នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%
សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាល​ដែលកំពុង​ធ្វើកិច្ច​ការងារ​យ៉ាង​សកម្ម​ស្វែង​រក​ដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥
សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ​ និង ការអភិវឌ្ឍន៍

ទួរគី នឹងចូលរួមក្នុងសំណុំរឿងប្រល័យពូជសាសន៍របស់អាហ្វ្រិកខាងត្បូងប្រឆាំងអ៊ីស្រាអែល នៅតុលាការពិភពលោក

2024/05/02 01:00:25 pm        231
Facebook Telegram Linkin
រដ្ឋមន្ត្រីការបរទេសទួរគី លោក ហាកាន ហ្វីដាន ( Hakan Fidan) បាននិយាយកាលពីថ្ងៃពុធថា ប្រទេសទួរគី នឹងចូលរួមក្នុងសំណុំរឿងប្រល័យពូជសាសន៍របស់អាហ្វ្រិកខាងត្បូងប្រឆាំងនឹងអ៊ីស្រាអែលនៅតុលាការយុត្តិធម៌អន្តរជាតិ (ICJ)។លោក ហ្វីដាន បាននិយាយនៅក្នុងសន្និសីទសារព័ត៌មានរួមគ្នាជាមួយរដ្ឋមន្ត្រីការបរទេសឥណ្ឌូនេស៊ី លោកស្រី រីណូ ម៉ាស៊ូឌី ( Retno Marsudi) នៅទីក្រុងអង់ការ៉ាថា៖«នៅពេលបញ្ចប់អត្ថបទផ្លូវច្បាប់នៃការងាររបស់យើង យើងនឹងបញ្ជូនសេចក្តីប្រកាសអំពីការអន្តរាគមន៍ជាផ្លូវការ នៅចំពោះមុខតុលាការ ICJ ដោយមានគោលបំណងអនុវត្តការសម្រេចចិត្តនយោបាយនេះ»។លោកបានបន្តថា៖ «ប្រទេសទួរគី នឹងបន្តគាំទ្រប្រជាជនប៉ាឡេស្ទីន គ្រប់កាលៈទេសៈ។កាលពីខែមករា តុលាការ ICJ បានបញ្ជាឲ្យអ៊ីស្រាអែលបដិសេធរាល់សកម្មភាពដែលអាចស្ថិតនៅក្រោមអនុសញ្ញាប្រល័យពូជសាសន៍ និងធានាឲ្យកងទ័ពរបស់ខ្លួនមិនប្រព្រឹត្តអំពើប្រល័យពូជសាសន៍ប្រឆាំងនឹងប៉ាឡេស្ទីន បន្ទាប់ពីអាហ្វ្រិកខាងត្បូង បានចោទប្រកាន់អ៊ីស្រាអែលពីអំពើប្រល័យពូជសាសន៍ដឹកនាំដោយរដ្ឋ នៅក្នុងតំបន់ហ្កាហ្សា។កាលពីខែមករា លោកប្រធានាធិបតី តាយីប អឺដូហ្កាន់ (Tayyip Erdogan) បាននិយាយថា ប្រទេសទួរគី កំពុងផ្តល់ឯកសារសម្រាប់សំណុំរឿងនេះ នៅតុលាការ ICJ ដែលត្រូវបានគេស្គាល់ថា ជាតុលាការពិភពលោក។អ៊ីស្រាអែល និងសម្ព័ន្ធមិត្តលោកខាងលិច បានពណ៌នាការចោទប្រកាន់នេះថា គ្មានមូលដ្ឋាន។ សេចក្តីសម្រេចចុងក្រោយក្នុងសំណុំរឿងរបស់អាហ្វ្រិកខាងត្បូងនៅតុលាការ ICJ នៅទីក្រុងឡាអេ អាចចំណាយពេលរាប់ឆ្នាំ។

សម្ដេចធិបតី ណែនាំដល់ក្រសួងស្ថាប័នទាំងអស់ផ្ដល់បរិយាកាសកក់ក្ដៅដល់អ្នកវិនិយោគនៅកម្ពុជា

