BTV NEWS

ឃាតកម្មចាក់សម្លាប់មនុស្សរួចយកសពប្លុងចោលក្នុងរថយន្តនៅខណ្ឌដង្កោ កម្លាំងសមត្ថកិច្ចឃាត់ខ្លួនក្រុមឃាតកបាន០៤នាក់

ដើមខែមិថុនានេះ កម្លាំងនគរបាលរាជធានីបង្ក្រាបគ្រឿងញៀន០៥ករណី ឃាត់មនុស្ស២៤នាក់ និងដកហូតគ្រឿងញៀន៦៦គីឡូក្រាម

បង្ក្រាបជនជាតិចិន០៤នាក់ ជាក្រុមត្រៀមរៀបចំផែនការណ៍ចាប់ជំរិត តែត្រូវទប់ស្កាត់ទាន់ពេល

សមត្ថកិច្ចខេត្តស្វាយរៀងបន្តចុះបង្រ្កាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាឃាត់ខ្លួនជនសង្ស័យជនជាតិចិន វៀតណាម និងខ្មែរចំនួន ៧៣នាក់

សន្តិសុខ និង សង្គម

សេតវិមាន៖ អ៊ីស្រាអែល ព្រមព្រៀងរៀបចំកាលបរិច្ឆេទឡើងវិញសម្រាប់ការចរចាស្តីពីទីក្រុងរ៉ាហ្វា

សហរដ្ឋអាមេរិកនិយាយថា អ៊ីស្រាអែល បានព្រមព្រៀងកំណត់កាលបរិច្ឆេទឡើងវិញនៃការចរចា រវាងប្រទេសទាំងពីរ លើផែនការវាយលុកតាមជើងគោករបស់អ៊ីស្រាអែលនៅតំបន់ហ្កាហ្សាស្ទ្រីប ភាគខាងត្បូង។ ការលើកឡើងនេះ បានធ្វើឡើងបន្ទាប់ពីអ៊ីស្រាអែល បានលុបចោលដំណើរទស្សនកិច្ចរបស់គណៈប្រតិភូ ទៅកាន់ក្រុងវ៉ាស៊ីនតោនក្នុងសប្តាហ៍នេះ។ ប្រធានាធិបតីសហរដ្ឋអាមេរិកលោក Joe Biden បានបង្ហាញពីការព្រួយបារម្ភរបស់លោក ចំពោះការបាត់បង់ជីវិតជនស៊ីវិលយ៉ាងច្រើន ប្រសិនបើអ៊ីស្រាអែល វាយលុកចូលទីក្រុង Rafah នៅពេលលោកបាននិយាយទៅកាន់ នាយករដ្ឋមន្រ្តីអ៊ីស្រាអែល លោក Benjamin Netanyahu កាលពីថ្ងៃទី ១៨ ខែមីនា។ លោក បានស្នើសុំឱ្យ លោក Netanyahu បញ្ជូនគណៈប្រតិភូមួយក្រុម ដើម្បីពិភាក្សាអំពីបញ្ហានេះ។ប៉ុន្តែកាលពីថ្ងៃចន្ទ អ៊ីស្រាអែល បានលុបចោលដំណើរទស្សនកិច្ចនេះដើម្បីតវ៉ាប្រឆាំងទៅនឹងការបរាជ័យរបស់សហរដ្ឋអាមេរិកក្នុងការប្រើសិទ្ធវេតូចំពោះសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលអំពាវនាវឱ្យមានបទឈប់បាញ់បន្ទាន់នៅក្នុងតំបន់ហ្កាហ្សា។អ្នកនាំពាក្យសេតវិមាន លោកស្រី Karine Jean-Pierre បាននិយាយទៅកាន់អ្នកសារព័ត៌មាន កាលពីថ្ងៃពុធថា ការិយាល័យរបស់លោក Netanyahu បានព្រមព្រៀងរៀបចំជំនួបឡើងវិញ។លោកស្រី បានបញ្ជាក់ពីសារៈសំខាន់នៃការធ្វើឱ្យប្រាកដថា មានផែនការការពារជនស៊ីវិល ដោយហៅវាថា ជាភាពបន្ទាន់។ កងកម្លាំងអ៊ីស្រាអែល បានកំណត់បន្តការវាយលុកតាមផែនការទៅលើទីក្រុង Rafah ជាកន្លែងដែលមនុស្ស ១,៥លាននាក់ កំពុងជ្រកកោន។ អ៊ីស្រាអែល បានទម្លាក់គ្រាប់បែកលើ ទីក្រុង Rafah ស្ទើរតែរាល់ថ្ងៃ។ អ៊ីស្រាអែល និយាយថា ក្រុមសកម្មប្រយុទ្ធហាម៉ាស នៅតែមាននៅក្នុងតំបន់នោះ។ទូរទស្សន៍ផ្សាយតាមផ្កាយរណប Al Jazeera មានមូលដ្ឋាននៅប្រទេសកាតា បានរាយការណ៍កាលពីថ្ងៃពុធ ថា មនុស្ស ២៤ នាក់រួមមានស្ត្រីនិងកុមារ ត្រូវបានសម្លាប់ក្នុងរយៈពេល ២៤ ម៉ោងកន្លងទៅនេះ។

