BTV NEWS

ស្លាប់១៨នាក់ ក្នុងករណីគ្រោះថ្នាក់ចរាចរណ៍៦ថ្ងៃ,ពីថ្ងៃទី២០ដល់២៥សីហានេះ

ឃាត់ខ្លួនជនបរទេសចំនួន៥នាក់ក្នុងប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យានៅឃុំសំរោង ស្រុកចន្ទ្រា ខេត្តស្វាយរៀង

បង្ក្រាបក្រុមចោរកាច់កម៉ូតូទាំងសំបុក ៦នាក់ដែលតែងធ្វើសកម្មភាពយ៉ាងសកម្មក្នុងភូមិសាស្ដ្ររាជធានីភ្នំពេញ

ស្នងការរាជធានី បញ្ជារឲ្យរឹតបន្តឹងកាន់តែខ្លាំង លើម៉ូតូកៃច្នៃបំពង់ស៊ីម៉ាំងបង្កសម្លេងរំខានដល់ពលរដ្ឋ តាមទីសាធារណៈ

សន្តិសុខ និង សង្គម

តំណាងអយ្យការចោទប្រកាន់ជនជាតិចិនម្នាក់ ចំនួន ២បទល្មើស ក្រោយបង្កគ្រោះថ្នាក់ចរាចរណ៍បណ្ដាលឱ្យមានមនុស្សស្លាប់

តំណាងអយ្យការអមសាលាដំបូងរាជធានី សម្រេចចោទប្រកាន់ជនជាតិចិនម្នាក់ ចំនួន២បទល្មើស ក្រោយបង្កគ្រោះថ្នាក់ចរាចរណ៍បណ្ដាលឱ្យមានមនុស្សស្លាប់នៅលើមហាវិថីសហព័ន្ធរុស្ស៉ី។អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានឱ្យដឹងនៅព្រឹកថ្ងៃទី២៦ ខែកុម្ភៈ ឆ្នាំ២០២៤នេះថា តំណាងអយ្យការអមសាលាដំបូងរាជធានីភ្នំពេញបានសម្រេចចោទប្រកាន់លើជនសង្ស័យជាជនជាតិចិនឈ្មោះ FU ZHONG HUA ភេទ ប្រុស កើតថ្ងៃទី១៨ ខែមីនា ឆ្នាំ១៩៨៦ ចំនួន២បទល្មើស បន្ទាប់ពីបង្កគ្រោះថ្នាក់ចរាចរណ៍បណ្តាលឱ្យស្លាប់អ្នកដទៃ។បទល្មើសទាំង២នោះ តំណាងអយ្យការបានចោទ ទី១ ពីបទ បើកបរក្នុងល្បឿនលឿន និងស្ថិតក្នុងស្ថានភាពស្រវឹងដោយមានអត្រាជាតិអាល់កុល ០.៨៦មីលីក្រាមក្នុងមួយលីត្រខ្យល់ ដែលមានបញ្ញត្តិឱ្យផ្តន្ទាទោសតាមមាត្រា៨៥ កថាខណ្ឌទី ២ ចំណុច ខ នៃច្បាប់ស្តីពីចរាចរណ៍ផ្លូវគោក និងទី២ ពីបទ រត់គេចខ្លួន ដែលមានបញ្ញត្តិឱ្យផ្តន្ទាទោសតាមមាត្រា ៥៤៣ នៃក្រមព្រហ្មទណ្ឌ។សូមបញ្ជាក់ជូនថា កាលពីវេលាម៉ោង១២ និង៤៤នាទីរំលងអធ្រាត្រ ឈានចូលថ្ងៃទី២៣ ខែកុម្ភៈ ឆ្នាំ២០២៤ ជនសង្ស័យឈ្មោះ FU ZHONG HUA ភេទប្រុស ជនជាតិចិន បានបើករថយន្តមួយគ្រឿងម៉ាក LAM BORGHINI HURACAN STO ពណ៌ទឹកក្រូច ពាក់ផ្លាកលេខ កម្ពុជា F.R.999 ផលិតឆ្នាំ២០២២ តាមបណ្តោយមហាវិថីសហព័ន្ធរុស្សី ទិសដៅពីកើតទៅលិច ក្នុងល្បឿនលឿនខ្វះការប្រុងប្រយ័ត្ន និងស្ថិតក្នុងស្ថានភាពស្រវឹងដោយមានអត្រាជាតិអាល់កុល ០.៨៦មីលីក្រាមក្នុងមួយលីត្រខ្យល់ លុះមកដល់ចំណុចមុខក្រុមហ៊ុន SDB លើមហាវិថីសហព័ន្ធរុស្សី សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ បានបុកពីក្រោយអ្នកបើកម៉ូតូម្នាក់ ភេទប្រុស ដែលធ្វើដំណើរស្របទិសគ្នា បណ្តាលឱ្យអ្នកបើកម៉ូតូស្លាប់នៅនឹងកន្លែង ហើយអ្នកបើកបររថយន្តបានបើករត់គេចខ្លួនចេញពីកន្លែងកើតហេតុ ជាមួយអ្នករួមដំណើរចំនួន០២នាក់ទៀត ជាជនជាតិចិនដូចគ្នា៕ អត្ថបទ ៖ ប្រាក់ វ៉ាន់ដា

