BTV NEWS

សម្ដេចធិបតីណែនាំអាជ្ញាធរពាក់ព័ន្ធគ្រប់លំដាប់ថ្នាក់ ត្រួតពិនិត្យ និងគ្រប់គ្រងឱ្យបានចំពោះទំនិញគេចពន្ធ និងខូចគុណភាព ហើយត្រូវសហការគ្នាចាត់វិធានការឱ្យបានច្បាស់លាស់

សម្ដេចធិបតីក្រើនរំឭកអាជ្ញាធរពាក់ព័ន្ធគ្រប់លំដាប់ថ្នាក់ត្រូវបន្តបង្ក្រាប Online Scams មិនត្រូវបន្ធូរដៃឡើយ

សម្ដេចតេជោ ហ៊ុន សែន អញ្ជើញជួបពិភាក្សាទ្វេភាគីជាមួយ ឯកឧត្តម លី ឈាង នាយករដ្ឋមន្ត្រីចិន

សម្ដេចតេជោ ហ៊ុន សែន អញ្ជើញចូលក្រាបថ្វាយបង្គុំគាល់ព្រះករុណាព្រះមហាក្សត្រ និងសម្តេចព្រះមហាក្សត្រី

នយោបាយ និង ការអភិវឌ្ឍន៍

រដ្ឋមន្ត្រីសេដ្ឋកិច្ចអាល្លឺម៉ង់៖ ការដំឡើងពន្ធរបស់ EU លើប្រទេសចិន មិនមែនជា «ទណ្ឌកម្ម» ទេ

រដ្ឋមន្ត្រីសេដ្ឋកិច្ចអាល្លឺម៉ង់ លោក Robert Habeck នៅថ្ងៃសៅរ៍ (ទី២២ ខែមិថុនា) នេះ បានប្រាប់មន្ត្រីចិនក្នុងទីក្រុងប៉េកាំងថា ការដំឡើងពន្ធរបស់សហភាពអឺរ៉ុប (EU) លើទំនិញរបស់ប្រទេសចិន មិនមែនជាការដាក់ទណ្ឌកម្មនោះឡើយ។គួរញ្ជាក់ថា ដំណើរទស្សនកិច្ចរបស់លោក Habeck ទៅកាន់ប្រទេសចិននេះ គឺជាលើកដំបូងរបស់មន្ត្រីជាន់ខ្ពស់អឺរ៉ុប ចាប់តាំងពីទីក្រុងប្រ៊ុចសែល បានស្នើឡើងនូវកាតព្វកិច្ចបង់ពន្ធខ្ពស់លើការនាំចូលរថយន្តអគ្គិសនី (EV) ដែលផលិតដោយប្រទេសចិន ដើម្បីប្រយុទ្ធប្រឆាំងនឹងអ្វីដែល EU ចាត់ទុកការឧបត្ថម្ភធនហួសកម្រិត។ហើយនៅមុនការធ្វើដំណើរទៅដល់របស់លោក ប្រទេសចិន កាលពីថ្ងៃសុក្រ (ទី២១ ខែមិថុនា) បានព្រមានថា ការកើនឡើងនូវជម្លោះជាមួយ EU ជុំវិញរថយន្ត EV អាចបង្កឲ្យមានសង្គ្រាមពាណិជ្ជកម្ម។នៅក្នុងសម័យប្រជុំពេញអង្គដំបូងនៃកិច្ចសន្ទនាស្តីពីអាកាសធាតុ និងការផ្លាស់ប្តូរ លោក Habeck បាននិយាយថា៖ «វាមានសារៈសំខាន់ណាស់ ក្នុងការយល់ថា ទាំងនេះមិនមែនជាពន្ធដាក់ទណ្ឌកម្មនោះឡើយ»។ រដ្ឋមន្ត្រីសេដ្ឋកិច្ចរូបនេះបានកត់សម្គាល់ថា ប្រទេសជាច្រើន ដូចជាសហរដ្ឋអាមេរិក ប្រេស៊ីល និងទួរគី បានប្រើប្រាស់ការដំឡើងពន្ធដាក់ទណ្ឌកម្ម ប៉ុន្តែមិនមែន EU នោះទេ។ លោកបានសង្កត់ធ្ងន់ថា៖ «អឺរ៉ុបធ្វើខុសគ្នាពីនោះ»។លោកបានបន្តថា វិធានការប្រឆាំងនឹងកាតព្វកិច្ចណាមួយ ដែលកើតចេញពីការពិនិត្យយ៉ាងល្អិតល្អន់របស់ EU «មិនមែនជាការដាក់ទណ្ឌកម្មនោះទេ» ដោយលោកបានបន្ថែមថា វិធានការបែបនេះ គឺមានគោលបំណងប៉ះប៉ូវអត្ថប្រយោជន៍ដែលទីក្រុងប៉េកាំងបានផ្ដល់ដល់បណ្ដាក្រុមហ៊ុនទាំងនោះ៕

នាវាផ្ទុកយន្តហោះអាមេរិក ទៅដល់កូរ៉េខាងត្បូង ដើម្បីត្រៀមសម្រាប់សមយុទ្ធយោធា

កងទ័ពជើងទឹកកូរ៉េខាងត្បូង បានប្រាប់ឲ្យដឹងថា នាវាផ្ទុកយន្តហោះដើរដោយថាមពលនុយក្លេអ៊ែររបស់សហរដ្ឋអាមេរិក Theodore Roosevelt បានទៅដល់ទីក្រុងកំពង់ផែ Busan របស់ប្រទេសកូរ៉េខាងត្បូងហើយ នៅថ្ងៃសៅរ៍ (ទី២២ ខែមិថុនា) នេះ ដើម្បីត្រៀមសម្រាប់សមយុទ្ធយោធារួមគ្នា ក្នុងខែមិថុនានេះ ជាមួយប្រទេសម្ចាស់ផ្ទះ និងប្រទេសជប៉ុន។គួរបញ្ជាក់ថា អំឡុងកិច្ចប្រជុំកំពូល នៅឯកន្លែងសម្រាកកាយ Camp David របស់ប្រធានាធិបតីអាមេរិក កាលពីខែសីហា ឆ្នាំ២០២៣ មេដឹកនាំនៃប្រទេសទាំង៣ បានព្រមព្រៀងគ្នាធ្វើសមយុទ្ធហ្វឹកហ្វឺនយោធាប្រចាំឆ្នាំ ហើយបានថ្កោលទោសចំពោះ «សកម្មភាពគ្រោះថ្នាក់ និងបង្កហេតុ» របស់ចិន នៅផ្លូវទឹកដែលមានជម្លោះ ក្នុងសមុទ្រចិនខាងត្បូង។ការទៅដល់របស់នាវានេះកើតមានឡើងក្នុងពេលដែលប្រធានាធិបតីរុស្ស៊ីលោក វ្ល៉ាឌីមៀរ ពូទីន ទើបបានបញ្ចប់ដំណើរទស្សនកិច្ចនៅកូរ៉េខាងជើង កាលថ្ងៃទី១៩ ខែមិថុនា ដែលជាលើកដំបូងក្នុងរយៈពេល ២៤ឆ្នាំ ដោយនៅទីនោះលោកបានចុះហត្ថលេខាលើកិច្ចព្រមព្រៀងជាមួយមេដឹកនាំ លោក គីម ជុងអ៊ុន ដែលរួមមានការសន្យាការពារគ្នាទៅវិញទៅមក។ នេះគឺជាការផ្លាស់ប្ដូរដ៏សំខាន់បំផុតមួយរបស់រុស្ស៊ី នៅក្នុងតំបន់អាស៊ីអស់រយៈពេលជាច្រើនឆ្នាំ។ជាមួយគ្នានេះ ការទៅដល់នេះកើតមានឡើងរយៈពេល ៧ខែបន្ទាប់ពីដំណើរទៅដល់កូរ៉េខាងត្បូងរបស់នាវាផ្ទុកយន្តហោះអាមេរិកមួយផ្សេងទៀត គឺ Carl Vinson ដោយនេះគឺការបង្ហាញពីការពង្រីកការរារាំងប្រឆាំងនឹងកម្មវិធីនុយក្លេអ៊ែរ និងមីស៊ីលរបស់កូរ៉េខាងជើង៕