ចំនួនអ្នកស្លាប់ពលរដ្ឋប៉ាឡេស្ទីននៅហ្កាហ្សា កើនឡើងដល់ ៣២.៤៩០នាក់

ក្រសួងសុខាភិបាលប៉ាឡេស្ទីនគ្រប់គ្រងដោយក្រុមហាម៉ាស បាននិយាយកាលពីថ្ងៃពុធថា ចំនួនអ្នកស្លាប់របស់ពលរដ្ឋប៉ាឡេស្ទីនពីការវាយប្រហាររបស់អ៊ីស្រាអែលដែលនៅតែបន្ត បានកើនឡើងដល់ ៣២.៤៩០នាក់។ ក្រសួងបាននិយាយនៅក្នុងសេចក្តីថ្លែងការណ៍ថា ក្នុងរយៈពេល ២៤ ម៉ោង កន្លងទៅនេះ កងទ័ពអ៊ីស្រាអែល បានសម្លាប់ពលរដ្ឋប៉ាឡេស្ទីន ៧៦នាក់ និង ១០២នាក់ផ្សេងទៀតបានរងរបួស។ នេះនាំឱ្យចំនួនអ្នកស្លាប់សរុបរបស់ប៉ាឡេស្ទីននៅតំបន់ហ្កាហ្សា ចាប់តាំងពីជម្លោះអ៊ីស្រាអែល និងក្រុមហាម៉ាស បានផ្ទុះឡើង នៅថ្ងៃទី ៧ ខែតុលា ឆ្នាំ ២០២៣ កើនឡើងដល់ ៣២.៤៩០នាក់ និងរបួសកើនឡើងដល់ ៧៤.៨៨៩ នាក់។វាត្រូវបានគេនិយាយថា ជនរងគ្រោះមួយចំនួននៅតែស្ថិតនៅក្រោមគំនរបាក់បែកក្នុងពេលមានការទម្លាក់គ្រាប់បែក និងខ្វះការការពារជនស៊ីវិល និងខ្វះបុគ្គលិករថយន្តគិលានសង្គ្រោះ។ សារព័ត៌មាន AFP បានរាយការណ៍ថា កងកម្លាំងអ៊ីស្រាអែល កាលពីថ្ងៃពុធ បានបន្តប្រតិបត្តិការយោធារបស់ខ្លួននៅក្នុងមន្ទីរពេទ្យ Al-Shifa ភាគខាងជើងតំបន់ហ្កាហ្សា ព្រមទាំងមន្ទីរពេទ្យ Al-Amal និងតំបន់ជុំវិញនៃបរិវេណមន្ទីពេទ្យ Nasser ក្នុងទីក្រុង Khan Yunis ភាគខាងត្បូងតំបន់ហ្កាហ្សា។ ក្រសួងសុខាភិបាល ដែលមានមូលដ្ឋាននៅតំបន់ហ្កាហ្សា បាននិយាយថា រថក្រោះ និងរថពាសដែក របស់អ៊ីស្រាអែលកំពុងប្រមូលផ្តុំ នៅជុំវិញបរិវេណមន្ទីពេទ្យ Nasser ប៉ុន្តែពុំទាន់បានចូលក្នុងមន្ទីរពេទ្យនៅឡើយ។ការវាយប្រហារតាមអាកាសរបស់អ៊ីស្រាអែល បានវាយប្រហារតំបន់លំនៅឋានក្នុងទីក្រុង Rafah ភាគខាងត្បូង ដោយបានសម្លាប់ពលរដ្ឋប៉ាឡេស្ទីនយ៉ាងហោចណាស់ ១១ នាក់។ យោងតាមសេចក្តីរាយការណ៍របស់ប្រព័ន្ធផ្សព្វផ្សាយក្នុងស្រុកបានឲ្យដឹងថា ពលរដ្ឋប៉ាឡេស្ទីន៣នាក់ត្រូវបានសម្លាប់ និង៩នាក់ផ្សេងទៀតបានរងរបួសដោយការទម្លាក់គ្រាប់បែក និងការបាញ់កាំភ្លើងរបស់អ៊ីស្រាអែលនៅទីក្រុង Jenin តំបន់West Bank ។ប្រភពព័ត៌មានប៉ាឡេស្ទីននៅក្នុងស្រុកបាននិយាយថា កងកម្លាំងយោធាអ៊ីស្រាអែលដ៏ច្រើន អមដោយគ្រឿងចក្រពីរគ្រឿង បានសម្រុកចូលទីក្រុង Jenin និងទីក្រុង ហ្កាបាទីយ៉ា(Qabatiya) ភាគខាងត្បូង ក្នុងពេលមានការបាញ់ប្រហារគ្នាជាមួយក្រុមសកម្មប្រយុទ្ធប៉ាឡេស្ទីន ហើយច្រកចូលសំខាន់ៗទៅកាន់ទីក្រុង Qabatiya ត្រូវបានឈូសឆាយអំឡុងការវាយឆ្មក់ចូល។

ជនអន្តោប្រវេសន៍ បង្ហាញការមិនទុកចិត្តលើគោលនយោបាយជំនួយសេដ្ឋកិច្ចរបស់រដ្ឋាភិបាលម៉ិកស៊ិក

