BTV NEWS

សភាពាណិជ្ជកម្មកម្ពុជា រៀបចំវេទិកាធុរកិច្ច និងនវានុវត្តន៍២០២៥ ដើម្បីលើកកម្ពស់វិស័យនវានុវត្តន៍និងធុរកិច្ច

ប្រធានសមាគមអ្នកផ្គត់ផ្គង់ត្រីប្ដេជ្ញាចិត្តចូលរួមផ្គត់ផ្គង់ទិន្នផលត្រីឱ្យឆ្លើយតបតាមតម្រូវការទីផ្សារ

រដ្ឋមន្ត្រីក្រសួងសាធារណការ ចូលរួមកិច្ចប្រជុំពិភាក្សាការងារលើការរៀបចំផែនការមេ និងការអភិវឌ្ឍច្រករបៀងគម្រោងព្រែកជីកហ្វូណនតេជោ

ឯកឧត្តម ឌិត ទីណា ចុះត្រួតពិនិត្យស្ថានភាពដីសម្រាប់ផលិតកម្មដំណាំបន្លែដេីម្បីផ្គត់ផ្គង់ដល់កងទ័ព

សេដ្ឋកិច្ច និង កសិកម្ម

ជំនាញសេដ្ឋកិច្ច៖ វិស័យកាត់ដេរនៅតែមានសក្តានុពល និងមានភាពធន់ នៅក្នុងវិស័យសេដ្ឋកិច្ច

ភ្នំពេញ៖ អ្នកជំនាញសេដ្ឋកិច្ច មានសុទិដ្ឋិនិយមថា វិស័យកាត់ដេរ នៅតែមានសក្តានុពល និងមានភាពធន់ បន្តដើរតួនាទីសំខាន់នៅក្នុងវិស័យសេដ្ឋកិច្ច ប៉ុន្តែវិស័យនេះ អាចប្រឈមនឹងការប្រកួតប្រជែងនៅពេលខាងមុខ ដែលទាមទារឲ្យមានការគាំទ្រ និងសម្របសម្រួលខ្ពស់ពីរាជរដ្ឋាភិបាល ។ ឯកឧត្តមបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា លើកឡើងកាលពីថ្ងៃទី២៩ ខែធ្នូនេះថា នៅក្នុងវិបត្តិកូវីដ-១៩ វិស័យកាត់ដេរបានដើរតួនាទីយ៉ាងសំខាន់ ពោលគឺវិស័យនេះធន់និងវិបត្តិដែលកំពុងកើតឡើង និងបានបង្កើតនូវប្រាក់ចំណូលសម្រាប់សេដ្ឋកិច្ចជាតិ ជាពិសេសជួយដល់កម្មករកម្មារិនីមិនឲ្យបាត់បង់ការងារ ទោះបីនៅក្នុងវិបត្តិនោះមានផលប៉ះពាល់ខ្លះៗក៏ដោយ។ឯកឧត្តមបណ្ឌិត បន្តថា អ្វីដែលជាការប្រឈមទៅពេលខាងមុខ គឺកម្ពុជា អាចនឹងជួបលើបញ្ហាប្រកួតប្រជែង ដែលកត្តាទាំងនេះទាមទារឲ្យមានការគាំទ្រ សម្របសម្រួល និងយកចិត្តទុកដាក់ខ្ពស់ពីរាជរដ្ឋាភិបាល ដើម្បីបន្តរក្សាស្ថិរភាពក្នុងខ្សែច្រវ៉ាក់ផលិតកម្មរបស់កម្ពុជា។ចំណែកលោកឧកញ៉ា ណំាង សុធី អនុប្រធានសហព័ន្ធនិយោជកកម្ពុជា លើកឡើងថា ជុំវិញការអភិវឌ្ឍឧស្សាហកម្មកាត់ដេរ ការបូប ក៏ដូចជាស្បែកជើង ក្នុងពេលបច្ចុប្បន្ននេះមានស្ថិរភាពល្អជាធម្មតា ក្នុងនោះកំលាំងពលកម្មបម្រើក្នុងវិស័យនេះក៏នៅរក្សាល្អប្រសើរក្នុងរង្វង់ប្រមាណ ១,៥លាននាក់ ដោយបានបង្កើតប្រាក់ចំណូលគិតជាមធ្យមក្នុងមួយខែៗ ប្រមាណជិត ៣០០ លានដុល្លារអាមេរិក បានចាក់ចូលក្នុងសេដ្ឋកិច្ចជាតិ ។ ចំណែកទៅពេលខាងមុខលោកឧកញ៉ា មើលឃើញថា វិស័យនេះមិនមានបញ្ហាប៉ះពាល់ជាដុំកំភួននោះឡើយ ព្រោះការកើនឡើង ឬថយចុះ គឺវាអាស្រ័យទៅលើអ្នកបញ្ជាទិញ ហើយក្នុងនោះសម្រាប់ទីផ្សារបញ្ជាទិញនាពេលកន្លងមក ក៏ដូចបច្ចុប្បន្ន មិនមែនមានតែកម្ពុជានោះឡើយ ហើយទៅពេលខាងមុខ ការបញ្ជាទិញនេះក៏មិនមានលក្ខណៈខុសគ្នាក្នុងពេលបច្ចុប្បន្ននេះដែរ។យោងតាមរបាយការណ៍ អគ្គនាកយដ្ឋានគយ និងរដ្ឋាកកម្ពុជា នៅក្នុងរយៈពេល ៩ខែ ឆ្នាំ២០២២ ការនាំចេញផលិតផលកាត់ដេររបស់កម្ពុជា ទៅកាន់ទីផ្សារអន្តរជាតិ មានចំនួនជាង ១០ ពាន់លានដុល្លារអាមេរិក កើនឡើងប្រមាណ ២ ០១៥ លានដុល្លារអាមេរិក ស្មើជាង ២៤% នៃការនាំចេញផលិតផលសរុប៕អត្ថបទ៖ សុន រ៉ាឌី

