នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្របខ័ណ្ឌទស្សនាទានស្តីពីយុទ្ធសាស្រ្តជំរុញវិនិយោគនឹងជួយទាក់ទាញការវិនិយោគដល់កម្ពុជា
ប្រធានសមាគមក្នុងស្រុក៖ ការធ្វើពាណិជ្ជកម្មកម្ពុជា-អាមេរិក នឹង​មាន​សន្ទុះ​កាន់​តែ​ខ្លាំង​បន្ទាប់​ពី​ចុះ​កិច្ច​ព្រមព្រៀងថ្មីនេះ
ធុរកិច្ចកម្ពុជា-ម៉ាឡេស៊ី បង្កើតកិច្ចសហការផលិតទឹកដោះគោស្រស់ ដើម្បីបំពេញតម្រូវការទីផ្សារ
ផលិតផលខ្មែរជាច្រើនមុខ ដែលផលិតនៅក្នុងស្រុក បាននិងកំពុងដាក់លក់ នៅក្នុងស្តង់ ផ្សារផលិតផលខ្មែរ ខេត្តកំពង់ស្ពឺ

សេដ្ឋកិច្ច និង កសិកម្ម

កសិករ៣១គ្រួសារនៅសហគមន៍កសិកម្មអូរកន្ធរមានជ័យខេត្តកំពង់ធំ ទទួលបានជំនួយឥតសំណង ៥៣០០០ដុល្លារពីគម្រោងពិពិធកម្មកសិកម្មកម្ពុជា (CASDP)

2025/10/12 03:57:21 pm        171
Facebook Telegram Linkin
កំពង់ធំ៖ អបអរសាទរដល់បងប្អូនកសិករចំនួន ៣១គ្រួសារ មកពីសហគមន៍កសិកម្មអូរកន្ធរមានជ័យ នៅខេត្តកំពង់ធំ ដែលទទួលបានជំនួយឥតសំណងក្នុងទំហំទឹកប្រាក់ប្រមាណ ៥៣០០០ ដុល្លារ ពីគម្រោងពិពិធកម្មកសិកម្មកម្ពុជា (CASDP) សម្រាប់គាំទ្រជាទុនបដិភាគដល់ការទិញឧបករណ៍សម្ភារៈផលិតកម្មមួយចំនួន ដើម្បីអាចផលិតស្រូវពូជលក់បាន ដូចជា៖ ម៉ាស៊ីនច្រូត គោយន្ត ម៉ាស៊ីនប៉ូមទឹក ម៉ាស៊ីនព្រួសស្រូវ និងម៉ាស៊ីនស្ទូងស្រូវជាដើម។ នេះបើតាមឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម។ ឯកឧត្តម ឃឹម ហ្វីណង់ បានឱ្យដឹងថា តាមផែនការ សហគមន៍នេះគ្រោងនឹងប្រែក្លាយខ្លួនជាក្រុមមួយ ស្ថិតក្រោមរចនាសម្ព័ន្ធនៃសហគមន៍កសិកម្មទំនើបអភិវឌ្ឍដំណាំស្រូវកំពង់ធំ ដែលជាសហគមន៍ទំនើបដែលមានស្រាប់នៅក្នុងតំបន់តែមួយ។ ជាមួុយនឹងការវិនិយោគថ្មីនេះ សហគមន៍នឹងមានសមត្ថភាពផលិតពូជសុទ្ធប្រភេទសែនក្រអូបនិងស្រង៉ែក្នុងបរិមាណប្រមាណជាង១០០០តោន ដោយផ្តោតលើការផ្គត់ផ្គង់ស្រូវពូជផ្ទាល់ដល់សហគមន៍កសិកម្មទំនើបតែម្តង។ បើតាម ឯកឧត្តម ឃឹម ហ្វីណង់ គម្រោងពិពិធកម្មកសិកម្មកម្ពុជា(CASDP) គឺជាកម្មវិធីរបស់ក្រសួងកសិកម្ម និងគាំទ្រថវិកាហិរញ្ញប្បទានដោយធនាគារពិភពលោក ដែលផ្តល់ទុនបដិភាគរហូតដល់៤០%ដល់សហគមន៍កសិកម្មនិងសមាជិក ដើម្បីគាំទ្រដល់ការវិនិយោគលើមុខរបរអាជីវកម្មរបស់ខ្លួន៕

កម្ពុជាទទួលបានសំណើសុំចុះបញ្ជីវិនិយោគចំនួន ៧គម្រោង មានទុនសរុប ១,៣ ប៊ីលានដុល្លារអាម៉េររិក

2025/10/10 12:32:31 pm        285
Facebook Telegram Linkin
គណៈកម្មាធិការវិនិយោគកម្ពុជា ពិនិត្យ ពិភាក្សាលើសំណើសុំចុះបញ្ជី គម្រោង​វិនិយោគ​មាន​លក្ខណៈ​សម្បត្តិ​គ្រប់គ្រាន់ ចំនួន៧ គម្រោង មានទុនវិនិយោគសរុបប្រមាណ ១,៣ ប៊ីលាន​ដុល្លារ​អាម៉េរិក ​និងអាចបង្កើតការងារបានប្រមាណ ៨,៣ ពាន់កន្លែង។ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា នៅ​ថ្ងៃ​ទី៩ ខែតុលា ឆ្នាំ ២០២៥នេះ បានអញ្ជើញជាអធិបតីភាព “កិច្ចប្រជុំច្រកចេញ-ចូល​តែ​មួយ​” លើកទី១៥ ក្នុងឆ្នាំ២០២៥ ត្រូវបានរៀបចំឡើងដើម្បី ពិនិត្យ ពិភាក្សា លើសំណើសុំចុះបញ្ជី គម្រោង​វិនិយោគមានលក្ខណៈសម្បត្តិគ្រប់គ្រាន់ចំនួន ៧ គម្រោង ដោយមានការអញ្ជើញ ចូលរួម​ពី​សំណាក់​តំណាងក្រសួង-ស្ថាប័ន និងរដ្ឋបាលរាជធានី-ខេត្តពាក់ព័ន្ធ។ ជុំវិញគម្រោងវិនិយោគខាងលើនេះ មានគម្រោងវិនិយោគក្នុងវិស័យឧស្សាហកម្មចំនួន៥គម្រោង (ផលិត​ឧបករណ៍ជាង និង សម្ភារៈបន្ទាប់បន្សំ (ពីលោហធាតុនិងប្លាស្ទិក), ស្ល និងកែច្នៃ​លោ​ហ​ធាតុ​, ផលិតក្រណាត់ និងអំបោះគ្រប់ប្រភេទ, ផលិតសម្ភារៈ លម្អក្នុងផ្ទះគ្រប់ប្រភេទ, កាត់ដេរ​សម្លៀក​បំពាក់​ កាបូប សម្លៀកបំពាក់សត្វចិញ្ចឹម គ្រឿងតុបតែងលម្អសម្លៀកបំពាក់ និងគ្រឿង អលង្ការ​កាទ្បៃ និងវិស័យហេដ្ឋារចនាសម្ព័ន្ធចំនួន២គម្រោងគឺគម្រោងបង្កើតមន្ទីរពេទ្យ និងមន្ទីរ​ពហុ​ព្យាបាល​ជំងឺចំនួន២២១ គ្រែ និង គម្រោងសាងសង់ និងប្រតិបត្តិការ​ព្រែក​ជីក​ហ្វូណន​តេជោ​។ ចំពោះគម្រោងវិនិយោគទាំង៧គម្រោងខាងលើនេះ ក្រុមហ៊ុន​ទាំង​នោះ​បាន​ជ្រើស​រើស​បង្កើត​រោង​ចក្រ​នៅ​តាមតំបន់ផ្សេងៗគ្នា រួមមាន៖ ខេត្តកណ្តាល កំពង់ស្ពឺ តាកែវ កំពត និងខេត្តកែប។សូមបញ្ជាក់ថា នៅក្នុងរយៈពេល៩ ខែ ឆ្នាំ២០២៥នេះ, ក្រុមប្រឹក្សាអភិវឌ្ឍន៍កម្ពុជា បាន​អនុម័ត​គម្រោង​វិនិយោគសរុបចំនួន ៥៤៦ គម្រោង កើនឡើងប្រមាណ ៧៣% ធៀបនិងឆ្នាំមុន ក្នុង​ទុន​វិនិយោគ​សរុប ៧,៨ ប៊ីលានដុល្លារអាម៉េរិក នឹងបង្កើតការងារបានជាង ៣៧៦ ពាន់កន្លែង៕ អត្ថបទ៖ សុន រ៉ាឌី