ជនអន្តោប្រវេសន៍ដែលធ្វើដំណើរឆ្លងកាត់រដ្ឋ Chiapas ភាគខាងត្បូងប្រទេសម៉ិកស៊ិក បាននិយាយកាលពីថ្ងៃពុធថា ពួកគេមិនជឿទុកចិត្តលើការផ្តល់ប្រាក់របស់អាជ្ញាធរម៉ិកស៊ិក ជាថ្នូរទៅនឹងការបញ្ជូនជនអន្តោប្រវេសន៍ត្រឡប់ទៅប្រទេសកំណើតរបស់ពួកគេវិញ។កាលពីសប្តាហ៍មុន រដ្ឋាភិបាលប្រទេសម៉ិកស៊ិក បាននិយាយថា រដ្ឋាភិបាលនឹងផ្តល់ឱ្យជនអន្តោប្រវេសន៍វេណេស៊ុយអេឡា នៅក្នុងប្រទេសម៉ិកស៊ិកប្រហែល ១១០ដុល្លារក្នុងមួយខែ ជាផ្នែកនៃកម្មវិធីដែលពួកគេក៏នឹងមានឱកាសធ្វើការឱ្យក្រុមហ៊ុនផ្សេងៗគ្នានៅក្នុងប្រទេសទាំងពីរផងដែរ។ប៉ុន្តែជនអន្តោប្រវេសន៍នៅក្នុងក្បួនធ្វើដំណើរព្រួយបារម្ភថា នេះគ្រាន់តែជាការប្រើល្បិចរបស់រដ្ឋាភិបាល ក្នុងការចាប់ខ្លួនមនុស្ស មុននឹងនិរទេសពួកគេត្រឡប់ទៅប្រទេសកំណើតវិញ ដោយពុំមានការបង់ប្រាក់ឡើយ។លោក ដាវីន ស៊ីហ្ការ៉ាវ(Darwin Cigarroa) ជនអន្តោប្រវេសន៍វេណេស៊ុយអេឡា បាននិយាយថា ជនអន្តោប្រវេសន៍ភាគច្រើន ពេញចិត្តបន្តដំណើរទៅមុខទៀត។

រកឃើញកន្លែងផលិតឈាមជ្រូក និងសណ្តែកបណ្តុះបន្ថែមសារធាតុគីមីនៅសង្កាត់បឹងសាឡាង ខណ្ឌទួលគោក

ភ្នំពេញ ៖ មន្ត្រីការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ថា.ក.ប.ប. សាខារាជធានីភ្នំពេញបានរកឃើញទីតាំងលួចផលិតឈាមជ្រូក និងសណ្តែកបណ្តុះបន្ថែមសារធាតុគីមីនៅសង្កាត់បឹងសាឡាង ខណ្ឌទួលគោក និងដកហូតវត្ថុតាងសរុបចំនួន ៧៣គីឡូក្រាម។មន្ត្រី ក.ប.ប. ប្រាប់ឲ្យដឹងថា ក្នុងការការពារសុខុមាលភាពប្រជាពលរដ្ឋ សាខា ក.ប.ប. រាជធានីភ្នំពេញ សហការជាមួយអាជ្ញាធរមូលដ្ឋាន និងប៉ុស្តិ៍នគរបាលរដ្ឋបាលសង្កាត់បឹងសាឡាង បានចុះត្រួតពិនិត្យ ណែនាំ និងអប់រំ នៅទីតាំងផលិតឈាមជ្រូក និងសណ្តែកបណ្តុះចំនួន ២ទីតាំង ស្ថិតនៅភូមិ១៧ សង្កាត់បឹងសាឡាង ខណ្ឌទួលគោក រាជធានីភ្នំពេញ។ លទ្ធផលនៃការត្រួតពិនិត្យ សមត្ថកិច្ចជំនាញបានរកឃើញផលិតផលឈាមជ្រូកធ្វើអំពីឈាមគោ ដែលជាកម្មវត្ថុនៃការក្លែងបន្លំវត្ថុធាតុដើម បន្លំយថាប្រភេទនៃផលិតផលឈាម និង សណ្តែកបណ្តុះមានដាក់បន្ថែមសារធាតុគីមី មិនស្របតាមបទប្បញ្ញត្តិបច្ចេកទេសតាមលក្ខខណ្ឌតម្រូវផ្នែកអនាម័យម្ហូបអាហារ គុណភាពសុវត្ថិភាពផ្នែកអតិសុខុមប្រាណជីវសាស្ត្រ ស្របតាមបទប្បញ្ញាត្តិនៃច្បាប់។នាប្រតិបត្តិការនោះ មន្ត្រីជំនាញបានដកហូតផលិតផលឈាម ចំនួន ៥១គីឡូក្រាម និងសណ្តែកបណ្តុះដែលបន្ថែមសារធាតុគីមី ចំនួន ២២គីឡូក្រាម សរុបចំនួន ៧៣គីឡូក្រាម ។មន្ត្រី ក.ប.ប. បញ្ជាក់ឲ្យដឹងថា ក្រោយការត្រួតពិនិត្យ និងការពន្យល់ណែនាំអំពីច្បាប់ដល់ម្ចាស់ទីតាំងទាំង២ខាងលើ ម្ចាស់ទីតាំងបានយល់ព្រមសហការទទួលការណែនាំ អប់រំ ពីមន្ត្រីជំនាញ ដោយធ្វើកិច្ចសន្យាបញ្ឈប់ការដាក់លាយសារធាតុបន្ថែម ដែលមានសារធាតុគីមីលើការផលិតសណ្តែកបណ្តុះ ឬមិនបន្តការផលិតសណ្តែកបណ្តុះទៀត និងបញ្ឈប់ការផលិតឈាមជ្រូកធ្វើពីឈាមគោ ដែលជាកម្មវត្ថុនៃការក្លែងបន្លំវត្ថុធាតុដើម បន្លំផលិតផលឈាម និងមិនដាក់លាយសារធាតុបន្ថែមណាដែលច្បាប់មិនអនុញ្ញាតិ ព្រមទាំងរៀបចំអនាម័យ ទុកដាក់សម្ភារៈ វត្ថុធាតុដើមឲ្យបានល្អ ហើយម្ចាស់ទីតាំងបានស្នើសុំការរៀបចំរយៈពេល៣ខែ ដើម្បីកែតម្រូវអនាម័យទីតាំងឲ្យបានល្អ និងសហការជាមួយសមត្ថកិច្ចជំនាញ ដើម្បីចុះផ្ទៀងផ្ទាត់ពីភាពត្រឹមត្រូវក្នុងការធ្វើអាជីវកម្មនេះ៕ដោយ ៖ តារាវុទ្ធី

