BTV NEWS

ចាប់ខ្លួនជនសង្ស័យ៥នាក់ពាក់ពន្ធ័ករណីចាប់ ឃុំឃាំង និងបង្ខាំងមនុស្សដោយខុសច្បាប់

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

សន្តិសុខ និង សង្គម

UN កត់ត្រាកំណើនយ៉ាងខ្លាំងនៃការស្លាប់ និងរបួសជនស៊ីវិលនៅអ៊ុយក្រែន ក្នុងខែមីនា

ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយកាលពីថ្ងៃអង្គារ (០៩ មេសា) ថាក្រុមអ្នកឃ្លាំមើលអង្គការសហប្រជាជាតិ បានកត់ត្រាការកើនឡើងយ៉ាងខ្លាំងនៃចំនួនអ្នកស្លាប់ និងរបួសដែលជាជនស៊ីវិលក្នុងប្រទេសអ៊ុយក្រែន កាលពីខែមុន ខណៈដែលកងកម្លាំងរុស្ស៊ី បានបង្កើនការវាយប្រហារឥតឈប់ឈរ។ ចំនួនអ្នកស្លាប់រួមមានកុមារយ៉ាងតិច ៥៧ នាក់បានស្លាប់ ឬរងរបួសនៅក្នុងខែមីនា ដែលចំនួននេះកើនឡើងទ្វេដងពីខែកុម្ភៈ។ បេសកកម្មឃ្លាំមើលសិទ្ធិមនុស្សរបស់អង្គការសហប្រជាជាតិ បានផ្ទៀងផ្ទាត់ថាជនស៊ីវិលយ៉ាងហោចណាស់ ៦០៤ នាក់ដែលត្រូវបានសម្លាប់ ឬរងរបួសនៅក្នុងប្រទេសអ៊ុយក្រែនក្នុងខែមីនា ដែលកើនឡើងចំនួន ២០ ភាគរយពីខែកុម្ភៈ។ បេសកកម្មនេះបានរកឃើញថា អ្នករងគ្រោះភាគច្រើនគឺជាស៊ីវិលដែលមានចំនួន ៩៣,៥ ភាគរយ ក៏ដូចជាការខូចខាតភាគច្រើនដល់កន្លែងអប់រំ និងសុខភាព និងហេដ្ឋារចនាសម្ព័ន្ធសំខាន់ៗបានកើតឡើងនៅក្នុងតំបន់ដែលគ្រប់គ្រងដោយរដ្ឋាភិបាល។អ៊ុយក្រែន បានរងការវាយប្រហារយ៉ាងធ្ងន់ធ្ងរជាពិសេសកាលពីខែមីនា ហើយលោកប្រធានាធិបតី វ្ល៉ូឌីមី ហ៊្សេឡិនស្គី (Volodymyr Zelenskiy) បាននិយាយថា ប្រទេសនេះអាចអស់មីស៊ីលការពារដែនអាកាស ប្រសិនបើរុស្ស៊ី បន្តយុទ្ធនាការទម្លាក់គ្រាប់បែករយៈចម្ងាយឆ្ងាយដ៏ខ្លាំងក្លារបស់ខ្លួន។ លោកបាននិយាយកាលពីសប្តាហ៍មុនថា រុស្ស៊ីបានបាញ់ទម្លាក់គ្រាប់បែកពីលើអាកាសចំនួនជាង ៣.០០០ គ្រាប់ យានដ្រូនចំនួន ៦០០ គ្រឿង និងមីស៊ីល ៤០០ គ្រាប់ទៅលើអ៊ុយក្រែន នៅក្នុងខែមីនា ដែលជាតួលេខដ៏ច្រើនសន្ធឹកសន្ធាប់៕

ពលរដ្ឋប៉ាឡេស្ទីន១៤នាក់ស្លាប់ និងរាប់សិបនាក់រងរបួសក្នុងការវាយប្រហាររបស់អ៊ីស្រាអែល នៅជំរំ Nuseirat

