នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឧបនាយករដ្ឋមន្ត្រីប្រចាំការ វង្សី វិស្សុត៖​ រាជរដ្ឋាភិបាលកំពុងកសាងនូវមូលដ្ឋានគ្រឹះរឹងមាំ ដើម្បីសម្រេចជាប្រទេសមានចំណូលខ្ពស់ឆ្នាំ២០៥០
ទួរគីកំពុងសិក្សាលទ្ធភាពនៃការនាំចេញគ្រាប់ស្វាយចន្ទីកែច្នៃពីកម្ពុជាទៅកាន់ប្រទេសរបស់ខ្លួន
កម្ពុជា-ហ្វីលីពីនផ្លាស់ប្តូរអនុស្សារណៈលើកទឹកចិត្តធុរជន និងជំរុញវិនិយោគក្នុងសហគមន៍ប្រទេសទាំងពីរ
កសិករធ្វើស្រែពឹងប្រព័ន្ធធារាសាស្ត្រគ្រប់ជ្រុងជ្រោយនៅស្រុកស្អាង ខេត្តកណ្ដាល ត្រៀមធ្វើស្រែលើកទីពីរ

សេដ្ឋកិច្ច និង កសិកម្ម

ក្រសួងសេដ្ឋកិច្ច ធ្វើបច្ចុប្បន្នភាពជំរុញការចុះបញ្ជីសារពើភណ្ឌទ្រព្យសម្បត្តិរដ្ឋឱ្យបានចប់ឆាប់ៗ

2024/11/12 03:02:08 pm        97
Facebook Telegram Linkin
ក្រសួងសេដ្ឋកិច្ច និងហិរញ្ញវត្ថុ ធ្វើបច្ចុប្បន្នភាពទីតាំងដីរបស់រដ្ឋ ការរៀបចំ​វិញ្ញាបនបត្រ​សម្គាល់​ម្ចាស់​អចលនវត្ថុ និងការចុះបញ្ជី សារពើភណ្ឌរបស់រដ្ឋ ដើម្បីជំរុញនៃការគ្រប់​គ្រង​ឱ្យ​បាន​ច្បាស់​លាស់ និងឱ្យបានចប់សព្វគ្រប់ក្នុងពេលឆាប់ ជាពិសេសការប្រមូល ចំណូលពីការ​ជួល​ដី​របស់​រដ្ឋ​ជាដើម​។ឯកឧត្តម យ៉េត វីណែល អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើក​ឡើង​នៅ​ក្នុង​វេទិកា​ពិភាក្សា ស្ដីពីបច្ចុប្បន្នភាព ទីតាំងដីរដ្ឋ ការរៀបចំវិញ្ញាបនបត្រសម្គាល់ម្ចាស់អចលនវត្ថុ និង​ការ​ចុះ​បញ្ជីសារពើភណ្ឌទ្រព្យសម្បត្តិរដ្ឋ នៅថ្ងៃម្សិលមិញនេះថា ជុំវិញ បញ្ហាដីរដ្ឋនេះ វាគ្មិន​បាន​លើក​ឡើង និងពិភាក្សាយ៉ាងផុលផុសនូវបញ្ហាជាច្រើន ជាពិសេសបញ្ហាប្រឈម ដែលយើង​ត្រូវ​តែ​រួម​គ្នា​ដោះស្រាយ ក្នុងគោលដៅរួមជំរុញឱ្យសម្រេចចេញលទ្ធផល ដើម្បី​ជា​គុណ​ប្រយោជន៍​របស់​រាជ​រដ្ឋាភិបាលរបស់កម្ពុជាទាំងមូល។ឯកឧត្តម បន្តថា ទាក់ទិនបញ្ហានេះ វាគឺជាសូចនកររួមគ្នា រវាងអង្គភាពកាន់កាប់, អង្គភាព​គ្រប់​គ្រង និងតួអង្គដែលមានការ ពាក់ព័ន្ធទាំងអស់ ជាក់ស្តែងនាឆ្នាំកន្លងមក គណៈកម្មការ​អន្តរ​ក្រសួង​បាន​ដាក់ទិសដៅ ដោយក្នុងនោះបណ្តារាជធានី-ខេត្ត ក៏បាន ជំរុញនៅតាម​មូលដ្ឋាន​របស់​ខ្លួន ឃើញការចុះបញ្ជីសារពើភណ្ឌទ្រព្យសម្បត្តិរដ្ឋមានការកើនឡើង ។ ចំណែក​បញ្ហា​ដែល​នៅ​សេស​សល់ យើងត្រូវរួមគ្នានូវគ្រប់ផ្នែកពាក់ព័ន្ធទាំងអស់ ដើម្បីដោះស្រាយបញ្ហាទាំងនេះ និង​ដាក់​ចេញ​ជា​វិធានការដោះស្រាយ រៀបចំជាផែនការ សកម្មភាព​សម្រាប់​អនុវត្ត​ជាក់​ស្ដែង​ក្នុង​ឆ្នាំ​២០២៥​។ នៅក្នុងកិច្ចពិភាក្សានេះ, ថ្នាក់ដឹកនាំក្រសួង និងស្ថាប័នពាក់ព័ន្ធ បានពិភាក្សាគ្នាយ៉ាងផុលផុស ដើម្បី​​ស្វែង​រក​សូចនករ មួយឱ្យបានជាក់លាក់ ដើម្បីអនុវត្ត​ការងារ​នេះ​ជំរុញ​ឱ្យ​សម្រេច​បាន​ជា​ផ្លែ​ផ្កា ជុំវិញការធ្វើប័ណ្ណកម្មសិទ្ធដីរបស់រដ្ឋ ដែលបានចុះបញ្ជី សារពើភណ្ឌទ្រព្យសម្បត្តិរដ្ឋ ឱ្យ​បាន​ចប់​សព្វ​គ្រប់​ក្នុងពេលឆាប់ៗ។ជុំវិញទ្រព្យសម្បត្តិរដ្ឋ រាជរដ្ឋាភិបាលបានកំពុងពង្រឹងជាបន្តបន្ទាប់ លើការ​គ្រប់​គ្រង​ទ្រព្យ​សម្បត្តិ​រដ្ឋ​ ដើម្បីធានាឱ្យការគ្រប់គ្រង និងការប្រើប្រាស់ទ្រព្យទាំងឡាយរបស់រដ្ឋ ប្រកបដោយប្រសិទ្ធភាព ស័ក្ដិ​សិទ្ធភាព តម្លាភាព និងគណនេយ្យភាព, ក្នុងនោះ រាជរដ្ឋាភិបាលបានដាក់​ឱ្យ​អនុវត្ត​ច្បាប់​ស្ដីពី​ការ​គ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ និងលិខិតបទដ្ឋានផ្សេងទៀត ដើម្បីពង្រឹងការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋឱ្យកាន់តែមានប្រសិទ្ធភាព និងបានដាក់​ឱ្យ​អនុវត្ត​អនុក្រឹត្យ ស្ដីពីលក្ខខណ្ឌ និងនីតិវិធីនៃ ការចុះបញ្ជីដីរដ្ឋ ដើម្បីធានា​ការពារ​បន្ថែម​ទៀត​នូវ​កម្ម​សិទ្ធិ និងសិទ្ធិផ្សេងទៀតលើដីរបស់រដ្ឋ។ យន្តការគ្រប់គ្រង និងសម្របសម្រួលនានា ក៏​ត្រូវ​បាន​រាជ​រដ្ឋាភិបាលបង្កើតឡើងរួមមាន៖ គណៈកម្មការអន្តរក្រសួង ដើម្បីពិនិត្យ និងធ្វើបច្ចុប្បន្នភាព ទីតាំង​ដីរដ្ឋ ដែលបានចុះក្នុងបញ្ជីសារពើភណ្ឌទ្រព្យសម្បត្តិរដ្ឋរបស់ក្រសួង-ស្ថាប័ន និង​រដ្ឋបាល​ថ្នាក់​ក្រោម​ជាតិ ដើម្បីរៀបចំធ្វើវិញ្ញាបន បត្រសម្គាល់ម្ចាស់អចលនវត្ថុ, គណៈកម្មាធិការ​គ្រប់​គ្រង​ដី​រដ្ឋ​ថ្នាក់​រាជធានី-ខេត្ត និងក្រុមការងារដីរដ្ឋថ្នាក់ក្រុង ស្រុក ខណ្ឌ។ សូមបញ្ជាក់ថា នៅក្នុងឆ្នាំ ២០២៥ ខាងមុខនេះ រាជរដ្ឋាភិបាល​គ្រោង​ប្រមូល​ចំណូល​មិន​មែន​សារ​ពើ​ពន្ធ ឱ្យបានចំនួនជាង ៣ ទ្រីលាន រៀល, ក្នុងនោះការប្រមូល​ចំណូល​ផល​ទុន​នៃ​ទ្រព្យ​សម្បត្តិ​រដ្ឋ​ជាង ៥២០ ប៊ីលានរៀល និងផលទុនជួលទ្រព្យសម្បត្តិ ការផ្តល់សេវា និង ផលទុន​ពី​ការ​រួម​ចំណែក​ផ្សេង​ៗ ប្រមាណ ២.៧ ទ្រីលានរៀលផងដែរ៕ អត្ថបទ៖ សុន រ៉ាឌី

