម្បទាន​ពី​សាធារណ​រដ្ឋកូរ៉េ។បើតាមរបាយការណ៍របស់ក្រុមហ៊ុនសាងសង់បានឱ្យដឹងថា គិតមកដល់ខែមិថុនា ឆ្នាំ២០២៤នេះ វឌ្ឍនភាពនៃគម្រោងអភិវឌ្ឍន៍ទំនប់ដូនទ្រីសម្រេចបានប្រមាណ ៨០ភាគរយ។សូម​បញ្ជាក់ថា គម្រោងអភិវឌ្ឍន៍ទំនប់ដូនទ្រីត្រូវប្រើរយៈពេលសាងសង់ ៩០ខែ ដោយ​ចាប់​ផ្ដើម​ការ​សាងសង់ក្នុងខែមិថុនា ឆ្នាំ២០១៨ និងគ្រោងបញ្ចប់នាខែតុលា ឆ្នាំ២០២៥ ខាងមុខ។ គម្រោងនេះ​គ្របដណ្តប់លើឃុំចំនួន ១១នៃស្រុកមោងឫស្សី និងស្រុករុក្ខគិរី ខេត្តបាត់ដំបង និង​ស្រុក​បាកាន ខេត្តពោធិ៍សាត់ មានសក្តានុពលស្ដុកទឹកបាន ១៦៣,១លានម៉ែត្រត្រីគុណ មាន​លទ្ធភាព​ផ្គត់ផ្គង់ទឹកស្រោចស្រពសម្រាប់បង្កើនផលិតផលកសិកម្មប្រមាណ ៣៣០០០​ហិកតា​នៅ​រដូវ​វស្សា និង ៤៥០០ហិកតានៅរដូវប្រាំង ព្រមទាំងរួមចំណែកក្នុងការផ្គត់ផ្គង់ទឹកស្អាត និង​កាត់​បន្ថយទឹកជំនន់តាមតំបន់មួយចំនួននៅផ្នែកខាងក្រោម។ក្នុងឱកាសនោះ ឯកឧត្តមរដ្ឋមន្ត្រី បានជម្រាបជូនគណៈប្រតិភូថា គម្រោង​អភិវឌ្ឍន៍​ទំនប់ដូនទ្រី​ជា​ប្រព័ន្ធធារាសាស្រ្តមួយដែលសាងសង់ប្រើប្រាស់វិធីសាស្រ្តថ្មីមិនធ្លាប់អនុវត្តន៍ពីមុនមកដូចជា ការ​ជីករូងក្នុងភ្នំ ការជីកថ្ម និងវិធីសាស្រ្តពង្រឹងកែច្នៃបាតគ្រឹះទំនប់ជាដើម។ជាមួយ​គ្នានេះ ឯកឧត្តមរដ្ឋមន្ត្រី បានថ្លែង​នូវ​ការ​កោត​សរសើរ​ចំពោះវឌ្ឍនភា​ព​គម្រោង​ដែល​សម្រេច​បាន ក្នុងការជួយដោះស្រាយបញ្ហាទឹក កាត់បន្ថយហានិភ័យគ្រោះធម្មជាតិ និងធានា​ដ​ល់​ការ​ផ្គត់ផ្គង់ទឹកគ្រប់គ្រាន់សម្រាប់ការបង្កបង្កើនផលវិស័យកសិកម្ម វិស័យទឹកស្អាត​សម្រាប់​ការ​ប្រើ​ប្រាស់​ប្រចាំ​ថ្ងៃ និងក្នុងឧស្សាហកម្ម និងបម្រើដល់ពហុវិស័យ ដែលជាផ្នែក​មួយ​ជួយ​លើក​ស្ទួយ​ដល់​ជីវភាពរស់នៅរបស់បងប្អូនប្រជាពលរដ្ឋ។ឯកឧត្តម សុខ លូ អភិបាលខេត្តបាត់ដំបង ក្នុងនាមប្រជាពលរដ្ឋនៅទូទាំងខេត្ត គោរព​ថ្លែង​អំណរ​គុណ​សម្តេចតេជោ ហ៊ុន សែន អតីតនាយករដ្ឋមន្ត្រី និងសម្តេចធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជា​ណា​ចក្រ​កម្ពុជា​ដែល​បាន​ផ្ដល់​គម្រោង​អភិវឌ្ឍន៍​ទំនប់ដូនទ្រី​នេះ​ដើម្បី​បម្រើ​ផល​ប្រយោជន៍ដ៏មហាសាលសម្រាប់ប្រជាពលរដ្ឋអ្នកខេត្តបាត់ដំបង។សូមជម្រាបថា គម្រោងអភិវឌ្ឍន៍ទំនប់ដូនទ្រី ស្ថិតនៅចម្ងាយប្រមាណ ៩០គីឡូម៉ែត្រ ភាគ​ពាយ័ព្យ​ពីក្រុងបាត់ដំបង មានទីតាំងស្ថិតនៅក្នុងស្រុករុក្ខគិរី ខេត្តបាត់ដំបង។ ហេដ្ឋា​រចនា​សម្ព័ន្ធ​សំខាន់ៗ​របស់គម្រោងរួមមាន៖ទំនប់មេប្រវែង ៦៥៤ម៉ែត្រ ,សំណង់បង្ហៀរធ្វើពីបេតុងប្រវែង ៤១៤​ម៉ែត្រ និងអាចដោះទឹកបាន ៨៥០ម៉ែត្រត្រីគុណក្នុង១វិនាទី ,រូងទូនេលពង្វាង​ទឹក​រាង​ជា​ក្រចក​ជើង​សេះប្រវែង ៤៦២ម៉ែត្រ, សំណង់គ្រប់គ្រងទឹកជា​ប្រភេទ​សំណង់​ប៉ម​មាន​ទ្វារ​ទឹក​ច្រើន​ថ្នាក់​ដែល​មានទ្វារទឹកចំនួន៥ និងស្ពានសម្រាប់ឆ្លងទៅប៉មប្រវែង ៥៥ម៉ែត្រ និងទទឹង ៣ម៉ែត្រ​, ផ្លូវ​ក្រាល​ថ្មភ្នំប្រវែង ១៧,៣គីឡូម៉ែត្រ ទទឹង៧ម៉ែត្រ , សំណង់ដោះទឹកចំនួន ៨កន្លែង និង​ស្ពាន​បណ្តោះ​អាសន្នចំនួន ៣កន្លែង៕