ពលរដ្ឋចាប់ផ្តើមសម្រុកទៅទិញត្រី ក្នុងរដូវប្រមូលផលនេសាទ ដើម្បីធ្វើប្រហុក-ផ្អក

ភ្នំពេញ៖ ប្រជាពលរដ្ឋរស់នៅក្នុងរាជធានីភ្នំពេញ និងតាមបណ្តាខេត្តមួយចំនួនទៀត នៅថ្ងៃទី២៩ ខែធ្នូនេះ បន្តទៅទីតាំងប្រមូលផលនេសាទ ស្ថិតនៅគីឡូម៉ែត្រលេខ៩ ដើម្បីទិញត្រីធ្វើប្រហុក ផ្អក ទុកបរិភោគនៅឆ្នាំក្រោយ។ក្នុងពេលមកទិញនោះ ប្រជាពលរដ្ឋបានប្រាប់BTVឲ្យដឹងថា ការធ្វើប្រហុក ផ្អក ដោយផ្ទាល់ដៃគឺធានាសុវត្ថិភាព អនាម័យ និងគុណភាព ហើយប្រហុក ផ្អក ដែលធ្វើនេះ ទុកខ្លះសម្រាប់ហូប និងខ្លះទៀតសម្រាប់លក់។ លើសពីនេះ ពួកគាត់បានបន្តថា តាមការសង្កេតត្រីនៅឆ្នាំនេះសំបូរជាងឆ្នាំមុនបន្តិច ហើយតម្លៃវិញ ១គីឡូ ចន្លោះពី២ពាន់រៀល ទៅ៣ពាន់រៀល អាស្រ័យទៅលើការចចាររវាងអ្នកទិញ និងអ្នកលក់។បើតាមសេចក្តីជូនដំណឹងរបស់រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ចេញផ្សាយនៅពេលថ្មីៗនេះ បានលើកឡើងថា តាមការសង្កេតត្រីចាប់ផ្តើមបន្លាស់ទី ចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់ ដែលអំណោយផលដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេសាប នៅភូមិសាស្រ្តខេត្តកណ្តាល និងរាជធានីភ្នំពេញ ចាប់ពីថ្ងៃទី២៩ខែធ្នូ ឆ្នាំ២០២២ ដល់ថ្ងៃទី៣ខែមករា ឆ្នាំ២០២៣ ក្នុងរណីមេឃស្រឡះល្អ គ្មានភ្លៀងកក់ខែ ឫមិនទទួលរងឥទ្ឋិពលព្យុះភ្លៀង។ជាមួយគ្នានេះ រដ្ឋបាលជលផល បានអំពាវនាវដល់ប្រជាពលរដ្ឋដែលមានបំណងធ្វើប្រហុក ផ្អក ត្រីឆ្អើរ ឫទឹកត្រី សូមរួសរាន់អញ្ជើញមកទិញត្រី តាមពេលវេលា និងទីកន្លែងខាងលើ៕អត្ថបទ៖ទូច សោភ័ណ

តម្លៃវិនិយោគលើវិស័យសំណង់មានទំហំទឹកប្រាក់ជាង ២ ៦៣៤ លានដុល្លារអាមេរិក

ភ្នំពេញ៖ កម្ពុជាទទួលបានគម្រោងវិនិយោគលើវិស័យសំណង់នៅទូទាំងប្រទេស ក្នុងឆ្នាំ ២០២២ មានចំនួនជាង ៣ពាន់គម្រោង ដែលតួលេខនេះ បង្ហាញពីការងើបឡើងវិញនៃសេដ្ឋកិច្ច ពីវិបត្តិកូវីដ១៩។ក្នុងរបាយការណ៍បូកសរុបនៃការអនុវត្តការងារឆ្នាំ ២០២២ និងលើកទិសដៅការងារឆ្នាំ ២០២៣ ក្រសួងរៀបចំដែនដី នគរូបនីយកម្ម និងសំណង់ បានបង្ហាញថា ទិន្នន័យសំណង់ទូទាំងប្រទេសមានចំនួន ៣ ៨២៧ គម្រោង មានផ្ទៃក្រឡាកម្រាលសំណង់សរុបជាង ៦,៥លានម៉ែត្រការ៉េ និងមានតម្លៃប៉ាន់ស្មានទុនវិនិយោគប្រមាណជាង ២ ៦៣៤ លានដុល្លារអាមេរិក បើធៀបនឹងរយៈពេលដូចគ្នាក្នុងឆ្នាំ២០២១ មានចំនួន ៣ ៩២៥ គម្រោង ដែលមានតម្លៃប៉ាន់ស្មានទុនវិនិយោគប្រមាណជាង ៥ ២១០ លានដុល្លារអាមេរិក ថយចុះជាង ៤៩ ភាគរយ។គម្រោងអគារខ្ពស់ៗ ចាប់ពី៥ជាន់ឡើង មានចំនួន ១២៨ គម្រោង ស្មើនឹង ១៤២អគារ (នៅរាជធានីភ្នំពេញចំនួន ៨៦គម្រោង ស្មើនឹង ៩៣ អគារ, ខេត្តព្រះសីហនុចំនួន ១៤ គម្រោង ស្មើនឹង ១៦អគារ និងខេត្តបន្ទាយមានជ័យចំនួន ១៣គម្រោង ស្មើនឹង ១៥អគារ។ចំណែកសំណង់លំនៅឋាន មានចំនួន ៤ ៣២១ គម្រោង មានតម្លៃប៉ាន់ស្មានទុនវិនិយោគប្រមាណជាង ១ ៤១២ លានដុល្លារ ក្នុងនោះបុរីលំនៅឋាន និងបណ្តំលំនៅឋានមានលក្ខណះជាបុរី មានចំនួន ៣៥គម្រោង ស្មើនឹង ៩ ៩១២ខ្នង មានតម្លៃប៉ាន់ស្មានទុនវិនិយោគជាង ៨២០ លានដុល្លារ, អគារផ្ទះល្វែង មាន ៦ ៦០៩ ល្វែង មានទុនវិនិយោគជាង ៥៥៤ លានដុល្លារ, និងអគារស្នាក់នៅរួមមានចំនួន ៥១គម្រោង មានទុនវិនិយោគជាង ២២២ លានដុល្លារ។ ដោយឡែកសំណង់សណ្ឋាគារក្នុងឆ្នាំ ២០២២ នេះដែរ កម្ពុជាទទួលបាន ចំនួន ២០ គម្រោង មានទុនវិនិយោគប្រមាណជាង ៧១ លានដុល្លារ, សំណង់អគារពាណិជ្ជកម្ម មានចំនួន ១៨៥គម្រោង មានទុនវិនិយោគជាង ៤៣៦ លានដុល្លារ, សំណង់អគាររោងចក្រ មានចំនួន ១១៧គម្រោង មានតម្លៃប៉ាន់ស្មានទុនវិនិយោគជាង ៥៣៣ លានដុល្លារ, និងសំណង់អគារពហុមុខងារ មានចំនួន ៧គម្រោងមានតម្លៃប៉ាន់ស្មានទុនវិនិយោគប្រមាណជាង ១៤៩ លានដុល្លារ៕អត្ថបទ៖ សុន រ៉ាឌី