ក្រសួងសុខាភិបាលបាននិយាយថា ពលរដ្ឋប៉ាឡេស្ទីនយ៉ាងហោចណាស់១៤នាក់ស្លាប់ កាលពីថ្ងៃអង្គារ ក្នុងអំឡុងការវាយប្រហារតាមអាកាសរបស់អ៊ីស្រាអែល លើជំរំ Nuseirat ក្នុងតំបន់ហ្កាហ្សា។ទីភ្នាក់ងារសារព័ត៌មានផ្លូវការរបស់ដែនដីប៉ាឡេស្ទីន Wafa បានរាយការណ៍ថា ការវាយប្រហារ ដែលបានបង្កឲ្យរងរបួសមនុស្សជាច្រើននាក់ បានកំណត់គោលដៅលើទីតាំងលំនៅឋានក្នុងជំរំជនភៀសខ្លួន Nuseirat នៅផ្នែកភាគកណ្តាលនៃតំបន់ហ្កាហ្សា។ការវាយប្រហារតាមអាកាសផ្សេងទៀត ត្រូវបានគេរាយការណ៍នៅទីក្រុង Deir al-Balah នៅទីក្រុងហ្កាហ្សាភាគកណ្តាល និងទីក្រុង Rafah នៅភាគខាងត្បូងផុត។ការវាយប្រហារនេះ បានកើតឡើងនៅមុនថ្ងៃបុណ្យ Eid al-Fitr ជាពិធីដែលបញ្ចប់ការតមអាហារតាមច័ន្ទគតិរបស់សាសនាឥស្លាមនៃខែបុណ្យរ៉ាម៉ាដាន ដែលត្រូវបានរំពឹងទុកនៅតំបន់ហ្កាហ្សានៅថ្ងៃពុធ ទី១០ ខែមេសានេះ។ក្រុមហាម៉ាស បាននិយាយកាលពីថ្ងៃអង្គារថា សំណើរបស់អ៊ីស្រាអែលស្តីពីបទឈប់បាញ់នៅក្នុងសង្រ្គាមរបស់ពួកគេនៅហ្កាហ្សា មិនបានបំពេញតាមការទាមទាររបស់ក្រុមសកម្មប្រយុទ្ធប៉ាឡេស្ទីននោះទេ ប៉ុន្តែក្រុមនេះនឹងសិក្សាការផ្តល់ឲ្យពេលវេលាបន្ថែមទៀត និងផ្តល់ការឆ្លើយតបរបស់ខ្លួនទៅកាន់អ្នកសម្របសម្រួល។សំណើនេះ ត្រូវបានប្រគល់ទៅឱ្យចលនាអ៊ីស្លាមនិយមប៉ាឡេស្ទីន ដោយអ្នកសម្របសម្រួលមកពីប្រទេសអេហ្ស៊ីប និងកាតា ក្នុងកិច្ចពិភាក្សានៅទីក្រុងគែរ ប្រទេសអេហ្ស៊ីប ក្នុងគោលបំណងស្វែងរកច្រកចេញពីសង្គ្រាមដ៏មហន្តរាយនៅតំបន់ហ្កាហ្សាស្ទ្រីប ដែលបច្ចុប្បន្ននេះ ឈានចូលដល់ខែទីប្រាំពីររបស់ខ្លួន។

ប្រព័ន្ធផ្សព្វផ្សាយ៖ អ៊ីស្រាអែល ទិញតង់ចំនួន ៤០.០០០ តង់សម្រាប់ការជម្លៀសអ្នកក្រុង រ៉ាហ្វា

