BTV NEWS

អគ្គនាយកដ្ឋានពន្ធនាគារ កំពុងសិក្សារៀបចំទីតាំងឃុំឃាំងថ្មីបន្ថែម ខណៈចំនួនជនជាប់ឃុំមានការកើនឡើងខ្លាំង

សមត្ថកិច្ចខេត្តព្រះសីហនុរកឃើញអ្នកបើកបររថយន្តធុនធ្ងន់មួយចំនួនមានសារធាតុគ្រឿងញៀននៅក្នុងខ្លួន

ឆេះខុនដូ Wealth Mansion តែសមត្ថកិច្ចជួយពន្លត់ទាន់ពេលដោយមិនរាលដាលទ្រង់ទ្រាយធំ

ជនជាតិវៀតណាម និងជនជាតិចិនជាងពីររយនាក់ទៀតត្រូវបានអាជ្ញាធរបណ្តេញចេញពីកម្ពុជាក្រោយរក ឃើញជាប់ពាក់ព័ន្ធករណី Online Scams

សន្តិសុខ និង សង្គម

កម្មករក្រុមហ៊ុន UPS ប្រមូលផ្តុំគ្នានៅទីក្រុង Los Angeles ខណៈថ្ងៃផុតកំណត់នៃកូដកម្មមកដល់

ក្រុមកម្មករដែលជួលដោយក្រុមហ៊ុនដឹកជញ្ជូន UPS បានធ្វើការប្រមូលផ្តុំគ្នានៅខាងក្រៅក្រុមហ៊ុន UPS កាលពីថ្ងៃពុធ (១៩ កក្កដា) ខណៈដែលថ្ងៃផុតកំណត់នៃកូដកម្មប្រឆាំងនឹងក្រុមហ៊ុនជិតមកដល់។ ក្រុមសមាជិកសភាអាមេរិកចំនួន ២០០នាក់កាលពីថ្ងៃពុធបាននិយាយថា ពួកគេបានយល់ព្រមមិនធ្វើអន្តរាគមន៍ក្នុងករណីធ្វើកូដកម្មរបស់កម្មករនៅក្រុមហ៊ុន UPS នេះទេ។ក្រុមហ៊ុនដឹកជញ្ជូនទំនិញធំបំផុតរបស់ពិភពលោកមួយនេះ និងសហជីពកម្មករ International Brotherhood of Teamsters មានពេលរហូតដល់ពាក់កណ្តាលអធ្រាត្រថ្ងៃទី៣១ ខែកក្កដា ក្នុងការឈានដល់កិច្ចព្រមព្រៀងកិច្ចសន្យាដែលគ្របដណ្តប់លើកម្មករប្រហែល ៣៤០.០០០នាក់ ដែលរៀបចំ ផ្ទុក និងចែកចាយទំនិញនៅសហរដ្ឋអាមេរិក៕

អតីតយុទ្ធជនប្រទេសកូឡុំប៊ី តវ៉ានឹងរដ្ឋាភិបាលរបស់លោកប្រធានាធិបតី Petro

ទាហានបម្រុង និងទាហានចូលនិវត្តន៍កូឡុំប៊ីរាប់រយនាក់ បានចេញដើរតាមផ្លូវនៃទីក្រុងបូហ្គោតា (Bogota) កាលពីថ្ងៃពុធ (១៩ កក្កដា) ដើម្បីសម្តែងការមិនសប្បាយចិត្តរបស់ពួកគេចំពោះការគ្រប់គ្រងរបស់ប្រធានាធិបតីកូឡុំប៊ីឆ្វេងនិយមលោក Gustavo Petro ។ក្រុមអ្នកតវ៉ាបានប្រមូលផ្តុំគ្នានៅទីលានចតុរង្គ Bolivar នៃទីក្រុងបូហ្គោតា ដើម្បីបដិសេធគោលនយោបាយសន្តិភាពអនុវត្តដោយរដ្ឋាភិបាលជាតិ ដែលភាគច្រើនមានទំនាក់ទំនងនឹងក្រុមប្រដាប់អាវុធដូចជាក្រុមប្រឆាំងរបស់កងទ័ពរំដោះជាតិ ELN និងក្រុមកងកម្លាំងប្រដាប់អាវុធបដិវត្តន៍ប្រទេសកូឡុំប៊ី FARC ជាដើម។ក្រុមបាតុករជាច្រើនបានគ្រវីទង់ជាតិកូឡុំប៊ី និងកាន់បដាដែលមានពាក្យស្លោកដូចជា "មិនត្រូវការប្រធានាធិបតីដូចជាលោក Petro ទៀតទេ" និង "សូមឲ្យលោក Petro ចេញទៅ”។ក្រុម ELN គឺជាក្រុមឧទ្ទាមដែលនៅសេសសល់ចំណាស់ជាងគេរបស់ប្រទេសកូឡុំប៊ី ហើយកិច្ចពិភាក្សាគឺជាមូលដ្ឋានគ្រឹះនៃកិច្ចខិតខំប្រឹងប្រែងរបស់លោក Petro ដោយខ្លួនលោកផ្ទាល់ធ្លាប់ជាសមាជិកនៃក្រុមបះបោរ M-19 ដែលត្រូវបានរំសាយនៅពេលនេះផងដែរ ដើម្បីចរចាកិច្ចព្រមព្រៀងសន្តិភាព ឬកិច្ចព្រមព្រៀងចុះចូលជាមួយពួកឧទ្ទាម និងក្រុមអន្ធពាលឧក្រិដ្ឋកម្មដែលនៅសេសសល់ទាំងនោះ៕

