BTV NEWS

ឃាតកម្មចាក់សម្លាប់មនុស្សរួចយកសពប្លុងចោលក្នុងរថយន្តនៅខណ្ឌដង្កោ កម្លាំងសមត្ថកិច្ចឃាត់ខ្លួនក្រុមឃាតកបាន០៤នាក់

ដើមខែមិថុនានេះ កម្លាំងនគរបាលរាជធានីបង្ក្រាបគ្រឿងញៀន០៥ករណី ឃាត់មនុស្ស២៤នាក់ និងដកហូតគ្រឿងញៀន៦៦គីឡូក្រាម

បង្ក្រាបជនជាតិចិន០៤នាក់ ជាក្រុមត្រៀមរៀបចំផែនការណ៍ចាប់ជំរិត តែត្រូវទប់ស្កាត់ទាន់ពេល

សមត្ថកិច្ចខេត្តស្វាយរៀងបន្តចុះបង្រ្កាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាឃាត់ខ្លួនជនសង្ស័យជនជាតិចិន វៀតណាម និងខ្មែរចំនួន ៧៣នាក់

សន្តិសុខ និង សង្គម

ចំនួនអ្នកស្លាប់ជនជាតិប៉ាឡេស្ទីន នៅតំបន់សង្រ្គាមហ្កាហ្សា កើនឡើងដល់ជាង ៣១.១០០ នាក់

ក្រសួងសុខាភិបាលនៃតំបន់ហ្កាហ្សា បានរាយការណ៍កាលពីថ្ងៃចន្ទ (១១ មីនា) ថាចំនួនអ្នកស្លាប់របស់ប៉ាឡេស្ទីន ដោយសារការវាយប្រហាររបស់អ៊ីស្រាអែល ដែលកំពុងបន្តលើតំបន់ហ្កាហ្សាស្ទ្រីប បានកើនឡើងលើសពី ៣១.១០០ នាក់។សេចក្តីថ្លែងការណ៍របស់ក្រសួងបានឱ្យដឹងថា ក្នុងរយៈពេល ២៤ ម៉ោងកន្លងមកនេះ កងទ័ពអ៊ីស្រាអែលបានសម្លាប់ជនជាតិប៉ាឡេស្ទីនចំនួន ៦៧ នាក់ និងបង្ករបួស ១០៦ នាក់ទៀត ដែលជំរុញឱ្យចំនួនអ្នកស្លាប់សរុបកើនឡើងដល់ ៣១.១១២ នាក់ និងអ្នករបួសដល់ ៧២.៧៦០ នាក់ចាប់តាំងពីការចាប់ផ្តើមនៃជម្លោះអ៊ីស្រាអែល និងក្រុមហាម៉ាស នៅថ្ងៃទី០៧ ខែតុលា ឆ្នាំ២០២៣ មក។ប្រភពប៉ាឡេស្ទីនបានប្រាប់សារព័ត៌មានស៊ីនហួថា នៅថ្ងៃដំបូងនៃបុណ្យរ៉ាម៉ាដាន យន្តហោះចម្បាំងរបស់អ៊ីស្រាអែលបានបន្តធ្វើការវាយប្រហារតាមអាកាសនៅក្នុងតំបន់ផ្សេងៗនៃតំបន់ហ្កាហ្សាស្ទ្រីប ដែលបណ្តាលឱ្យមានអ្នកស្លាប់ និងរបួសជាច្រើននាក់។នៅក្នុងសង្កាត់ អាល់ ហ្សាយទួន (Al-Zaytoun) នៃភាគខាងត្បូងហ្កាហ្សា ប្រភពបានរាយការណ៍ថា មនុស្ស ១៦ នាក់ រួមទាំងកុមារ និងស្ត្រី ត្រូវបានសម្លាប់នៅពេលដែលផ្ទះមួយត្រូវបានបំផ្ទុះ។ យោងតាមប្រភព និងសាក្សីក្នុងតំបន់បានឱ្យដឹងថា នៅចុងភាគខាងត្បូងហ្កាហ្សា ជនជាតិប៉ាឡេស្ទីនរាប់សិបនាក់ផ្សេងទៀតត្រូវបានសម្លាប់ និងជាច្រើននាក់បានរងរបួសនៅក្នុងការទម្លាក់គ្រាប់បែកមិនឈប់ឈររបស់អ៊ីស្រាអែល៕