ប្រព័ន្ធផ្សព្វផ្សាយអ៊ីស្រាអែល បានរាយការណ៍កាលពីថ្ងៃអង្គារ (០៩ មេសា) ថា ក្រសួងការពារជាតិអ៊ីស្រាអែល កំពុងបញ្ជាទិញតង់ចំនួន ៤០.០០០ តង់ មុនពេលការជម្លៀសអ្នកស្រុកចេញពីទីក្រុង រ៉ាហ្វា (Rafah) ភាគខាងត្បូងនៃតំបន់ហ្កាហ្សា ដែលអ៊ីស្រាអែលបាននិយាយថា ខ្លួនគ្រោងនឹងវាយលុកដើម្បីបំផ្លាញកងវរសេនាតូចដែលនៅសេសសល់របស់ក្រុមសកម្មប្រយុទ្ធហាម៉ាស ប៉ុន្តែមិនបានបញ្ជាក់កាលបរិច្ឆេទ។មិនមានការបញ្ជាក់ភ្លាមៗពីក្រសួងការពារជាតិនៃការទិញនេះទេ ខណៈសារព័ត៌មាន ហ្សេរុយសាឡឹម បុស្តិ៍ (Jerusalem Post) ដែលជាប្រព័ន្ធផ្សព្វផ្សាយមួយក្នុងចំណោមផ្សព្វផ្សាយដែលបានរាយការណ៍ព័ត៌មាននេះ បាននិយាយថាដំណឹងនេះត្រូវបានបែកធ្លាយដោយពុំមានការប្រកាសជាផ្លូវការ។ព័ត៌មាននៃការគ្រោងទិញតង់ ដែលតង់នីមួយៗអាចស្នាក់នៅបានមនុស្ស ១២ នាក់នេះគឺជាសញ្ញាមួយក្នុងចំណោមសញ្ញាដំបូងនៃការរៀបចំជាក់ស្តែងសម្រាប់ការជម្លៀសក្រុងរ៉ាហ្វា ជាទីដែលប្រជាជនប៉ាឡេស្ទីនជាង ១ លាននាក់បានជ្រកកោន។នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានលើកឡើងម្តងហើយម្តងទៀតនូវផែនការដើម្បីលុកលុយទីក្រុងរ៉ាហ្វា ដែលជាទីក្រុងចុងក្រោយបង្អស់នៅតំបន់ហ្កាហ្សា ដែលមិនទាន់ប្រឈមមុខនឹងការវាយលុកដ៏ធំ។ នៅមុនពេលមានការវាយប្រហារណាមួយកើតឡើង យោធាអ៊ីស្រាអែលបាននិយាយថា ខ្លួននឹងជម្លៀសប្រជាជនស៊ីវិលទៅកាន់អ្វីដែលគេហៅថា «កោះមនុស្សធម៌» នៅភាគកណ្តាលហ្កាហ្សា ដោយផ្តល់អាហារ ទឹក និងបរិក្ខារពេទ្យដល់អ្នកដែលត្រូវការ៕

អ៊ីស្រាអែលនិយាយថា ជំនួយបន្ថែមទៀតកំពុងចូលក្នុងដែនដីហ្កាហ្សា ប៉ុន្តែចំនួនត្រូវបានជំទាស់

អ៊ីស្រាអែលនិយាយថា ជំនួយកំពុងសម្រុកចូលក្នុងដែនដីហ្កាហ្សាកាន់តែលឿន បន្ទាប់ពីសម្ពាធអន្តរជាតិកើនឡើងលើរដ្ឋាភិបាលរបស់លោកនាយករដ្ឋមន្ត្រី ណេតាន់យ៉ាហ៊ូ យ៉ាងណា ចំនួននេះត្រូវបានជំទាស់ ហើយអង្គការសហប្រជាជាតិនិយាយថា បរិមាណជំនួយនេះនៅតែតិចជាងចំនួនអប្បបរមាដើម្បីបំពេញតម្រូវការមនុស្សធម៌នៅឡើយ។អ៊ីស្រាអែល បាននិយាយថារថយន្តដឹកទំនិញចំនួន៤១៩គ្រឿង ដែលជាចំនួនខ្ពស់បំផុតចាប់តាំងពីជម្លោះបានចាប់ផ្តើម បានចូលទៅក្នុងតំបន់នេះកាលពីថ្ងៃចន្ទដើមសប្ដាហ៍នេះ ទោះបីជាអង្គការអឌ្ឍចន្ទក្រហមនិងអង្គការសហប្រជាជាតិ បានផ្តល់តួលេខទាបជាងនេះយ៉ាងណាក្ដី ដោយអង្គការសហប្រជាជាតិបាននិយាយថា ចំនួនរថយន្តមានត្រឹមតែពាក់កណ្តាលប៉ុណ្ណោះ ដោយសារតែច្បាប់អធិការកិច្ចរបស់អ៊ីស្រាអែល។ រយៈពេល៦ខែនៅក្នុងយុទ្ធនាការផ្លូវអាកាស និងថ្មើរជើងរបស់កងទ័ពអ៊ីស្រាអែល នៅក្នុងដែនដីហ្កាហ្សា ដែលបង្កឡើងដោយការវាយប្រហារថ្ងៃទី ៧ ខែតុលា ពីសំណាក់ក្រុមហាម៉ាស លើភាគខាងត្បូងអ៊ីស្រាអែល ដែនដីប៉ាឡេស្ទីន ត្រូវបានអ៊ីស្រាអែលឡោមព័ទ្ធនេះ បានមើលឃើញការបំផ្លិចបំផ្លាញ ឈានដល់ការប្រឈមគ្រោះទុរ្ភិក្ស និងជំងឺរាតត្បាត ស្របពេលប្រជាជនស្ទើរតែទាំងអស់នៅពេលបច្ចុប្បន្ននេះគ្មានផ្ទះសម្បែង។ ទីភ្នាក់ងារជំនួយបានត្អូញត្អែរថា អ៊ីស្រាអែលពុំបានធានាឱ្យមានលទ្ធភាពគ្រប់គ្រាន់សម្រាប់អាហារ ឱសថ និងការផ្គត់ផ្គង់មនុស្សធម៌ដែលត្រូវការចាំបាច់ផ្សេងទៀតនោះទេ ហើយប្រធានគោលនយោបាយការបរទេសរបស់សហភាពអឺរ៉ុបលោក Josep Borrell បានចោទប្រកាន់ថា អ៊ីស្រាអែលបានប្រើប្រាស់ភាពអត់ឃ្លានជាអាវុធនៃសង្គ្រាម។ អ្នកនាំពាក្យទីភ្នាក់ងារមនុស្សធម៌របស់អង្គការសហប្រជាជាតិ អូឆា (OCHA) លោក ជែនស៍ឡេអើគី (Jens Laerke) ក៏បានចង្អុលបង្ហាញអំពីការរឹតបន្តឹងធ្ងន់ធ្ងរលើការផ្តល់ជំនួយនៅខាងក្នុងតំបន់ហ្កាហ្សានេះដែរកាលពីខែមុន ដោយនិយាយថា អ៊ីស្រាអែល បានបដិសេធប្រហែល៣លើក មិនព្រមឲ្យក្បួនពាក់កណ្តាលដែលខ្លួនព្យាយាមបញ្ជូនទៅកាន់ភាគខាងជើងកាលពីខែមីនា រួមទាំងក្បួនជំនួយរបស់អង្គការសហប្រជាជាតិចូលទេ៕