UN៖ អំពើហឹង្សាក្រុមជនអន្ធពាលហៃទី បង្អាក់ការចែកចាយស្បៀងអាហារ ទឹក និងការផ្គត់ផ្គង់ថ្នាំពេទ្យ

ក្រុមមនុស្សធម៌របស់អង្គការសហប្រជាជាតិ និងដៃគូរបស់ពួកគេនៅក្នុងប្រទេសហៃទី បាននិយាយកាលពីថ្ងៃអង្គារ (២៦ មីនា) ថា អំពើហឹង្សារបស់ក្រុមជនអន្ធពាល និងការបិទផ្លូវ កំពុងបង្កឱ្យមានការផ្តល់ជំនួយខុសប្រក្រតី និងការរំខានដល់ការចែកចាយការផ្គត់ផ្គង់ថ្នាំពេទ្យ។ កម្មវិធីស្បៀងអាហារពិភពលោក (WFP) បានប្រកាសពីសមិទ្ធិផលដ៏សំខាន់មួយសម្រាប់ខែមីនា ដោយសហការជាមួយដៃគូក្នុងស្រុកដើម្បីចែកចាយអាហារក្តៅៗចំនួន ១៨.៥០០ ដល់ជនភៀសខ្លួន។សមិទ្ធិផលនេះមានភាពផ្ទុយស្រឡះពីស្ថានការណ៍ប៉ុន្មានថ្ងៃមុន ចាប់ពីថ្ងៃទី២០ ដល់ថ្ងៃទី២២ ខែមីនា នៅពេលដែលទីភ្នាក់ងារ WFP និងដៃគូរបស់ខ្លួនជួបប្រទះការលំបាកក្នុងការផ្ដល់ជំនួយដល់មនុស្ស ១៨.០០០ នាក់ដែលបានគ្រោងទុក ដោយសារការព្រួយបារម្ភអំពីសុវត្ថិភាព។ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា ការចែកចាយថ្នាំ និងការផ្គត់ផ្គង់ផ្នែកវេជ្ជសាស្រ្ត គឺជាតម្រូវការដ៏សំខាន់ រួមទាំងការចែកចាយការផ្គត់ផ្គង់ដើម្បីឆ្លើយតបទៅនឹងជំងឺអាសន្នរោគ។ ទីភ្នាក់ងារនេះស្វះស្វែងរក្សាទីតាំងតាមដានការផ្ទុះជំងឺសម្រាប់ជនភៀសខ្លួននៅទូទាំងរដ្ឋធានី ព័រអូប្រាំង ៕

ក្រុមហាម៉ាស ជំរុញឱ្យបញ្ចប់ការទម្លាក់ជំនួយតាមយន្តហោះនៅហ្កាហ្សា បន្ទាប់ពីមនុស្ស១៨នាក់ស្លាប់

ក្រុមហាម៉ាស កាលពីថ្ងៃអង្គារ បានជំរុញឱ្យប្រទេសនានា បញ្ឈប់ការទម្លាក់ជំនួយតាមឆ័ត្រយោង ចូលទៅក្នុងតំបន់ហ្កាហ្សាដែលហែកហួរដោយសង្រ្គាម បន្ទាប់ពីមន្រ្តីនិងទីភ្នាក់ងារមនុស្សធម៌ បាននិយាយថាមនុស្ស ១៨នាក់បានស្លាប់ដោយព្យាយាមចូលទៅដល់កញ្ចប់អាហារ។ជំនួសឲ្យការទម្លាក់ជំនួយតាមយន្តហោះ ក្រុមសកម្មប្រយុទ្ធប៉ាឡេស្ទីន ដែលគ្រប់គ្រងតំបន់ហ្កាហ្សាស្ទ្រីប បានទាមទារឱ្យអ៊ីស្រាអែលដែលជាសត្រូវរបស់ខ្លួន អនុញ្ញាតឱ្យរថយន្តដឹកជំនួយបន្ថែមទៀត ចូលទៅក្នុងដែនដីដែលត្រូវបានហ៊ុមព័ទ្ធ ដែលអង្គការសហប្រជាជាតិ បានព្រមានថា ស្ថិតលើមាត់ជ្រោះ នៃគ្រោះទុរ្ភិក្សដែលបង្កើតឡើងដោយមនុស្ស។យន្តហោះជាច្រើនគ្រឿង មកពីប្រទេសហ្ស៊កដានី សហរដ្ឋអាមេរិក និងប្រទេសផ្សេងទៀត រួមទាំងប្រទេសសិង្ហបុរី បានទម្លាក់ស្បៀងអាហារតាមយន្តហោះចូលទៅក្នុងតំបន់ហ្កាហ្សា ទោះបីជាមន្ត្រីអង្គការសហប្រជាជាតិ និងទីភ្នាក់ងារជំនួយ បានព្រមានថា ការទម្លាក់បែបនេះគឺខ្វះតម្រូវការធ្ងន់ធ្ងរសម្រាប់ប្រជាជនចំនួន ២,៤ លាននាក់ ហើយមានប្រសិទ្ធភាពតិចជាងការទទួលបានតាមរយៈការដឹកជញ្ជូនតាមផ្លូវគោក។កាលពីថ្ងៃអង្គារ យន្តហោះរបស់ប្រទេសហ្ស៊កដានី អេហ្ស៊ីប និងអាល្លឺម៉ង់ បានទម្លាក់ជំនួយសង្គ្រោះម្តងទៀត ដោយឃើញកញ្ចប់អាហារអណ្តែតលើទឹកជាប់ជាមួយឆ័ត្រយោង ដែលបានធ្វើឲ្យហ្វូងប្រជាជនប៉ាឡេស្ទីនប្រញាប់ប្រញាល់ទៅរកជំនួយនោះ។រដ្ឋាភិបាលក្រុមហាម៉ាស និងក្រុមឃ្លាំមើលសិទ្ធិមនុស្សដែលមានមូលដ្ឋាននៅប្រទេសស្វីស បាននិយាយថាមនុស្ស ៦ នាក់បានស្លាប់នៅក្នុងការរត់ប្រជ្រៀតគ្នា និង ១២ នាក់ផ្សេងទៀតបានលង់ទឹក។