រុស្ស៊ីប្រាប់អាមេរិកថា យើងចាំបាច់ត្រូវពិភាក្សា ប៉ុន្តែអ៊ុយក្រែន ត្រូវតែស្ថិតក្នុងរបៀបវារៈ

វិមានក្រឹមឡាំង បាននិយាយកាលពីថ្ងៃសុក្រថា ប្រទេសរុស្ស៊ី មើលឃើញពីសម្ពាធតម្រូវការចាំបាច់សម្រាប់កិច្ចពិភាក្សាសន្តិសុខជាមួយសហរដ្ឋអាមេរិក ប៉ុន្តែវាត្រូវតែទូលំទូលាយ និងរួមបញ្ចូលប្រធានបទអ៊ុយក្រែនផងដែរ។ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា យើងបើកចំហសម្រាប់ការសន្ទនា ប៉ុន្តែចំពោះកិច្ចសន្ទនាគ្រប់ជ្រុងជ្រោយដ៏ទូលំទូលាយ គ្របដណ្តប់គ្រប់ទិដ្ឋភាពទាំងអស់ រួមទាំងបញ្ហាបច្ចុប្បន្នទាក់ទងទៅនឹងជម្លោះនៅអ៊ុយក្រែនដែលចូលរួមដោយផ្ទាល់របស់សហរដ្ឋអាមេរិកនៅក្នុងជម្លោះនេះ។ សហរដ្ឋអាមេរិក បានច្រានចោលការអះអាងរបស់រុស្ស៊ីដែលថា ដោយបានផ្តល់អាវុធទៅឲ្យអ៊ុយក្រែន ខ្លួនបានក្លាយជាតួអង្គផ្ទាល់នៅក្នុងសង្រ្គាមនេះ។ សហរដ្ឋអាមេរិក និយាយថា ការចរចាណាមួយ ជុំវិញសង្គ្រាម គឺជាបញ្ហាសម្រាប់អ៊ុយក្រែន។ជំហររបស់រុស្ស៊ី ដូចដែលបានលើកឡើងដោយ លោក Peskov ពុំមែនជារឿងថ្មីទេ។ ប៉ុន្តែលោកបានប្រាប់អ្នកសារព័ត៌មានថា បញ្ជីប្រធានបទដែលរុស្ស៊ី និងសហរដ្ឋអាមេរិក ត្រូវការពិភាក្សាកំពុងកើនឡើង ហើយសរុបមក ការសន្ទនានេះគឺត្រូវការយ៉ាងខ្លាំង។ វាត្រូវការ ព្រោះតែបញ្ហាកំពុងកើនឡើង ហើយមានបញ្ហាជាច្រើនជាប់ទាក់ទងទៅនឹងស្ថាបត្យកម្មសន្តិសុខពិភពលោក។តាមទស្សនៈរបស់ទីក្រុងវ៉ាស៊ីនតោន គឺលោកពូទីន ដែលក្នុងឆ្នាំទី៣នៃសង្រ្គាមនៅអ៊ុយក្រែន កំពុងបន្ថែមចូលទៅក្នុងបញ្ជីនៃការព្រួយបារម្ភផ្នែកសន្តិសុខ។ ក្នុងសប្តាហ៍នេះ លោក ពូទីន បានទៅធ្វើទស្សនកិច្ចនៅប្រទេសកូរ៉េខាងជើងដែលមានអាវុធនុយក្លេអ៊ែរ ហើយបានចុះហត្ថលេខាលើកិច្ចព្រមព្រៀងការពារជាតិទៅវិញទៅមកជាមួយមេដឹកនាំ លោក Kim Jong Un និងបាននិយាយថា លោកអាចនឹងផ្គត់ផ្គង់អាវុធរបស់រុស្ស៊ីដល់ប្រទេសកូរ៉េខាងជើង ដើម្បីឆ្លើយតបទៅនឹងការផ្តល់អាវុធរបស់លោកខាងលិច ទៅឲ្យអ៊ុយក្រែន។លោក ពូទីន បានបញ្ជាក់ជាថ្មីថា លោកកំពុងពិចារណាការពិនិត្យឡើងវិញនូវគោលលទ្ធិរបស់រុស្ស៊ី ស្តីពីការប្រើប្រាស់អាវុធនុយក្លេអ៊ែរ។ សន្ធិសញ្ញាគ្រប់គ្រងអាវុធដែលនៅសេសសល់ចុងក្រោយ កំណត់ចំនួនក្បាលគ្រាប់នុយក្លេអ៊ែរជាយុទ្ធសាស្ត្រ ដែលរុស្ស៊ី និងអាមេរិក អាចដាក់ពង្រាយ នឹងត្រូវផុតកំណត់នៅឆ្នាំ ២០២៦។