ក្រុមហេសបូឡា បានបាញ់ទម្លាក់យានដ្រូនតម្លៃ៥លានដុល្លាររបស់អ៊ីស្រាអែល

ក្រុមយុទ្ធជនហេសបូឡា (Hezbollah) បានបាញ់ទម្លាក់យានដ្រូនដែលមានតម្លៃប្រមាណ ៥លានដុល្លាររបស់អ៊ីស្រាអែល។ សារព័ត៌មាន Al Mayadeen របស់អ៊ីរ៉ង់ បានរាយការណ៍ថា វីដេអូនៃឧបទ្ទវហេតុដែលត្រូវបានបង្ហោះនៅលើប្រព័ន្ធផ្សព្វផ្សាយសង្គម បានបង្ហាញពីយានដ្រូនដែលកំពុងឆេះ ដោយបានធ្លាក់មកដីលើ នៅក្នុងប្រទេសលីបង់។ក្រុមហេសបូឡា បានអះអាងថា យានដ្រូននេះ គឺម៉ូដែល Hermes 900។កងកម្លាំងការពារអ៊ីស្រាអែល (IDF) បាននិយាយថា ជាការឆ្លើយតប អ៊ីស្រាអែល បានធ្វើការវាយប្រហារតាមអាកាសប្រឆាំងនឹងទីតាំងចំនួនបី ដែលពាក់ព័ន្ធនឹងការការពារដែនអាកាសរបស់ក្រុមហេសបូឡា នៅស្រុកបាអាល់បែក ( Baalbek) ភាគឦសាននៃប្រទេសលីបង់។ការវាយប្រហារនេះ បានកើតឡើង នៅពេលដែលលោក Nabih Berri ប្រធានសភាលីបង់ បានចោទប្រកាន់អ៊ីស្រាអែលថា មានចេតនាចង់ «ទាក់ទាញ» ទីក្រុងបេរូត (Beirut)ឲ្យចូលទៅក្នុងសង្រ្គាម ចំពេលមានការព្រមានពីមន្ត្រីអង្គការសហប្រជាជាតិថា ការប៉ះទង្គិចគ្នានៅតាមព្រំដែនអ៊ីស្រាអែល-លីបង់ «ត្រូវតែបញ្ឈប់» «ខណៈពេលដែលនៅតែមានឱកាសសម្រាប់ផ្លូវការទូត»។

