BTV NEWS

ក្របខ័ណ្ឌទស្សនាទានស្តីពីយុទ្ធសាស្រ្តជំរុញវិនិយោគនឹងជួយទាក់ទាញការវិនិយោគដល់កម្ពុជា

ប្រធានសមាគមក្នុងស្រុក៖ ការធ្វើពាណិជ្ជកម្មកម្ពុជា-អាមេរិក នឹងមានសន្ទុះកាន់តែខ្លាំងបន្ទាប់ពីចុះកិច្ចព្រមព្រៀងថ្មីនេះ

ធុរកិច្ចកម្ពុជា-ម៉ាឡេស៊ី បង្កើតកិច្ចសហការផលិតទឹកដោះគោស្រស់ ដើម្បីបំពេញតម្រូវការទីផ្សារ

ផលិតផលខ្មែរជាច្រើនមុខ ដែលផលិតនៅក្នុងស្រុក បាននិងកំពុងដាក់លក់ នៅក្នុងស្តង់ ផ្សារផលិតផលខ្មែរ ខេត្តកំពង់ស្ពឺ

សេដ្ឋកិច្ច និង កសិកម្ម

ប្រធាន AmCham៖ ទំនិញអាម៉េរិកនឹងហូរចូលកម្ពុជាកាន់តែច្រើនជំរុញកំណើនពាណិជ្ជកម្មប្រទេសទាំងពីរ

ប្រធានសភាពាណិជ្ជកម្មអាម៉េរិកប្រចាំនៅកម្ពុជា (AmCham) មានក្តីរំពឹងខ្ពស់ នៃការធ្វើពាណិជ្ជកម្មទ្វេភាគីរវាងកម្ពុជា-អាម៉េរិក នឹងមានកំណើនកាន់តែខ្លាំងក្លា ជាពិសេសទំនិញអាម៉េរិក នឹងហូរចូលមកទីផ្សារកម្ពុជាកាន់តែច្រើន បន្ទាប់ពីការទម្លាក់អត្រាពន្ធនាំចូល សូន្យ (០%) គាំទ្រដល់ការធ្វើពាណិជ្ជកម្មនៃប្រទេសទាំងពីរ។លោក ខេស៊ី បាណេត ប្រធានសភាពាណិជ្ជកម្មអាម៉េរិកប្រចាំនៅកម្ពុជា (AmCham) លើកឡើងក្នុងកិច្ចសម្ភាសន៍ជាមួយ សារព័ត៌មាន ស្តីពីការធ្វើពាណិជ្ជកម្មទ្វេភាគីរវាងកម្ពុជា-អាម៉េរិក នេះថា ជុំវិញការធ្វើពាណិជ្ជកម្មទ្វេនៃប្រទេសទាំងពីរ បាននិងកំពុង បន្តកំណើនកើនឡើងជារៀងរាល់ឆ្នាំ ជាពិសេសការនាំចេញទំនិញរបស់កម្ពុជាទៅកាន់ទីផ្សារអាម៉េរិក។ ចំណែកការនាំចូលវិញ មកដល់ បច្ចុប្បន្ន ក៏មានការកើនឡើងជាបន្តបន្ទាប់ តែស្ថិតនៅក្នុងកម្រិតទាបមិនទាន់សមតុល្យនិងគ្នានៅឡើយ។ជុំវិញការនាំចូលនេះ លោកមានសុទិដ្ឋិនិយមខ្ពស់ នឹងរំពឹងថា នៅក្នុងរយៈពេលខាងមុខ ការនាំចូលទំនិញពីអាម៉េរិក នឹងបន្ត កើនឡើងកាន់តែខ្លាំងក្លា ខណៈដែលកម្ពុជាបានទម្លាក់អត្រាពន្ធនាំចូល ០% (សូន្យភាគរយ) នៅលើប្រភេទមុខទំនិញជាច្រើន ដែល ប្រការទាំងនេះនឹងគាំទ្រដល់ការធ្វើពាណិជ្ជកម្មនៃប្រទេសទាំងពីរ គាំទ្រដល់ការហូរចូលទំនិញពីអាម៉េរិក ស្របពេលប្រជាជនកម្ពុជាមាន ជីវភាពកាន់តែធូរធារ។សូមបញ្ជាក់ថា នៅក្នុងរយៈពេល ៩ ខែ ឆ្នាំ២០២៥នេះ ការដោះដូរពាណិជ្ជកម្មអន្តរជាតិរបស់កម្ពុជា មានទំហំទឹកប្រាក់សរុបជិត ៤៨ ពាន់លានដុល្លារអាម៉េរិក ដោយកម្ពុជាបាននាំចេញទំនិញសំខាន់ៗ មានទឹកប្រាក់ជាង ២៣ ពាន់លានដុល្លារ ខណៈតម្លៃនៃការនាំចូល មានទឹកប្រាក់សរុបជិត ២៤ ពាន់លានដុល្លារ, ក្នុងនោះចំពោះការធ្វើពាណិជ្ជកម្មទ្វេភាគីរវាងកម្ពុជា-អាម៉េរិកវិញ ឃើញថា នៅក្នុងរយៈ ពេល ៩ ខែនេះដែរ ការធ្វើពាណិជ្ជកម្មនៃប្រទេសទាំងពីរ មានទំហំទឹកប្រាក់ជាង ៩ ៥៦០ លានដុល្លារអាម៉េរិក កើនឡើងជាង ២២ ភាគរយ ធៀបរយៈពេលដូចគ្នាឆ្នាំមុន ពោលគឺទីផ្សារមួយនេះបានគាំទ្រដល់កំណើនខ្ពស់នៃការនាំចេញទំនិញរបស់កម្ពុជា៕ អត្ថបទ៖ សុន រ៉ាឌី