អាមេរិក សន្យាផ្តល់ថវិកាបន្ថែមដល់កម្លាំងសន្តិសុខហៃទី ខណៈស្ថានការណ៍កាន់តែយ៉ាប់យ៉ឺន

រដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) បាននិយាយកាលពីថ្ងៃចន្ទ (១១ មីនា) ថាសហរដ្ឋអាមេរិក នឹងផ្តល់វិភាគទានបន្ថែមចំនួន ១០០ លានដុល្លារដល់កងកម្លាំងសន្តិសុខពហុជាតិដែលគាំទ្រដោយអង្គការសហប្រជាជាតិ ដែលមានបំណងជួយនគរបាលហៃទី ប្រយុទ្ធប្រឆាំងនឹងក្រុមជនអន្ធពាល និងជំនួយមនុស្សធម៌ចំនួន ៣៣ លានដុល្លារ ស្របពេលដែលស្ថានភាពសន្តិសុខក្នុងប្រទេសនេះកាន់តែយ៉ាប់យ៉ឺនខ្លាំង។ការប្តេជ្ញាចិត្តនេះនាំមកនូវការរួមចំណែករបស់សហរដ្ឋអាមេរិក ដែលបានស្នើឡើងដល់ចំនួន ៣០០ លានដុល្លារ ប៉ុន្តែជាគេមិនច្បាស់ថាត្រូវការរយៈពេលប៉ុន្មានដើម្បីឱ្យមូលនិធិនេះត្រូវបានអនុម័តដោយសមាជិកសភា និងត្រូវផ្ទេរ។អ្នកនាំពាក្យរបស់ស្ថាប័នពិភពលោកមួយនេះបាននិយាយថា គិតត្រឹមថ្ងៃច័ន្ទ ចំនួនតិចជាង ១១ លានដុល្លារត្រូវបានបញ្ចូលទៅក្នុងមូលនិធិបរធនបាល របស់អង្គការសហប្រជាជាតិ ដោយមិនមានការបន្ថែមថ្មីចាប់តាំងពីថ្ងៃទី០៣ ខែមីនា នៅពេលដែលហៃទី បានប្រកាសដាក់ប្រទេសក្នុងភាពអាសន្នដោយសារតែអំពើហិង្សាកាន់តែអាក្រក់ឡើងពីក្រុមជនអន្ធពាល ដែលកំពុងស្វះស្វែងផ្តួលរំលំរដ្ឋាភិបាល។អង្គការសហប្រជាជាតិ ជឿថា ក្រុមជនអន្ធពាលជនជាតិហៃទីបានប្រមូលឃ្លាំងអាវុធដ៏ធំដែលភាគច្រើនជួញដូរពីសហរដ្ឋអាមេរិក។ អង្គការនេះប៉ាន់ប្រមាណថាមនុស្សជាង ៣៦២.០០០ នាក់ត្រូវបានផ្លាស់ទីលំនៅខាងក្នុង ដែលពាក់កណ្តាលជាកុមារ ហើយមនុស្សរាប់ពាន់នាក់ត្រូវបានសម្លាប់នៅក្នុងជម្លោះរួមនៅក្នុងប្រទេសហៃទី ជាមួយនឹងរបាយការណ៍រីករាលដាលនៃការចាប់រំលោភ ការធ្វើទារុណកម្ម និងការចាប់ជំរិតប្រាក់លោះខ្លួន ចាប់តាំងពីឆ្នាំ២០២១ មក៕

កងទ័ពនីហ្សេរីយ៉ា តាមស្វែងរកក្រុមចាប់ជំរិតប្រដាប់អាវុធ

ទាហានប្រទេសនីហ្សេរីយ៉ា កាលពីថ្ងៃចន្ទ បានតាមស្វែងរកក្រុមចាប់ជំរិតប្រដាប់អាវុធ ដែលបានចាប់សិស្សសាលាជិត ៣០០ នាក់ នៅក្នុងរដ្ឋ Kaduna កាលពីសប្តាហ៍មុន។ យោងតាមប្រភពសន្តិសុខ បាននិយាយថា កងពល One Division មានមូលដ្ឋាននៅរដ្ឋ Kaduna របស់កងទ័ព កំពុងដឹកនាំប្រតិបត្តិការ នេះ។ប្រភពព័ត៌មាន បាននិយាយថា ទាហានត្រូវបានគាំទ្រដោយនគរបាលក្នុងតំបន់ ទីភ្នាក់ងារស៊ើបការណ៍សម្ងាត់ និងកងកម្លាំងទ័ពអាកាស ព្រមទាំងអង្គភាពសេវាស៊ើបអង្កេតរបស់រដ្ឋ Kaduna ។ ឪពុកម្តាយរបស់សិស្ស និយាយថា ពួកគេកំពុងរង់ចាំចម្លើយពីអាជ្ញាធរតំបន់ បន្ទាប់ពីការចាប់ពង្រត់កូនៗរបស់ពួកគេ កាលពីថ្ងៃព្រហស្បតិ៍សប្តាហ៍មុន នៅក្នុងទីក្រុង Kuriga ។ ការចាប់ពង្រត់ទ្រង់ទ្រាយធំបែបនេះ ត្រូវបានធ្វើឡើងជាលើកដំបូងដោយក្រុមជីហាដ Boko Haram កាលពីមួយទសវត្សរ៍កន្លងទៅនេះ។ ប៉ុន្តែយុទ្ធសាស្ត្រនេះ ត្រូវបានក្រុមជនប្រដាប់អាវុធប្រើប្រាស់ដើម្បីទាមទារប្រាក់លោះ។គ្រួសារ និងសហគមន៍ បានមើលឃើញថា ពួកគេត្រូវបង្ខំចិត្តប្រមូលធនធាន ហើយលក់ទ្រព្យសម្បត្តិ ដូចជាសត្វគោក្របី និងដីធ្លី ដើម្បីឲ្យកូនៗរបស់ពួកគេត្រូវបានដោះលែងមកវិញ។ អ្នកវិភាគសន្តិសុខ បាននិយាយថា ប្រធានាធិបតី លោក Bola Tinubu មិនទាន់ដាក់ចេញនូវគោលនយោបាយច្បាស់លាស់អំពីវិធីដែលលោកមានបំណងធ្វើឱ្យប្រទេសនីហ្សេរីយ៉ា មានសុវត្ថិភាពជាងមុននៅឡើយ។ លោកបានចូលកាន់តំណែងកាលពីខែឧសភា ឆ្នាំមុន ដោយសន្យាថា នឹងដោះស្រាយបញ្ហាអសន្តិសុខដែលកំពុងរាលដាលនេះ។