2024/05/02 12:55:00 pm        260
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបង្ហាញនូវមោទនភាពជាខ្លាំងដែលបានឃើញពីវឌ្ឍនភាពនៃវិស័យឧស្សាហកម្មនៅកម្ពុជា ជាពិសេសតាមរយៈនៃការខិតខំរបស់រាជរដ្ឋាភិបាលទាំងអាណត្តិចាស់ និងអាណត្តិថ្មី ដែលសម្តេចតែងតែខិតខំគៀគររកការវិនិយោគមកកម្ពុជា ហើយសម្តេចក៏បានបញ្ជាក់ថា ការខិតខំរបស់សម្តេចឱ្យគេសម្រេចចិត្តមកថ្មីគឺសំខាន់ ប៉ុន្តែសំខាន់ជាងនេះ គឺធ្វើឱ្យអ្នកដែលមកហើយមានភាពកក់ក្តៅ។សម្តេចធិបតីនាយករដ្ឋមន្ត្រី បានបង្ហាញនូវទំនុកចិត្តដល់វិនិយោគិនបែបនេះ ខណ:អញ្ជើញ ជាអធិបតីក្នុងពិធីសម្ពោធដាក់ឱ្យដំណើរការជាផ្លូវការរោងចក្រផ្គុំ និងដំឡើងរថយន្តតូយ៉ូតា តូយ៉ូតាស៊ុយស៊ូ មេនូហ្វេកធឺរីង(ខេមបូឌា)ដែលមានទីតាំងស្ថិតនៅតំបន់សេដ្ឋកិច្ចពិសេស រ៉ូយ៉ាល់គ្រុប ក្នុងរាជធានីភ្នំពេញ នាព្រឹកថ្ងៃទី២ ខែឧសភានេះ។សម្ដេច បានបញ្ជាក់យ៉ាងដូច្នេះថា រោងចក្រផ្គុំ និងដំឡើងរថយន្តតូយ៉ូតាដែលជាប្រភេទរថយន្ត​មានតម្រូវការ​និងប្រជាប្រិយនៅក្នុងប្រទេសកម្ពុជា បានបោះទុនវិនិយោគរហូតដល់​ប្រមាណ ៣៦,៨លានដុល្លារ មានបុគ្គលិកសរុប ១៥០នាក់ ជាមួយនឹងមានសមត្ថភាពដំឡើងរថយន្ត២ប្រភេទ ដំឡើងរថយន្តបាន ១.៣០០គ្រឿងសម្រា ប់ឆ្នាំ២០២៤នេះ មិនត្រឹមតែជាសញ្ញាបង្ហាញពីវឌ្ឍនភាពថ្មី​មួយសម្រាប់វិស័យឧស្សាហកម្មនៅកម្ពុជាឡើយ ប៉ុន្តែបន្ថែមជាសញ្ញាវិជ្ជមានមួយទៀតសម្រាប់ការ​ធ្វើ​ពិពិធកម្ម​សេដ្ឋកិច្ចកម្ពុជា ដែលការវិនិយោគបែបនេះគឺជាអ្វីដែលកម្ពុជាចង់បាន។សម្ដេចបន្តថា រាជរដ្ឋាភិបាលនីតិកាលទី៧ នៃរដ្ឋសភា បានដាក់ចេញនូវយុទ្ធសាស្ត្រ បច្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាពនិងចីរភាពដោយ​កំណត់​យកអាទិភាពគន្លឹះចំនួន៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា។ទន្ទឹមនឹងនេះ ដើម្បីទាញយក​ប្រយោជន៍ជាអតិបរមានិងជំរុញឲ្យអស់សក្តានុពលនូវប្រភពធនធាន ដែលមានបច្ចុប្បន្ន និងប្រភពថ្មីនៃកំណើនសេដ្ឋកិច្ចរបស់កម្ពុជារាជរដ្ឋាភិបាលបានគិតគូគ្រប់ជ្រុងជ្រោយ ដោយផ្ដល់ការ​លើកទឹកចិត្តខ្ពស់ដល់ការវិនិយោគគ្រប់វិស័យអាទិភាពតាមរយៈច្បាប់ស្ដីពីការវិនិយោគនៃ ព្រះរាជាណាចក្រកម្ពុជា និងការដាក់ចេញជាបន្តបន្ទាប់នូវច្បាប់ គោលនយោបាយនិងផែនការ​យុទ្ធសាស្ត្រ​ចាំបាច់នានាដែល មានភាពប្រឡាក់ក្រឡាសំដៅបង្កើតនិងបង្កើនការងារ​ដ៏មាន​តម្លៃ​បន្ថែមខ្ពស់និងចាប់យកឲ្យបាននូវកាលានុវត្តភាពថ្មី ដែលកំពុងលេចឡើង ស្របនឹង​និន្នាការ​តំបន់និងសាកល ដើម្បីបង្កើនល្បឿន និងធានាចីរភាពនៃកំណើនរយៈពេលវែង៕

សម្ដេចធិបតីលើកទឹកចិត្តឱ្យបណ្ដាក្រុមហ៊ុននៅក្នុងប្រទេសកម្ពុជា ចូលរួមប្រើប្រាស់វត្ថុធាតុដើមនៅក្នុងស្រុក

2024/05/02 12:45:41 pm        286
Facebook Telegram Linkin
ក្នុងឱកាសអញ្ជើញជាអធិបតីដ៏ខ្ពង់ខ្ពស់ សម្ពោធដាក់ឱ្យដំណើរការជាផ្លូវការរោងចក្រផ្គុំ និងដំឡើងរថយន្តតូយ៉ូតា ក្នុងតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ នៅព្រឹកថ្ងៃទី០២ ខែឧសភា ឆ្នាំ២០២៤នេះដែរ សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ក៏បានលើកទឹកចិត្តដល់បណ្ដាក្រុមហ៊ុនរោងចក្រសហគ្រាសនានាដែលមកវិនិយោគនៅកម្ពុជា ចូលរួមប្រើប្រាស់វត្ថុធាតុដើមដែលមានស្រាប់នៅក្នុងស្រុក ដើម្បីលើកកម្ពស់ជីវភាព សេដ្ឋកិច្ច និងបង្កើនការងារដល់ពលរដ្ឋ។ក្នុងឱកាសនោះសម្ដេចធិបតី បានគូសបញ្ជាក់ថា ចក្ខុវិស័យរបស់រាជរដ្ឋាភិបាលនីតិកាលទី៧ នៃរដ្ឋសភា គឺជំរុញកែប្រែ និងធ្វើទំនើបកម្មរចនាសម្ព័ន្ធឧស្សាហកម្មនៅកម្ពុជា ពីឧស្សាហកម្ម អត្តពលកម្ម ទៅជាឧស្សាហកម្មផ្អែកលើជំនាញ ស្របតាមគោលនយោបាយអភិវឌ្ឍន៍​វិស័យ​ឧស្សាហកម្មកម្ពុជា ២០១៥-២០២៥ សំដៅរួមចំណែកដល់ការបង្កើនតម្លៃបន្ថែមខ្ពស់ ដែលទ្រទ្រស់ដល់កំណើនសេដ្ឋកិច្ច ប្រកបដោយចីរភាព និងបរិយាបន្ន ការបង្កើតការងារ ការបង្កើនប្រាក់ចំណូលសមស្រប និងជីវភាពកាន់តែប្រសើរឡើងជូនដល់ប្រជាពលរដ្ឋ។ សម្ដេចធិបតីបញ្ជាក់ថា កម្ពុជាមានចក្ខុវិស័យប្រែក្លាយខ្លួនជាមជ្ឈមណ្ឌលផ្ដុំសកម្មភាព​ផលិត​គ្រឿងបង្គុំយានយន្ត និងបរិក្ខាអេឡិចត្រូនិក ​សម្រាប់នាំចេញទៅកាន់ទីផ្សារក្នុងតំបន់ និងសាកល​លោក ដែលការសម្រេចបានចក្ខុវិស័យនេះនឹងនាំមកផលវិជ្ជមានជាច្រើន​សម្រាប់ការអភិវឌ្ឍសង្គមជាតិកម្ពុជា។ សូមជម្រាបថា រាជរដ្ឋាភិបាល នីតិកាលទី៧ នេះបានដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដើម្បី កំណើន ការងារ សមធម៌ ប្រសិទ្ធភាព និងចីរភាព សំដៅកសាងមូលដ្ឋានគ្រឹះឆ្ពោះទៅសម្រេចបាននូវចក្ខុវិស័យកម្ពុជាឆ្នាំ២០៥០ ជាប្រទេសចំណូលខ្ពស់ ដោយក្នុងនោះ ដោយបញ្ចកោណទី២ “ការធ្វើពិពិធកម្មសេដ្ឋកិច្ច និង ការបង្កើន ភាពប្រកួតប្រជែង” រាជរដ្ឋាភិបាលបានផ្តោតលើកិច្ចការអាទិភាពចំនួន៥ ដោយកិច្ចការអាទិភាពទី៣ ការកែលម្អបរិយាកាសធុរកិច្ច និង ការវិនិយោគ ដែលមានគោលដៅយុទ្ធសាស្ត្រផ្តោតលើ ការបន្តកែលម្អបរិយាកាសអំណោយផល ដល់ការធ្វើធុរកិច្ច, ការធ្វើពាណិជ្ជកម្ម និងការវិនិយោគ តាមរយៈ ការសម្រួល និង ការធ្វើសាមញ្ញកម្ម នីតិវិធីពាក់ព័ន្ធនានា, ការធ្វើឌីជីថលភាវូបនីយកម្មសម្រាប់ការផ្តល់សេវាសាធារណៈ និង កិច្ចការរដ្ឋបាល, ការពង្រឹងសមត្ថភាពស្ថាប័ន, និង ការលើកកម្ពស់ប្រសិទ្ធភាពនៃកិច្ចសម្របសម្រួលអន្តរក្រសួង-ស្ថាប័ន៕អត្ថបទ៖ វ៉ន ដារ៉ា