ឪពុករបស់តារាចម្រៀង Taylor Swift គេចផុតពីការចោទប្រកាន់ពីបទវាយអ្នកប្រមាញ់រូបភាព នៅអូស្ត្រាលី

ឪពុករបស់តារាចម្រៀងដ៏ល្បីកញ្ញា ថេល័រ ស្វីស (Taylor Swift) នឹងមិនត្រូវបានចោទប្រកាន់ជុំវិញបទចោទដែលថាលោកបានវាយប្រហារលើអ្នកតាមប្រមាញ់រូបថតម្នាក់ នៅក្នុងប្រទេសអូស្ត្រាលី នោះទេ។ អ្នកប្រម៉ាញ់រូប ឈ្មោះ បេន មែកដូណាល់ (Ben McDonald) វ័យ ៥១ ឆ្នាំបានប្រាប់នគរបាលថា លោក ស្កុត ស្វីស (Scott Swift) វ័យ ៧២ ឆ្នាំបានវាយចំមុខលោក នៅកំពង់ផែក្រុង ស៊ីដនី (Sydney) កាលពីថ្ងៃទី២៧ ខែកុម្ភៈ ប៉ុន្តែរបួសមិនត្រូវការជំនួយផ្នែកវេជ្ជសាស្រ្តទេ។អ្នកនាំពាក្យរបស់កញ្ញា ថេល័រ ស្វីស នៅពេលនោះបាននិយាយថា មនុស្សពីរនាក់បានប្រព្រឹត្តយ៉ាងគឃ្លើនឆ្ពោះទៅរកតារាចម្រៀងរូបនេះ។ បន្ទាប់ពីការស៊ើបអង្កេតរយៈពេលមួយខែ នគរបាលរដ្ឋ ញ៉ូវសៅវែល (New South Wales) កាលពីថ្ងៃអង្គារ (២៦ មីនា) បាននិយាយថា នឹងមិនចាត់វិធានការបន្ថែមទៀតទេ។ការប្រឈមមុខដាក់គ្នានេះបានកើតឡើងបន្ទាប់ពីលោក ស្វីស និងកូនស្រីរបស់ខ្លួនបានចុះពីទូកមួយ ក្នុងរយៈពេលប៉ុន្មានម៉ោង បន្ទាប់ពីកម្មវិធីប្រគុំតន្រ្តី អ៊ីរ៉ាស ធួរ (Eras Tour) ចុងក្រោយរបស់នាងនៅទីក្រុងស៊ីដនី។ វីដេអូមួយដែលត្រូវបានផ្សព្វផ្សាយដោយប្រព័ន្ធផ្សព្វផ្សាយអូស្ត្រាលី បង្ហាញពីតារាចម្រៀងរូបនោះ កំពុងលាក់ខ្លួននៅក្រោមឆ័ត្រដើរជាមួយឪពុក និងសន្តិសុខ។កាមេរ៉ាថតបានសំឡេងមនុស្សពីរនាក់ ដែលគេរាយការណ៍ថាជាអ្នកប្រម៉ាញ់រូប និងអង្គរក្ស ចោទប្រកាន់គ្នាទៅវិញទៅមកថាបានប៉ះឆ័ត្រដែល ថេល័រ ស្វីស កំពុងកាន់។ គេមិនច្បាស់ថា តើវីដេអូនោះថតពីហេតុការណ៍ដែលគេចោទប្រកាន់នោះ ឬយ៉ាងណា។ លោក មែកដូណាល់ បានប្រាប់សារព័ត៌មាន BBC ថាកញ្ញា ថេល័រ ស្វីស ចូលក្នុងរថយន្តរួចទៅហើយ នៅពេលដែលលោក ស្វីស «រុលទៅ» និងវាយប្រហារខ្លួនដោយគ្មានការបង្កហេតុ៕