ប្រព័ន្ធផ្សព្វផ្សាយរដ្ឋ៖ ផ្កាយរណបចិន-បារាំង ត្រូវបានបាញ់បង្ហោះទៅកាន់គន្លងតារាវិថី

2024/06/22 05:39:58 pm        213
Facebook Telegram Linkin
ទូរទស្សន៍រដ្ឋចិន CCTV បានរាយការណ៍ថា ផ្កាយរណបមួយអភិវឌ្ឍដោយប្រទេសចិន និងបារាំង ដែលជាថាមពលខ្លាំងបំផុត សម្រាប់ការសិក្សាការផ្ទុះនៅផ្នែកឆ្ងាយបំផុតនៃពពួកផ្កាយ ត្រូវបានបាញ់បង្ហោះទៅកាន់គន្លងតារាវិថីហើយ នៅថ្ងៃសៅរ៍ (ទី២២ ខែមិថុនា) នេះ។ទូរទស្សន៍ CCTV បានឲ្យដឹងនៅថ្ងៃសៅរ៍នេះថា ផ្កាយរណបដើម្បីសិក្សាបាតុភូត ក្នុងនោះរួមទាំងការផ្ទុះកាំរស្មីហ្គាម៉ា ត្រូវបានដាក់បញ្ចូលទៅក្នុងគន្លងតារាវិថីដោយយានចម្លងរបស់ចិន ដែលត្រូវបានបាញ់បង្ហោះចេញពីមជ្ឈមណ្ឌលបាញ់បង្ហោះផ្កាយរណប Xichang ក្នុងខេត្ត Sichuan ភាគនិរតីនៃប្រទេសចិន។ដោយដកស្រង់សម្ដីរបស់រដ្ឋបាលអវកាសជាតិចិន ប្រព័ន្ធផ្សព្វផ្សាយនោះ បានរាយការណ៍ថា ការបាញ់បង្ហោះផ្កាយរណប Space Variable Objects Monitor នឹងដើរតួនាទីយ៉ាងសំខាន់ ក្នុងរបកគំហើញតារាសាស្ត្រ។គួរបញ្ជាក់ថា សារព័ត៌មាន China Daily បានចុះផ្សាយកាលពីខែមេសាថា នេះគឺជាផ្កាយរណបតារាសាស្ត្រដំបូងគេដែលត្រូវបានបង្កើតឡើងដោយប្រទេសចិន និងបារាំង ទោះបីជាប្រទេសទាំង២ បានបង្កើតផ្កាយរណបមហាសមុទ្រចិន-បារាំង ដែលបានបាញ់បង្ហោះក្នុងឆ្នាំ២០១៨ ក៏ដោយ៕

