BTV NEWS

ចាប់ខ្លួនជនសង្ស័យ៥នាក់ពាក់ពន្ធ័ករណីចាប់ ឃុំឃាំង និងបង្ខាំងមនុស្សដោយខុសច្បាប់

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

សន្តិសុខ និង សង្គម

កំហឹងពុះកញ្ជ្រោលឡើងក្នុងចំណោមអ្នកស្រុក ស្របពេលទឹកជំនន់ធ្ងន់ធ្ងរនៅតំបន់ Urals របស់រុស្ស៊ី

យ៉ាងហោចណាស់មានជនជាតិរុស្ស៊ី ១០០ នាក់បានសុំជំនួយពីលោកប្រធានាធិបតី វ្ល៉ាឌីមៀ ពូទីន កាលពីថ្ងៃចន្ទ (០៨ មេសា) នៅក្នុងទីក្រុងមួយដែលត្រូវបានវាយប្រហារដោយទឹកជំនន់ដ៏អាក្រក់បំផុតមិនធ្លាប់មានក្នុងកំណត់ត្រា ដោយស្រែកថា «អ្នកឯងគ្មានភាពខ្មាស់អៀន» ទៅកាន់ក្រុមមន្ត្រីក្នុងតំបន់ ដែលពួកគេបាននិយាយថា បានធ្វើតិចតួចពេកក្នុងការជួយដល់ស្ថានភាពរបស់ពួកគេ ខណៈមនុស្សជាង ៦ ពាន់នាក់ត្រូវបង្ខំឱ្យជម្លៀស។ប្រទេសរុស្ស៊ី បានប្រកាសភាពអាសន្ននៅក្នុងតំបន់ អូរិនប៊ឺក (Orenburg) ក្បែរប្រទេសកាហ្សាក់ស្ថាន បន្ទាប់ពីទឹកនៅទន្លេ អ៊ូរ៉ល់ស៍ (Urals) ដែលជាទន្លេវែងជាងគេទីបីរបស់អឺរ៉ុប បានហក់ឡើងខ្ពស់ជាច្រើនម៉ែត្រក្នុងរយៈពេលប៉ុន្មានម៉ោងកាលពីថ្ងៃសុក្រ ហើយបានផ្ទុះឡើងតាមទំនប់វារីអគ្គិសនីក្នុងទីក្រុង អសស្ក៍ (Orsk)។ដោយសារទ្រព្យសម្បត្តិរបស់ពួកគេត្រូវបានបំផ្លាញ ឬខូចខាតយ៉ាងធ្ងន់ធ្ងរ អ្នកស្រុកមួយចំនួនមិនសប្បាយចិត្តនឹងសំណងដែលផ្តល់ដោយអាជ្ញាធរនោះទេ។ អ្នកខ្លះក៏មិនសប្បាយចិត្តដែរ ដែលទំនប់វារីអគ្គិសនីដែលបានសាងសង់ក្នុងឆ្នាំ ២០១០ មិនអាចការពារទីក្រុងរបស់ពួកគេបាន។លំនៅឋានជាង ១០.៤០០ ខ្នងនៅទូទាំងប្រទេសរុស្ស៊ី ត្រូវបានជន់លិច ដោយតំបន់ អ៊ូរ៉ល់ស៍ (Urals) ស៊ីបេរី (Siberia) តំបន់វ៉ុលហ្កា (Volga) និងតំបន់កណ្តាលជាច្រើនទៀត ទទួលរងផលប៉ះពាល់ខ្លាំងជាងគេ។ ភ្លាមៗនោះគេមិនទាន់ដឹងច្បាស់ទេថា ហេតុអ្វីបានជាទឹកជំនន់ឆ្នាំនេះអាក្រក់ខ្លាំងម្ល៉េះ ព្រោះការរលាយព្រិលទឹកកកគឺជាព្រឹត្តិការណ៍ធម្មតាប្រចាំឆ្នាំប៉ុណ្ណោះនៅក្នុងប្រទេសរុស្ស៊ី៕