កម្ពុជានៅតែទទួលឱកាសវិនិយោគ ដែលបង្ហាញឲ្យឃើញការងើបឡើងវិញនៃសេដ្ឋកិច្ច-សង្គម

ភ្នំពេញ៖ រាជរដ្ឋាភិបាលនូវតែបន្តទទួលបានគ្រោងវិនិយោគថ្មីៗបន្ថែម ដោយបានបង្ហាញឲ្យឃើញនៃការងើបឡើងវិញនៃសេដ្ឋកិច្ច-សង្គមនាពេលបច្ចុប្បន្ន ជាពិសេសបានឆ្លុះបញ្ចាំងដល់ស្ថានភាពផលិតកម្ម និងការបន្តកើនឡើងនៃការនាំចេញរបស់កម្ពុជា។យោងតាមផេករបស់ក្រុមប្រឹក្សាអភិវឌ្ឍន៍កម្ពុជា ហៅកាត់ (CDC) នៅថ្ងៃទី២៦ ខែធ្នូនេះ បានចុះផ្សាយនៃការសម្រេច ចេញវិញ្ញាបនបត្រចុះបញ្ជី គម្រោងវិនិយោគជូនក្រុមហ៊ុនថ្មីចំនួន ៤ ដែលវិនិយោគលើវិស័យផ្សេងៗគ្នា មានទុនវិនិយោគជាង ១៦ លានដុល្លារអាមេរិក និងអាចបង្កើតការងារបានចំនួនប្រមាណជាង ៧០០កន្លែង, ក្នុងនោះតាមរយៈនៃការទទួលបានក្រុមហ៊ុនថ្មីមកវិនិយោគបន្ថែមនេះ គឺបានកើតឡើងពីការខិតខំប្រឹងប្រែងរបស់រាជរដ្ឋាភិបាល ដើម្បីគាំទ្រដល់សកម្ម ភាពនៃការអភិវឌ្ឍន៍សេដ្ឋកិច្ចជាតិ។ជាក់ស្តែងក្រុមហ៊ុនថ្មីដែលចុះបញ្ជីវិនិយោគចំនួន ៤ ក្នុងនោះមានក្រុមហ៊ុនចំនួន ៣ មានគម្រោងបង្កើតរោងចក្រនៅក្នុងតំបន់សេដ្ឋកិច្ចពិសេសក្រុងព្រះសីហនុ ដោយគ្រោងវិនិយោគលើការផលិតក្តារប៉ាកេ និងក្តារបន្ទះ, គម្រោងបង្កើតរោងចក្រផលិតថង់ប្លាស្ទិក, និងគម្រោងបង្កើតរោងចក្រផលិតផលិតផលធ្វើពីក្រដាស ។ ចំណែកក្រុមហ៊ុនមួយទៀតដែលទើបចុះបញ្ជីថ្មីដែរនោះ មានគម្រោងបង្កើតរោងចក្របោះពុម្ព និងផលិតផលិតផលវិចខ្ចប់ មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូលយ៉ាល់គ្រុបភ្នំពេញ។ជុំវិញឱកាសការវិនិយោគនេះ បើតាមរយបាយការណ៍ក្រសួងសេដ្ឋកិច្ច និងហិរញ្ញវត្ថុ ក្នុងរយៈពេល ១០ខែ ឆ្នាំ២០២២ នេះ, ស្ថានភាពវិនិយោគ បានបង្ហាញពីភាពល្អប្រសើរបន្តិច, ជាក់ស្ដែងគម្រោងវិនិយោគឯកជនសរុប មានចំនួន ១១៦ គម្រោង បានកើនឡើង ២៤ គម្រោង, និងមានលទ្ធភាពបង្កើតកម្លាំងពលកម្មថ្មីប្រមាណជា ១០៥ ពាន់នាក់ កើនឡើងជាង ៤៣%និងទុនវិនិយោគសរុប ២ ៧៥៨ លានដុល្លារអាមេរិក កើនឡើងជាង ១៣៦% ធៀបនឹងរយៈពេលដូចគ្នាឆ្នាំមុន៕អត្ថបទ៖ សុន រ៉ាឌី

ក្រសួងពាណិជ្ជកម្ម នឹងបង្កើតគោលនយោបាយជាតិ«ម្រេច» ដើម្បីជំរុញការដាំម្រេចសម្រាប់នាំចេញ