អភិបាលខេត្តប៉ៃលិនជំរុញអាជ្ញធរដាំដើមក្ងោកតាមដងផ្លូវ ដើម្បីបង្កើនសោភ័ណភាពក្រុង

ប៉ៃលិន៖ នៅក្នុងឱកាសចុះពិនិត្យមើលការរៀបចំសណ្តាបធ្នាប់ និងសោភ័ណភាពរមណីយដ្ឋានធម្មជាតិ ទឹកធ្លាក់ភ្នំខៀវអូរតាវ៉ៅ លោកជំទាវបណ្ទិត បាន ស្រីមុំ អភិបាលខេត្តប៉ៃលិន បានណែនាំដល់មន្ត្រីក្រោម ឱវាទទាំងអស់ ត្រូវបង្កើនការដាំដើមក្ងោក ដើម្បីលើកកម្ពស់សោភ័ណភាពដងផ្លូវ ដែលជាចំណែករួមផ្សំ ដើម្បីទាក់ទាញភ្ញៀវទេសចរជាតិ-អន្តរជាតិ។លោកជំទាវ បានបញ្ជាក់ដែរថា ដោយមើលឃើញពីសក្តានុពល នៃវិស័យទេសចរណ៍ធម្មជាតិ និង ដើម្បីលើកកម្ពស់សោភ័ណភាពរមណីដ្ឋានធម្មជាតិទឹកធ្លាក់ភ្នំខៀវអូរតាវ៉ៅ លោកជំទាវ បានណែនាំឱ្យយុវ ជន ស.ស.យ.ក ខេត្ត សហការជាមួយមន្ត្រីជំនាញ និងអាជ្ញាធរមូលដ្ឋាន រួមគ្នាធ្វើការរៀបចំសណ្តាប់ធ្នាប់ អនាម័យ និងកែលម្អហេដ្ឋារចនាសម័ន្ធថ្មី សម្រាប់ទទួលភ្ញៀវទេសចរ ចូលកម្សាន្តនៅលើទឹកដីខេត្តត្បូង ពេជ្រដ៏តូចច្រឡឹងមួយនេះ។លោកជំទាវ ក៏បានសំណូមពរដល់ប្រជាពលរដ្ឋ និងភ្ញៀវទេសចរទាំងអស់ ដែលចូលកម្សាន្តតាមរម ណីយដ្ឋាននានាក្នុងខេត្តប៉ៃលិន ត្រូវរួមគ្នាសម្អាតអនាម័យបរិស្ថាន ដោយត្រូវវេចខ្ចប់កាកសំណល់សំរាម និងទុកដាក់ឱ្យបានត្រឹមត្រូវ ចៀសវាងបោះចោលសំរាមគ្មានសណ្តាប់ធ្នាប់ ដែលធ្វើឱ្យប៉ះពាល់ដល់សោភ័ណភាព និងអនាម័យសាធារណៈ។ ចំណែក អាជីវករលក់ដូរម្ហូបអាហារនៅតាមរមណីយដ្ឋាននានា ត្រូវ មានអនាម័យ និងតម្លៃសមរម្យ ដើម្បីទាក់ទាញភ្ញៀវទេសចរជាតិ-អន្តរជាតិឱ្យបានកាន់តែច្រើនផងដែរ៕

គម្រោងអភិវឌ្ឍន៍ប្រព័ន្ធធារាសាស្ត្រនៅខេត្តបន្ទាយមានជ័យ នឹងផ្តល់ផលដល់ពលរដ្ឋប្រមាណ ៤២ ២១៣គ្រួសារ នៅថ្ងៃអនាគត

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅថ្ងៃទី២២ ខែមិថុនា ឆ្នាំ ២០២៤នេះ បានបង្ហាញពីគម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ (IDFMP) ខេត្តបន្ទាយមានជ័យ នឹងជួយកាត់បន្ថយពីគ្រោះមហន្តរាយធម្មជាតិ នៃគ្រោះទឹកជំនន់ទឹកភ្លៀងដែលកើតឡើងភ្លាមៗនៅក្នុងតំបន់ និងជំនន់ឆ្លងដែនប្រទេសថៃ និងគ្រោះរាំងស្ងួត ហើយអាចផ្តល់ផលដល់ ប្រជាពលរដ្ឋ និងប្រជាកសិករប្រមាណ ៤២ ២១៣ គ្រួសារ។គម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ (IDFMP) ខេត្តបន្ទាយមានជ័យ ទទួលប្រភពទឹកមកពីតាមបណ្តាអូរ ស្ទឹង នៅតាមបណ្តោយព្រំដែនកម្ពុជា- ថៃ ដែលត្រូវកសាងហេដ្ឋារចនាសម្ព័ន្ធសំខាន់ៗ ដូចជា៖ ប្រឡាយស្រោចស្រព និងដោះទឹកខ្នាតធំចំនួន ៦ខ្សែ មានប្រវែងសរុប ៩២,៦៥គីឡូម៉ែត្រ សំណង់ សិល្បការសរុបចំនួន ២០៨កន្លែង និងស្តារអាងទឹកចំនួន ៣ កន្លែង ( អាងពង្រ អាងវាំងហែង និង អាងកន្សែង) ព្រមទាំងជួសជុលទំនប់តភ្ជាប់អាងទឹកអូរខៃដន ។ គម្រោងនេះ មានលទ្ធភាពស្រោចស្រព ផ្ទៃដីបង្កបង្កើនផលវស្សាសរុបប្រមាណជិត ២០ ០០០ហិកតា និងរដូវប្រាំង ៣៥០០ ហិកតាហើយប្រជាកសិករ ដែលអាចទទួលផលមានចំនួន ៤២ ២១៣ គ្រួសារ ស្ថិតក្នុងឃុំ-សង្កាត់ចំនួន១៧ នៃក្រុងប៉ោយប៉ែត ស្រុកម៉ាឡៃ ស្រុកអូរជ្រៅ និង ក្រុងសិរីសោភ័ណ។គោលបំណងនៃគម្រោងនេះ គឺដើម្បីបង្កើនផលិតភាពកសិកម្ម ជួយកាត់បន្ថយផលប៉ះពាល់ពីគ្រោះមហន្តរាយធម្មជាតិ និងបង្កើនប្រសិទ្ធភាពនៃប្រភពធនធានទឹក ក្នុងការធានាដល់ការផ្គត់ផ្គង់ទឹកគ្រប់គ្រាន់ សម្រាប់ការបង្កបង្កើនផលស្រូវ ដំណាំគ្រប់ប្រភេទ និង សម្រាប់ការប្រើប្រាស់ប្រចាំថ្ងៃ ព្រមទាំងកាត់បន្ថយបាននូវហានិភ័យបណ្តាលមកពីគ្រោះទឹកជំនន់ និងគ្រោះរាំងស្ងួត ដែលនឹងក្លាយជាផ្នែកមួយដ៏សំខាន់ជួយលើកកម្ពស់ដល់ជីវភាពរស់នៅរបស់បងប្អូនប្រជាពលរដ្ឋ និងជំរុញកំណើនសេដ្ឋកិច្ច ស្របតាមយុទ្ធសាស្ត្របញ្ចកោណ-ដំណាក់កាលទី១ នៃរាជរដ្ឋាភិបាលនីតិកាលទី៧ ក្រោមការដឹកនាំប្រកបដោយភាពប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។

កម្មការិនីរោងចក្រម៉ៅការដេរបន្តនៅកម្ពុជាជាច្រើននាក់ មិនទាន់ទទួលបានរបបសន្តិសុខសង្គម