រដ្ឋបាលខេត្តពោធិ៍សាត់ និងក្រុមហ៊ុនមីនីបៀរ បន្តពង្រឹងកិច្ចសហការដើម្បីជំរុញផែនការ សាងសង់រោងចក្រដ៏ធំទី២ ក្នុងស្រុកក្រគរ

2024/06/22 05:13:22 pm        378
Facebook Telegram Linkin
ពោធិ៍សាត់៖ ឯកឧត្តម ខូយ រីដា អភិបាលខេត្តពោធិ៍សាត់ នៅព្រឹកថ្ងៃទី២២ ខែមិថុនា ឆ្នាំ២០២៤ បានជួបពិភាក្សាការងារជាមួយតំណាងក្រុមហ៊ុនមីនីបៀ (Minebea) របស់ប្រទេសជប៉ុន ក្នុងគោលបំណងពង្រឹងកិច្ចសហការណ៍គ្នាទោវិញទៅមកដើម្បីជំរុញផែនការសាងសង់រោងចក្រដ៏ធំទី២របស់ក្រុមហ៊ុន នៅស្រុកក្រគរ ក្នុងខែកញ្ញា ខាងមុខនេះ ឱ្យមានដំណើរការល្អប្រសើរ ។ ក្នុងឱកាសនោះឯកឧត្តម ខូយ រីដា ក៏ដូចជាប្រជាពលរដ្ឋខេត្តពោធិ៍សាត់ទាំងមូល សូមស្វាគមន៍​យ៉ាងកក់ក្តៅ ចំពោះវត្តមានគម្រោងសាងសង់រោងចក្រដ៏ធំរបស់ក្រុមហ៊ុនមីនីបៀរ របស់ប្រទេសជប៉ុន ក្នុងទឹកដីនៃខេត្តពោធិ៍សាត់ ហើយក្នុងនាមរដ្ឋបាលខេត្តឯកឧត្តម ប្តេជ្ញា​ធ្វើការសម្របសម្រួល ​និងកិច្ចសហការគ្រប់យ៉ាងជាមួយក្រុមហ៊ុន​ ដើម្បីជម្រុញឱ្យដំណើរ​ការសាងសង់រោងចក្រដ៏ធំនេះដំណើរការដោយរលូន ។ក្នុងកិច្ចពិភាក្សានោះ លោក កាត់ស៊ូហ៊ីកូ យ៉ូស៊ីដា (Katsuhiko Yoshida )តំណាងក្រុមហ៊ុនមីនីបៀ Minebea បានថ្លែងអំណរគុណយ៉ាងជ្រាលជ្រៅ ​ចំពោះរាជរដ្ឋាភិបាលកម្ពុជា ដែលបានគាំទ្រដល់​ក្រុមហ៊ុន ធ្វើឱ្យអាជីវកម្មមានភាពរីកចម្រើនមកដល់សព្វថ្ងៃ ​និងសូមអរគុណដល់រដ្ឋបាល​ខេត្តពោធិ៍សាត់​ ដែលបានផ្តល់កិច្ចសហប្រតិបត្តិការល្អ​ និងការគាំទ្រយ៉ាងពេញលេញ សម្រាប់​ការវិនិយោគ រោងចក្រទី២ ក្នុងស្រុកក្រគរ នៃខេត្តពោធិ៍សាត់ ។ គួរបញ្ជាក់ដែរថា ក្រុមហ៊ុនមីនីបៀមីត្យូមី (Minebea Mitsumi) ដែលជាក្រុមហ៊ុនដ៏ធំមួយរបស់ជប៉ុន បាន​វិនិយោគនៅកម្ពុជារយៈពេលប្រមាណ១០ឆ្នាំ ​ក្នុងតំបន់សេដ្ឋកិច្ចភ្នំពេញ ​ដោយផលិតជាម៉ូទ័រ អំពូល LED និងសម្ភារៈក្មេងលេង ជាដើមសម្រាប់នាំចេញទៅលក់នៅក្រៅប្រទេស ហើយក្រុមហ៊ុន​បានសម្រេចចិត្តបង្កើតរោងចក្រទី២ របស់ខ្លួនក្នុងប្រទេសកម្ពុជា ក្នុងគោលបំណងពង្រីកខ្សែច្រវាក់​ផលិតកម្មរបស់ខ្លួន ថែមមួយកម្រិតទៀតដោយរោងចក្រទី២នេះ​ មានទំហំវិនិយោគសរុបជាង ៦៥០លានដុល្លារ ​នៅលើផ្ទៃដី៥០ហិកតា ស្ថិតស្រុកក្រគរ ​ខេត្តពោធិ៍សាត់ អាចបង្កើតការងារ​ជូនប្រជាពលរដ្ឋជាង​ ៨០០០កន្លែង ព្រោះតែបច្ចុប្បន្ន ខេត្តពោធិ៍សាត់​ មានហេដ្ឋារចនាសម្ព័ន្ធ និង​ប្រភពថាមពលគ្រប់គ្រាន់ ដែលអាចបង្កភាពងាយស្រួលក្នុងការដំណើរការខ្សែច្រវាក់ផលិតកម្ម ៕