ក្រសួងឧស្សាហកម្ម នឹងដាក់ចេញវិធានការ អភិវឌ្ឍសហគ្រាសធុនមីក្រូ តូច និងមធ្យមឱ្យរស់រវើក

2024/11/12 02:47:51 pm        108
Facebook Telegram Linkin
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងបន្តរៀបចំ ជំរុញ​កិច្ច​សហ​ប្រតិបត្តិការ​ជាមួយដៃគូអភិវឌ្ឍន៍ជាតិ-អន្តរជាតិ និងវិស័យពាក់ព័ន្ធ ដើម្បីរៀបចំភាពប្រទាក់ក្រឡា ការដាក់ចេញវិធានការជាក់លាក់ ដើម្បីអភិវឌ្ឍវិស័យសហគ្រាសធុនមីក្រូ តូច និងមធ្យម ប្រកប​ដោយ​សង្គតិភាព ស្ថេរភាព និរន្តរភាព និងបរិយាបន្ន។ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើក​ឡើង​នៅ​ក្នុង​ទិវាសហគ្រិនស្ត្រី កម្ពុជា ឆ្នាំ២០២៤ "ការពង្រឹងភាពអង់អាចស្រ្តីក្នុងសេដ្ឋកិច្ចបៃតង" ម្សិល​មិញនេះថា សម្រាប់វិស័យសហគ្រាសធុនមីក្រូ តូច និង មធ្យម រាជរដ្ឋាភិបាល​កំពុង​សស្រាក់​សស្រាំ អនុវត្តកម្មវិធីនយោបាយ ២០២៣-២០២៨, យុទ្ធសាស្រ្តបញ្ចកោណដំណាក់កាលទី១, ផែនការ​យុទ្ធសាស្ត្រអភិវឌ្ឍន៍ជាតិ, គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥, ក្របខណ្ឌគោល នយោបាយសេដ្ឋកិច្ច និងសង្គម​ឌីជីថល​កម្ពុជា​ឆ្នាំ​២០២១-២០៣៥, យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ ២០២៣-២០២៨, គោល​នយោបាយជាតិសម្រាប់ផលិតផលយុទ្ធសាស្ត្រអាទិភាព, ការកែសម្រួល និងកែលម្អ​សេវា​សាធារណៈ​របស់ក្រសួង ស្ថាប័ន ក៏ដូចជាការលើកទឹកចិត្ត និងការបន្តរៀបចំ​លិខិតបទដ្ឋាន​គតិ​យុត្ត​គាំទ្រពា​ក់ព័ន្ធនានាបន្ថែមទៀត។ ឯកឧត្តម បន្តថា ក្នុងអន្តរកាល​ដែលកម្ពុជាកំពុងត្រៀមខ្លួ​ន​ចាក​ចេញ​ពី​ស្ថាន​ភាព​ជា​ប្រទេស​អភិវឌ្ឍន៍​តិចតួច និងការប្រើ ប្រាស់បច្ចេកវិទ្យានៃបដិវត្តន៍ឧស្សាហកម្ម ៤.០, សហគ្រាសធុនមីក្រូ តូច និងមធ្យម ក៏នឹងជួបប្រទះបញ្ហាប្រឈមជាបន្តបន្ទាប់ដូចជា ការកសាង​សមត្ថភាព​ទាំង​ផ្នែក​បច្ចេក​ទេស និងបច្ចេកវិទ្យា, ការពង្រឹងភាពអនុលោម និងស្តង់ដារផលិតផល សេវារបស់ខ្លួន, ការ​ពង្រីក មាត្រដ្ឋាន និងការពង្រឹងប្រសិទ្ធភាព រួមទាំងលទ្ធភាពប្រកួតប្រជែងអាជីវកម្ម ផលិតកម្ម និង​ផលិតផល, ការប្រកួតប្រជែងទីផ្សារជាតិ និងអន្តរជាតិជាដើម សុទ្ធសឹងជាកត្តាចាំបាច់ ដែល​ត្រូវ​មាន​ការត្រៀមខ្លួនថែមទៀត ដោយសហគ្រិនខ្លួនឯង និងការគាំទ្រជ្រោម ជ្រែងពីគ្រប់​បណ្តា​ភាគី​ពាក់ព័ន្ធ។ ជុំវិញបញ្ហានេះ, ឯកឧត្តម ហែម វណ្ណឌី អំពាវនាវឱ្យសហគ្រាសធុនមីក្រូ តូច និងមធ្យម និង​សិប្បកម្ម​ប្រើប្រាស់ការចុះបញ្ជី និងការ ខិតខំបំពេញអនុលោមភាព ជាគុណ​ប្រយោជន៍​ដល់​សហ​គ្រាស​ខ្លួន និងជួយឱ្យក្រសួងស្ថាប័ន អាចគ្រប់គ្រងទិន្នន័យច្បាស់លាស់ ត្រឹមត្រូវដឹង​ពី​សុខទុក្ខ និង​តម្រូវ​ការគាំទ្រពិតប្រាកដ និងទទួលបានធាតុចូលគ្រប់គ្រាន់ សម្រាប់រៀបចំវិធានការគាំទ្រ សម្រួ​ល​ស្ថានភាព អាជីវកម្ម ផលិតកម្ម បានគ្រប់ជ្រុងជ្រោយ និងអាចទទួល​បាន​ភាព​អនុ​គ្រោះ​ជា​ផ្លូវការ​។ ឯកឧត្តម ក៏បានសំណូមពរឱ្យសមាគម តំណាងសហគ្រិនទាំងអស់ បន្តសិក្សា និង​កំណត់​អំពី​បញ្ហាប្រឈមនានា ពាក់ព័ន្ធនឹងវិស័យកម្មន្តសាលឱ្យបានច្បាស់លាស់ និង ស៊ីជម្រៅ ជូន​ក្រុម​ការងារផ្នែកកម្មន្តសាល សហគ្រាសធុនតូច និងមធ្យម និងសេវា "ក្រុមការងារ គ" ដើម្បី​ទទួលបានធាតុចូលបន្ថែម សម្រាប់រៀបចំផែនការយុទ្ធសាស្រ្តដោះស្រាយបញ្ហាជាក់ស្តែង ក៏​ដូច​ជា​ដាក់​ស្នើ​ជូនរាជរដ្ឋាភិបាល ពិនិត្យ និងដោះស្រាយក្នុងករណី ចាំបាច់ និងបានសំណូមពរ​ដល់​សហ​គ្រាសធុនមីក្រូ តូច និងមធ្យម និងសិប្បកម្ម ចូលរួមទទួលសេវាសាធារណៈ តាមប្រព័ន្ធថ្នាល បច្ចេក​វិទ្យាដែលក្រសួង-ស្ថាប័នជាច្រើន បានរៀបចំរួចជាស្រេច ព្រោះប្រព័ន្ធនេះ ផ្តល់ផល​ប្រយោជន៍​ដល់ផ្នែកឯកជនដូចជា ចំណេញ ថវិកា ចំណេញពេលវេលា និងអាចអនុវត្ត​បាន​គ្រប់​ទី​កន្លែង​៕ អត្ថបទ៖ សុន រ៉ាឌី 

ធនាគារជាតិដាក់ឱ្យដំណើរការទូទាត់បាគងទេសចរ ជាមួយម៉ាស្ទ័រកាត ដើម្បីគាំទ្រ​វិស័យ​ទេសចរណ៍