សម្ដេចធិបតី៖ រាជរដ្ឋភិបាលតែងតែចាត់ទុកវិស័យឯកជន ជាក្បាលម៉ាស៊ីនជួយជំរុញកំណើនសេដ្ឋកិច្ចជាតិ

2024/05/02 12:40:45 pm        77
Facebook Telegram Linkin
ក្នុងឱកាសអញ្ជើញជាអធិបតីដ៏ខ្ពង់ខ្ពស់ សម្ពោធដាក់ឱ្យដំណើរការជាផ្លូវការរោងចក្រផ្គុំ និងដំឡើងរថយន្តតូយ៉ូតា ក្នុងតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ នៅព្រឹកថ្ងៃទី០២ ខែឧសភា ឆ្នាំ២០២៤នេះ សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍បញ្ជាក់ថា ក្នុងការអភិវឌ្ឍសង្គម សេដ្ឋកិច្ច រាជរដ្ឋភិបាលតែងតែចាត់ទុកវិស័យឯកជនជាក្បាលម៉ាស៊ីនក្នុងការជួយជំរុញកំណើនសេដ្ឋកិច្ចជាតិ។ក្នុងឱកាសនោះសម្ដេចធិបតី នាយករដ្ឋមន្រ្ដី បានថ្លែងថា បច្ចុប្បន្នប្រទេសកម្ពុជាកំពុងឈាន​ដល់​ការអនុវត្ត និងអភិវឌ្ឍន៍វិស័យកម្មន្តសាល ដូច្នេះកម្ពុជាត្រូវតែមានសមត្ថភាពក្នុងការផលិត ផលិតផលពាក់កណ្ដាលសម្រេច និងផលិតផលសម្រេចដើម្បីនាំចេញទៅប្រទេសដទៃទៀត។ សម្តេចធិបតី នាយករដ្ឋមន្រ្ដីនៃកម្ពុជា ប្រកាសថ្លែងអំណរគុណដល់រដ្ឋាភិបាល និងប្រជាជនជប៉ុន​ដែលជឿជាក់ និងមានទំនុកចិត្តចំពោះកម្ពុជា បានបន្តមកបណ្ដាក់ទុនវិនិយោគនៅកម្ពុជា​ជាបន្តបន្ទាប់។ សម្តេចប្រកាសស្វាគមន៍ វិស័យឯកជន និងបណ្ដាក្រុមហ៊ុនរបស់ជប៉ុនបន្តមកវិនិយោគ និងបណ្ដាក់ទុននៅកម្ពុជាបន្តទៀត។សូមជម្រាបថា ក្រុមហ៊ុន TOYOTA TSUSHO MANUFACTURING (CAMBODIA) CO., LTD ជាក្រុមហ៊ុនដំឡើងរថយន្តលំដាប់អន្តរជាតិមួយបន្ថែមទៀតបន្ទាប់ពីក្រុមហ៊ុន RMA Cambodia ដែលបានបើកដំណើរការរោងចក្រដំឡើងរថយន្ត Ford នៅក្នុងស្រុកក្រគរ ខេត្តពោធិ៍សាត់ កាលពីឆ្នាំ២០២២។ក្រុមហ៊ុននេះ បានពង្រីកធុរកិច្ចរបស់ខ្លួនតាមរយៈការបង្កើតរោងចក្រ ពិសេសគឺការធ្វើពិពិធកម្មពី​ការនាំ​រថយន្តចូលគ្រប់ប្រភេទទាំងស្រុង មកជាការវិនិយោគសង់រោងចក្រតម្លើងរថយន្ត​ទាំងពីរ​ប្រភេទនៅកម្ពុជាតែម្តង ហើយនេះគឺជាការចូលរួមចំណែកដ៏ធំក្នុងការអភិវឌ្ឍវិស័យ​ឧស្សាហកម្ម នៅកម្ពុជាផងដែរ។ នេះគឺជាមោទនភាពមួយផងដែរ ដែលមានក្រុមហ៊ុនលំដាប់អន្តរជាតិ​ជា​បន្តបន្ទាប់ បានផ្តល់នូវទំនុកចិត្តជ្រើសរើសកម្ពុជាជាទីតាំងវិនិយោគ​ក្នុងវិស័យឧស្សាហកម្មដំឡើង​រថយន្តដើម្បីចែកចាយនៅលើទីផ្សារក្នុងស្រុកនិងនាំចេញទៅអន្តរជាតិ៕អត្ថបទ៖ វ៉ន ដារ៉ា