ការចរចាបទឈប់បាញ់ហ្កាហ្សា នៅតែជាប់គាំង ខណៈអ៊ីស្រាអែលកំណត់ថ្ងៃវាយលុកក្រុង រ៉ាហ្វា

ក្រុមហាម៉ាស បានច្រានចោលសំណើបទឈប់បាញ់របស់អ៊ីស្រាអែល ដែលបានធ្វើឡើងនៅក្នុងកិច្ចពិភាក្សានៅទីក្រុងគែរ នេះបើយោងតាមមន្ត្រីជាន់ខ្ពស់ម្នាក់របស់ហាម៉ាស បាននិយាយកាលពីថ្ងៃចន្ទ (០៨ មេសា) ហើយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា កាលបរិច្ឆេទមួយត្រូវបានកំណត់រួចហើយសម្រាប់ការលុកលុយក្រុង រ៉ាហ្វា (Rafah) ដែលជាជម្រកចុងក្រោយនៅក្នុងតំបន់ហ្កាហ្សា សម្រាប់ប្រជាជនភៀសខ្លួនប៉ាឡេស្ទីន។អ៊ីស្រាអែល និងក្រុមហាម៉ាស បានបញ្ជូនក្រុមរៀងៗខ្លួនទៅអេហ្ស៊ីប កាលពីថ្ងៃអាទិត្យ សម្រាប់កិច្ចពិភាក្សាដែលរួមមានអ្នកសម្របសម្រួលកាតា និងអេហ្ស៊ីប ព្រមទាំងនាយកទីភ្នាក់ងារចារកម្មកណ្ដាល CIA របស់អាមេរិក លោក វីលៀម ប៊ឺនស៍ (William Burns)។ វត្តមានរបស់លោក ប៊ឺនស៍ បានគូសបញ្ជាក់ពីការកើនឡើងសម្ពាធពីសម្ព័ន្ធមិត្តសំខាន់របស់អ៊ីស្រាអែល គឺសហរដ្ឋអាមេរិក សម្រាប់កិច្ចព្រមព្រៀងមួយដែលនឹងដោះលែងចំណាប់ថ្នូរអ៊ីស្រាអែល និងទទួលបានជំនួយដល់ជនស៊ីវិលប៉ាឡេស្ទីន។ព័ត៌មានលម្អិតនៃសំណើបទឈប់បាញ់នេះមិនត្រូវបានគេដឹងភ្លាមៗនោះទេ។ ទន្ទឹមនឹងនេះ លោក ណេតាន់យ៉ាហ៊ូ បាននិយាយថា «ជ័យជម្នះនេះតម្រូវឱ្យមានការចូលទៅក្នុងក្រុង រ៉ាហ្វា ហើយកាលបរិច្ឆេទបានកំណត់រួចរាល់» ប៉ុន្តែលោកមិនបានបញ្ជាក់ពីកាលបរិច្ឆេទនោះទេ។ក្រុង រ៉ាហ្វា គឺជាជម្រកចុងក្រោយសម្រាប់ជនស៊ីវិលប៉ាឡេស្ទីន ដែលផ្លាស់ទីលំនៅដោយការទម្លាក់គ្រាប់បែកឥតឈប់ឈររបស់អ៊ីស្រាអែល ដែលបានធ្វើឱ្យលំនៅឋានរបស់ពួកគេរាបស្មើក្លាយជាផេះផង់។ អ៊ីស្រាអែលនិយាយថា ក្រុង រ៉ាហ្វា នេះគឺជាជម្រកសង្ស័យដ៏សំខាន់ចុងក្រោយរបស់អង្គភាពប្រយុទ្ធរបស់ក្រុមហាម៉ាស ដែលខ្លួនត្រូវតែលុបបំបាត់៕

មន្ទីរប្រឆាំងគ្រឿងញៀន ចុះបង្ក្រាបបទល្មើសគ្រឿងញៀន ឃាត់មនុស្ស២នាក់ រឹបអូសថ្នាំញៀនជាង ១៧គីឡូក្រាម នៅរាជធានីភ្នំពេញ