ទឹកជំនន់គំរាមកំហែងរដ្ឋ Kentucky បន្ទាប់ពីមានភ្លៀងធ្លាក់នៅតំបន់នេះ

ភ្លៀងធ្លាក់ខ្លាំងបានជន់លិចតំបន់ខ្លះនៃរដ្ឋ Kentucky កាលពីថ្ងៃពុធ (១៩ កក្កដា) ហើយបានបណ្ដាលឲ្យដាច់ចរន្តអគ្គិសនីផងដែរ ដោយសារបញ្ហាអាកាសធាតុបានរំខានផ្នែកខ្លះនៃសហរដ្ឋអាមេរិក។នៅតំបន់ Graves County នៅតាមព្រំដែនរដ្ឋ Kentucky ជាមួយរដ្ឋ Tennessee មានភ្លៀងធ្លាក់កម្រិតជាង ១១អ៊ីង (២៧ សង់ទីម៉ែត្រ) ទៅលើតំបន់នេះ ដែលបានបំបែកកំណត់ត្រាក្នុងស្រុក។ នៅទីក្រុង Mayfield ទឹកជំនន់បានជន់លិចផ្ទះសម្បែង និងទ្រព្យសម្បត្តិឯកជនជាច្រើន។ ក្រុមអាជ្ញាធរបានរាយការណ៍ថា មិនមានរបាយការណ៍បឋមពីអ្នករបួស ឬអ្នកស្លាប់នោះទេ។នៅភាគខាងលិចរដ្ឋ Kentucky ផ្ទះសម្បែង និងក្រុមហ៊ុនអាជីវកម្មប្រហែល៩០.០០០កន្លែង មិនមានអគ្គិសនីប្រើប្រាស់ បន្ទាប់ពីមានព្យុះផ្គររន្ទះជាច្រើនជុំបានបំផ្លាញខ្សែភ្លើង និងដើមឈើនៅទូទាំងតំបន់នេះពេញមួយយប់ ព្រមទាំងបន្តរហូតដល់ព្រឹកថ្ងៃពុធទៀតផង នេះបើយោងតាមគេហទំព័រតាមដានការដាច់ចរន្តអគ្គិសនីសហរដ្ឋអាមេរិក poweroutage.us៕

