BTV NEWS

ឃាត់ខ្លួនជនបរទេសចំនួន៥នាក់ក្នុងប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យានៅឃុំសំរោង ស្រុកចន្ទ្រា ខេត្តស្វាយរៀង

បង្ក្រាបក្រុមចោរកាច់កម៉ូតូទាំងសំបុក ៦នាក់ដែលតែងធ្វើសកម្មភាពយ៉ាងសកម្មក្នុងភូមិសាស្ដ្ររាជធានីភ្នំពេញ

ស្នងការរាជធានី បញ្ជារឲ្យរឹតបន្តឹងកាន់តែខ្លាំង លើម៉ូតូកៃច្នៃបំពង់ស៊ីម៉ាំងបង្កសម្លេងរំខានដល់ពលរដ្ឋ តាមទីសាធារណៈ

ចាប់ខ្លួនជនសង្ស័យ៥នាក់ពាក់ពន្ធ័ករណីចាប់ ឃុំឃាំង និងបង្ខាំងមនុស្សដោយខុសច្បាប់

សន្តិសុខ និង សង្គម

មនុស្សរាប់ពាន់នាក់ចេញធ្វើបាតុកម្មក្នុងទីក្រុងអ៊ីស្លាម៉ាបាដ សម្រាប់ពលរដ្ឋប៉ាឡេស្ទីន នៅហ្កាហ្សា

មនុស្សរាប់ពាន់នាក់ បានចេញធ្វើបាតុកម្មនៅទីក្រុងអ៊ីស្លាម៉ាបាដ កាលពីថ្ងៃអាទិត្យ ទី១០ ខែមីនា ដោយមានកាន់ទង់ជាតិប៉ាឡេស្ទីន។ បាតុកម្មនេះ ត្រូវបានរៀបចំឡើងដោយគណបក្ស ចាម៉ាអាត អ៊ី អ៊ីស្លាមមី(Jamaat-e-Islami) របស់ប្រទេសប៉ាគីស្ថាន ក្នុងសាមគ្គីភាពជាមួយប្រជាជនប៉ាឡេស្ទីន នៅតំបន់ហ្កាហ្សា ក្នុងពេលចាប់ផ្តើមខែតមអាហារដ៏ពិសិដ្ឋនៃខែបុណ្យរ៉ាម៉ាដាន។សង្រ្គាមបច្ចុប្បន្ននៅក្នុងតំបន់ហ្កាហ្សា ដែលពេលនេះឈានចូលដល់ខែទី៦ បានចាប់ផ្តើមកាលពីថ្ងៃទី ៧ ខែតុលា នៅពេលដែលក្រុមអ្នកប្រយុទ្ធហាម៉ាស បានវាយលុកចូលទឹកដីរបស់ប្រទេសអ៊ីស្រាអែល ដោយបានសម្លាប់ជនជាតិអ៊ីស្រាអែលប្រហែល ១.២០០នាក់ និងចាប់ចំណាប់ថ្នូរជាងមួយរយនាក់។យុទ្ធនាការឥតឈប់ឈររបស់អ៊ីស្រាអែល ប្រឆាំងក្រុមហាម៉ាសបានបង្កឱ្យមានការព្រមានកើនឡើងនៅទូទាំងពិភពលោក ខណៈមានហានិភ័យនៃគ្រោះទុរ្ភិក្ស ដែលបានគំរាមកំហែងបន្ថែមលើចំនួនអ្នកស្លាប់ដែលបានកើនឡើងដល់ ៣១.០០០នាក់ រួចទៅហើយ។លោក ស៊ីរ៉ាច អ៊ុល ហាក (Siraj ul Haq) ប្រធានគណបក្ស ចាម៉ាអាត អ៊ី អ៊ីស្លាមមី(Jamaat-e-Islami) (JI) បាននិយាយទៅកាន់ហ្វូងមនុស្សថា យើងចង់ទៅជួយសង្គ្រោះប្រជាជនប៉ាឡេស្ទីន។ យើងចង់ទៅទីនោះ។ យើងចង់ផ្តល់ជីវិតរបស់យើងសម្រាប់ពួកគេ។ លោកបានគម្រាមហែក្បួនបាតុកម្មទៅកាន់ស្ថានទូតអាមេរិក ក្នុងទីក្រុង Islamabad ជាមួយនឹងមនុស្សរាប់លាននាក់ មកពីទូទាំងប្រទេសប៉ាគីស្ថាន នៅថ្ងៃសុក្រចុងក្រោយនៃបុណ្យរ៉ាម៉ាដាន ប្រសិនបើគ្មានបទឈប់បាញ់នោះទេ។