កងជីវពលស៊ីអ៊ីតអ៊ីរ៉ាក់៖ ភាពស្ងប់ស្ងាត់បច្ចុប្បន្នជាមួយកងកម្លាំងអាមេរិក គឺជា«យុទ្ធសាស្ត្របណ្តោះអាសន្ន»

មេដឹកនាំនៃកងជីវពលនិកាយស៊ីអ៊ីតប្រដាប់អាវុធអ៊ីរ៉ាក់ បាននិយាយកាលពីថ្ងៃអាទិត្យថា រយៈពេលនៃការស្ងប់ស្ងាត់នាពេលបច្ចុប្បន្នក្នុងចំណោមក្រុមប្រដាប់អាវុធអ៊ីរ៉ាក់ក្នុងជម្លោះរបស់ពួកគេជាមួយកងកម្លាំងអាមេរិក គឺជា «យុទ្ធសាស្ត្របណ្តោះអាសន្ន» ដោយសង្កត់ធ្ងន់ថា ក្រុមតស៊ូអ៊ីស្លាមនៅអ៊ីរ៉ាក់ មិនបានបោះបង់ចោលការគាំទ្ររបស់ខ្លួនសម្រាប់ប៉ាឡេស្ទីននោះទេ។លោកអាក្រាម អាល់កាអាប៊ី ( Akram al-Kaabi) ជាអគ្គលេខាធិការនៃចលនា al-Nujaba ដែលគាំទ្រដោយអ៊ីរ៉ង់ បាននិយាយនៅក្នុងសេចក្តីថ្លែងការណ៍មួយថា ភាពស្ងប់ស្ងាត់នាពេលបច្ចុប្បន្ននេះ គ្រាន់តែជាយុទ្ធសាស្ត្រមួយសម្រាប់ការរៀបចំទីតាំងឡើងវិញ និងការដាក់ពង្រាយ ដោយបញ្ជាក់ថា៖«វាគ្រាន់តែជាភាពស្ងប់ស្ងាត់ មុនពេលព្យុះតែប៉ុណ្ណោះ»។លោកបាននិយាយថា ការតស៊ូអ៊ីស្លាមនៅអ៊ីរ៉ាក់ «គឺជាផ្នែកដ៏សំខាន់មួយ ក្នុងការប្រយុទ្ធ ដើម្បីប្រឈមមុខនឹងការឈ្លានពានរបស់ក្រុមជ្វីហ្វនិយម (យុទ្ធនាការយោធាអ៊ីស្រាអែល) និងអ្នកគាំទ្រអាមេរិកប្រឆាំងនឹងតំបន់ហ្កាហ្សាស្ទ្រីប»។លោក អាល់កាអាប៊ី ក៏បាននិយាយដែរថា មានការសម្របសម្រួលកម្រិតខ្ពស់រវាង «ក្រុមរណសិរ្សបើកចំហ» ផ្សេងៗគ្នាប្រឆាំងនឹងជនជាតិអាមេរិក និងអ៊ីស្រាអែល នៅក្នុងតំបន់ ដោយសង្កត់ធ្ងន់ថា «ភាពស្ងប់ស្ងាត់ណាមួយ នៅផ្នែកខាងមុខ និងការបង្កបញ្ហាលើផ្នែកមួយទៀត គឺជាយុទ្ធសាស្ត្រប្រកបដោយចេតនា មានគោលបំណង និងសម្របសម្រួល»។សេចក្តីថ្លែងការណ៍នោះ បានឲ្យដឹងថា៖«ទោះបីជាក្រុមអ្នកតស៊ូអ៊ីស្លាម មិនបានច្រានចោលការចរចា របស់រដ្ឋាភិបាល ដើម្បីកំណត់ការដកទ័ពអាមេរិកចេញពីអ៊ីរ៉ាក់ក៏ដោយ ក៏យើងបញ្ជាក់ថា អ្នកកាន់កាប់សហរដ្ឋអាមេរិកនេះ គឺជាអ្នកភូតកុហក អ្នកបោកប្រាស់ និងជាអ្នកដែលក្រអឺតក្រទម»។រយៈពេលប៉ុន្មានថ្ងៃបន្ទាប់ពីការប្រយុទ្ធគ្នា បានផ្ទុះឡើងរវាងចលនាតស៊ូអ៊ីស្លាមដែលគ្រប់គ្រងតំបន់ហ្កា ហ្សា (Hamas) និងអ៊ីស្រាអែល នៅក្នុងតំបន់ហ្កាហ្សាស្ទ្រីប កាលពីថ្ងៃទី៧ ខែតុលា ក្រុមតស៊ូអ៊ីស្លាម នៅក្នុងប្រទេសអ៊ីរ៉ាក់ បានបើកការវាយប្រហារដោយគ្រាប់រ៉ុក្កែត យានដ្រូន និងកាំភ្លើងត្បាល់ទៅលើមូលដ្ឋានយោធារបស់កងកម្លាំងអាមេរិក នៅក្នុងប្រទេសអ៊ីរ៉ាក់ និងស៊ីរី។

លោកហ្សេឡិស្គី៖ អ៊ុយក្រែន មិនស្នើសុំឲ្យក្រុមដៃគូ ដាក់ពង្រាយទ័ពរបស់ពួកគេលើទឹកដីរបស់ខ្លួនឡើយ