មនុស្សរាប់ពាន់នាក់ត្រូវបានជម្លៀសចេញ បន្ទាប់ពីឃ្លាំងគ្រាប់រំសេវនៅគ្រីម៉េផ្ទុះឆេះ

ជនស៊ីវិលរាប់ពាន់នាក់ ត្រូវបានជម្លៀសចេញ បន្ទាប់ពីឃ្លាំងគ្រាប់រំសេវមួយនៅក្នុងតំបន់គ្រីម៉េ ដែលត្រូវបានបញ្ចូលក្នុងឧបសម្ព័ន្ធរបស់រុស្ស៊ី បានឆាបឆេះយ៉ាងសន្ធោសន្ធៅ ដោយបង្កឱ្យមានការផ្ទុះជាបន្តបន្ទាប់។ប្រព័ន្ធផ្សព្វផ្សាយរុស្ស៊ី បានរាយការណ៍ថា ការផ្ទុះនៅតែត្រូវបានគេឮជាច្រើនម៉ោង បន្ទាប់ពីភ្លើងឆេះ ត្រូវបានរាយការណ៍នៅមូលដ្ឋានយោធាKirovske កាលពីព្រឹកថ្ងៃពុធ។អាជ្ញាធរមិនបានបញ្ជាក់ពីមូលហេតុនៃការឆាបឆេះនេះទេ ប៉ុន្តែវីដេអូបង្ហាញពីផ្សែងខ្មៅដ៏ខ្មួលខ្មាញហុយឡើងលើអាកាស។ឧបទ្ទវហេតុនេះ បានកើតឡើងប៉ុន្មានថ្ងៃ បន្ទាប់ពីការផ្ទុះនៅលើស្ពាន Kerchតភ្ជាប់ឧបទ្វីបសមុទ្រខ្មៅទៅកាន់ប្រទេសរុស្ស៊ីដីគោក ដែលវិមានក្រឹមឡាំងបានស្តីបន្ទោសទៅលើប្រទេសអ៊ុយក្រែន។អាជ្ញាធរមូលដ្ឋាន បាននិយាយថា មនុស្សជាងពីរពាន់នាក់ ត្រូវបានជម្លៀសចេញពីភូមិជុំវិញឃ្លាំងគ្រាប់រំសេវនោះ។ តាមការរាយការណ៍ ពួកគេត្រូវបានផ្តល់ឲ្យនូវជម្រកបណ្តោះអាសន្ន។

ស្ត្រីអាហ្វហ្គានីស្ថានតវ៉ាប្រឆាំងនឹងបម្រាមឲ្យបិទហាងកែសម្ផស្ស

មន្ត្រីសន្តិសុខបានបាញ់ទៅលើអាកាស និងប្រើបំពង់បាញ់ទឹកពន្លត់អគ្គិភ័យ ដើម្បីបំបែកស្ត្រីអាហ្វហ្គានីស្ថានរាប់សិបនាក់ ដែលកំពុងតវ៉ានៅទីក្រុងកាប៊ុល កាលពីថ្ងៃពុធ (ទី១៩ ខែកក្កដា) ប្រឆាំងនឹងការបញ្ជារបស់អាជ្ញាធរតាលីបង់ឲ្យបិទហាងកែសម្ផស្ស ដោយនេះជាការចេញបម្រាមចុងក្រោយបង្អស់ ដែលគាបសង្កត់ពួកគេមិនឲ្យប្រើប្រាស់ជីវិតសាធារណៈ។ចាប់តាំងពីឡើងកាន់អំណាច ក្នុងខែសីហា ឆ្នាំ២០២១ រដ្ឋាភិបាលតាលីបង់បានហាមឃាត់ក្មេងស្រីៗ និងស្ត្រីទាំងអស់ មិនឲ្យចូលរៀនវិទ្យាល័យ និងសាកលវិទ្យាល័យនានា ដោយដាក់បម្រាមចំពោះពួកគេ មិនឲ្យទៅលេងសួនកម្សាន្ត កន្លែងតាំងពិព័រណ៍ និងកន្លែងហាត់ប្រាណ ហើយបានបញ្ជាឲ្យពួកគេបិទបាំងមុខមាត់ពេលដើរជាសាធារណៈ។បទបញ្ជាដែលបានចេញកាលពីខែមុន បង្ខំឲ្យបិទហាងកែសម្ផស្សរាប់ពាន់កន្លែងទូទាំងប្រទេសដែលគ្រប់គ្រងដោយស្ត្រី ដែលជារឿយៗជាប្រភពចំណូលតែមួយគត់សម្រាប់គ្រួសារ ហើយលើសពីនោះទៀតបទបញ្ជានោះ បានបិទឱកាសមួយ ក្នុងចំណោមឱកាសនៅសល់តិចតួច ដែលជួយឲ្យពួកស្ត្រីទាំងឡាយក្នុងការប្រទេសនេះ បានជួបជុំគ្នា ក្រៅពីផ្ទះរបស់ខ្លួន។ការតវ៉ាជាសាធារណៈ គឺកម្រកើតមានណាស់ នៅអាហ្វហ្គានីស្ថាន ហើយជាញយៗ ត្រូវបានបំបែកដោយកងកម្លាំងអាជ្ញាធរ ប៉ុន្តែគេបានឃើញស្ត្រីប្រហែល ៥០នាក់ ចូលរួមក្នុងការប្រមូលផ្តុំកាលពីថ្ងៃពុធ ដោយបង្កឲ្យមានការតាមដានយ៉ាងយកចិត្តទុកដាក់ពីបុគ្គលិកសន្តិសុខភ្លាមៗ។ ក្រោយមក ក្រុមអ្នកតវ៉ា បានចែករំលែករូបភាពវីដេអូ និងរូបថតជាមួយអ្នកកាសែត ដែលបង្ហាញថា អាជ្ញាធរប្រើបំពង់បាញ់ទឹកពន្លត់អគ្គិភ័យបំបែកពួកគេ ខណៈដែលគេអាចលឺសំឡេងកាំភ្លើង ចេញពីកន្លែងណាមួយមិនពិតប្រាកដ។ហាងកែសម្ផស្សបានរីកដុះដាលពេញទីក្រុងកាប៊ុល និងទីក្រុងផ្សេងទៀតរបស់ប្រទេសអាហ្វហ្គានីស្ថាន ក្នុងរយៈពេល ២០ឆ្នាំ នៅពេលដែលកងកម្លាំងដឹកនាំដោយសហរដ្ឋអាមេរិក បានគ្រប់គ្រងប្រទេសនេះ៕