អង្គការអុកស្វាម កាលពីរសៀលថ្ងៃទី២១ មិថុនា ឆ្នាំ២០២៤ បានរៀបចំវេទិកាថ្នាក់ជាតិស្តីពី កិច្ចសន្ទនាគោលនយោបាយ និងផ្សព្វផ្សាយរបាយការណ៍ស្រាវជ្រាវ «ការទទួលបានការងារសមរម្យ និងរបបសន្តិសុខសង្គមក្នុងចំណោមកម្មការិនីរោងចក្រម៉ៅការដេរបន្តនៅកម្ពុជា» ដែលប្រព្រឹត្តិទៅ ក្រោមវត្តមានរបស់ ឯកឧត្តម ហ៊ីវ រស្មី អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ។លោកស្រី ភាណ សោភ័ណ នាយិកានៃអង្គការអុកស្វាម បានមានប្រសាសន៍ថា បន្ទាប់ពីបើកការស្រាវជ្រាវកន្លងមក បានឲ្យឃើញពីចំណុចមួយចំនួនដែលខ្វះខាត ទើបអង្គការត្រូវបន្តសហការជាមួយរាជរដ្ឋាភិបាល ក្រុមហ៊ុនបញ្ជាទិញ អ្នកប្រើប្រាស់ និងភាគីពាក់ព័ន្ធផ្សេងទៀត ដើម្បីធានាថា កម្មករនិយោជិតនៅតាមរោងចក្រម៉ៅការដេរបន្តទទួលបានការងារសមរម្យ និងអត្ថប្រយោជន៍របបសន្តិសុខសង្គមដូចគ្នាទៅនឹងកម្មករនិយោជិតធ្វើការនៅតាមរោងចក្រសហគ្រាសដែលបានចុះបញ្ជីរការដែរ។ ខណៈរោងចក្រកាត់ដេរបន្ត ដើរតួនាទីមួយផ្នែកក្នុងឧស្សាហកម្មកាត់ដេរនៅកម្ពុជា ដែលផ្តល់ឱកាសការងារដល់កម្មករនិយោជិត (ស្រ្តី) ជាច្រើននាក់នៅទូទាំងប្រទេស។ លោកស្រី បន្តថា រោងចក្រទាំងនេះ ភាគច្រើនជាខ្នាតតូច ដែលមានជំនាញជាក់លាក់ទៅលើផ្នែកនានានៃចង្វាក់ផលិតកម្មកាត់ដេរ ចាប់ពីការដេររហូតដល់ការតុបតែងដើម្បីបំពេញតម្រូវការផ្សេងៗ របស់អតិថិជនជាសកល។នៅក្នុងវេទិកា ឯកឧត្តមអនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ឲ្យដឹងថា រដ្ឋាភិបាល នឹងពិនិត្យមើលលើរបាយការណ៍គោលនយោបាយ និងផ្សព្វផ្សាយរបាយការណ៍ស្រាវជ្រាវ «ការទទួលបានការងារសមរម្យ និងរបបសន្តិសុខសង្គមក្នុងចំណោមកម្មការិនីរោងចក្រម៉ៅការដេរបន្តនៅកម្ពុជា» ដើម្បីជាធាតុចូលសម្រាប់ការសម្រេចចិត្តលើគោលនយោបាយពាក់ព័ន្ធ។ ឯកឧត្តម បានបញ្ជាក់បន្ថែមថា បច្ចុប្បន្ននេះ មានកម្មករនិយោជិតចំនួនប្រមាណ ៩៥ម៉ឺននាក់ នៅតាមរោងចក្រទូទាំងប្រទេស។ ក្នុងអំឡុង ៥ខែ ឆ្នាំ២០២៤នេះ ការនាំចេញពីវិស័យកាត់ដេរស្បែកជើង និងសម្ភារៈធ្វើដំណើរមានទំហំទឹកប្រាក់ប្រមាណ ៥,៥ពាន់លានដុល្លារ ដែលកើនឡើងក្នុងអត្រា ២៤% ប្រៀបធៀបទៅនឹងរយៈពេលដូចគ្នានៅឆ្នាំ២០២៣កន្លងទៅ។សូមជម្រាបជូនថា បន្ទាប់ពីបញ្ចប់វេទិកាកិច្ចសន្ទនាគោលនយោបាយ និងផ្សព្វផ្សាយរបាយការណ៍ស្រាវជ្រាវ «ការទទួលបានការងារសមរម្យ និងរបបសន្តិសុខសង្គមក្នុងចំណោមកម្មការិនីរោងចក្រម៉ៅការដេរបន្តនៅកម្ពុជា» អង្គការ អុកស្វាម នឹងផលិតរបាយការណ៍ រួចដាក់ជូនរាជរដ្ឋាភិបាលកម្ពុជាតាមរយៈក្រសួងជំនាញ និងភាគីពាក់ព័ន្ធ ដើម្បីពិចារណាស្វែងរកកិច្ចអន្តរាគមន៍ផ្នែកគោលនយោបាយ និងការកែលម្អលទ្ធភាពនានា ដើម្បីធានាការទទួលបានការងារសមរម្យ និងរបបសន្តិសុខសង្គមក្នុងចំណោមកម្មករនិយោជិត (ស្ត្រី) នៅក្នុងរោងចក្រម៉ៅការដេរបន្តនៅកម្ពុជា៕អត្ថបទ ឈិត បូរ៉ាវី

ឯកឧត្តម សាយ សំអាល់ អំពាវនាវឲ្យគ្រឹះស្ថានហិរញ្ញវត្ថុ ធ្វើជាដៃគូជាមួយរាជរដ្ឋាភិបាល ទ្រទ្រង់សេដ្ឋកិច្ចកម្ពុជា