ក្រុមភេរវករ អាល់កៃដា នៅប្រទេសយេម៉ែន ប្រកាសពីការស្លាប់មេដឹកនាំរបស់ខ្លួន

ក្រុមស៊ើបការណ៍ចារកម្មសម្ងាត់ SITE បានរាយការណ៍កាលពីថ្ងៃអាទិត្យ (១០ មីនា) ថាសាខារបស់ក្រុមភេរវកេ អាល់កៃដា (Al-Qaeda) នៅក្នុងប្រទេសយេម៉ែន បានប្រកាសពីការស្លាប់របស់មេដឹកនាំរបស់ខ្លួនឈ្មោះ ខាលីដ បាថាហ្វី (Khalid Batarfi) និងបានតែងតាំងអ្នកស្នងតំណែងបន្ទាប់។ សេវាត្រួតពិនិត្យចារកម្មនេះបាននិយាយថាសាកសពរបស់លោក បាថាហ្វី ត្រូវបានបង្ហាញនៅក្នុងវីដេអូដែលចេញផ្សាយដោយក្រុម អាល់កៃដា នៅឧបទ្វីបអារ៉ាប់ នៅក្នុងសម្លៀកបំពាក់បញ្ចុះសព និងរុំដោយទង់ជាតិដែលមានឈ្មោះក្រុមជីហាដ។មិនមានព័ត៌មានលម្អិតភ្លាមៗអំពីពេលវេលា ឬមូលហេតុនៃការស្លាប់របស់លោក បាថាហ្វី ដែលត្រូវបានគេជឿថាមានវ័យ ៤០ ឆ្នាំរូបនេះទេ។ ទីភ្នាក់ងារ SITE បាននិយាយថាក្រុមនេះបានតែងតាំងជាប្រធានថ្មីរបស់ខ្លួនឈ្មោះថា សាអាដ ប៊ីន អាតេហ្វ អាល់អាវឡាឃី (Saad bin Atef al-Awlaki) ដែលបានបង្ហាញខ្លួនចុងក្រោយនៅក្នុងវីដេអូមួយចេញផ្សាយកាលពីខែកុម្ភៈ ឆ្នាំ២០២៣ ដោយជំរុញឱ្យកុលសម្ព័ន្ធស៊ុននីចូលរួមជាមួយបណ្ដាញ អាកាប (AQAP) របស់ក្រុម អាល់កៃដា នៅឧបទ្វីបអារ៉ាប់។បណ្ដាញ អាកាប បានប្រកាសនៅក្នុងខែកុម្ភៈ ឆ្នាំ២០២០ ថាលោក បាថាហ្វី ត្រូវបានតែងតាំងជាមេដឹកនាំរបស់ខ្លួន បន្ទាប់ពីមរណភាពរបស់អ្នកកាន់តំណែងមុននោះគឺលោក កាសស៊ីម អាល់រីមី (Qassim al-Rimi) នៅក្នុងការវាយប្រហារដោយយានដ្រូនមួយដែលប្រហែលជាធ្វើឡើងដោយអាមេរិក ឬយេម៉ែន។ សហរដ្ឋអាមេរិក បានចាត់ទុកសាខារបស់ក្រុមអាល់កៃដា នៅយេម៉ែន ជាក្រុមដ៏គ្រោះថ្នាក់បំផុតនៃបណ្តាញក្រុមជីហាតពិភពលោក ហើយក្រសួងការបរទេសបានចាត់តាំងលោក បាថាហ្វី ក្នុងឆ្នាំ២០១៨ ថាជា «ភេរវករសកល»៕