មនុស្ស១០នាក់ស្លាប់ និងមួយចំនួនទៀតជាប់ខ្លួនក្នុងបំណាក់ដីនៅរដ្ឋភាគខាងលិច Maharashtraប្រទេសឥណ្ឌា

ក្រុមមន្រ្តីនិយាយថា នៅថ្ងៃព្រហស្បតិ៍ ក្រុមការងារសង្រ្គោះនៅប្រទេសឥណ្ឌា បានព្យាយាមជម្នះលក្ខណៈភូមិសាស្រ្តដ៏ពិបាក និងស្ថានភាពអាកាសធាតុអាក្រក់ ពេលដែលពួកគេរុករកអ្នករស់រានក្នុងហេតុការណ៍បំណាក់ដីដែលបានសម្លាប់មនុស្សយ៉ាងហោច ១០នាក់ នៅភូមិតំបន់ភ្នំមួយកន្លែងស្ថិតនៅរដ្ឋភាគខាងលិច Maharashtra ក្រោយភ្លៀងធ្លាក់ខ្លាំង ធ្វើឲ្យសើមដីជម្រាលភ្នំ ។រលកកម្តៅខ្លាំងបំផុត ភ្លើងឆេះព្រៃ ភ្លៀងធ្លាក់ខ្លាំង និងទឹកជំនន់ បានបង្កភាពវឹកវរនៅទូទាំងពិភពលោកក្នុងរយៈពេលប៉ុន្មានថ្ងៃចុងក្រោយនេះ បង្កឲ្យកើតមានក្តីបារម្ភជាថ្មីពីជំហានបម្រែបម្រួលអាកាសធាតុ ។ក្រុមមន្រ្តីនិយាយថា ដីបានបាក់នៅកណ្តាលជម្រាលភ្នំកាលពីពេលយប់ក្នុងភូមិដាច់ស្រយាល Irshalwadi ស្ថិតក្នុងរដ្ឋ Maharashtra ដែលមានចម្ងាយប្រហែល ៦០គ.មពីទីក្រុងម៉ុមបៃ ។លោក Devendra Fadnavis គឺជាអភិបាលរងរដ្ឋ Maharashtra និយាយនៅលើបណ្តាញព័ត៌មានសង្គម Twitterថា មនុស្សសរុប ៤៨គ្រួសារ រស់នៅទីនោះ ។ មនុស្សប្រហែល ៧៥នាក់ ត្រូវបានជម្លៀសខ្លួន ហើយមកទល់នឹងពេលនេះ មនុស្ស ១០នាក់ បានស្លាប់ ។សេចក្តីរាយការណ៍ដំបូង បានឲ្យដឹងថា មនុស្សប្រហែល ១០០នាក់ ត្រូវបានគេព្រួយបារម្ភថា បានជាប់នៅក្រោមគម្ទេចកម្ទី ហើយក្រុមការងារសង្រ្គោះ កំពុងប្រឹងប្រែងទាំងភ្លៀងធ្លាក់ខ្លាំង ដើម្បីស្វែងរកអ្នករស់រាន ស្របពេលដែលសាច់ញាតិ រង់ចាំដំណឹងនៅជើងភ្នំ ។លោក S B Singh គឺជាមន្រ្តីមកពីកងកម្លាំងឆ្លើយតបគ្រោះមហន្តរាយជាតិ ដែលទទួលបន្ទុកប្រតិបត្តិការជួយសង្រ្គោះ បាននិយាយប្រាប់កាសែត Indian Express ថា គម្ទេចកម្ទីនៅកន្លែងខ្លះ មានជម្រៅ ពី ៣ម៉ែត្រ ទៅ ៩ម៉ែត្រ ។លោកបន្តថា វាពិបាកក្នុងការនាំយកគ្រឿចក្រធុនធ្ងន់មកកាន់ទីនេះ ។ គេត្រូវការធ្វើដំណើរចម្ងាយ ២,៨គ.ម ដើម្បីទៅដល់កន្លែងកើតហេតុ ហើយពួកយើងត្រូវតែកាយចេញកម្ទេចកម្ទីដោយដៃ ដែលទំនងជាត្រូវប្រើពេលយូរ ៕