ប្រមុខ UN៖ រុស្ស៊ីត្រូវតែអនុវត្តតាមការដាក់ទណ្ឌកម្មលើកូរ៉េខាងជើង

2024/06/22 04:17:52 pm        201
Facebook Telegram Linkin
អគ្គលេខាធិការអង្គការសហប្រជាជាតិ (UN) លោក Antonio Guterres កាលពីថ្ងៃសុក្រ (ទី២១ ខែមិថុនា) បាននិយាយថា ប្រទេសរុស្ស៊ីត្រូវតែគោរពតាមការដាក់ទណ្ឌកម្មរបស់ UN លើកូរ៉េខាងជើង បន្ទាប់ពីប្រទេសទាំង២ ក្នុងសប្តាហ៍នេះ បានធ្វើឲ្យទំនាក់ទំនងកាន់តែស៊ីជម្រៅ និងបានយល់ព្រមផ្តល់ជំនួយយោធាភ្លាមៗ ប្រសិនបើប្រទេសទាំង២ ប្រឈមនឹងការឈ្លានពានដោយប្រដាប់អាវុធ។គួរបញ្ជាក់ថា កិច្ចព្រមព្រៀងដែលត្រូវបានចុះហត្ថលេខាដោយប្រធានាធិបតីរុស្ស៊ី លោក វ្ល៉ាឌីមៀរ ពូទីន និងមេដឹកនាំកូរ៉េខាងជើង លោក គីម ជុងអ៊ុន កាលពីថ្ងៃទី១៩ ខែមិថុនា កើតមានឡើងបន្ទាប់ពីមានការចោទប្រកាន់របស់សហរដ្ឋអាមេរិក ដែលថា ទីក្រុងព្យុងយ៉ាងបានផ្ទេរអាវុធទៅឲ្យរុស្ស៊ី ដើម្បីយកទៅប្រើប្រាស់ប្រឆាំងនឹងអ៊ុយក្រែន ដែលប្រទេសនេះបានលុកលុយកាលពីខែកុម្ភៈ ឆ្នាំ២០២២។ ទាំងទីក្រុងមូស្គូ និងទីក្រុងព្យុងយ៉ាងបានបដិសេធការចោទប្រកាន់នោះ។បណ្ដាអ្នកការទូតបានលើកឡើងថា ក្រុមប្រឹក្សាសន្តិសុខ UN នឹងជួបប្រជុំគ្នានៅថ្ងៃទី២៨ ខែមិថុនា ស្តីអំពីកូរ៉េខាងជើង តាមសំណើរបស់សហរដ្ឋអាមេរិក បារាំង អង់គ្លេស កូរ៉េខាងត្បូង និងជប៉ុន ដែលចង់ពិភាក្សាអំពីការផ្ទេរអាវុធរបស់ទីក្រុងព្យុងយ៉ាង ព្រោះបានរំលោភលើសេចក្ដីសម្រេចរបស់ក្រុមប្រឹក្សា។ដោយត្រូវបានគេស្គាល់ជាផ្លូវការថា ជាសាធារណរដ្ឋប្រជាមានិតប្រជាធិបតេយ្យកូរ៉េ (DPRK) កូរ៉េខាងជើងបានស្ថិតនៅក្រោមការដាក់ទណ្ឌកម្មរបស់ UN ចាប់តាំងពីឆ្នាំ២០០៦ ពាក់ព័ន្ធនឹងកម្មវិធីនុយក្លេអ៊ែរ និងមីស៊ីលបាលីស្ទិករបស់ខ្លួន ហើយវិធានការទាំងនោះត្រូវបានពង្រឹងក្នុងរយៈពេលជាច្រើនឆ្នាំ ដោយមានការជួយជ្រោមជ្រែងពីរុស្ស៊ី។កាលពីថ្ងៃទី២១ ខែមិថុនា លោក Guterres បានប្រាប់អ្នកសារព័ត៌មានថា៖ «មានទណ្ឌកម្មដែលត្រូវបានអនុម័តដោយក្រុមប្រឹក្សាសន្តិសុខទាក់ទងនឹងកូរ៉េខាងជើង។ ដូច្នវ រាល់ទំនាក់ទំនងដែលប្រទេសណាមួយមានជាមួយកូរ៉េខាងជើង ក្នុងនោះរួមទាំងសហព័ន្ធរុស្ស៊ីផងដែរ ត្រូវតែគោរពទាំងស្រុងនូវទណ្ឌកម្មទាំងនោះ»។ បេសកកម្មរបស់រុស្ស៊ីប្រចាំ UN បានបដិសេធមិនធ្វើអត្ថាធិប្បាយលើការលើកឡើងរបស់លោក Guterres នេះទេ៕