2024/11/11 04:31:27 pm        297
Facebook Telegram Linkin
ធនាគារជាតិនៃកម្ពុជា ដាក់ឱ្យដំណើរការកម្មវិធីទូទាត់បាគងទេសចរ ជាមួយ​ក្រុមហ៊ុ​ន​បណ្តាញ​ប័ណ្ណ​ទូទាត់អន្តរជាតិ ម៉ាស្ទ័រកាត ដោយអ្នកប្រើប្រាស់អាចផ្ទេរប្រាក់ពីគណនី Mastercard ទៅ​កាន់​គណនីផ្សេងៗតាមប្រព័ន្ធ Bakong Tourists wallets ដោយធ្វើឱ្យការ ទូទាត់កាន់តែងាយ​ស្រួល​សម្រាប់​អ្នកទេសចរណ៍។លោកជំទាវបណ្ឌិត ជា សេរី ទេសាភិបាលធនាគារជាតិនៃកម្ពុជា លើកឡើងនៅ​ក្នុង​ពិធី​ដាក់ឱ្យ​ដំណើរ​ការ​កម្មវិធីទូទាត់បាគង ទេសចរ ជាមួយក្រុមហ៊ុនបណ្តាញប័ណ្ណទូទាត់អន្តរជាតិម៉ាស្ទ័រកាត នៅ​ថ្ងៃទី១១ ខែវិច្ឆិកា ឆ្នាំ២០២៤ នេះថា នៅពេលដែលបច្ចេកវិទ្យា និងទេសចរណ៍មានការវិវឌ្ឍន៍ ក្នុង​នោះសម្រាប់អ្នកធ្វើដំណើរពួកគេនឹងស្វែងរកភាពរលូនប្រកបដោយប្រសិទ្ធភាព និង​បទ​ពិសោធន៍ ផ្ទាល់ខ្លួនផ្សេងៗ។ បញ្ហានេះ, ធនាគារជាតិនៃកម្ពុជាបានបង្កើត “បាគងកម្ម​វិធី​ទេសចរណ៍​” ដើម្បីកែលម្អសេវាកម្មទូទាត់ និងគាំទ្រ វិស័យទេសចរណ៍ ដោយបើកដំណើរការ, ការទូទាត់តាម​ឌីជីថលសម្រាប់ភ្ញៀវទេសចរអន្តរជាតិ។ កម្មវិធីនេះ ផ្តល់នូវព័ត៌មាន និងសេវា កម្មជាច្រើនដូចជា ការតភ្ជាប់អ្នកធ្វើដំណើរ និងអាជីវកម្មក្នុងស្រុក ដើម្បីទទួលបានបទពិសោធន៍ធ្វើដំណើរកាន់តែប្រសើរ។  លោកជំទាវបណ្ឌិត លើកឡើងបន្ថែមថា បន្ទាប់ពីការប្រកាសនេះ Mastercard និងធនាគារជាតិនៃកម្ពុជា បានធ្វើការរួមគ្នា ដើម្បីឈានដល់ចំណុចដ៏ប្រសើរ ហើយបន្ទាប់ពីការដាក់ឱ្យដំណើរការនេះទៅ អ្នកប្រើប្រាស់អាចផ្ទេរប្រាក់ពីគណនី Mastercard របស់ពួកគេទៅកាន់គណនីផ្សេងៗ, ដោយកាបូបអ្នកទេសចរបាគង (Bakong Tourists wallets) ធ្វើឱ្យការទូទាត់កាន់តែងាយស្រួល ពេលធ្វើដំណើរ។ លក្ខណៈពិសេសនេះផ្តល់នូវភាពរហ័សរហួន លទ្ធភាពទទួលបានមូលនិធិ បើកការទិញ ការកក់ និងការគ្រប់គ្រងការ ចំណាយដោយមិនយកសាច់ប្រាក់ ឬប្រើបញ្ជរប្តូររូបិយប័ណ្ណ ជាពិសេសផ្តល់ភាពងាយស្រួលនៃការប្រើកម្មវិធី និងមានច្រើនភាសា ធ្វើឱ្យមនុស្សទូទៅអាចប្រើប្រាស់បានគ្រប់ៗគ្នា ដោយធានាបាននូវបទពិសោធន៍ធ្វើដំណើរគ្មានភាពតានតឹង។ ទាក់ទិនបញ្ហានេះ អ្នកទេសចរអាចភ្ជាប់ Mastercard ដែលមានស្រាប់ ដើម្បីបញ្ចូលទឹកប្រាក់បាគងរបស់ពួកគេ, កាបូបលុយ អ្នកទេសចរ និងលែងមានបញ្ហាក្នុងការបញ្ចូលលុយតាមរយៈដៃគូអាជីវកម្មបាគង។ នៅដំណាក់កាលបន្ទាប់នៃកម្មវិធី នឹងអនុញ្ញាតឱ្យ អ្នកប្រើប្រាស់ភ្ជាប់ជាមួយកាតទូទាត់អន្តរជាតិ ដែលមានស្រាប់ផ្សេងទៀត។ គំនិតផ្តួចផ្តើមមានគោលបំណងកាត់បន្ថយការពឹងផ្អែក លើសាច់ប្រាក់ ដែលអនុញ្ញាតឱ្យអ្នកទេសចរណ៍ធ្វើការទូទាត់ដោយការស្កេន KHQR Codes នៅទីតាំងពាណិជ្ជករប្រមាណ ៣,៣ លានកន្លែងនៅទូទាំងប្រទេសកម្ពុជា។  លោកជំទាវបណ្ឌិត ជា សេរី មានជំជឿថា ការបើកដំណើរការកម្មវិធី “Bakong Tourists App with Mastercard” នឹងជំរុញ ឱ្យមានការបង្កើតថ្មីនៅក្នុងវិស័យធនាគារ និងហិរញ្ញវត្ថុ ផ្តល់ជូនអ្នកដំណើរនូវភាពងាយស្រួល និងសុវត្ថិភាពនៃឌីជីថលការបង់ប្រាក់, ដែលការអនុវត្តនេះស្របតាមគោលនយោបាយរបស់រាជរដ្ឋាភិបាលកម្ពុជា ដែលមានគោលបំណងជំរុញសេដ្ឋកិច្ចឌីជីថល និងសង្គម៕ អត្ថបទ៖ សុន រ៉ាឌី

កម្ពុជាត្រៀមបន្សុទ្ធពូជស្រូវបន្ថែមដើម្បីជំរុញការនាំចេញ ខណៈអង្ករខ្មែរ​ជាប់ពានរង្វាន់ល្អដាច់គេ​លើពិភពលោក

2024/11/08 11:58:30 am        146
Facebook Telegram Linkin
លោកអគ្គលេខាធិការសហព័ន្ធស្រូវអង្ករកម្ពុជា បានប្រាប់ឲ្យដឹងថា គិតមកដល់បច្ចុប្បន្ន និងខណៈអង្ករកម្ពុជា ទទួលបានពានរង្វាន់ជាអង្ករល្អដាច់គេលើពិភពលោកក្នុងឆ្នាំ២០២៤នេះ។ រដ្ឋាភិបាលកម្ពុជា បានកំពុងគិតគូរក្នុងការពង្រឹង និងរៀបចំបន្សុទ្ធពូជស្រូវអង្ករបន្ថែមទៀត ដើម្បីលើកកម្ពស់វិស័យស្រូវអង្ករកាន់តែមានសក្តានុពល ក៏ដូចជាការពង្រីកទីផ្សារនាំចេញ។លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា នៅព្រឹកថ្ងៃទី៨ ខែវិច្ឆិកានេះ បានមានប្រសាសន៍ប្រាប់ ព័ត៌មាន ប៊ីធីវី ឲ្យដឹងថា គិតមកដល់ពេលនេះ គឺជាលើកទី៦ហើយ ដែលអង្ករខ្មែរទទួលបានពានរង្វាន់ ជាអង្ករល្អដាច់គេលើលោក ដោយសារផ្អែកទៅលើក្លិន រសជាតិ ភាពទន់ និងសោភ័ណភាពនៃការកិនកែច្នៃស្រូវចេញទៅជាអង្ករ។ ពាក់ព័ន្ធការទទួលបានពានរង្វាន់អង្ករកម្ពុជាល្អដាច់គេនេះដែរ លោកអគ្គលេខាធិការ បានបញ្ជាក់ឲ្យដឹងទៀតថា ចំនួនសំណាកអង្ករដែលដាក់ពាក្យចូលរួមប្រកួតប្រជែងមានចំនួន ៤៥សំណាក។ ហើយអង្ករកម្ពុជាដែលទទួលជ័យជម្នះនេះ គឺប្រភេទពូជផ្ការំដួល ដែលជាម៉ាកមួយ (Bran) ជាទីផ្សារមួយ សម្រាប់ទាក់ទាញឲ្យគេទទួលស្គាល់អំពីគុណភាពអង្ករកម្ពុជាកាន់តែច្រើនផងដែរ។ លោកបានបន្ថែមថា គិតក្នុងរយៈពេល ៤ទៅ១០ឆ្នាំចុងក្រោយនេះ អង្ករកម្ពុជាបានកសាងកេរ្តិ៍ឈ្មោះគ្រប់ទីកន្លែង ហើយក៏កំពុងរីកចម្រើន និងកើនម្តងបន្តិចៗ ក្នុងការនាំចេញទៅលក់លើទីផ្សារអន្តរជាតិ។ជុំវិញវិស័យស្រូវអង្ករនេះដែរ លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យនៃក្រសួងកសិកម្ម រុក្ខាប្រមាញ់ និងនេសាទ បានលើកទឹកចិត្តដល់ប្រជាកសិករ ឱ្យងាកមកដាំស្រូវផ្ការំដួល និងសែនក្រអូប ដែលជាពូជរបស់ខ្មែរមានរសជាតិឆ្ងាញ់ មានទីផ្សារ និងកិត្តិនាមល្អ ទាំងនៅក្នុងតំបន់ និងពិភពលោក។សូមជម្រាបជូនថា នៅថ្ងៃទី៧ ខែវិច្ឆិកាកន្លងទៅ អង្ករក្រអូបប្រណិតកម្ពុជា បានឈ្នះពានរង្វាន់អង្ករល្អប្រណិតផ្តាច់គេលើពិភពលោកជាលើកទី៦ ក្នុងការប្រកួតអង្ករល្អផ្តាច់គេលើពិភពលោក (World Best Rice) នៅក្នុងកម្មវិធីសន្និសីទស្រូវអង្ករពិភពលោកឆ្នាំ២០២៤ នាទីក្រុងម៉ានីឡា ប្រទេសហ្វីលីពីន ដែលរៀបចំឡើងដោយវិទ្យាស្ថានគ្រាប់ធុញ្ញជាតិអន្តរជាតិ International Commodity Institute (ICI) និង The Rice Trader (TRT) របស់សហរដ្ឋអាមេរិក៕ អត្ថបទ៖ ឈិត បូរ៉ាវី 