ការដោះដូរពាណិជ្ជរបស់កម្ពុជា ក្នុងរយៈពេល៩ខែ មានទំហំទឹកប្រាក់ជិត ៤៨ពាន់លានដុល្លារ

2025/10/10 12:15:24 pm        259
Facebook Telegram Linkin
នៅក្នុងរយៈពេល ៩ខែ ឆ្នាំ២០២៥នេះ ការដោះដូរពាណិជ្ជកម្មអន្តរជាតិរបស់កម្ពុជា មានទំហំទឹកប្រាក់សរុបជិត ៤៨ពាន់លាន ដុល្លារអាម៉េរិក ក្នុងនោះកម្ពុជាបាន​នាំចេញ​ទំនិញ​សំខាន់ៗ មានទឹកប្រាក់ជាង ២៣ពាន់លានដុល្លារ ខណៈតម្លៃនៃការនាំចូលមានទឹក ប្រាក់សរុបជិត ២៤ពាន់លានដុល្លារ។អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានបង្ហាញស្ថិតិពាណិជ្ជកម្ម នៃការធ្វើពាណិជ្ជកម្មលើ ទីផ្សារអន្តរជាតិរបស់កម្ពុជា ក្នុងរយៈពេល៩ ខែ ឆ្នាំ២០២៥នេះ, ក្នុងនោះការធ្វើពាណិជ្ជកម្មទំនិញជាមួយប្រទេសដៃគូរសំខាន់ៗរបស់ កម្ពុជា មានទំហំទឹកប្រាក់សរុបប្រមាណជាង ៤៧,៨ ពាន់លានដុល្លារអាមេរិក កើនឡើងជាង ៦ ពាន់លានដុល្លារអាម៉េរិក ស្មើនឹង ១៦% បើប្រៀបធៀបនឹងរយៈពេល ៩ ខែ ឆ្នាំ២០២៤ (មានត្រឹមជាង ៤១ ពាន់លានដុល្លារអាម៉េរិកប៉ុណ្ណោះ)។ចំណែកការនាំចេញ-ចូលវិញ នៅក្នុងរយៈពេល ៩ ខែនេះ ក្នុងនោះសម្រាប់ពាណិជ្ជកម្មនៃការនាំចេញររបស់កម្ពុជា មានតម្លៃ សរុបជាង ២៣ ពាន់លានដុល្លារអាម៉េរិក កើនឡើងជាង ៣ ពាន់លានដុល្លារអាម៉េរិក ស្មើនឹង ១៥% បើប្រៀបធៀបនឹងរយៈពេល៩ ខែ ឆ្នាំ២០២៤ (ដែលមានចំនួនជាង ២០ ពាន់លានដុល្លារអាម៉េរិក)។ ចំណែកការនាំចូលវិញ, មានតម្លៃសរុបជាង ២៤ ពាន់លានដុល្លារ អាម៉េរិក កើនឡើងជាង ៣,៣ ពាន់លានដុល្លារអាម៉េរិក ស្មើនឹង ១៦% បើប្រៀបធៀបនឹងរយៈពេល៩ ខែ ឆ្នាំ២០២៤ (មានជាង ២១ ពាន់លានដុល្លារអាម៉េរិកប៉ុណ្ណោះ)។សូមបញ្ជាក់ថា ជុំវិញការធ្វើពាណិជ្ជកម្មជាអន្តរជាតិរបស់កម្ពុជានេះ ក្នុងនោះជញ្ជីងពាណិជ្ជកម្ម (នៃនាំចេញ-នាំចូល) ក្នុងរយៈពេល៩ ខែ ឆ្នាំ២០២៥នេះ មានតម្លៃស្មើនឹង -១,៣៣៥ លានដុល្លារអាម៉េរិក ដែលនេះបានបង្ហាញពីការរប្រកួតប្រជែងមានតុល្យភាពប្រហាក់ ប្រហែលគ្នា ជាពិសេសបានបង្ហាញអំពីទំនោរនៃការនាំចេញរបស់កម្ពុជាមានកំណើនល្អប្រសើរ៕ អត្ថបទ៖ សុន រ៉ាឌី