សម្ដេចធិបតីលើកទឹកចិត្តក្រុមហ៊ុននានាបើកថ្នាលបណ្ដុះបណ្ដាល និងផ្ដល់ឱកាសដល់យុវជនចូលហាត់ការ

2024/05/02 12:30:19 pm        90
Facebook Telegram Linkin
សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានលើកទឹកចិត្តដល់រោងចក្រ និងក្រុមហ៊ុននានាដែលមកវិនិយោគនៅកម្ពុជា ឱ្យបើកថ្នាលបណ្ដុះបណ្ដាល និងផ្ដល់ឱកាសដល់យុវជនដែលកំពុងរៀនជំនាញវិជ្ជាជីវៈរបស់រាជរដ្ឋាភិចំនួន ១,៥ លាននាក់មានឱកាសអាចចូលហាត់ការនៅតាមរោងចក្រ ឬក្រុមហ៊ុនដោយផ្ទាល់។សម្ដេចធិបតី នាយករដ្ឋមន្រ្ដី មានប្រសាសន៍អំពាវនាវបែបនេះ ក្នុងឱកាសអញ្ជើញជាអធិបតីដ៏ខ្ពង់ខ្ពស់ សម្ពោធដាក់ឱ្យដំណើរការជាផ្លូវការរោងចក្រផ្គុំ និងដំឡើងរថយន្តតូយ៉ូតា ក្នុងតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ នៅព្រឹកថ្ងៃទី០២ ខែឧសភា ឆ្នាំ២០២៤។សម្ដេចធិបតី មានប្រសាសន៍ថា សមិទ្ធផលថ្មីនៃការបង្កើតរោងចក្រ ដំឡើងរថយន្តរបស់តូយ៉ូតានៅក្នុងប្រទេសកម្ពុជានេះ គឺជាឱកាសក្នុងការផ្ទេរបច្ចេកវិទ្យាទំនើបៗពីប្រទេសជប៉ុនមកកម្ពុជា។ ដូច្នេះសម្ដេចបានលើកទឹកចិត្តដល់រោងចក្រឱ្យបើកថ្នាលបណ្ដុះបណ្ដាល និងផ្ដល់ឱកាសដល់យុវជនដែលកំពុងរៀនជំនាញវិជ្ជាជីវៈអាចមកហាត់ការដោយផ្ទាល់នៅទីនេះ។ ក្នុងឱកាសនោះសម្តេចធិបតី នាយករដ្ឋមន្រ្ដី បានជំរុញដល់ក្រសួងស្ថាប័នពាក់ព័ន្ធត្រូវផ្ដល់ការគាំទ្រ​ដល់វិស័យឯកជនដែលចង់មកវិនិយោគនៅកម្ពុជា។ ជាមួយគ្នានេះសម្ដេចធិបតី ក៏បានលើកទឹកចិត្ត​ដល់បងប្អូនដែលជាកម្មករនិយោជិត កំពុងបំពេញការងារនៅក្នុងរោងចក្រ​ដំឡើងរថយន្តតូយ៉ូតា ក៏ដូចជាបណ្ដាក្រុមហ៊ុន និងរោងចក្រសហគ្រាសដទៃទៀត ត្រូវខិតខំពង្រឹងសមត្ថភាព និងចាប់យកឱកាសការងារនេះឱ្យបានល្អ៕អត្ថបទ៖ វ៉ន ដារ៉ា

អ្នកនយោបាយចាត់ទុកក្រុមប្រឆាំងគម្រោងព្រែកជីកហ្វូណនតេជោ ជាបុគ្គលមិនគិត​ពី​ប្រយោជន៍ជាតិ