កម្មវិធីCanvas of Dream -Cocktails Gala ប្រមូលមូលនិធិបានជាង ៣.១២៥ ដុល្លារសម្រាប់ផ្តល់ការអប់រំផ្នែកសិល្បៈដល់កុមារក្រីក្រនៅក្នុងប្រទេសកម្ពុជា

2024/11/07 08:16:48 pm        35
Facebook Telegram Linkin
ភ្នំពេញ : យុទ្ធនាការ “Canvas of Dreams” ដែលបានធ្វើឡើងនៅក្នុងកម្មវិធី Cocktail Gala ដ៏អស្ចារ្យនាថ្ងៃទី ០៦ ខែវិច្ឆិកា ឆ្នាំ២០២៤ កន្លងទៅនេះ បានទាក់ទាញការប្រមូលផ្តុំដ៏គួរឱ្យចាប់អារម្មណ៍នៃអ្នកចូលរួមជាង 300 នាក់ដោយជោគជ័យក្នុងការប្រមូលនិធិទឹកប្រាក់បានជាង ៣.១២៥ ដុល្លារសម្រាប់ Tiny Toones Cambodia ដែលជាអង្គការក្រៅរដ្ឋាភិបាលដ៏ឆ្នើមមួយដែលផ្តល់ការ អប់រំផ្នែកសិល្បៈដល់កុមារក្រីក្រនៅ ក្នុងប្រទេសកម្ពុជា។   អង្គពិធីនេះក៏មានការអញ្ជើញចូលរួមពីកិត្តិយសពី សំ ណាក់ភ្ញៀវកិត្តិយសជាច្រើនរូបរួមមាន៖ លោកជំទាវ ប៉ែន មុនីមករា រដ្ឋលេខាធិការក្រសួងវប្បធម៌និងវិចិត្រសិល្បៈ។ លោក Daniel Kerr នាយកប្រតិបត្តិការសម្រាប់ប្រទេសវៀតណាម កម្ពុជា និងមីយ៉ាន់ម៉ានៅក្រុមហ៊ុន The Ascott Limited; លោកស្រី Anita Cui អគ្គនាយករងនៃក្រុមហ៊ុន GRED ដែលជាម្ចាស់ក្រុមហ៊ុនរបស់សណ្ឋា គារ Oakwood; និងលោក De mian Jung ប្រធានគ្រប់គ្រងទូទៅនៃសណ្ឋាគារ Oakwood Premier Phnom Penh ផងដែរ ។   លោក Daniel Kerr បានថ្លែងកោតសរសើរចំពោះកិច្ចខិតខំប្រឹងប្រែងនិង ការលះបង់របស់សណ្ឋាគារ Oak wood Premier Phnom Penh ក្នុងការគាំទ្រដល់ជនក្រីក្រនិងជំរុញទឹកចិត្តស្រលាញ់សិល្បៈពិតជាគំរូដ៏ល្អ ដ៏គួរឲ្យកោតសសើរ។ ព្រឹត្តិការណ៍នេះមិនត្រឹមតែរៃអង្គាសថវិកា សម្រាប់អង្គការ Tiny Toons Cambodia តែ មួយមុខប៉ុណ្ណោះទេ វាថែមទាំងបង្ហាញពីការប្តេជ្ញាចិត្តរបស់សណ្ឋាគារក្នុងការគាំទ្រដល់សិល្បករវ័យក្មេង និងពង្រឹងមុខមាត់វប្បធម៌ក្នុងស្រុករបស់កម្ពុជាផងដែរ។ រួម​គ្នាយើង​អាច​បង្កើត​ឱកាស​ដែល​ជំរុញ​ទឹកចិត្តនិង​លើក​ស្ទួយ​មនុស្ស​ជំនាន់​ក្រោយ ” ។លោកបានបន្តថា អំឡុងពេលមួយខែនៃយុទ្ធនាការ Canvas of Dreams នេះសណ្ឋាគារ Oak wood Premier Phnom Penh បានចូលរួមយ៉ាង សកម្មដល់សហគមន៍ជាមួយនឹងសកម្មភាពដ៏សម្បូរបែប រួមទាំងការតាំងពិពណ៌សិល្បៈ និងកម្មវិធីជួបសំណេះ សំណាលជាមួយសិល្បករផងដែរ។គំនិតផ្តួចផ្តើមទាំងនេះបានផ្តល់វេទិកាសម្រាប់សិល្បករក្នុងស្រុកដើម្បីបង្ហាញពីទេពកោសល្យរបស់ពួកគេ និងលើកទឹកចិត្តឱ្យមានការចូលរួមជាសាធារណៈនៅក្នុងសិល្បៈ។ Cocktail Gala​បានបម្រើការជាចំណុចកំពូលដែលសម ស្របទៅនឹងកិច្ចខិតខំប្រឹងប្រែងទាំងនេះ ដោយអបអរសាទរនូវទេពកោស ល្យដ៏អស្ចារ្យនៅក្នុងសហគមន៍សិល្បៈក្នុងស្រុក និងបញ្ជាក់ឡើងវិញនូវការប្តេជ្ញាចិត្តរបស់សណ្ឋាគារចំពោះការពង្រឹងវប្បធម៌។ មូលនិធិដែលរៃអង្គាសបានក្នុងអំឡុងពេលពិធី ត្រូវផ្តល់ជូនទាំងស្រុងដល់អង្គការ Tiny Toones Cambodia ដែលអាចឱ្យអង្គការបន្តការងារសំខាន់ៗរបស់ខ្លួន ក្នុងការផ្តល់ការអប់រំផ្នែកសិល្បៈ និង ឱកាសច្នៃប្រឌិតដល់កុមារដែលត្រូវការវាច្រើនបំផុត។ កម្មវិធីនេះ គឺមានសារៈសំខាន់ក្នុងការផ្តល់អំណាចដល់បុគ្គលវ័យក្មេង ជំរុញភាពច្នៃប្រឌិតរបស់ពួកគេ និងផ្តល់ឱ្យពួកគេនូវឧបករណ៍ដែលពួកគេត្រូវ ការដើម្បីទទួលបានជោគជ័យ។  សូមជម្រាបថា នៅពេលដែលយុទ្ធនាការ Canvas of Dreams បានបញ្ចប់សណ្ឋាគារ Oakwood Premier Phnom Penh នៅតែមិនផ្លាស់ប្តូរនៅក្នុងការលះបង់របស់ខ្លួនក្នុងការលើកស្ទួយសហគមន៍សិល្បៈក្នុងស្រុក។ សណ្ឋាគារទន្ទឹង រង់ចាំកិច្ចសហការ និងគំនិតផ្តួចផ្តើមនាពេលខាងមុខដែលបន្តផ្តល់អំណាច ជាពិសេសការបំផុស គំនិតដល់ទេព កោ សល្យវ័យក្មេង ដោយធានាថា សិល្បៈនៅតែជាផ្នែកមួយដ៏រស់រវើក និងសំខាន់នៃវប្បធម៌កម្ពុជា។ យើងរួមគ្នាបង្កើតឥទ្ធិពលយូរអង្វែងដល់ជីវិតរបស់សិល្បករវ័យក្មេង និងអបអរសាទរបេតិកភណ្ឌវប្បធម៌ដ៏សម្បូរបែបរបស់កម្ពុជា៕