ការស្ទង់មតិបង្ហាញថា ក្រុមហ៊ុនជប៉ុន ពិបាក ឬមិនអាចបំពេញតំណែងប្រតិបត្តិសម្រាប់បុគ្គលិកស្រី

ជប៉ុន៖ ការស្ទង់មតិមួយរបស់ទីភ្នាក់ងារព័ត៌មានរ៉យទ័រ បានបង្ហាញថា ចំនួនភាគច្រើនដ៏លើសលប់នៃក្រុមហ៊ុនជប៉ុន គិតថា ពួកគេពិបាក ឬមិនអាចតែម្តង ដើម្បីបំពេញតំណែងប្រតិបត្តិការចំនួន ៣០ភាគរយសម្រាប់បុគ្គលិកស្រី នៅឆ្នាំ ២០៣០ខាងមុខនេះ ។ លទ្ធផលខាងលើ បញ្ជាក់ពីការលំបាកដែលប្រទេសមហាអំណាចសេដ្ឋកិច្ចទី ៣របស់ពិភពលោកមួយនេះ ប្រឈម ដើម្បីបិទគំលាតយេនឌ័រ ។ កាលពីខែមិថុនាកន្លងទៅ នាយករដ្ឋមន្រ្តីជប៉ុន លោក Fumio Kishida បានកំណត់គោលដៅឲ្យមានតំណែងប្រតិបត្តិយ៉ាងហោច ៣០ភាគរយសម្រាប់បុគ្គលិកស្រីនៅតាមក្រុមហ៊ុនឈានមុខគេ ក្នុងឆ្នាំ ២០៣០ខាងមុខនេះ ។ ការផ្តួចផ្តើមគំនិតចុងក្រោយឲ្យលើកកម្ពស់ការចូលរួមផ្នែកគ្រប់គ្រងរបស់បុគ្គលិកស្រីនេះ ត្រូវបានប្រកាសឡើង ដើម្បីបង្កើនតួនាទីស្រ្តី ពី ២,២ភាគរយ គិតត្រឹមខែកក្កដា ឆ្នាំ ២០២២ ។ យោងតាមការស្ទង់មិត បានបង្ហាញថា ៦០ភាគរយនៃក្រុមអ្នកគ្រប់គ្រងសាជីវកម្ម និយាយថា វានឹងពិបាកក្នុងការឈានដល់គោលដៅដែលបានកំណត់ ហើយចំនួន ២៩ភាគរយ និយាយថា វាគ្មានលទ្ធភាពតែម្តង ។ លទ្ធផលនេះដែរ បានឆ្លុះបញ្ចាំងពីសន្ទុះនៅក្នុងប្រទេសជប៉ុនឆ្ពោះទៅរកការបង្កើនតួនាទីរបស់ស្រ្តីនៅក្នុងកម្លាំងការងារ ដើម្បីកែលម្អភាពចម្រុះ និងជំរុញកំណើនសេដ្ឋកិច្ច ។ នៅក្នុងឆ្នាំនេះដែរ ជប៉ុនឈរនៅចំណាត់ថ្នាក់លេខរៀងទី ១២៥នៅក្នុងចំណោម ១៤៦ប្រទេសក្នុងរបាយការណ៍វេទិកាសេដ្ឋកិច្ចពិភពលោកប្រចាំឆ្នាំ ដែលវាស់ពីកម្រិតសមភាពយេនឌ័រ ពោលគឺធ្លាក់ចុះពីចំណាត់ថ្នាក់លេខរៀងទី ១១៦កាលពីឆ្នាំមុន ហើយពួកគេស្ថិតនៅចំណាត់ថ្នាក់ក្រោមប្រទេសចិន អារ៉ាប៊ីសាអូឌីត និងទួរគី ៕