យោធាអាមេរិក បញ្ជូនយន្តហោះដឹកបុគ្គលិកស្ថានទូតពីប្រទេសហៃទី និងពង្រឹងសន្តិសុខ

យោធាអាមេរិក បាននិយាយកាលពីថ្ងៃអាទិត្យ (១០ មីនា) ថាខ្លួនបានធ្វើប្រតិបត្តិការមួយនៅក្នុងប្រទេសហៃទី ដើម្បីបញ្ជូនបុគ្គលិកស្ថានទូតដែលមិនសំខាន់ចេញពីប្រទេស ហើយបានបន្ថែមកងកម្លាំងសហរដ្ឋអាមេរិក ដើម្បីពង្រឹងសន្តិសុខស្ថានទូត ខណៈដែលប្រទេសសមុទ្រការ៉ាអ៊ីបមួយនេះកំពុងស្ថិតក្នុងភាពអាសន្ន។ប្រតិបត្តិការនេះគឺជាសញ្ញាចុងក្រោយបង្អស់នៃបញ្ហារបស់ប្រទេសហៃទី ខណៈដែលអំពើហឹង្សារបស់ក្រុមជនអន្ធពាលគំរាមកំហែងដល់ការទម្លាក់រដ្ឋាភិបាល និងបាននាំឱ្យមនុស្សរាប់ពាន់នាក់ភៀសខ្លួនចេញពីលំនៅឋានរបស់ពួកគេ។ជាមួយគ្នានេះ គណៈប្រតិភូសហភាពអឺរ៉ុបនៅក្នុងប្រទេសហៃទី បានបិទការិយាល័យរបស់ខ្លួនជាបណ្តោះអាសន្ន និងកាត់បន្ថយវត្តមានរបស់ខ្លួននៅក្នុងប្រទេសនេះមកត្រឹមកម្រិតអប្បបរមា នេះបើយោងតាមការបង្ហោះនៅលើប្រព័ន្ធផ្សព្វផ្សាយសង្គម X ដោយលើកឡើងពីកង្វល់សុវត្ថិភាព។ប្រទេសហៃទី បានធ្លាក់ចូលទៅក្នុងភាពអាសន្នកាលពីថ្ងៃអាទិត្យសប្តាហ៍មុន បន្ទាប់ពីមានការប្រយុទ្ធគ្នាកាន់តែខ្លាំងឡើងរវាងក្រុមជនអន្ធពាល ដែលព្រមានពីសង្គ្រាមស៊ីវិល ខណៈលោកនាយករដ្ឋមន្ត្រី អារៀល ហិនរី (Ariel Henry) ស្ថិតនៅក្នុងទីក្រុងណៃរ៉ូប៊ី ដើម្បីស្វែងរកកិច្ចព្រមព្រៀងសម្រាប់បេសកកម្មគាំទ្រដោយអង្គការសហប្រជាជាតិ ដែលបានពន្យារពេលជាយូរមកហើយ៕

នគរបាលអ៊ីស្រាអែល ប្រើកាណុងបាញ់ទឹក ដើម្បីបំបែកបាតុករប្រឆាំងលោកណេតាន់យ៉ាហ៊ូ

នគរបាលអ៊ីស្រាអែល បានប្រើកាណុងបាញ់ទឹក និងបានចាប់ខ្លួនមនុស្ស ១៩នាក់ ដើម្បីបំបែកការតវ៉ាទាមទារឲ្យលោកបេចាមីន ណេតាន់យ៉ាហ៊ូ (Benjamin Netanyahu) ចុះចេញពីតំណែង។ប្រជាជនអ៊ីស្រាអែលរាប់ពាន់នាក់ បានដើរតាមដងផ្លូវកាលពីល្ងាចថ្ងៃសៅរ៍ ខណៈដែលចលនាតវ៉ាប្រឆាំងលោកណេតាន់យ៉ាហ៊ូ ដែលបានថយចុះ ក្រោយការវាយប្រហាររបស់ក្រុមហាម៉ាស កាលពីថ្ងៃទី៧ ខែតុលា ទទួលបានចាប់អារម្មណ៍ឡើងវិញ។ប្រជាជនប្រមាណ ១០.០០០នាក់ បានចេញមកតវ៉ា នៅទីក្រុងតែលអាវីវ(Tel Aviv)។ នគរបាល បានឆ្លើយតបដោយកាណុងបាញ់ទឹក ហើយនគរបាល បានប្រមូលបាតុករ និងចាប់ខ្លួនមនុស្ស ១៦នាក់ដោយការប៉ះទង្គិចគ្នាក្លាយជាហិង្សា នៅក្នុងទីក្រុងនេះ។នៅក្នុងទីក្រុង Caesarea មានចម្ងាយប្រហែល ៣០ម៉ាយភាគខាងជើងនៃទីក្រុងតែលអាវីវ ប្រហែល មនុស្សប្រហែល ១.000នាក់ បានប្រមូលផ្តុំគ្នានៅភូមិគ្រឹះរបស់នាយករដ្ឋមន្ត្រី។ បាតុករម្នាក់នៅទីនោះ ត្រូវបានចាប់ខ្លួន នៅពេលយប់។គេមិនដឹងថា ការចាប់ខ្លួនមនុស្សពីរនាក់ទៀត ត្រូវបានគេធ្វើឡើង នៅទីណានោះទេ។បាតុកររាប់សែននាក់ បានចេញមកតាមដងផ្លូវកាលពីឆ្នាំមុន បន្ទាប់ពីលោកណេតាន់យ៉ាហ៊ូ បានបង្ហាញផែនការធ្វើកំណែទម្រង់តុលាការកំពូលរបស់អ៊ីស្រាអែល ជាវិធានការមយយដែលមនុស្សជាច្រើនភ័យខ្លាច នឹងដកប្រព័ន្ធត្រួតពិនិត្យ និងតុល្យភាព ដែលអាចរក្សាអំណាចរបស់នាយករដ្ឋមន្ត្រីរូបនេះ។