ភ្នំពេញ៖ ក្រសួងពាណិជ្ជកម្ម គ្រោងរៀបចំគោលនយោបាយជាតិស្តីពី «ម្រេច» ដើម្បីបង្កើនប្រសិទ្ធិភាពនៃប្រកួតប្រជែងទីផ្សារអន្តរជាតិ និងបង្កើននូវតម្លៃបន្ថែមក្នុងខ្សែច្រវាក់ផលិតកម្មម្រេចកម្ពុជា។ ឯកឧត្តម វ៉ា រុតសាន ប្រធានក្រុមទីប្រឹក្សានៃក្រសួងពាណិជ្ជកម្ម មានប្រសាសន៍ថា ក្រសួងពាណិជ្ជកម្ម នឹងជំរុញការរៀបចំគោលនយោបាយជាតិស្តីពី«ម្រេច» ក្នុងគោលដៅបង្កើនឧត្តមភាពប្រកួតប្រជែងរបស់កម្ពុជាឱ្យអស់លទ្ធភាព ។ ការបង្កើតគោលនយោបាយជាតិម្រេចនេះ គឺផ្តោតលើការអភិវឌ្ឍផ្ទៃដីដំាដុះម្រេចសរីរាង្គ ឬដាំម្រេចសុវត្ថិភាពខ្ពស់។ឯកឧត្តម វ៉ា រុតសាន មានប្រសាសន៍ថា កម្ពុជា អាចអភិវឌ្ឍន៍ដីដាំម្រេចសរីរាង្គបាន ។ នេះ ជាឧត្តមភាពរបស់កម្ពុជា ដែលអាចដកស្រង់យកចំណុចខ្លាំងមកប្រើប្រាស់ដើម្បីអភិវឌ្ឍន៍វិស័យម្រេចរបស់កម្ពុជាឱ្យអស់លទ្ធភាព។សម្រាប់គោលនយោបាយជាតិម្រេចនេះ គឺមានលក្ខណៈមិនខុសគ្នាពីគោលនយោបាយជាតិស្តីពីស្វាយចន្ទី ប៉ុន្មានឡើយ។ គោលនយោបាយទាំងនេះ បង្កើតឡើងដើម្បីបង្កើនទិន្នផលដំណាំ, កាត់បន្ថយថ្លៃដើម, បង្កើនតម្លៃបន្ថែមក្នុងខ្សែច្រវាក់ផលិតកម្ម, ជំរុញការវិនិយោគ និងជំរុញការនាំចេញជាដើម។ជុំវិញបញ្ហាកសិកម្មកម្ពុជានេះ ឯកឧត្តម វ៉ា រុតសាន លើកទឹកចិត្តដល់ភាគីពាក់ព័ន្ធទាំងអស់ ជាពិសេសវិស័យឯកជនត្រូវខិតខំរៀបចំនិងធ្វើយ៉ាងម៉េចឱ្យមានតម្លៃបន្ថែមក្នុងផលិតកម្ម និងដំណើរការចេញនាំម្រេចទៅកាន់ទីផ្សារពិភពលោកឱ្យកាន់តែប្រសើរ។សម្រាប់គោលនយោបាយជាតិស្តីពីម្រេចដែលក្រសួងពាណិជ្ជកម្មរៀបចំឡើងនេះ សហព័ន្ធម្រេច និង គ្រឿងទេសកម្ពុជា បានត្រៀមខ្លួនជាស្រេច ក្នុងការចូលរួមផ្តល់ធាតុចូល និងជួយសម្របសម្រួលទីផ្សារក្នុងនិងក្រៅស្រុក ។លោក ម៉ាក់ នី ប្រធានសហព័ន្ធម្រេច និង គ្រឿងទេសកម្ពុជា បានលើកឡើងថា នៅពេលភាគីពាក់ព័ន្ធទាំងអស់សហការគ្នា រួមមានទាំងផលិតករ ក្រុមហ៊ុនកែច្នៃនាំចេញ ក្រុមហ៊ុនផ្គត់ផ្គង់ផលិត-សេវាក្នុងវិស័យកសិកម្មឧស្សាហកម្ម រួមគ្នាអនុវត្តគោលនយោបាយជាតិស្តីពី«ម្រេច»នោះ វានឹងធ្វើឱ្យវិស័យម្រេចកម្ពុជាកាន់តែរីកចម្រើន ខណៈដែលកម្ពុជាកំពុងបើកទីផ្សារសេរីជាមួយប្រទេសក្នុងពិភពលោកជាបន្តបន្ទាន់។របាយការណ៍ពីក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ក្នុងឆ្នាំ២០២១ កម្ពុជាមានផ្ទៃដីដាំដុះម្រេចសរុប ៦, ៩៣៥ហិកតា ដែលផ្តល់ទិន្នផលបាន ១៨ ៣៧៣តោន។ សម្រាប់រយៈពេល១១ខែ ឆ្នាំ២០២២ កម្ពុជានាំចេញបាន ១៨ ០០០តោន។ ក្នុងនោះ ទីផ្សារធំជាងគេរបស់កម្ពុជា គឺប្រទេសវៀតណាម ខណៈអាល្លឺម៉ង់ស្ថិតនៅលេខ២។ម្រេចកម្ពុជាបានចូលដល់ទីផ្សារប្រទេសចំនួន១៧ ក្នុងពិភពលោក ដែលក្នុងនោះមានប្រទេសវៀតណាម សហរដ្ឋអាម៉េរិក កាណាដា សហភាពអឺរ៉ុប តៃវ៉ាន់ កូរ៉េខាងត្បូង ជប៉ុន អ៊ីស្រាអែល និងប្រទេសឥណ្ធា ជាដើម៕ អត្ថបទ៖ វណ្ណៈ