រយៈពេល១០ខែ កម្ពុជានាំចេញអង្ករមានទំហំទឹកប្រាក់ជាង ៣៧៦ លានដុល្លារអាមេរិក

2024/11/07 01:50:48 pm        312
Facebook Telegram Linkin
កម្ពុជាបាននាំចេញអង្ករ នៅក្នុងរយៈពេល ១០ ខែ ឆ្នាំ ២០២៤, មានបរិមាណសរុបប្រមាណជាង ៥០៧ ពាន់តោន គិតជាទឹក ប្រាក់មានចំនួនជាង ៣៧៦ លានដុល្លារអាមេរិក ក្នុង​នោះ​ការ​នាំ​ចេញ​ទៅ​កាន់​ទីផ្សារអឺរ៉ុប មានកំណើនកើនឡើងខ្ពស់ជាងទីផ្សារ ផ្សេងៗ។ជុំវិញ​ការនាំចេញអង្ករនេះ, បើតាមរបាយការណ៍របស់សហព័ន្ធស្រូវអង្ករកម្ពុជា បង្ហាញឱ្យដឹងថា នៅ​ក្នុង​រយៈពេល ១០ ខែ ឆ្នាំ ២០២៤ កម្ពុជាបាននាំចេញអង្ករ មានបរិមាណប្រមាណជាង ៥០៧ ពាន់តោន ក្នុងនោះមានក្រុមហ៊ុនចំនួន ៥៥ បាននាំអង្ករចេញ ទៅកាន់​ប្រទេស​គោល​ដៅ​សំខាន់​ចំនួន៦៦ ។ ចំណែកទីផ្សារចែកចាយវិញ, ការនាំចេញអង្ករ​ទៅ​បណ្តា​ប្រទេស​នៅ​ក្នុង​តំបន់​អឺរ៉ុប ចំនួន ២៦, មានបរិមាណអង្ករជាង ២៥៤ ពាន់តោន គិតជាទឹកប្រាក់ជាង ១៩៦ លាន​ដុល្លារ​សហរដ្ឋអាមេរិក។ ប្រទេសចិន រួមទាំង ហុងកុង និងម៉ាកាវ ជាង ៩៣ ពាន់តោន មានទឹក​ប្រាក់​ជាង ៩១ លានដុល្លារសហរដ្ឋអាមេរិក។ដោយឡែកការនាំចេញប្រទេសក្នុងអាស៊ានវិញ, នៅក្នុងរយៈពេលនេះដែរ កម្ពុជា​បាន​នាំ​ចេញ​អង្ករ​ទៅ​ប្រទេស​ចំនួន ៧ មានបរិមាណសរុបជាង ១០០ ពាន់តោន គិតជាទឹកប្រាក់ចំនួន ៦៦ លាន​ដុល្លារសហរដ្ឋអាមេរិក។ ក្រៅពីនេះកម្ពុជាក៏បាននាំចេញទៅ កាន់គោលដៅចំនួន ៣០ ប្រទេសផ្សេងទៀត មានបរិមាណសរុបជាង ៥៧ ពាន់តោន ក្នុងទំហំទឹកប្រាក់ជាង ៥១ លាន​ដុល្លារអាមេរិក , ចំពោះប្រភេទអង្ករដែលបាននាំចេញរួមមាន៖ អង្ករក្រអូបគ្រប់ប្រភេទ ចំនួន ៧៧ ភាគ​រយ ប្រភេទអង្ករសគ្រាប់ជាង ២១ ភាគរយ អង្ករចំហ៊ុយ ៣ ភាគរយ អង្ករសរីរាង្គជិត ២ ភាគរយ និងរួមមានអង្ករផ្សេងៗទៀតផងដែរ។ដោយឡែកការនាំចេញស្រូវវិញ, នៅក្នុងរយៈពេល ១០ ខែនេះដែរ កម្ពុជា​បាន​នាំ​ចេញ​ស្រូវ​ទៅ​កាន់​ប្រទេស​ជិតខាង ជា ប្រភេទស្រូវសើម មានបរិមាណសរុបជាង ៤ លានតោន គិតជាទឹក​ប្រាក់​ប៉ាន់​ស្មាន មានចំនួនប្រមាណជាង ១ ១៨៤ លានដុល្លារ អាមេរិក ក្នុងនោះចំនួន ៨៦ ភាគរយ បាន​នាំ​ចេញដោយឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច។សូមបញ្ជាក់ថា នៅក្នុងរយៈពេល ១០ ខែ ក្នុងឆ្នាំ ២០២៣ កន្លងមកនេះ បើ​តាម​របាយការណ៍​អគ្គ​នាយកដ្ឋាន​កសិកម្ម, កម្ពុជាបាន នាំចេញអង្ករមានបរិមាណសរុបជិត ៥៣០ ពាន់តោន ទៅកាន់​ប្រទេស​គោល​ដៅ​ចំនួន ៧១ គិតជាទឹកប្រាក់មានចំនួនជាង ៤៥៨ លានដុល្លារអាមេរិក៕ អត្ថបទ៖ សុន រ៉ាឌី

អង្កររបស់ខ្មែរ បានជាប់ពានរង្វាន់ជាអង្ករល្អដាច់គេលើពិភពលោក ជាថ្មីម្ដងទៀត​ក្នុងឆ្នាំ២០២៤នេះ នៅទីក្រុងម៉ានីល

2024/11/07 01:19:31 pm        178
Facebook Telegram Linkin
ភ្នំពេញ៖ អង្កររបស់ខ្មែរ បានជាប់ពានរង្វាន់ជាអង្ករល្អដាច់គេលើពិភពលោកជាថ្មីម្ដងទៀត ក្នុងឆ្នាំ​២០២៤​នេះ នៅទីក្រុងម៉ានីល ប្រទេសហ្វីលីពីន។ នេះបើតាមការបញ្ជាក់របស់លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យនៃក្រសួងកសិកម្ម រុក្ខាប្រមាញ់ និងនេសាទ នៅព្រឹក​ថ្ងៃទី៧ ខែវិច្ឆិកា ឆ្នាំ២០២៤នេះ។លោកជំទាវបានឱ្យដឹងថា ក្រសួងកសិកម្ម រុក្ខាប្រមាញ់ និងនេសាទ មានក្ដីសោមនស្ស សូម​ជូន​ដំណឹង​​ដល់​បងប្អូនអ្នកសារព័ត៌មាន និងសាធារណជនជ្រាបថា អង្កររបស់ខ្មែរ បាន​ជាប់​ពាន​រង្វាន់​ជា​អង្ករ​ល្អដាច់​គេ​លើ​ពិភពលោកជាថ្មីម្ដងទៀត ក្នុងឆ្នាំ២០២៤នេះ នៅទីក្រុងម៉ានីល ប្រទេស​ហ្វីលីពីន។លោកជំទាវបញ្ជាក់ថា «នេះគឺជាលើកទី៦ហើយ ដែលអង្ករខ្មែរបាន​ទទួល​ពាន​រង្វាន់​ជា​អង្ករ​ល្អ​ដាច់​គេ​លើ​លោក ដោយលើកទី១ ទទួលបាននៅឆ្នាំ២០១២, លើកទី២ នៅឆ្នាំ ២០១៣, លើក​ទី៣ នៅឆ្នាំ២០១៤, លើកទី៤ នៅឆ្នាំ២០១៨, លើកទី៥ នៅឆ្នាំ២០២២, និងលើកទី៦ នៅ​ឆ្នាំ​២០២៤»។បើតាម​លោកជំទាវ អ៊ឹម រចនា ក្រសួងកសិកម្ម រុក្ខាប្រមាញ់ និងនេសាទ លើកទឹកចិត្ត​ដល់​បង​ប្អូន​ប្រជា​កសិករ ងាកមកដាំស្រូវផ្ការំដួល និងសែនក្រអូប ដែលជាពូជរបស់ខ្មែរ ដែលមាន​រស​ជាតិ​ឆ្ងាញ់ ​មានទីផ្សារ និងកិត្តិនាមល្អ ទាំងនៅក្នុងតំបន់ និងពិភពលោក៕ 