កិច្ចប្រជុំប្រចាំសប្ដាហ៍របស់ក្រសួងពាណិជ្ជកម្ម ផ្ដោតលើរបៀបវារៈសំខាន់ចំនួន៦

នាព្រឹកថ្ងៃព្រហស្បតិ៍ ទី១៦ ខែតុលា ឆ្នាំ២០២៥ នៅទីស្ដីការក្រសួងពាណិជ្ជកម្ម ឯកឧត្តម កឹម ស៊ីថន រដ្ឋលេខាធិការប្រចាំការក្រសួងពាណិជ្ជកម្ម តំណាងដ៏ខ្ពង់ខ្ពស់របស់ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានអញ្ជើញដឹកនាំកិច្ចប្រជុំប្រចាំសប្ដាហ៍របស់ក្រសួងពាណិជ្ជកម្ម ផ្ដោតលើរបៀបវារៈចំនួន៦។កិច្ចប្រជុំប្រចាំសប្ដាហ៍នេះ ត្រូវបានរៀបចំឡើងដោយផ្ទាល់ និងតាមប្រព័ន្ធអនឡាញ ក្រោមរបៀបវារៈរួមមាន៖១. របាយការណ៍ ស្តីពី លទ្ធផលនៃការចូលរួមកិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៥៧ និងកិច្ចប្រជុំពាក់ព័ន្ធ នៅរដ្ឋធានី គូឡាឡាំពួ ប្រទេសម៉ាឡេស៊ី២. របាយការណ៍ ស្ដីពី វឌ្ឍនភាពការងាររបស់នាយកដ្ឋានចុះបញ្ជីពាណិជ្ជកម្ម ៣. របាយការណ៍ ស្ដីពី វឌ្ឍនភាពការងាររបស់នាយកដ្ឋានកម្មសិទ្ធិបញ្ញា ៤. របាយការណ៍ ស្ដីពី វឌ្ឍនភាពការងាររបស់នាយកដ្ឋានសហប្រតិបត្តិការអន្តរជាតិ ៥. របាយការណ៍ ស្ដីពី វឌ្ឍនភាពការងាររបស់មន្ទីរពាណិជ្ជកម្មខេត្តកំពង់ស្ពឺ ៦. បញ្ហាផ្សេងៗ។ គួរបញ្ជាក់ថា កិច្ចប្រជុំនេះ មានវត្តមានចូលរួមពី ឯកឧត្តម លោកជំទាវរដ្ឋលេខាធិការ ឯកឧត្តម លោកជំទាវអនុរដ្ឋលេខាធិការ ឯកឧត្តមអគ្គនាយក លោកជំទាវអគ្គាធិការ លោក-លោកស្រីអគ្គនាយករង លោក-លោកស្រីអគ្គាធិការរង លោកប្រធាននាយកដ្ឋាន-វិទ្យាស្ថានលោក-លោកស្រីអនុប្រធាននាយកដ្ឋាន-វិទ្យាស្ថាន លោក-លោកស្រីប្រធាន និងអនុប្រធានមន្ទីរ និងសាខា ក.ប.ប. រាជធានី-ខេត្តទាំងអស់ចំណុះឱ្យក្រសួងពាណិជ្ជកម្មផងដែរ៕

ក្រុមឧស្សាហករជាតិ-អន្តរជាតិ បង្ហាញមោទនភាពលើខ្សែច្រវាក់ផលិតកម្ម និងការធ្វើពាណិជ្ជកម្មនៅកម្ពុជា

ក្រុមឧស្សាហករជាតិ-អន្តរជាតិ បង្ហាញនូវមោទនភាពរបស់ខ្លួន លើកិច្ចដំណើរការខ្សែច្រវាក់ផលិតកម្ម និងការធ្វើពាណិជ្ជកម្ម សម្រាប់ការផ្គត់ផ្គង់ទីផ្សារក្នុងស្រុក ស្របពេលសកម្មភាពអាជីវកម្មបានកំពុងកើតឡើងយ៉ាងផុលផុស និងក៏ដូចជាការនាំចេញ ខណៈ កម្ពុជាមានដៃគូសហការជាច្រើន។ឧស្សាហករដែលចូលរួមក្នុងពិព័រណ៍អន្តរជាតិវិស័យសំណង់ និងឧស្សាហកម្មយានយន្ត នៅសាលពិព័រណ៍និងសន្និបាតកោះ ពេជ្រ ដែលចាប់ផ្តើមពីថ្ងៃទី ១៤-១៦ ខែតុលា ឆ្នាំ២០២៥នេះ បានលើកឡើងថា នៅក្នុងឆ្នាំ២០២៥ ឃើញថា សម្ទុះនៃការអភិវឌ្ឍ នៅកម្ពុជា មានសកម្មភាពងើបឡើងវិញ គាំទ្រដល់ទីផ្សារក្នុងស្រុក ជាពិសេសទីផ្សារសម្រាប់នាំចេញ ដោយកំពុងកំណើននាំចេញ យ៉ាងល្អប្រសើរ។ ចំណែកទាក់ទិនការវិនិយោគវិញ ឃើញថា កម្ពុជាបានកំពុងស្រូបយកឱកាសវិនិយោគជាហូហែរផងដែរ ដែលបាន ជំរុញដល់ការប្រកួតប្រជែងកាន់តែខ្លាំងក្លា។ឧស្សាហករ លើកឡើងស្រដៀងគ្នាទៀតថា ចំណែការធ្វើពាណិជ្ជកម្មក្នុងស្រុក បន្ទាប់ពីការផ្ទុះឡើងបញ្ហាជម្លោះព្រំដែនជាមួយ ប្រទេសជិតខាង ឃើញថា ចលនារួបរួមជាតិមានសម្ទុះយ៉ាងខ្លាំងក្លា ក្នុងនោះសម្រាប់ផលិតកម្មក្នុងស្រុក ជាពិសេសសហគ្រាស និងសិប្បកម្ម មិនថាការផលិតរបស់របរប្រើប្រាស់ ការផលិតនំចំណី និងអាហារហូបចុកប្រចាំថ្ងៃនោះឡើយ ចំពោះប្រភេទទំនិញ មួយចំនួន ក៏ទទួលបានការគាំទ្រពីប្រជាពលរដ្ឋកម្ពុជាផងដែរ ដែលទាំងនេះបានធ្វើឱ្យចលនាខ្សែច្រវាក់ផលិតកម្មក្នុងស្រុក កំពុងមាន សម្ទុះងើបឡើង គាំទ្រដល់ការអភិវឌ្ឍជាតិដូចជា ការផ្តល់នូវការងារ និងប្រាក់ចំណូលក្នុងសេដ្ឋកិច្ចជាដើម។នៅក្នុងពិព័រណ៍អន្តរជាតិនេះដែរ, ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត បច្ចេកវិទ្យា និងនវានុវត្តន៍ ក៏បានលើកឡើងក្នុងសន្និសីទ និងពិព័រណ៍វិស័យទឹកស្អាតអន្តរជាតិនៅកម្ពុជា នៅក្នុងព្រឹត្តិការណ៍ពិព័រណ៍អន្តរជាតិ វិស័យសំណង់ និងឧស្សាហកម្មយានយន្តផងដែរ អំពីសាៈសំខាន់សម្រាប់ក្រុមហ៊ុនជាតិ និងអន្តរជាតិ នៃការដាក់តាំងបង្ហាញផលិតផលរបស់ខ្លួន ជាពិសេសផលិតផលបម្រើដល់វិស័យទឹកស្អាតជាដើម ខណៈកម្ពុជាកំពុងមានតម្រូវការច្រើន និងត្រូវដើរឱ្យទាន់នវានុវត្តន៍ និង បច្ចេកវិទ្យាថ្មីៗ, ហើយព្រឹត្តិការណ៍នេះដែរ ក៏បានបង្ហាញពីការប្តេជ្ញាចិត្តរួមរបស់កម្ពុជា ក្នុងការសម្រេចគោលដៅអភិវឌ្ឍន៍ប្រកបដោយ ចីរភាព ៦.១ ដែលកំណត់ថា ទាំងអស់គ្នាត្រូវទទួលបានទឹកស្អាតប្រើប្រាស់ត្រឹមឆ្នាំ២០៣០។សូមបញ្ជាក់ថា ជុំវិញការពិព័រណ៍អន្តរជាតិវិស័យសំណង់ និងឧស្សាហកម្មយានយន្តនេះ បានទាក់ទាញក្រុមហ៊ុនជាង ១០០ នៅជុំវិញ តំបន់ មកចូលរួមតាំងបង្ហាញនូវផលិតផលររបសខ្លួនរួមមាន៖ វិស័យទឹកស្អាត វិស័យសំណង់, ការរចនាប្រព័ន្ធថាមពលដោយ ប្រសិទ្ធិភាព, បច្ចេកវិទ្យាសំណង់ឌីជីថល, ផែនទីនគរូបនីយកម្ម និងយានយន្តជាដើម៕ អត្ថបទ៖ សុន រ៉ាឌី