ខែមីនាជាខែក្ដៅបំផុតលើកំណត់ត្រារបស់ពិភពលោក ដោយសារកត្តាបម្រែបម្រួលអាកាសធាតុ

ទីភ្នាក់ងារតាមដានបម្រែបម្រួលអាកាសធាតុបាននិយាយនៅថ្ងៃអង្គារទី៩ខែមីនានេះ ថា ពិភពលោកទើបតែបានជួបប្រទះការហក់ឡើងសីតុណ្ហភាពក្ដៅបំផុតក្នុងខែមីនាលើកំណត់ត្រារបស់ពិភពលោកជាខែក្ដៅបំផុតក្នុងរយៈពេល១០ខែដែលគ្រប់ខែនីមួយៗ បានកើនឡើងសីតុណ្ហភាពខ្ពស់បំផុតថ្មីៗ ។ ទីភ្នាក់ងារតាមដានបម្រែបម្រួលអាកាសធាតុ កូភើនីកាស (Copernicus) ឬ(C3S) របស់សហភាពអឺរ៉ុប បាននិយាយនៅក្នុងព្រឹត្តិបត្រប្រចាំខែមួយថា ក្នុងរយៈពេល១០ខែចុងក្រោយនីមួយៗ ជាប់ចំណាត់ថ្នាក់ជាខែក្តៅបំផុតរបស់ពិភពលោក បើធៀបនឹងខែដូចគ្នាកាលពីឆ្នាំមុន។ C3S បាននិយាយថាខែមីនាបានជាប់ចំណាត់ថ្នាក់ជាខែមានអាកាសធាតុក្តៅបំផុតមិនធ្លាប់មានរបស់ភពផែនដីក្នុងរយៈពេល ១២ ខែ។ ចាប់ពីខែមេសា ឆ្នាំ២០២៣ ដល់ខែមីនា ឆ្នាំ២០២៤ សីតុណ្ហភាពជាមធ្យមរបស់ពិភពលោកគឺ ១,៥៨ អង្សាសេ លើសពីកម្រិតមធ្យមភាគក្នុងសម័យមុនឧស្សាហកម្មឆ្នាំឆ្នាំ១៨៥០ ដល់១៩០០។នាយករងទីភ្នាក់ងារ C3S លោកស្រីសាម៉ាន់តា ប៊ើហ្គេស(Samantha Burgess)បានស្រាប់សារព័ត៌មាន Reuters កាលពីថ្ងៃចន្ទ ៨មេសា ថា និន្នាការរយៈពេលវែងជាមួយនឹងកំណត់ត្រាពិសេស បានធ្វើឱ្យពួកគេមានការព្រួយបារម្ភយ៉ាងខ្លាំង ។ការចងក្រងទិន្នន័យរបស់ទីភ្នាក់ងារ C3S កាលពីឆ្នាំ ១៩៤០ ដែលក្រុមអ្នកវិទ្យាសាស្ត្រឆ្លងកាត់ការត្រួតពិនិត្យជាមួយនឹងទិន្នន័យផ្សេងទៀត បានបញ្ជាក់ថាខែមុនគឺជាខែមីនា ជាខែក្តៅបំផុតចាប់តាំងពីសម័យមុនឧស្សាហកម្មមក។ កាលពីឆ្នាំ២០២៣កន្លងទៅនេះ គឺជាឆ្នាំក្តៅបំផុតរបស់ភពផែនដីក្នុងកំណត់ត្រាពិភពលោក ចាប់តាំងពីឆ្នាំ១៨៥០មក ។ គ្រោះរាំងស្ងួតដែលជំរុញដោយបម្រែបម្រួលអាកាសធាតុ និងបាតុភូតអេល នីញ៉ូ នៅក្នុងតំបន់ព្រៃអាម៉ាហ្សូនបានធ្វើឱ្យមានភ្លើងឆេះព្រៃក្នុងប្រទេសវេណេហ្ស៊ុយអេឡា ចាប់ពីខែមករាដល់ខែមីនា ខណៈគ្រោះរាំងស្ងួតនៅអាហ្វ្រិកខាងត្បូងបានបំផ្លាញដំណាំ និងធ្វើឱ្យមនុស្សរាប់លាននាក់ប្រឈមភាពអត់ឃ្លាន៕