វិស័យដឹកជញ្ជូនរំពឹងកើនឡើង គាំទ្រដោយការដឹកជញ្ជូនវិស័យទេសចរណ៍ និងពាណិជ្ជកម្ម

ភ្នំពេញ៖ រាជរដ្ឋាភិបាលរំពឹងថា នៅក្នុងឆ្នាំ ២០២៣ វិស័យដឹកជញ្ជូន និងគមនាគមន៍នៅកម្ពុជា ត្រូវបានរំពឹងថា នឹងបន្តកើនឡើង គាំទ្រដោយការបន្តងើបឡើងនសកម្មភាពដឹកជញ្ជូនបម្រើឱ្យវិស័យទេសចរណ៍ និងពាណិជ្ជកម្ម ស្របពេលការបន្តកើនឡើងនូវការប្រើប្រាស់អ៊ីនធឺណិត និងឌីជីថលក្នុងអាជីវកម្ម ។ទាក់ទងវិស័យដឹកជញ្ជូន និងគមនាគមន៍ នៅក្នុងឆ្នាំ ២០២៣ រាជរដ្ឋាភិបាលគ្រោងចំណាយមូលធនថវិកាជាតិជាច្រើនសន្ធឹកសន្ធាប់ ក្នុងទិសដៅគាំទ្រដល់ការអនុវត្តកម្មវិធីវិនិយោគសាធារណៈ ៣ ឆ្នាំរំកិល (២០២៣-២០២៥) ជាពិសេសការអនុវត្តកម្មវិធីយុទ្ធសាស្រ្តស្តារ និងជំរុញកំណើនសេដ្ឋកិច្ច ក្នុងការរស់ជាមួយកូវីដ ១៩ តាមគន្លងប្រក្រតីភាពថ្មី ក្នុងនោះហេដ្ឋារចនាសម្ព័ន្ធត្រូវកសាង និងជួសជុលដូចជា ផ្លូវថ្នល់ ស្ពាន លូ និងការជួសជុលឡើងវិញនូវហេដ្ឋារចនាសម្ព័ន្ធដែលរងប៉ះពាល់ទឹកជំនាន់ជាដើម។ ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា លើកឡើងថា បន្ទាប់ពីរាជរដ្ឋាភិបាលបើកដំណើរការសេដ្ឋកិច្ចឡើងវិញ ទោះបីតម្លៃប្រេងមិនទាន់ចុះដូចដើម តែសេវាដឹកជញ្ជូនមានតម្លៃថេរល្អ ដោយអាចវាយតម្លៃបាន នៅក្នុងកម្រិតមួយសមរម្យ ក្នុងនោះប្រសិនប្រេងឥន្ធនៈនឹងបន្តចុះ ថ្លៃនៃការដឹកជញ្ជូនអាចនឹងចុះបន្ថែមទៀត ដែលជាផ្នែកមួយជួយកាត់បន្ថយនូវខ្ទង់ចំណាយ។ចំណែក លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា បានលើកឡើងថា ទាក់ទងការដឹកជញ្ជូននេះ នៅពេលវិបត្តិជំងឺកូវីដ ១៩ កំពុងរីករាលដាល ជាពិសេសស្ថានភាពសង្គ្រាមរុស្សី-អ៊ុយក្រែន បានធ្វើឲ្យប៉ះពាល់យ៉ាងធ្ងន់ធ្ងរ អំពីតម្លៃសេវាដឹកជញ្ជូនជាពិសេសតាមកប៉ាល់ តែមកដល់ពេលនេះតម្លៃនៃការដឹកជញ្ជូនកប៉ាល់នេះ បានធ្លាក់ចុះបន្តិចបន្ទួចតែប៉ុណ្ណោះ ខណៈថ្លៃប្រេងនៅមានតម្លៃមួយខ្ពស់នៅឡើយ, ដែលបញ្ហានេះ ធ្វើឲ្យក្រុមហ៊ុនដឹកជញ្ជូន គិតសេវាទៅតាមស្ថានភាពជាក់ស្តែង ក្នុងនោះក៏មានក្រុមហ៊ុនមួយសុខចិត្តខាតបង់ ដើម្បីរក្សាអតិថិជនរបស់ខ្លួនផងដែរ។ លោកឧកញ៉ា បញ្ជាក់ថា៖ ចំពោះសេវាថ្លៃនៃការដឹកជញ្ជូនវិញ គឺមានតម្លៃសមស្របទៅនឹងការធ្វើពាណិជ្ជកម្មក្នុងពេលបច្ចុប្បន្ន តែអ្វីដែលជាការព្រួយបារម្ភណ៍ គឺការធ្លាក់ចុះគ្មានទំនិញដឹកជញ្ជូនទៅវិញ ខណៈមកដល់ពេលនេះ សេវសាដឹកជញ្ជូនបានធ្លាក់ចុះជាច្រើន ក្នុងរង្វង់ប្រមាណពី ៣០ ទៅ ៤០ ភាគរយ, ចំណែកស្ថានភាពទៅថ្ងៃខាងមុខ គឺមិនទាន់បានអាចធ្វើការវាយតម្លៃបាននៅឡើយ ៕អត្ថបទ៖ សុន រ៉ាឌី

កសិករគំរូនៅឃុំអណ្តូងទឹកប្រមូលផលត្រសក់ផ្អែមជាបណ្តើរៗហើយ ខណៈបញ្ជាទិញច្រើន

ភ្នំពេញ៖ កសិករមួយគ្រួសារដែលគេចាត់ទុកថា ជាកសិករគំរូនៅក្នុងភូមិជីត្រេះ ឃុំអណ្តូងទឹក ស្រុកបូទុមសាគរ ខេត្តកោះកុង ផ្តើមប្រមូលផលត្រសក់ផ្អែមរបស់ខ្លួនជាបណ្តើរៗហើយ ក្រោយដាំដុះ៣ខែមកនេះ។អ្នកស្រី ឡាយ រ៉ន និងលោក លាង នេត បានឱ្យដឹងនៅថ្ងៃទី២៥ ខែធ្នូ ឆ្នាំ២០២២ថា ទិន្នផលផ្លែត្រសក់ផ្អែម ឆ្នាំនេះហុចផលល្អប្រសើរណាស់ បើធៀបនឹងការដាំសាកល្បងកាលពីឆ្នាំទៅ។ ឥឡូវនេះកំពុងប្រមូលផលជាបណ្តើរៗហើយ អាចថា នៅថ្ងៃទី៣០ ឬ៣១ ខែធ្នូ ខាងមុខ ទើបប្រមូលបានពេញលេញតែម្តង។អ្នកស្រី ឡាយ រ៉ន បានបន្ដទៀតថា ត្រសក់ផ្អែមទុំ ត្រូវបានលក់ចេញទៅកាន់ទីផ្សារក្នុង១គីឡូក្រាមថ្លៃ៥០០០រៀល ភាគច្រើនឈ្នួញនៅផ្សារកូនកុក ឃុំកោះស្តេច ស្រុកគិរីសាគរ បញ្ជាទិញយកទៅលក់បន្ត និងមួយផ្នែកទៀតដាក់តាំងលក់នៅផ្ទះ។ ដាំណាំត្រសក់ផ្អែមជា ប្រភេទដាំណាំមួយរើសដីបន្តិចសម្រាប់ការបង្កបង្កើនផល ប្រសិនជាដីណាមិនផ្តល់អំណោយទានពិតជាពិបាកនឹងជោគជ័យបានផលណាស់។លោក នាង ពិសិដ្ឋ អនុប្រធានការិយាល័យកសិកម្ម ធនធានធម្មជាតិ និងបរិស្ថានស្រុកបូទុមសាគរ ថ្លែងថា គ្រួសារអ្នកស្រី ឡាយ រ៉ន និងលោក លាង នេត ជាកសិករគំរូម្នាក់នៅក្នុងភូមិជីត្រេះ ដោយពួកគាត់ជាអ្នកអំណត់ប្រឹងប្រែងធ្វើកសិកម្មជាខ្លាំងបូករួមនឹងចំណេះដឹងបច្ចេកទេសពីមន្រ្តីជំនាញ។លោក រម្លឹកដែរថា កាលពីឆ្នាំទៅ កសិករដាំដំណាំត្រសក់ផ្អែមបានទទួលចំណូលប្រមាណ៤លានរៀលពីការប្រមូល ។ ដោយឡែកឆ្នាំ២០២២នេះ ពួកគេអាចកើនប្រាក់ចំណូលបន្ថែម ដើម្បីដោះស្រាយផ្គត់ផ្គង់ជីវភាពរស់នៅបានយ៉ាងសមរម្យមិនពិបាកដូចពេលមិនចាប់មុខរបរធ្វើកសិកម្មបែបសិរីរាង្គនេះ។គួរជម្រាបថា ស្រុកបូទុមសាគរ ត្រូវបានគេចាត់ទុកថា មូលដ្ឋានស្រុកមួយមានការដាំដុះកសិកម្មជាច្រើនប្រភេទ រួមមាន៖ ឪឡឹកលឿន ខាត់ណាផ្កា ត្រសក់ទ្រើង ត្រប់ ស្ពឹក សាឡាត់ និងចិញ្ចឹមត្រី មាន់ ទា ជាដើម។ ហើយគ្រប់ទិន្នផលដែលប្រមូលបាន វាមិនពិបាកលក់ចេញឡើយ ពោលឱ្យតែថាមានទិន្នផលសម្រាប់នាំចេញ៕អត្ថបទ៖ ឈឹម មករា