ប្រទេសអ៊ុយក្រែន មិននិយាយជាមួយក្រុមដៃគូអំពីលទ្ធភាពដាក់ពង្រាយទ័ពរបស់ពួកគេលើទឹកដីខ្លួន ឡើយ។យើងមិននិយាយជាមួយដៃគូរបស់យើងអំពីកងទ័ពរបស់ពួកគេដែលត្រូវដាក់ពង្រាយ នៅប្រទេសអ៊ុយ ក្រែនទេ។ប្រសិនបើអ៊ុយក្រែន ចូលរួមជាមួយអង្គការណាតូ ដែលនឹងក្លាយជាការធានាសន្តិសុខដ៏រឹងមាំបំផុតសម្រាប់ពួកយើង នោះខ្ញុំគិតថា យើងនឹងបង្កើតមាត្រា៥[នៃសន្ធិសញ្ញាអាត្លង់ទិកខាងជើង] ប្រសិនបើ រឿងនោះកើតឡើងពិតប្រាកដ។ ទោះបីជាអ្វីដែលយើងឃើញ [...] គឺថា រុស្ស៊ី មិនបានវាយប្រហារប្រទេសណាមួយនោះទេក្នុងចំណោមប្រទេសទាំងអស់នោះ។ លោកហ្សេឡិនស្គី ក៏បាននិយាយដែរថា ការសម្រេចចិត្តអញ្ជើញអ៊ុយក្រែនឲ្យចូលជាសមាជិកណាតូ គឺស្ថិតក្នុងដៃប្រទេសពីរ គឺសហរដ្ឋអាមេរិក និងអាល្លឺម៉ង់។លោកប្រធានាធិបតីហ្សេឡិនស្គី ក៏បានរំលឹកឡើងវិញថា អ៊ុយក្រែន បានប្រាប់សហអាមេរិកថា ទីក្រុងវ៉ាស៊ីនតោន ចាំបាច់ត្រូវអនុម័តកញ្ចប់ជំនួយរបស់ខ្លួនសម្រាប់អ៊ុយក្រែន នៅខែក្រោយ ហើយសភាអាមេរិក ក៏ដឹងច្បាស់អំពីរឿងនេះដែរ។

វេជ្ជបណ្ឌិតកូរ៉េខាងត្បូង ប្រឈមការផ្អាកការងារប្រសិនបើពួកគេ មិនត្រឡប់មកធ្វើការវិញ

រដ្ឋាភិបាលប្រទេសកូរ៉េខាងត្បូង បានទុកពេលឱ្យក្រុមវេជ្ជបណ្ឌិតវ័យក្មេងដែលកំពុងធ្វើកូដកម្ម រយៈពេល ៤ ថ្ងៃដើម្បីរាយការណ៍ពីការត្រឡប់មកធ្វើការវិញ ដោយបាននិយាយនៅថ្ងៃចន្ទនេះថា ពួកគេនឹងមិនទទួលទណ្ឌកម្មនោះទេ ប្រសិនបើពួកគេត្រឡប់មកធ្វើការវិញតាមកាលបរិច្ឆេទ ប៉ុន្តែនឹងត្រូវប្រឈមមុខនឹងការចោទប្រកាន់ និងការព្យួរអាជ្ញាប័ណ្ណពេទ្យ ប្រសិនបើពួកគេមិនអនុវត្តតាម។គ្រូពេទ្យហាត់ការផ្នែកវេជ្ជសាស្រ្ត និងគ្រូពេទ្យប្រហែល ៩.០០០នាក់ បានឈប់ពីការងារចាប់តាំងពីដើមសប្តាហ៍កន្លងទៅនេះ ដើម្បីតវ៉ាចំពោះផែនការរបស់រដ្ឋាភិបាលក្នុងការបង្កើនការចូលរៀននៅសាលាពេទ្យប្រហែល ៦៥ភាគរយ។ ការធ្វើកូដកម្ម បានធ្វើឱ្យប៉ះពាល់ធ្ងន់ធ្ងរដល់ប្រតិបត្តិការរបស់មន្ទីរពេទ្យដោយមានការលុបចោលផ្នែកវះកាត់ និងការព្យាបាលជំងឺផ្សេងៗទៀត។មន្ត្រីរដ្ឋាភិបាលនិយាយថា ការបន្ថែមវេជ្ជបណ្ឌិត គឺចាំបាច់ដើម្បីដោះស្រាយជាមួយនឹងចំនួនប្រជាជនដែលមានវ័យចំណាស់យ៉ាងឆាប់រហ័សរបស់ប្រទេសកូរ៉េខាងត្បូង។ សមាមាត្ររវាងវេជ្ជបណ្ឌិត និងអ្នកជំងឺ នាពេលបច្ចុប្បន្នរបស់ប្រទេស គឺស្ថិតក្នុងចំណោមកម្រិតទាបបំផុតក្នុងប្រទេសអភិវឌ្ឍន៍។អនុរដ្ឋមន្ត្រីក្រសួងសុខាភិបាល លោក Park Min-soo បាននិយាយនៅក្នុងសន្និសីទសារព័ត៌មានតាមទូរទស្សន៍នៅថ្ងៃចន្ទនេះថា រដ្ឋាភិបាលនឹងមិនស្វែងរកវិធានការវិន័យណាមួយប្រឆាំងនឹងវេជ្ជបណ្ឌិតដែលកំពុងធ្វើកូដកម្មនោះទេ ប្រសិនបើពួកគេត្រឡប់ចូលមកធ្វើការវិញ នៅថ្ងៃព្រហស្បតិ៍។លោក Park និយាយថា យើងចង់ឱ្យពួកគេត្រឡប់ទៅធ្វើការវិញនៅចុងខែនេះ ថ្ងៃទី ២៩ ខែកុម្ភៈ។ ប្រសិនបើពួកគេត្រឡប់ទៅមន្ទីរពេទ្យដែលពួកគេបានចាកចេញ នោះយើងនឹងមិនឲ្យពួកគេទទួលខុសត្រូវចំពោះការខូចខាតណាមួយ ដែលបណ្តាលមកពីការធ្វើកូដកម្មរបស់ពួកគេឡើយ។