ប្រទេសរុស្ស៊ី ចោទអ៊ុយក្រែន អាមេរិក និងអង់គ្លេសថា ជាអ្នកនៅពីក្រោយការបាញ់ប្រហារ នៅទីក្រុងមូស្គូ

ប្រធានទីភ្នាក់ងារសន្តិសុខដ៏មានឥទ្ធិពលបំផុតរបស់រុស្ស៊ី បាននិយាយកាលពីថ្ងៃអង្គារថា លោកជឿថា អ៊ុយក្រែន រួមជាមួយនឹងសហរដ្ឋអាមេរិក និងអង់គ្លេស បានចូលរួមក្នុងការវាយប្រហារលើសាលប្រគុំតន្ត្រីមួយ នៅខាងក្រៅទីក្រុងមូស្គូ ដែលបានសម្លាប់មនុស្សយ៉ាងហោចណាស់ ១៣៩នាក់។អ៊ុយក្រែន ដែលបានបដិសេធម្តងហើយម្តងទៀតនូវការទាក់ទងនឹងការវាយប្រហារកាលពីថ្ងៃសុក្រ បានច្រានចោលការចោទប្រកាន់រុស្ស៊ីថា ជាការកុហក។ ចក្រភពអង់គ្លេស បាននិយាយថា ពួកគេ «មិនសមហេតុសមផលទាំងស្រុង»។ ក្រុមរដ្ឋឥស្លាម ជាក្រុមសកម្មប្រយុទ្ធ ដែលធ្លាប់ស្វែងរកការគ្រប់គ្រងលើទឹកដីអ៊ីរ៉ាក់ និងស៊ីរី បានអះអាងទទួលខុសត្រូវចំពោះការបាញ់ប្រហារដ៏ធំនេះ។លោក អាឡិចសាន់ឌឺ ប៊តនីកូវ (Alexander Bortnikov) ប្រធានសេវាសន្តិសុខសហព័ន្ធ (FSB) បាននិយាយតាមទូរទស្សន៍ថា៖«យើងជឿថា សកម្មភាពនេះ ត្រូវបានរៀបចំឡើងដោយក្រុមបដិវត្តន៍ឥស្លាមខ្លួនឯង ហើយត្រូវបានសម្របសម្រួលដោយសេវាកម្មពិសេសរបស់លោកខាងលិច»។លោកប៊តនីកូវ បានបញ្ជាក់ថា៖«សេវាកម្មពិសេសរបស់អ៊ុយក្រែន គឺទាក់ទងដោយផ្ទាល់ទៅនឹងបញ្ហានេះ» ដោយបន្ថែមថា ទីក្រុងគីវ បានជួយរៀបចំក្រុមបដិវត្តន៍ឥស្លាម នៅទីតាំងមិនស្គាល់អត្តសញ្ញាណ នៅមជ្ឈិមបូព៌ា។នៅពេលដែលត្រូវបានសួរដោយអ្នកសារព័ត៌មានរុស្ស៊ីថា តើអ៊ុយក្រែន និងសម្ព័ន្ធមិត្តរបស់ខ្លួន សហរដ្ឋអាមេរិក និងអង់គ្លេស មានជាប់ពាក់ព័ន្ធក្នុងការវាយប្រហារលើសាលប្រគុំតន្ត្រីដែរឬទេ លោកប៊តនីកូវ បាននិយាយថា៖«យើងគិតថា នោះគឺជាបញ្ហាចោទ។ ឥឡូវនេះយើងកំពុងនិយាយអំពីភ័ស្តុតាង ដែលយើង មាន។ នេះគឺជាព័ត៌មានទូទៅ»។លោកប៊តនីកូវ មានវ័យ ៧២ឆ្នាំ ដែលបានបម្រើការជាប្រធាន FSB ចាប់តាំងពីឆ្នាំ ២០០៨ បាននិយាយថា ប្រទេសរុស្ស៊ី មិនទាន់កំណត់អត្តសញ្ញាណអ្នក ដែលបញ្ជាឲ្យធ្វើការវាយប្រហារដ៏សាហាវបំផុត នៅក្នុងប្រទេសរុស្ស៊ីអស់រយៈពេលពីរទសវត្សរ៍មកហើយ ប៉ុន្តែបានអះអាងថា វិធានការសងសឹក នឹងត្រូវធ្វើឡើង។លោកមិនបានផ្តល់ភ័ស្តុតាងជាក់លាក់ណាមួយសម្រាប់ការអះអាងនេះទេ ដែលក្រុមអ្នករឹងរូស នៅទីក្រុងមូស្គូ អាចប្រើដើម្បីបង្ហាញអំពីភាពត្រឹមត្រូវនៃការកើនឡើងសង្រ្គាមនៅអ៊ុយក្រែន និងពន្យល់ពីរបៀប ដែលសេវាសន្តិសុខរុស្ស៊ី បរាជ័យក្នុងការទប់ស្កាត់ការវាយប្រហារនេះ។

កូឡុំប៊ី គំរាមផ្តាច់ទំនាក់ទំនងជាមួយអ៊ីស្រាអែល ប្រសិនបើខ្លួន មិនគោរពតាមសេចក្ដីសម្រេចបទឈប់បាញ់របស់UN