សហព័ន្ធម្រេច និងគ្រឿងទេសកម្ពុជា ជំរុញផលិតកម្មម្រេច និងនាំចេញទៅកាន់ទីផ្សារអន្តរជាតិ

ភ្នំពេញ៖ សហព័ន្ធម្រេច និងគ្រឿងទេសកម្ពុជា បានរៀបចំវេទិកាប្រមើលមើលម្រេចកម្ពុជា ដើម្បីពិភាក្សានិរន្តភាពផលិតកម្មម្រេច និងជំរុញការនាំចេញផលិតផលម្រេច និងគ្រឿងទេសកម្ពុជាទៅកាន់ទីផ្សារអន្តរជាតិ។វេទិកាស្តីពីប្រមើលមើលម្រេចកម្ពុជា ពេញមួយថ្ងៃ ត្រូវបានរៀបចំនៅថ្ងៃទី២៣ ខែធ្នូ នៅសណ្ឋាគារ សាន់វ៉េភ្នំពេញ ដោយមានការអញ្ជើញចូលរួមពីប្រធានសហព័ន្ធម្រេច និងគ្រឿងទេសកម្ពុជា លោក ម៉ាក់ នី ឯកឧត្តម វ៉ា រុតសាន ប្រធានក្រុមទីប្រឹក្សាក្រសួងពាណិជ្ជកម្ម ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ ក្រុមហ៊ុនកែច្នៃ និងនាំចេញកសិករម្រេច សហគមន៍កសិកម្ម និងដៃគូអភិវឌ្ឍន៍។ថ្លែងក្នុងពិធីនេះ លោក ម៉ាក់ នី មានប្រសាសន៍ វេទិកាស្តីពីការប្រមើលមើលម្រេចកម្ពុជា ឆ្នាំ២០២២នេះ នឹងផ្តល់នូវឱកាសជូនដល់សមាជិករបស់ខ្លួន និងអ្នកចូលរួម អាចទទួលបានព័ត៌មាន និងយល់ដឹងបន្ថែមអំពីស្ថានភាពនៃវិស័យម្រេចជាសកល ព្រមទាំងរបាំងបច្ចេកទេស ក៏ដូចជាឧសគ្គផ្សេងៗលើទីផ្សារនាំចេញផលិតផលម្រេចទៅកាន់ពិភពលោកជាដើម។ក្នុងវេទិកានេះ ក៏មានការធ្វើបទបង្ហាញ វគ្គចែករំលែកបទពិសោធន៍ និងវេទិកាពិភាក្សាដោយសមាជិក កសិករ ក្រុមអ្នកផលិតម្រេច និងក្រុមហ៊ុនវេចខ្ចប់ កែច្នៃ និងនាំចេញ។ក្នុងអំឡុងពេលវេទិកានេះ សហព័ន្ធម្រេច និងគ្រឿងទេសកម្ពុជា នឹងចែករំលែកដល់អ្នកចូលរួមទាំងអស់នូវសមិទ្ធផលការងារម្រេចបានកន្លងមក បញ្ហាប្រឈមផ្សេងៗ និងផែនការអនាគតរបស់ខ្លួនផងដែរ។ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លើកឡើងថា វេទិកានេះ នឹងផ្តល់នូវចំណេះដឹងបន្ថែមទាក់ទងនឹងបច្ចេកទេសផលិត ជាពិសេសទីផ្សារ និងតម្រូវការប្រើប្រាស់ក្នុងស្រុក និងទីផ្សារអន្តរជាតិ ដែលម្ចាស់ចម្ការម្រេច សហគមន៍ម្រេច និងក្រុមហ៊ុននាំចេញ អាចធ្វើការនាំចេញទៅកាន់ទីផ្សារបរទេស។បច្ចុប្បន្ន កម្ពុជាមានផ្ទៃដីចម្ការម្រេច ប្រមាណ ៦ ៩៣៥ហិកតា ផ្តល់ទិន្នផលប្រមាណ ១៨ ៣៧៣តោន ក្នុងមួយឆ្នាំ។ក្រសួងកសិកម្ម រុក្ខាប្រមាញ់ និងនេសាទ បានជំរុញដល់កសិករ ម្ចាស់រោងចក្រកែច្នៃ ឬវេចខ្ចប់ម្រេច ទាំងអស់ ប្រញាប់ដាក់ពាក្យស្នើសុំចុះបញ្ជីចម្ការ និងរោងចក្រកែច្នៃរបស់ខ្លួន នៅអគ្គនាយកដ្ឋានកសិកម្ម សម្រាប់ការនាំចេញម្រេចទៅទីផ្សារចិន។បន្ទាប់ពីដាក់ពាក្យរួច មន្រ្តីជំនាញនៃអគ្គនាយកដ្ឋានកសិកម្ម នឹងចុះវាយតម្លៃស្របតាមនីតិវិធីបច្ចេកទេស ដែលមានចែងក្នុងពិធីសារ។ ជាមួយគ្នានេះ អគ្គនាយដ្ឋានកសិកម្ម គ្រោងបញ្ជូនឈ្មោះចម្ការ និងរោងចក្រកែច្នៃ និងវេចខ្ចប់ម្រេច ទៅកាន់ភាគីចិននៅដើមខែមករា ឆ្នាំ២០២៣ខាងមុខ ដើម្បីពិនិត្យ និងវាយតម្លៃបញ្ចប់ មុនឈានដល់ការនាំចេញជាផ្លូវការ ៕ អត្ថបទ៖ ជា វណ្ណៈ