ក្រសួងសេដ្ឋកិច្ចពង្រឹងការប្រមូលចំណូលពន្ធអាករ លើការផ្គត់ផ្គង់មានថែមទំនិញ ឬផ្តល់ជារង្វាន់

2024/11/07 10:40:06 am        99
Facebook Telegram Linkin
ក្រសួងសេដ្ឋកិច្ច និងហិរញ្ញវត្ថុ ពង្រឹងការគ្រប់គ្រងប្រមូលចំណូលពន្ធអាករ ចំពោះ​ការ​ផ្គត់​ផ្គង់​ទំនិញ​ដោយ​មាន​ថែម​ទំនិញ ឬផ្តល់ជា រង្វាន់ទំនិញជាស្តុកសម្រាប់លក់, ការថែមទំនិញ ឬផ្តល់​ជា​រង្វាន់​ទំនិញ​មិនមែនជាស្ដុកសម្រាប់លក់ ឬរង្វាន់ផ្សេងៗក្រៅពីទំនិញជាដើម។ក្រសួង​សេដ្ឋកិច្ច និងហិរញ្ញវត្ថុ ចេញសេចក្តីណែនាំ ស្តីពីកាតព្វកិច្ចបង់ពន្ធអាករ ចំពោះ​ការ​ផ្គត់​ផ្គង់​ទំនិញ​ដោយ​មានថែមទំទិញ ឬផ្តល់ជារង្វាន់ របស់សហគ្រាសផ្គត់ផ្គង់ទំនិញក្នុងស្រុក ដែល​មាន​ថែម​ទំនិញ​របស់សហគ្រាស ឬទំនិញដទៃ ឬផ្តល់ជារង្វាន់តាមរយៈ ក្រវិលកំប៉ុង គម្របដប ឬ​វិធី​ផ្សេង​ទៀត​ផ្តល់ជូនអតិថិជនរបស់ខ្លួន។ ដើម្បីពង្រឹងការគ្រប់គ្រងប្រមូល ចំណូលពន្ធអាករ ប្រកប​ដោយប្រសិទ្ធភាព ក្រសួងណែនាំ​ដល់​សហគ្រាសផ្គត់​ផ្គង់​ទំនិញ​ក្នុង​ស្រុក​អំពី​កាតព្វកិច្ច​បង់​ពន្ធអាករ ចំពោះការផ្គត់ផ្គង់ទំនិញដោយមានថែម ទំនិញ ឬផ្តល់ជារង្វាន់ជាដើម។ចំពោះ​ការផ្គត់ផ្គង់ទំនិញដោយមានថែមទំនិញ ឬផ្តល់រង្វាន់នូវទំនិញជាស្តុកសម្រាប់លក់ ត្រូវ​ចាត់​ទុក​ជា​ការ​ផ្គត់ផ្គង់ជាប់អាករ ដែលសហគ្រាសត្រូវបំពេញកាតព្វកិច្ច ក្នុងនោះសហគ្រាស​ផលិត​ក្នុង​ស្រុក​នូវទំ​និញជាប់អាករពិសេស និងអាករសម្រាប់បំភ្លឺសាធារណៈ ត្រូវជាប់អាករពិសេស និង​អាករ​សម្រាប់​បំភ្លឺសាធារណៈ ចំពោះការថែមទំនិញឬផ្តល់ជារង្វាន់នូវទំនិញផលិតក្នុងស្រុក ជាប់​អាករ​ពិសេស ផង និងអាករសម្រាប់បំភ្លឺសាធារណៈផង។ ក្នុងករណីទំនិញផលិតក្នុងស្រុកមិនជាប់អាករសម្រាប់បំភ្លឺសាធារណៈនោះ សហគ្រាសបង់ តែ​អាករ​ពិសេសប៉ុណ្ណោះ និងត្រូវជាប់អាករសម្រាប់បំភ្លឺសាធារណៈ ក្នុងករណីការថែមទំនិញ ឬ​ផ្តល់​ជា​រង្វាន់​នូវទំនិញជាប់អាករសម្រាប់ បំភ្លឺសាធារណៈ ដែលសហគ្រាសបាននាំចូលដោយផ្ទាល់។ ជាប់​អាករ​លើតម្លៃបន្ថែម និងប្រាក់រំដោះពន្ធលើប្រាក់ចំណូល ដោយ អនុញ្ញាតឱ្យ​យក​មូល​ដ្ឋាន​គិត​អាករ​លើតម្លៃបន្ថែម និងប្រាក់រំដោះពន្ធលើប្រាក់ចំណូល ស្មើនឹងថ្លៃ​ដើម​នៃ​ទំនិញ​ជាប់​អាករ​នោះ​។ ត្រូវជាប់ពន្ធលើប្រាក់ចំណូល ដោយអនុញ្ញាតឱ្យទទួលស្គាល់ ចំណូល​ស្មើ​នឹង​ចំណាយ​ថ្លៃដើម​។ចំពោះសហគ្រាសនាំចូលទំនិញជាប់អាករសម្រាប់បំភ្លឺសាធារណៈ៖ ត្រូវជាប់​អាករ​សម្រាប់​បំភ្លឺ​សាធារណៈ ដោយមូលដ្ឋានគិត អាករ ត្រូវផ្អែក​តាម​តម្លៃ​ទីផ្សារ​នៃ​ការ​ផ្គត់ផ្គង់​ទំនិញ​ជាប់​អាករ​នោះ​,​​ ត្រូវជាប់អាករលើតម្លៃបន្ថែម និងប្រាក់រំដោះពន្ធលើប្រាក់ចំណូល ដោយអ​នុញ្ញាត​ឱ្យ​យក​មូល​ដ្ឋាន​គិត​អាករលើតម្លៃបន្ថែម និងប្រាក់រំដោះពន្ធលើប្រាក់ចំណូល ស្មើនឹងថ្លៃដើម​នៃ​ការ​នាំចូល​ទំនិញ​ជាប់អាករនោះ, ត្រូវជាប់ពន្ធលើប្រាក់ចំណូល ដោយអនុញ្ញាត​ឱ្យ​ទទួល​ស្គាល់​ចំណូល​ស្មើ​នឹង​ចំណាយ​ថ្លៃដើម។ ចំណែកសហគ្រាសផ្គត់ផ្គង់ ទំនិញដែលមិនជាប់អាករពិសេស និង​អាករ​សម្រាប់​បំភ្លឺ​សាធារណៈ៖ ត្រូវជាប់អាករលើតម្លៃបន្ថែម និងប្រាក់រំដោះពន្ធលើប្រាក់ចំណូល ដោយ​អនុញ្ញាតឱ្យយកមូលដ្ឋានគិតអាករលើតម្លៃបន្ថែម និងប្រាក់រំដោះពន្ធលើប្រាក់ចំណូល ស្មើនឹង​ថ្លៃ​ដើម​នៃ​ទំនិញជាប់អាករនោះ។ដោយឡែកការថែមទំនិញ ឬផ្តល់ជារង្វាន់នូវទំនិញដែលមិនមែនជាស្ដុក សម្រាប់​លក់​ឬ​រង្វាន់​ផ្សេង​ៗ​ក្រៅ​ពីទំនិញ, សហគ្រាស ត្រូវអនុវត្តដូចជា៖ មិនត្រូវបានចាត់​ទុក​ជាការ​ផ្គត់​ផ្គង់​ដែល​ជា​កម្មវត្ថុ​នៃ​អាករលើតម្លៃបន្ថែម ប្រាក់រំដោះពន្ធលើប្រាក់ចំណូល និងពន្ធលើ ប្រាក់ចំណូលឡើយ, អាករ​លើតម្លៃបន្ថែមដែលសហគ្រាសបានបង់ លើការទិញ​ទំនិញ​យក​មក​ប្រើប្រាស់​សម្រាប់​ការ​លក់ដោយមានថែមទំនិញឬផ្តល់ជារង្វាន់, មិនត្រូវបានអនុញ្ញាត​ជា​ឥណទាន​អាករ​លើ​ធាតុ​ចូល​ឡើយ​ ប៉ុន្តែត្រូវបានអនុញ្ញាតជាចំណាយកាត់កងបាន, ចំណែកការអនុញ្ញាតជាចំណាយវិញ, ត្រូវ​បានអនុញ្ញាតជាចំណាយកាត់កងបាន សម្រាប់គោលដៅពន្ធលើប្រាក់ចំណូល និងត្រូវកត់ត្រា ឱ្យ​ច្បាស់​លាស់​ក្នុងបញ្ជីគណនេយ្យ ដោយត្រូវមានសក្ខីបត្រគាំទ្រដូចមានចែងក្នុង បទប្បញ្ញត្តិ​ស្តីពី​ពន្ធ​លើ​ប្រាក់ចំណូលជាដើម៕ អត្ថបទ៖ សុន រ៉ាឌី