ប្រធានសហភាពអឺរ៉ុប៖ អ៊ីស្រាអែល ធ្វើមិនបានគ្រប់គ្រាន់ទេ ជំនួយតាមសមុទ្ររបស់EUដល់ហ្កាហ្សា គឺពិតជាចាំបាច់

ប្រធានគណៈកម្មការសហភាពអឺរ៉ុប លោកស្រី Ursula von der Leyen បានប្រាប់ទូរទស្សន៍សាធារណៈ ZDF របស់អាល្លឺម៉ង់កាលពីថ្ងៃអាទិត្យថា អ៊ីស្រាអែល ត្រូវធ្វើបន្ថែមទៀត ដើម្បីកាត់បន្ថយស្ថានភាពធ្ងន់ធ្ងរនៃប្រជាជននៅតំបន់ហ្កាហ្សាស្ទ្រីប។លោកស្រីបាននិយាយនៅក្នុងកម្មវិធីព័ត៌មានពេលយប់របស់ទូរទស្សន៍ ZDF ថា អ៊ីស្រាអែល គ្រាន់តែបំពេញកាតព្វកិច្ចរបស់ខ្លួន ក្នុងការថែទាំប្រជាជនក្នុងកម្រិតកំណត់មួយប៉ុណ្ណោះ ហើយត្រូវតែធ្វើបន្ថែមទៀត ដើម្បីការពារជីវិតជនស៊ីវិល។លោកស្រី បានបន្ថែមថា ដោយមើលឃើញពីស្ថានការណ៍នៅតំបន់ហ្កាហ្សា ច្រករបៀងជំនួយដែនសមុទ្ររបស់សហភាពអឺរ៉ុប ដែលបានគ្រោងទុកពីប្រទេសកោះស៊ីបទៅហ្កាហ្សា គឺពិតជាចាំបាច់ណាស់ ពីព្រោះបច្ចុប្បន្នយើងកំពុងជួបប្រទះគ្រោះមហន្តរាយមនុស្សធម៌។ ប្រតិបត្តិការតាមសមុទ្រ ត្រូវបានយល់ព្រមជាមួយអ៊ីស្រាអែល។កត្តាចាំបាច់ គឺថា អ៊ីស្រាអែលអាចត្រួតពិនិត្យទំនិញនៅខាងកោះស៊ីប និងអនុវត្តការត្រួតពិនិត្យសុវត្ថិភាព»។ បន្ទាប់ពីនោះមក នាវាអាចធ្វើដំណើរទៅកាន់តំបន់ហ្កាហ្សា។នៅពេលសួរអំពីការទទួលបានលទ្ធភាពចូលតាមផ្លូវដីបន្ថែមទៀតសម្រាប់ការផ្គត់ផ្គង់ជំនួយ លោកស្រី von der Leyen បាននិយាយថា បញ្ហានេះ ក៏កំពុងត្រូវបាន «ពិភាក្សាយ៉ាងយកចិត្តទុកដាក់» ជាមួយអ៊ីស្រាអែលផងដែរ។ «មនុស្សគ្រប់គ្នា ត្រូវបានអំពាវនាវឲ្យជួយ»។

ក្រុមហាម៉ាស វាយតម្លៃថា ការខូចខាតសង្រ្គាមនៅតំបន់ហ្កាហ្សា មានចំនួន ៣០ពាន់លានដុល្លារ