អ្នកជំនាញអាមេរិកផ្នែកនយោបាយរុស្ស៊ី បញ្ជាក់លើតម្រូវការបន្ទាន់ ក្នុងការផ្តល់ជំនួយថ្មីដល់អ៊ុយក្រែន

អ្នកជំនាញសហរដ្ឋអាមេរិក ផ្នែកនយោបាយប្រទេសរុស្ស៊ី បានបញ្ជាក់លើតម្រូវការបន្ទាន់សម្រាប់ប្រទេសលោកខាងលិច ក្នុងការផ្តល់ជំនួយយោធាដល់ប្រទេសអ៊ុយក្រែន ដោយបានប្រៀបធៀបស្ថានភាពបច្ចុប្បន្ន ទៅនឹងអំឡុងសង្គ្រាមលោកលើកទីពីរ។ អតីតសមាជិកជាន់ខ្ពស់នៃក្រុមប្រឹក្សាសន្តិសុខជាតិសេតវិមាន លោកស្រី ហ្វៃអូណា ហ៊ីល(Fiona Hill) បាននិយាយដូច្នេះ ទៅកាន់ប្រព័ន្ធផ្សព្វផ្សាយ CNN នៅមុនថ្ងៃខួប២ឆ្នាំ នៃការចាប់ផ្តើមការឈ្លានពានរបស់រុស្ស៊ីលើអ៊ុយក្រែន នៅថ្ងៃទី ២៤ ខែកុម្ភៈ។លោកស្រី Hill បានបញ្ជាក់លើការប្តេជ្ញាចិត្តរបស់កងកម្លាំងរុស្ស៊ី ក្រោមការដឹកនាំរបស់ប្រធានាធិបតី លោក Vladimir Putin ដោយនិយាយថា «លោក ពូទីន មានឆន្ទៈមុះមុត ក្នុងការប្រយុទ្ធជាមួយអ៊ុយក្រែនរហូតដល់ចុងក្រោយ»។ លោកស្រី បានបញ្ជាក់ថា ការផ្តោតសំខាន់នាពេលបច្ចុប្បន្ន សម្រាប់អ៊ុយក្រែនមិនគួរផ្តោតលើការបើកការវាយលុកនោះទេ ប៉ុន្តែត្រូវរក្សាទីតាំងការពាររបស់ពួកគេ។លោកស្រី Hill បាននិយាយថា នេះគឺស្រដៀងទៅនឹងស្ថានភាព នៅពេលដែលសហរដ្ឋអាមេរិកស្វែងរកការគាំទ្រចក្រភពអង់គ្លេស ក្នុងអំឡុងសង្គ្រាមលោកលើកទីពីរ។ លោកស្រី និយាយថា «យើងកំពុងស្ថិតក្នុងគ្រាប្រវត្តិសាស្ត្របែបនោះ»។ដោយធ្វើអត្ថាធិប្បាយលើជំនួយយោធារបស់សហរដ្ឋអាមេរិកដែលជាប់គាំង ដល់ប្រទេសអ៊ុយក្រែន លោកស្រី Hill បាននិយាយថា លោកស្រី គិតថា «វាជារឿងគួរឲ្យខ្មាស់គេដែរសម្រាប់ភាគីយើង» ដែល យើងមានការបែកបាក់គ្នាផ្ទៃក្នុង យើងមិនអាចមើលឃើញថាតើយើងស្ថិតនៅកន្លែងណា។ លោកស្រីនិយាយថា «ចំណុចសំខាន់គឺថា យើងមិនត្រូវបិទភ្នែក ហើយយើងមិនគួរដើរថយក្រោយទេ»។