ភាគខាងត្បូងនៃទ្វីបអាហ្វ្រិក ប្រឈមនឹងភាពអត់ឃ្លាន ដោយសារគ្រោះរាំងស្ងួតបំផ្លាញដំណាំ

ភាគខាងត្បូងនៃទ្វីបអាហ្រ្វិក កំពុងវិលត្រលប់ទៅរកគ្រោះរាំងស្ងួតដ៏អាក្រក់បំផុតរបស់ខ្លួនក្នុងរយៈពេលប៉ុន្មានឆ្នាំមកនេះ ដោយសារតែការរួមបញ្ចូលគ្នានៃបាតុភូតអាកាសធាតុ អ៊ែលនីញ៉ូ (El Nino) ដែលកើតឡើងដោយធម្មជាតិ នៅពេលដែលការឡើងកម្ដៅមិនធម្មតានៃទឹកនៅប៉ាស៊ីហ្វិកភាគខាងកើតបញ្ចេញកម្ដៅទៅក្នុងខ្យល់ដែលនាំឱ្យអាកាសធាតុកាន់តែក្តៅនៅទូទាំងពិភពលោក និងសីតុណ្ហភាពជាមធ្យមខ្ពស់ខ្លាំងដោយសារការបំភាយឧស្ម័នផ្ទះកញ្ចក់។អាកាសធាតុនៅទូទាំងពិភពលោកបានបង្កើតកំណត់ត្រាខ្ពស់បំផុតនៅឆ្នាំ២០២៣ ដោយសារបម្រែបម្រួលអាកាសធាតុ ដែលបានពង្រីកឥទ្ធិពលពីគំរូអាកាសធាតុ អ៊ែលនីញ៉ូ។ ការសិក្សាមួយកាលពីខែតុលា ឆ្នាំមុន បានលើកឡើងថា បម្រែបម្រួលអាកាសធាតុឥឡូវនេះអាចជាកត្តាសំខាន់ក្នុងការបង្កឱ្យមានលក្ខខណ្ឌ អ៊ែលនីញ៉ូ ដែលជាបាតុភូតធម្មជាតិដូចជាកាំរស្មីព្រះអាទិត្យក្ដៅខ្លាំងជាដើម។ទីភ្នាក់ងារជំនួយ អកស៍ហ្វាម (Oxfam) បានព្រមានកាលពីសប្តាហ៍មុនថា មនុស្សជាង ២៤ លាននាក់នៅទ្វីបអាហ្វ្រិកខាងត្បូងប្រឈមនឹងភាពអត់ឃ្លាន កង្វះអាហារូបត្ថម្ភ និងកង្វះទឹកដោយសារតែគ្រោះរាំងស្ងួត។ ប្រជាជននៅតំបន់ដែលប៉ះពាល់ដោយគ្រោះរាំងស្ងួត កំពុងជួបការលំបាកដើម្បីរស់រានមានជីវិត ដោយសារដំណាំភាគច្រើននៅជុំវិញតំបន់នោះត្រូវបានងាប់អស់លើដីដាំដុះដែលស្ងួតហួតហែង ដោយសារគ្រោះរាំងស្ងួតដែលកំពុងបំផ្លាញទ្វីបអាហ្វ្រិកខាងត្បូង៕

ហ្វីលីពីន ព្រមានពីកម្រិតដ៏គ្រោះថ្នាក់នៃសីតុណ្ហភាព ដែលអាចឡើងរហូតដល់ ៥១ អង្សាសេ

ការិយាល័យអាកាសធាតុរដ្ឋនៃប្រទេសហ្វីលីពីន កាលពីថ្ងៃចន្ទ (០៨ មេសា) បានព្រមានអំពីសន្ទស្សន៍កម្ដៅដ៏ក្តៅគគុករហូតដល់ ៥១ អង្សាសេ នៅក្នុងតំបន់យ៉ាងហោចណាស់ចំនួន ៩ នៅទូទាំងប្រទេស។ ការិយាល័យរដ្ឋបាននិយាយថា តំបន់ចំនួនប្រាំបួននៅក្នុងប្រទេសហ្វីលីពីន ត្រូវបានចាត់ថ្នាក់មាន «គ្រោះថ្នាក់ខ្លាំង» ដែលអាចមានសីតុណ្ហភាពចាប់ពី ៤២ ដល់ ៥១ អង្សាសេ។ចំណែកប្រទេសអាស៊ីអាគ្នេយ៍ដែលនៅសេសសល់ជាច្រើនទៀត កំពុងស្ថិតនៅក្រោម «ការប្រុងប្រយ័ត្នជាខ្លាំង» ដោយមានសីតុណ្ហភាពចាប់ពី ៣៣ ទៅ ៤១ អង្សាសេ។ តំបន់ដែលមានសន្ទស្សន៍កម្ដៅកម្រិតគ្រោះថ្នាក់ទំនងជានឹងជួបប្រទះអាកាសធាតុក្តៅក្រហល់ក្រហាយ និងអស់កម្លាំងខ្លាំង ដែលអាចបណ្ដាលឱ្យមានអាការៈថប់ដង្ហើមសន្លប់ដោយសារក្ដៅខ្លាំង ឬហៅម៉្យាងទៀតថា ជំងឺសុរិយរោគ (Heatstroke)។ដើម្បីជៀសវាងផលវិបាកដែលអាចកើតមានពីកម្ដៅខ្លាំង ការិយាល័យអាកាសធាតុហ្វីលីពីន បានណែនាំសាធារណជនឱ្យកាត់បន្ថយសកម្មភាពក្រៅផ្ទះ និងផឹកទឹកឱ្យបានច្រើន។ រដ្ឋាភិបាលបានអនុញ្ញាតឱ្យសាលារៀនធ្វើការសិក្សាតាមអនឡាញជាជាងការរៀនទល់មុខគ្នា ដើម្បីការពារសិស្ស ជាពិសេសកុមារពីសន្ទស្សន៍កម្ដៅដ៏ខ្ពស់នេះ៕