ការិយាល័យប្រព័ន្ធផ្សព្វផ្សាយដែលគ្រប់គ្រងដោយក្រុមហាម៉ាស បាននិយាយកាលពីថ្ងៃសៅរ៍ថា សង្រ្គាមនៅតំបន់ហ្កាហ្សា បានបណ្តាលឲ្យមានការខូចខាតចំនួន ៣០ ពាន់លានដុល្លារ និងការបំផ្លិចបំផ្លាញអគាររហូតដល់ ៨០ភាគរយ នៅទីក្រុងហ្កាហ្សា។ការិយាល័យនេះ បានឲ្យដឹងថា ការខូចខាតជារួម គឺអគារលំនៅដ្ឋាន គ្រឿងបរិក្ខារសេដ្ឋកិច្ច និងហេដ្ឋារចនាសម្ព័ន្ធ ដូចជាផ្លូវថ្នល់ អគ្គិសនី និងបំពង់បង្ហូរទឹក និងប្រព័ន្ធលូ។ព័ត៌មាននេះ មិនអាចផ្ទៀងផ្ទាត់ដោយឯករាជ្យបានទេ។អ៊ីស្រាអែល បាននិងកំពុងធ្វើសង្គ្រាម នៅតំបន់ហ្កាហ្សា បន្ទាប់ពីការលុកលុយរបស់ក្រុមសកម្មប្រយុទ្ធហាម៉ាសប៉ាឡេស្ទីន និងក្រុមផ្សេងទៀតចូលទៅក្នុងប្រទេសអ៊ីស្រាអែល កាលពីថ្ងៃទី៧ ខែតុលា ដែលបាន បណ្តាលឲ្យមនុស្សប្រហែល១.២០០នាក់ស្លាប់ និងប្រហែល ២៥០នាក់ ត្រូវបានចាប់ពង្រត់។ផ្នែកមួយនៃសង្រ្គាមរបស់អ៊ីស្រាអែល រួមមានការវាយប្រហារទ្រង់ទ្រាយធំទៅលើទីក្រុង និងតំបន់លំនៅដ្ឋាន នៅក្នុងតំបន់ហ្កាហ្សាស្ទ្រីប ដែលមានប្រជាជនរស់នៅច្រើន។ សម្ព័ន្ធមិត្តដូចជាសហរដ្ឋអាមេរិក បានរិះគន់យ៉ាងខ្លាំងទៅលើសកម្មភាពយោធារបស់អ៊ីស្រាអែលដែលបានសម្លាប់ជនរងគ្រោះជាច្រើន ក្នុងចំណោមប្រជាជនស៊ីវិលផងដែរ។យោធាអ៊ីស្រាអែល អះអាងថា ខ្លួនមានបំណងកម្ទេចក្រុមហាម៉ាស និងដោះលែងចំណាប់ថ្នូរទាំងអស់។

អ្នកគាំទ្រអតីតនាយករដ្ឋមន្ត្រី ប៉ាគីស្ថាន តវ៉ាប្រឆាំងការបន្លំក្នុងការបោះឆ្នោតតាមដែលចោទប្រកាន់

ក្រុមអ្នកគាំទ្ររាប់រយនាក់ របស់អតីតនាយករដ្ឋមន្ត្រីប្រទេសប៉ាគីស្ថាន លោក Imran Khan បានចេញធ្វើបាតុកម្មនៅទូទាំងប្រទេស កាលពីថ្ងៃអាទិត្យ ដើម្បីតវ៉ាប្រឆាំងការក្លែងបន្លំក្នុងការបោះឆ្នោត កាលពីថ្ងៃទី ៨ ខែកុម្ភៈ តាមដែលបានចោទប្រកាន់។ អ្នកបោះឆ្នោតនៅក្នុងប្រទេសប៉ាគីស្ថាន បានទៅបោះឆ្នោតកាលពីខែកុម្ភៈ ក្នុងការបោះឆ្នោតមួយដែលត្រូវបានរំខានដោយការបិទប្រព័ន្ធអ៊ីនធឺណិតនៅថ្ងៃបោះឆ្នោត មានការចាប់ខ្លួន និងអំពើហិង្សា ហើយលទ្ធផលត្រូវបានពន្យាពេលមិនប្រក្រតី ដែលនាំឱ្យមានការចោទប្រកាន់ថាការបោះឆ្នោតនេះ ត្រូវបានក្លែងបន្លំ។បេក្ខជនដែលគាំទ្រដោយលោក Khan បានឈ្នះអាសនៈចំនួន ៩៣ ប៉ុន្តែពុំមានចំនួនគ្រប់គ្រាន់ក្នុងការបង្កើតរដ្ឋាភិបាលនោះទេ។ លោក និងគណបក្សរបស់លោក បានច្រានចោលលទ្ធផលនៃការបោះឆ្នោត ដោយចោទថាមានការលួចបន្លំយ៉ាងទូលំទូលាយ។ លោក Khan ត្រូវបានបណ្តេញចេញពីតំណែងនៅក្នុងឆ្នាំ ២០២២ បន្ទាប់ពីមានជម្លោះជាមួយយោធាដ៏មានឥទ្ធិពលរបស់ប្រទេស ដែលបដិសេធមិនជ្រៀតជ្រែកក្នុងកិច្ចការនយោបាយ។គណបក្ស Pakistan Tehreek-e-Insaf (PTI) របស់លោកបានឈ្នះការបោះឆ្នោតជាតិកាលពីឆ្នាំ ២០១៨។ សំណុំរឿងផ្លូវច្បាប់ជាច្រើនករណី ត្រូវបាននាំមកដើម្បីប្រឆាំង លោក Khan ដែលបានដកសិទ្ធិលោកជាបេក្ខជន ហើយបានកាត់ទោសឱ្យជាប់ពន្ធនាគាររយៈពេលយូរ ដែលលោក បានបដិសេធថាពុំបានធ្វើអ្វីខុសនោះទេ។