ភ្នំពេញ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណាង់ បានអំពាវនាវទៅដល់គ្រប់ធនាគារ និងមីក្រូហិរញ្ញវត្ថុ ធ្វើជាដៃគូជាមួយរាជរដ្ឋាភិបាលកម្ពុជា ក្នុងការកសាង និងទ្រទ្រង់ខឿនសេដ្ឋកិច្ចជាតិ និងចូលរួមអភិវឌ្ឍន៍ប្រទេស ឲ្យកាន់តែរីកចម្រើន ។ក្នុងកិច្ចប្រជុំជាមួយសមាគមធនាគារ និងសមាគមមីក្រូហិរញ្ញវត្ថុ នៅរសៀលថ្ងៃទី២១ ខែមិថុនា ឆ្នាំ២០២៤នេះ ឯកឧត្តមឧបនាយករដ្ឋមន្ត្រី មានប្រសាសន៍ថា ពាក់ព័ន្ធនឹងវិស័យដីធ្លី រាជរដ្ឋាភិបាលកម្ពុជា ដែលមានក្រសួងដែនដីជាសេនាធិការ កំពុងពន្លឿនការវាស់វែងចុះបញ្ជី ដីធ្លីជាប្រព័ន្ធនៅទូទាំងប្រទេស និងធ្វើយ៉ាងណាខិតខំប្រឹងប្រែងឲ្យចប់ នៅត្រឹមអាណត្តិទី៧ នេះ ។ឯកឧត្តម បានបន្តថា បន្ទាប់ពីនោះមក នឹងមានការរៀបចំប្លង់គោល ដើម្បីអភិវឌ្ឍន៍ទីក្រុង ឲ្យកាន់តែរីកចម្រើន មានភាពទាក់ទាញ ស្មាតស៊ីធី (Smart City) និងមានភាពបៃតងជាដើម ជាមួយនេះ រាជរដ្ឋាភិបាល ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា នឹងបន្តអភិវឌ្ឍន៍កម្ពុជា ឲ្យក្លាយជារដ្ឋទំនើប ប្រកបដោយភាពរឹងមាំ ឆ្លាតវៃ រស់រវើក និងច្នៃប្រឌិត ដោយមានយុទ្ធសាស្រ្តបញ្ចកោណ ដំណាក់កាលទី១ គោលនយោបាយទាំង៦ និងវិធានគន្លឹះទាំង៥ ជាផែនទីឯកភាពនៃចក្ខុវិស័យដ៏វែងឆ្ងាយ ដើម្បីកម្ពុជាមានភាពម្ចាស់ការ រក្សាបានឯករាជ្យក្នុងនាមរដ្ឋអធិបតេយ្យ និងដឹកនាំនាវាកម្ពុជា ឈានឆ្ពោះទៅកាន់វឌ្ឍនភាព និងវិបុលភាព ។ទន្ទឹមនឹងចក្ខុវិស័យទាំងនេះ ឯកឧត្តម សាយ សំអាល់ បានចាត់ទុកធនាគារ មីក្រូហិរញ្ញវត្ថុ និងភ្នាក់ងារហិរញ្ញវត្ថុទាំងអស់ ជាដៃគូរយុទ្ធសាស្រ្តដ៏សំខាន់មួយ ក្នុងការទ្រទ្រង់ឧស្សាហកម្មហិរញ្ញវត្ថុ និងកៀងគរចំណូល និងសារពើពន្ធមិនមែនធនាគារ ឧស្សាហកម្មអចលនទ្រព្យ និងឧស្សាហកម្មគ្រឿងផ្គុំសំណង់ ព្រមទាំងបង្កើតនូវវប្បធម៌ នៃការផ្តល់កម្ចីដោយមានវត្ថុធានា ដែលបានរួមចំណែកយ៉ាងសំខាន់ ក្នុងការកសាង និងទ្រទ្រង់ខឿនសេដ្ឋកិច្ចកម្ពុជា និងចូលរួម អភិវឌ្ឍភូមិឋាននៅកម្ពុជា ឲ្យមានភាពក្សេមក្សាន្ត ។ ជាមួយនេះ ឯកឧត្តមឧបនាយករដ្ឋមន្ត្រី ក៏បានលើកទឹកចិត្ត និងជំរុញសមាគមធនាគារ និងសមាគមមីក្រូហិរញ្ញវត្ថុ អាចលើកសំណូមពរនានា ដែលពាក់ព័ន្ធនឹងវិស័យអចលនទ្រព្យ ដើម្បីឲ្យមន្ត្រីជំនាញរបស់ក្រសួងជួយដោះស្រាយ ៕អត្ថបទ បាន សុខរិទ្ធិ

ធនាគារពិភពលោកផ្តល់ឥនទានដល់កម្ពុជា ចំនួន១៤៥លានដុល្លារ សម្រាប់កែលម្អហេដ្ឋារចនាសម្ព័ន្ធទឹក