ពិព័រណ៍ខ្នាតអន្តរជាតិវិស័យសំណង់និងឧស្សាហកម្មយានយន្ត បើកស្វាគមន៍អ្នកជំនួញដើម្បីរួមគ្នាអភិវឌ្ឍន៍ជាតិនៅកម្ពុជា

នៅព្រឹកថ្ងៃទី១៤ ខែតុលានេះ ពិព័រណ៍អន្តរជាតិដ៏សំខាន់ៗចំនួនពីរ គឺវិស័យសំណង់ និងឧស្សាហកម្មយានយន្ត (CAMBUILD & CAMAUTO 2025) បានបើកសម្ពោធជាផ្លូវការនៅអគារមជ្ឈមណ្ឌលសន្និបាតកោះពេជ្រ ដែលបង្ហាញស្ដែងឲ្យឃើញពីជំហានដ៏សំខាន់ក្នុងការអភិវឌ្ឍវិស័យឧស្សាហកម្មសំណង់ និងបច្ចេកវិទ្យាថ្មីៗរបស់ព្រះរាជាណាចក្រកម្ពុជា។ពិធីបើកសម្ពោធពិព័រណ៍អន្តរជាតិនេះ បានប្រព្រឹត្តទៅដោយមានការអញ្ជើញចូលរួមពីគណៈអធិបតី ឯកឧត្ដម ឡៅ ទិព្វសីហា រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ ព្រមទាំងមានការចូលរួមពីថ្នាក់ដឹកនាំវិស័យឧស្សាហកម្មផ្សេងទៀតដូចជា លោក Edmund Lee, នាយកអភិវឌ្ឍន៍អាជីវកម្មនៅកម្ពុជា និង ឯកឧត្ដម បណ្ឌិត តាន់ មុនីវណ្ណ ប្រធានសហព័ន្ធឧស្សាហកម្មយានយន្តកម្ពុជា។ ពិព័រណ៍នេះ មានអ្នកចូលរួមតាំងបង្ហាញផលិតផលប្រមាណជាង ១០០ក្រុមហ៊ុន មកពីជាង ១៥ប្រទេស ដែលនាំមកនូវសម្ភារៈសំណង់សម័យថ្មី បច្ចេកវិទ្យាសំណង់ទំនើប និងប្រព័ន្ធមេកានិច-អគ្គីសនី ដែលមានសុវត្តិភាពខ្ពស់។លោក Edmund Lee បានលើកឡើងថា ការរៀបចំពិព័រណ៍ទាំងពីរនៅទីតាំងតែមួយនេះ ជាការបង្ហាញនូវសក្តានុពល និងការរួមបញ្ចូលគ្នាដែលមានភាពស៊ីសង្វាក់គ្នា រវាងឧស្សាហកម្មសំណង់ស្តង់ដារពិភពលោក និងឧស្សាហកម្មយានយន្ត ដែលជាគ្រឿងផ្សំមួយដ៏សំខាន់ក្នុងការបង្កើតសហគមន៍ ដែលអាចរស់នៅបាន និងមាននិរន្តរភាព។ លោករំពឹងថា ពិព័រណ៍នេះ នឹងទាក់ទាញអ្នកជំនាញឧស្សាហកម្មច្រើនជាង ៦,០០០នាក់ រួមមានអ្នកសាងសង់ អភិវឌ្ឍន៍អាគារ វិស្វករ ជំនាញយានយន្ត និងអ្នកវិនិយោគជាដើម។-ល-។ ឯកឧត្ដមរដ្ឋលេខាធិការ ឡៅ ទិព្វសីហា បានមានប្រសាសន៍ថា ពិព័រណ៍ទាំងពីរនេះ នឹងក្លាយជាស្ពានភ្ជាប់ទំនាក់ទំនងដ៏សំខាន់ រវាងព្រះរាជាណាចក្រកម្ពុជា និងសហគមន៍អន្តរជាតិ ដែលនាំមកនូវបច្ចេកវិទ្យា ឯកទេស និងដំណោះស្រាយទំនើបៗ ដែលនឹងស្ថាបនាអនាគតរបស់វិស័យសំណង់ ឧស្សាហកម្ម និងយានយន្តនៅកម្ពុជា។ ឯកឧត្តម បានបន្ថែមថា នេះមិនត្រឹមតែជាឱកាសអាជីវកម្មប៉ុណ្ណោះទេ តែជាវិថីនៃការអភិវឌ្ឍន៍ដែលមាននិរន្តរភាព និងឯករាជនៃបច្ចេកវិទ្យារបស់ប្រទេសជាតិផងដែរ។ក្រៅពីការតាំងពិព័រណ៍ នៅក្នុងកម្មវិធីនេះ ក៏នឹងមានរៀបចំជាវេទិកា ដើម្បីបង្ហាញពីជំនាញបច្ចេកទេស ដែលផ្តល់ចំណេះដឹងសំខាន់ៗដូចជា៖ និរន្តភាពនៃសំណង់អគារ, ការរចនាប្រព័ន្ធថាមពលដោយប្រសិទ្ធភាព, បច្ចេកវិទ្យាសំណង់ឌីជីថល, ផែនទីនគរូបនីយកម្មនិរន្តរភាព និងអនាគតរបស់ «Smart Mobility»។ ព្រឹត្តិការណ៍ដ៏ធំមួយនេះ នឹងរៀបចំឡើងរយៈពេល ៣ថ្ងៃ ចាប់ពី ថ្ងៃទី១៤ ដល់១៦ ខែតុលា ឆ្នាំ២០២៥៕ អត្ថបទ៖ឈិត បូរ៉ាវី