កម្ពុជារំពឹងថា នឹងទទួលបានភ្ញៀវទេសចរណ៍អន្តរជាតិ ៣លាននាក់ សម្រាប់ឆ្នាំ២០២៣

ភ្នំពេញ៖ កម្ពុជាអាចនឹងទទួលបានទេសចរអន្តរជាតិច្រើនជាង ៣លាននាក់ ខណៈសម្រាប់ពេញមួយឆ្នាំ២០២២នេះ កម្ពុជារំពឹងថា នឹងទទួលបានទេសចរអន្តរជាតិច្រើនជាង ២,២លាននាក់ និងទេសចរផ្ទៃក្នុង ច្រើនជាង ១៣លាននាក់។នៅក្នុងពិធីបិទសិក្ខាសាលាផ្សព្វផ្សាយសមិទ្ធផល នៃការអនុវត្តកម្មវិធីពង្រឹងសមត្ថភាពពាណិជ្ជកម្មក្នុងវិស័យទេសចរណ៍កាលពីរសៀលថ្ងៃទី២២ ធ្នូ ឆ្នាំ២០២២កន្លងទៅ ឯកឧត្តម ថោង ខុន រដ្ឋមន្រ្តីក្រសួងទេសចរណ៍ បានលើកឡើងថា ការរំពឹងទុករបស់កម្ពុជា ថានឹងអាចទទួលបានទេសចរអន្តរជាតិច្រើនជាង ៣លាននាក់ នៅក្នុងឆ្នាំ២០២៣ខាងមុខនេះ គឺដោយសារជាឆ្នាំដែលកម្ពុជា នឹងធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម លើកទី៣២ ឆ្នាំ២០២៣។ឯកឧត្តមរដ្ឋមន្រ្តី បានលើកឡើងបន្ត ជាចក្ខុវិស័យ ការអភិវឌ្ឍវិស័យទេសចរណ៍កម្ពុជា ត្រូវផ្អែកជាចំបងលើសក្តានុពលដែលយើងមាន ដូចជា កត្តាធនធានវប្បធម៌ និងធម្មជាតិ, កត្តាភូមិសាស្រ្ត, និងកត្តាប្រជាសាស្រ្ត ជាមួយនឹងការគិតគូរជាប់ជាប្រចាំពីការប្រែប្រួលឥតឈប់ឈរនៃតម្រូវការរបស់ភ្ញៀវទេសចរជាតិ និងអន្តរជាតិ ព្រមទាំងការវិវត្តយ៉ាងឆាប់រហ័សនៃបរិបទសេដ្ឋកិច្ច-សង្គម ដែលមានទាំងកាលានុវត្តភាពថ្មី និងបញ្ហាប្រឈមថ្មី។ ក្នុងន័យនេះ យើងនៅមានការងារជាច្រើនទៀត ដែលត្រូវខិតខំធ្វើ និងបន្តធ្វើ ដើម្បីស្តារកំណើនទេសចរណ៍កម្ពុជាពីវិបត្តិជំងឺកូវីដ-១៩។ឯកឧត្តម ថោង ខុន បានអំពាវនាវបន្ថែមដែរ ទៅដល់គ្រប់ក្រសួង-ស្ថាប័ន, អាជ្ញាធរគ្រប់លំដាប់ថ្នាក់, រដ្ឋបាលថ្នាក់ក្រោមជាតិ, វិស័យឯកជន, ប្រជាពលរដ្ឋ និងភ្ញៀវទេសចរ ព្រមទាំងគ្រប់ភាគីពាក់ព័ន្ធទាំងអស់ ឲ្យបន្តចូលរួមគាំទ្រដល់កិច្ចខិតខំប្រឹងប្រែងក្នុងការស្តារវិស័យទេសចរណ៍កម្ពុជា ឆ្ពោះទៅរកភាពរីកចម្រើនរុងរឿងនៃ “កម្ពុជា៖ ព្រះរាជាណាចក្រអច្ឆរិយៈ ផ្តល់ភាពកក់ក្តៅ”។សូមបញ្ជាក់ថា គិតត្រឹមរយៈពេល ១១ខែ ឆ្នាំ២០២២នេះ កម្ពុជាទទួលបានភ្ញៀវទេសចរអន្តរជាតិប្រមាណជាង ១,៩១លាននាក់ កើនឡើងជាង ១ពាន់ភាគរយ ធៀបនឹងរយៈពេលដូចគ្នាឆ្នាំ២០២១។ រីឯភ្ញៀវទេសចរផ្ទៃក្នុងធ្វើដំណើរកម្សាន្តក្នុងប្រទេសមានភ្ញៀវទេសចរជាតិមានចំនួនជាង ១១,៦៥លាននាក់ កើនឡើងក្នុងអត្រា ១៨១% ធៀបរយៈពេលដូចគ្នាឆ្នាំ២០២១ និងភ្ញៀវទេសចរបរទេសផ្ទៃក្នុង ជាង ១,៦៤លាននាក់ កើនឡើងក្នុងអត្រា ៦០២% ធៀបរយៈពេលដូចគ្នាឆ្នាំ២០២១៕អត្ថបទ៖ បូរ៉ាវី