ធនាគារពិភពលោកនៅថ្ងៃទី២១ ខែមិថុនា ឆ្នាំ២០២៤នេះ បានសម្រេចអនុម័តការវិនិយោគថ្មីមួយទៀត ដោយមានទឹកប្រាក់ចំនួន១៤៥លានដុល្លារអាមេរិកដល់កម្ពុជា សម្រាប់គម្រោងកែលម្អហេដ្ឋារចនាសម្ព័ន្ធផ្គត់ផ្គង់ទឹក ដែលគម្រោងនេះ ត្រូវបានគេរំពឹងថា នឹងផ្តល់អត្ថប្រយោជន៍ដល់ប្រជាជនកម្ពុជាជាង១១៣ ០០០នាក់។យោងតាមសេចក្តីប្រកាសព័ត៌មានរបស់ធនាគារពិភពលោក (World Bank) ដែលទូរទស្សន៍BTVទទួលបាននាថ្ងៃទី២២ ខែមិថុនានេះ បានឲ្យដឹងថា ក្រោមជំនួយឥណទាន(កម្ចីការប្រាក់ទាប) ចំនួន១៤៥លានដុល្លារអាមេរិក ពីសមាគមអភិវឌ្ឍន៍អន្តរជាតិ (IDA) របស់ធនាគារ ពិភពលោកនេះ គឺជា«គម្រោងកែលម្អសន្តិសុខទឹកនៅកម្ពុជា (Cambodia Water Security ImprovementProject) នឹងធ្វើឱ្យសន្តិសុខទឹកកាន់តែមានភាពប្រសើរឡើង, ជួយបង្កើនផលិតភាពកសិកម្ម និងកសាងភាពធន់ទៅនឹងហានិភ័យអាកាសធាតុ។ថ្លែងតាមរយៈសេចក្តីប្រកាសព័ត៌មានខាងលើនេះលោកស្រី ម៉ារីយ៉ាម សាលីម ប្រធានគ្រប់គ្រងធនាគារពិភពលោកប្រចាំនៅកម្ពុជាបានលើកឡើងថា «គម្រោង នេះនឹងជួយប្រទេសកម្ពុជាឱ្យមានសន្តិសុខទឹកប្រកបដោយចីរភាព និងសម្រេចបានផលិតភាពកសិកម្មកាន់តែច្រើន។ ការវិនិយោគនៅពេលនេះទៅលើភាពធន់ទៅនឹងអាកាសធាតុ, ការធ្វើផែនការ និងការរៀបចំហេដ្ឋារចនាសម្ព័ន្ធឱ្យកាន់តែប្រសើរឡើង មិនត្រឹមតែអាចឆ្លើយតបបានភ្លាមៗទៅនឹងតម្រូវការទឹករបស់កសិករ និងគ្រួសារកម្ពុជាប៉ុណ្ណោះទេ ប៉ុន្តែថែមទាំងធ្វើជាមូលដ្ឋានគ្រឹះសម្រាប់ការផ្តល់សេវាទឹករយៈពេលវែងផងដែរ»។ទោះបីជាប្រទេសកម្ពុជាមានប្រភពទឹកច្រើនក៏ដោយ ភាពខុសគ្នានៃការធ្លាក់ភ្លៀងតាមរដូវ និងតាមតំបន់នៅក្នុងប្រទេស បានបង្កបញ្ហាប្រឈមជាច្រើនដល់ការផ្គត់ផ្គង់ទឹកនៅក្នុងទីក្រុង និងនៅតាមទីជនបទ។ តាមរយៈការព្យាករណ៍អាកាសធាតុបានឱ្យដឹងថា ទឹកជំនន់ និងភាពគ្រោះរាំងស្ងួត នឹងមានកាន់តែញឹកញាប់ និងសភាពកាន់តែធ្ងន់ធ្ងរ ដែលដាក់សម្ពាធកាន់តែខ្លាំងទៅលើសមត្ថភាពរបស់ប្រទេស ក្នុងការគ្រប់គ្រងធនធានទឹកសាបរបស់ខ្លួន។ បញ្ហានេះនឹងជះឥទ្ធិពលទៅលើផលិតកម្មស្បៀង និងកំណើនសេដ្ឋកិច្ច។តាមសេចក្តីប្រកាសព័ត៌មានរបស់ធនាគារពិភពលោក បានបញ្ជាក់ឲ្យដឹងទៀតថា គម្រោងនេះនឹងត្រូវអនុវត្តក្នុងរយៈពេលប្រាំឆ្នាំ ដោយក្រសួងធនធានទឹក និងឧតុនិយម និងក្រសួងកសិកម្ម រុក្ខាប្រមាញ់ និងនេសាទ។ គម្រោងនឹងពង្រឹងការគ្រប់គ្រងធនធានទឹក តាមរយៈការពង្រីកស្ថានីយជលសាស្ត្រ, ការធ្វើបច្ចុប្បន្នភាពគោលនយោបាយ និងបទប្បញ្ញត្តិ, ការរៀបចំផែនការគ្រប់គ្រងអាងទន្លេដែលមានព័ត៌មានអំពីអាកាសធាតុ និងការពង្រឹងការបំពេញមុខងាររបស់អាជ្ញាធរទឹកថ្នាក់ជាតិ និងថ្នាក់ខេត្ត។ប្រព័ន្ធផ្គត់ផ្គង់ទឹកសម្រាប់គ្រួសារ និងប្រព័ន្ធធារាសាស្រ្ត នឹងត្រូវបានស្តារឡើងវិញ និងកែលម្អឱ្យប្រសើរឡើង ហើយសហគមន៍កសិករអ្នកប្រើប្រាស់ទឹកនឹងទទួលបានការបណ្តុះបណ្តាល និងជំនួយបច្ចេកទេសតាមរយៈគម្រោង សម្រាប់ធ្វើប្រតិបត្តិការ និងការថែទាំហេដ្ឋារចនាសម្ព័ន្ធដែលត្រូវបានកែលម្អឡើងវិញ។ តាមរយៈ មន្ទីរកសិកម្ម រុក្ខាប្រមាញ់ និងនេសាទ ថ្នាក់ជាតិ និងថ្នាក់ខេត្ត វិធានការនានានឹងត្រូវធ្វើឡើងដើម្បីជួយកសិករឱ្យចេះចាប់យកបច្ចេកវិទ្យាឆ្លាតវៃអាកាសធាតុ សម្រាប់បង្កើនផលិតភាព និងកាត់បន្ថយការបំភាយឧស្ម័ននៅក្នុងវិស័យកសិកម្មជាដើម៕អត្ថបទបាន ចក់

រដ្ឋលេខាធិការដ្ឋានអាកាសចរណ៍ស៊ីវិល ជម្រាបជូនគណៈកម្មការរដ្ឋសភាពីផែនការការងារ និងវឌ្ឍនភាពនៃការដឹកជញ្ជូនតាមផ្លូវអាកាស សម្រាប់នីតិកាលទី៧នៃរដ្ឋសភា