ភ្នំពេញ៖ អនុវត្តតាមបញ្ជារបស់ឯកឧត្តម នាយឧត្ដមសេនីយ៍ ស ថេត អគ្គស្នងការនគរបាលជាតិ, ឯកឧត្តម ឧត្តមសេនីយ៍ឯក ប៊ុនប៉ា ម៉ារីលុច អគ្គស្នងការរង ទទួលដឹកនាំការងារជំនាញមន្ទីរប្រឆាំងគ្រឿងញៀន និងឯកឧត្តម ឧត្ដមសេនីយ៍ឯក ព្រុំ សន្ធរ អគ្គស្នងការរង ទទួលសហការដឹកនាំការងារប្រឆាំងគ្រឿងញៀន ក្រោមការបញ្ជាដឹកនាំផ្ទាល់ របស់ឯកឧត្តម ឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន កាលពីថ្ងៃទី០៥ ខែមេសា ឆ្នាំ២០២៤ ម៉ោង១៧៖២០នាទី កម្លាំងជំនាញនៃមន្ទីរប្រឆាំងគ្រឿងញៀន (ក៦) សហការជាមួយកម្លាំងស្នងការដ្ឋាននគរបាលរាជធានីភ្នំពេញ ដោយមានការដឹកនាំ និងសម្របសម្រួលពីលោក គឹម ហុងសាន ព្រះរាជ្ញារងអមសាលាដំបូងរាជធានីភ្នំពេញ បានចុះស្រាវជ្រាវស៊ើបអង្កេត រហូតឈានទៅបង្ក្រាបករណីរក្សាទុក ជួញដូរដោយខុសច្បាប់នូវសារធាតុញៀន នៅ០២គោលដៅ៖ គោលដៅទី០១ មុខខារ៉ាអូខេធូស៊ីសធើ (Two sister) ផ្លូវបេតុង សង្កាត់ទួលសង្កែ ខណ្ឌឬស្សីកែវ និងគោលដៅទី២ បន្ទប់ជួលលេខ១១ ផ្លូវបេតុង ភូមិបាក់ទូក សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។កម្លាំងជំនាញឃាត់ខ្លួនជនល្មើស២នាក់ ទី១៖ ឈ្មោះ គ្រុយ សុខផាត ភេទប្រុស ជនជាតិខ្មែរ ឆ្នាំកំណើត១៩៨១ និងទី២៖ ឈ្មោះ ក្រាយ ស្រីមុំ ភេទស្រី ជនជាតិខ្មែរ ឆ្នាំកំណើត១៩៨២។ វត្ថុតាងចាប់យកបានរួមមាន៖ សារធាតុញៀនប្រភេទ មេតំហ្វេតាមីន (ICE) ទម្ងន់១៥គីឡូ ១៩៤ក្រាម, សារធាតុញៀនប្រភេទ អ៊ិចស្តាស៊ី (MDMA) ទម្ងន់១គីឡូ ៣៩៩.៩៦ក្រាម, សារធាតុញៀនប្រភេទ កេតាមីន (Ketamine) ទម្ងន់ ៥៥៤ក្រាម។ សារធាតុញៀនសរុបទម្ងន់ ១៧គីឡូ ១៤៧.៩៦ក្រាម និងសារធាតុមិនច្បាស់ ទម្ងន់ ៨៥២.៣១ ក្រាម។បច្ចុប្បន្នជនល្មើសទាំង២នាក់ និងវត្ថុតាងត្រូវបានកម្លាំងជំនាញកសាងសំណុំរឿងបញ្ជូន ទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ និងបន្តស្រាវជ្រាវដើម្បីតាមរកមេខ្លោង និងអ្នកពាក់ព័ន្ធផ្សេងទៀត មកផ្តន្ទាទោសតាមច្បាប់៕

ម៉ិកស៊ិក ស្វាគមន៍បុគ្គលិកស្ថានទូតនៅអេក្វាឌ័រមកប្រទេសវិញ បន្ទាប់ពីការវាយឆ្មក់ប្រដាប់អាវុធ

ប្រទេសម៉ិកស៊ិក បានស្វាគមន៍ការវិលត្រឡប់របស់បុគ្គលិកស្ថានទូតនៅប្រទេសអេក្វាឌ័ររបស់ខ្លួនរយៈពេលពីរថ្ងៃបន្ទាប់ពីនគរបាល បានឆ្មក់ចូលអគារក្នុងសកម្មភាពមួយ ដែលបង្កឱ្យមានការកាត់ផ្តាច់ផ្នែកការទូតភ្លាមៗខណៈបង្កឱ្យមានការភ្ញាក់ផ្អើលជាសកលនិងការថ្កោលទោសដល់ប្រទេសនៅអាមេរិកខាងត្បូងមួយនេះ។នគរបាល និងទាហានប្រទេសអេក្វាឌ័រ បានបង្ខំចូលទៅក្នុងស្ថានទូតរបស់ប្រទេសម៉ិកស៊ិក ក្នុងទីក្រុង ហ្គីតូ(Quito) កាលពីយប់ថ្ងៃសុក្រ ដើម្បីចាប់ខ្លួនអតីតអនុប្រធានាធិបតី លោក Jorge Glas ដែលបានភៀសខ្លួននៅទីនោះ អស់រយៈពេលជាច្រើនខែ បន្ទាប់ពីមន្ត្រីម៉ិកស៊ិកបានផ្តល់ការការពារសិទ្ធិជ្រកកោនផ្លូវការដល់លោក។ ប្រទេសអេក្វាឌ័រ បានអះអាងថា ការផ្តល់សិទ្ធិជ្រកកោនដល់លោក Glas គឺជាការខុសច្បាប់ ជាអ្នកដែលត្រូវបានកាត់ទោសពីរដង ពីបទពុករលួយ។នៅអាកាសយានដ្ឋានធំនៅរដ្ឋធានីប្រទេសម៉ិកស៊ិក រដ្ឋមន្ត្រីការបរទេស លោកស្រី អាលីសៀ បាសេណា(Alicia Barcena) បានបានរិះគន់យ៉ាងខ្លាំងចំពោះការឆ្មក់ចូលស្ថានទូតរបស់ប្រទេសអេក្វាឌ័រ និងបានសរសើរបុគ្គលិកការទូតដែលបានការពារស្ថានទូត។ឯកអគ្គរដ្ឋទូត ម៉ិកស៊ិក ប្រចាំប្រទេសអេក្វាឌ័រ លោក រ៉ាហ្គែល សឺរូ(Raquel Serur) បាននិយាយថាប្រធានាធិបតីអេក្វាឌ័រ លោក ណូបាវ បានធ្វើឲ្យមានកំហុសដោយការសម្រេចចិត្ត ដែលមិនត្រឹមតែបែកបាក់ជាមួយអនុសញ្ញាអន្តរជាតិដែលបានបង្កើតឡើងទាំងអស់ប៉ុណ្ណោះទេ ប៉ុន្តែវាក៏បង្ហាញពីការមិនអើពើចំពោះការពិតរបស់ប្រទេសលោក ផងដែរ។