កម្ពុជា-អូស្ត្រាលី បន្តជំរុញកិច្ចសហប្រតិបត្តិការផ្នែកសេដ្ឋកិច្ច-ពាណិជ្ជកម្ម

ភ្នំពេញ៖ រដ្ឋាភិបាលកម្ពុជា និងរដ្ឋាភិបាលអូស្ត្រាលី បានបញ្ជាក់សារជាថ្មីនូវការប្តេជ្ញាចិត្ត ក្នុងការបន្តកិច្ចសហប្រតិបត្តិការឱ្យកាន់តែជិតស្និទ្ធ សំដៅពង្រឹង ពង្រីក និងជំរុញទំនាក់ទំនងសេដ្ឋកិច្ច-ពាណិជ្ជកម្ម និងវិនិយោគ រវាងប្រទេសទាំងពីរឱ្យកាន់តែរីកចម្រើនបន្ថែមទៀតក្នុងថ្ងៃអនាគត។ក្នុងឱកាសទទួលជួបការងារ និងជម្រាបលារបស់ ឯកឧត្តម ប៉ាប្លូ កាំង (PABLO Kang) ឯកអគ្គរាជទូតអូស្រ្តាលីប្រចាំកម្ពុជា ដែលនឹងចប់អាណត្តិ កាលពីរសៀលថ្ងៃទី២២ ធ្នូ ឆ្នាំ២០២២កន្លងទៅ នៅទីស្តីការក្រសួង ឯកឧត្តម ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម បានសម្ដែងនូវការស្វាគមន៍ និងអបអរសាទរចំពោះ ឯកឧត្តមឯកអគ្គរាជទូត ដែលបានបំពេញបេសកកម្មប្រកបដោយជោគជ័យនៅកម្ពុជា ព្រមទាំងបានកោតសរសើរចំពោះតួនាទី និងការចូលរួមចំណែកយ៉ាងសកម្មរបស់ឯកឧត្តមទូត ក្នុងការលើកកម្ពស់កិច្ចសហប្រតិបត្តិការនិងទំនាក់ទំនងកម្ពុជា-អូស្រ្តាលី ជាពិសេសលើវិស័យពាណិជ្ជកម្ម។ ជាមួយគ្នានេះដែរឯកឧត្តមរដ្ឋមន្រ្តី បានអបអរសាទរខួបលើកទី៧០ នៃទំនាក់ទំនងការទូតរវាងប្រទេសទាំងពីរ និងថ្លែងការអរគុណចំពោះរដ្ឋាភិបាល និងប្រជាជនអូស្ត្រាលី សម្រាប់ការគាំទ្រជាបន្តបន្ទាប់ ដល់ការអភិវឌ្ឍសេដ្ឋកិច្ច និងសង្គមកម្ពុជា ដែលក្នុងនោះរួមមានទាំងការឧបត្ថម្ភវ៉ាក់សាំងប្រឆាំងនឹងជំងឺកូវីដ-១៩ ដែលជាការចូលរួមចំណែកដល់យុទ្ធនាការចាក់វ៉ាក់សាំងរបស់រាជរដ្ឋាភិបាលកម្ពុជា។ ឯកឧត្តម ក៏បានថ្លែងអំណរគុណយ៉ាងស្មោះស្ម័គ្រចំពោះរដ្ឋាភិបាល និងប្រជាជនអូស្ត្រាលី ដែលបានផ្តល់ជំនួយក្រោមកម្មវិធីអភិវឌ្ឍន៍សេដ្ឋកិច្ចទ្វេភាគីថ្មី កម្ពុជា-អូស្ត្រាលី ក៏ដូចជាកម្មវិធីពាណិជ្ជកម្មតំបន់ (RT4D) ដែលក្នុងនោះ ក្រសួងពាណិជ្ជកម្ម នឹងទទួលបានអត្ថប្រយោជន៍ជាច្រើនពីកម្មវិធីទាំងនេះផងដែរ។ក្រសួងពាណិជ្ជកម្ម បានបញ្ជាក់ថា ក្នុងជំនួបនេះផងដែរ ភាគីទាំងពីរ ក៏បានស្វាគមន៍ចំពោះការសម្រេចបានជាដុំកំភួន នូវការចរចាដំទ្បើងកម្រិតនៃកិច្ចព្រមព្រៀងតំបន់ពាណិជ្ជកម្មសេរីអាស៊ាន-អូស្រ្តាលី-នូវែលសេទ្បង់ (AAZNFTA Upgrade) ដែលជាសមិទ្ធផលអាទិភាពសេដ្ឋកិច្ចមួយរបស់កម្ពុជាក្នុងនាមជាប្រធានអាស៊ានឆ្នាំ២០២២។ យោងតាមអគ្គនាយកដ្ឋានគយ និងរដ្ឋាករកម្ពុជា បានឲ្យដឹងថា ការនាំចេញ-នាំចូល រវាងប្រទេសកម្ពុជា-អូស្រ្តាលី គិតក្នុងរយៈពេល ៧ខែ ឆ្នាំ២០២២ មានទំហំទឹកប្រាក់សរុបចំនួនប្រមាណជាង ៣២០លានដុល្លារ មានការកើនឡើងជាង ១២៧% ប្រៀបធៀបរយៈពេលដូចគ្នាទៅនឹងឆ្នាំ២០២១ ដែលមានចំនួនប្រមាណ ១៤១លានដុល្លារ៕អត្ថបទ៖ បូរ៉ាវី

បណ្ដាញសង្គម

ព័ត៌មានថ្មីៗ

ក្រសួងការពារជាតិកម្ពុជា អំពាវនាវឱ្យកងទ័ពថៃ កំពុងឈរជើងនៅប្រាសាទតាក្របីអនុវត្តការងាររបស់ខ្លួនឱ្យបានត្រឹមត្រូវ និងការទទួសខុសត្រូវ

រដ្ឋមន្ត្រីការបរទេសបារាំងស្វាគមន៍ការសម្រេចរបស់ចិន ជុំវិញស្រាកូញាក់ ប៉ុន្តែប្រាប់ថា បញ្ហានៅតែមាន

ម៉ាឡេស៊ីដាក់ពន្ធប្រឆាំងការបង្ខូចតម្លៃលើផលិតផលដែក និងដែកថែបរបស់ចិន កូរ៉េខាងត្បូង និងវៀតណាម

ក្រុមប្រទេស BRICS នឹងថ្កោលទោសវិធានការពន្ធរបស់លោក Trump

ឯកឧត្តមរដ្ឋមន្ត្រី ជា វ៉ាន់ដេត ដឹកនាំកិច្ចប្រជុំលើកទី៧ របស់ គ.រ.ឌ. ពិនិត្យលើស្ថានភាព និងយន្តការនៃការទប់ស្កាត់ការវាយប្រហារសាយប័រ (Cyber Attack)

EU ត្រូវបានរាយការណ៍ថា គ្រោងស្តុកទុកធនធានរ៉ែសំខាន់ៗ អំឡុងពេលមានហានិភ័យភូមិសាស្ត្រនយោបាយ

អ៊ុយក្រែនឲ្យដឹងថា ខ្លួនបានវាយប្រហារអាកាសយានដ្ឋានយោធារុស្ស៊ី

ជើងជ្រូក និងស្លាបមាន់ បង្កកជិត ៤តោនត្រូវបានកម្លាំងជំនាញនៃអគ្គនាយកដ្ឋានសុខភាពសត្វ និងផលិតកម្មសត្វ ឆ្មក់បង្រ្កាប

លោក Trump៖ អាមេរិកនឹងចាប់ផ្តើមកិច្ចពិភាក្សាជាមួយចិន ជុំវិញកិច្ចព្រមព្រៀង TikTok សប្តាហ៍ក្រោយ

ជប៉ុនត្រៀមសម្រាប់ការរញ្ជួយដីបន្ថែមទៀត ខណៈអាជ្ញាធរច្រានចោលការឃោសនាបំផ្លើសពីថ្ងៃវិនាសកម្ម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877