កម្ពុជានាំចេញកសិផលគ្រប់ប្រភេទ មានទំហំទឹកប្រាក់ជាង ៣.៨៨៨ លានដុល្លារអាម៉េរិក

2025/10/09 04:27:53 pm        387
Facebook Telegram Linkin
កម្ពុជាបាននាំចេញកសិផលទៅទីផ្សារក្រៅប្រទេស នៅក្នុងរយៈពេល ៩ខែ ឆ្នាំ២០២៥, មាន​បរិមាណ​សរុប​ជាង ១១,១ លានតោន គិតជាទំហំទឹកប្រាក់ត្រូវប្រមាណជាង ៣.៨៨៨ លាន​ដុល្លារ​អាម៉េរិក ដោយគាំទ្រដោយកសិផលជាច្រើនប្រភេទ ជំរុញដល់ ការនាំចេញ​មាន​កំណើន​ខ្ពស់​។អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានបង្ហាញរបាយការណ៍ នៃ​ការ​នាំ​ចេញ​កសិផលរបស់ កម្ពុជា ក្នុងរយៈពេល ៩ ខែ ឆ្នាំ២០២៥, ក្នុងនោះ​សម្រាប់​ការ​នាំ​ចេញ​កសិផល​របស់​កម្ពុជាទៅក្រៅប្រទេស មានបរិមាណសរុបជាង ១១,១ លានតោន កើនឡើង​ប្រមាណ​ជាង ៣០ភាគរយ ក្នុងនោះការនាំចេញអង្ករចំនួនជិត ៦០ ម៉ឺនតោន កើនឡើង ៣៣ ភាគរយ​, ស្រូវជាង ៥,២ លានតោន កើនឡើង ៦៧ ភាគរយ បើធៀប​រយៈពេល​ដូច​គ្នា​ឆ្នាំ​២០២៤​ ដោយកម្ពុជានាំចេញទៅកាន់ទីផ្សារគោលដៅ ចំនួន ៨៨ ប្រទេស។ទាក់ទិនទំហំទឹកប្រាក់វិញ, បើគិតតម្លៃទឹកប្រាក់នៃការនាំចេញក្នុងរយៈពេល៩ខែរនេះ, ការ​ធ្វើ​ពាណិជ្ជ​កម្ម​នៃការនំាចេញ កសិផលរបស់កម្ពុជា មានទំហំទឹកប្រាក់សរុបជិត ៣.៨៨៨ លាន​ដុល្លារ​អាមេរិក ដែលក្នុងនោះតម្លៃទឹកប្រាក់នៃការនាំចេញផលិតផល ដំណាំក្រៅពីស្រូវ-អង្ករ មាន​ចំនួនជិត ៣.០០០ លានដុល្លារអាម៉េរិក, ការនាំចេញស្រូវ មានចំនួនជាង ១ ពាន់​លាន​ដុល្លារ​អាម៉េរិក និងការនាំចេញអង្ករ មានចំនួនជាង ៤៥៥ លានដុល្លារអាម៉េរិក។ ចំណែក​ការ​នាំ​ចេញ​ផលិត​ផល​ដំណាំក្រៅពីស្រូវ-អង្ករ ទៅប្រទេសថៃ មានចំនួនជិត ៣៦០ លានដុល្លារអាម៉េរិក ស្មើ​ជាង ៦ ភាគរយ នៃការនាំចេញសរុប។សូមបញ្ជាក់ថា ការនាំចេញផលិតផលដំណាំក្នុងរយៈពេល៩ខែ ឆ្នាំ២០២៥, ទោះបី​មាន​កំណើន​ជាង​ ៣០ភាគរយ ក៏ពិតមែន តែ ផលិតផលដំណាំមួយចំនួនមានការថយចុះ បណ្ដាល​មក​ពី​កត្តា​មួយ​ចំនួន​ដូចជា​៖ ការនាំចេញដំឡូងមីស្រស់ថយចុះ ដោយសារប្រជា កសិករបំប្លែងពីដំឡូង​មី​ស្រស់​ទៅ​ក្រៀម និងកែច្នៃជាម្សៅ ដើម្បីអាចរក្សាទុកបានយូរនិងមានតម្លៃខ្ពស់។ ជាក់ស្តែង​ក្នុង​រយៈពេល ៩ខែ ឆ្នាំ២០២៥នេះ ការនាំចេញដំឡូងមីក្រៀមកើនឡើងចំនួនជាង ៥៧ ភាគរយ និង​ម្សៅ​ដំ​ឡូងមីកើនឡើងចំនួនជាង ៨៣ ភាគរយ បើធៀបនឹងរយៈពេលដូចគ្នាឆ្នាំ២០២៤៕ អត្ថបទ៖ សុន រ៉ាឌី

ទំហំមូលធនូបនីយកម្មទីផ្សារសរុបរបស់ផ្សារមូលបត្រកម្ពុជាមានតម្លៃ ២,៧៥ ពាន់លាន​ដុល្លារ​អាម៉េរិក

2025/10/08 12:38:00 pm        181
Facebook Telegram Linkin
គិតត្រឹមត្រីមាសទី២ ឆ្នាំ២០២៥នេះ ទំហំមូលធនូបនីយកម្មទីផ្សារសរុប របស់ផ្សារ​មូល​បត្រ​កម្ពុជា​មានតម្លៃប្រមាណជាង ១១ ទីលានរៀល ត្រូវ ២,៧៥ ពាន់លានដុល្លារអាម៉េរិក ឬស្មើនឹង ៥,៧៣% ធៀបនឹងផលិតផលក្នុងស្រុកសរុប។ ឯកឧត្តម ស៊ូ សុជាតិ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃនិយ័តករមូលបតកម្ពុជា លើក​ឡើង​នៅក្នុង «សន្និសីទ មូលបត្រប្រចាំឆ្នាំ ២០២៥ ក្រោមមូលបទ៖ ការវិវត្តនៃវិស័យ​មូល​បត្រ​៖ ចីរភាព នវានុវត្ត បរិយាបន្ន និងភាពធន់» នៅថ្ងៃទី៧ ខែតុលា ឆ្នាំ២០២៥ នេះថា សមិទ្ធ​ផល​ទីផ្សារ គិតមកដល់បច្ចុប្បន្ន, ផ្សារមូលបត្រកម្ពុជាមានក្រុមហ៊ុនចំនួន ២៥ បានបោះផ្សាយ​លក់​មូល​បត្រ និងចុះបញ្ជីលក់មូលបត្រនៅផ្សារមូលបត្រកម្ពុជា ដែលក្រុមហ៊ុនទាំង២៥នេះ បាន​ប្រមូល​សាច់​ប្រាក់ក្នុងរង្វង់ ៥៥០ លានដុល្លារ អាម៉េរិក ហើយនៅថ្ងៃនេះ ផ្សារមូលបត្រ​នឹង​មាន​ការ​ចុះបញ្ជី​សញ្ញាបណ្ណចំនួន ១០០ លានដុល្លារអាម៉េរិកបន្ថែមទៀត។ឯកឧត្តម បន្តឱ្យដឹងថា ក្នុងចំណោមក្រុមហ៊ុនទាំង២៥ នេះ មានក្រុមហ៊ុនចំនួន ១១ បាន​បោះ​ផ្សាយ​លក់​មូលបត្រកម្មសិទ្ធិ និងក្រុមហ៊ុនចំនួន ១៤ បានបោះផ្សាយលក់សញ្ញាបណ្ណ ដោយរួម​បញ្ចូល​ទាំង​សញ្ញាបណ្ណបៃតង និងសញ្ញាបណ្ណចីរភាព ដែលនេះជា មោទនភាពមួយ​សម្រាប់​កម្ពុជា​។ ​ថ្វីត្បិតតែប្រទេសយើងចាប់ផ្តើមទីផ្សារដើរក្រោយគេ ហើយទំហំទីផ្សារនៅតូច តែ​ការ​អនុវត្ត និងការអភិវឌ្ឍទីផ្សារ គឺស្របទៅនឹងនិន្នាការថ្នាក់តំបន់ និងសកល។ ចំពោះ​សញ្ញា​បណ្ណ​ដែល​បានបោះផ្សាយ គឺមានឥណប្រតិទានចន្លោះពី ៣ ឆ្នាំ ដល់ ១៥ ឆ្នាំ, ជាក់ស្តែង​គិត​ត្រឹម​ត្រី​មាស​ទី២ ឆ្នាំ២០២៥ ទំហំមូលធនូបនីយកម្មទីផ្សារសរុបមានតម្លៃជាង ១១ទីលានរៀល ត្រូវ​ប្រមាណ​ ២,៧៥ ពាន់លានដុល្លារអាម៉េរិក។ឆ្លើយតបទីផ្សារនេះ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋ​មន្រ្តី​ក្រសួង​សេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ បាន​ផ្ដល់​នូវអនុសាសន៍មួយចំនួនរួមមាន៖ និយ័តករមូលបត្រកម្ពុជា ត្រូវដឹកនាំ​អនុវត្ត​យុទ្ធសាស្រ្ត​អភិវឌ្ឍន៍​វិស័យមូលបត្រ ២០២៥-២០៣៥ ប្រកបដោយស្មារតីបុរេសកម្ម, ម្ចាស់ការ និងការ​ទទួល​ខុស​ត្រូវខ្ពស់។ ត្រូវសហការគ្នាឲ្យបានជិតស្និទ្ធ ដើម្បីពិនិត្យ​ឡើង​វិញ​នូវ​ហេដ្ឋា​រចនា​សម្ព័ន្ធ​ទីផ្សារ​ដែល​មាន​ស្រាប់ ដោយពង្រឹងធ្វើទំនើបកម្ម និងអាចឈានទៅដល់​ការ​កែ​ទម្រង់​ចាំបាច់​នានា​ជា​ជំហាន​ៗ។ និយ័តករមូលបត្រកម្ពុជា និងស្ថាប័នស្ថិតក្រោមនិយ័តកម្ម ត្រូវបន្តធ្វើការ រួមគ្នា និង​សហការ​គ្នាស្អិតល្មួត ប្រកបដោយស្មារតីទទួលខុសត្រូវខ្ពស់ ដោយតម្កល់ផលប្រយោជន៍ និង​ការ​គាំ​ពារ​វិនិយោគិន ជាអាទិភាព ស្របតាមយន្តការដែលមានស្រាប់ និងអាចពិនិត្យ បង្កើត​យន្តការ​ថ្មី​បន្ថែម​។ ត្រូវបន្តកិច្ចសហការល្អ ក្នុងការលើកកម្ពស់ការ អភិវឌ្ឍទីផ្សារមូលបត្រចីរភាព ក៏ដូចជា​ក្នុង​ការ​ជំរុញអនុវត្តគោលនយោបាយពាក់ព័ន្ធ ដើម្បីចូលរួមគាំទ្រកម្ពុជា សម្រេចបាននូវ គោល​ដៅ​អព្យា​ក្រឹត្យ​កាបូន ២០៥០ ព្រមទាំងត្រូវបន្តនូវកិច្ច សហការស្អិតល្មួត ក្នុងយុទ្ធនាការ​ប្រឆាំង​ការឆបោក​តាម​ប្រព័ន្ធបច្ចេកវិទ្យា ដើម្បីធានាថា វិស័យមូលបត្រ មិនត្រូវជាប់ពាក់ព័ន្ធ​ជាមួយ​នឹង​បញ្ហា​នៃការឆបោកតាមប្រព័ន្ធបច្ចេកវិទ្យាទាំងនេះឡើយ។ និយ័តករមូល បត្រកម្ពុជា ត្រូវប​ន្ត​ជំរុ​ញ​ការ​ធ្វើ​បរិវត្តកម្មឌីជីថល ទាំងក្នុងស្ថាប័ននិយ័តករមូលបត្រ និងវិស័យមូលបត្រទាំងមូល ដោយ​មាន​ការចូលរួមយ៉ាងសកម្ម ពីគ្រប់តួអង្គពាក់ព័ន្ធក្នុងទីផ្សារនិង ត្រូវបន្តជំរុញសមាហរណកម្មទីផ្សារ ជាមួយនឹងនិយ័តករក្នុងតំបន់ និងអន្តរជាតិ ដើម្បីរក្សាទីផ្សារមូលបត្រឲ្យបានរឹងមាំ៕ អត្ថបទ៖ សុន រ៉ាឌី