តៃវ៉ាន់ប្រទះឃើញយន្តហោះយោធាចិនចំនួន ៤១គ្រឿង នៅជុំវិញកោះ

2024/06/22 03:31:25 pm        229
Facebook Telegram Linkin
អាជ្ញាធរការពារជាតិរបស់កោះតៃវ៉ាន់ នៅថ្ងៃសៅរ៍ (ទី២២ ខែមិថុនា) នេះ បានប្រាប់ឲ្យដឹងថា ខ្លួនបានប្រទះឃើញយន្តហោះយោធាចិនចំនួន ៤១គ្រឿង នៅជុំវិញកោះនេះ នៅរយៈ ២៤ម៉ោង ពោលគឺ ១ថ្ងៃបន្ទាប់ពីទីក្រុងប៉េកាំង បាននិយាយថា ក្រុមគាំទ្រឯករាជ្យរបស់កោះតៃវ៉ាន់ អាចប្រឈមនឹងទោសប្រហារជីវិត។ប្រទេសចិនបានអះអាងថា កោះតៃវ៉ាន់ដែលគ្រប់គ្រងខ្លួនឯងតាមបែបប្រជាធិបតេយ្យ ជាផ្នែកមួយនៃទឹកដីរបស់ខ្លួន ហើយបាននិយាយថា ខ្លួននឹងមិនបោះបង់ចោលការប្រើប្រាស់កម្លាំង ដើម្បីនាំយកកោះនេះឲ្យមកស្ថិតនៅក្រោមការគ្រប់គ្រងរបស់ទីក្រុងប៉េកាំងនោះឡើយ។ប្រទេសមហាអំណាចសេដ្ឋកិច្ចលំដាប់ទី២ របស់ពិភពលោកមួយនេះ បានបង្កើនសម្ពាធលើទីក្រុងតៃប៉ិ ក្នុងប៉ុន្មានឆ្នាំថ្មីៗនេះ ហើយបានធ្វើសមយុទ្ធ នៅជុំវិញកោះនេះ បន្ទាប់ពីពិធីឡើងកាន់តំណែងរបស់មេដឹកនាំតៃវ៉ាន់ថ្មី លោក Lai Ching-te។នៅថ្ងៃទី២២ ខែមិថុនានេះ អាជ្ញាធរការពារជាតិរបស់ទីក្រុងតៃប៉ិ បាននិយាយថា ខ្លួនបានប្រទះឃើញយន្តហោះយោធាចិនចំនួន ៤១គ្រឿង និងនាវាកងទ័ពជើងទឹកចំនួន ៧គ្រឿង ដែលកំពុងប្រតិបត្តិការ នៅជុំវិញកោះតៃវ៉ាន់ ក្នុងរយៈពេល ២៤ម៉ោង ដោយមានវត្តមានរហូតដល់ម៉ោង ៦ព្រឹក (ម៉ោងក្នុងស្រុក)។ដោយនិយាយសំដៅទៅលើខ្សែបន្ទាត់ដែលខណ្ឌចែកផ្លូវទឹកប្រវែង ១៨០គីឡូម៉ែត្រដែលកាត់ផ្ដាច់កោះតៃវ៉ាន់ពីប្រទេសចិន អាជ្ញាបានឲ្យដឹងនៅក្នុងសេចក្តីថ្លែងការណ៍មួយថា៖ «យន្តហោះចំនួន ៣២គ្រឿង បានឆ្លងកាត់ខ្សែបន្ទាត់មេដ្យាននៃច្រកសមុទ្រតៃវ៉ាន់»។ ក្រសួងបានបន្ថែមថា ខ្លួនបាន «តាមដានស្ថានការណ៍នេះ ហើយឆ្លើយតបទៅតាមនោះ»៕