ប្រធានទីភ្នាក់ងារ UNRWA មានសង្ឃឹមថាម្ចាស់ជំនួយមួយចំនួននឹងបន្តផ្តល់មូលនិធិក្នុងពេលឆាប់ៗនេះ

ប្រធានទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិបាននិយាយថា លោកមានសុទិដ្ឋិនិយមថា ម្ចាស់ជំនួយមួយចំនួននឹងចាប់ផ្តើមផ្តល់មូលនិធិម្តងទៀតក្នុងរយៈពេលប៉ុន្មានសប្តាហ៍ខាងមុខនេះ ដោយព្រមានថាការផ្អាកប្រតិបត្តិការរបស់ទីភ្នាក់ងារនេះមានហានិភ័យខ្ពស់នៃការស្លាប់របស់ពលរដ្ឋប៉ាឡេស្ទីនបន្ថែមទៀត បន្ទាប់ពីអ៊ីស្រាអែល បានចោទប្រកាន់បុគ្គលិករបស់ទីភ្នាក់ងារនេះមួយចំនួនបានចូលរួមក្នុងការវាយប្រហាររបស់ពួកហាម៉ាស កាលពីថ្ងៃទី០៧ ខែតុលា។ការពិនិត្យឡើងវិញដោយឯករាជ្យនៃទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ជិតបូព៌ា (UNRWA) ត្រូវបានដាក់ឱ្យដំណើរការក្រោមការដឹកនាំរបស់អតីតរដ្ឋមន្ត្រីការបរទេសបារាំង លោកស្រី ខាធើរីន ខូឡូនណា (Catherine Colonna) ហើយរបាយការណ៍ចុងក្រោយរបស់លោកស្រីត្រូវបានគេរំពឹងថានឹងបោះពុម្ពនៅខែក្រោយ ដែលនោះប្រហែលជាការសម្រេចលើជោគវាសនារបស់ទីភ្នាក់ងារនេះ។ទីភ្នាក់ងារ UNRWA ដែលផ្តល់ជំនួយ និងសេវាកម្មសំខាន់ៗដល់ជនភៀសខ្លួនប៉ាឡេស្ទីននៅតំបន់ហ្កាហ្សា តំបន់ វេសបែង (West Bank) ដែលកាន់កាប់ដោយអ៊ីស្រាអែល និងនៅទូទាំងតំបន់ជិតបូព៌ានោះ បានជួបវិបត្តិចាប់តាំងពីអ៊ីស្រាអែលបានចោទប្រកាន់បុគ្គលិក ១២ នាក់ក្នុងចំណោមបុគ្គលិក ១៣.០០០ នៅហ្កាហ្សា ពីបទជាប់ពាក់ព័ន្ធក្នុងការវាយប្រហារកាលពីថ្ងៃទី០៧ ខែតុលា លើអ៊ីស្រាអែល ដែលបង្កឱ្យមានសង្គ្រាមដ៏បង្ហូរឈាមនៅក្នុងតំបន់ហ៊ុមព័ទ្ធប៉ាឡេស្ទីនមួយនេះ៕

សមាជិកសភាអភិរក្សនិយម ចោទលោកកាមេរូនថា បានរិះគន់អ៊ីស្រាអែលជុំវិញការដោះស្រាយស្ថានការណ៍នៅហ្កាហ្សា