ជប៉ុនផ្ដល់ឥណទានសម្បទានទឹកប្រាក់សរុបជិត ៣០០លានដុល្លារ សម្រាប់​អនុវត្ត​គម្រោង​ចំនួនពីរ​​នៅកម្ពុជា

2025/10/08 11:47:56 am        570
Facebook Telegram Linkin
នៅព្រឹកថ្ងៃទី៨ ខែតុលា ឆ្នាំ២០២៥នេះ កម្ពុជា និងជប៉ុន បាន​ចុះហត្ថលេខាលើលិខិតប្ដូរសារ ស្ដីពី​ការ​ផ្តល់ឥណទានសម្បទានប្រាក់យ៉េនរបស់រដ្ឋាភិបាលជប៉ុន សរុបជិត ៣០០​លាន​ដុល្លារ​សហរដ្ឋ​អាមេរិក​ សម្រាប់​អនុវត្ត​គម្រោង​ចំនួនពីរ គឺគម្រោងពង្រីកប្រព័ន្ធផ្គត់ផ្គង់ទឹកស្អាតនិរោធ និង​គម្រោង​ពង្រីក​ប្រព័ន្ធ​ខ្សែ​បញ្ជូន និង​ចែកចាយអគ្គិសនីក្នុង រាជធានីភ្នំពេញ (ដំណាក់​កាល​ទី៣​)​។ពិធីចុះហត្ថលេខានេះប្រារព្ធឡើងក្រោម​អធិបតីភាព​ឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកឧត្តម UENO Atsushi ឯក​អគ្គ​រាជ​ទូត​វិសាមញ្ញ និងពេញសមត្ថភាពជប៉ុនប្រចាំកម្ពុជា គម្រោងទាំងពីរនោះរួមមាន៖ ១. ទឹកប្រាក់ចំនួន ២១.៥២៦.០០០.០០០ យ៉េន (ប្រមាណ ១៤៣.៥ លានដុល្លារ អាម៉េរិក) សម្រាប់អនុវត្តគម្រោងពង្រីកប្រព័ន្ធផ្គត់ផ្គង់ទឹកស្អាតនិរោធ និង ២. ទឹកប្រាក់ចំនួន ២២.៩១១.០០០.០០០ យ៉េន (ប្រមាណ ១៥២.៧ លានដុល្លារ អាម៉េរិក) សម្រាប់អនុវត្តគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនីក្នុង រាជធានីភ្នំពេញ (ដំណាក់កាលទី៣)។ការបន្តផ្តល់ជំនួយហិរញ្ញវត្ថុនេះ បញ្ជាក់ពីការប្តេជ្ញាចិត្តយ៉ាងមុតមាំរបស់ជប៉ុន ក្នុងការ ជំរុ​ញ​ការ​អភិវឌ្ឍ​សង្គម-សេដ្ឋកិច្ចរបស់កម្ពុជា និងពង្រឹងបន្ថែមទៀតនូវភាពជាដៃគូយុទ្ធសាស្ត គ្រប់ជ្រុង​ជ្រោយ​រវាង​ប្រទេសទាំងពីរ៕

អាជ្ញាធរខេត្តកែបជំរុញលើកទឹកចិត្តសហគមន៍ឱ្យពង្រីកការចិញ្ចឹមត្រីឆ្ពង់ ដើម្បីផ្តត់ផ្គង់​តម្រូវ​ការ​ទេសចរ