2024/05/02 12:24:45 pm        91
Facebook Telegram Linkin
មេដឹកនាំបណ្តាគណបក្សនយោបាយមួយចំនួន បានចាត់ទុក​ក្រុម​អ្នកប្រឆាំង​គម្រោង​ព្រែកជីក​ហ្វូណន​តេជោ ជាបុគ្គលមិនស្គាល់ពីផលប្រយោជន៍ជាតិ ធ្វើនយោបាយដើម្បីតែ​ផល​របស់​រប​ស់​ពួក​គេ​ប៉ុណ្ណោះ។ស្របពេលមជ្ឈដ្ឋានក្នុង និងក្រៅប្រទេសកំពុងបន្តប្រកាសគាំទ្រយ៉ាងផុលផុស​ទៅ​លើ​គម្រោង​ព្រែកជីក​ហ្វូណនតេជោ មានមេដឹកនាំ​គណបក្ស​នយោបាយ​ដែល​តែង​មាន​សកម្មភាព​ជា​ប្រចាំទៅ​លើ​បញ្ហា​សង្គម បាននាំគ្នាសម្តែងការគាំទ្រ​យ៉ាងពេញ​ទំហឹង​ចំពោះ​ត្រៀម​លក្ខណៈ​ដំណើរ​ការ​របស់​គម្រោង​ព្រែកជីកហ្វូណនតេជោ ដែលជាគម្រោងដ៏សំខាន់សម្រាប់កម្ពុជា។ លោក អ៊ុន ជឹម ប្រធានគណបក្សឯកភាពជាតិខ្មែរ ចាត់ទុកការប្រឆាំង​របស់​អ្នក​នយោបាយ​ចំពោះ​គម្រោង​ព្រែក​ជីកហ្វូណនតេជោ ជាបុគ្គលមិនស្គាល់ពីផលប្រយោជន៍ជាតិ និងផលប្រយោជន៍​ប្រជាជន​ជា​ធំ ជាពិសេសបុគ្គលនេះជាអ្នកនយោបាយមានបុគ្គលិកលក្ខណៈវិទ្ធង្សនាសុទ្ធសាធ។ ជាមួយគ្នា លោក អ៊ុន វិសិទ្ធគុន ប្រធានគណបក្សកម្លាំងប្រជាធិបតេយ្យ លើកឡើងថា គម្រោង​ព្រែក​ជីកហ្វូណនតេជោជាគម្រោងដ៏មហាសាល ដូចនេះ​អ្នក​នយោបាយ​ប្រឆាំង​ចំពោះគ​ម្រោង​ព្រែក​ជីក​ហ្វូណនតេជោ គឺជាអ្នកនយោបាយបម្រើសម្រាប់បរទេសជាជាងប្រជាជនរបស់ខ្លួន។ ក្នុងនោះ លោក ញឹក ប៊ុនឆៃ ប្រធានគណបក្សខ្មែររួបរួមជាតិ លើកឡើងថា ផលប្រយោជន៍​ពី​គម្រោង​ព្រែក​ជីកហ្វូណនតេជោ ជាការចាប់ផ្តើមបង្ហាញ​កម្ពុជា​មាន​លទ្ធភាព​គ្រប់​គ្រាន់​សម្រាប់​ការ​ដឹក​ជញ្ជូន ដោយពុំចាំបាច់ដឹកជញ្ជូន និងពឹងពាក់ពីប្រទេជិតខាងដូចមុននោះទេ។ សូមជម្រាបថា គម្រោងព្រែកជីកហ្វូណនតេជោ ជាគម្រោង​ដែល​តភ្ជាប់​ផ្លូវ​ទឹក​រវាង​ទន្លេ​ទៅ​កាន់​សមុទ្រ​ ដោយឆ្លងកាត់ខេត្តកណ្តាល តាកែវ កំពត និងខេត្តកែប ដែលមាន​ប្រវែង​១៨០​គីឡូម៉ែត្រ​។ ​គម្រោងព្រែកជីកហ្វូណនតេជោ និងផ្តល់អត្ថប្រយោជន៍ដ៏មហាសាលដល់ប្រទេសកម្ពុជា ជា​ពិសេសវិស័យដឹកជញ្ជូន ដូចជា កាត់បន្ថយតម្លៃដឹកជញ្ជូន កាត់បន្ថយពេលវេលា-ចម្ងាយ ការ​ខូចខាត​ផ្លូវ​ថ្នល់ ការកកស្ទះចរាចរណ៍ គ្រោះថ្នាក់ចរាចរណ៍ ក៏ដូចជាកាត់ បន្ថយនីតិ​វិធី​ សម្រាប់​នាវា និងបែបបទក្នុងការឆ្លងកាត់ទំនិញពីកម្ពុជាទៅសមុទ្រ ហើយនឹងបង្កើតតំបន់ពាណិជ្ជកម្ម តំបន់​សេដ្ឋកិច្ចពិសេស ការអភិវឌ្ឍន៍ផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារា​សាស្ត្រ វារីវប្បកម្ម ទេសចរណ៍ ជួយរំដោះទឹកជំនន់ក្នុងរដូវវស្សា ជួយ​បង្កើន​ផល​ត្រី​ទឹក​សាប​នៅ​តាម​ព្រែក ខណៈគម្រោងនេះ គឺជាគម្រោងបម្រើផ​ល​ប្រយោជន៍​ជាតិ​ដ៏ធំ​ចំពោះ​សេដ្ឋកិច្ច​របស់​កម្ពុជា​៕ អត្ថបទ សេក ឧត្តម 

កោះតៃវ៉ាន់ ពិបាកក្នុងការចូលរួមសន្និបាតរបស់អង្គការ WHO ទោះអាមេរិក គាំទ្រក៏ដោយ

2024/05/02 12:08:32 pm        100
Facebook Telegram Linkin
ប្រមុខការបរទេសរបស់កោះតៃវ៉ាន់ បាននិយាយនៅថ្ងៃព្រហស្បតិ៍ (០២ ឧសភា) នេះថា វានឹងពិបាកសម្រាប់កោះតៃវ៉ាន់ ក្នុងការចូលរួមសន្និបាតប្រចាំឆ្នាំរបស់អង្គការសុខភាពពិភពលោក (WHO) នៅឆ្នាំនេះ ហើយខ្លួនសង្ឃឹមថាប្រទេសជាច្រើនទៀតនឹងគាំទ្រវត្តមានរបស់កោះតៃវ៉ាន់ បន្ទាប់ពីសហរដ្ឋអាមេរិក បានជំរុញឱ្យមានការអញ្ជើញ ប៉ុន្តែលទ្ធភាពនៃការចូលរួមណាមួយហាក់មានតិច ទោះអាមេរិកគាំទ្រក៏ដោយ។កោះតៃវ៉ាន់ ត្រូវបានដកចេញពីអង្គការអន្តរជាតិភាគច្រើនដោយសារតែការជំទាស់របស់ប្រទេសចិន ដែលចាត់ទុកកោះគ្រប់គ្រងតាមបែបប្រជាធិបតេយ្យនេះជាទឹកដីរបស់ខ្លួន។ សន្និបាតសុខភាពពិភពលោក (WHA) ឆ្នាំនេះចាប់ផ្តើមនៅថ្ងៃទី២៧ ខែឧសភា ត្រឹមតែមួយសប្តាហ៍បន្ទាប់ពីមេដឹកនាំជាប់ឆ្នោតថ្មីរបស់តៃវ៉ាន់ លោក ឡៃ ឈីងទឺ (Lai Ching-te) ដែលចិនចាត់ទុកថាជាអ្នកផ្ដាច់ខ្លួន ចូលកាន់តំណែង។តៃវ៉ាន់ បានចូលរួមសន្និបាតសុខភាពពិភពលោក (WHA) នេះក្នុងនាមជាអ្នកសង្កេតការណ៍ពីឆ្នាំ២០០៩ ដល់ឆ្នាំ២០១៦ ក្រោមការគ្រប់គ្រងរបស់មេដឹកនាំនៅពេលនោះ គឺលោក ម៉ា អ៊ីងចូវ (Ma Ying-jeou) ដែលបានចុះហត្ថលេខាលើកិច្ចព្រមព្រៀងពាណិជ្ជកម្ម និងទេសចរណ៍សំខាន់ៗជាមួយប្រទេសចិន។ ប៉ុន្តែទីក្រុងប៉េកាំង បានចាប់ផ្តើមរារាំងការចូលរួមរបស់តៃវ៉ាន់នៅឆ្នាំ២០១៧ បន្ទាប់ពីមេដឹកនាំថ្មី លោកស្រី សៃ អ៊ីងវិន (Tsai Ing-wen) បានឈ្នះតំណែង។ថ្លែងទៅកាន់អ្នកសារព័ត៌មានក្នុងសភា ប្រមុខការបរទេសតៃវ៉ាន់ លោក ចូសេប អ៊ូ (Joseph Wu) បានលើកឡើងពីសេចក្តីថ្លែងការណ៍មួយកាលពីថ្ងៃពុធ របស់រដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) ដែលក្នុងនោះលោកបាននិយាយថា សហរដ្ឋអាមេរិក «លើកទឹកចិត្តយ៉ាងខ្លាំង» ដល់អង្គការសុខភាពពិភពលោក ឱ្យស្តារការអញ្ជើញរបស់តៃវ៉ាន់ឡើងវិញ៕