អ្នកជំនាញសិទ្ធិមនុស្សរបស់ UN និយាយថា រុស្ស៊ី ជាអ្នកទទួលខុសត្រូវចំពោះការស្លាប់របស់លោក Navalny

អ្នកជំនាញសិទ្ធិមនុស្សរបស់អង្គការសហប្រជាជាតិ ទទួលបន្ទុកលើរុស្ស៊ី បាននិយាយកាលពីថ្ងៃចន្ទ (១១ មីនា) ថាការស្លាប់របស់អ្នកនយោបាយប្រឆាំងរបស់រុស្ស៊ី លោក អាឡិចស៊ី ណាវ៉ាលនី (Alexei Navalny) គឺជាការទទួលខុសត្រូវរបស់ទីក្រុងមូស្គូ ខណៈដែលលោកអាចត្រូវបានគេសម្លាប់នៅក្នុងពន្ធនាគារ ឬក៏ស្លាប់ដោយសារលក្ខខណ្ឌឃុំឃាំង ដែលស្មើនឹងការធ្វើទារុណកម្ម។អាជ្ញាធររុស្ស៊ីបាននិយាយថា លោក ណាវ៉ាលនី ដែលជាអ្នករិះគន់ដ៏លេចធ្លោបំផុតលើលោកប្រធានាធិបតី វ្ល៉ាឌីមៀ ពូទីន បានទទួលមរណភាពកាលពីថ្ងៃទី១៦ ខែកុម្ភៈ នៅក្នុងពន្ធនាគារនៅតំបន់អាក់ទិក ដោយសាររោគាពាធ ប៉ុន្តែភរិយារបស់លោក ណាវ៉ាលនី លោកស្រី យ៉ូលៀ ណាវ៉ាលណាយ៉ា (Yulia Navalnaya) បានចោទប្រកាន់លោក ពូទីន ថាបានសម្លាប់ស្វាមីរបស់ខ្លួន ខណៈវិមានក្រឹមឡាំងបានបដិសេធ។អ្នកជំនាញរបស់អង្គការសហប្រជាជាតិ លោកស្រី ម៉ារីយ៉ាណា ខាតហ្សារ៉ូវ៉ា (Mariana Katzarova) ដែលត្រូវបានតែងតាំងកាលពីឆ្នាំមុនហើយមិនទាន់ត្រូវបានអនុញ្ញាតឱ្យចូលប្រទេសរុស្ស៊ី បានប្រាប់សារព័ត៌មានរ៉យទ័រ នៅក្រៅព្រឹត្តិការណ៍ស្តីពីអ្នកទោសនយោបាយរុស្ស៊ី នៅអង្គការសហប្រជាជាតិក្នុងទីក្រុងហ្សឺណែវ ថាអ្នកជាប់ឃុំឃាំងផ្សេងទៀតនៅក្នុងប្រទេសរុស្ស៊ី អាចទទួលរងនូវជោគវាសនាដូចគ្នានឹងលោក ណាវ៉ាលនី។ក្រុមសង្គមស៊ីវិលនិយាយថា អ្នកទោសនយោបាយប្រហែលពី ៦០០ ទៅ ១.០០០ នាក់កំពុងត្រូវបានឃុំខ្លួនក្នុងប្រទេសរុស្ស៊ី ពីបទប្រឆាំងទៅនឹងការឈ្លានពានរបស់រុស្ស៊ីលើអ៊ុយក្រែន ឬបដិសេធមិនចូលរួមធ្វើសង្គ្រាម ប៉ុន្តែទីក្រុងមូស្គូ បដិសេធការរិះគន់នេះ៕

គ្រោះថ្នាក់អណ្តូងរ៉ែធ្យូងថ្មពីរដាច់ដោយឡែកពីគ្នាបានសម្លាប់មនុស្ស ១២ នាក់នៅប្រទេសចិន