នៅវិមានរដ្ឋសភា នាព្រឹកថ្ងៃទី២០ ខែមិថុនា ឆ្នាំ២០២៤ គណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្រ្ត បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា (គណៈកម្មការទី៩) ដឹកនាំដោយលោកជំទាវ និន សាផុន ប្រធានគណៈកម្មការ ព្រមទាំងតំណាងមកពីគណៈកម្មការជំនាញផ្សេងៗទៀតនៃរដ្ឋសភា បានជួបប្រជុំពិភាក្សាការងារជាមួយរដ្ឋលេខាធិការដ្ឋានអាកាសចរណ៍ស៊ីវិល ដឹកនាំដោយឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីរដ្ឋលេខាធិការដ្ឋានអាកាសចរណ៍ស៊ីវិល។ ជាកិច្ចចាប់ផ្តើមលោកជំទាវ និន សាផុន បានជម្រាបជូនថ្នាក់ដឹកនាំរដ្ឋលេខាធិការដ្ឋានអាកាសចរណ៍ស៊ីវិលថា កិច្ចប្រជុំនាពេលនេះ គឺក្នុងគោលបំណងដើម្បីឈ្វេងយល់ពីវឌ្ឍនភាពការងារបស់រដ្ឋលេខាធិការដ្ឋានអាកាសចរណ៍ស៊ីវិល បញ្ហាប្រឈម ផែនការការងារ និងប្រសិទ្ធភាពនៃការប្រតិបត្តិច្បាប់ និងលិខិតបទដ្ឋានគតិយុត្តនានា ដែលពាក់ព័ន្ធនឹងសមត្ថកិច្ចទទួលខុសត្រូវរបស់រដ្ឋលេខាធិការដ្ឋានអាកាសចរណ៍ស៊ីវិល។ លោកជំទាវ និន សាផុន បានបន្តថា កិច្ចប្រជុំនេះមិនមែនជាកិច្ចប្រជុំសួរដេញដោល ត្រួតពិនិត្យ និងអធិការកិច្ចលើស្ថាប័នរាជរដ្ឋាភិបាលនោះទេ គោលបំណងសំខាន់គឺ ឈ្វេងយល់នូវវិស័យការងារដែលជាសមត្ថកិច្ចទទួលខុសត្រូវរបស់គណៈកម្មការទី៩ នៃរដ្ឋសភា ដើម្បីរួមសហការគ្នារវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិ ជំរុញការអនុវត្តន៍កម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលនីតិកាលទី៧ នៃរដ្ឋសភា។ ឯកឧត្តមបណ្ឌិត ម៉ៅហាវណ្ណាល់ បានជម្រាបជូនកិច្ចប្រជុំថា ស្របទៅតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧ ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានជំរុញឱ្យមានកំណើនអ្នកធ្វើដំណើរ និងការដឹកជញ្ជូនទំនិញតាមផ្លូវអាកាស។រដ្ឋលេខាធិការដ្ឋានអាកាសចរណ៍ស៊ីវិល បានបន្តអនុវត្តគោលនយោបាយបើកចំហជើងមេឃ ពង្រឹងសុវត្ថិភាព និងសន្តិសុខអាកាសចរណ៍ ពង្រឹងនិងពង្រីកហេដ្ឋារចនាសម្ព័ន្ធអាកាសយានដ្ឋានជាតិ និងអន្តរជាតិ ពង្រឹងផ្នែកសេវាកម្មនាំផ្លូវអាកាស ការធ្វើទំនើបកម្មប្រព័ន្ធនាំផ្លូវហោះហើរ ការពង្រឹងនិងពង្រីកកិច្ចសហប្រតិបត្តិការអន្តរជាតិ ទាំងទ្វេភាគី និងពហុភាគី ព្រមទាំងបន្តការជំរុញឱ្យមានកិច្ចប្រឹងប្រែងបង្កើនការហោះហើរត្រង់មកកាន់កម្ពុជា ទាំងក្នុងតំបន់ តំបន់មជ្ឈឹមបូព៌ា និងជាពិសេសអឺរ៉ុប ការពង្រឹងក្របខ័ណ្ឌច្បាប់ បទប្បញ្ញត្តិ កិច្ចព្រមព្រៀង កិច្ចសន្យាសម្បទាន ដើម្បីជំរុញឱ្យមានកំណើនចំនួនអ្នកធ្វើដំណើរនិងទំនិញតាមផ្លូវអាកាស និងស្របតាមបទដ្ឋានរបស់អង្គការអាកាសចរណ៍ស៊ីវិលអន្តរជាតិ (ICAO)។ ឯកឧត្តមបណ្ឌិត ម៉ៅ ហាវណ្ណាល់បានបន្តថា រដ្ឋលេខាធិការដ្ឋានអាកាសចរណ៍ស៊ីវិល បានកំណត់គោលដៅច្បាស់លាស់លើការពង្រឹងនិងពង្រីកកិច្ចព្រមព្រៀងសេវាកម្មដឹកជញ្ជូនតាមផ្លូវអាកាស ជាមួយបណ្តាប្រទេសសំខាន់ៗជាលក្ខណៈទ្វេភាគី និងជាមួយបណ្តាប្រទេសជាសមាជិកអាស៊ាន ព្រមទាំងដៃគូសន្ទនាអាស៊ានជាលក្ខណៈពហុភាគី។ ក្រោយពីឯកឧត្តមរដ្ឋមន្ត្រី បានជម្រាបជូនគណៈកម្មការទាំង១០របស់រដ្ឋសភារួចហើយ លោកជំទាវ និន សាផុន ប្រធានគណៈកម្មការទី៩នៃរដ្ឋសភា បានថ្លែងការកោតសរសើរចំពោះរបាយការណ៍ដ៏ល្អិតល្អន់ ក្បោះក្បាយ និងការបំភ្លឺនូវសំណួរឈ្វេងយល់របស់ ឯកឧត្តមរដ្ឋមន្ត្រី និងសហការី ជូនអង្គប្រជុំ ដែលជាធាតុចូលយ៉ាងសំខាន់សម្រាប់គណៈកម្មការជំនាញនៃរដ្ឋសភា មានមូលដ្ឋានក្នុងការបំពេញតួនាទីស្នូលសំខាន់ៗគឺតួនាទីនីតិកម្ម តួនាទីត្រួតពិនិត្យ តួនាទីជាអ្នកតំណាង និងជាពិសេសការបំពេញតួនាទីជាសេនាធិការរបស់រដ្ឋសភា។ លោកជំទាវ និន សាផុន បានវាយតម្លៃខ្ពស់ចំពោះការខិតខំយកចិត្តទុកដាក់បំពេញការងារ និងតួនាទីប្រកបដោយវិជ្ជាជីវៈ និងប្រកបដោយការទទួលខុសត្រូវខ្ពស់ ក្នុងការបន្តមរតកសមិទ្ធផលនៃបិតាសន្តិភាពរបស់កម្ពុជា គឺសម្តេចអគ្គមហាសេនាបតីតេជោ ហ៊ុន សែន ដែលសម្តេចតេជោបានតស៊ូលះបង់គ្រប់បែបយ៉ាងដើម្បីរំដោះជាតិ និងអភិវឌ្ឍន៍ប្រទេសរហូតដល់ទទួលបានឯកភាពជាតិ និងសុខសន្តិភាពពេញលេញ។ ជាពិសេស ការអនុវត្តន៍នូវ «គោលនយោបាយ បើកចំហរជើងមេឃ» របស់សម្តេចតេជោ ហ៊ុន សែន ដែលបានដាក់ចេញនៅថ្ងៃទី៦ ខែធ្នូ ឆ្នាំ២០០២ ជាសមិទ្ធផលមិនអាចបដិសេធបានរបស់សម្តេច គឺជាជោគជ័យមិនអាចកាត់ថ្លៃបានសម្រាប់ប្រជាជនកម្ពុជា។ ហើយបានបន្តដំណើរមកដល់សហសម័យកម្ពុជា ដែលជាយុគសម័យទំនើបនៃការបន្តដំណើររីកចម្រើនទៅមុខ ព្រមទាំងការដាក់ចេញនូវផែនការសកម្មភាពការងារ និងទិសដៅការងារបន្ត ដើម្បីឈានទៅសម្រេចបានសន្ទុះនៃកំណើនសេដ្ឋកិច្ច និងកសាងមូលដ្ឋានគ្រឹះឆ្ពោះទៅសម្រេចបានចក្ខុវិស័យកម្ពុជា២០៥០ ស្របតាមកម្មវិធីនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយភាពឈ្លាសវៃ និងគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕

ឯកឧត្តមបណ្ឌិត ម៉ឹង មករា ជំរុញឲ្យមន្រ្តីស្រុកមេមត់ នាំគ្នាដាំកូនឈើ និងរក្សាបរិស្ថានអនាម័យល្អ