ប្រមុខចារកម្មអ៊ុយក្រែន និយាយថា លោក Navalny បានស្លាប់ដោយសារឈាមកក

ប្រមុខចារកម្មរបស់ក្រសួងការពារជាតិអ៊ុយក្រែននិយាយថា មេដឹកនាំប្រឆាំងរុស្ស៊ី លោក Alexei Navalny បានស្លាប់ដោយសារឈាមកក ដោយច្រានចោលការសន្និដ្ឋានថា លោកត្រូវបានសម្លាប់ខណៈនៅក្នុងពន្ធនាគារ។លោក គីរីឡូ ប៊ូដាណូវ(Kyrylo Budanov) ត្រូវបានគេដកស្រង់សម្តី ខណៈកំពុងនិយាយទៅកាន់អ្នកសារព័ត៌មាន កាលពីថ្ងៃអាទិត្យថា «លោកប្រហែលជាធ្វើឲ្យអ្នកទាំងអស់គ្នាខកចិត្ត ប៉ុន្តែយើងដឹងថា លោក Alexei Navalny បានស្លាប់ ដោយសារឈាមកក» ។លោក Navalny គឺជាអ្នករិះគន់ឥតសំចៃ លើប្រធានាធិបតីរុស្ស៊ី លោក Vladimir Putin ដែលតាមគេរាយការណ៍ថា បានស្លាប់នៅពន្ធនាគារតំបន់អាកទិក(Arctic) កាលពីថ្ងៃទី ១៦ ខែកុម្ភៈ។ ក្រុមមន្ត្រីប្រទេសរុស្ស៊ី បាននិយាយថា លោកបានស្លាប់ដោយសារមូលហេតុធម្មជាតិ ប៉ុន្តែមានការសន្និដ្ឋាននៅប្រទេសលោកខាងលិចថា រដ្ឋបាលរបស់លោកPutin ទទួលខុសត្រូវចំពោះការស្លាប់របស់លោក។នៅក្នុងសេចក្តីថ្លែងការណ៍មួយកាលពីថ្ងៃសៅរ៍ មេដឹកនាំនៃក្រុមប្រទេសទាំងប្រាំពីរ ឬ G7 បានអំពាវនាវឱ្យរដ្ឋាភិបាលរុស្ស៊ី បញ្ជាក់ច្បាស់ពីស្ថានភាព ជុំវិញការស្លាប់របស់លោក Navalny ។

ក្រុមវេជ្ជបណ្ឌិតកូរ៉េខាងត្បូងកំពុងធ្វើកូដកម្មនិយាយថា ពួកគេធ្វើការលើសកម្លាំងនិង ពុំមានការដឹងឮ

លោក Park Dan ដែលថ្មីៗនេះបានយល់ដឹងពីក្តីស្រមៃកាលពីកុមារភាពរបស់លោក ក្នុងការធ្វើជាគ្រូពេទ្យសង្គ្រោះបន្ទាន់ គឺជាគ្រូពេទ្យហាត់ការម្នាក់ក្នុងចំណោមគ្រូពេទ្យហាត់ការ និងវេជ្ជបណ្ឌិត ដែលសុំលាលែងពីការងារ នៅក្នុងការប្រឈមមុខដាក់គ្នាជាមួយរដ្ឋាភិបាលប្រទេសកូរ៉េខាងត្បូង ដែលគំរាមកំហែងចាប់ខ្លួនពួកគេ។ លោកនិយាយថា វេជ្ជបណ្ឌិតចុះកម្មសិក្សា ជាសមាជិកសំខាន់នៅក្នុងប្រព័ន្ធវេជ្ជសាស្ត្រដែលទទួលបានការយកចិត្តទុកដាក់ខ្ពស់របស់ប្រទេសកូរ៉េខាងត្បូង បានធ្វើការលើសកម្រិតការងារ ទទួលបានប្រាក់ខែតិច និងពុំមានការដឹងឮ។ វេជ្ជបណ្ឌិតវ័យក្មេងដូចជា លោក Park ចង់បានប្រាក់ខែ និងលក្ខខណ្ឌការងាររបស់ពួកគេជាអាទិភាព ជាជាងផែនការរបស់រដ្ឋាភិបាលក្នុងការបង្កើនចំនួនគ្រូពេទ្យ។ អាជ្ញាធរ បាននិយាយថា ត្រូវការបុគ្គលិកបន្ថែមទៀតដើម្បីបង្កើនសេវាថែទាំសុខភាពនៅតំបន់ដាច់ស្រយាល និងបំពេញតាមតម្រូវការដែលកំពុងកើនឡើងរបស់សង្គមដែលមានមនុស្សវ័យចំណាស់ឆាប់រហ័ស របស់ពិភពលោក។ បន្ទប់សង្គ្រោះបន្ទាន់នៅមន្ទីរពេទ្យធំបំផុតចំនួន៥ របស់ប្រទេសកូរ៉េខាងត្បូង បានស្ថិតក្នុង «ការព្រមានពណ៌ក្រហម» កាលពីថ្ងៃអាទិត្យ ដែលមន្ទីរពេទ្យទាំងនេះកំពុងអស់គ្រែសម្រាក។ នាយករដ្ឋមន្ត្រី លោក Han Duck-soo បាននិយាយថា មន្ទីរពេទ្យរដ្ឋ នឹងនៅតែបើក នៅថ្ងៃចុងសប្តាហ៍ និងថ្ងៃឈប់សម្រាក ដើម្បីបំពេញតម្រូវការ។ មន្ទីរពេទ្យ បានបង្វែរអ្នកជំងឺចេញ និងលុបចោលការវះកាត់ បន្ទាប់ពីក្រុមវេជ្ជបណ្ឌិតវ័យក្មេងប្រហែល ២ ភាគ ៣ របស់ប្រទេសនេះ បានដើរចេញពីការងារ ដើម្បីតវ៉ា។ យោងតាមសមាគមគ្រូពេទ្យហាត់ការប្រទេសកូរ៉េ បានឱ្យដឹងថា គ្រូពេទ្យហាត់ការ និងវេជ្ជបណ្ឌិតនៅក្នុងប្រទេសកូរ៉េខាងត្បូង ធ្វើការប្តូរវេន ៣៦ម៉ោង បើប្រៀបធៀបទៅនឹងការប្តូរវេនតិចជាង២៤ម៉ោង នៅសហរដ្ឋអាមេរិក។ សមាគម និយាយថា គ្រូពេទ្យវ័យក្មេងពាក់កណ្តាលនៅសហរដ្ឋអាមេរិក ធ្វើការ ៦០ ម៉ោងក្នុងមួយសប្តាហ៍ឬតិចជាងនេះ ខណៈក្រុមវេជ្ជបណ្ឌិតប្រទេសកូរ៉េ ធ្វើការលើសពី ១០០ម៉ោង។ ទីភ្នាក់ងារសារព័ត៌មាន Yonhap បានរាយការណ៍នៅថ្ងៃចន្ទនេះថា គ្រូពេទ្យ និងវេជ្ជបណ្ឌិត កូរ៉េខាងត្បូងចំនួនជាង១ម៉ឺននាក់ បានបញ្ជូនលិខិតលាលែងពីការងាររបស់ពួកគេ ក្នុងការតវ៉ាចំពោះផែនការរបស់រដ្ឋាភិបាល ដើម្បីបង្កើនចំនួននិស្សិតពេទ្យ។