ប្រធានាធិបតីកូឡុំប៊ី លោក ហ្គាស្តាវូ ភេត្រូ (Gustavo Petro) កាលពីថ្ងៃអង្គារ បានគំរាមផ្តាច់ទំនាក់ទំនងការទូតជាមួយអ៊ីស្រាអែល ប្រសិនបើប្រទេសនេះ មិនគោរពតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលអំពាវនាវឲ្យមានបទឈប់បាញ់ជាបន្ទាន់ នៅតំបន់ហ្កាហ្សាស្ទ្រីប។លោកភេត្រូ បានធ្វើសេចក្តីប្រកាសនៅលើបណ្តាញសង្គម X ដែលពីមុនត្រូវបានគេស្គាល់ថា ជាTwitter។ កាលពីថ្ងៃចន្ទ លោកបានផ្សព្វផ្សាយសារមួយទៀត ដែលលោកបានអបអរសាទរការអនុម័តនៃសេចក្តីសម្រេចនេះ និងបានជំរុញឲ្យប្រទេសផ្សេងទៀតផ្អាកទំនាក់ទំនងជាមួយអ៊ីស្រាអែល ប្រសិនបើខ្លួនមិនបញ្ឈប់ការវាយលុកយោធារបស់ខ្លួន នៅតំបន់ហ្កាហ្សាស្ទ្រីប ដែលបានបណ្តាលឲ្យមនុស្សជាង ៣២.000 នាក់ស្លាប់ នេះបើយោងតាមក្រសួងសុខាភិបាលនៅតំបន់ហ្កាហ្សា។ក្រសួងការបរទេសរបស់អ៊ីស្រាអែល បានឆ្លើយតបទៅនឹងការគំរាមកំហែងរបស់លោកភេត្រូកាលពីថ្ងៃអង្គារជាមួយនឹងសារតាមបណ្តាញសង្គមX ដែលបាននិយាយថា ប្រទេសមជ្ឈិមបូព៌ានេះ នឹង «បន្តការពារប្រជាជនរបស់ខ្លួន ហើយនឹងមិនចុះចាញ់នឹងសម្ពាធ និងការគំរាមកំហែងណាមួយឡើយ»។ក្រសួងការបរទេស បានចោទលោកភេត្រូថា ជា «អ្នកគាំទ្រក្រុមភេរវករហាម៉ាស ដែលបានសម្លាប់កុមារ និងស្ត្រី ក្នុងអំឡុងពេលការវាយឆ្មក់កាលពីថ្ងៃទី៧ ខែតុលា លើសហគមន៍អ៊ីស្រាអែល ដែលបានធ្វើការលុកលុយតំបន់ហ្កាហ្សានាពេលបច្ចុប្បន្ន ហើយបាននិយាយថា ជំហររបស់លោកភេត្រូ គឺជាការធ្វើឲ្យ«អាម៉ាស់ដល់ប្រជាជនកូឡុំប៊ី»។ ការប្រឈមមុខដាក់គ្នាលើបណ្តាញសង្គមX បង្ហាញពីការកាន់តែយ៉ាប់យ៉ឺន នៅក្នុងទំនាក់ទំនងរវាងប្រទេសទាំងពីរដែលបានចេញពីភាពជាដៃគូយោធានិងពាណិជ្ជកម្ម ទៅជាគូប្រជែងមនោគមន៍វិជ្ជាដ៏ជូរចត់។អស់ជាច្រើនទសវត្សរ៍មកហើយ ប្រទេសកូឡុំប៊ី បានប្រើប្រាស់យន្តហោះចម្បាំង និងកាំភ្លើងយន្តដែលផលិតដោយអ៊ីស្រាអែល ដើម្បីប្រយុទ្ធប្រឆាំងនឹងក្រុមជួញដូរគ្រឿងញៀន និងក្រុមឧទ្ទាម ហើយប្រទេសទាំងពីរ បានចុះហត្ថលេខាលើកិច្ចព្រមព្រៀងពាណិជ្ជកម្មសេរី នៅឆ្នាំ ២០២០។

ជនសង្ស័យទី៨ ពាក់ព័ន្ធការវាយប្រហារនៅសាលប្រគំតន្ត្រីក្រុងមូស្គូ ឡើងតុលាការ ខណៈមានការព្រមានការធ្វើទារុណ្ឌកម្ម