ការស៊ើបអង្កេតការវាយប្រហារសាលប្រគំតន្ត្រីក្រុងមូស្គូ បង្ហាញការជាប់ពាក់ព័ន្ធរបស់ជនសង្ស័យជាមួយទីភ្នាក់ងារចារកម្មអ៊ុយក្រែន

គណៈកម្មាធិការស៊ើបអង្កេតរបស់រុស្ស៊ី បាននិយាយកាលពីថ្ងៃចន្ទទី៨មេសា សប្ដាហ៍នេះ ថាការស៊ើបអង្កេតរបស់ខ្លួនលើការវាយប្រហារក្នុងសាលប្រគំតន្ត្រី នៅជាយទីក្រុងមូស្គូ បានផ្តល់ភស្តុតាងសំខាន់ៗដែលបង្ហាញថាការងាររៀបចំរបស់ក្រុមជនសង្ស័យឧក្រិដ្ឋកម្ម មានទំនាក់ទំនងជាមួយទីភ្នាក់ងារចារកម្មរបស់ប្រទេសអ៊ុយក្រែន។ការបាញ់ប្រហារនៅសាលប្រគំតន្ត្រី ក្រូកាសស៊ីរីហល (Crocus City Hall) កាលពីថ្ងៃសុក្រទី២២មីនា ២០២៤ បន្ទាប់មកមានភ្លើងឆេះយ៉ាងសន្ធោសន្ធៅ បណ្តាលឲ្យមនុស្សយ៉ាងហោចណាស់ ១៤៤នាក់បានស្លាប់ និង ៥៥១នាក់ ផ្សេងទៀតបានរងរបួស។តាមសេចក្ដីប្រកាស បានឲ្យដឹងថា គណៈកម្មាធិការស៊ើបអង្កេត របស់ប្រទេសនេះ នៅតែបន្តកំណត់អត្តសញ្ញាណជនរងគ្រោះនៅឡើយ។ទីភ្នាក់សន្តិសុខសហព័ន្ធរបស់រុស្ស៊ី បានប្រកាសថ្មីៗនេះថា ខ្លួនបានឃាត់ខ្លួនជនសង្ស័យចំនួន ១១នាក់ ក្នុងនោះ ៤នាក់ បានធ្វើសកម្មភាពវាយប្រហារដោយផ្ទាល់។រុស្ស៊ីធ្លាប់បានលើកឡើងថា ការវាយប្រហារភេរវកម្មនេះ មានទំនាក់ទំនងទៅនឹងអ៊ុយក្រែន ជាការអះអាងដែលអ៊ុយក្រែនបានបដិសេធម្តងហើយម្តងទៀត មិនត្រឹមតែប៉ុណ្ណោះរដ្ឋបាលលោកប្រធានាធិបតីPutin នៅតែចោទថា អាមេរិក និងសម្ព័ន្ធមិត្តនៅអឺរ៉ុបជាប់ពាក់ ព័ន្ធការការវាយប្រហារនេះ ទោះប្រទេសទាំងនោះបានទាត់ចោលក៏ដោយ៕

ក្រុមនិស្សិតតវ៉ានៅម៉ិកស៊ិក បានដុតអគាររដ្ឋាភិបាល ក្នុងពេលមានកំហឹងជុំវិញការស្លាប់និស្សិតម្នាក់