ចំនួនអ្នកស្លាប់ប៉ាឡេស្ទីន ពីការវាយប្រហាររបស់អ៊ីស្រាអែលនៅហ្កាហ្សា ឡើងដល់ជិត ៣៣.២០០ នាក់

ក្រសួងសុខាភិបាលនៅហ្កាហ្សា បានប្រកាសកាលពីថ្ងៃអាទិត្យ (០៧ មេសា) ថាចំនួនអ្នកស្លាប់របស់ប៉ាឡេស្ទីន នៅក្នុងការវាយប្រហារដ៏បង្ហូរឈាមរបស់អ៊ីស្រាអែល បានកើនឡើងដល់ជិត ៣៣.២០០ នាក់។ ក្រសួងបាននិយាយនៅក្នុងសេចក្តីថ្លែងការណ៍មួយថា ក្នុងរយៈពេល ២៤ ម៉ោងកន្លងមកនេះ កងទ័ពអ៊ីស្រាអែលបានសម្លាប់ជនជាតិប៉ាឡេស្ទីន ៣៨ នាក់ និងបង្ករបួស ៧១1 នាក់ទៀត ដែលនាំឱ្យចំនួនអ្នកស្លាប់សរុបកើនឡើងដល់ ៣៣.១៧៥ នាក់ និងរបួសដល់ ៧៥.៨៨៦ នាក់ចាប់តាំងពីជម្លោះអ៊ីស្រាអែល និងក្រុមហាម៉ាស បានផ្ទុះឡើងកាលពីថ្ងៃទី០៧ ខែតុលា ឆ្នាំ២០២៣ មក។សារព័ត៌មាន អាល់គុតស៍ (Al-Quds) របស់ប៉ាឡេស្ទីនបានរាយការណ៍កាលពីថ្ងៃអាទិត្យថា អ៊ីស្រាអែលបានបើកការវាយប្រហារដោយយានដ្រូនលើតំបន់ អាល់ណាសឺ (al-Nasr) ក្នុងទីក្រុងរ៉ាហ្វា (Rafah) ភាគខាងត្បូងហ្កាហ្សាស្រ្ទីប ដោយចំនួនអ្នកស្លាប់បាត់បង់ជីវិតមិនទាន់ច្បាស់នៅឡើយទេ។ លោក ហើហ្ស៊ី ហាលេវី (Herzi Halevi) ប្រធានបុគ្គលិកនៃកងកម្លាំងការពារអ៊ីស្រាអែល (IDF) បានចេញសេចក្តីថ្លែងការណ៍មួយកាលពីថ្ងៃអាទិត្យ ដោយនិយាយថា ទោះបីជាមានការដកទ័ពអ៊ីស្រាអែលចេញពីក្រុង ខាន់ យូនីស ក៏ដោយ ក៏សង្គ្រាមប្រឆាំងនឹងក្រុមហាម៉ាសនៅតែបន្ត និងមិនទាន់បញ្ចប់ឡើយ។ លោកបាននិយាយថា យោធាអ៊ីស្រាអែលមានការរីកចម្រើនគួរឱ្យកត់សម្គាល់ក្នុងប្រតិបត្តិការយោធារបស់ខ្លួននៅក្នុងតំបន់ហ្កាហ្សា ប៉ុន្តែមិនទាន់សម្រេចបានពេញលេញនូវគោលដៅរបស់ខ្លួននៅឡើយទេ៕

ឆ្មាំល្បាតឆ្នេរទុយនីស៊ី ស្រង់សាកសពជនអន្តោប្រវេសន៍ ១៣ នាក់ ខណៈសង្គ្រោះបានជិតពីរពាន់នាក់