ប្រទេសរុស្ស៊ី បានឃុំខ្លួនបុរសជនសង្ស័យមានដើមកំណើតកៀហ្ស៊ិស្ថានក្នុងមន្ទីរឃុំឃាំងកាលពីថ្ងៃអង្គារ ដែលសង្ស័យថាជាប់ពាក់ព័ន្ធក្នុងការបាញ់ប្រហារសម្លាប់មនុស្សដ៍រង្គាលកាលពីថ្ងៃសុក្រ ទី២២ខែមីនា សប្ដាហ៍មុន នៅឯសាលប្រគំតន្ត្រីនៅទីក្រុងមូស្គូ ហើយបានបញ្ជូនអ្នកស៊ើបអង្កេតទៅកាន់ប្រទេសតាហ្ស៊ីគីស្ថានដើម្បីសាកសួរក្រុមគ្រួសាររបស់បុរសបួននាក់ដែលត្រូវបានចោទប្រកាន់ពីបទ វាយប្រហារនេះ។ ឥឡូវនេះ ជនសង្ស័យចំនួនប្រាំបីនាក់ត្រូវបានឃុំខ្លួនបណ្តោះអាសន្ន ចាប់តាំងពីខ្មាន់កាំភ្លើងបានបាញ់រះលើអ្នកចូលទស្សនាការប្រគំតន្ត្រីក្នុងការវាយប្រហារដ៏សាហាវបំផុតនៅក្នុងប្រទេសរុស្ស៊ី ក្នុងរយៈពេលពីរទសវត្សរ៍មិនធ្លាប់មាន មួយថ្ងៃបន្ទាប់ពីលោកប្រធានាធិបតី Vladimir Putinបានឈ្នះការបោះឆ្នោតក្ដាប់អាចអាណត្តិទី៥បន្ត ។ ក្រុមរដ្ឋអ៊ីស្លាមបានអះអាងថាខ្លួនជាអ្នកវាយប្រហារ និងបានបញ្ចេញវីដេអូពីការវាយប្រហារទៀតផង។ សហរដ្ឋអាមេរិក និងបារាំងនិយាយថា ការស៊ើបអង្កេតបង្ហាញថាក្រុមនេះពិតជានៅពីក្រោយការវាយប្រហារសម្លាប់មនុស្ស ១៣៩ នាក់ និង ១៨២ នាក់រងរបួសពិតមែន ។ ក្រុមសកម្មប្រយុទ្ធពុំបានកំណត់អត្តសញ្ញាណខ្មាន់វាយប្រហារណាម្នាក់ឡើយ។រុស្ស៊ី លើកឡើងថា ខ្មាន់កាំភ្លើងដែលជាប់សង្ស័យទាំង៤នាក់បានសារភាព ប៉ុន្តែគេបានមើលឃើញស្នាមរបួសនៅលើខ្លួនពួកគេ នៅពេលបង្ហាញខ្លួននៅក្នុងតុលាការ ដោយបង្កើនការព្រួយបារម្ភថាពួកគេត្រូវបានគេធ្វើទារុណកម្ម។ ទីភ្នាក់ងារព័ត៌មាន TASS បានរាយការណ៍ថា ស្នងការសិទ្ធិមនុស្សរបស់រុស្ស៊ី បាននិយាយថា ការឃុំខ្លួនជនសង្ស័យគួរតែត្រូវបានអនុវត្តទៅតាមច្បាប់ បន្ទាប់ពីវីដេអូដែលត្រូវបានផ្សព្វផ្សាយបានបង្ហាញពីការសួរចម្លើយជនសង្ស័យ។ ស្លឹកត្រចៀករបស់ជនសង្ស័យម្នាក់ត្រូវដាច់រហែក អំឡុងពេលសួរចម្លើយ៕

បណ្ដាញសង្គម

ព័ត៌មានថ្មីៗ

លោក គីម រិទ្ធី ៖«ការសម្រេចចិត្តចូលរួមរស់ជាមួយគណបក្សប្រជាជនកម្ពុជា គឺជាការចូលរួមចំណែកក្នុងការថែរក្សាសុខសន្តិភាព និងបន្តកសាងការអភិវឌ្ឍប្រទេសជាតិឱ្យកាន់តែរីកចម្រើន»

ក្រុមអ្នកជំនាញការអាដហុក ចុះពិនិត្យគម្រោងការងារនៅប្រាសាទមេបុណ្យខាងលិច

វិទ្យាស្ថានជាតិវិជ្ជាជីវៈបាត់ដំបងធ្វើតេស្តRPLដល់អតីតពលករមកពីថៃ ដើម្បីបំប្លែងបទពិសោធន៍ការងារទៅជាវិញ្ញាបនបត្រទទួលស្គាល់ជំនាញផ្លូវការ

ក្រុមគ្រូពេទ្យភ្នែកស្ម័គ្រចិត្តចុះពិនិត្យព្យាបាលភ្នែក និងផ្ដល់វ៉ែនតាជូនពលរដ្ឋស្រុកស្ទោងខេត្ដកំពង់ធំ

អ្នកតំណាងរាស្ត្រខេត្តពោធិ៍សាត់ ជួបសំណេះសំណាល និងផ្សព្វផ្សាយច្បាប់សំខាន់ៗជូនពលរដ្ឋឃុំកំពង់ពោធិ៍

ឯកឧត្តម គន់ គីម អញ្ជើញបញ្ចុះបឋមសិលាសាងសង់អគារទីស្នាក់ការ អ.ន.ក.ខេត្តតាកែវ

ឆ្មាំល្បាតឆ្នេរកោះតៃវ៉ាន់និយាយថា ខ្លួនបានដាក់ពង្រាយនាវាដើម្បីឆ្លើយតបទៅនឹងប្រតិបត្តិការរបស់ចិន

សម្ដេចតេជោ និងសម្ដេចកិត្តិព្រឹទ្ធបណ្ឌិត ប្រគេនចង្ហាន់សមណសិស្សជាង១ពាន់អង្គ/នាក់ ក្នុងឱកាសប្រឡងធម្មវិន័យ

បារាំង និងសម្ព័ន្ធមិត្តសម្លឹងរកការចាត់វិធានការថ្នាក់ជាតិ ដើម្បីដាក់សម្ពាធលើអ៊ីស្រាអែលលើបញ្ហាតំបន់ West Bank

ករណីឆ្លងជំងឺអេបូឡាហក់ឡើងជាង ៤០០នាក់ ខណៈក្ដីបារម្ភកើនឡើងពីការផ្ទុះឡើងនៃជំងឺនេះនៅអាហ្វ្រិកកណ្តាល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877