ក្រុមបាតុករជានិស្សិតនៅប្រទេសម៉ិកស៊ិក បានដុតអគាររដ្ឋាភិបាល កាលពីថ្ងៃចន្ទ បន្ទាប់ពីពួកគេបានគប់គ្រាប់បែកសាំង ក្នុងពេលមានកំហឹងជុំវិញការស្លាប់របស់និស្សិតម្នាក់។ក្រុមនិស្សិត បានវាយប្រហារទៅលើវិមានរដ្ឋាភិបាល របស់លោក ហ្គូរ៉េរ៉ូ(Guerrero) ក្នុងទីក្រុង ឈីលប៉ានស៊ីនហ្គោ( Chilpancingo) និងបានដុតរថយន្តជាច្រើនគ្រឿង។ក្រុមនិស្សិតកំពុងតវ៉ា ទាមទាររកយុត្តិធម៌សម្រាប់និស្សិតឈ្មោះ យ៉ានហ្គី កូថាន ហ្គូម៉េស (Yanqui Kothan Gomez)។ Gomez តាមសេចក្តីរាការណ៍ថាបានស្លាប់បន្ទាប់ពីនគរបាលរដ្ឋ បានបើកការបាញ់រះទៅលើរថយន្តដែលគាត់ដែលកំពុងធ្វើដំណើរ។ក្រុមអ្នកតវ៉ា មានកំហឹងចំពោះការខ្វះដំណើរការនៃការស្លាប់របស់និស្សិត Gomez ។ការស្លាប់របស់ និស្សិត Gomez បានកើតឡើងមួយថ្ងៃបន្ទាប់ពីក្រុមមួយ ធ្វើការតវ៉ាចំពោះការបាត់ខ្លួនសិស្សចំនួន ៤៣ នាក់នៅក្នុងប្រទេសម៉ិកស៊ិក កាលពីក្នុងឆ្នាំ ២០១៤ ។

បណ្ដាញសង្គម

ព័ត៌មានថ្មីៗ

លោកជំទាវលីម ដារ៉ែន ជួន ណារិន្ទ ផ្តល់ម៉ូតូ២០គ្រឿង និងអំណោយមួយចំនួន ទៅកាន់វរៈនគរបាល និងកងទ័ពការពារព្រំដែន

ក្រុមការងាររាជរដ្ឋាភិបាលចុះមូលដ្ឋានឃុំកណ្តឹងស្រុកបាទី ខេត្តតាកែវនិងរដ្ឋបាលឃុំកណ្តឹងប្រារព្វពិធីផ្សព្វផ្សាយពីបញ្ហាគ្រឿងញៀន និង ពិធីបង្សុកូលឧទ្ទិសកុសលដល់វិញ្ញាណក្ខន្ធវិរះកងទ័ពកម្ពុជាដែលបានពលីជីវិតក្នុងសមរភូមិ

ហ្វីលីពីន និងអូស្ត្រាលី ចាប់ផ្តើមសមយុទ្ធដ៏ធំបំផុតមិនធ្លាប់មាន នៅជិតសមុទ្រចិនខាងត្បូង

ទីក្រុងគីវ៖ រុស្ស៊ីបាញ់យាន ៨៥គ្រឿង និងមីស៊ីល ១គ្រាប់ លើអ៊ុយក្រែន ប៉ុន្មានម៉ោងក្រោយមានជំនួប Trump-Putin

ផ្ទុះរោងចក្រ នៅតំបន់ Ryazan របស់រុស្ស៊ី បណ្ដាលឲ្យមនុស្ស ១១នាក់ស្លាប់ និង ១៣០នាក់របួស

នាយករដ្ឋមន្ត្រីដាណឺម៉ាក និយាយថា លោក Netanyahu បានប្រែទៅជាបង្ក «បញ្ហាដោយខ្លួនលោកផ្ទាល់»

ឯកឧត្តមសាស្ត្រាចារ្យ ប៉ិច សុធី អញ្ជើញបើកសន្និសីទប្រចាំឆ្នាំលើកទី១ របស់សមាគមគ្រូពេទ្យបង្កកំណើតកម្ពុជា

មេដឹកនាំអឺរ៉ុបស្វាគមន៍កិច្ចប្រឹងប្រែងរបស់លោក Trump ប៉ុន្តែបញ្ជាក់ថា សម្ពាធលើរុស្ស៊ី ត្រូវតែមានបន្ត

មេភូមិភាគ៣កម្ពុជាស្នើថៃជៀសវាងសកម្មភាពទាំងឡាយដែលនាំឲ្យមានភាពតានតឹងនៅតាមព្រំដែនជាយថាហេតុ

[UPDATE] ក្រុមអ្នកជួយសង្គ្រោះប៉ាគីស្ថាន ពិបាកស្រង់សាកសព ក្រោយភ្លៀងរដូវមូសុង សម្លាប់មនុស្សយ៉ាងតិច ៣២០នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877