លោក Trump៖ ការឆ្មក់ចាប់ខ្លួនរបស់នគរបាលលើក្រុមបាតុករនៅសាកលវិទ្យាល័យ ជារឿងល្អ

2024/05/02 10:41:04 am        151
Facebook Telegram Linkin
បេក្ខជនប្រធានាធិបតីអាមេរិក មកពីគណបក្សសាធារណរដ្ឋ លោក ដូណាល់ ត្រាំ (Donald Trump) បាននិយាយកាលពីថ្ងៃពុធ (០១ ឧសភា) ថា «នេះគឺជារឿងដ៏ល្អបំផុតក្នុងការមើលឃើញ» មន្ត្រីនគរបាលក្រុងញូវយ៉ក ឆ្មក់ចូលអគារសាកលវិទ្យាល័យ កូឡុំប៊ី (Columbia) ដែលត្រូវបានកាន់កាប់ដោយនិស្សិតបាតុកម្មគាំទ្រប៉ាឡេស្ទីន ដោយហៅក្រុមបាតុករទាំងនោះថា «ជាពួកឆ្កួតលីលា និងជាអ្នកអាណិតអាសូរក្រុមហាម៉ាស»។លោក ត្រាំ បានប្រាប់អ្នកគាំទ្រនៅឯការប្រមូលផ្តុំយុទ្ធនាការនៅរដ្ឋ វីស្ខនស៊ីន (Wisconsin) ថា «ក្រុងញូវយ៉ក បានស្ថិតនៅក្រោមការឡោមព័ទ្ធកាលពីយប់មិញ ហើយនោះជារឿងល្អខ្លាំងណាស់»។ លោកបានសរសើរមន្ត្រីនគរបាលដែលបានចាប់ខ្លួនបាតុករប្រមាណ ៣០០ នាក់។ លោក ត្រាំ បាននិយាយដោយយោងលើរបាយការណ៍ប្រព័ន្ធផ្សព្វផ្សាយអំពីផែនការរបស់រដ្ឋបាលលោកប្រធានាធិបតី ចូ បៃដិន (Joe Biden) ក្នុងការទទួលយកជនភៀសខ្លួនហ្កាហ្សា ថា «យើងមិនត្រូវនាំយកជនភៀសខ្លួនរាប់ពាន់នាក់ពីចំណុចកណ្តាលភេរវកម្ម ដូចជាតំបន់ហ្កាហ្សា នេះមកអាមេរិកទេ ទោះក្នុងកាលៈទេសៈណាក៏ដោយ»។ការវាយប្រហារកាលពីថ្ងៃទី០៧ ខែតុលា ទៅលើភាគខាងត្បូងអ៊ីស្រាអែល ដោយក្រុមសកម្មប្រយុទ្ធហាម៉ាស មកពីតំបន់ហ្កាហ្សាស្ទ្រីប និងការវាយលុករបស់អ៊ីស្រាអែល ជាបន្តបន្ទាប់លើតំបន់ហ៊ុមព័ទ្ធប៉ាឡេស្ទីន បានធ្វើឱ្យមានកំណើនដ៏ធំបំផុតនៃសកម្មភាពតវ៉ារបស់និស្សិតអាមេរិក ចាប់តាំងពីការតវ៉ាប្រឆាំងនឹងការរើសអើងជាតិសាសន៍ក្នុងឆ្នាំ២០២០ មក រួមទាំងឧបទ្ទវហេតុប្រឆាំងជនជាតិជ្វីហ្វជាច្រើន៕

លោក Blinken៖ អាមេរិក មិនគាំទ្រការវាយលុកជើងគោកលើក្រុងរ៉ាហ្វា ទេ បើពុំមានផែនការមនុស្សធម៌