ក្រុមអ្នកតវ៉ាវាយសម្រុកចូលស្ថានទូតស៊ុយអែតក្នុងក្រុងបាកដាដ ជុំវិញការដុតគម្ពីរកូរ៉ាន

ស៊ុយអែត៖ ក្រុមអ្នកតវ៉ាដែលខឹងសម្បានឹងការដុតច្បាប់ចម្លងនៃគម្ពីរកូរ៉ានក្នុងប្រទេសស៊ុយអែត បានសម្រុកចូលស្ថានទូតស៊ុយអែតក្នុងរដ្ឋធានីបាកដាដរបស់ប្រទេសអ៊ីរ៉ាក់ ដោយទម្លុះចូលទៅក្នុងបរិវេណ និងដុតភ្លើង។វីដេអូអនឡាញជាច្រើន បានបង្ហាញឲ្យឃើញក្រុមបាតុករនៅឯបរិវេណអគារការទូតនៅព្រឹកថ្ងៃព្រហស្បតិ៍នេះ ដោយគ្រវីទង់ជាតិ និងសញ្ញាបង្ហាញមេដឹកនាំនយោបាយនិងសាសនានិកាយស៊ីអ៊ីត អ៊ីរ៉ាក់ដ៏មានឥទ្ធិពលគឺ លោកMuqtada Sadr( ម៉ុកតាដា អាល់សាត)។ទីភ្នាក់ងារសារព័ត៌មាន Reuters បានរាយការណ៍ថា ក្រសួងការបរទេសអ៊ីរ៉ាក់ បានថ្កោលទោសយ៉ាងដាច់អហង្ការចំពោះការវាយប្រហារលើស្ថានទូតនេះ។ក្រសួងការបរទេសអ៊ីរ៉ាក់ បាននិយាយនៅក្នុងសេចក្តីថ្លែងការណ៍មួយថា៖«រដ្ឋាភិបាលអ៊ីរ៉ាក់ បានណែនាំដល់អាជ្ញាធរសន្តិសុខមានសមត្ថកិច្ចឲ្យធ្វើការស៊ើបអង្កេតជាបន្ទាន់ និងចាត់វិធានការសន្តិសុខចាំបាច់ ដើម្បីបង្ហាញពីកាលៈទេសៈនៃឧបទ្ទវហេតុនេះ និងកំណត់ភិនភាគជនល្មើសនៃទង្វើនេះ និងឲ្យពួកគេទទួលខុសត្រូវតាមច្បាប់»។ក្រសួងការបរទេសស៊ុយអែត បាននិយាយថា បុគ្គលិកនៅស្ថានទូត «ស្ថិតក្នុងសុវត្ថិភាព» បន្ទាប់ពីស្ថានទូត ត្រូវបានវាយលុក និងដុតបំផ្លាញ៕

ទីក្រុងមួយរបស់អេស្ប៉ាញជំរុញឲ្យពលរដ្ឋកាត់បន្ថយការប្រើប្រាស់រថយន្ត ព្រោះការបំពុលពាក់ព័ន្ធនឹងរកលកកម្ដៅ