ទូរទស្សន៍រដ្ឋ CCTV បានរាយការណ៍នៅថ្ងៃអង្គារ (១២ មីនា) នេះថា គ្រោះថ្នាក់អណ្តូងរ៉ែធ្យូងថ្មពីរករណីដាច់ដោយឡែកពីគ្នាបានសម្លាប់មនុស្ស ១២ នាក់នៅប្រទេសចិន ក្នុងរយៈពេល ២៤ ម៉ោងចុងក្រោយនេះ ដោយនោះជាឧបទ្ទវហេតុចុងក្រោយបំផុតដែលញាំញីដល់ឧស្សាហកម្មប្រភេទនេះ បន្ទាប់ពីរដ្ឋាភិបាលថ្មីៗនេះបានកែសម្រួលច្បាប់សុវត្ថិភាពការជីកយករ៉ែ។ទូរទស្សន៍ CCTV បាននិយាយថា លេណដ្ឋានធ្យូងថ្មក្រោមដីមួយ ដែលជាកម្មសិទ្ធិរបស់ក្រុមហ៊ុនមួយនៅក្នុងតំបន់ ចុងយ៉ាង (Zhongyang) ខេត្តសានស៊ី (Shanxi) បានដួលរលំនៅមុនពាក់កណ្តាលអធ្រាត្រថ្ងៃច័ន្ទ ដោយបានសម្លាប់មនុស្ស ៥ នាក់ និងបាត់ខ្លួនពីរនាក់។ គ្រោះថ្នាក់ដ៏ធ្ងន់ធ្ងរនៅក្នុងខេត្ត សានស៊ី នេះកើតឡើងបន្ទាប់ពីនិយតករសុវត្ថិភាពការជីកយករ៉ែរបស់ខ្លួនបានចេញសេចក្តីជូនដំណឹងមួយកាលពីខែមុន ដោយប្រាប់ក្រុមហ៊ុនអណ្តូងរ៉ែឱ្យទប់ស្កាត់ការផលិតលើសកំណត់ដើម្បីការពារគ្រោះថ្នាក់។ដោយឡែកមនុស្ស ៧ នាក់ក៏ត្រូវបានរកឃើញថាស្លាប់ និងពីរនាក់បាត់ខ្លួនបន្ទាប់ពីការផ្ទុះឧស្ម័ននៅឯអណ្តូងរ៉ែធ្យូងថ្ម ហួយហឺ អ៊ីននើជី (Huaihe Energy) ក្នុងខេត្ត អានហួយ (Anhui) ភាគខាងកើតរបស់ប្រទេសចិន នេះបើតាមទូរទស្សន៍ CCTV បានរាយការណ៍កាលពីល្ងាចថ្ងៃចន្ទ។គ្រោះថ្នាក់អណ្តូងរ៉ែធ្យូងថ្មដែលបណញដាលឱ្យមានមនុស្សស្លាប់មិនមែនជារឿងកម្រក្នុងប្រទេសចិនទេ។ នៅឆ្នាំ២០២៣ ប្រទេសចិនបានជួបឧបទ្ទវហេតុអណ្តូងរ៉ែធ្យូងថ្មយ៉ាងធ្ងន់ធ្ងរ ដែលបង្ខំឱ្យរដ្ឋបាលសុវត្ថិភាពអណ្តូងរ៉ែរបស់ប្រទេសនេះ កែប្រែច្បាប់ដែលមានស្រាប់របស់ខ្លួនដោយសារមាន «បញ្ហាលេចធ្លោ» ជាច្រើន៕