2024/05/02 10:06:16 am        107
Facebook Telegram Linkin
រដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) បាននិយាយកាលពីថ្ងៃពុធ (០១ ឧសភា) ថា លោកនៅតែមិនបានឃើញផែនការការពារជនស៊ីវិលណាមួយក្នុងការវាយលុកជើងគោកដែលបានគ្រោងទុករបស់អ៊ីស្រាអែល លើទីក្រុងរ៉ាហ្វា (Rafah) ភាគខាងត្បូងនៃតំបន់ហ្កាហ្សា នោះទេ ហើយទីក្រុងវ៉ាស៊ីនតោន មិនគាំទ្រប្រតិបត្តិការបែបនេះឡើយ បើពុំមានផែនការមនុស្សធម៌ជាក់លាក់។លោក ប្លីងខិន និងនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានជួបប្រជុំគ្នានៅទីក្រុងហ្សេរុយសាឡឹម រយៈពេលពីរម៉ោងកន្លះ បន្ទាប់មកអ៊ីស្រាអែលបាននិយាយម្តងទៀតថាប្រតិបត្តិការ រ៉ាហ្វា នឹងបន្តទៅមុខ ទោះជាមានជំហរប្រឆាំងរបស់សហរដ្ឋអាមេរិក និងការព្រមានរបស់អង្គការសហប្រជាជាតិ ដែលថានឹងនាំឱ្យមាន «សោកនាដកម្ម» ក៏ដោយ។អ្នកនាំពាក្យរដ្ឋាភិបាលអ៊ីស្រាអែល បាននិយាយថា អ៊ីស្រាអែលនៅតែប្តេជ្ញាចិត្តបំផ្លាញទម្រង់ប្រយុទ្ធរបស់ក្រុមហាម៉ាស ដែលនៅសេសសល់ទោះជាមានសម្ពាធខ្លាំងក៏ដោយ។អ៊ីស្រាអែល គឺជាទីឈប់សំចតចុងក្រោយក្នុងដំណើរទស្សកិច្ចមជ្ឈិមបូព៌ារបស់ប្រមុខការទូតអាមេរិករូបនេះ ដែលជាដំណើរលើកទីប្រាំពីររបស់ខ្លួនទៅកាន់តំបន់ដែលត្រូវបានធ្លាក់ចូលទៅក្នុងជម្លោះកាលពីខែតុលាឆ្នាំមុន នៅពេលដែលក្រុមហាម៉ាស បានវាយប្រហារភាគខាងត្បូងអ៊ីស្រាអែល។ ដំណើរទស្សកិច្ចនេះបានផ្តោតជាសំខាន់លើកិច្ចខិតខំប្រឹងប្រែងដើម្បីកែលម្អលក្ខខណ្ឌមនុស្សធម៌នៅក្នុងតំបន់ហ្កាហ្សា៕

សាលារៀនផ្លាស់ប្ដូរម៉ោងសិក្សា និងស្រោចទឹកជាប្រចាំ ក្នុងការទប់ស្កាត់ការកើនឡើងកម្ដៅខ្លាំង

2024/05/01 03:15:51 pm        142
Facebook Telegram Linkin
តាមបណ្ដាសាលារៀនមិនថានៅរាជធានីភ្នំពេញ ឬនៅតាមបណ្ដាខេត្ត ចាប់ផ្ដើមធ្វើការស្រោចទឹកជាប្រចាំថ្ងៃ ក្នុងការទប់ស្កាត់ការកើនឡើងកម្ដៅខ្លាំង។ ទន្ទឹមគ្នានេះដែរ ក្រសួងអប់រំ យុវជន និងកីឡា ក៏បានសម្រេចឱ្យមានការផ្លាស់ប្ដូរម៉ោងសិក្សាផងដែរ ដោយវេនព្រឹកចាប់ផ្ដើមនៅម៉ោង ៧.00 ចេញម៉ោង ១០.00ព្រឹក រឺឯវេនថ្ងៃចូលសិក្សានៅម៉ោង ២.០០ ចេញម៉ោង ៥.០០ ល្ងាច។កម្ពុជា ក៏ដូចជាប្រទេសជិតខាងក្នុងតំបន់ បច្ចុប្បន្នកំពុងជួបវិបត្តិនៃការកើនឡើងកម្ដៅខ្លាំង។ ជាក់ស្ដែងសម្រាប់ប្រទេសកម្ពុជា ក្នុងរដូវប្រាំង ជាពិសេសមួយរយៈចុងក្រោយនេះ អាកាសធាតុបាន​ឡើងកម្ដៅ លើសពី ៤០ អង្សា ដែលបង្ករជាផលវិបាកសម្រាប់មនុស្សគ្រប់គ្នា ពិសេសកុមារ និងមនុស្សចាស់ដែលមានភាពប្រឈម។ ស្របពេលដែលកម្ដៅមានការហក់ឡើងខ្លាំងបែបនេះ ក្រសួងអប់រំ យុវជន និងកីឡា បានសម្រេចឱ្យមានការផ្លាស់ប្ដូរម៉ោងសិក្សា ដើម្បីទប់ស្កាត់ហានិភ័យ និងចៀសវាងជំងឺផ្សេងៗ ដែលអាចប៉ះពាល់ដល់សុខភាព ការរៀនសូត្ររបស់សិស្ស និងការបំពេញការងាររបស់គ្រូបង្រៀន។ ការផ្លាស់ប្ដូរ គឺវេនព្រឹកត្រូវចូលរៀន ម៉ោង ៧.00 ចេញម៉ោង ១០.00ព្រឹក ចំណែគវេនថ្ងៃចូល​សិក្សានៅម៉ោង ២.០០ ចេញម៉ោង ៥.០០ ល្ងាច។សម្រាប់ការកើនឡើងកម្ដៅនេះដែរ លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា លើកឡើងដែរថា ​ក្រសួងកំពុងធ្វើការងារតាមដានយ៉ាងយកចិត្តទុកដាក់ ទៅលើស្ថានភាព​សាលានីមួយៗ ដើម្បីអាចស្វែងរកដំណោះស្រាយបន្ទាន់តាមករណីជាក់ស្ដែង។ ទន្ទឹមនឹងការផ្លាស់ប្ដូរម៉ោងសិក្សានេះដែរ តាមបណ្ដាសាលារៀន ក៏បានដាក់ចេញវិធានការផ្ទាល់ខ្លួន ទៅតាមលទ្ធភាពជាក់ស្ដែង ក្នុងការទប់ស្កាត់ការកើនឡើងកម្ដៅនេះដែរ។ ភាគច្រើនជាការ​សង្កេតឃើញ គឺសាលាចាប់ផ្ដើមស្រោចទឹក ក្នុងថ្នាក់រៀន រឺនៅតាមបរិវេណសាលា។ សម្រាប់ សាលាបឋមសិក្សាសំបួរមាស ក្នុងភូមិសាស្ត្រខណ្ឌដង្កោ បានតទុយោទឹកដោយខ្លួនឯង និងធ្វើការស្រោចនៅក្នុងបន្ទប់រៀនរយៈពេលជិតមួយសប្ដាហ៍រួចមកហើយ។ លោក សាយ ឆាយ ជានាយកសាលាបឋមសិក្សាសំបួរមាស លើកឡើងថាការបាញ់ទឹក​រយៈពេល​ប៉ុន្មានថ្ងៃមកនេះ ជួយដល់ការសិក្សារបស់សិស្សបានច្រើន។ លើកសម្គាល់ឃើញថា ប៉ុន្មានថ្ងៃមុន​ឳពុកម្ដាយមួយចំនួនបានសុំច្បាប់ឱ្យកូនឈប់សម្រាក ដោយសារបញ្ហាកម្ដៅខ្លាំង តែចាប់ពីសាលា​មានការស្រោចទឹកនៅក្នុងបន្ទប់រៀននេះ ចំនួនសិស្សសុំច្បាប់គឺមានការធ្លាក់ចុះ។ ទន្ទឹមនឹងធាតុអាកាសបែបនេះ លោកក៏សំណូមពរឱ្យអាណាព្យាបាលរៀបចំ ទឹកពិសារសម្រាប់កូនជាចាំបាច់ផងដែរ។កំពុងអង្គុយរៀនក្នុងបន្ទប់ដែលបាញ់ទឹកសើមជាប្រចាំ កុមារាកុមារី លើកឡើងជាសប្បាយចិត្ត ព្រោះការស្រោចទឹកនេះ ​ជួយឱ្យពួកគេទទួលបានភាពត្រជាក់ ងាយស្រួលអង្គុយសិក្សាជាងមុន។ ក្រសួងអប់រំ ក្រៅពីសម្រេចឱ្យមានការផ្លាស់ប្ដូរម៉ោងសិក្សា​ ក៏បានបញ្ជាក់ដែរថា ​ករណីសីតុណ្ហភាព​កើនឡើងខ្លាំងលើសពីការគ្រប់គ្រង គ្រឹះស្ថានសិក្សាមានសិទ្ធិក្នុងការសម្រេចជាក់ស្ដែង៕អត្ថបទ៖ គឹមហុក