ឆ្មាំល្បាតឆ្នេរប្រទេសទុយនីស៊ី បានស្រង់យកសាកសពជនអន្តោប្រវេសន៍ចំនួន ១៣ នាក់ចេញពីឆ្នេរសមុទ្រទុយនីស៊ី ហើយបានជួយសង្គ្រោះជនអន្តោប្រវេសន៍ ១.៨៦៧ នាក់ផ្សេងទៀតនៅក្នុងឧប្បត្តិហេតុដាច់ដោយឡែកមួយចំនួននៅសមុទ្រមេឌីទែរ៉ាណេ។អាជ្ញាធរបានចាប់ខ្លួនមនុស្ស ១៤ នាក់ដែលជាប់ពាក់ព័ន្ធក្នុងការសម្រុះសម្រួល និងការរត់ពន្ធមនុស្ស រឹបអូសទូកដែក ១៦ គ្រឿង និងម៉ាស៊ីនប្រើសម្រាប់ទូកចេញសមុទ្រ ៤៧ គ្រឿង ព្រមទាំងបានរកឃើញឃ្លាំងមួយដែលរៀបចំសម្រាប់ផលិតទូកសម្រាប់ការធ្វើអន្តោប្រវេសន៍មិនទៀងទាត់។ជាមួយនឹងភាពប្រសើរឡើងនៃអាកាសធាតុ ចំនួនទូកអន្តោប្រវេសន៍ដែលធ្វើដំណើរពីទុយនីស៊ី ទៅកាន់ឆ្នេរសមុទ្រអ៊ីតាលី បានកើនឡើងយ៉ាងខ្លាំង។កាលពីឆ្នាំមុន គេបានមើលឃើញចំនួនកំណត់ត្រានៃជនអន្តោប្រវេសន៍ឆ្លងកាត់សមុទ្រមេឌីទែរ៉ាណេ ពីឆ្នេរសមុទ្រទុយនីស៊ី ដោយមានជាង ១.៣០០ នាក់បានស្លាប់នៅសមុទ្រ នេះបើយោងតាមទិន្នន័យពីវេទិកាទុយនីស៊ីសម្រាប់សេដ្ឋកិច្ច និងសិទ្ធិសង្គម៕

អេហ្ស៊ីប នឹងបង្កើនចំនួនរថយន្តដឹកជំនួយដល់៣០០គ្រឿងក្នុងមួយថ្ងៃ ទៅតំបន់ហ្កាហ្សា

ប្រធានអង្គភាពសេវាព័ត៌មានរដ្ឋរបស់ប្រទេសអេហ្ស៊ីប លោក ឌីអា រ៉ាស្វាន(Diaa Rashwan) បាននិយាយថា ប្រទេសអេហ្ស៊ីប បានសម្រេចបង្កើនចំនួនរថយន្តដឹកស្បៀងអាហារ ជំនួយផ្នែកវេជ្ជសាស្រ្ត និងការផ្គត់ផ្គង់អាហារសម្រាប់តំបន់ហ្កាហ្សាស្ទ្រីបដែលហែកហួរដោយសង្រ្គាម ដល់យ៉ាងហោចណាស់ ៣០០ គ្រឿង ក្នុងមួយថ្ងៃ ដោយចាប់ពីថ្ងៃអាទិត្យ។នៅក្នុងសេចក្តីថ្លែងការណ៍ លោក Rashwan បាននិយាយថា រថយន្តសរុបចំនួន ១៩.៣៥៤គ្រឿងបានចូលទៅក្នុងតំបន់ហ្កាហ្សាពីច្រកឆ្លងកាត់ទីក្រុង Rafah ចាប់តាំងពីការចាប់ផ្តើមការឈ្លានពានរបស់អ៊ីស្រាអែលនៅតំបន់ហ៊ុមព័ទ្ធនៅថ្ងៃទី ៧ ខែតុលា ឆ្នាំ ២០២៣ ដោយបានដឹកបរិក្ខាពេទ្យចំនួន ១៩.៩៥២តោន ប្រេងឥន្ធនៈ១០.៤៣៥តោន ស្បៀងអាហារ១២៣.៤៥៣តោន ទឹក ២៦.៦៩២ តោន តង់និងក្រណាត់តង់២.០២៣តោន សម្ភារៈសង្គ្រោះ៤៤.១០៣តោន និងរថយន្តសង្គ្រោះបន្ទាន់មានបំពាក់សម្ភារៈចំនួន ១២៣ គ្រឿង។សេចក្តីថ្លែងការណ៍និយាយថា បន្ថែមពីលើនេះ អ្នករងរបួស និងអ្នកជំងឺចំនួន ៣.៧៦៤នាក់ មកពីតំបន់ហ្កាហ្សា បានចូលទៅក្នុងប្រទេសអេហ្ស៊ីបដើម្បីព្យាបាល រួមជាមួយគ្រួសារចំនួន ៦.១៩១នាក់ ។លោក Rashwan បាននិយាយជាថ្មីនូវការប្តេជ្ញាចិត្តរបស់ប្រទេសអេហ្ស៊ីប ក្នុងការពន្លឿនការផ្តល់ជំនួយមនុស្សធម៌ទៅកាន់តំបន់ហ្កាហ្សា និងបានសន្យាថានឹងខិតខំជាបន្តបន្ទាប់ ដើម្បីបង្កើនចំនួនជំនួយទៅកាន់តំបន់នេះ។