កម្ពុជាកំពុងអភិវឌ្ឍន៍ប្រព័ន្ធ Data Center សម្រាប់គាំទ្រ និងការដោះស្រាយក្នុងអាជីវកម្ម

2024/11/06 11:58:21 am        145
Facebook Telegram Linkin
កម្ពុជាទទួលបានការវិនិយោគលើប្រព័ន្ធគ្រប់គ្រងទិន្នន័យ មានទំហំទឹកប្រាក់ប្រមាណ ១៣៧ លាន​ដុល្លារអាមេរិក, ដែលតាមរយៈនេះ កម្ពុជាសង្ឃឹមថា នឹងជំរុញគាំទ្រ និង​បង្កើត​ការងារ​ថ្មី​ៗ​ផ្សេង​ទៀត សម្រាប់ជាដំដោះស្រាយក្នុងអាជីវកម្ម ជាពិសេសការជំរុញអភិវឌ្ឍន៍ ទៅជា មជ្ឈ-មណ្ឌល​ដ៏​ធំមួយនៅអាស៊ីផងដែរ។ឯកឧត្តម ហ៊ាង សុទ្ធាយុត្តិ អគ្គលេខាធិការរងនៃអគ្គលេខាធិការដ្ឋាន ក្រុមប្រឹក្សាអភិវឌ្ឍន៍កម្ពុជា លើក​ឡើងនៅក្នុងកិច្ចពិភាក្សា លើប្រធានបទ៖ ឆ្ពោះទៅរកសេដ្ឋកិច្ចឌីជីថលនៅកម្ពុជា នេះថា ការ​វិនិយោគលើហេដ្ឋារចនាសម្ព័ន្ធឌីជីថល នៃការឆ្ពោះទៅរកកំណើន សេដ្ឋកិច្ច​ប្រកប​ដោយ​បរិយាបន្ន​នៅ​ក្នុងសង្គមនេះ កម្ពុជាបានកំពុងអភិវឌ្ឍន៍ នៃ​ការ​ចាប់​យក​ប្រព័ន្ធ​ឌីជីថល​មក​អនុវត្ត​ជា​បណ្តើរ​ៗ ក្នុង នោះកម្ពុជាមានមជ្ឈមណ្ឌលបណ្តុះធុរកិច្ចថ្មី "តេជោ" បានកំពុងគាំទ្រ​ដល់​ការ​បង្កើត​ធុរកិច្ច និងប្រព័ន្ធចុះបញ្ជីអាជីវកម្មថ្នាលបច្ចេកវិទ្យា ព័ត៌មាន ក៏កំពុងជំរុញ​ការ​ចុះ​បញ្ជី​ពន្ធដារ និងក្រសួងពាណិជ្ជកម្មជាដើម។ ក្រៅពីនេះកម្ពុជាក៏មានក្របខណ្ឌគោលនយោបាយសេដ្ឋកិច្ច និងសង្គមឌីជិថលកម្ពុជាឆ្នាំ ២០២១-២០៣៥ ស្របពេលដែល CDC ក៏មានប្រព័ន្ធគ្រប់គ្រងគម្រោងវិនិយោគកម្ពុជា (cdcIPM) ដែលផ្ដល់លទ្ធភាពជូនដល់វិនិយោគិន អាច​ស្នើ​សុំ​ចុះ​បញ្ជី​គម្រោង​វិនិយោគ​មាន​លក្ខណៈ​សម្បត្តិ​គ្រប់គ្រាន់ (QIP) ពីគ្រប់ទីកន្លែង តាមរយៈប្រព័ន្ធអនឡាញជាដើម នេះ​ជា​ការ​ត្រៀម​លក្ខណៈក្នុងការគាំទ្រសេដ្ឋកិច្ចឌីជីថលនៅកម្ពុជា។ឯកឧត្តម បន្តឱ្យដឹងថា នៅក្នុងរយៈពេលថ្មីៗនេះ ក្រុមប្រឹក្សា​អភិវឌ្ឍន៍​កម្ពុជា​បា​ន​អនុម័ត​នូវ​គម្រោង​ចំនួន​ពីរ នៃការវិនិយោគ លើប្រព័ន្ធគ្រប់គ្រងទិន្នន័យ (Data Center) មានទំហំ​ទឹក​ប្រាក់​ប្រមាណ​ជា ១៣៧ លានដុល្លារអាមេរិក ដែលតាមរយៈនេះ នឹងជំរុញ គាំទ្រនិងទាក់​ទាញ​ដល់​ការ​វិនិយោគ​លើ​វិស័យផ្សេងៗទៀត អាចចូលរួមបង្កើតការងារកាន់តែច្រើន ជាពិសេស​តាម​រយៈ​នៃ​គម្រោងនេះដែរ និងអាចជំរុញឱ្យកម្ពុជាមានមជ្ឈមណ្ឌលដ៏ធំមួយនៅអាស៊ី។ទាក់ទិនសេដ្ឋកិច្ចឌីជីថលនេះដែរ, ឯកឧត្តមបណ្ឌិត តាំង ងួនលី នាយកប្រតិបត្តិ​មជ្ឈមណ្ឌល​បណ្តុះ​ធុរកិច្ច​ថ្មី "តេជោ" បានវាយតម្លៃថា ប្រព័ន្ធ ICT គឺមានសារៈសំខាន់ណាស់ សម្រាប់ឆ្លើយ​តប​ទៅ​និង​សេដ្ឋកិច្ចឌីជីថល ប៉ុន្តែកិច្ចការទាំងនោះត្រូវគាំទ្រ បន្ថែម ទាក់ទងប្រព័ន្ធអ៊ិនធ័រណេត ខ្សែ​កាបអុបទិច ដើម្បីជំរុញឱ្យមានល្បឿនលឿន ឆ្លើយតបទៅនិងការធ្វើអាជីវកម្មផ្សេងៗដូចជា ការ​លក់ និងការទិញជាដើម ខណៈកម្ពុជាកំពុងធ្វើដំណើរទៅមុខ ដែលត្រូវការគាំទ្រច្រើន តាម​រយៈ​កិច្ច​សហការប្រតិបត្តិការផ្សេងៗ ដូចជាប្រទេសចិនជាដើម ដើម្បីជំរុញ​អភិវឌ្ឍន៍​ឱ្យ​កាន់​តែ​ខ្លាំង​ក្លា ជាពិសេសការបង្កើតនូវប្រព័ន្ធទិន្នន័យ (Data) សម្រាប់ចែករំលែកពី គ្នាទៅវិញទៅមក ដើម្បី​ជំរុញការផ្តល់សេវាកម្មឱ្យកាន់តែងាយស្រួល ជាពិសេសសម្រាប់អ្នកធុរកិច្ច។ជុំវិញប្រព័ន្ធឌីជីថលនេះដែរ, លោកស្រី ចេន ហ្វូលីង (Gan Qiuling) លើកឡើងថា ដើម្បី​គាំទ្រ​ដល់​ប្រព័ន្ធ​ឌីជីថល, បើតាម បទពិសោធន៍នៃប្រទេសចិន ជាដំបូងគឺយើង​ត្រូវ​កសាង​ហេដ្ឋ​រចនា​សម្ព័ន្ធ​សេដ្ឋកិច្ច​ឌីជីថល ដើម្បីជាមូលដ្ឋានគ្រឹះសម្រាប់ការអភិវឌ្ឍន៍ វិស័យសេដ្ឋកិច្ច ក្នុងនោះ​សេដ្ឋកិច្ច​ឌីជីថល គឺត្រូវឱ្យមានកិច្ចសហប្រតិបត្តិការឱ្យស្អិតរមួតាមមួយភាគីពាក់ព័ន្ធទាំងអស់ ដើម្បី​ដើរ​ឈាន ទៅមុខរួមគ្នា ។ ដោយសារតែសង្គមឌីជីថល យើងត្រូវបង្កើតវេទិកាអេឡិចត្រូនិច ដើម្បី​ជួយដល់ប្រជាជនទូទៅបានស្វែងយល់ ហើយ បញ្ហានេះ តើប្រជាជន ឬអ្នកធុរកិច្ច​ទទួល​យក​សេដ្ឋកិច្ច​ឌីជីថលបានរបៀបណាខ្លះ? ដូច្នេះមានតែតាមរយៈវេទិកានេះទេ ដើម្បីឱ្យ ប្រជាជន​ងាយ​ទទួល​យកបាន ដែលជាតំណររុញផលិតផលរបស់គាត់ឱ្យទៅកាន់ទីផ្សារអន្តរជាតិ ។ លោកស្រី បន្តថា បញ្ហានេះ កម្ពុជាត្រូវអូសទាញដល់ក្រុមហ៊ុនដែលមានឧត្តមភាពលើអន្តរជាតិ មក​វិនិយោគនៅប្រទេសកម្ពុជា ដើម្បីកម្ពស់ដល់សមត្ថភាពប្រកួត ប្រជែងទាំងនៅក្នុងស្រុក និង​ទៅ​កាន់​លើឆាកអន្តរជាតិ៕ អត្ថបទ៖ សុន រ៉ាឌី