បណ្ដាញសង្គម

ព័ត៌មានថ្មីៗ

សម្តេចរដ្ឋសភាធិបតី ឃួន សុដារី និងប្រធានគណៈប្រតិភូអាយប៉ា អញ្ជើញចុះហត្ថលេខាលើរបាយការណ៍លទ្ធផលមហាសន្និបាតលើកទី៤៦
09/21/2025 08:09 AM
Facebook Telegram Linkin
ហូលីវីតចិន គ្រោងផលិតភាពយន្តភាគខ្លីៗ និងអភិវឌ្ឍទេសចរណ៍ជាមួយបច្ចេកវិទ្យាទំនើប នៅកម្ពុជា
09/20/2025 09:09 PM
Facebook Telegram Linkin
សភាសហភាពអឺរ៉ុប កំពុងតាមដានដោយយកចិត្តទុកដាក់ការអនុវត្តបទឈប់បាញ់
09/20/2025 07:09 PM
Facebook Telegram Linkin
ផ្ទះ​អតីត​យុទ្ធ​ជន​ ៣៥ខ្នង ស្ថិតនៅ​ឃុំ​ក្រយា​ ស្រុក​សន្ទុក​ ខេត្ត​កំពង់​ធំ​ រងផលប៉ះពាល់​ដោយ​ជំនន់​ទឹក​ភ្លៀង
09/20/2025 06:09 PM
Facebook Telegram Linkin
ឯកអគ្គរដ្ឋទូត៖ ដាណឺម៉ាកប្រើកោះ Bornholm ដើម្បីគំរាមកំហែងសន្តិសុខរបស់រុស្ស៊ី រួមទាំងតំបន់ Kaliningrad
09/20/2025 04:09 PM
Facebook Telegram Linkin
មនុស្សរាប់ពាន់នាក់ ធ្វើបាតុកម្មនៅយេម៉ែនប្រឆាំងនឹងប្រតិបត្តិការយោធាអ៊ីស្រាអែល នៅតំបន់ហ្កាហ្សា
09/20/2025 04:09 PM
Facebook Telegram Linkin
អាមេរិក កំពុងពិភាក្សាជាមួយក្រុមតាលីបង់អំពីការវិលត្រឡប់នូវយោធារបស់ខ្លួន ទៅមូលដ្ឋានទ័ពអាកាស Bagram វិញ
09/20/2025 04:09 PM
Facebook Telegram Linkin
កូរ៉េខាងត្បូង មានបំណងរក្សាទំនាក់ទំនងជាមួយរុស្ស៊ី
09/20/2025 03:09 PM
Facebook Telegram Linkin
រុស្ស៊ីបើកការវាយប្រហារចង្កោមលើគោលដៅអ៊ុយក្រែន ចំណែកអ៊ុយក្រែន បានវាយប្រហារមជ្ឈមណ្ឌលដឹកជញ្ជូនយោធារុស្ស៊ី
09/20/2025 03:09 PM
Facebook Telegram Linkin
មន្ត្រីជាន់ខ្ពស់៖ យន្តហោះចម្បាំង MiG-31 របស់រុស្ស៊ី មិនបានបំពានដែនអាកាសអេស្តូនីទេ
09/20/2025 03:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.