កោះតៃវ៉ាន់ បន្តការស្វែងរកអ្នកបាត់ខ្លួន៦នាក់ ក្រោយរញ្ជួយដីកម្រិត៧,៣រ៉ិចទ័រ

ក្រុមអាជ្ញាធរ បាននិយាយកាលពីថ្ងៃអាទិត្យ ថាមនុស្ស៦នាក់នៅតែបន្តបាត់ខ្លួន បន្ទាប់ពីគ្រោះរញ្ជួយដីកម្រិត៧,៣រ៉ិចទ័រ បានវាយប្រហារតំបន់មាត់សមុទ្រជិតតំបន់ហ័រលៀន (Hualien)នៅកោះតៃវ៉ាន់ ហើយការងារស្វែងរកនិងសង្គ្រោះ នៅតែបន្តនៅឡើយ ។ មជ្ឈមណ្ឌលប្រតិបត្តិការសង្រ្គោះបន្ទាន់ ក្នុងតំបន់បាននិយាយថា មនុស្ស៥នាក់ នៅតែបាត់ខ្លួន នៅក្នុងឧស្យានតារ៉ូកូ (Taroko) ក្នុងស្រុកហ័រលៀន រួមទាំងភៀសទេសចរជនជាតិអូស្ត្រាលី២នាក់ ហើយជនទី៦ កំពុងបាត់ខ្លួននៅជិតតំបន់ជីកយករ៉ែមួយកន្លែង ។ នាយកដ្ឋានពន្លត់អគ្គិភ័យ បាននិយាយថា មនុស្សជាង៣០០នាក់ ត្រូវបានជម្លៀស កាលពីថ្ងៃអាទិត្យ។ គិតត្រឹមម៉ោង៣រសៀលថ្ងៃអាទិត្យ ចំនួនអ្នកស្លាប់ដោយសារការរញ្ជួយដីនេះបានកើនឡើងដល់១៣នាក់ និងមនុស្ស១.១៤០នាក់ រងរបួស។កាលពីចុងសប្ដាហ៍នេះ ពលរដ្ឋដែលភៀសខ្លួន ជ្រកកោននៅតាមជម្រកបណ្ដោះអាសន្ន បាននិយាយថា ពួកគេភ័យខ្លាចមិនហ៊ានត្រឡប់ទៅលំនៅឋានវិញទេ ខណៈរលករញ្ជួយដីនៅតែបន្តអង្រួនតំបន់ភាគខាងកើតរបស់កោះនេះ៕