មេដឹកនាំក្រុមជនអន្ធពាលនៅហៃទី គំរាមថា សណ្ឋាគារជាច្រើនកំពុងលាក់អ្នកនយោបាយ

មេដឹកនាំក្រុមជនអន្ធពាលនៅប្រទេសហៃទី លោក Jimmy Cherizier បានរារាំងម្ចាស់សណ្ឋាគារ កាលពីថ្ងៃចន្ទ មិនឲ្យលួចលាក់អ្នកនយោបាយ ខណៈលោកនិយាយថា ក្រុមជនអន្ធពាលកំពុងធ្វើ បដិវត្តន៍បង្ហូរឈាម ដែលព្យាយាមផ្តួលរំលំនាយករដ្ឋមន្ត្រី លោក Ariel Henry និងជ្រើសរើសរដ្ឋាភិបាលថ្មី។ មេដឹកនាំនៃសម្ព័ន្ធភាពក្រុមប្រដាប់អាវុធ បាននិយាយ ខណៈមន្ត្រីសហរដ្ឋអាមេរិក រដ្ឋសហគមន៍តំបន់សមុទ្រការ៉ាអ៊ីប និងសមាជិកគណបក្សនយោបាយ វិស័យឯកជន សង្គមស៊ីវិល និងក្រុមសាសនា នៅប្រទេសហៃទី ចូលរួមនៅក្នុងកិច្ចពិភាក្សានៅក្នុងប្រទេសចាម៉ៃការ ក្នុងគោលបំណងបង្កើតក្រុមប្រឹក្សាអន្តរកាល ដែលនឹងត្រួសត្រាយផ្លូវទៅរកការបោះឆ្នោតលើកដំបូងចាប់តាំងពីឆ្នាំ ២០១៦មក។រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយថា សហរដ្ឋអាមេរិកនឹងផ្តល់ជំនួយចំនួន ១០០លានដុល្លារបន្ថែមទៀត ដល់កងកម្លាំងសន្តិសុខពហុសាសន៍ដែលគាំទ្រដោយអង្គការសហប្រជាជាតិ ក្នុងគោលបំណងជួយនគរបាលប្រទេសហៃទីប្រយុទ្ធប្រឆាំងក្រុមជនអន្ធពាល និងផ្តល់ជំនួយមនុស្សធម៌ចំនួន ៣៣ លានដុល្លារ។ប្រទេសហៃទី បានធ្លាក់ចូលទៅក្នុងរដ្ឋគ្រាអាសន្នកាលពីថ្ងៃទី ៣ ខែមីនា ខណៈការប៉ះទង្គិចគ្នាជាច្រើនលើក បានធ្វើឱ្យខូចទំនាក់ទំនង និងនាំឱ្យមានការហែកពន្ធនាគារចំនួនពីរកន្លែង បន្ទាប់ពីលោក Cherizier បាននិយាយថា ពួកគេនឹងរួបរួមគ្នា និងផ្ដួលរំលំនាយករដ្ឋមន្ត្រី លោក Ariel Henry ដែលមិនបានជាប់ឆ្នោត របស់ប្រទេសហៃទី។លោក Henry ជាអ្នកដែលបានឡើងកាន់តំណែង បន្ទាប់ពីការធ្វើឃាតប្រធានាធិបតី ចុងក្រោយរបស់ប្រទេសហៃទី ឆ្នាំ ២០២១ ប៉ុន្តែបច្ចុប្បន្នបានជាប់គាំងនៅក្រៅប្រទេស កំពុងពិភាក្សាតាមបណ្តាញអ៊ីនធឺណិត ជាមួយរដ្ឋសហគមន៍តំបន់សមុទ្រការ៉ាអ៊ីប(CARICOM)។

ឥណ្ឌូនេស៊ីមើលឃើញគ្រោះទឹកជំនន់និងបំណាក់ដីដ៏ធ្ងន់ធ្ងរ ក្រោយភ្លៀងធ្លាក់ឥតឈប់៦ម៉ោង ឆក់យកជីវិតមនុស្ស២៦នាក់

យោងតាមសារព័ត៌មាន BNPB និងទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូនេស៊ី ភ្លៀងធ្លាក់ខ្លាំងបណ្ដាលឲ្យមានទឹកជំនន់ និង បំណាក់ដី ក្នុងតំបន់មួយចំនួននៅខេត្តស៊ូម៉ាត្រាខាងលិច ចាប់តាំងពីថ្ងៃទី៧ខែមីនាឆ្នាំ២០២៤មក ។ រហូតមកដល់ពេលនេះ អ្នកស្លាប់បានកើនឡើងដល់២៦នាក់ និង១១នាក់កំពុងបាត់ខ្លួន លំនៅឋានជាច្រើនរងការបំផ្លិចបំផ្លាញ ដោយបង្ខំឲ្យប្រជាពលរដ្ឋជាង៨ម៉ឺននាក់ជម្លៀសចេញពីលំនៅឋាន។ ទឹកជំនន់បានជន់លិចផ្លូវនានានៅទីក្រុងផាដាង (Padang City)របស់ខេត្តស៊ូម៉ាត្រាខាងលិច ប៉ះពាល់ដល់ផ្ទះសម្បែងប្រមាណ១ម៉ឺនខ្នង និងពលរដ្ឋចំនួន៣.៧៣៤នាក់ ត្រូវបានជម្លៀសចេញពីលំនៅឋាន។ ក្រុមអាជ្ញាធរបានរាយការណ៍ពីទឹកជំនន់នៅក្នុងតំបន់ចំនួន៣១ទីតាំង ក្នុងស្រុកចំនួន៨ ក្នុងទីក្រុងនេះ ចន្លោះថ្ងៃទី៧និង៩មីនា។ មានសេចក្ដីរាយការណ៍ថាមានបំណាក់ដីចំនួន៦ទីតាំង ។ ទិន្នន័យបង្ហាញថា មានកម្រិតភ្លៀងធ្លាក់ជិត៣០០មីលីម៉ែត្រ ក្នុងពេល៦ម៉ោងកាលពីថ្ងៃទី៧មីនាឆ្នាំ២០២៤។ សហគមន៍នានានៅក្នុងតំបន់ ផេស៊ីស៊ សេឡាតាន រីជិនស៊ី (Pesisir Selatan Regency) ក៏ត្រូវបានរងការប៉ះពាល់ធ្ងន់ធ្ងរដែរ។ កាលពីថ្ងៃទី១០មីនា សារព័ត៌មាន BNPB បានរាយការណ៍ថា ទឹកជំនន់បានប៉ះពាល់ដល់ពលរដ្ឋចំនួន២៥.៧៩៤គ្រួសារ និងមនុស្ស៧៦.១៧៨នាក់ ត្រូវបានជម្លៀសចេញពីផ្ទះសម្បែង។មនុស្ស១៦នាក់ បានស្លាប់ក្នុងតំបន់នេះ។ ក្រុមអ្នកស្វែងរក និងជួយសង្រ្គោះតាមស្វែងរកអ្នកបាត់ខ្លួន ។ក្នុងការធ្វើបច្ចុប្បន្នភាពចុងក្រោយនៅថ្ងៃទី១១មីនា សារព័ត៌មាន BNPB បានបញ្ជាក់ថាមនុស្ស២៦នាក់បានស្លាប់ និង១១នាក់បាត់ខ្លួន ។ លំនៅឋានជាង៣ម៉ឺនខ្នង ស្ពាន២៦ខ្សែ អគារព្រះវិហារចំនួន៤៥កន្លែង សាលារៀន ២៥ខ្នង ផ្លូវ១៣ ខ្សែ និងអគាររដ្ឋចំនួន៥កន្លែង ត្រូវបានបំផ្លាញ៕