ជនអន្តោប្រវេសន៍ប្រឈមការលង់ទឹកស្លាប់ និងបាត់ខ្លួន ក្នុងពេលព្យាយាមឆ្លងទឹកចូលរដ្ឋ តិចសាស់

ជនអន្តោប្រវេសន៍ដែលកំពុងព្យាយាមឆ្លងទឹកទន្លេ រីយ៉ូគ្រែន (Rio Grande) ចូលទៅក្នុងរដ្ឋតិចសាស់(Texas) ត្រូវបានជួយសង្រ្គោះកាលពីថ្ងៃសៅរ៍ចុងសប្ដាហ៍នេះ បន្ទាប់ពីទឹកហូរគួចពួកគេ។ជនអន្តោប្រវេសន៍មួយក្រុមមានគ្នា៥នាក់ រួមទាំងបុរសជនជាតិកាតេម៉ាឡា និងមិត្តស្រីរបស់គេ បានទៅតាមបុរសជនជាតិម៉ិកស៊ីកូម្នាក់ដែល បានព្យាយាមជាលើកទី២នាំពួកគេឆ្លងទន្លេ ។ ក្នុងការប៉ុនប៉ងលើកទី២ចរន្តទឹកហួរខ្លាំងក្នុងទន្លេបានហួរគួចក្រុមនេះ ដែលធ្វើឲ្យពួកគេស្រែកឲ្យគេជួយខណៈពួកគេកាន់ដៃគ្នា។ ឆ្មាំជាតិនិងនគរបាលម៉ិកស៊ិក បានប្រញាប់ប្រញាល់ទៅច្រាំងទន្លេ។ បុរសម្នាក់បានលោតចូលក្នុងទន្លេនិងបានទាញបុរសម្នាក់ដែលជាមេក្រុម ក្នុងស្ថានភាពសន្លប់ឡើងមកលើច្រាំងនិងចាប់ផ្ដើមសង្រ្គោះ។ជនអន្តោប្រវេសន៍មួយចំនួនបានរត់ទៅកាន់មាត់ច្រាំង ប៉ុន្តែនៅពេលព្រះអាទិត្យលេច ស្ត្រីជនជាតិកាតេម៉ាឡា នៅតែបាត់ខ្លួនហើយមិនត្រូវបានគេដឹងភ្លាមៗទេថាតើនាងនៅមានជីវិតឬយ៉ាងណា។ ប្រហែលកន្លះម៉ោងក្រោយមក ក្រុមអាជ្ញាធរម៉ិកស៊ិក បានប្រើឈើវែងមួយដើមជួយសង្រ្គោះស្ត្រី ជនជាតិកូឡុំប៊ីម្នាក់ពីទន្លេនេះ។ទីក្រុងភីដ្រាស ណេក្រាស(Piedras Negras) រដ្ឋ គ័រអ៊ុយឡា(Coahuila) ប្រទេសម៉ិកស៊ិក គឺជាចំណុចឆ្លងទន្លេរីយ៉ូគ្រែន ពីទីក្រុង Eagle Pass រដ្ឋតិចសាស់ ជាទីដែលអភិបាលរដ្ឋ តិចសាស់ លោក Greg Abbott បានចាប់ផ្ដើមសាងសង់ជំរំមូលដ្ឋានយោធារបស់រដ្ឋនេះ ដែលលោកនិយាយថា នឹងក្លាយជាជម្រកសម្រាប់កងទ័ព១.៨០០នាក់ ជាផ្នែកមួយនៃកិច្ចខិតខំប្រឹងប្រែងការពារព្រំដែនដើម្បីទប់ស្កាត់ចំនួនអន្តោប្រវេសន៍ខុសច្បាប់៕

អតីតប្រធានាធិបតីប្រេស៊ីល ប្រមូលផ្តុំអ្នកគាំទ្រដើម្បីបង្ហាញពីភាពរឹងមាំ ក្នុងពេលមានការស៊ើបអង្កេតរដ្ឋប្រហារ