ប្រទេសរវ៉ាន់ដា ប្រារព្ធខួប៣០ឆ្នាំ ចាប់តាំងការប្រល័យពូជសាសន៍

ប្រជាជនក្នុងប្រទេសអាហ្រ្វិកកណ្តាលរវ៉ាន់ដា បានប្រារព្ធខួប៣០ឆ្នាំ ចាប់តាំងពីការប្រល័យពូជសាសន៍ឆ្នាំ ១៩៩៤ បណ្តាលឱ្យមនុស្សប្រមាណ ៨០០.០០០នាក់ស្លាប់។ពិធីរំលឹក បានធ្វើឡើងនៅក្នុងរដ្ឋធានី Kigali កាលពីថ្ងៃអាទិត្យ។អ្នកចូលរួម បានគោរពវិញ្ញាណក្ខន្ធជនរងគ្រោះនៃជម្លោះជនជាតិភាគតិច ដែលបានចាប់ផ្តើមនៅក្នុងខែមេសា ឆ្នាំ ១៩៩៤។ ក្រុមអ្នកវាយប្រហារដែលដឹកនាំដោយក្រុមសកម្មប្រយុទ្ធហ៊ូទូ(Hutu) បានសម្លាប់រង្គាលមនុស្សជាច្រើនមកពីក្រុមជនជាតិភាគតិច Tutsi និងក្រុមជនជាតិភាគតិច Hutu ។ អ្នកដែលមានអាយុក្រោម ៣០ ឆ្នាំ មានចំនួនប្រហែល ២ ភាគ ៣ នៃ ចំនួនប្រជាជនបច្ចុប្បន្ន។ប្រធានាធិបតីលោកប៉ូល កាហ្កាម៉េ(Paul Kagame) បាននិយាយសំដៅទៅមនុស្សជំនាន់ក្រោយ នៅក្នុងសុន្ទរកថារបស់លោក នៅក្នុងពិធីនេះ។ លោកបាននិយាយថា យុវជនរបស់យើងគឺជាអ្នកការពារនៃអនាគតរបស់យើង និងជាមូលដ្ឋាននៃការរួបរួមរបស់យើង។ លោកនិយាយថា ទោះបីជាអ្នកមានអំណាចយ៉ាងណាក៏ដោយ អ្នកអាចប្រើវាដើម្បីប្រាប់ការពិត ហើយធ្វើអ្វីដែលត្រឹមត្រូវ។សហគ្រិនវ័យក្មេងនៅក្នុងតំបន់ទីក្រុងរបស់ប្រទេសរវ៉ាន់ដា បានចាប់ផ្តើមអាជីវកម្មដោយមានជំនួយពីបច្ចេកវិទ្យាឌីជីថល។ នេះកើតឡើងក្នុងពេលដែលមានកិច្ចខិតខំប្រឹងប្រែងរបស់រដ្ឋាភិបាល ដើម្បីជំរុញឧស្សាហកម្មព័ត៌មានវិទ្យា។ ប៉ុន្តែការផ្សះផ្សាសហគមន៍នៅតែជាបញ្ហាប្រឈមនៅក្នុងវិស័យកសិកម្ម ខណៈពលរដ្ឋដែលបានរួចរស់ជីវិតពីរបបប្រល័យពូជសាសន៍ បានហុចបន្តការខឹងសម្បារ និងការមិនទុកចិត្ត ទៅដល់កូនៗរបស់ពួកគេ។ អារម្មណ៍អវិជ្ជមានទាំងនោះ ត្រូវបានគេរាយការណ៍ថា ប៉ះពាល់ដល់អាពាហ៍ពិពាហ៍ និងស្ថានភាពការងារ។

ទឹកជំនន់បានហក់ឡើងក្នុងតំបន់ Urals របស់រុស្ស៊ី បង្ខំមនុស្សជាង៦.០០០នាក់ត្រូវជម្លៀសខ្លួនចេញ

ទឹកជំនន់ បានហក់ឡើងខ្ពស់នៅក្នុងទីក្រុងចំនួនពីរនៅតំបន់ភ្នំ អ៊ូរ៉ាល់(Ural) ប្រទេសរុស្ស៊ី កាលពីថ្ងៃអាទិត្យ ទី៧ ខែមេសា បន្ទាប់ពីទន្លេវែងបំផុតទីបីនៅអឺរ៉ុប បានហូរបុកទំនប់ដោយបានជន់លិចលំនៅឋានយ៉ាងហោចណាស់ ១០.០០០ខ្នង និងបង្ខំមនុស្សរាប់ពាន់នាក់ឱ្យភៀសខ្លួន ដោយយកទៅជាមួយបាននូវសត្វចិញ្ចឹម និងរបស់របរមួយចំនួន។ទឹកជំនន់ធ្ងន់ធ្ងរបំផុត ក្នុងរយៈពេលជាច្រើនទស្សវត្សរ៍កន្លងទៅនេះ បានវាយលុកនៅតំបន់ជាច្រើនរបស់រុស្ស៊ី នៅតំបន់ភ្នំ Ural និងតំបន់ស៊ីបេរី រួមជាមួយផ្នែកមួយចំនួននៅប្រទេសកាហ្សាក់ស្ថាន ដែលនៅជិតខាង ក្នុងប៉ុន្មានថ្ងៃថ្មីៗនេះ។អភិបាលក្រុង Orsk លោកវ៉ាសាលី កូហ្ស៊ូពីតសា(Vasily Kozupitsa) ត្រូវបានទីភ្នាក់ងារសារព័ត៌មានរុស្ស៊ី ដកស្រង់សម្តីដោយនិយាយថាទន្លេទីពីរនៅក្នុងទីក្រុងគឺទន្លេ យ៉េលសានកា(Yelshanka) បានបាក់ច្រាំងហើយវិធានការនានាកំពុងត្រូវបានអនុវត្តដើម្បីជម្លៀសប្រជាជនចេញពីតំបន់រងផលប៉ះពាល់។យោងតាមអាជ្ញាធរតំបន់បានឱ្យដឹងថា មនុស្សជាង ៦.១០០នាក់ ត្រូវបានជម្លៀសចេញពីទីតំបន់ដែលមានប្រជាជនចំនួន ២៣០.០០០នាក់ រួចហើយ។ សាលារៀនចំនួន ១៥កន្លែង ក្នុងចំណោម ៤០ កន្លែង ត្រូវបានជន់លិច។ វីដេអូដែលចេញផ្សាយដោយក្រសួងសង្គ្រោះបន្ទាន់ បានបង្ហាញថា មនុស្សជាច្រើន កំពុងធ្វើដំណើរឆ្លងកាត់ទឹកដែលមានជម្រៅត្រឹម ក និងបានជួយសង្គ្រោះសត្វសុនខដែលជាប់ខ្លួន និងបានធ្វើដំណើរតាមដងផ្លូវលិចទឹកតាមទូក។ទីភ្នាក់ងារព័ត៌មានរដ្ឋ TASS បានរាយការណ៍ថា មនុស្សពេញវ័យចំនួន ៦នាក់ និងកុមារ ៣ នាក់ ត្រូវបានបញ្ជូនទៅមន្ទីរពេទ្យ ប៉ុន្តែស្ថានភាពរបស់ពួកគេពុំគំរាមកំហែងដល់អាយុជីវិតនោះទេ។ប្រធានាធិបតីលោក វ្ល៉ាឌីមៀ ពូទីន បានបញ្ជាឱ្យរដ្ឋមន្ត្រីទទួលបន្ទុកគ្រាអាសន្ន ធ្វើដំណើរតាមយន្តហោះទៅកាន់តំបន់រងគ្រោះ។