ឯកឧត្តម ឌិត ទីណា លើកទឹកចិត្តផលិតករបង្កើនភាពច្នៃប្រឌិតថ្មី និងពង្រឹងគុណភាព ដើម្បីឆ្លើយតបការកើនឡើងអតិថិជន

ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកទឹកចិត្តឱ្យអ្នកកែច្នៃទាំងអស់ពិចារណាធ្វើពិពិធកម្មមករកបរិបទថ្មី ដែលមានសក្តានុពល មានទីផ្សារល្អ ហើយសាកល្បងកែច្នៃនូវផលិតផលថ្មីៗបន្ថែមទៀត ដែលមានរសជាតិឆ្ងាញ់ ភាពច្នៃប្រឌិត វេចខ្ចប់ ដែលគិតគូរពីសុខភាពអ្នកប្រើប្រាស់ ពិសេសការធានាអនាម័យ និងសុវត្ថិភាពជូនអតិថិជន។ក្នុងឱកាសអញ្ជើញចូលរួមពិធីបិទបញ្ចប់គម្រោងអភិវឌ្ឍន៍ជលផលក្រោយប្រមូលផល (CAPFISH-CAPTURE) កាលពីរសៀលថ្ងៃទី១៣ តុលា ឆ្នាំ២០២៥ ឯកឧត្តមរដ្ឋមន្រ្តី ឌិត ទីណា ក៏បានសំណូមពរដល់សាធារណជន ព្រមទាំងអ្នកប្រើប្រាស់ និងអ្នកបរិភោគទាំងអស់ បង្កើនការចូលរួមគាំទ្រផលិតផលក្នុងស្រុក ដែលជាកត្តាសំខាន់ចាំបាច់ជួយលើកទឹកចិត្តអ្នកផលិតក្នុងវិស័យម្ហូបអាហារ ក៏ដូចជាវិស័យជលផលឱ្យកាន់តែមានភាពច្នៃប្រឌិត លើកកម្ពស់ផលិតផលខ្មែរ រក្សាបាននូវការផលិតបែបគុណភាពខ្ពស់ សុវត្ថិភាព អនាម័យ និងមានប្រសិទ្ធភាពសេដ្ឋកិច្ច។ស្ថិតក្រោមមូលបទ «បរិវត្តកម្មជលផលកម្ពុជាដើម្បីកំណើនប្រកបដោយចីរភាព និងបរិយាប័ន្ន» ឯកឧត្តមរដ្ឋមន្រ្តី បានអបអរសាទរនូវការអនុវត្តការងារគម្រោងពីមន្រ្តីជំនាញ និងដៃគូអភិវឌ្ឍន៍សហភាពអឺរ៉ុប ព្រមទាំងអង្គការយូនីដូ ដែលបានជំរុញតួអង្គពាក់ព័ន្ធទាំងអស់ក្នុងវិស័យជលផលកម្ពុជា ទទួលបាននូវចំណេះដឹង ចំណេះធ្វើ ក្នុងការកែច្នៃផលិតផលជលផលរួមមាន៖ ត្រីងៀត ប្រហុក ផ្អកជាដើម ប្រកបដោយគុណភាព សុវត្ថិភាព អនាម័យខ្ពស់ និងអាចនាំចេញទៅកាន់ទីផ្សារអន្តរជាតិ។ ឯកឧត្តម បានវាយតម្លៃខ្ពស់តាមរយៈការអនុវត្តគម្រោងនេះ ដែលនាំឱ្យវិស័យឯកជនទទួលបានទីផ្សារផ្សារភ្ជាប់នឹងការផលិត ការកសាងទំនុកចិត្តជាមួយអ្នកប្រើប្រាស់ រក្សាបានការកែច្នៃតាមស្តង់ដាអន្តរជាតិ មានវិញ្ញាបនបត្រទទួលស្គាល់ច្បាស់លាស់ ជាពិសេសតម្លៃនៃភាពជាម្ចាស់ ការគិតគូរកែច្នៃម្ហូបដែលជាវប្បធម៌ខ្មែរ រក្សាបាននូវរសជាតិដើមប្រពៃណីខ្មែរ។សូមជម្រាបជូនថា ពិធីបិទបញ្ចប់គម្រោងអភិវឌ្ឍន៍ជលផលក្រោយប្រមូលផល (CAPFISH-CAPTURE) ក៏មានការអញ្ជើញចូលរួមរបស់ ឯកឧត្តម អ៊ីហ្គ័រ ឌ្រីសម៉ាន់(Igor DRIESMANS) ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា និង លោក ដេហ្សេណេ តេហ្សេរ៉ា (Dejene TEZERA) ប្រធាននាយកដ្ឋាននៃអង្គការយូនីដូ (UNIDO) និងភ្ញៀវកិត្តិយសជាច្រើនរូបផ្សេងទៀតផងដែរ៕ អត្ថបទ៖ ឈិត បូរ៉ាវី

ពាណិជ្ជកម្មទ្វេភាគីកម្ពុជា-អាម៉េរិក ក្នុងរយៈពេល៩ខែឆ្នាំនេះ មានទំហំទឹកប្រាក់ជាង ៩ ៥៦០ លានដុល្លារ