2025/10/07 12:11:45 pm        513
Facebook Telegram Linkin
អាជ្ញាធរខេត្តកែប បានលើកទឹកចិត្តដល់សហគមន៍នេសាទទាំង៥ ឱ្យបន្តខិតខិតសិក្សាស្រាវជ្រាវ ពង្រីក​ការ​ចិញ្ចឹមត្រីឆ្ពង់នៅតាមសហគមន៍របស់ខ្លួនឱ្យបានច្រើន ដើម្បីឆ្លើយតបតម្រូវ​ការ​របស់​ភ្ញៀវ​ទេសចរ មកលេងខេត្តកែប និងបានណែនាំដល់មន្ទីរជំនាញពាក់ព័ន្ធ ឲ្យបន្តជួយជ្រោម​ជ្រែក​គាំ​ទ្រ ​ទាំងស្មារតី និង សម្ភារបច្ចេកទេសដល់សហគមន៍នីមួយៗ។នៅក្នុងដំណើរចុះពិនិត្យការចិញ្ចឹមត្រីឆ្ពង់នៅសហគមន៍នេសាទអូរក្រសារ នាពេលថ្មីៗនេះ លោក ហ៊ួរ មិថុនា អភិបាលរងខេត្តកែប ទទួលបន្ទុក វិស័យកសិកម្ម និងពាណិជ្ជកម្ម បានលើកឡើងថា ត្រីឆ្ពង់ ជាមុខម្ហូបដែលទទួលបានការនិយមចូលចិត្តពីពលរដ្ឋ និងអ្នកទេសចរ ហើយកន្លងមក ឯកឧត្តម​ ឧបនាយករដ្ឋមន្រ្តី សាយ សំណាល់ ប្រធានក្រុមការងាររាជរដ្ឋាភិបាលចុះ ជួយ​មូល​ដ្ឋាន​​ខេត្ត​កែប ក៏បានជំរុញអាជ្ញាធរ ខេត្តឱ្យខិតខំពង្រឹង និងពង្រីកការធ្វើវារីវប្បកម្ម ដើម្បី​លើក​កម្ពស់​ជីវភាពប្រជាពលរដ្ឋ ស្របពេលកំណើន ទេសចរក្នុងខេត្តបន្តកើនឡើង។លោកបានបន្តថា បច្ចុប្បន្ននេះ សហគមន៍នេសាទ៥នៅខេត្តកែប ទើបឃើញ​សហគមន៍​នេសាទ​អូរក្រសារ​មួយប៉ុណ្ណោះ ដែលបាននឹងកំពុងចិញ្ចឹមត្រីឆ្ពង់ ទទួលបានលទ្ធផលឆ្លើយតបល្អប្រសើរ។ លោកជំរុញលើកទឹកចិត្តដល់មន្ត្រីជំនាញ មន្ទីរអង្គភាពពាក់ព័ន្ធ សូមបង្កើនការយកចិត្តទុកដាក់ បន្ត​សិក្សា និងពង្រីកការចិញ្ចឹមត្រីឆ្ពង់នៅសហគមន៍៤ផ្សេងទៀតឲ្យបានល្អប្រសើរ ព្រោះតម្រូវការទីផ្សារក្នុងខេត្ត មិន ទាន់អាចផ្គត់ផ្គង់គ្រប់នៅឡើយទេ។ លោក ថឹង បូរិន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកែប បានបញ្ជាក់ថា មន្ទីរបាន នឹងកំពុង​ជំរុញការចិញ្ចឹមត្រីឆ្ពង់ នៅគ្រប់សហគមន៍នេសាទទូទាំងខេត្ត ព្រោះមន្ទីរ បាន​មើល​ឃើញ​​ពី​សក្តានុពល នៃវារីវប្បកម្មនៅតាមតំបន់ឆ្នេរ ពិសេសការចិញ្ចឹមត្រីឆ្ពង់ វាជាផ្នែកមួយ​ជួយ​ដល់​ការ​ងារអភិរក្សឱ្យមានស្ថិរភាព។ លោក នួន សុភ័ក្រ ប្រធានសហគមន៍នេសាទអូរក្រសារ បានឱ្យដឹងថា បច្ចុប្បន្ន មានប្រជាសហ គមន៍​បួន​គ្រួសារ​ប៉ុណ្ណោះដែលបាននឹងកំពុងចិញ្ចឹមត្រីឆ្ពង់ ដោយក្នុងមួយគ្រួសារ មានត្រីត្រឹម​តែ​ជាង​មួយពាន់ក្បាល។ ត្រីឆ្ពង់ដែលប្រមូលផលបាន យកទៅផ្គត់ផ្គង់​ឱ្យ​បណ្តា​ភោជនីយ​ដ្ឋាន​នៅក្នុ​ង​ខេត្ត​ និងមួយចំ នួនទៀតឲ្យភ្ញៀវទេសចរដែលមកលេងផ្ទាល់ ក្នុងតម្លៃ​២៥,០០០​រៀល​ក្នុង​មួយ​គីឡូ៕ អត្ថបទ៖ សារឹម

ADB បានអនុម័តដំណាក់កាលទីពីរ​នៃ​កម្មវិធី​អភិវឌ្ឍន៍​អន្តរកម្ម​ថាមពល​នៅ​កម្ពុ​ជា​ដោយ​មាន​ទឹក​ប្រាក់​ជាង ៨២លានដុល្លារ