បណ្ដាញសង្គម

ព័ត៌មានថ្មីៗ

លោកជំទាវលីម ដារ៉ែន ជួន ណារិន្ទ ផ្តល់ម៉ូតូ២០គ្រឿង និងអំណោយមួយចំនួន ទៅកាន់វរៈនគរបាល និងកងទ័ពការពារព្រំដែន

ក្រុមការងាររាជរដ្ឋាភិបាលចុះមូលដ្ឋានឃុំកណ្តឹងស្រុកបាទី ខេត្តតាកែវនិងរដ្ឋបាលឃុំកណ្តឹងប្រារព្វពិធីផ្សព្វផ្សាយពីបញ្ហាគ្រឿងញៀន និង ពិធីបង្សុកូលឧទ្ទិសកុសលដល់វិញ្ញាណក្ខន្ធវិរះកងទ័ពកម្ពុជាដែលបានពលីជីវិតក្នុងសមរភូមិ

ហ្វីលីពីន និងអូស្ត្រាលី ចាប់ផ្តើមសមយុទ្ធដ៏ធំបំផុតមិនធ្លាប់មាន នៅជិតសមុទ្រចិនខាងត្បូង

ទីក្រុងគីវ៖ រុស្ស៊ីបាញ់យាន ៨៥គ្រឿង និងមីស៊ីល ១គ្រាប់ លើអ៊ុយក្រែន ប៉ុន្មានម៉ោងក្រោយមានជំនួប Trump-Putin

ផ្ទុះរោងចក្រ នៅតំបន់ Ryazan របស់រុស្ស៊ី បណ្ដាលឲ្យមនុស្ស ១១នាក់ស្លាប់ និង ១៣០នាក់របួស

នាយករដ្ឋមន្ត្រីដាណឺម៉ាក និយាយថា លោក Netanyahu បានប្រែទៅជាបង្ក «បញ្ហាដោយខ្លួនលោកផ្ទាល់»

ឯកឧត្តមសាស្ត្រាចារ្យ ប៉ិច សុធី អញ្ជើញបើកសន្និសីទប្រចាំឆ្នាំលើកទី១ របស់សមាគមគ្រូពេទ្យបង្កកំណើតកម្ពុជា

មេដឹកនាំអឺរ៉ុបស្វាគមន៍កិច្ចប្រឹងប្រែងរបស់លោក Trump ប៉ុន្តែបញ្ជាក់ថា សម្ពាធលើរុស្ស៊ី ត្រូវតែមានបន្ត

មេភូមិភាគ៣កម្ពុជាស្នើថៃជៀសវាងសកម្មភាពទាំងឡាយដែលនាំឲ្យមានភាពតានតឹងនៅតាមព្រំដែនជាយថាហេតុ

[UPDATE] ក្រុមអ្នកជួយសង្គ្រោះប៉ាគីស្ថាន ពិបាកស្រង់សាកសព ក្រោយភ្លៀងរដូវមូសុង សម្លាប់មនុស្សយ៉ាងតិច ៣២០នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877