ការធ្វើពាណិជ្ជកម្មទ្វេភាគីរវាងកម្ពុជា-អាម៉េរិក នៅក្នុងរយៈពេល ៩ ខែ ឆ្នាំ២០២៥នេះ, មានទំហំទឹកប្រាក់ប្រមាណជាង ៩ ៥៦០ លាន ដុល្លារអាម៉េរិក កើនឡើងជាង ២២ ភាគរយ ធៀបរយៈពេលដូចគ្នាឆ្នាំមុន ពោលគឺទីផ្សារមួយនេះ បានគាំទ្រដល់កំណើនខ្ពស់នៃការនាំចេញទំនិញ របស់កម្ពុជា។អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានបង្ហាញស្ថិតិពាណិជ្ជកម្ម នៃការធ្វើពាណិជ្ជកម្មអន្តរជាតិ ជាក់ស្តែងនៅក្នុងរយៈពេល ៩ ខែ ឆ្នាំ២០២៥នេះ ការដោះដូរពាណិជ្ជកម្មអន្តរជាតិរបស់កម្ពុជា មានទំហំទឹកប្រាក់សរុបជិត ៤៨ ពាន់ លានដុល្លារអាម៉េរិក កើនឡើងជិត ១៥ ភាគរយ ក្នុងនោះកម្ពុជាបាននាំចេញទំនិញសំខាន់ៗមានទឹកប្រាក់ជាង ២៣ ពាន់លានដុល្លារ កើនឡើងជិត ១៣ ភាគរយ ខណៈការនាំចូល មានទឹកប្រាក់សរុបជិត ២៤ ពាន់លានដុល្លារ កើនជាង ១៦ ភាគរយ បើប្រៀបធៀប នឹងរយៈពេលដូចគ្នាឆ្នាំ២០២៤ ។ចំណែកការធ្វើពាណិជ្ជកម្មទ្វេភាគីរវាងកម្ពុជា-អាម៉េរិកវិញ ឃើញថា នៅក្នុងរយៈពេល ៩ ខែ ឆ្នាំ២០២៥នេះ, ការធ្វើពាណិជ្ជកម្ម ប្រទេសទាំងពីរ មានទំហំទឹកប្រាក់សរុបជាង ៩ ៥៦០ លានដុល្លារដុល្លារអាម៉េរិក កើនឡើងជាង ២២ ភាគរយ បើប្រៀបធៀបរយៈពេលដូចគ្នា និងឆ្នាំ២០២៤ ក្នុងនោះកម្ពុជាបាននាំចេញទៅអាម៉េរិក មានទឹកប្រាក់ជិត ៩ ៣០០ លានដុល្លារអាម៉េរិក កើនឡើង ២២ ភាគរយ ខណៈការចូលពីអាម៉េរិកមកកម្ពុជាវិញ មានទឹកប្រាក់ជាង ២៧៣ លានដុល្លារដុល្លារអាម៉េរិក កើនឡើងជិត ៤៧ ភាគរយ។ សូមបញ្ជាក់ថា ចំពោះប្រភេទទំនិញសំខាន់ៗដែលសហរដ្ឋអាម៉េរិកបានកំពុងគាំទ្រដល់កំណើនខ្ពស់ នៃការនាំចេញរបស់កម្ពុជារួមមាន៖ ការនាំ ចេញសម្លៀកបំពាក់ ស្បែកជើង សម្ភារៈសម្រាប់ការធ្វើដំណើរ ការនាំចេញផលិតផលពីកសិកម្ម និងផ្សេងៗទៀត។ ដោយឡែកការនាំចូលពី សហរដ្ឋអាម៉េរិកវិញមានដូចជា៖ យានយន្ត គ្រឿងបង្គុំ គ្រឿងអេឡិចត្រូនិច និងមានប្រភេទទំនិញាច្រើនផ្សេងៗទៀត៕ អត្ថបទ៖ សុន រ៉ាឌី

អគ្គនាយកដ្ឋានពន្ធដារ ពន្យារពេលបង់ពន្ធអចលនទ្រព្យឆ្នាំ២០២៥ ដើម្បីទុកពេលឱ្យម្ចាស់ អចលនទ្រព្យមកបំពេញកាតព្វកិច្ច

អគ្គនាយកដ្ឋានពន្ធដារ ពន្យារពេលបង់ពន្ធលើអចលនទ្រព្យសម្រាប់ឆ្នាំ២០២៥ រហូតដល់ថ្ងៃទី៣១ ខែធ្នូ ឆ្នាំ២០២៥ ដើម្បីផ្ដល់ លទ្ធភាពជូនម្ចាស់អចលនទ្រព្យ មានឆន្ទៈក្នុងការបំពេញកាតព្វកិច្ច ហើយការលើកលែងនេះ ពុំមានអានុភាពប្រតិសកម្មចំពោះ ទណ្ឌកម្មរដ្ឋបាល (ពន្ធបន្ថែម និងការប្រាក់) ដែលបានបង់រួចហើយនោះឡើយ។អគ្គនាយកដ្ឋានពន្ធដារ ចេញសេចក្តីជូនដំណឹង ស្តីពីការពន្យារពេលបង់ពន្ធលើអចលនទ្រព្យសម្រាប់ឆ្នាំ២០២៥ រហូតដល់ ថ្ងៃទី៣១ ខែធ្នូ ឆ្នាំ២០២៥, ដែលបញ្ហានេះអគ្គនាយកដ្ឋានពន្ធដារបានពិនិត្យឃើញថា រហូតមកទល់ពេលនេះ មានម្ចាស់អចលនទ្រព្យ ជាច្រើន បានមកប្រកាសបង់ប្រាក់ពន្ធលើអចលនទ្រព្យសម្រាប់ឆ្នាំ២០២៥ ហើយក៏នៅមានម្ចាស់អចលនទ្រព្យមួយចំនួនទៀត នៅមិន ទាន់បានបំពេញកាតព្វកិច្ចប្រកាសបង់ប្រាក់ពន្ធនេះនៅឡើយ។ អនុវត្តតាមច្បាប់ និងបទប្បញ្ញត្តិជាធរមាន ម្ចាស់អចលនទ្រព្យត្រូវមាន កាតព្វកិច្ចប្រកាសបង់ពន្ធលើអចលនទ្រព្យយ៉ាងយឺតបំផុត ត្រឹមថ្ងៃទី៣០ ខែកញ្ញា នៃឆ្នាំជាប់ពន្ធនីមួយៗ។ ផុតរយៈពេលនេះ ម្ចាស់ អចលនទ្រព្ នឹងត្រូវទទួលរងទណ្ឌកម្មរដ្ឋបាល (ពន្ធបន្ថែម និងការប្រាក់) ស្របតាមច្បាប់ស្តីពីសារពើពន្ធជាធរមាន។ដើម្បីផ្ដល់លទ្ធភាពជូនម្ចាស់អចលនទ្រព្យ ដែលមានឆន្ទៈក្នុងការបំពេញកាតព្វកិច្ចប្រកាសបង់ពន្ធលើអចលនទ្រព្យ រាជរដ្ឋាភិ- បាលបានសម្រេចបន្តការលើកលែងទណ្ឌកម្មរដ្ឋបាល (ពន្ធបន្ថែម និងការប្រាក់) ចំពោះពន្ធលើអចលនទ្រព្យដូចតទៅ "ចំពោះ អចលនទ្រព្យ (មានបណ្ណកម្មសិទ្ធិ ឬគ្មានបណ្ណកម្មសិទ្ធិ) ដែលពុំធ្លាប់បានចុះបញ្ជី និងប្រកាសបង់ពន្ធលើអចលនទ្រព្យកន្លងមក បន្ត អនុញ្ញាតឱ្យចុះបញ្ជី និងប្រកាសបង់ពន្ធ ចាប់ពីឆ្នាំកាន់កាប់ ឬទទួលប្រយោជន៍ចុងក្រោយ និងចំពោះអចលនទ្រព្យដែលបានចុះបញ្ជី និងប្រកាសបង់ពន្ធកន្លងមក ប៉ុន្តែខកខានពុំបានប្រកាសបង់ពន្ធក្នុងឆ្នាំខ្លះ អនុញ្ញាតបន្តការលើកលែងទណ្ឌកម្មរដ្ឋបាល (ពន្ធបន្ថែម និងការប្រាក់) រហូតដល់ដំណាច់ឆ្នាំ២០២៥។ ការលើកលែងនេះ ពុំមានអានុភាពប្រតិសកម្មចំពោះទណ្ឌកម្មរដ្ឋបាល (ពន្ធបន្ថែម និង ការប្រាក់) ដែលបានបង់រួចហើយនោះទេ។”អគ្គនាយកដ្ឋានពន្ធដារ បានជម្រាបជូនដល់ម្ចាស់អចលនទ្រព្យទាំងអស់ ដែលមិនទាន់បានបំពេញកាតព្វកិច្ចចុះបញ្ជីអចលន- ទ្រព្យ ឬធ្វើបច្ចុប្បន្នភាពព័ត៌មានអចលនទ្រព្យ និងប្រកាសបង់ប្រាក់ពន្ធនៅឡើយ សូមអញ្ជើញទៅចុះបញ្ជីអចលនទ្រព្យ ឬធ្វើបច្ចុប្បន្ន- ភាពព័ត៌មានអចលនទ្រព្យរបស់ខ្លួន នៅសាខាពន្ធដារខេត្ត-ខណ្ឌដែលអចលនទ្រព្យស្ថិតនៅ។ចំពោះម្ចាស់អចលនទ្រព្យ ដែលបានចុះបញ្ជី និងធ្វើបច្ចុប្បន្នភាពព័ត៌មានអចលនទ្រព្យរួចរាល់ ក្នុងប្រព័ន្ធគ្រប់គ្រងទិន្នន័យ អចលនទ្រព្យរបស់អគ្គនាយកដ្ឋានពន្ធដារ និងមានបណ្ណសម្គាល់ការបង់ពន្ធអចលនទ្រព្យ សូមទៅប្រកាសបង់ប្រាក់ពន្ធឱ្យបានទាន់ ពេលវេលា ត្រឹមថ្ងៃទី៣១ ខែធ្នូ ឆ្នាំ២០២៥ នៅអគ្គនាយកដ្ឋានពន្ធដារ ឬសាខាពន្ធដារខេត្ត-ខណ្ឌដែលអចលនទ្រព្យស្ថិតនៅ ឬនៅ គ្រប់សាខាធនាគារពាណិជ្ជដែលបានចុះអនុស្សរណៈនៃការយោគយល់គ្នាជាមួយក្រសួងសេដ្ឋកិច្ច និងហិរញ្ញវត្ថុ ឬបង់ពន្ធតាមរយៈ កម្មវិធីទូរសព្ទដៃអ្នកជាប់ពន្ធ (GDT Taxpayer App) ជាដើម៕ អត្ថបទ៖ សុន រ៉ាឌី