អ៊ុយក្រែន ត្រៀមដាក់ពង្រាយយន្តហោះចម្បាំង F-16 ឲ្យបានឆាប់ត្រឹមខែកក្កដា

សារព័ត៌មាន New York Times បានរាយការណ៍ថា អ្នកបើកយន្តហោះអ៊ុយក្រែនចំនួន ១២នាក់ត្រូវបានគេរំពឹងថា នឹងត្រៀមខ្លួនរួចរាល់ ដើម្បីបើកយន្តហោះ F-16 ក្នុងការប្រយុទ្ធ នៅរដូវក្តៅនេះ។ទោះយ៉ាងណាក៏ដោយ យន្តហោះចម្បាំងចំនួន ៦គ្រឿង ត្រូវបានគេរំពឹងថា នឹងត្រូវដឹកជញ្ជូនទាន់ពេល វេលា។សរុបមក សម្ព័ន្ធមិត្តអ៊ឺរ៉ុប បានសន្យាថា នឹងផ្គត់ផ្គង់យន្តហោះចំនួន ៤៥គ្រឿងដល់អ៊ុយក្រែន ដោយប្រទេសដាណឺម៉ាក បានកំណត់ថា នឹងផ្តល់យន្តហោះចំនួន៦គ្រឿងដំបូង នៅចុងនិទាឃរដូវ។ការបណ្តុះបណ្តាលសម្រាប់អ្នកបើកយន្តហោះអ៊ុយក្រែន បានចាប់ផ្តើមកាលពីខែសីហាឆ្នាំមុន នៅឯមូលដ្ឋានអាកាស Skrydstrup នៅប្រទេសដាណឺម៉ាកភាគខាងត្បូង ប៉ុន្តែកង្វះជំនាញភាសា និងចំណេះដឹងអំពីបច្ចេកទេសហោះហើរលោកខាងលិច ត្រូវបានគេរាយការណ៍ថា បានធ្វើឲ្យអ្វីៗគ្រប់យ៉ាង ធ្លាក់ចុះ។សារព័ត៌មាន NY Times បានឲ្យដឹងថា អ្នកបើកយន្តហោះអ៊ុយក្រែនបច្ចុប្បន្ន កំពុងរង់ចាំយន្តហោះចម្បាំង និងគ្រូបង្រៀនបើក នៅមជ្ឈមណ្ឌលហ្វឹកហ្វឺនថ្មីមួយ នៅឯមូលដ្ឋានអាកាស F&abreve;testi នៅ ប្រទេសរ៉ូម៉ានីភាគខាងត្បូង ប៉ុន្តែវាមិនច្បាស់ទេថា នៅពេលណាពួកគេ នឹងចាប់ផ្តើមមេរៀនរបស់ពួកគេទេ។កាលពីខែសីហា ទីក្រុងវ៉ាស៊ីនតោន បានធានាចំពោះសម្ព័ន្ធមិត្តអឺរ៉ុបថា សហរដ្ឋអាមេរិក នឹងពន្លឿនការបញ្ជូនយន្តហោះ F-16 ទៅកាន់អ៊ុយក្រែន នៅពេលដែលអាកាសយានិក ត្រូវបានបណ្តុះបណ្តាល។

គេហទំព័រដែលមានទំនាក់ទំនងជាមួយក្រុមហាម៉ាស ព្រមានប៉ាឡេស្ទីនកុំឲ្យធ្វើការជាមួយអ៊ីស្រាអែល