2025/10/07 11:29:06 am        114
Facebook Telegram Linkin
ធនាគារអភិវឌ្ឍន៍អាស៊ី ដែលហៅកាត់ថា ADB បានអនុម័តដំណាក់កាលទីពីរនៃ កម្ម​វិធី​អភិវឌ្ឍន៍​វិស័យ​សម្រាប់​អន្តរកម្ម​ថាមពល(ETSDP) របស់កម្ពុជា ដែលមានទឹកប្រាក់ ៨២,៥ លាន​ដុល្លារ​អាម៉េរិក ហើយនឹងបន្តដំណាក់កាលទីបីទៀត នៅឆ្នាំ២០៣០។ នេះបើតាម​ផេក​ហ្វេស​បុក​ផ្លូវ​ការ​របស់​ ADB។យោងតាមផេកហ្វេសបុករបស់ធនាគារអភិវឌ្ឍន៍អាស៊ី ដែលបានចេញនៅថ្ងៃទី៧ ខែតុលា ឆ្នាំ​២០២៥​នេះ​បានបញ្ជាក់ថា ធនាគារអភិវឌ្ឍន៍អាស៊ី (ADB)បានអនុម័តដំណាក់កាលទីពីរនៃ កម្ម​វិធី​អភិវឌ្ឍន៍វិស័យសម្រាប់អន្តរកម្មថាមពល (ETSDP) របស់កម្ពុជាដែលមានទឹកប្រាក់ ៨២,៥ លាន​ដុល្លារ​។ ដោយមានសហហិរញ្ញប្បទានពីមូលនិធិហេដ្ឋារចនាសម្ព័ន្ធអាស៊ាន (ASEAN Infrastructure Fund), មូលនិធិហិរញ្ញវត្ថុអាកាសធាតុអាស៊ីប៉ាស៊ីហ្វិក (Asia-Pacific Climate Finance Fund), មូលនិធិអាកាសធាតុបៃតង(Green Climate Fund), និងចក្រភពអង់គ្លេស តាមរយៈ មូលនិធិហរញ្ញវត្ថុបៃតងដើម្បីជំរុញសេដ្ឋកិច្ចអាស៊ាន (ASEAN Catalytic Green Finance Facility) កម្មវិធីនេះមានគោលបំណង ផ្តល់ការគាំទ្រទូលំទូលាយ សម្រាប់​អន្តរ​កម្ម​ថា​មព​ល​ស្អាត របស់ប្រទេស ដោយរួមបញ្ចូល​គ្នា​នូវ​កំណែ​ទម្រង់​គោល​នយោបាយ​ជាមួយ​នឹង​គម្រោង​វិនិយោគបច្ចេកវិទ្យាថ្មីៗ។ តាមរយៈផេកហ្វេសបុកនេះ បានបញ្ជាក់បន្ថែមទៀតថា កម្មវិធីដំណាក់​កាល​ទីមួយ​ដែល​ត្រូវ​បាន​អនុម័ត​ក្នុង​ឆ្នាំ២០២២ បានដាក់ចេញនូវវិធានការ គោលនយោបាយសំខាន់ៗ ដែលដឹកនាំ​វិស័យ​ថាមពល ឆ្ពោះទៅរកការអភិវឌ្ឍថាមពលកកើតឡើងវិញប្រកបដោយប្រសិទ្ធភាព។ ផ្អែក​លើ​មូល​ដ្ឋាន​នេះ កម្មវិធីដំណាក់កាលទីពីរ ជំរុញកំណែទម្រង់លិខិតបទដ្ឋានគតិយុត្ត ដើម្បីពង្រឹង​ក្រប​ខ័ណ្ឌ​ប្រសិទ្ធភាពថាមពល និងបង្កើនភាពច្បាស់លាស់ នៃគោលនយោបាយ សំដៅទាក់​ទាញ​ការ​វិនិយោគ​ពី​វិស័យឯកជន។ សមិទ្ធផលសំខាន់នៃកម្មវិធីនេះគឺ ការបង្កើតសំណុំ​បទ​ប្បញ្ញត្តិ​ដំបូង​របស់​កម្ពុជា​សម្រាប់បង្កើត ស្តង់ដារប្រសិទ្ធភាពថាមពលអប្បបរមា (Minimum Energy Performance Standards) សម្រាប់ឧបករណ៍អគ្គិសនី ដោយចាប់ផ្តើមពី ម៉ាស៊ីនត្រជាក់ ដែល​រួម​ចំណែក​ធំបំផុតក្នុងការប្រើប្រាស់ថាមពលក្នុងវិស័យលំនៅដ្ឋាន។កម្មវិធីដំណាក់កាលទីពីរនេះ ក៏នឹងបង្កើតមូលនិធិបង្វិលសម្រាប់ប្រសិទ្ធភាពថាមពល (Energy Efficiency Revolving Fund) ផងដែរ ក្នុងគោល​បំណង​សម្រប​សម្រួល​លទ្ធភាព​ទទួល​បាន​ហិរញ្ញ​វត្ថុ​សម្រាប់សហគ្រាសធុនតូចនិងមធ្យមក្នុងស្រុក ដើម្បីវិនិយោគ​លើ​បច្ចេក​វិទ្យា​សន្សំ​សំចៃ​ថាមពល​។ មូលនិធិបង្វិលនេះ នឹងត្រូវបានបង្កើតឡើងតាមរយៈរចនាសម្ព័ន្ធអន្តរការីហិរញ្ញវត្ថុ ដើម្បី​ឱ្យ​ធនាគារក្នុងស្រុកអាចបង្កើនប្រាក់កម្ចីដល់សហគ្រាសធុនតូច និងមធ្យម សម្រាប់​ការ​វិនិយោគ លើប្រសិទ្ធភាពថាមពល។ តាមរយៈការបញ្ចូលស្ថាប័នហិរញ្ញវត្ថុក្នុងស្រុក និងការ​គាំទ្រ​ដល់​សហគ្រាសធុនតូច និងមធ្យម មូលនិធិបង្វិលនេះត្រូវបាន​រំពឹងថា​នឹង​ពន្លឿន​ការ​វិនិយោគ​លើ​ប្រសិទ្ធ​ភាព​ថាមពលនៅទូទាំងប្រទេសកម្ពុជា។ជាមួយគ្នានេះនាយកស្តីទីធនាគារអភិវឌ្ឍន៍អាស៊ីប្រចាំកម្ពុជា លោក Anthony Gill មាន​ប្រសាសន៍​ថា «ADB មាន​កិត្តិយស​ក្នុង​ការ​ជួយ​ដល់​ប្រទេស​កម្ពុជា​ក្នុង​ដំណើរ​ប្រកប​ដោយ​មហិច្ឆិតា​ និងការផ្លាស់ប្តូរ ក្នុងវិស័យថាមពល។ តាមរយៈកញ្ចប់ហិរញ្ញប្បទានកំណែទម្រង់ដ៏ទូលំទូលាយ ដែលរួមបញ្ចូលគ្នានូវការគាំទ្រ គោល​នយោបាយ​ជាមួយនឹងការវិនិយោគជាយុទ្ធសាស្ត្រ កម្មវិធីអភិវឌ្ឍន៍វិស័យសម្រាប់អន្តរកម្មថាមពល នឹង​គាំទ្រ​ការប្រែក្លាយចក្ខុវិស័យរបស់រាជរដ្ឋាភិបាល ឱ្យទៅជាលទ្ធផលជាក់ស្តែង។ ការងារនេះ​រួម​បញ្ចូល​ទាំង​គោលដៅនៃការសម្រេចបាននូវថាមពលកកើតឡើងវិញចំនួន ៧0% ក្នុងល្បាយ​ថាមពល នៅត្រឹមឆ្នាំ ២០៣០ ជាមួយនឹងកា​រ​ប្តេជ្ញា​ចិត្ត​យ៉ាង​មុតមាំ​ក្នុង​ការ​ជំរុញ​ប្រសិទ្ធ​ភាព​ថាមពល​ប្រកប​ដោយតម្លៃសមរម្យ ដែលជាកត្តាចាំបាច់​ដើម្បី​ធានា​ថា​កំណើន​របស់​កម្ពុជា​នៅ​តែ​មាន​និរន្តរភាព។»កម្មវិធីដំណាក់កាលទីពីរនេះ នឹងត្រូវបន្តដោយដំណាក់កាលទីបីទៀតនៅឆ្នាំ ២០២៧ ដែល​នឹង​ធ្វើ​ឱ្យ​កំណែទម្រង់កាន់តែស៊ីជម្រៅបន្ថែមទៀត តាមរយៈកា​រ​ពង្រី​ក​ក្រប​ខ័ណ្ឌ​បទ​ប្បញ្ញត្តិ​ប្រសិទ្ធ​ភាព​ថាមពល និងការបង្កើតស្តង់ដារបច្ចេកទេសសម្រាប់ថាមពលកកើតឡើងវិញសម្រាប់ អគារ និង​ឧស្សាហកម្ម ដើម្បីទាក់ទាញការវិនិយោគពីវិស័យឯកជនបន្ថែមទៀត៕ 

រាជរដ្ឋាភិបាល ប្រកាសប្រើប្រាស់ថ្នាលគាំពារសង្គមឌីជីថល ដើម្បីផ្តល់​សេវាកាន់តែ​ងាយ​ស្រួល​ជូន​ពលរដ្ឋ