បណ្ដាញសង្គម

ព័ត៌មានថ្មីៗ

ប្រធានគណៈប្រចាំការនៃគណៈអចិន្ត្រៃយ៍យុវជនគណបក្សប្រជាជនកម្ពុជាថ្នាក់កណ្ដាល និងលេខាទី១ នៃគណៈកម្មាធិការមជ្ឈិមសម្ព័ន្ធយុវជនកុម្មុយនីស្តចិនចុះអនុស្សរណៈស្ដីពីកិច្ចសហប្រតិបត្តិការជាមួយគ្នា
06/26/2026 08:06 PM
Facebook Telegram Linkin
កសិដ្ឋានចិញ្ចឹមសត្វគោ និងជ្រូកនៅប្រទេសបែលហ្ស៊ិក កំពុងជួបការលំបាក ដោយសាររលកកម្តៅ
06/26/2026 08:06 PM
Facebook Telegram Linkin
នយោបាយឈ្នះ-ឈ្នះនាំឱ្យកម្ពុជាសម្រេចបានសន្តិភាព និងការអភិវឌ្ឍដូចសព្វថ្ងៃ
06/26/2026 08:06 PM
Facebook Telegram Linkin
អ៊ីរ៉ង់៖ ការឆ្លងកាត់ច្រកសមុទ្រ Hormuz មិនត្រូវបានធានាទេ បើគ្មាន​ការសម្របសម្រួលជាមួយ​ទីក្រុងតេអេរ៉ង់
06/26/2026 08:06 PM
Facebook Telegram Linkin
ប្រធានាធិបតីជិតឡើងកាន់អំណាចកូឡុំប៊ី ចេញឱសានវាទដល់ក្រុមឧក្រិដ្ឋកម្មប្រដាប់អាវុធ
06/26/2026 08:06 PM
Facebook Telegram Linkin
មន្ត្រីជាន់ខ្ពស់៖ លីបង់ទាមទារឲ្យ​អ៊ីស្រាអែលដកទ័ពទាំងស្រុង ក្នុងកិច្ចព្រមព្រៀងណាមួយ នៅទីក្រុងវ៉ាស៊ីនតោន
06/26/2026 08:06 PM
Facebook Telegram Linkin
កម្ពុជា ប្តេជ្ញាធ្វើការងារជិតស្និទ្ធជាមួយចិន ដើម្បីពង្រីកបន្ថែមទាំងវិសាលភាព និងភាពស៊ីជម្រៅនៃទំនាក់ទំនងទ្វេភាគី
06/26/2026 08:06 PM
Facebook Telegram Linkin
រញ្ជួយដីកម្រិត ៦,៥រ៉ិចទ័រ វាយប្រហារកោះ នៅ​ភាគខាងត្បូងនៃ​ប្រទេស​ហ្វីលីពីន
06/26/2026 08:06 PM
Facebook Telegram Linkin
UN ជំរុញឲ្យមានសេចក្តីថ្លៃថ្នូរសម្រាប់ជនអន្តោប្រវេសន៍ ក្រោយតុលាការអាមេរិកសម្រេចលើជនអន្តោប្រវេសន៍ហៃទី និងស៊ីរី
06/26/2026 08:06 PM
Facebook Telegram Linkin
អ៊ីស្រាអែលទម្លាក់ខិត្តប័ណ្ណ នៅ​ទីក្រុងរបស់​លីបង់ ដោយបញ្ជាឲ្យ​ប្រជាជនចាកចេញ
06/26/2026 08:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.