អតីតប្រធានាធិបតីប្រទេសប្រេស៊ីល លោក Jair Bolsonaro បានប្រមូលផ្តុំក្រុមអ្នកគាំទ្ររាប់ពាន់នាក់ នៅលើវិថី ប៉ាវលីស្តា អឺវេនញូ(Paulista Avenue) ដ៏ល្បីល្បាញរបស់ទីក្រុង Sao Paulo កាលពីថ្ងៃអាទិត្យ ដើម្បីបង្ហាញពីភាពរឹងមាំខាងនយោបាយ ក្នុងពេលមានការស៊ើបអង្កេត ដែលមនុស្សជាច្រើន ជឿថា អាចធ្វើឱ្យលោកជាប់ពន្ធនាគារ។ អតីតប្រធានាធិបតីស្តាំនិយម ដែលបានអំពាវនាវឲ្យមានការប្រមូលផ្តុំគ្នា បន្ទាប់ពីត្រូវបានកំណត់គោលដៅដោយការវាយឆ្មក់របស់នគរបាលកាលពីដើមខែនេះ ដើម្បីស៊ើបអង្កេតការប៉ុនប៉ងធ្វើរដ្ឋប្រហារតាមដែលបានចោទប្រកាន់ បាននិយាយប្រហែល ២០នាទី ដើម្បីការពារខ្លួន ខណៈពេលរំលឹកឡើងវិញអំពីអាណត្តិរបស់លោក កាលពី ២០១៩ដល់ឆ្នាំ២០២២។ លោក Bolsonaro ត្រូវបានគេរឹបអូសយកលិខិតឆ្លងដែន ហើយត្រូវបានចោទប្រកាន់ពីបទកែសម្រួលក្រិតដែលបានពង្រៀង ដើម្បីលុបចោលលទ្ធផលបោះឆ្នោត ដោយដាក់សម្ពាធលើមេបញ្ជាការយោធា ឱ្យចូលរួមក្នុងការប៉ុនប៉ងធ្វើរដ្ឋប្រហារ និងរៀបចំផែនការដាក់ពន្ធនាគារប្រធានតុលាការកំពូល បន្ទាប់ពីការចាញ់ការបោះឆ្នោតរបស់ ប្រធានាធិបតីឆ្វេងនិយម លោក លូអ៊ីស អ៊ីណាស៊ីញ៉ូ លូឡា ដាស៊ីលវ៉ា (Luiz Inacio Lula da Silva) ក្នុងឆ្នាំ ២០២២។ លោក Bolsonaro កាលពីថ្ងៃអាទិត្យ បានច្រានចោលបទចោទប្រកាន់នេះ និងបាននិយាយថា លោកកំពុងត្រូវបានគេ «ធ្វើទុក្ខបុកម្នេញ» ហើយក្រឹតដែលបានពង្រៀងនោះ គឺផ្អែកតាមរដ្ឋធម្មនុញ្ញ។ លោក បានអំពាវនាវ ឲ្យមានការលើកលែងទោសចំពោះអ្នកទាំងឡាយណា ដែលបានចូលរួមក្នុងកុបកម្ម ថ្ងៃទី ៨ ខែ មករា។ មេដឹកនាំស្តាំនិយមរូបនេះ បានថ្លែងសន្ទរកថារបស់លោក នៅលើរថយន្តដឹកទំនិញ ដែលហ៊ុមព័ទ្ធដោយក្រុមអ្នកគាំទ្រ ដែលភាគច្រើន កាន់ទង់ជាតិអ៊ីស្រាអែលផងដែរ។

អ៊ីស្រាអែល និងក្រុមហាម៉ាស ប្រយុទ្ធគ្នានៅហ្កាហ្សា ខណៈកិច្ចប្រឹងប្រែងបទឈប់បាញ់កំពុងបង្កើនល្បឿន