គេហទំព័រដែលមានទំនាក់ទំនងជាមួយក្រុមហាម៉ាសកាលពីថ្ងៃចន្ទ បានព្រមានបុគ្គល ឬក្រុមប៉ាឡេស្ទីនប្រឆាំងនឹងការសហការជាមួយអ៊ីស្រាអែល ក្នុងការផ្តល់សន្តិសុខសម្រាប់ក្បួនរថយន្តជំនួយ ចំពេលមានសង្រ្គាមរយៈពេល៥ខែ នៅក្នុងតំបន់ហ្កាហ្សាស្ទ្រីប។គេហទំព័រសន្តិសុខ Al-Majdរបស់ក្រុមហាម៉ាស បាននិយាយ ដោយដកស្រង់សម្តីមន្ត្រីសន្តិសុខម្នាក់នៅក្នុងកងកម្លាំងសកម្មប្រយុទ្ធប៉ាឡេស្ទីនថា អ្នកដែលបានធ្វើ នឹងត្រូវចាត់ទុកជាអ្នកសហការ និងត្រូវបានគ្រប់គ្រងដោយកណ្តាប់ដៃដែក។ការព្រមាននេះ បានធ្វើឡើងជាការឆ្លើយតបទៅនឹងរបាយការណ៍ប្រព័ន្ធផ្សព្វផ្សាយរបស់អ៊ីស្រាអែលដែលថា អ៊ីស្រាអែល កំពុងពិចារណាផ្តល់អាវុធដល់បុគ្គល ឬក្រុមកុលសម្ព័ន្ធប៉ាឡេស្ទីនមួយចំនួន នៅក្នុងតំបន់ហ្កាហ្សា ដើម្បីផ្តល់ការការពារសន្តិសុខសម្រាប់ក្បួនរថយន្តជំនួយចូលទៅក្នុងដែនដីដែលឡោមព័ទ្ធ ជាផ្នែកនៃផែនការដ៏ទូលំទូលាយសម្រាប់ការផ្គត់ផ្គង់ជំនួយមនុស្សធម៌ បន្ទាប់ពីការប្រយុទ្ធគ្នា បានបញ្ចប់។ការិយាល័យនាយករដ្ឋមន្ត្រីអ៊ីស្រាអែល បានបដិសេធមិនធ្វើអត្ថាធិប្បាយលើរបាយការណ៍នេះ ដែលបានកើតឡើងមួយសប្តាហ៍ បន្ទាប់ពីជនជាតិប៉ាឡេស្ទីនរាប់សិបនាក់ ត្រូវបានសម្លាប់នៅក្នុងឧប្បត្តិហេតុមួយដោយហ្វូងមនុស្ស បានឡោមព័ទ្ធក្បួនរថយន្តជំនួយដែលចូលទៅតំបន់ហ្កាហ្សាភាគខាងជើង ហើយកងទ័ព បានបើកការបាញ់ប្រហារ។គេហទំព័រនេះ បាននិយាយថា៖«ការប៉ុនប៉ងរបស់អ៊ីស្រាអែលក្នុងការទំនាក់ទំនងជាមួយមេដឹកនាំ និង គ្រួសារមួយចំនួន ដើម្បីធ្វើប្រតិបត្តិការនៅក្នុងតំបន់ហ្កាហ្សាស្ទ្រីប ត្រូវបានចាត់ទុកថា ជាកិច្ចសហការដោយផ្ទាល់ជាមួយការកាន់កាប់នេះ និងជាអំពើក្បត់ជាតិ ដែលយើងនឹងមិនអត់ឱនឲ្យបាន»។

មនុស្សយ៉ាងហោចណាស់៥០នាក់ បានរងរបួស ខណៈយន្តហោះក្រុមហ៊ុនអាកាសចរណ៍ LATAM ជួបឧបទ្ទវហេតុ