ខែតុលាកន្លងទៅនេះ កម្ពុជាទទួលបានគម្រោងវិនិយោគចំនួន៣១គម្រោងបន្ថែម មានទុនសរុបជាង ២២៦ លានដុល្លារ

2024/11/06 11:33:51 am        162
Facebook Telegram Linkin
ក្រុមប្រឹក្សាអភិវឌ្ឍន៍កម្ពុជា ក្នុងខែតុលា ឆ្នាំ២០២៤ នេះ បានអនុម័តគម្រោងថ្មីចំនួន៣១ និង​គម្រោង​ពង្រីកផលិតកម្មចំនួន១ មានទុនវិនិយោគសរុបជាង ២២៦ លានដុល្លារអាមេរិក ក្នុង​នោះ​ចិន​វិនិយោគ​ជាប់លំដាប់លេខរៀងទី១ បានរួមចំណែកជាង ៥៣% ភាគរយ ខណៈការ​វិនិយោគ​ក្នុង​ស្រុក​គ្រប​ដណ្តប់ជាង ២៩ ភាគរយ នៃទុនវិនិយោគសរុប។ក្រុមប្រឹក្សា​អភិវឌ្ឍន៍កម្ពុជា បានបង្ហាញរបាយការណ៍វិនិយោគ នៅក្នុងខែតុលា ឆ្នាំ២០២៤ ក្នុង​នោះ​បាន​អនុម័តគម្រោងថ្មី ចំនួន៣០ គម្រោង និងគម្រោងពង្រីកផលិតកម្មចំនួន ១ គម្រោង ដែល​មាន​ទុនវិនិយោគសរុបប្រមាណជាង ២២៦ ពាន់លានដុល្លារ អាមេរិក ដោយ​អាច​បង្កើត​ការងារ​បាន​ប្រមាណ ១៦ ពាន់កន្លែង។ ក្នុងចំណោមគម្រោងវិនិយោគសរុប, គម្រោង​វិនិយោគ​ដែល​មានទីតាំងស្ថិតនៅក្រៅតំបន់សេដ្ឋកិច្ចពិសេស មានចំនួន ២១ គម្រោង និង​គម្រោង​វិនិយោគ​ដែល​មានទីតាំងស្ថិតនៅក្នុងតំបន់សេដ្ឋកិច្ច ពិសេសមានចំនួន ១០ គម្រោងផងដែរ។ចំពោះគម្រោងវិនិយោគដែលមានភាពលេចធ្លោជាងគេ ប្រចាំខែតុលានេះ នៅក្រៅតំ​បន់​សេដ្ឋ​កិច្ច​ពិសេស​រួម​មាន៖ គម្រោង វិនិយោគក្នុងវិស័យហេដ្ឋារចនាសម្ព័ន្ធចំនួន ១, គម្រោង​បង្កើត​រោង​ចក្រ​កាត់​ដេរ​សម្លៀកបំពាក់, ស្បែកជើង និងកាបូប, គម្រោងបង្កើត រោងចក្រផលិត​សម្ភារៈ​ប្រើប្រាស់​ក្នុង​ផ្ទះ, សម្ភារៈបរិក្ខាសម្រាប់បោះតង់, គ្រឿងសង្ហារឹម, គ្រឿងតុបតែងលម្អ និងមាន​គម្រោង​ជា​ច្រើន​ផ្សេងៗទៀតផងដែរ។សូមបញ្ជាក់ថា ក្នុងរយៈពេលពេញមួយឆ្នាំនេះ ប្រភព​ទុន​វិនិយោគ​មក​ពី​ប្រទេស​ចិន​ឈរ​នៅ​លំដាប់​លេខ​រៀងទី ១ ដោយបានរួម ចំណែកជាង ៦០ ភាគរយ នៃទុនវិនិយោគសរុប ខណៈ​ពេល​ដែល​ការវិនិយោគក្នុងស្រុកគ្របដណ្តប់ជាង ៣២ ភាគរយ នៃទុន វិនិយោគសរុបផងដែរ៕ អត្ថបទ៖ សុនរ៉ាឌី

បណ្ដាញសង្គម

ព័ត៌មានថ្មីៗ

សមាគមអតីតយុទ្ធជនកម្ពុជា និងអង្គការអតីតយុទ្ធជនសង្គ្រាមថៃ ចុះកិច្ចព្រមព្រៀងពង្រឹងកិច្ចសហប្រតិបត្តិការដើម្បីជួយអតីតយុទ្ធជនប្រទេសទាំងពីរ
02/12/2025 09:02 PM
Facebook Telegram Linkin
ក្តីបារម្ភ និងការថ្កោលទោសបានកើតមានឡើងក្នុងតំបន់ហ្កាហ្សា ស្របពេលអ៊ីស្រាអែលគំរាមចាប់ផ្តើមសង្រ្គាមឡើងវិញ
02/12/2025 08:02 PM
Facebook Telegram Linkin
UN៖ អតីតរដ្ឋាភិបាលបង់ក្លាដែសនៅពីក្រោយលទ្ធភាពនៃឧក្រិដ្ឋកម្មប្រឆាំងមនុស្សជាតិ
02/12/2025 08:02 PM
Facebook Telegram Linkin
ក្រសួងការងារបញ្ជូនរថយន្តការងារចល័ត ដើម្បីផ្តល់ការងារថ្មីជូនកម្មករនិយោជិតរោងចក្រត្រូវបានអគ្គិភ័យឆាបឆេះ
02/12/2025 07:02 PM
Facebook Telegram Linkin
គណៈកម្មាធិការជាតិបណ្តុះបណ្តាលដាក់ចេញនូវទិសដៅការងារ៤ចំនុច ដើម្បីដាក់ឲ្យអនុវត្តសម្រាប់ឆ្នាំ២០២៥
02/12/2025 07:02 PM
Facebook Telegram Linkin
ពលរដ្ឋហ្កាហ្សាសង្ឃឹមថា ក្រុមហាម៉ាស់ និងអ៊ីស្រាអែលនឹងអាចបន្តបទឈប់បាញ់
02/12/2025 07:02 PM
Facebook Telegram Linkin
ចិនអះអាងថា វិទ្យាស្ថានរោគវិទ្យាក្រុង Wuhan ពុំពាក់ព័ន្ធនឹងការបង្កើតវីរុស COVID-19 នោះឡើយ
02/12/2025 07:02 PM
Facebook Telegram Linkin
ហាណូយក្លាយជាទីក្រុងមានកង្វក់បរិយាកាសបំផុត ស្របពេលផ្សែងអ័ព្ទយ៉ាងក្រាស់គ្របដណ្តប់រដ្ឋធានីប្រទេសវៀតណាមមួយនេះ
02/12/2025 07:02 PM
Facebook Telegram Linkin
​ លោក Trump ជំរុញផែនការគ្រប់គ្រងតំបន់ហ្កាហ្សាអំឡុងកិច្ចប្រជុំជាមួយព្រះមហាក្សត្រហ៊្សកដានី
02/12/2025 07:02 PM
Facebook Telegram Linkin
លោក Musk និងលោក Trump រិះគន់ទីភ្នាក់ងារ USAID ថាពុករលួយ និងអសមត្ថភាព អំឡុងសន្និសីទសារព័ត៌មាន
02/12/2025 07:02 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.