អេស្ប៉ាញ៖ រយៈពេលប៉ុន្មានសប្ដាហ៍ក្រោយការលើកឡើងថា នឹងមានការផ្អាកតំបន់បញ្ចេញឧស្ម័ន(LEZ)កម្រិតតិច រដ្ឋាភិបាលចម្រុះស្ដាំនិយមថ្មី នៅក្នុងទីក្រុងវ៉ាឡាដូលីដ (Valladolid)របស់ប្រទេសអេស្ប៉ាញកំពុងអំពាវនាវដល់ពលរដ្ឋឲ្យបញ្ឈប់ការប្រើរថយន្តផ្ទាល់ខ្លួន ដោយសារកម្រិតនៃការបំពុលស្រទាប់អូហ្ស៊ូន ឡើងខ្ពស់។ ការិយាល័យអភិបាលក្រុងបាននិយាយនៅក្នុងសេចក្តីថ្លែងការណ៍មួយថា ខ្យល់ក្តៅពីរលកកម្ដៅដែលប៉ះពាល់ដល់ទ្វីបអឺរ៉ុបភាគខាងត្បូងបានបណ្តាលឲ្យកម្រិតអូហ្សូនក្នុងបរិយាកាសហក់ឡើងលើសពីការអំពាវនាវឲ្យប្រើរថយន្តតិចតួចរយៈពេលបីថ្ងៃជាប់គ្នាកាលពីថ្ងៃអង្គារ។ ការិយាល័យខាងលើបានបន្ថែមថា ផ្សែងបញ្ចេញជាតិពុលពីរថយន្ត ដែលរួមចំណែកយ៉ាងសំខាន់ដល់ការបង្កើតអូហ្សូនក្នុងបរិយាកាស វាជារឿងសំខាន់ដែលការប្រើប្រាស់យានយន្តចំហេះសម្រាប់ការដឹកជញ្ជូនឯកជនត្រូវបានកាត់បន្ថយតាមដែលអាចធ្វើទៅបាន ដើម្បីកុំឲ្យមានវិធានការរឹតត្បិតបន្ថែមទៀត។ប្រទេសអេស្ប៉ាញ ដូចជាផ្នែកជាច្រើននៃពិភពលោកកំពុងទប់ទល់នឹងរលកកម្ដៅដែលបានឃើញទីក្រុង និងតំបន់មួយចំនួន បំបែកកំណត់ត្រាសីតុណ្ហភាពអតិបរមាក្នុងរយៈពេលប៉ុន្មានថ្ងៃថ្មីៗនេះ៕

ឧត្តមសេនីយ៍ រ័ត្ន ស្រ៊ាង ក្រើនរំលឹកកម្លាំងក្រោមឱវាទទៅបោះឆ្នោត នៅថ្ងៃទី២៣កក្កដាឲ្យបានគ្រប់ៗគ្នា

ភ្នំពេញ៖ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស ជាមេបញ្ជាការ កងរាជអាវុធហត្ថរាជធានីភ្នំពេញ បានបើកកិច្ចប្រជុំផ្សព្វផ្សាយផែនការ ការពារ សន្តិសុខ សុវត្ថិភាព និងសណ្តាប់ធ្នាប់ ក្នុងពិធីបិទយុទ្ធនាការឃោសនា និងដំណើរការបោះឆ្នោតជ្រើសតាំង តំណាងរាស្ត្រ នីតិកាលទី៧ ដោយមានការចូលរួមពីលោកមេបញ្ជាការរង នាយ-នាយសេនាធិការរង ប្រធាន-អនុប្រធានមន្ទីរ នាយការិយាល័យ លោកមេបញ្ជាការ មូលដ្ឋានអាវុធហត្ថខណ្ឌទាំង ១៤ និងលោកមេបញ្ជាការ-មេបញ្ជាការរង វរសេនាតូចជាច្រើនរូប កាលពីរសៀល ថ្ងៃទី១៩ ខែកក្កដា ឆ្នាំ២០២៣ ។លោកឧត្តមសេនីយ៍ឯក រ័ត្ន ស្រ៊ាង បានមានប្រសាសន៍ណែនាំដល់នាយ-នាយរងអាវុធហត្ថ ដែលទទួលដឹកនាំតាមបណ្តាគោលដៅទាំងអស់ ត្រូវតែធានាឲ្យបានដាច់ខាត ទាំងមធ្យោបាយ សម្ភារៈគ្រឿងបំពាក់ និង កម្លាំងប្រតិបត្តិការ ដើម្បីសម្រេចនូវបេសកកម្មខាងមុខនេះឲ្យខាងតែបាន។ លោកឧត្តមសេនីយ៍ឯក រ័ត្ន ស្រ៊ាង ក៏បានផ្តាំផ្ញើ ដល់កម្លាំងអាវុធហត្ថទាំងអស់ ពេលត្រលប់ទៅវិញត្រូវដាស់តឿន ក្រើនរំលឹក ដល់កម្លាំងក្រោមឱវាទរៀងៗខ្លួន ក៏ដូចជា មិត្តភក្តិ បងប្អូនសាច់ញាតិទាំងអស់ ឲ្យទៅចូលរួមបោះឆ្នោត នៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ ឲ្យបានគ្រប់ៗគ្នា ដើម្បីបំពេញតួនាទីជាពលរដ្ឋល្អក្នុងសង្គមកុំបីខាន ។បោះឆ្នោតជូនគណបក្សប្រជាជនកម្ពុជាដែលមានលេខរៀងទី១៨ នៅក្នុងសន្លឹកឆ្នោត ដើម្បីបន្តដឹកនាំប្រទេស និងមានលទ្ធភាពបំរើប្រជាពលរដ្ឋជាបន្តទៀត ។លោកឧត្តមសេនីយ៍ឯក រ័ត្ន ស្រ៊ាង មានប្រសាសន៍ថា គោលនយោបាយដ៏ត្រឹមត្រូវរបស់គណបក្ស ប្រជាជនកម្ពុជាពិសេសគោលដៅរបស់សម្តេចតេជោ ហ៊ុន សែន ដែលនាំអោយប្រទេសមានសុខសន្តិភាព យូអង្វែង មានការអភិវឌ្ឍរីកចម្រើនឥតឈប់ឈរលើគ្រប់វិស័យ ៕