ប្រធាន AmCham៖ វិនិយោគិនចិននឹងហូរចូលកម្ពុជាកាន់តែច្រើន ខណៈចិនប្រឈមបញ្ហាពន្ធជាមួយអាម៉េរិក

ប្រធានសភាពាណិជ្ជកម្មអាម៉េរិកប្រចាំនៅកម្ពុជា (AmCham) រំពឹងថា កម្ពុជានឹងអាចស្រូបយកវិនិយោគិនពីសហរដ្ឋអាម៉េរិក ជាពិសេសពីប្រទេសចិនបានកាន់តែច្រើន ផលិតសម្រាប់ទីផ្សារនាំចេញទៅកាន់សហរដ្ឋអាម៉េរិក ខណៈកម្ពុជាមានកំលាំងពលកម្មសមរម្យ និងមានអត្រាពន្ធបដិកាក្នុងកម្រិតអាចប្រកួតប្រជែង។លោក ខេស៊ី បាណេត ប្រធានសភាពាណិជ្ជកម្មអាម៉េរិកប្រចាំនៅកម្ពុជា (AmCham) លើកឡើងក្នុងកិច្ចសម្ភាសន៍ជាមួយ សារព័ត៌មាន ស្តីពីការវិនិយោគ និងការនាំចេញរបស់កម្ពុជាទៅកាន់ទីផ្សារអាមេរិក នៅក្នុងវេទិកាពន្ធប្រចាំឆ្នាំ២០២៥ “AmCham Tax Forum 2025” នៅចុងសប្តាហ៍កន្លងមកថា កម្ពុជាគឺជាប្រទេសមួយកំពុងទទួលបាននៃការហូរចូលវិនិយោគិនបរទេស ខណៈដែលកម្ពុជាទទួលបានអត្រាពន្ធបដិកា ១៩% ពីសហរដ្ឋអាម៉េរិក ជាអត្រាពន្ធស្ថិតនៅក្នុងកម្រិតអាចប្រកួតប្រជែង ហើយតាមរយៈនេះកម្ពុជា នឹងអាចស្រូបយកវិនិយោគិនពីសហរដ្ឋអាម៉េរិក ជាពិសេសវិនិយោគិនពីប្រទេសចិនមកបណ្តាក់ទុនកាន់តែច្រើនថែមទៀតផងដែរ។លោកបន្ថែមថា ជុំវិញការនាំចេញ, ប្រទេសចិនមានទីផ្សារនាំចេញទំនិញរបស់ខ្លួនទៅកាន់អាម៉េរិកធំជាងគេ បច្ចុប្បន្ន បន្ទាប់ពីលោកដូណាត្រាំ ប្រធានាធិបតីសហរដ្ឋអាមរិក បានតម្លើងពន្ធមានអត្រាជាង ៥០% នេះជាការបង្អាក់បន្ទុចដល់ការនាំចេញ របស់ចិន។ លោកបន្តថា បញ្ហានេះធ្វើឱ្យវិនិយោគិនចិនបានកំពុងសម្លឹងមើលអំពីឱកាសគវិនិយោរបស់ខ្លួននៅកម្ពុជា ដើម្បីផលិតនាំចេញ ទៅកាន់ទីផ្សារសហរដ្ឋអាម៉េរិក ស្របពេលដែលកម្ពុជាមានកំលាំងពលកម្មកាន់តែច្រើន បន្ទាប់ពីមានជម្លោះព្រំដែនជាមួយប្រទេសជិត ខាង, ការផ្គត់ផ្គង់សម្ភារៈសំណង់អាចឆ្លើយតប និងការបង្កើតរោងចក្រ, និងក៏ដូចជាការទទួលបានអត្រាពន្ធគយពីសហរដ្ឋអាម៉េរិកជាដើម ខណៈដែលប្រទេសថៃបានកំពុងធ្វើឱ្យបាត់ទំនុកចិត្តដល់វិនិយោគបរទេស និងស្របពេលប្រទេសវៀតណាមមានកំលំាងពលកម្មថ្លៃជាង ប្រទេសកម្ពុជា និងការកង្វះគ្រឿងសំណង់ជាដើម។លោក ខេស៊ី បាណេត បន្ថែមថា ជុំវិញពន្ធបដិកាខាងលើនេះឃើញថា រាជរដ្ឋាភិបាលកម្ពុជាដែលដឹកនាំការចរចាដោយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បាននិងកំពុងព្យាយាមលើការចរចារ ជាមួយសហរដ្ឋអាម៉េរិក នៅលើប្រភេទទំនិញចំនួន ៧ មុខបន្ថែមទៀត ដើម្បីបញ្ចុះនូវអត្រាពន្ធគយបន្ថែម។ បញ្ហានេះប្រសិនបើថៃមិនគោរពតាមការសម្របសម្រួល នៃការចុះហត្ថលេខាកិច្ចព្រមព្រៀងសន្តិភាពរវាងប្រទេសទាំងពីរ ក្រោមគំនិតផ្តួចផ្តើមផ្ទាល់ របស់ឯកឧត្តម ដូណាត្រាំ ប្រធានាធីបតីនៃសហរដ្ឋអាមេរិក កម្ពុជានឹងអាចទទួលបានជោគជ័យលើការបន្ថូបន្ថយពន្ធបដិកានេះបន្ថែមទៀត។សូមបញ្ជាក់ថា នៅក្នុងរយៈពេល ៩ ខែ ឆ្នាំ២០២៥, ការធ្វើពាណិជ្ជកម្មទ្វេភាគីរវាងកម្ពុជា-អាម៉េរិក មានទំហំទឹកប្រាក់ជាង ៩ ៥០០ លានដុល្លារដុល្លារអាម៉េរិក កើនឡើងជាង ២២ ភាគរយ ក្នុងនោះកម្ពុជាបាននាំចេញទៅទីផ្សារអាម៉េរិក ជាង ៩ ២០០ លានដុល្លារដុល្លារ កើនឡើង ២២ ភាគរយ ខណៈការនាំចូលមកកម្ពុជាជាង ២៨៣ លានដុល្លារដុល្លារ បើប្រៀបធៀបរយៈពេលដូចគ្នានិងឆ្នាំ២០២៤៕ អត្ថបទ៖ សុន រ៉ាឌី