ឯកឧត្តមបណ្ឌិត ម៉ឹង មករា រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងាររាជរដ្ឋាភិបាលចុះមូលដ្ឋាន ស្រុកមេមត់ បានចុះពិនិត្យមើលស្ថានភាពការលក់ ដូរ និងសួរសុខទុក្ខបងប្អូនប្រជាពលរដ្ឋនៅក្នុងផ្សារមេមត់ ក្នុងស្រុកមេមត់ ខេត្តត្បូងឃ្មុំ ព្រមទាំងជម្រុញជំរុញគោលនយោបាយ "បរិស្ថានល្អ" ដោយចាប់ផ្ដើមយុទ្ធនាការឲ្យមន្រ្តីសាលាស្រុកមេមត់ នាំគ្នាដាំកូនឈើ និងថែរក្សាបរិស្ថានអនាម័យល្អ។ឯកឧត្តមបណ្ឌិត ម៉ឹង មករា បានគូសរំលេចថា ក្រោយពីមានសេចក្ដីសម្រេច ចាត់តាំងក្រុមការងាររាជរដ្ឋាភិបាលចុះមូលដ្ឋាន ខេត្តត្បូងឃ្មុំ នៅថ្ងៃទី១៧ ខែមករា ឆ្នាំ២០២៤ និងការណែនាំដ៏ខ្ពង់ខ្ពស់ពីសំណាក់ ឯកឧត្តមបណ្ឌិត អៀង សុផលែ្លត រដ្ឋមន្ត្រីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ ក្រុមការងាររាជរដ្ឋាភិបាលចុះមូលដ្ឋានស្រុកមេមត់ បានដឹកនាំជំរុញគោលនយោបាយ "បរិស្ថានល្អ" ដោយចាប់ផ្ដើមយុទ្ធនាការដាំកូនឈើដោយច្រើនដែលអាចធ្វើទៅបាននៅក្នុងមូលដ្ឋានស្រុកមេមត់ និងមិនឲ្យមានសំរាមតាមភូមិឃុំ។ ជាក់ស្ដែង រដ្ឋបាលស្រុកមេមត់បានចាប់ផ្ដើមអនុវត្តមិនឲ្យមានសំរាមនៅមុខសាលាស្រុកមេមត់ តាមដងផ្លូវជាតិលេខ៧ ចម្ងាយជាងពីរគីឡូម៉ែត្ររួចស្រេចទៅហើយ។ គោលនយោបាយយុទ្ធនាការ "បរិស្ថានល្អ" មិនត្រឹមតែជួយកាត់បន្ថយការប្រែប្រួលអាកាសធាតុ លើកកំពស់សុខភាពប្រព័ន្ធអេកូឡូស៊ី និងកែលម្អគុណភាពបរិស្ថានទាំងមូលនោះទ "បរិស្ថានល្អ" គឺមាន សារៈសំខាន់សម្រាប់ប្រជាពលរដ្ឋរ ដែលជាមូលដ្ឋានគ្រឹះនាំមកនូវ វិបុលភាពសេដ្ឋកិច្ច សុខភាពសាធារណៈ និងភាពសុខដុមរមនាក្នុងសង្គម។ឯកឧត្តមបណ្ឌិត បានបន្តថ្លែងថា បេសកកម្មចម្បងរបស់ក្រុមការងារថ្នាក់ជាតិចុះមូលដ្ឋានស្រុកមេមត់ គឺការរួមចំណែកជាមួយរាជរដ្ឋាភិបាលកម្ពុជា ផ្សព្វផ្សាយនិងអនុវត្តនូវគោលនយោបាយសំខាន់ៗនៃកម្មវិធីនយោបាយ "យុទ្ធសាស្ត្របញ្ចកោណ-ដំណាក់កាលទី១" ដែលជាកម្មវិធីនយោបាយរបស់ រាជរដ្ឋាភិបាលអាណត្តិទី៧ សម្រាប់ការកសាង និងការពារជាតិមាតុភូមិកម្ពុជា។ក្រុមការងាររាជរដ្ឋាភិបាលចុះមូលដ្ឋានស្រុកមេមត់ ត្រូវសហការគ្រប់គ្រងសភាពការណ៍នៅមូលដ្ឋាន ដើម្បីពង្រឹង និងលើកកម្ពស់ការទទួលខុសត្រូវរបស់អាជ្ញាធរ កងកម្លាំងមានសមត្ថកិច្ចនៅក្នុងមូលដ្ឋាន សំដៅបំពេញការងារបម្រើប្រជាពលរដ្ឋប្រកបដោយការទទួលខុសត្រូវ និងប្រសិទ្ធភាពព្រមទាំងខិតខំចូលរួមសហការដោះស្រាយឆ្លើយតបបញ្ហាប្រឈមនានា ជាពិសេស បញ្ហាប្រឈមពាក់ព័ន្ធ "ជីវភាពរស់នៅរបស់ប្រជាពលរដ្ឋនៅមូលដ្ឋាន"៕

បណ្ដាញសង្គម

ព័ត៌មានថ្មីៗ

ប្រធានគណៈប្រចាំការនៃគណៈអចិន្ត្រៃយ៍យុវជនគណបក្សប្រជាជនកម្ពុជាថ្នាក់កណ្ដាល និងលេខាទី១ នៃគណៈកម្មាធិការមជ្ឈិមសម្ព័ន្ធយុវជនកុម្មុយនីស្តចិនចុះអនុស្សរណៈស្ដីពីកិច្ចសហប្រតិបត្តិការជាមួយគ្នា

កសិដ្ឋានចិញ្ចឹមសត្វគោ និងជ្រូកនៅប្រទេសបែលហ្ស៊ិក កំពុងជួបការលំបាក ដោយសាររលកកម្តៅ

នយោបាយឈ្នះ-ឈ្នះនាំឱ្យកម្ពុជាសម្រេចបានសន្តិភាព និងការអភិវឌ្ឍដូចសព្វថ្ងៃ

អ៊ីរ៉ង់៖ ការឆ្លងកាត់ច្រកសមុទ្រ Hormuz មិនត្រូវបានធានាទេ បើគ្មានការសម្របសម្រួលជាមួយទីក្រុងតេអេរ៉ង់

ប្រធានាធិបតីជិតឡើងកាន់អំណាចកូឡុំប៊ី ចេញឱសានវាទដល់ក្រុមឧក្រិដ្ឋកម្មប្រដាប់អាវុធ

មន្ត្រីជាន់ខ្ពស់៖ លីបង់ទាមទារឲ្យអ៊ីស្រាអែលដកទ័ពទាំងស្រុង ក្នុងកិច្ចព្រមព្រៀងណាមួយ នៅទីក្រុងវ៉ាស៊ីនតោន

កម្ពុជា ប្តេជ្ញាធ្វើការងារជិតស្និទ្ធជាមួយចិន ដើម្បីពង្រីកបន្ថែមទាំងវិសាលភាព និងភាពស៊ីជម្រៅនៃទំនាក់ទំនងទ្វេភាគី

រញ្ជួយដីកម្រិត ៦,៥រ៉ិចទ័រ វាយប្រហារកោះ នៅភាគខាងត្បូងនៃប្រទេសហ្វីលីពីន

UN ជំរុញឲ្យមានសេចក្តីថ្លៃថ្នូរសម្រាប់ជនអន្តោប្រវេសន៍ ក្រោយតុលាការអាមេរិកសម្រេចលើជនអន្តោប្រវេសន៍ហៃទី និងស៊ីរី

អ៊ីស្រាអែលទម្លាក់ខិត្តប័ណ្ណ នៅទីក្រុងរបស់លីបង់ ដោយបញ្ជាឲ្យប្រជាជនចាកចេញ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