បណ្ដាញសង្គម

ព័ត៌មានថ្មីៗ

សម្តេចតេជោ អរគុណជប៉ុនបានជួយកម្ពុជាចាប់តាំងពីការចាប់ផ្ដើមស្វែងរកសន្ដិភាពរហូតដល់បច្ចុប្បន្ន

កម្ពុជា-ឡាវ-វៀតណាម ដាក់ចេញកញ្ចប់ទស្សនកិច្ចរួម «ប្រទេសបី គោលដៅមួយ» ដើម្បីជំរុញការធ្វើដំណើរក្នុងតំបន់

សាធារណរដ្ឋកូរ៉េ សម្រេចបន្ធូរបន្ថយកម្រិតបម្រាមធ្វើដំណើរសម្រាប់ពលរដ្ឋរបស់ខ្លួនមកលើទឹកដីកម្ពុជាក្រោមហេតុផលស្ថានភាពសន្តិសុខល្អប្រសើរ

អ្នកគាំទ្ររាប់សែននាក់ស្វាគមន៍ក្រុមជម្រើសជាតិន័រវែស ទោះបីបញ្ចប់ដំណើរនៅវគ្គ៨ ក្រុមចុងក្រោយ World Cup

សិស្សនិងគ្រូបង្រៀននីហ្សេរីយ៉ាដែលត្រូវបានជួយសង្គ្រោះ បានត្រឡប់ទៅលំនៅឋានវិញបន្ទាប់ពីត្រូវបានចាប់ជំរិត

អឺរ៉ុប៖ កញ្ចប់មូលនិធិស្តារឡើងវិញតំបន់ហ្កាហ្សា១ពាន់លានដុល្លារ ជាជំហានដំបូងឆ្ពោះទៅរកមូលនិធិ៧០ពាន់លានដុល្លារដែលត្រូវការ

អ្នករៀបចំប្រណាំងម៉ូតូត្រៃ៖ រំពឹងថាយ៉ាងយូរ ៥ឆ្នាំទៀតប៉ុណ្ណោះធនធានកីឡាករប្រណាំងកម្ពុជានឹងមានច្រើនសម្បូរបែប

សហភាពអឺរ៉ុប កំពុងថ្លឹងថ្លែងពីការកំណត់បណ្តាញផ្សព្វផ្សាយសង្គមសម្រាប់កុមារ

សម្ដេចតេជោ ហ៊ុន សែន អរគុណអាល្លឺម៉ង ដែលបានជួយកម្ពុជាលើការអភិវឌ្ឍលើវិស័យជាច្រើនហើយសង្ឃឹមវិនិយោគិនបន្តមកបណ្ដាក់ទុនបន្ថែម

អតីតនាយករដ្ឋមន្ត្រីអេស្ប៉ាញ Mariano Rajoy រងការរិះគន់ខ្លាំងក្រោយថាកីឡាករបារាំងមិនមានកីឡាករជនជាតិបារាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877