ក្រសួងកសិកម្មដាក់ឱ្យប្រើប្រាស់ជាផ្លូវការកម្មវិធី FARMBOOK APP ដើម្បីបង្កើនប្រសិទ្ធភាពការងារមន្រ្តីកសិកម្មឃុំ

ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី១៣ ខែតុលា ឆ្នាំ២០២៥នេះ បានរៀបចំវគ្គបណ្តុះបណ្តាលស្តីពីការតម្រង់ទិសដំបូង និងជំនាញឌីជីថល និងដាក់ឱ្យប្រើប្រាស់ជាផ្លូវការនូវកម្មវិធី FARMBOOK APP និងពិធីប្រគល់កុំព្យូទ័របន្ទះ (TABLET) ដល់មន្រ្តីកសិកម្មឃុំ-សង្កាត់ ដើម្បីងាយស្រួលក្នុងការចងក្រងជារបាយការណ៍ផ្ញើទៅកាន់ថ្នាក់ជាតិ ដើម្បីរៀបចំផែនការយុទ្ធសាស្ត្រ និងអន្តរាគមន៍បានទាន់ពេលវេលាក្នុងករណីមានបញ្ហាប្រឈម។ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នៅក្នុងកម្មវិធីនេះ បានសម្តែងការអបអរសាទរដល់មន្រ្តីកសិកម្មឃុំ-សង្កាត់ទាំងអស់ ដែលបានប្រលងជាប់ ហើយការចែកជូនកុំព្យូទ័របន្ទះនេះ ជាការគិតគូរច្បាស់លាស់របស់រាជរដ្ឋាភិបាល ក្នុងការជួយសម្រួលដល់ការអនុវត្តការងារឱ្យកាន់តែមានប្រសិទ្ធភាព ប្រើប្រាស់ក្នុងស្មារតីទទួលខុសត្រូវខ្ពស់ និងផ្សព្វផ្សាយអ្វីដែរត្រឹមត្រូវជាប្រយោជន៍ដល់ប្រជាកសិករ។ទាក់ទិនការដាក់ឱ្យប្រើប្រាស់កម្មវិធី FARMBOOK APP នេះ ឯកឧត្តមរដ្ឋមន្រ្តី បានលើកឡើងថា ដើម្បីបណ្ដុះបណ្ដាលមន្ដ្រីកសិកម្មឃុំ អំពីការប្រមូលព័ត៌មានពីកសិករនិងតួអង្គពាក់ព័ន្ធ សិក្សាប៉ាន់ស្មានផែនការតាមតំបន់ និងទំហំផលិតកម្ម សិក្សាពីតម្រូវការ និងព័ត៌មានរបស់ឣ្នកប្រមូលទិញធៀបនឹងទិន្នផល រៀបចំផែនការផលិតសមស្របទៅនឹងតម្រូវការទីផ្សារ ប៉ាន់ប្រមាណតម្រូវការធាតុចូលកសិកម្ម និងដឹងពីស្ថានភាពភូមិសាស្ត្រតាមតំបន់។ ហើយព័ត៌មានដែលទទួលបានទាំងនេះ នឹងត្រូវចងក្រងជារបាយការណ៍ផ្ញើទៅកាន់ថ្នាក់ជាតិ។ជាមួយនេះ ឯកឧត្តមរដ្ឋមន្រ្តី ឌិត ទីណា បានគូសបញ្ជាក់បន្ថែមអំពីសារៈសំខាន់នៃវិស័យកសិកម្ម ធ្វើយ៉ាងណាឱ្យប្រជាពលរដ្ឋ «មានហូប មានបាន មានប្រើ និងមានរហូត»។ លើសពីនេះទៀត ឯកឧត្តម បានណែនាំក្នុងការបម្រើផ្តល់សេវាប្រឹក្សាយោបល់ជូនប្រជាកសិករទាំងបច្ចេកទេសកសិកម្ម កត្តាទីផ្សារ ពាណិជ្ជកម្ម សេដ្ឋកិច្ច និងមានវិធីសាស្រ្តក្នុងការពន្យល់ឱ្យមានការចូលរួមពីប្រជាកសិករ ជាពិសេសការប្រមូលផ្តុំកសិករចងក្រងជាសហគមន៍កសិកម្មទំនើប ដែលអាចទទួលបានអត្ថប្រយោជន៍ជាច្រើន បានកម្ចីការប្រាក់ទាប លើកកម្ពស់ជីវភាព និងមានសេដ្ឋកិច្ចមាត្រដ្ឋាន។សូមបញ្ជាក់ថា វគ្គបណ្តុះបណ្តាលស្តីពី ការតម្រង់ទិសដំបូង និងជំនាញឌីជីថល និងដាក់ឱ្យប្រើប្រាស់ជាផ្លូវការ FARMBOOK APP និងពិធីប្រគល់កុំព្យូទ័របន្ទះ (TABLET) ដល់មន្រ្តីកសិកម្មឃុំ-សង្កាត់ មានការអញ្ជើញចូលរួមជាអធិបតីភាពរបស់ ឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា និង ឯកឧត្តម Stefan Messerer ឯកអគ្គរដ្ឋទូតអាល្លឺម៉ង់ប្រចាំកម្ពុជា ឯកឧត្តម គង់ ម៉ារី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងដៃគូអភិវឌ្ឍន៍នានា ព្រមទាំងលោកគ្រូ អ្នកគ្រូ និងមន្រ្តីជំនាញ ដែលជួយសហការរៀបចំកម្មវិធីនេះដើម្បីជួយដល់មន្រ្តីកសិកម្មឃុំឱ្យកាន់តែមានគុណភាព និងសមត្ថភាពមួយកម្រិតទៀតដើម្បីជួយដល់ប្រជាកសិករទាំងអស់នៅកម្ពុជាទាំងមូល៕ អត្ថបទ៖ ឈិត បូរ៉ាវី