សមាជិកសភាអភិរក្សនិយម បានចោទប្រកាន់លោករដ្ឋមន្ត្រីការបរទេស លោក ដេវីត កាមេរូន ( David Cameron)ថាបាន «រិះគន់»អ៊ីស្រាអែលជុំវិញការដោះស្រាយស្ថានការណ៍របស់ខ្លួន នៅក្នុងតំបន់ហ្កាហ្សា ហើយបានអះអាងថា ក្រសួងការបរទេសបង្ហាញពី«មនោសញ្ចេតនាប្រឆាំងនឹងអ៊ីស្រាអែល»។សមាជិកសភាបក្សអភិរក្សអង់គ្លេសដែលគាំទ្រអ៊ីស្រាអែល គ្រោងនឹងលើកឡើងពីកង្វល់របស់ខ្លួនជាមួយរដ្ឋមន្ត្រីការបរទេស នៅក្នុងកិច្ចប្រជុំមួយ នៅថ្ងៃអង្គារ។កាលពីសប្តាហ៍មុន លោកកាមេរូន បានជួបជាមួយ លោក Benny Gantz រដ្ឋមន្ត្រីនៃគណៈរដ្ឋមន្ត្រីអ៊ីស្រាអែល ដើម្បីពិភាក្សាអំពីលំហូរនៃជំនួយទៅកាន់តំបន់ហ្កាហ្សា។ បន្ទាប់ពីកិច្ចប្រជុំ លោកបានបង្ហោះសេចក្តីថ្លែងការណ៍មួយនៅលើបណ្តាញសង្គម X ដែលពីមុនជា Twitter ដោយនិយាយថា លោកបាន«ធ្វើឲ្យមានភាពច្បាស់លាស់នូវជំហានដែលអ៊ីស្រាអែលត្រូវធ្វើ ដើម្បីបង្កើនជំនួយ» ហើយថា «យើងនៅតែមិនឃើញការកែលម្អជាក់ស្តែង»។លោកក៏បាននិយាយផងដែរថា ខ្លួនមាន«ការព្រួយបារម្ភយ៉ាងខ្លាំងអំពីលទ្ធភាពនៃការវាយលុកយោធានៅ ទីក្រុងរ៉ាហ្វា «Rafah» ហើយថា ការអនុវត្តរបស់អ៊ីស្រាអែលក្នុងការផ្តល់ជំនួយនឹងមាន «ផលវិបាក»សម្រាប់ការវាយតម្លៃរបស់ចក្រភពអង់គ្លេសអំពី«ថាតើអ៊ីស្រាអែល គោរពតាមច្បាប់អន្តរជាតិឬអត់»។សមាជិកសភាម្នាក់ បានប្រាប់សារព័ត៌មាន The Telegraph ថា នៅពេលដែលសេចក្តីថ្លែងការណ៍ ត្រូវបានបង្ហោះចូលទៅក្នុងក្រុម WhatsApp របស់សមាជិកសភាបក្សអភិរក្សអង់គ្លេស មាន «ការប៉ះពាល់ដល់ផ្លូវអារម្មណ៍យ៉ាងខ្លាំងទាក់ទងនឹងអ្វីដែលលោកដេវីត បានលើកឡើង។លោកស្រី Theresa Villiers អតីតរដ្ឋមន្ត្រីនៃគណៈរដ្ឋមន្ត្រី បាននិយាយថា៖«រដ្ឋាភិបាលចក្រភពអង់គ្លេស ត្រូវតែ [គាំទ្រ] សិទ្ធិរបស់អ៊ីស្រាអែលក្នុងការការពារខ្លួនពីអំពើប្រល័យពូជសាសន៍ ដែលបានវាយប្រហារពួកគេកាលពីថ្ងៃទី៧ ខែតុលា»។

ឃ្លាំងស្តុកប្រេងរុស្ស៊ី ត្រូវរងការវាយប្រហារពីអ៊ុយក្រែន ខណៈវិមានក្រឹមឡាំង ហាមឃាត់ការនាំចេញប្រេង