ទាហានអ៊ីស្រាអែល និងខ្មាន់កាំភ្លើងប៉ាឡេស្ទីន បានប្រយុទ្ធគ្នានៅពាសពេញតំបន់ហ្កាហ្សាស្ទ្រីប កាលពីចុងសប្តាហ៍ ខណៈក្រុមអ្នកសម្របសម្រួល បានបង្កើនល្បឿននៃកិច្ចពិភាក្សាជុំវិញបទឈប់បាញ់ដែលអាចធ្វើទៅបាន ដើម្បីដោះលែងចំណាប់ថ្នូរដែលចាប់ខ្លួនដោយក្រុមហាម៉ាស និងនាំយកវិធានការសម្រាប់ការផ្អាកនៅថ្ងៃសម្រាក បុណ្យរ៉ាម៉ាដាន ទៅកាន់តំបន់ហ៊ុមព័ទ្ធដែលរងការវាយប្រហារមួយនេះ។ ទោះជាយ៉ាងណា ទស្សនវិស័យ សម្រាប់ការធានាបានបទឈប់បាញ់ណាមួយ មើលទៅដូចជាមិនប្រាកដប្រជា ដោយអ៊ីស្រាអែលនិយាយថា មានផែនការពង្រីកការបោសសម្អាតដើម្បីកម្ទេចក្រុមហាម៉ាស ខណៈ ក្រុមសកម្មប្រយុទ្ធ បានប្រកាន់ជំហររឹងមាំ លើការទាមទាររបស់ខ្លួន សម្រាប់ការបញ្ចប់ជាអចិន្ត្រៃយ៍នៃសង្គ្រាមរយៈពេលជិតប្រាំខែ។ នាយករដ្ឋមន្ត្រីអ៊ីស្រាអែល លោក Benjamin Netanyahu បានកោះប្រជុំគណៈរដ្ឋមន្ត្រីសង្គ្រាមរបស់លោក នៅក្នុងសន្និសីទមួយកាលពីល្ងាចថ្ងៃសៅរ៍ ដោយប្រមុខចារកម្ម ដែលបានបានវិលត្រឡប់ពីកិច្ចប្រជុំជាមួយក្រុមអ្នកសម្របសម្រួលរបស់ប្រទេសកាតា អេហ្ស៊ីប និងអាមេរិក នៅទីក្រុងប៉ារីស អំពីបទឈប់បាញ់នៅតំបន់ហ្កាហ្សា ជាលើកទីពីរ។ ទីប្រឹក្សាសន្តិសុខជាតិ របស់សេតវិមាន លោក Jake Sullivan បានប្រាប់ប្រព័ន្ធផ្សព្វផ្សាយ CNN ថា ក្រុមអ្នកចរចាសម្រាប់សហរដ្ឋអាមេរិក អេហ្ស៊ីប កាតា និងអ៊ីស្រាអែល បានឈានដល់ការយោគយល់គ្នា លើទម្រង់ការជាមូលដ្ឋាននៃកិច្ចព្រមព្រៀងចំណាប់ថ្នូរ ក្នុងអំឡុងពេលកិច្ចពិភាក្សានៅទីក្រុងប៉ារីស។ លោក Sullivan និយាយថា កិច្ចព្រមព្រៀងនេះកំពុងស្ថិតក្រោមការចរចានៅឡើយ ហើយនឹងត្រូវតែមានការពិភាក្សាដោយប្រយោល ធ្វើឡើងដោយប្រទេសកាតា និងអេហ្ស៊ីប ជាមួយក្រុមហាម៉ាស។ លោក Netanyahu បាននិយាយថា វាមិនទាន់ច្បាស់នៅឡើយទេថាតើ កិច្ចព្រមព្រៀងចំណាប់ថ្នូរនឹងលេចចេញជារូបរាងពីកិច្ចពិភាក្សានេះឬយ៉ាងណា ដោយបដិសេធមិនពិភាក្សាអំពីចំណុចជាក់លាក់ ប៉ុន្តែនិយាយថាក្រុមហាម៉ាស ចាំបាច់ត្រូវទាមទារឲ្យសមហេតុផលបន្ថែមទៀត។

បណ្ដាញសង្គម

ព័ត៌មានថ្មីៗ

កម្ពុជាចាត់ទុកសកម្មភាពទន្រ្ទានរបស់ថៃ ជាឯកតោភាគី គឺបានធ្វើឲ្យប៉ះពាល់កិច្ចខិតខំប្រឹងប្រែងនៃការអនុវត្តបទឈប់បាញ់

កិច្ចប្រជុំ RBC រវាងយោធភូមិភាគទី៤កម្ពុជា និងកងទ័ពភូមិភាគ២ថៃ នឹងធ្វើឡើងនៅច្រកព្រំដែនអន្តរជាតិជាំ-សាង៉ាំ ខេត្តឧត្តរមានជ័យថ្ងៃនេះ

អ៊ីស្រាអែលបញ្ជាក់ថា អ្នកកាសែតរ៉យទ័រ និង AP ដែលស្លាប់ក្នុងការវាយប្រហារនៅហ្កាហ្សា មិនមែនជាគោលដៅទេ

លោក Trump នឹងបើកកិច្ចប្រជុំសេតវិមានស្ដីពីហ្កាហ្សា ខណៈសង្រ្គាមអ៊ីស្រាអែល រំពឹងដោះស្រាយបានចុងឆ្នាំនេះ

លោក Trump ពិចារណាដាក់ទណ្ឌកម្មលើរុស្ស៊ី ប្រសិនបើពុំអាចសម្រេចបានបទឈប់បាញ់នៅអ៊ុយក្រែន

ដាណឺម៉ាក បញ្ជាក់ថា ខ្លួនមិនច្រានចោលលទ្ធភាពនៃការទទួលស្គាល់ភាពជារដ្ឋរបស់ប៉ាឡេស្ទីនឡើយ

ប្រធានាធិបតីងហ្វាំងឡង់ រំពឹងថា លោក Trump នឹងអស់ការអត់ធ្មត់ជាមួយរុស្ស៊ី

អ៊ីរ៉ង់ប្តេជ្ញាចាត់វិធានការតបតវិញ បន្ទាប់ពីអូស្ត្រាលីបណ្តេញបេសកជន

គ្រោះទុរ្ភិក្សត្រូវបានប្រកាសនៅទីក្រុងហ្កាហ្សា ខណៈភាពអត់ឃ្លានកើតមានឡើង

កសិករប៉ាគីស្ថានជាប់បំណុល និងប្រឈមវិបត្តិទឹកជំនន់បង្កឡើងដោយបម្រែបម្រួលអាកាសធាតុ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877