កសិករអ្នកចិញ្ចឹមជ្រូក៣៨គ្រួសារនៅសហគមន៍កសិកម្មចំណារលើរីកចម្រើនស្រុកស្ទោងទទួលបានជំនួយឥតសំណង ៣២៥០០ដុល្លារ ពីគម្រោង CASDP

ជំនួយឥតសំណងចំនួន ៣២៥០០ដុល្លារ ត្រូវបានផ្តល់ជូនដល់បងប្អូនកសិករអ្នកចិញ្ចឹមជ្រូក៣៨គ្រួសារ មកពីសហគមន៍កសិកម្មចំណារលើរីកចម្រើន ស្រុកស្ទោង ខេត្តកំពង់ធំ តាមរយៈគម្រោងពិពិធកម្មកសិកម្មកម្ពុជា(CASDP)នៃក្រសួងកសិកម្ម សម្រាប់គាំទ្រជាទុនបដិភាគដល់ការទិញឧបករណ៍សម្ភារៈផលិតកម្មកូនជ្រូក និងជ្រូកសាច់ ដូចជា៖ សម្ភារៈសាងសង់ទ្រុងជ្រូក ម៉ាស៊ីនវ៉ៃកន្ទក់ ម៉ូទ័រហាន់ដើមចេក ម៉ូទ័របូមទឹក សម្ភារៈដាក់ចំណីជ្រូក និងមេ-បាជ្រូក។ នេះបើតាមឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម។ ឯកឧត្តម ឃឹម ហ្វីណង់ បានឱ្យដឹងថា មរយៈផែនការពង្រឹងសមត្ថភាពផលិតកម្មនិងបង្កើនប្រសិទ្ធភាពសេដ្ឋកិច្ច ដែលគាំទ្រដោយគម្រោង CASDP សហគមន៍ដែលមានសមាជិកភាគច្រើនជាស្ត្រីនេះ គ្រោងនឹងផលិតកូនជ្រូកយ៉ាងតិច២០០០ក្បាល និងជ្រូកសាច់ជិត៧០០០ក្បាល ក្នុងរយៈពេល៣ឆ្នាំខាងមុខ។ សហគមន៍ក៏គ្រោងនឹងប្រែក្លាយខ្លួនទៅជាសហគមន៍កសិកម្មទំនើបក្នុងពេលអនាគត ដោយសិក្សាពិនិត្យលទ្ធភាពទិញធាតុចូលរួមគ្នា ផលិតពូជកូនជ្រូករួមគ្នាដើម្បីផ្គត់ផ្គង់ដល់សមាជិកយកទៅចិញ្ចឹម និងចុះកិច្ចសន្យាតភ្ជាប់ទីផ្សារទុកជាមុនផងដែរ៕

បណ្ដាញសង្គម

ព័ត៌មានថ្មីៗ

លោក Trump និយាយថា ច្បាប់អាមេរិក រារាំងការឈរឈ្មោះជាប្រធានាធិបតីអាណត្តិទីបី

ធ្លាក់ព្រិលខ្លាំងខុសរដូវកាល ប៉ះពាល់ដល់ទេសចរណ៍ភ្នំអេវឺរ៉េស នៅនេប៉ាល់ និងតំបន់ទីបេ របស់ចិន

ក្រុមហ៊ុនទូទាំងពិភពលោក បានកាត់បន្ថយបុគ្គលិក ស្របពេលទំនុកចិត្តអតិថិជនចុះខ្សោយ និងការជំរុញ AI

សហរដ្ឋអាមេរិក ព្រមានពលរដ្ឋខ្លួននៅម៉ាលី ឱ្យចាកចេញពីប្រទេសនេះជាបន្ទាន់

អឌ្ឍចន្ទក្រហម៖ សាកសពជនអន្តោប្រវេសន៍ជិត ២០នាក់ ត្រូវស្រង់បានពីសមុទ្រប្រទេសលីប៊ី

លោក Trump និយាយថាកិច្ចពិភាក្សាជាមួយលោក Xi នឹងក្លាយជាលទ្ធផលដ៏ល្អបំផុតសម្រាប់ពិភពលោក

ប្រមុខការពារជាតិជប៉ុន-អាមេរិក បើកកិច្ចប្រជុំលើកដំបូងនៅក្នុងទីក្រុងតូក្យូ ប្រទេសជប៉ុន

រដ្ឋាភិបាលអាមេរិក ចូលរួមជាមួយដៃគូដើម្បីជំរុញថាមពលនុយក្លេអ៊ែរមានតម្លៃ៨០ពាន់លានដុល្លារ

កូរ៉េខាងត្បូង នឹងជូនគ្រឿងឥស្សរិយយសកម្រិតខ្ពស់បំផុត និងមកុដស្រោបមាស ឱ្យទៅលោក Trump

ចៅក្រមបង្គាប់ឲ្យអ្នកដឹកនាំក្នុងការបង្ក្រាបអន្តោប្រវេសន៍នៅChicago របស់លោក Trump បង្ហាញខ្លួនក្នុងតុលាការ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

ប្រធាន AmCham៖ ទំនិញអាម៉េរិកនឹងហូរចូល​កម្ពុជាកាន់តែ​ច្រើនជំរុញ​កំណើន​ពាណិជ្ជកម្ម​ប្រទេស​ទាំងពីរ