យោងតាមក្រុមហ៊ុនអាកាសចរណ៍ និងអង្គភាពសេវាសុខភាពប្រទេសនូវែលហ្សេឡង់ដែលបានព្យាបាលអ្នករងរបួស បាននិយាយថា មនុស្សយ៉ាងហោចណាស់ ៥០ នាក់ បានរងរបួសនៅពេលដែលយន្តហោះ Boeing ៧៨៧ ធ្វើប្រតិបត្តិការដោយក្រុមហ៊ុនអាកាសចរណ៍ LATAM Airlines LTM.SN បានជួបឧបទ្ទវហេតុភ្លាមៗនៅពាក់កណ្តាលជើងហោះហើរពីទីក្រុងស៊ីដនី(Sydney) ទៅកាន់ទីក្រុងអក់លែន(Auckland) កាលពីថ្ងៃចន្ទ។ ក្រុមហ៊ុនអាកាសចរណ៍អាមេរិកខាងត្បូងមួយនេះ បាននិយាយថា យន្តហោះបានជួបប្រទះដំណើរញ័រខ្លាំង។ជើងហោះហើរមានអ្នកដំណើរ ២៦៣នាក់ និងសមាជិកយានិក ៩នាក់ បានចុះចតនៅអាកាសយានដ្ឋាន ទីក្រុង Auckland តាមការគ្រោងទុកកាលពីរសៀលថ្ងៃច័ន្ទ។ មនុស្សម្នាក់ស្ថិតក្នុងស្ថានភាពធ្ងន់ធ្ងរ ខណៈអ្នកផ្សេងទៀតបានរងរបួសស្រាល ទៅមធ្យម។អ្នកជំនាញផ្នែកសុវត្ថិភាពនិយាយថា ឧបទ្ទវហេតុយន្តហោះភាគច្រើន គឺបណ្តាលមកពីកត្តារួមផ្សំដែលចាំបាច់ត្រូវស៊ើបអង្កេតឱ្យបានហ្មត់ចត់។ក្រុមហ៊ុន Boeing បាននិយាយថា ក្រុមហ៊ុនកំពុងធ្វើការដើម្បីប្រមូលព័ត៌មានបន្ថែម ហើយនឹងផ្តល់ការគាំទ្រណាមួយដល់ក្រុមហ៊ុនអាកាសចរណ៍។ ភាគហ៊ុនរបស់ក្រុមហ៊ុន Boeing បានធ្លាក់ចុះជិតប្រហែល ៣ភាគរយ បន្ទាប់ពីឧបទ្ទវហេតុចុងក្រោយដែលពាក់ព័ន្ធនឹងយន្តហោះមួយគ្រឿងរបស់ខ្លួន។ រដ្ឋបាលអាកាសចរណ៍សហព័ន្ធអាមេរិក កាលពីខែមករា បានរារាំងក្រុមហ៊ុនផលិតយន្តហោះដែលមានបញ្ហាពីការពង្រីកការផលិតយន្តហោះខ្នាតតូច 737 MAX ដែលលក់ដាច់បំផុតរបស់ខ្លួន បន្ទាប់ពីបញ្ហាគុណភាព ដែលពុំអាចទទួលយកបាន។

បណ្ដាញសង្គម

ព័ត៌មានថ្មីៗ

ក្រុមអ្នកសង្កេតការណ៍អាស៊ាន បន្តចុះសង្កេតការណ៍ស្ថានភាពព្រំដែននៅតំបន់អូរភ្លុកដំរី ស្ថិតក្នុងឃុំថ្មដា ស្រុកវាលវែង ខេត្តពោធិ៍សាត់ ទីតាំងរងការវាយប្រហារ និងកំពុងកាន់កាប់ដោយខុសច្បាប់ដោយយោធាថៃ

ឯកអគ្គរដ្ឋទូត៖ ប៉ាគីស្ថាននៅតែរក្សាទំនាក់ទំនងជាមួយរុស្ស៊ីជុំវិញបញ្ហាអ៊ីរ៉ង់

CENTCOM៖ សហរដ្ឋអាមេរិកបានបាញ់ទម្លាក់មីស៊ីលអ៊ីរ៉ង់ដែលបាញ់ឆ្ពោះទៅប្រទេសកូវ៉ែត និងបារ៉ែន

ឱកាសការងារជាង ៩ពាន់កន្លែង អត្ថប្រយោជន៍ ប.ស.ស. និងកម្មវិធី TVET ត្រូវបានផ្សព្វផ្សាយដល់មូលដ្ឋានក្នុងខេត្តបាត់ដំបង ក្នុងស្មារតី «ខ្មែរជួយរកការងារ និងផ្ដល់ការងារឱ្យខ្មែរ»

លោក PUTIN៖ រុស្ស៊ីនឹងបន្តសាងសង់រោងចក្រនុយក្លេអ៊ែរនៅក្នុងប្រទេសអ៊ីរ៉ង់ នៅពេលស្ថានការណ៍ស្ងប់ស្ងាត់

សារព័ត៌មាន Politico ៖ ប្រទេសណាតូកំពុងពិភាក្សាអំពីកញ្ចប់ជំនួយហិរញ្ញវត្ថុចំនួន ៧០ ពាន់លានអឺរ៉ូសម្រាប់អ៊ុយក្រែន

អៀរឡង់ដាក់បម្រាមធ្វើដំណើរលើរដ្ឋមន្ត្រីអ៊ីស្រាអែលពីររូបមិនឲ្យចូលប្រទេសនេះ

ទីប្រឹក្សាមេដឹកនាំកំពូលអ៊ីរ៉ង់អំពាវនាវឲ្យលោក TRUMP បញ្ឈប់ការបិទច្រកសមុទ្រហ័រមូស និងដោះលែងទ្រព្យសកម្មរបស់ក្រុងតអេរ៉ង់

ប្រព័ន្ធផ្សព្វផ្សាយ៖ អ៊ីរ៉ង់ច្រានចោលការអះអាងដែលថា ខ្លួនយល់ព្រមប្រគល់សារធាតុអ៊ុយរ៉ានីញ៉ូមឲ្យទៅប្រទេសទី៣

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877