ប្រជាជនរុស្សី កំពុងមានអារម្មណ៍ថា មានការប៉ះពាល់យ៉ាងខ្លាំងពីការវាយប្រហាររបស់អ៊ុយក្រែនលើហេដ្ឋារចនាសម្ព័ន្ធប្រេង «នៅក្នុងស្ថានភាពមួយដែលពួកគេពិបាកក្នុងការគ្រប់គ្រង» ខណៈដែលឃ្លាំងប្រេងមួយ នៅក្នុងតំបន់ Kursk បានក្លាយជាទីតាំងចុងក្រោយបំផុតដែលត្រូវបានកំណត់គោលដៅ។មន្ត្រីរុស្ស៊ី បាននិយាយថា ឃ្លាំងស្តុកប្រេងនៅក្នុងតំបន់ដែលមានព្រំប្រទល់ជាប់ប្រទេសអ៊ុយក្រែន បានផ្ទុះឡើង បន្ទាប់ពីវាត្រូវរងការវាយប្រហារ កាលពីព្រឹកថ្ងៃអាទិត្យ។លោក Roman Starovoyt អភិបាលតំបន់ បាននិយាយកាលពីព្រឹកថ្ងៃអាទិត្យថា៖«កងពន្លត់អគ្គិភ័យ និងសេវាសង្គ្រោះបន្ទាន់ កំពុងធ្វើការនៅកន្លែងកើតហេតុនោះ»។ លោកមិនបានបញ្ជាក់ថា តើឃ្លាំងប្រេងមួយណា ត្រូវបានវាយប្រហារ ឬទំហំរបស់វាប៉ុនណានោះទេ។ការវាយប្រហារនេះ គឺជាផ្នែកមួយនៃយុទ្ធសាស្ត្ររបស់អ៊ុយក្រែន ដើម្បីវាយប្រហាររោងចក្រប្រេង និងឧស្ម័ននៅទូទាំងប្រទេសរុស្ស៊ី ដែលក្រសួងការពារជាតិអង់គ្លេស បាននិយាយថា បានបង្ខំវិមានក្រឹមឡាំងឲ្យ ហាមឃាត់ការនាំចេញប្រេងឥន្ធនៈសម្រាប់រយៈពេល៦ខែ ដើម្បីព្យាយាមកាត់បន្ថយការកើនឡើងតម្លៃ ប្រេង។ក្រសួងនេះ បាននិយាយថា៖«វាទំនងជាសមត្ថភាពចម្រាញ់របស់រុស្ស៊ី ត្រូវបានកាត់បន្ថយជាបណ្ដោះ អាសន្នដោយការវាយប្រហារតាមអាកាសជាច្រើនដងប្រឆាំងនឹងរោងចក្រចម្រាញ់ប្រេង នៅទូទាំងប្រទេសរុស្ស៊ី»។ការហាមឃាត់ការនាំចេញប្រេងឥន្ធនៈរបស់រុស្ស៊ី ដែលបានណែនាំនៅថ្ងៃទី១ ខែមីនា បន្ទាប់ពីការហាមឃាត់រយៈពេល៣ខែ ស្រដៀងគ្នាដែលបានចូលជាធរមាន នៅពាក់កណ្តាលខែកញ្ញា។ ការហាមឃាត់ កាលពីឆ្នាំមុន ត្រូវបានបង្កឡើងដោយកសិកររុស្ស៊ី ដែលបានគំរាមតវ៉ា លុះត្រាវិមានក្រឹមឡាំងគ្រប់គ្រងតម្លៃប្រេងឥន្ធនៈ មិនឲ្យកើនឡើង។

បណ្ដាញសង្គម

ព័ត៌មានថ្មីៗ

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញប្រគេនទេយ្យវត្ថុដល់វត្តចំនួន៥ និងចែកអំណោយជូនប្រជាពលរដ្ឋចំនួន៥០០គ្រួសារ នៅខេត្តស្វាយរៀង

ប្រព័ន្ធការពារដែនអាកាសរបស់រុស្ស៊ី បានបំផ្លាញយានដ្រូនអ៊ុយក្រែនជាង ៩០គ្រឿង កាលពីយប់ថ្ងៃសៅរ៍

រុស្ស៊ី គ្រោងជួលជនជាតិឥណ្ឌាមកបម្រើការ នៅក្នុងវិស័យគ្រឿងយន្ត និងគ្រឿងអេឡិចត្រូនិច

ជនជាតិឃើដនៅប្រទេសស៊ីរី និយាយថា ដំណើរការជ្រើសរើសសមាជិកសភា គឺពុំមានលក្ខណៈប្រជាធិបតេយ្យ

គោលជំហរសន្ដិភាពរបស់រាជរដ្ឋាភិបាលកម្ពុជា គឺជាគោលជំហរច្បាស់លាស់ ដាច់ខាត និងឥតប្រែប្រួល

សភាពការណ៍ជួរមុខតាមបន្ទាត់ព្រំដែនខេត្តព្រះវិហារ ឧត្តរមានជ័យ និងបន្ទាយមានជ័យមានសភាពស្ងប់ស្ងាត់

ឯកឧត្តម អ៊ុច បូររិទ្ធ អញ្ជើញសួរសុខទុក្ខ និងនាំយកអំណោយរបស់សម្ដេចតេជោ ជូនប្រជាពលរដ្ឋ និងកុមារភៀសសឹក នៅខេត្តឧត្តរមានជ័យ

វិទ្យាស្ថានជាតិពាណិជ្ជសាស្ត្រ (NIB) បានសហការជាមួយក្រុមហ៊ុនចំនួន៥ ដើម្បីផ្ដល់ឱកាសការងារចំនួន ២៤៦៣កន្លែងដល់ពលករខ្មែរដែលទើបវិលត្រឡប់មកពីប្រទេសថៃ

ខេត្តជាប់សមុទ្រនៃប្រទេសចិនខាងត្បូង កំពុងចាត់វិធានការទប់ស្កាត់ផលប៉ះពាល់ពីព្យុះទីហ្វុង Kajiki

អ៊ុយក្រែន ប្រារព្ធទិវាឯករាជ្យ ជាមួយនឹងការវាយប្រហារដោយយានដ្រូន ទៅលើប្រទេសរុស្ស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877