2025/10/06 03:41:16 pm        240
Facebook Telegram Linkin
នៅថ្ងៃទី៦ ខែតុលានេះ ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី​​ក្រសួងសេដ្ឋកិច្ច និងហិរញ្ញវត្ថុ បានប្រកាសដាក់ឲ្យដំណើរការ ថ្នាលគាំពារ​សង្គម​ឌីជីថល​ក​ម្ពុជា DSPP ហើយតាមរយៈការប្រព័ន្ធនេះនឹងបង្កើនប្រសិទ្ធភាពការគ្រប់គ្រង ការ​ផ្តល់​សេវា​គាំ​ពារ​សង្គម ​និងការផ្តល់អត្ថប្រយោជន៍ ការបើក​ឧបត្ថម្ភ​សាច់​ប្រាក់​ជូនពលរដ្ឋ​កាន់​តែ​មាន​ភាព​ងាយ​ស្រួល​ជាង​មុន​។ឯកឧត្តម ឧបនាយករដ្ឋមន្ត្រី អូន ព័ន្ធមុនីរ័ត្ន ក្នុងនាម ប្រធានក្រុមប្រឹក្សាជាតិគាំពារសង្គម បាន​ថ្លែង​ថា ​ការធ្វើទំនើបកម្ម ថ្នាលគាំពារសង្គមឌីជីថលកម្ពុជា DSPP ជំនាន់២.០ ដែលមិន​ធ្លាប់​មាន​ពីមុន​មក​នេះ នឹងរួមចំណែកការសម្រេចបាននូវថ្នាលរដ្ឋាភិបាលឌីជីថល ជាពិសេសការ​បង្កើន​ប្រសិទ្ធ​ភាព​ការផ្តល់សេវាគាំពារសង្គមសំដៅកាត់បន្ថយជាអតិបរមានូវប្រតិបត្តិការចុះបញ្ជី និង​បើក​ផ្តល់​អត្ថ​ប្រយោជន៍​ដោយស្ទួន ដែលឆ្លើយតបទាន់ពេល​ការ​ជួយ​គ្រោះ​អាសន្ន​ជូន​ដល់​ពលរដ្ឋ​។ក្នុងឱកាសនេះឯកឧត្តម ឧបនាយករដ្ឋមន្ត្រី បានណែនាំដល់គ្រប់ភាគីពាក់ព័ន្ធនានា រៀបចំ​ទស្សនា​ទាន​រួមដើម្បីពង្រឹងការរៀបចំបើកកញ្ចប់អត្ថប្រយោជន៍ តាមថ្នាលគាំពារ​សង្គម​ឌីជីថល​នេះ​ឲ្យ​មាន​ប្រសិទ្ធភាព និងងាយស្រួលជូនពលរដ្ឋដែលជាអ្នកទទួលផល និងធនាសន្តិសុខ ទិន្នន័យ​ឯក​ជនភាពឲ្យបានត្រឹមត្រូវជាដើម។ឯកឧត្តម ចន ណារិទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការ​ក្រុម​ប្រឹក្សា​ជាតិ​គាំពារសង្គម បានបញ្ជាក់បន្ថែមថា ថ្នាលគាំពារសង្គមឌីជីថលកម្ពុជា ក្នុងអំឡុង​ពេ​ល​នេះ ​គឺបាននិងកំពុងដាក់ដំណើរការនៅតាមឃុំសង្កាត់ចំនួន៤ ហើយនៅពេលដ៏ខ្លីនេះ ថ្នាល​គាំ​ពារ​សង្គម​ឌីជីថល នឹងដាក់ដំណើរប្រើប្រាស់តាម នៅទូទាំងប្រទេស ដើម្បីផ្តល់​ភាព​កាន់​តែ​ងាយ​ស្រួល​ជូន​ពលរដ្ឋដែលជាអ្នកទទួលផល។សូមបញ្ជាក់ថា បច្ចុប្បន្ននៅទូទាំប្រទេស មានពលរដ្ឋ ដែលស្ថិតនៅក្នុងប្រព័ន្ធគាំពារសង្គម រួម​មាន​ ​ពលរដ្ឋស្ថិតក្នុងគ្រួសារក្រីក្រមានប្រមាណជាង២លាននាក់ ពលរដ្ឋ​ស្ថិត​ក្នុង​គ្រួសារ​ងាយ​រង​ហានីភ័យ មានប្រមាណ១លាន៨សែននាក់ ពលរដ្ឋជាសមាជិក ប.ស.ស មានប្រមាណ​ជាង​២​លាន​នាក់ ហើយពលរដ្ឋទាំងអស់នេះ គឺត្រូវបានចុះបញ្ជី កំណត់ទិន្នន័យ​នៅ​ក្នុង​ថ្នាល​គាំពារ​សង្គម​ឌីជីថល​កម្ពុជា​ទាំងអស់៕ អត្ថបទ៖ ស៊ុម សុខជា

កម្ពុជានឹងរៀបចំប្រព័ន្ធអេកូឡូស៊ីឌីជីថល គ្រប់គ្រងគម្រោងវិនិយោគសាធារណៈ ដើម្បីធានា​ប្រសិទ្ធភាព វិស័យពាក់ព័ន្ធ

2025/10/06 11:10:16 am        197
Facebook Telegram Linkin
អគ្គនាយកដ្ឋានជំនាញនៃក្រសួងសេដ្ឋកិច្ច និងហិរញ្ញវត្ថុ គ្រោងនឹងរៀបចំប្រព័ន្ធអេកូឡូស៊ីឌីជីថល លើ​ការគ្រប់គ្រងគម្រោងវិនិយោគសាធារណៈ សំដៅធានាប្រសិទ្ធភាព តម្លាភាព និងចីរភាព ដើម្បី​រួម​ចំណែក​ដល់​ការ​អភិវឌ្ឍសេដ្ឋកិច្ច និងសមធម៌សង្គម ក្នុងព្រះរាជាណាចក្រកម្ពុជា។ជុំវិញគម្រោងវិនិយោគសារធារណៈ, រាជរដ្ឋាភិបាលមានចក្ខុវិស័យ បង្កើតឱ្យ​បាន​នូវ​ប្រព័ន្ធ​គ្រប់​គ្រង​ការ​វិនិយោគសាធារណៈរួម មួយរបស់ជាតិ ដែលធានាបាននូវភាពឆ្លើយតប ប្រសិទ្ធភាព ស័ក្តិ​សិទ្ធ​ភាព តម្លាភាព គណនេយ្យភាព និងចីរភាពនៃការបែងចែក និង ការប្រើប្រាស់​ធន​ធាន​សាធារណៈ ស្របតាមឧត្តមានុវត្តន៍ជាអន្តរជាតិ និងបរិការណ៍ជាក់ស្តែងរបស់កម្ពុជា សំដៅ​ចូលរួម​ចំណែក​ដល់​ការអភិវឌ្ឍសេដ្ឋកិច្ច និងសមធម៌សង្គម ក្នុងព្រះរាជាណាចក្រកម្ពុជា។លោក អៀច សេដ្ឋា អគ្គនាយករងនៃអគ្គនាយកដ្ឋានសេដ្ឋកិច្ចឌីជីថល ក្រសួងសេដ្ឋកិច្ច និង​ហិរញ្ញ​វត្ថុ​លើកឡើងថា អគ្គនាយក ដ្ឋានសេដ្ឋកិច្ចឌីជីថល ត្រូវបានបង្កើតឡើងក្នុងកំឡុងឆ្នាំ២០២៣ គឺ​ជា​សេនា​ធិការរបស់ក្រសួងសេដ្ឋកិច្ច និងហិរញ្ញវត្ថុ ដើម្បីចូលរួមចំណែក ក្នុងការអភិវឌ្ឍ​សេដ្ឋកិច្ច​ឌីជីថល ​ក្នុងនោះអ្វីដែលការចាប់ផ្តើមដំបូងរបស់អគ្គនាយកដ្ឋាន គឺការអភិវឌ្ឍ​ប្រព័ន្ធ​វិក្ក័យ​បត្រក​ម្ពុជា និងមួយទៀត គឺបានអនុវត្តហេដ្ឋារចនាសម្ព័ន្ធគ្រឹះទិន្នន័យ ដែលបា​ន​ឆ្លើយ​តប​ទៅ​និ​ង​និន្នា​ការ​បរិបទ​នេះផងដែរ។ ចំណែកជំហ៊ានបន្ទាប់ អគ្គនាយកដ្ឋាន បាននិងកំពុងសម្របសម្រួល រៀប​ចំ​ប្រព័ន្ធ​អេកូឡូស៊ីឌីជីថល នៃការគ្រប់គ្រងគម្រោងវិនិយោគសាធារណៈ ឆ្លើយតប​ទៅ​និង​តម្រូ​វកា​រ​ជា​ក់ស្តែង ក្រៅពីនេះគឺការរៀបចំនូវគោលនយបាយ បទដ្ឋានគតិយុទ្ធ និងកិច្ច​សហ​ប្រតិបត្តិការ​នានា​ក្នុ​ងតំបន់ និងអន្តរជាតិផងដែរ។សូមបញ្ជាក់ថា ទាក់ទងគម្រោងវិនិយោគសាធារណៈនេះ នៅក្នុងឆ្នាំ២០២០, រាជ​រដ្ឋាភិបាល​បាន​ចេញ​អនុក្រិត្យ ស្តីពីការគ្រប់គ្រងការ វិនិយោគ ដោយអនុក្រិត្យ​នេះ​មាន​គោល​បំណង​ធានា​នូវ​ប្រសិទ្ធ​ភាព ស័ក្តសិទ្ធភាព តម្លាភាព គណនេយ្យភាព និងចីរភាពនៃការគ្រប់គ្រង គម្រោងវិ​និយោគ​សាធារណៈ នៅតាមដំណាក់កាលនៃវដ្តគម្រោងពីគ្រប់ប្រភពហិរញ្ញប្បទាន និងនៅ​គ្រប់​កម្រិត​រដ្ឋបាល សំដៅចូលរួម ចំណែកការអភិវឌ្ឍសេដ្ឋកិច្ច-សង្គម។ អនុក្រិត្យនេះ មាន​វិសា​លភាព​គ្រប​ដណ្តប់លើការគ្រប់គ្រងដូចជា៖ គម្រោងហិរញ្ញប្បទានដោយថវិកា ជាតិ, គម្រោង​ហិរញ្ញប្បទាន​ក្រៅ​ប្រទេស, គម្រោងវិនិយោគសាធារណៈ​តាម​យន្ត​ការ​ភាពជា​ដៃគូ​រវាងរដ្ឋ និង​ឯកជន, គម្រោងវិនិយោគ សាធារណៈដោយប្រភពហិរញ្ញប្បទានចម្រុះ, គម្រោងវិនិយោគ​សាធារណៈ​ហិរញ្ញប្បទាន ដោយការធ្វើឯកជនភាវូបនីយកម្មទ្រព្យសម្បត្តិរដ្ឋ, គម្រោង​វិនិយោគ​សាធារណៈ​ដោយ​សហគ្រាសសាធារណៈ គ្រឹះស្ថានសាធារណៈរដ្ឋបាល និងអង្គភាព​សាធារណៈ​ប្រហាក់​ប្រហែល​ដ៏ទៃទៀត, និងគម្រោងវិនិយោគសាធារណៈហិរញ្ញប្បទាន ដោយឥណទាន​ពាណិជ្ជក​ម្ម​៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

រដ្ឋធានីដែល្លីប្រទេសឥណ្ឌាងាកទៅរកការសាបព្រួសពពកបង្កើតជាភ្លៀង ដើម្បីទប់ស្កាត់កង្វក់បរិយាកាស
10/29/2025 08:10 PM
Facebook Telegram Linkin
កង្វះខាតប្រេងឥន្ធនៈ កំពុងយាយីដល់តំបន់កសិកម្មដ៏សំខាន់របស់ប្រទេសបូលីវី
10/29/2025 08:10 PM
Facebook Telegram Linkin
ក្រុមលើកលែងទោសព្រមានពីវិបត្តិកាន់តែជ្រៅនៅតង់ហ្សានី ខណៈក្រុមប្រឆាំងរាយការណ៍ពីការចាប់ពង្រត់
10/29/2025 08:10 PM
Facebook Telegram Linkin
បារាំង៖ បទឈប់បាញ់នៅហ្កាហ្សាស្ថិតក្រោមការគំរាមកំហែង ហើយត្រូវតែស្តាឡើងវិញ
10/29/2025 08:10 PM
Facebook Telegram Linkin
EU ជំរុញឲ្យគោរពបទឈប់បាញ់ នៅហ្កាហ្សា ខណៈមន្ត្រីរិះគន់ការវាយប្រហាររបស់អ៊ីស្រាអែល
10/29/2025 08:10 PM
Facebook Telegram Linkin
លោក Putin៖ រុស្សីបានសាកល្បងអាវុធបាញ់ក្រោមទឹកមានសមត្ថភាពបំពាក់នុយក្លេអ៊ែរ Poseidon
10/29/2025 08:10 PM
Facebook Telegram Linkin
លោក Trump បញ្ជាក់ថា សម្រេចបានកិច្ចព្រមព្រៀងពាណិជ្ជកម្មជាមួយកូរ៉េខាងត្បូង
10/29/2025 07:10 PM
Facebook Telegram Linkin
ប្រព័ន្ធអេកូឡូស៊ីធុរកិច្ចថ្មីឌីជីថលកម្ពុជា ចំនួន៤ នឹងចូលរួមក្នុងកម្មវិធី Silicon Valley Summit 2025 នៅ អាម៉េរិក
10/29/2025 07:10 PM
Facebook Telegram Linkin
រដ្ឋមន្ត្រីការពារជាតិអ៊ីស្រាអែល ព្រមានថា ថ្នាក់ដឹកនាំក្រុមហាម៉ាស នឹងមិនមានសិទ្ធិពិសេសទេ
10/29/2025 07:10 PM
Facebook Telegram Linkin
ប្រភព៖ ការចរចា រវាងអ៊ីស្រាអែល និងស៊ីរី កំពុងបន្តមាន
10/29/2025 06:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.